Tisih pelajar mikro ke udah dipejalaika.

Bepelasarka pelajar mikro ke udah dipejalaika sechara beraban, tisih tu digaga

dikena bejuraika pengelebih enggau chara ngemanahka pelajar nya enggau
pengurang sereta chara mutarka iya.

Ba set induksyen, siti pengelebih ba pelajar mikro ke udah dipejalaika iya nya
pengajar meri perampa ngagai nembiak senentang sistem jaku iya nya raban jaku
bantu. Pengajar enda lalu terus madahka nama ti dikumbai jaku bantu tang betanya
saut dulu enggau nembiak ngena jaku bantu lalu nembiak deka meragam raban jaku
ti deka dipelajarka ungkup ke seharinya. Chunto iya pengajar nanya “udah makai kita
pagi tu?” lalu nembiak nyaut ngena leka jaku bantu “udah.” Ngena chara tu mega
nembiak deka nemu bakani ke guna jaku bantu tu dalam pengidup bersehari-hari.
Dikena ngemanahka chara ngajar ba set induksyen tu, pengajar tau mantaika kad
gambar ke ngundan leka jaku bantu lalu ngasuh nembiak nyebut leka jaku nya
dikena betanya saut. Enggau chara tu nembiak deka lebih mereti agi raban jaku ti
deka dipelajarka laban sida ulih meda sereta nyepil kediri jaku bantu nya. Baka enti
pengajar nanya “udah makai kita pagi tu?” sekeda nembiak deka nyaut “udah” lalu
sekeda nembiak mega deka nyaut “bedau”. Nya alai, enti bisi kad jaku bantu nya
nembiak nemu ni bagi saut ti betul kena nyaut tanya nya.

Ba ripih keterubah pelajar mikro nya, pengelebih ke bisi iya nya pengajar nerangka
konsep jaku bantu ke diajar enggau nemban lalu bisi meri chunto dikena nerangka
ngagai nembiak ngena LCD enggau komputer iya nya kereban ICT ti beguna bendar
dikena narit ati nembiak lebuh belajar. Pengajar mega bisi minta nembiak meri
chunto diri empu dikena meda naka ni penemu nembiak senentang jaku bantu
nitihka konsep ti udah diterangka pengajar.

Pengurang ba ripih keterubah tu iya nya pengajar enda nitihka Langgur Pelajar
Sehari (LPS) ti udah disediaka. Pengajar semina ngajar reti jaku bantu enggau
chunto dalam ayat tang nadai ngasuh nembiak ngaga ayat baka ke dipadah dalam
LPS. Pengajar mega nadai ngidarka kad ti ngembuan chunto jaku bantu tang semina
dipegai nyadika malin iya empu aja. Ba nya kitai tau meda pengajar nya enda nitihka
LPS ti udah dilanggur iya kad nya kebendar iya diberi ngagai nembiak dikena sida iya
ngaga ayat ke ngembuan jaku bantu. Kelimpah ari nya, aktiviti belajar ke dipejalaika
mega nadai besangkut-paut enggau topik iya nya Pemeresi Sungai baka ke udah
dipadah ba LPS. Pengajar sepatut iya nitihka LPS ti udah dilanggur ngambika rurun
pelajar enda charut lalu nembiak ulih nerima pekara ke deka diajar enggau berurun.
Pengajar mega patut nerangka topik “Pemeresi Sungai” dalam pengawa nerangka
konsep jaku bantu. Chunto iya, pengajar ngena teks ti bekaul enggau pemeresi
sungai dikena nerangka guna jaku bantu dalam ayat. Pengajar mega patut nguna
perengka bantu ngajar baka kad jaku bantu ke udah disediaka enggau nemban iya
nya diberi nyadika malin nembiak. Pengajar patut nemu bakani deka berinteraksyen
enggau nembiak ngambika enda kesal ati lebuh ngajar lalu utai ti dikereja enda
sebaka enggau utai ke udah dilanggur enggau lenak.

Nyadika simpul, pengajar patut nemu bakani deka ngepunka set induksyen
enggau meri perampa ngagai nembiak senentang pekara ti deka dipelajarka ungkup
seharinya. Pengajar enda ibuh terus madahka nembiak topik deka diajar ngambika
runding nembiak ulih tebuka meragam nama utai ti deka dipelajar. Pengajar mega
patut ngepunka siti-siti aktiviti ba ripih satu dalam LPS nya enggau aktiviti ke paling
mudah dulu iya nya baka nemu konsep jaku bantu enggau beratika teks ti bekaul
enggau pemeresi sungai. Udah nya nembiak baru dipinta ngaga ayat kediri ngena
jaku bantu ke bisi dalam teks ti udah dibacha nya. Enggau chara tu, nembiak ulih
nangkap nama utai diajar enggau berurun lalu enda charut enggau pelajar bukai.