HURIA KRISTEN BATAK PROTESTAN (HKBP)

BORNEO RESSORT BANJARMASIN

Jl. Bandarmasih Komp. DPR Gg. IV No. 6, RT.036/RW.003
Belitung Selatan - Banjarmasin, Kalimantan Selatan
Pimpinan Jemaat : Pdt. Apriando J. Rajagukguk (0821-4808-9192)
No. Rek. HKBP Borneo : 00010-01-50-042749-2 (Bank Tabungan Negara)
No. Rek. HKBP Borneo Pembangunan : 00010-01-54.000709-0 (Bank Tabungan Negara)

Bahan Sermon Parhalado Jumat, 26 Mei 2023

DEBATA DO MANOMPA SALUHUTNA

(Mateus 11, 25-27)

Ingkon Tondi ni Debata do na mangula di ngolu ni jolma i, asa

tarbahen jolma i mangantusi hadirion ni Debata Ama dohot Anak i. I do
alana dipangke hata “siondihononhon” di turpuk jamita on, i ma Debata
Ama dohot Anak na mangondihon jolma i marhite TondiNa. Debata
Ama, Anak dohot Tondi Parbadia nuaeng dipatorang na so tarsirang.
Hadirion ni Ama dipapatar do i marhite hadirion ni Anak dohot Tondi
Parbadia, suang songon i do nang hadirion ni Anak i, dipapatar do i
marhite hadirion ni Debata Ama i. Alani i didok di turpuk on “Hupuji Ho,
Amang, Tuhan na manggomgomi banua ginjang dohot tano on….”
Paboahon na tangkas situtu do ditanda Anak i, i ma na Debata Ama i
do na marhuaso di banua ginjang dohot na di tano on. Jadi marhite
pandohan i songon panghatindanghonon do i, laho patangkashon na
holan Anak i do na tangkas mananda Debata Ama i. Naeng
dohononna ma “Ama i pe, ndang adong na mananda i, ia so holan
Anak i”.

1
 Hata “Hupuji Ho, Amang” na marlapatan do i dipuji Jesus do
Ama i siala ditamondinghon Debata hata i sian jolo ni angka na pistar
dohot na marroha, alai dipapatar do i tu angka siondihononhon. Jala
dihalomohon Ama i do saluhutna i dipasahat tu Anak i. Jesus Kristus
do Anak i, hapataran ni Debata Ama na mangarumari diriNa gabe
jolma. Tung tangkas hadirion ni Debata Ama, i ma na manompa, na
marhuaso jala na manggomgomi nasa na tarida dohot na so tarida,
sian mula ni mulana sahat ro di saleleng ni lelengna. Dipapatar Debata
Ama do diriNa marhitehite Jesus Kristus AnakNa na sasada i. Sipalua
hajolmaon, jala disahaphon Ibana do haluaon i marhite TondiNa, Tondi
Parbadia i, umbahen na dipatau hita mandok “Amang” tu Debata Ama
i. Marhite i ma tarida balga ni holong ni roha ni Debata Ama i, na
manarihon nasa na ringkot di ngolu ni hita jolma, marhite dalan na
niantusan ni jolma i. Hasitolusadaon ni Debata lam dipahot marhite
turpuk on, na naeng patangkashon na so tarsirang Debata Ama, Anak
dohot Tondi Parbadia sian ngolu ni hita jolma.

Jadi hadirion ni Debata Ama i do naeng tangkas tarida marhite

turpuk on. Jala laos diuduti do muse pangantusion i, tu na patoranghon
hasadaon ni Ama dohot Anak i. Huaso ni Debata Ama tangkas do
dipatorang di turpuk jamita on, di na didok ni Jesus, “Hupuji Ho Amang,
Tuhan na manggomgomi banua ginjang dohot tano on”. Jesus di
bagasan hadirionNa Anak ni Debata, mangokuhon Debata Ama na
marhuaso. Hata “Tuhan manggomgomi” gabe sada pandohan tu
2
Debata, na marlapatan Ibana do nampuna siala sian Ibana do
haroroan ni i saluhutna. Debata sitompa langit dohot tano dos do i
dohot pandohan Debata panggomgom banua ginjang dohot tano.

Na didokna di turpuk on “angka na pistar dohot angka na

marroha” (orang bijak dan pandai) ndang na martudutudu tu angka
halak na timbo parbinotoanna manang parsingkolaanna. Alai, dison
tangkas do naeng dohononna ia “angka na pistar dohot angka na
marroha” i martudutudu tu angka halak na marpangunsandean tu dirina
sandiri dohot tu pingkiranna sandiri. Baliksa, tu “siondihononhon”
(orang kecil) i ma angka halak na so marpangunsandean tu dirina
dohot tu pingkiranna. Boasa Jesus marlas ni roha jala mamuji Debata
Ama i? Alusna ala tu angka halak na “siondihononhon” (orang kecil) do
dipapatar Ibana diriNa jala ditamondingkon Ibana do diriNa tu angka
halak na pistar dohot angka na marroha na mangasahon dirina sandiri
dohot pingkiranna. Antong nuaeng pe, hita na porsea di Jesus, naeng
dohononta ma, parsidohot do hita dipangke Debata laho papatarhon
hadirion ni Debata di ngolunta siganup ari. Amen

3
4