Acara Minggu HKBP Sa-Resort Martoba Medan

MINGGU ADVENT III

“MANGOLU SO HASURAHAN DI HARORO NI TUHAN I”
“HIDUP TAK BERCACAT PADA KEDATANGAN TUHAN”
Tgl. 13 Desember 2020

01. PAMUHAI :
U : Huria ni Debata na Hinaholongan ni Tuhanta Yesus Kristus, hami saluhut
Parhalado, pasahathon tabe ma tu sude hamu ruas ni huria: Selamat Advent
ma di hita saluhutna.
R : Selamat Advent!
U : Patuginjang ma tohangmuna, hamu ale angka harbangan, patuginjang ma
hamu, ale angka pintu sian na robi, asa bongot Raja ni hamuliaon! Ise ulaning
Raja ni hamuliaon i?
R : I ma Jahowa, na gogo jala Ulubalang, Jahowa Ulubalang di hamusuon.
U : Patuginjang ma tohangmuna, hamu ale angka harbangan, jala patuginjang
ma hamu, ale angka pintu sian na robi, asa bongot Raja ni hamuliaon i! Ise
ulaning Ibana, Raja ni hamuliaon i?
R : I ma Jahowa Zebaot, Ibana do Raja ni hamuliaon
U : Di ari sadari on tama hita mandok mauliate tu Tuhan Jesus Kristus Raja ni
huria, na mangalehon partingkian di hita umbahen boi Taripar Sahat tu
Advent III on. Alani marhite parmingguonta sadari on di jou do hita asa
mangolu so hasurahan di haroro ni Tuhan i. Antong manjonok ma hita jala
marunduk ni roha di adopan ni Debata, ai nunga ro Ibana manopot hita.
Tahangoluhon ma ngolu na so hasurahan, asa ias, di haroro ni Tuhanta Jesus
Kristus muse manopot hita, marende ma hita.
02. Marende BE No. 44: 1,2 HAMUNA NA PORSEA I SAI TOMU HAMU
TUHAN JESUS BL. 206
 Hamuna na porsea i sai tomu Tuhan Jesus i, pahehe rohamuna, Jonok do ari pesta ni
saluhut huriaNa i, i ma hatutubuNa, I pe hehe ma hamuna, baen pantunna lao
manjangkon na manopot hajolmaon. (Jongjong)
 Marlas ni roha situtu saluhut halak na burju lao mangihuthon Jesus, I pe
pataridahon ma las ni roham di Debata sangkapNa ma patulus, Puji puji Jesus
Kristus na manobus tondimuna sian hamagoanmuna.
03. VOTUM – INTROITUS – TANGIANG:
U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Porbadia na tumompa langit dohot tano on.
Amen. Ida ma, hatop do Ahu ro, tiop ma na di ho nuaeng, asa unang adong
na mambuat tumpalmi. Haleluya!.

-1-
 R : (Mangendehon): Haleluya, Haleluya, Haleluya!
U : Martangiang ma hita : Ale Amanami na di banua ginjang! Na mandok
mauliate do hami tu Ho, ala dipabotohon Ho tu hami marhitehite AnakMu
Tuhan Jesus Kristus, na laho salpu sogot langit dohot tano, alai na hot do
anggo HataM ro di salelenglelengna. Angkup ni i, ingkon patar do sogot
saluhut jolma di jolo ni habangsa paruhumanMi. Sai asi ma rohaM di hami,
pahot ma rohanami marhaporseaon di HataM marhitehite Tondi Parbadia.
Padungo ma hami jala paringgas hami martangiang, asa marlas ni roha
hami paimaimahon Ho, jala asa dapot hami hangoluan na so ra suda. Amen.
(Hundul)
04. Marende BE No. 45: 4 HOSIANNA ANAK NI RAJA DAVID
 Hosianna Tatap ma hami na nirajaanMu, Togu ma tu Debata hami angka
siseanMu, Sai sungguli hami on mangoloi hataM tongtong
05. PATIK:
U : Tangihon hamu ma Patik ni Debata di Minggu ADVENT III on, i ma na
tarsurat di Efesus 2: 10, Ai jadijadianNa do hita, angka na tinompa di
bagasan Kristus Jesus, asa marulaon na denggan hita; ai angka i do dipature
Debata hian, asa taparangehon i. (Antong rap mangido gogo ma hita tu adopan
ni Debata).
R : Ale Tuhan Debata, sai pargogoi ma hami mangulahon na hombar tu
PatikMi. Amen.
06. Marende BE No. 686: 1,2 RAMUN DO AU
 Ramun do au di joloMi, gok dosangki urasi au, O, Jesus, birubiru i, dison do au
patau ma au. (Jongjong)
 Na ro do au tu joloMi, gale do au urupi au, O, Jesus, ala mudarMi, dison do au
patau ma au.
07. MANOPOTI DOSA:
U : Huria ni Tuhanta, dibagasan roha na hohom tatopoti ma dosanta na godang i
tu adopan ni Debata, asa tama hita manjalo bagabagaNa taringot tu hasesaan
ni dosanta. : Ale Tuhan Debata, Amanami, Pargogo na so hatudosan,
Parasiroha mida hami na dangol on! Arga do hami ditobus Ho. Pola ro Ho tu
portibi on laho manobus dohot paluahon hami. Alani do ingkon
haholongannami Ho nang dongannami jolma. Ingkon mangolu ma hami di
bagasan holong dohot asi ni roha songon Ho na manghaholongi hami. Alai
Tuhan jotjot do ndang huhamauliatehon hami pambahenanMu di bagasan
ngolunami on. Ndang marsitutu hami martangiang tu adopanMu, ndang
ringgas rohanami masitangiangan sama hami, ujungna gabe ndang jumpa be
las ni roha. Huintopi hami do Tondi i, lea do rohanami maradophon

