DAERAH VII P.JAWA, BALI & KALIMANTAN TATA IBADAH HARI KENAIKAN TUHAN YESUS Kamis, 18 Mei 2023
“Manghaporseai Jesus Naung Manaek Tu Banua Ginjang”
(Johannes 6:60-63) 1. Joujou tu Parmingguon : Hatorangan : (U : Uluan ; H : Huria) U : Shalom ma di hita saluhutna ruas ni huria! H : Shalom ma tutu dohot di hamu Pendeta dohot parhaladonami. U : Ari na mansai denggan dohot ari las ni roha situtu do ari sadari on do hita, di ari Parningotan Hananaek ni Tuhanta Jesus Kristus, ima na pasadahon hita dibagasan haporseaon laho mamuji Debata. H : Pinuji ma Debata na mangaramoti sude hita tinompaNa dipardalanan ni ngolunta, umbahen marhasonangan hita. U : Pinuji ma Tuhan Jesus Kristus naung pasadahon hita dohot Debata Ama marhitehite panobusionNa, di na tarsilangi Ibana laos mate, dungi hehe sian na mate jala manaek tu banua ginjang laho hundul di siamun ni Debata Ama laos paradehon inganan tu hita angka naung porsea di GoarNa na badia i. H : Sadarion ma hita marningot hananaek ni Tuhan Jesus, asa manghirim hita angka na porsea, di ragam ni pasupasu partondion silehonon ni Debata sian banua ginjang. U : Alani, tapahibul ma rohanta laho mamasuhi Parsombaon tu adopan ni Tuhan Debata. 2. Votum : U : Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na manompa langit dohot tano on, dipasaor ma dameNa tu tondimuna. Amen. Rap ma hita mandok di tangiangta I : H : Ale Jesus Tuhannami, bereng hami na dison : PinarmahanMi do hami saluhutna na dison; Sai asi rohaM di hami, sai pangolu hami on. Amen.
3. Marende :BE. No. 97:1-3 “Ingoton Ma Sadarion”
Ingoton ma sadarion Panaek ni Tuhan Jesus/Tu habangsaNa na tongtong Na so tarbaen be meret/Tasomba ma Tuhanta i Naung mulak tu Amana i Tapuji ma Ibana Ai nunga mungkap dalan i Di angka na porsea/Lao mamongoti Surgo i Malua sian jea Naung mangonai tu sasude Na mangulahon dosa i Pinuji ma Tuhanta Ianggo las roham tutu Di Jesus i Tuhanta/Pauba ma roham burju Ihuthon ma Ibana Oloi hataNa sasude Sai tiru pambaenanNa pe saleleng ho mangolu 4. Intoritus : Ayat + Tangiang U : Di Tuhan Debatanta I do hatuaon dohot hasangapon dohot hamuliaon dohot hagogoon. Sai baritahononku do sude angka baritaM di angka bahal, asa marolopolop au mida hatuaonMi. H : Nunga lonong angka parbegu tu bagasan godung na binahen nasida I, taralit do pat nasida tu jorgong na buni tinaon nasida i. sai pujionku do Jahowa sian nasa rohangku, pajojorongku do sude angka halongangan na binaenNa. U : Hatindanghononku ma pambahenanMu ro dihasusuda ni bohalhu, asa lam patar habalgaonMu di liat portibi on. Haleluya. Nunga didok Jahowa mandok Tuhanku ; hundul ma Ho tu siamunHon, paima hubahen angka musuM sidegedegean ni patMu. Tongosan ni Jahowa ma sian Sion tungkot harajaon ni huasoMi; antong mangarajai ma Ho di tongatonga ni musuM. H : PadirionKu ma tu na monang I hundulan di habangsangKu rap dohot Ahu, songon Ahu, dung monang, hundul rap dohot Damang di habangsaNa i. Sai patimbul ma diriM, ale Debata, tu atas ni langit hamuliaonMu tu sandok tano on. U : Disiamun ni Debata do Ibana, dung laho tu banua ginjang, gabe marunduk do tu Ibana angka surusuruan, angka gomgoman dohot angka hagogoon. Martangiang ma hita : Ale Tuhan Jesus Kristus Sipangolu hami ! Mauliate dohot pujipujian ma hupelehon hami tu Ho. nunga manaek Ho tu banua ginjang jala hundul di siamun ni Debata Ama, laho mangondihon hami. Sai pargogoi ma hami marhite TondiM I, asa monang hami maralohon sibolis dohot musunami na naeng manirang hami sian Ho. sai dongani jala urupi hami, asa margogo jala marhiras ni roha hami manghatindangkon Ho, asa lam rarat harajaonMu di sandok liat portibi on. Ho do Tuhan sipujion jala sipasangapon rap dohot Debata Ama dohot Tondi Parbadia ro di salelenglelengna. Didongani Tuhan Debata ma hamu saluhutna, Amen! Haleluya, Haleluya, Haleluya. H : (Mangendehon) Haleluya, Haleluya, Haleluya.
