BAHAN SERMON HKBP RESSORT SIPIROK (KAMIS 30 JUNI 2022)

MINGGU VII DUNG TRINITATIS, 31 JULI 2022

HABISUHON NA SIAN GINJANG
(JAKOBUS 3 : 13 – 18)
I. PATUJOLO
Ditongos do surat ni si Jakobus on tu ruas ni huria na adong di parserahan. Molo di bona ni surat on didok do:
"Mandapothon na sampuludua manga, na di parserahan" martudutudu do i tu halak Kristen Jahudi naung marserak di
duru ni Palestina. Songon bangso na marserak, godang do diae nasida hamaolon. Dihasogohon jala dipaburuburu do
nasida alani haporseaon tu Tuhan Jesus. Alani marhite surat on diapoi jala ditogutogu do nasida asa naeng lam bagas
nian parbinotoan jala panandaion nasida taringot tu Kristus i. Asa marhite i boi jumpang nasida ojahan na togu laho:
mangadopi angka pangajarion na sala na boi mangharhari haporseaonnasida. Udut tusi, ditungkoli do nasida asa
tarhilas rohanasida jala pir tondinasida mangadopi haporsuhon dohot pangaleleon hinorhon ni haporseaonnasida tu
Tuhan Jesus i. Tarlumobi, diapoi do nasida asa pataridahon parange na denggan songon parbue ni haporseaonnasida
tu Tuhan Jesus. Naeng jumpang tiruan na denggan sipapataronnasida. Di pangaleleon na masa tu nasida hatihai, boi do
jumpang hamaolon laho mamaritahon taringot tu Kristus, alani tung mansai ringkot ma papataron nasida tiruan
marhite parange na denggan, na boi idaon ni saluhut halak. Asa marhite i boi lam torop jolma na olo mangihuthon
Jesus jala manghaporseai Ibana. Boi do tapatudos tu pandohan na tarsurat di buku 1 Petrus 3 : 1 “...gabe meut
rohanasida, binahen ni parange ni parompuan i, so pola mardongan hata." Naeng antusanta, gumogo do tiruan na
denggan sian godang hata laho paubahon roha ni dongan, jala tung marsahala situtu do hata na dipasahat mardongan
tiruan na denggan. Baliksa tahe hata nauli gabe sisoada jala marisuang do i molo ndang saurdot dohot tiruan nang
parange na denggan. Alani do umbahen na disosoi ruas ni huria i papatarhon tiruan marhite parange ni ngolu na
denggan.

II. HATORANGAN
Molo tajaha 5 bindu surat Jakobus on tung godang do ondolan taringot tu parange na denggan na ingkon patar di
ngolu ni angka na porsea, songon parbue ni haporseaon. Ai mardongan ulaon na denggan do haporseaon na mangolu.
Gariada tahe didok do; '"Haporseaon i pe songon i do: Anggo so adong pangulaonna, naung mate do hadirionna"(2:17)
Alani do umbahen na diapoi nasida asa manghangoluhon haporseaon marhite parange na denggan, ido dalan
papatarhon haporseaon na sintong jala na polin. Adong do na patut tapamanat sian ayat 1 on ima hata "unang deak
hamu gabe guru." Adong do penafsir na mangalapati hata on ndang holan martudutudu tu guru ima angka pangajari
taringot tu hata ni Tuhan. Hata on tarlumobi martudutudu tu angka jolma na pajongjong dohot manimbangi dirina
patut jala tama gabe guru, alai ulaonna ndang tartuju laho mangajarhon hata ni Tuhan i alai godangan do mangalehon
kritik, pinsangpinsang dohot pasingothon taringot tu angka na hurang dohot angka na sala.
Ai molo tu angka guru na denggan, nda tung dipasahat oraora gabe guru jala dipasingothon tu nasida: "Ai taboto
do, dumokdok do uhum sijaloonta" (3:1). Alai dipasahat do hata on tu angka na manghilalahon dirina tama manang na
patamatamahon dirina gabe guru alai ulaonna tartuju holan laho pasahat pinsangpinsang dohot panguhumion
sambing. Jala laos tarlumobi tu nasida do dipasahat hata on: "Ise hamu na bisuk jala na pantas marroha?"
Tutu sada ulaon na sangap do na gabe guru. Diida do nasida songon sahalak na pistar jala na marbisuk. Ai songon
umpasa Batak i do na mandok: "Na bisuk nampuna hata, na oto tu panggadisan," sipatujoloon do nasida jala
sitangihononhon do hata ni halak na bisuk ala dihirim arga do hata na pinasahat nasida i. Marhite habisuhonna
dihirim do angka guru boi mangalehon pangajaran, mangalehon panuturion dohot pingkiran nang panimbangion na
sintong tu angka ruas mangadopi ragam ni angka na masa di ngolu nasida.
Alani marhite turpuk on ditogihon do saluhut ruas ni huria (nang angka guru pe) asa marmanat marnida hadirion
ni sahalak na manggoarhon dirina gabe guru. Ndang holan hapistaran alai tarlumobi habisuhon dohot hapantason ni
roha, ido na ringkot asa tau jala tama sasahalak jongjong jala dipatujolo gabe sahalak guru. Sasingtongna hatihai
dihirim do boi jongjong sahalak guru na marhabisuhon na patut sipatujoloon laho mangajari jala maniroi huhut
manogunogu bangso dohot ruas ni huria na tongon mangadopi godang angka hamaolon ni ngolu. Udut tusi, ndada
holan laho mangajari, dihirim do nang guru i boi gabe uluan di tongatonga nasida, na manguluhon ruas ni huria di
parserahan i marhite hapistaran dohot habisuhon nasida. Alai marhite hatorangan na mangudut di turpuk on
ditogihon do ruas ni huria na gabe hasahatan ni surat on nang hita pe laho mangantusi ia halak na bisuk patar do i
marhite parange dohot ulaonna.

