Kidung Kawitan Wargasari

1.
Purwakaning angrip tarum
Ning wana ukir
Kahadang labuh kartika
Panedengin sari
Angayon tangguli ketur
Angringring jangga mure.
2.
Sukania arja winangun
Winarna sari
Rumrumning puspa
Priaka ingoling tangi
Sampuning riris sumaura
Umungguh ring srengganing rejeng.
 Kidung Wargasari
Ida ratu saking luhur
Kaula nunas lugrane
Mangda sampun titiang tandruh
Mangayat Bhatara mangkin
Titiang ngaturang pejati
Banten suci muah daksina
Sami sampun puput
Pratekaning saji.
 Kidung Turun Tirta
1.
Turun tirta saking luhur
Pamangkune manyiratang
Mangulencok muncrat mumbul
Mapan tirta merta jati
Paican Bhatara sami
Panglukatan dasa mala
Sami pada lebur
Malane ring bhumi.
2.
Turun tirta saking luhur
Tirta panca dewatane
Wisnu tirta kamandalu
Hyang Iswara Sanjiwani
Maha Dewa Kundalini
Hyang Brahma tirta pawirta
Hyang Siwa pamuput
Amerta ki nardi.
3.
Maketis ping tiga sampun
Pabakan Siwa Dwarane
Wang suhane raris inum
Ping tiga raris masugi
Ring waktra magentos genti
Toya amerta Hyang Bhatara
Sami sampun puput
Mengalangin hati.