5. Manjaha Singkat Ni Patik
U : Tangihon hamu ma sikkat ni Tona / Patik ni Debata di parmingguonta sadari on ima sian Efesus 1 : 19 – 20 “Asa ditanda hamu nang hagogok ni gogoNa na sumurung I na tu hita, angka na porsea sian panghorhon ni hagogoonNa na marmulia i. ai di Kristus do I diulahon Debata, di na pinaheheNa I Ibana sian na mate jala pinahundulNa I tu siamunNa di bagasan banua ginjang i”. Rap ma hita mangido : H : Ale Tuhan Debata! Sai pargogoi ma hami mangulahon na hombar tu HataMi. Amen.
6. Marende : BE. No. 179:1-2 “Adong Sada Mual”
Adong do sada mual i, di na mardosa i Mansai denggan do mual i pasonang rohangki Aek mual na badia i, i ma di Jesus I (Ruas Jongjong) Disesa do tihasta i, dibuat arsak i 7. Panopotion ni Dosa dohot Bagabaga Hasesaan ni Dosa U : Di ari sadarion di jolo ni Debata, pargogo na so hatudosan jala nampuna ngolunta, dohot di jolo ni Jesus Kristus Anak ni Debata naung manghophop hita sian dosa, dohot dibagasan Tondi Parbadia na mangajari hita ganup tingki, mansai ringkot rimanganta pardalanan ni ngolunta. H : Ale Tuhan Debata, hurajumi hami do ndang adong sada ari pe di ngolunami nalias sian dosa, mardosa do hami dompak Ho marhite pangalaosionnami di hataM. Mardosa do hami tu pangisi ni bagas, ala mansai jotjot do hami tarrimas maradophon pangisi ni bagasnami. Mardosa do hami maradophon na humaliang hami ala maol hupatupa hami hadameon, mardosa do hami diulaonnami ala sipata ndang huhaholongi hami ulaonnami siganup ari. U : Ndang adong sada ari pe di ngolunami lias sian dosa. Dohot do hami pasombuhon angka ianakkonnami diboan arus zaman on. lupa do hami mangarahon nasida asa tongtong marsaor dohot Ho, ndang husangahon hami mangalompit tangan rap martangiang tu Ho molo jumpa jut roha dohot pingkirannami. Jotjot do hurang huhamauliatehon hami angka pasupasu na nilehonMi di rumatangganami. H : Ale Tuhan Jesus Kristus, Anak ni Natumimbul I, asi ma rohaM di hami jala sesa ma dosanami. U : Ndang adong sada ari pe di ngolunami na lias sian dosa. Huboto hami do angka ianakkonnami songon generasi penerus, alai jojtjot do tuminggil pinggolnami tumangihon pangidoan nasida ala tondi ni zaman on sian na manogihon nasida tumangihon hataM tu bagas joroM nabadia i. lemba do hami mamparrohahon pangalaho ni ianakkonnami, hape ulaonna nunga mambahen ramun pangalahona. Gabe madabu nasida tu pangalaho naso mamparsangapi angka natumua nang natorasna pe, madabu tu naso mangargahon hadirionna dohot ari pangapudianna ala pangoloionna tu panggora ni portibi on. H : Ala denggan ni basaMi, ro do hami tu Ho, o Jesushi. Parbadia i ma roha nami, na marpungu dison, patau ma hami ale Tuhan manudalhon saluhut dosanami.” U : Alai na maporus ma hami nuaeng tu asi ni rohaM na godang I mangido sian nasa rohanami hasesaan ni dosanami saluhutna. Sai