III. PANIMPULI
Tangkas do dipatorang panurat Jakobus on parsagi ni halak na mangolu di bagasan habisuhon na sasintongna
dohot halak na so sintong habisuhonna, ima:
 Habisuhon na sian ginjang, ima habisuhon na sian Tuhan. Jolma na manjalo habisuhon na sian Tuhan i
marhapataran do i marhite: parange ni ngolu na dibagasan halambohon, bontor ima panaglaho na so marlaok
alai polin mangulahon angka ulaon, olo mardame, pangoloi di hata ni Debata, gok asi ni roha, dao sian
hangangguon nang pangansion.
 Habisuhon na sian tano, sian roha ni jolma, sian sibolis. Jolma na mangasahon habisuhon sian portibion
marhapataran do i marhite: pangiburuon, hatongkaron, ginjang ni roha, mangulahon hajahaton, margabus.
Hasesega do di ngolu ni na mangulahonsa nang di ngolu ni dongan jolma molo marojahan tu bisuk ni sibolis. Alani
disosoi panurat Jakobus on do sude ruas ni huria, angka guru, nang hita pe saluhutna asa mangolu jala marparange
dibagasan habisuhon na sian ginjang i, asa jumpang las ni roha dohot dame ditonga di ngolunta nang di tongatonga
parsaoranta. Amen
 BAHAN SERMON HKBP RESSORT SIPIROK (KAMIS, 30 JUNI 2022)
MINGGU IV DUNG TRINITATIS, 10 JULI 2022
EV.: 5 MUSA 30:11-14 “MAMARITAHON HUHUT MANGULAHON HATA NI DEBATA”
I. Patujolo
Di buku 5 Musa on dipatuduhon do songon dia Debata naung mamboan bangso i haruar sian tano Misir tu tano
Kanaan, tano naung binagabagahon ni Debata tu ompu nasida si Abraham. Dipatudos Debata tu sahalak Raja na gogo
situtu mamboan haruar sian parhatobanan dohot manguluhon nasida di pardalanan i. Asa saut saluhut nanidok ni
Debata tu bangso i, dijou Debata ma si Musa gabe partogi di bangso i. Alani i tung marsitutu do si Musa laho
pasahathon tona i tu nasida. Dipelehon si Musa do sandok ngoluna gabe partogi ni bangso i hombar tu panjouon
naung sahat tu ibana. Dielek, dianju bangso i (5 Musa 29:2-15), dipaingot (5 Musa 29 :16-28), jala didasdasi (5 Musa
30:1-14). Ditogihon nasida mamillit hangoluan unang hamatean, pasupasu do unang burabura. Tontu molo hangoluan
dohot pasupasu do pillitonnasida naeng ma tangkas nasida marsitutu manghaporseai Debata. Alai molo hamagoan
dohot bura do pillitonasida nunga marisuang panobusion ni Debata tu nasida. Ndang pola ringkot marsomba tu
Debata, dituntun ma lomona. Ido umbahen didok di ayat 11: "Ai patikon, nahutonahon i tu ho sadarion, ndang
masongkalhu di ho, manang maholangku." Ditogihon si Musa nasida asa mulak marsomba tu Debata. Mansai tegas do
si Musa laho pasahathon tona i tu bangso i naginoaranna si jogal rungkung. Atik pe sipata nasida ndang parduli, ndang
olo manangihon tona ni Debata napinasahat ni si Musa. Gariada tahe mangalaosi do nasida tongtong saleleng di
pardalanan i. Di pardalanan nasida maninggalhon tano Misir tangkas do dipaingot si Musa bangso i asa tongtong
marningot hata ni Debata. Marhite angka natoras mangajari ianakhonna manghabiari Debata.Mangajarhon,
manaringoti, mangarahuthon dohot manurathonsa (5 Musa 6:7-9). Antong dia do patik nanidokna naung sahat tu
bangso i? Ima patik nasampulu ina nidokna di 2 Musa 20:1-17. Sintuhu ni patik i ima asa tongtong nasida marhabiaran
tu Debata. Ingkon haholongan nasida Tuhan Debata sian nasa roha, ateate dohot sian nasa gogo (5 Musa 6:5).
Ndang dao patik i alai nunga dipasahat Debata tu nasida di Dolok Sinai. Asa ndada sipaimaon be nunga rade holan
mangulahonnama nasida. Jadi molo didok nasida: "Ise ulaning singkatnami manaek tu banua ginjang, asa mangalapsa
di hami dohot patubegehonsa tu hami, asa ulahononnami nian? (ay.12-13). Ndang tingkos i, sidalian do i. Unang ma
nian marsidalian nasida laho mangulahonsa. Boasa be dohonon nasida songon i, sai hira na dao patik i di banua
ginjang hape nunga di tongatonganasida. Nunga dipasahat si Musa hian uju rap nasida di pardalanan i. Unang olo
marsomba tu ganaganaan ima debata ni halak Misir manang debata sileban .Ido patik nanidokna. Alani i molo
ditaringoti pe di buku 5 Musa on taringot tu angka uhum dohot patik ndada na gabe “patik naimbaru manang patik
paduahon” mangimbangi patik naung hea jinalo nasida di pardalanan di Dolok Sinai. Holan na porlu di bangso i ima
pangaratarataion do. Unang lupa nasida nuaeng nang dung sahat tu tano bagabagai. Songon bangso napinalua ni
Debata tontu ingkon mangolu nasida di bagasan hasatiaon dohot tu angka aturan naung pinasahat ni Debata. Sude
angka aturan i nanaeng mamboan nasida asa satia manghaholongi Debata. Tutu marragam angka aturan na adong di
nasida songon napinaboa di buku 3 Musa i. Adong do i angka ruhut parugamaon, ruhut hamalimon, pelean, ari raya
saleleng mamolus halongonan i. Laos adong do i dohot patik na ingkon tongtong ulahonon nasida dung sahat nasida tu
tano bagabagai. Alai sasude ruhutruhut i ingkon marhaojahan tu holong ni roha tu Debata dohot tu dongan jolma. Ima
tandana paboa naung pinalua ni Debata nasida sian parhatobanan jala pataruonna tu tano bagabaga i. Unang
marisuang panobusion ni Debata tu nasida, gariada ingkon tongtong parhatopoton nasida do tangan ni Debata
marorot nasida.

