HURIA KRISTEN BATAK PROTESTAN (HKBP)

BORNEO RESSORT BANJARMASIN

Jl. Bandarmasih Komp. DPR Gg. IV No. 6, RT.036/RW.003
Belitung Selatan - Banjarmasin, Kalimantan Selatan
Pimpinan Jemaat : Pdt. Apriando J. Rajagukguk (0821-4808-9192)
No. Rek. HKBP Borneo : 00010-01-50-042749-2 (Bank Tabungan Negara)
No. Rek. HKBP Borneo Pembangunan : 00010-01-54.000709-0 (Bank Tabungan Negara)

Bahan Sermon Parhalado Jumat, 24 Pebruari 2023

“Mangolu di bagasan asi ni roha”

Rom 5, 12-17

Dipasahat si Paulus turpuk on, laho mangalo poda ni Jahudi, na sai

marjogal mandok, ndang ringkot nasida manjalo hasesaan ni dosa, ala
ndang mardosa nasida hinorhon ni na mangulahon patik, dohot mangulahon
patik do malua jolma sian dosana, marhite na mangulahon patik do tigor
jolma di jolo ni Debata. Dipatorang si Paulus di turpuk on, songon naung
pinatorangna tu huria Korint, "Ai songon marhite sian sada jolma songgop
hamatean, songon i do marhite sian sada Jolma haheheon ni angka naung
mate. Ai songon na di bagasan Adam saluhut mate, songon i di bagasan
Kristus sude dipangolu", 1 Kor.15, 21-22. Ala ni si Adam luhut jolma
mardosa, jala ala ni Kristus malua sude jolma, marhite haporseaonna.
Andorang mardosa si Adam ndang adong dope patik, dung pe di tingki ni si
Musa, alai nang pe naung adong patik, lam mangimbukbuk do dosa, alani
ndang margogo patik mamboan jolma tu haluaon. Domu tusi ma didok si
Paulus di turpuk dohot di jamita on, "Mangolu di bagasan asi ni roha do hita",
ndang alani pambahenanta.

1. Luhut do jolma mardosa ala ni si Adam.

Mangihuthon Jahudi, ndang mardosa nasida ala patik dohot ala bangso na
pinillit ni Jahowa nasida. Alani ma didok si Paulus di turpuk on, " Dibahen i,
songon na bongot dosa i tu portibi on marhite sian sada halak jala
marhitehite dosa I ro hamatean, songon i sahat hamatean i tu saluhut jolma,
ala sude nasida mardosa. Ai nunga di portibi on hian do dosa, nang
andorang so ro dope patik i; alai ndang dijujur dosa, ia so adong patik, Alai
nunga manggomgomi hamatean i olat ni si Adam sahat ro di si Musa, nang
so dos pardosaonnasida tu pangalaosion ni si Adam, sumansuman ni na
naeng ro i", ay. 12-14. Andorang so adong dope patik, nunga mangimbukbuk
1
dosa ni jolma. Ndang gabe lias halak Jahudi sian dosa ala mar-patik, ndang
gabe so mardosa nasida ala bangso na pinillit ni Debata. Didok si Paulus tu
huria Rom, ala ni dosa, ala pangalaosion ni si Adam, nunga luhut jolma
madabu tu toru ni huaso ni dosa. Dipatorang si Paulus, ala si Adam
perwakilan ni luhut jolma, sahalak sian sandok jolma, sude do jolma
mardosa. Na tinean ni luhut jolma sian si Adam i ma kecenderungan, talpe
mardosa. Nunga disuan sibolis i boni ni dosa di rohani si Adam, jala nunga
sai tubu, marparbuehon dosa boni i sahat tu tingki on di roha ni jolma. Ala
nunga digohi pangaloon roha ni si Adam, diula pangalaosion, nunga
dipatunduk dosa i rohana, ndang holan ibana, sude na tubu sian ibana nunga
dipatunduk dosa. Ndang adong dope patik sahat tu tingki ni si Musa. la so
adong dope patik uju i, sasintongna ndang adong dope pangalaosion di
patik, jala ndang mate nian jolma. Hape mardosa do nasida jala mate. Mate
nasida ala mardosa, nang pe ndang adong dope patik dilaosi nasida uju i.
Marhite i dipatorang si Paulus, sude do jolma mardosa ala
hasadaonna dohot si Adam. Ala dosa ni si Adam, gabe tunduk tu hamatean
luhut jolma. Di bindu 3 pe nunga tangkas didok si Paulus, "Ai ndang adong
imbar ni i tung saluhut do nasida mardosa jala ndang dapot pujion ni Debata
nasida", ay.23. Na nidokna, sude do jolma mardosa, dohot do disi Jahudi.
Nang pe na pinillit ni Debata nasida, dohot do nasida mardosa. Ndang adong
na singkop di jolo ni Debata. Ala sude do jolma mardosa, dohot Jahudi,
ndang adong jolma na boi patimbohon dirina di jolo ni Debata. Ala sude do
jolma mardosa di jolo ni Tuhan i, ingkon sude patutoruhon diri di jolo ni
Tuhan i laho manjalo hasesaan ni dosa. Mangihuthon pamingkirion ni halak
Jahudi, ala bangso na pinillit ni Debata nasida, ndang ringkot nasida manjalo
hasesaan ni dosa. Mangihuthon nasida, ala pamilliton i dohot sandirina
paluaon ni Debata do nasida. Ndang diantusi nasida, pamilliton ni Debata di
nasida mangigil haunduhon dohot parange na hombar tu lomo ni roha ni
Debata.
Marhite turpuk on dipinsang si Paulus halak Jahudi na mangasangkon
hasurunganna songon bangso na pinillit ni Debata. Dipangke hasurungan,
hajongjongan "bangso na pinillit" i patimbo diri maradophon bangso na asing.
Ala dosa na manginsombut di ngolu ni jolma, ndang adong be
sipangasahonon. Dipangasahon bangso Israel hadirionna songon bangso na
pinillit ni Debata, hape parangena ndang hombar tu lomo ni roha ni Debata.
Hajongjongan nasida bangso na pinillit dipangke tu ginjang ni roha na patubu
parbolatan dohot mambahen parholangan di parsaoran. Sasintongna dijou,