urupi ma hami paubahon rohanami ala ni Tuhan Jesus Kristus, Anak haholongan ni rohaM, Sipangolu hami dohot ala ni GoarMu na badia i. ale Tuhan, sai asi ma rohaM di hami halak na dangol on. Amen. Tabege ma hata bagabaga ni Debata taringot hasesaan ni dosanta : Unang ho mabiar, ai Ahu do siluluhon ho; nunga pola Hujou goarmu, Ahu nampuna ho. Hasangapon ma di Debata na di ginjang H : Amen 8. Marende :BE. No. 183:1+3 “Na Jumpang Ahu” Na jumpang au na asi roha/Di au naung mago i hian/Tuhan Jesus parasi roha/Di au na lilu nahinan/Nuaeng hutanda Tuhanki/Parasi roha bolon i/Parasi roha bolon i On pe holan asi ni roha/Sipangasahononhon i Sipujionku do Jahowa/Dung ro na pamanathon i Unduk huhut las rohangki/Mamuji asiroha i/Mamuji asiroha i 9. Manjaha Epistel : Heber 12 : 1 – 6, 10. Koor : PNB 11. Marende :BE. No.99:4-5 “O Ulu Balang Na Gogo I” Sai taiti rohanami on Urupi hami on tongtong Mangalo dosanami Paias rohanami be Parangenami baen ture Nang panghataionnami Tompa roha Na imbaru asa haru monang hami Maralohon dosanami Pabulus langkanami be Patigor dalannami pe Lao tu banua ginjang (Ruas Jongjong) O Jesus tatap hami on Na so tarbaen di tano on Mardame manang sonang Sonang, monang Di lambungMu bahenonMu hami sogot Dung tu Surgo hami bongo 12. Manghatindangkon Hata Haporseaon 14. Koor : PPr HKI Pondok Gede 15. Marende : BE. No. 98 : 1 --- (Papungu Pelean I & II) Naung manaek do Ho Lao tu Surgo do Ale Jesus Rajanami, Ho do ihuthononnami/Ho partogi i Lao tu Surgo i Maol do dalan on Togu hami on Asa tung malua hami sian angka musunami/Na di tano on Togu hami on _______________Musik_________________ Suru ma TondiM singkat ni bohiM Tu bagasan rohanami Manogihon tondinami/Lao tu Surgo i Tu adopanMi . 16. Jamita : Johannes 6 : 60 – 63 17. Marende : BE. No. 100 : 3-4 “Mardongan Olopolop Manaek Tuhnta I Tatimbang ma lapangna Umbaen na songon i/Ai naeng ma dohot hita Tumopot Surgo i Antong taingot ma ianggo Tuhan Jesus/Ibana do patulus Nidok ni Debata Ditaon do hamatean Humophop hita on/Pature pardalanan Na sian tano on Manogu hita be Tu lambung ni AmaNa/Disi di adopanNa Naeng sahat sasude 18. Tangiang Pangondianon : 19. Marende : BE. No. 691:1-3 “Hupasahat Ma Tu Jesus” (PP III & IV) Hupasahat ma tu Jesus saluhutna ngolungki/Roha nang pambaenanku saluhutna tingkingki/Hupasahat ma tu Jesus saluhutna diringki Hupasahat ma tu Jesus saluhutna ngolungki Pangkeonku ma tanganku, mangula lomoNa i/Langka nang simanjojakku mangihuthon Tuhanki/Hupasahat ma tu Jesus saluhutna diringki Hupasahat ma tu Jesus saluhutna ngolungki Nang pamereng ni matangku, Mandompakkon Jesus i Soara ni pamanganku, mamuji goarNa i/Hupasahat ma tu Jesus saluhutna diringki Hupasahat ma tu Jesus saluhutna ngolungki 20. Tangiang Panutup Selamat Merayakan Hari Kenaikan Tuhan Yesus Kristus