II. Hatorangan
(a). Marhite turpuk on naeng dipangido hasatiaonta tu Patik ni Debata. Nian maol do mangulahon i alai ingkon do
radotanta doi. Borat do molo so tangkas dihangoluhon manang diparateatehon, apalagi ma molo dihalanggushon.
Gabe sisoada do panindangion sisongon i. Ala ni i naeng ma ingkon satia hita tu Debata. Porlu parsitutuon, unang
dangoldangol sisilon, (suamsuam kuku) manghaporseai Debata. Alai ingkon nasa roha dohot gogo do. Memang molo
so talehon rohanta dohot pingkiranta laho mangulahon tona i, ndang saut tu na pinangido ni Debata. Alai molo satia
hita di tona ni Debata i sintong ma mardalan di aturan dohot uhum ni Debata. Unang ma nian mangose padan naung
taunduk di adopan ni Debata.
(b). On ma na pinangido ni Debata tu hita di tingki on, ingkon tongtong ma tarida parsitutuonta manghaporseai Debata
sian nasa gogo, roha dohot ateate. Unang ma pamurahu hita di elaela ni portibion gabe so taingot Tuhanta i. Unang ma
gabe saor haporseaonta tu naasing. Alai ingkon polin, hot jala togu laos marparbue di bagasan ngolu siganup ari. Ido
goaron siihuthon Kristus.
(c). Sian sejarah ni parngoluonta tangkas do taparhatopot, nunga dipalua Debata hita sian rante ni sibolis dohot sian
haholomon tu hatiuron, nda ongkuhononta do i holong dohot asi ni roha ni Debata? Jesus do haluaon di hita, partogi
na mamboan hita haruar sian haholomon dohot parsorion i. Alai tanda naung dipalua Debata hita, naeng do tangkas
patuduhononta parsitutuonta laho manghaporseai Ibana. Manghaholongi Debata. Ido nanidok ni Jesus di evanggelium
Mateus i. Sihaholonganmu do Tuhan Debatam sian nasa roham dohot sian nasa ateatem , sian nasa hosam dohot sian
nasa roham. Sihaholonganmu do donganmi doshon dirim (Mat. 22:37-39) suang songon i ma nang manghaholongi
musu (Mat. 5:43-44).

II. Siparhusorhusoran
Alani i ampit do topik i jamita on tu Minggu IV dung Trinitatis sadarion Mamaritahon huhut Mangulahon hata ni
Debata. Songon parbue ni haporseaon tu Debata. Ido nahinalashon dohot nihamauliatehon ni aposel Paulus tu huria
Kolose di turpuk epistelta i. Ala tarida parbue ni haporseaon dohot panandaon huria Kolose tu Tuhan Jesus Kristus
(Kolose 1:1-14). Nang hita pe angka ruas ni huria naeng ma tabaritahon jala taulahon hata ni Debata naung sahat tu
hita. Ima barita hatuaon dohot haluaonta sian Debata marhite Jesus Kristus dohot Tondi Porbadia. Amen.