Bahan sermon 12 nopember 2023 klasis lau baleng

Invocatio : Ranan mehuli desken tengguli, entebu nanamna, tama kejuah-juahen man kula (kua 16:24)

Ogen : 3 Johanes 1:1-4 (Tunggal)

Khotbah : Jeremia 17:14-18 (Tunggal)

Tema : Mejuah-juah ras Tuhan

KATA PERLEBE

Lit slogan nina” Kesehatan adalah harta yang paling berharga” slogan enda mpersingeti kita maka kerina ertata enda lalit ergana adi
ibandingken ras kesehaten. Engkai maka bage? Sebab adi lit pinakit bas jabu kai pe ertata labo siakap mberat ndayakenca gelah tercukupi
kerina biaya ertambar. Tapi rusur kel kita la sadar guna ngayaki erta maun-maun lanai siperdiateken kesehatenta, misalna sangana kita ncari
la siinget man, lanai si atur istirahatta. Arah minggu kesehaten enda iajari kita uga carata guna njgai kesehatenta.

PEBAGESI TEKS

Jeremia sekalak si alus kel penggejapenna, ia idilo Tuhan jadi nabi tupung nguda denga. Ibas pelayanen melala kel perbeben
siinanamina. Sebab ia sekalak nabi si idilo Tuhan ernubuat kerna ukumen si nangdangi seh man bangsana, si erbanca melala si ernembeh ate
man bana. Aminna pe nterem kalak si ernembeh ate man bana tapi tetap iberitakenna kata Tuhan e, sebab menurut penggejapen Jeremia kata
Tuhan bali ras api ibas pusuhna, la banci lang arus ipesehna man bangsana. La ia nggit jadi nabi palsu ngidah kerina kejahaten siibahan
bangsana, aminna pe erkiteken nubuatna e geluhna terancam. Ibas kitab Jeremia 17:14 “O Tuhan, pepalem min aku maka mejuah-juah aku,
pulahi min aku maka terkelin aku” Nabi Jeremia erlebuh mindo penampat man Tuhan gelahna Tuhan mpepalem ia, sebab Jeremia tek maka
Tuhan ngenca ngasup mpepalem ia ras si mereken keterkelinen man bana. Ayat 15 “nina kalak man bangku, ija dage ancamen si ibahan
Tuhan man banta e? suruhlah maka idalankenNa” Jeremia nggejapken pusuh si seh kel cedana erkiteken perbahanen ras sikap bangsa
Israel, emaka itungtungkenna kerina man Tuhan kerina ranan bangsa Israel man bana, si tempa-tempa la tek nangdangi kai si iberitaken
Jeremia. Ayat 16 Jeremia nuriken man Tuhan maka ia la pernah mindo gelah kiniseran terjadi ku bangsa Israel, dingen kai si inubuatkenna e
labo rekayasana tapi ei kerina tuhu reh ibas Tuhan nari. Ayat 17 mindo Jeremia aminna itulak bangsana pe ia, nembeh ate bangsana pe ia
tapi ola min jadi kearun man bana dingen erban ia putus asa. Sebab igejapna labolit si banci nampati ia dingen si mere perlindungen man
bana seekatan Tuhan ngenca. ibas ayat 18 Jeremia mindo gelah kerina kalak si ngayak-ngayak ia ipermelaken, dem alu kebiaren ras jumpa
cilaka. Adi siperdiateken Jeremia lit ibas situasi kekecewaan si mendalam sebab sedekah enda nggo ibelana bangsana mati-matian tapi
kiniulin ukurna la irespon bangsana mehuli.
Bahan Invocationta “ Ranan mehuli desken tengguli, entebu nanamna, tama kejuah-juahen man kula (kua 16:24)” kita kuan-kuanen enda
ngajarken kita maka ranan si mehuli si kita belasken banci jadi motivasi ras pasu-pasu man kalak si deban. Jadi ranan si belasken kita lit
kekuatenna si banci erbanca kalak si megisa semangat ras pusuh kalak si deban pe jadi tenang ras nyaman.

Ogenta 3 Johanes eme surat si itulisken sekalak pertua man Gayus, arah surat enda iturikenna man Gayus uga riahna ukurna erkiteken Gayus
nggeluh ibas kebujuren ras ia pe tetap ertoto gelah si mehuli jadi bas geluh Gayus ras erpengarapen ia maka Gayus tetap lit bas kejuah-
juahen erkiteken kegeluhen pertendinna si mehuli. Kesehaten kula la terlepas ibas situasi pertendinta, adi sekalak jelma si sangana melala
persoalenna maba bana turah pinakit ibas kulana. Misalna mesui takal, mesui beltek ras sakit sidebanna. Pernah ibaca kami artikel nina 70 %
penyakit disebabkan karena pikiran, 10 % keturunan dan 20% dari makanan. Penyebab terbesar penyakit bas kulanta eme pikirenta si la
sehat ntah pe si la mehuli.

PENGKENAINA

Temata mejuah-juah ras Tuhan, mereken pengangkan man banta adi rembak kita ras Tuhan kita tetap lit ibas kinijuah-juahen. Labo erkiteken
kita la jumpa tantangen ras persoalen, Jeremia melala tantangen si inanamina tapi tek ia Tuhan ngasup mpepalem ia dingen ngangkat kearun
atena. Bagepe kita aminna melala tantangen si kita hadapi tetap kita mejuah-juah sebab Tuhan ngajari kita uga harusna mengelola hati ras
pikiranta gelahna tetap kita sehat. Arah kita tetap memiliki hubungan ras Tuhan kita reh beluhna rukur, reh beluhna ncibalken ranan. Janah
ranan si kita belasken e tuhu-tuhu banci bagi tengguli entebu ras erguna man kula, gelah setiap ranan si kita belasken e nambahi semangat
ras kekuatan man kalak sideban. Sebab hati yang gembira adalah obat, tapi semangat yang patah keringkan tulang.