NADOM GUSTI URANG

SADAYANA

Gusti urang sadayana

Kanjeng Nabi anu mulya
Muhammad jenenganana
Arab Kures nya bangsana
Ramana sayid Abdullah
Ibuna Siti Aminah
Dibabarkeunna di Mekah
Wengi senen taun gajah
Robiul awwal bulanna
Tanggal kadua welasna
April bulan masehina
Tanggal kaduapuluhna
Ari bilangan taunna
Lima ratus cariosna
Tujuh puluh panambahna
Sareng sahiji punjulna
Siti Aminah misaur
Waktos babarna kacatur
Ningal cahya mani ngempur
Dibumina hurung mancur
Babar taya kokotoran
Orok tos kenging nyepitan
Soca lir kenging nyipatan
Sarta harum seuseungitan
Medal Nabi ahir jaman
Pirang-pirang kaanehan
Sesembahan bangsa setan
Kabeh pada raruksakan
Nabi yuswa lima bulan
Geus tiasa angkat-angkatan
Yuswana salapan bulan
Geus capetang sasauran
Yuswana sapuluh bulan
tiasa ameng papanahan
Ngelehkeun budak nu lian
Tapi tara kumagungan

Parangina Kanjeng Nabi

Jatnika pinuh ku puji
Pinter tur gede kawani
Sabar nyaah ka sasami
Keur opat taun yuswana
Diberesihan manahna
Nabi dibeulah dadana
Malaikat nu meulahna
Jibril kadua rencangna
Mikail jenenganana
Ngeusikeun kana manahna
Elmu hikmah sapinuhna
Tuluy dada kanjeng Nabi
Gancang dirapetkeun deui
Sarta teu ngaraos nyeri
Dicap ku hotaminnabi
Harita Nabi ayana
Di lembur ibu inangna
Halimah jenenganana
Sadiah ngaran lemburna
Rama Nabi kacaturkeun
Pupusna kacarioskeun
Basa Nabi dibobotkeun
Dua sasih kaunggelkeun
Keur lima taun yuswana
Ditinggal pupus ibuna
Tuluy dirawat eyangna
Abdul mutolib asmana
Kersana robbulalamin
Kanjeng Nabi nu prihatin
Yuswa dalapan taun yakin
Eyangna mulih ka batin
Sabada wapat eyangna
Nabi dirawat uwa na
Abi Thalib kakasihna
Saderek teges ramana
Kanjeng nabi sering pisan
Dicandak ka nagri Syam
Sok nyandak barang dagangan
Di dinya teh pajeng pisan