2
dipapulik Debata bangso Israel asa unduk do nasida tu Debata. Panjouon i
mangigil haimbaruon ni roha dohot ngolu.
Asa malua jolma sian dosa, ingkon porsea di Tuhan i. Porsea di
Tuhan i, lapatanna rade manjou goar ni Tuhan i, songon na nidok ni goar ni
minggu on, Invokavit, Jouonna ma Ahu, dung i alusanku ma ibana, Ps.91,
15a. Bagabaga ni Debata do i tu par-Psalm i, taringot tu haradeonNa
mangalusi angka na manjou goarNa. Marhite goar ni minggu on dipapatar tu
hita sai na alusan ni Debata do na mangido pangurupionNa. Mangihuthon
Psalm 91,15a, panguhalan ni goar Invokavit, na porsea i do na joujou tu
Debata, dung I alusan ni Tuhan i ma na joujou i.

2. Alani Jesus do malua hita sian uhum dosa.

Laho mangalo poda ni Jahudi na mandok, marhite na mangulahon patik do
boi tigor sada halak di jolo ni Tuhan i, dipatorang si Paulus di turpuk on: Ala
ni sahalak, si Adam, mardosa luhut jolma, alani sahalak, Jesus Kristus,
malua jolma sian dosana. Ala ndang margogo be jolma paluahon dirina
umbahen ro Tuhan Jesus paluahon jolma i. Ala ndang margogo patik
paluahon jolma sian dosana, alani ro Tuhan Jesus mamboan haluaon.
Diseahon Jesus hosaNa asa malua sian dosa. Songon si Adam na
mambahen luhut jolma mardosa, songon i ma Jesus Kristus mamboan jolma
tu haluaon. Ala dosa ni si Adam, luhut jolma mangae hamatean, alani Jesus
nunga talu hamatean, nunga dipatunduk huaso ni sibolis. Gabe luhut jolma
mardosa ala ni si Adam jala madabu tu huaso ni hamatean; alai marhite
Jesus Kristus, luhut jolma dipalua sian dosa jala dipalua sian huaso ni
hamatean, jala dipaunsat tu hangoluan. Nang pe lam mangimbukbuk dosa
alani patik, alai dipalua holong ni Kristus do jolma sian uhum ala
pangalaosion di patik ni Debata. Dipatorang si Paulus, nunga tarihot jala
tunduk jolma tu huaso ni dosa, jala ndang adong be sihirimonna na boi
paluahon dirina sian i; disi ma ro Jesus Kristus manostosi jala mangarapui
ihotihot ni dosa dohot hamatean. Marhite hamonangan ni Kristus
maradophon hamatean, dilehon panghirimon na imbaru, dipaunsat jolma i tu
hangoluan. Ro Jesus paluahon jolma sian dosana. Malua jolma sian huaso ni
dosa dohot hamatean molo porsea di Jesus Sipalua i.
Di bungku 1500 Ceritera Bermakna dibaritahon, adong sada missionar di
Afrika. Di sada botari marmeammeam anakna si Philips di porlak di pudi ni
bagas ni jabu ni missionar i. Di tingki jongjong missionar i di teras na
mandompakhon porlak i di bereng missionar i jongjong si Philips di toru ni
sada hau na balga, jala di dangka ni hau i mangarpe sada ulok na balga na
3
naeng mamargut si Philips. Ala bahaya na mengancam anakna i didok
missionar i gogo, "Philips ! Tiarap". Tiarap si Philips, ndang disungkun:
Boasa?, Dung tiarap ibana didok missionar i, "Cepat merangkak kemari
Dioloi si Philips hata ni Bapakna i, so pola disungkun, Boasa? Dung dibereng
si Philips tu pudi diida ma ulok naeng manurbing ibana sian dangka ni hau di
ginjang ni simajujungna. Aut sugari disungkun, "Boasa tiarap au?", turbingon
ni ulok i ma ibana. Ala dioloi parenta ni Bapakna so pola dikomentari, malua
ibana sian parmaraan. Tudos tusi do haporseaon i. Porsea lapatanna, unduk
ndang ganggu di Tuhan i. Haporseaon i papataron di haunduhon na bulus,
sian roha na ias, ndang mardua roha. Sikap ni halak Kristen tu Jesus ingkon
unduk, unang mardua roha manghaposi Ibana. Nioloan hataNa, i do tanda ni
haporseaon. Amen.