-2-
 panurirangon. Ndang hutiop hami na denggan jala ndang hupasiding hami
angka na roa. Ale Tuhan asi ma rohaM di hami, Ho ma na mamparbadiai
hami asa gabe sun denggan. Ho ma na mangaramoti tondinami, rohanami
nang dagingnami, asa ias so hasurahan di haroro ni Tuhan Jesus, Tuhannami.
R : Ale Tuhan Debata, Amanami, Pargogo na so hatudosan, Parasiroha mida
hami na dangol on! Ho ma na mangaramoti hami asa ias so hasurahan di
haroro ni Tuhan Jesus, Tuhannami.
U : Ale Tuhan Debata, Amanami, Pargogo na so hatudosan, Parasiroha mida
hami na dangol on ! Na ro do hami tu joloM manopoti dosanami na godang i.
Di bagasan hajahaton do hami tubu jala ndang adong haporseaon di bagasan
rohanami hian, saluhut do hami manimbil sian angka dalanMu. Mansai
godang do pangalaosionnami di PatikMu. Alai ingot ma hami, ale Tuhan, ala
ni denggan ni basaM dohot asi ni rohaM. Sai unang paingotingot angka dosa
ni haposoonnami dohot pangalaosionnami : sai ingot ma hami hombar tu asi
ni rohaM dohot denggan ni basaM ala ni GoarMu. Ale Tuhan Jesus,
marpamuati ma rohaM di dosanami na godang i ! Amen.
R : (Mangendehon): 733: 1,4 DULO MA AU ON O TUHAN
 Dulo ma au on o Tuhan, bege anggukkon, Ro do Ho tu angka dongan, topot ma au
on. Jesus Tuhan bege anggukkon, Ro do Ho tu angka dongan, topot nang au on.
 Ho do siapuli roha, ni na marsak i, Na soada tudosanNa, Ho haposanki. Jesus Tuhan
bege anggukkon, Ro do Ho tu angka dongan, topot nang au on.
U : Tabege ma Hata bagabaga taringot tu hasesaan ni dosa: Ai ndang adong
imbar ni i; ai saluhut do pardosa jala hurangan maradophon hasangapon ni
Debata, alai angka na gabe pintor, binahen ni basabasa marhite sian asi ni
rohaNa, hinorhon ni panobusion na marhitehite Kristus Jesus i, na
pinajongjong ni Debata bahen habangsa parasian marhitehite haporseaon di
mudarNa. Hasangapon ma di Debata na di ginjang!
R : Amen (Hundul)
08. Marende BE No. 39: 6,8 BEHA MA PANJALONGKU BL. 156
 Beha ma panjalongku di Ho, o Tuhanki? Beha ma panomungku di Ho, o Rajangki?
Sondangi ma rohangku na holom, na bodo, ai naeng patupaonku las ni rohaM di
Ho.
 Pangisi ni sionMu do mangolophon Ho, Laos songon i rohangku lao mandapothon
Ho, Na ringgas do rohangku mamuji goarMi, Nadaulat do sangkaphu patulus
rohaM i!
09. E P I S T E L :
U : Tabege ma Hata ni Debata turpuk ni ari Minggu Advent III on i ma na
tarsurat di Psalmen 126: 1 – 6, Ende hananangkok. Di na mulak tinogihon ni
Jahowa angka na tarbuang sian Sion, doshon halak na marnipi do hita.

-3-
 R : Gok parengkelon ma uju i pamanganta, jala marolopolop dilanta,
martaringot ma uju i di tongatonga ni angka parbegu: Godang ma na
binahen ni Jahowa tu nasida!
U : Godang ma tongon na binahen ni Jahowa tu hita, jadi marhilas ni roha ma
hita.
R : Sai togihon ma mulak, ale Jahowa, angka na tarbuang sian hami, songon
angka sunge di tano tungkan dangsina.
U : Angka na mariluilu laho manabur, marolopolop do sogot laho manggotil.
R : Mardalandalan pe ibana huhut tangis pausungusung boni
sisaburhononhon, ro do ibana sogot marolopolop mangusung angka
tibalanna.
U : I do sahatna: Martua ma angka na tumangihon Hata ni Debata jala na umpeopsa.
Amen.
10. Marende BE No. 591: 2,3 BORU SION
 Anak Daud ro ma Ho! pasu-pasu bangsoMon, HarajaonMu hot tongtong dame ma
di tano on, Hosianna ro ma Ho! pasu-pasu bangsoMon. (Jongjong)
 Hosianna ro ma Ho! Masuk Ho tu rohangkon, Baen mardame tondingkon lao
manjangkon haroroM, Anak Daud ro ma Ho! Masuk Ho tu rohangkon.
11. MANGHATINDANGHON HAPORSEAON:
U : Tahatindangkon ma haporseaonta i, songon na hinatindangkon ni donganta
sahaporseaon di sandok portibi on. Rap ma hita mandok:
R : Ahu porsea di Debata Jahowa………. (Hundul)
12. TINGTING
13. Marende BE No. 758: 1-- JAHOWA PANGURUP (Pel. Ia + Ib)
 Jahowa pangurupi di si ulaonmi. Dilehon pos ni roha di ganup tingki i,
Nang pe sipata ganggu haporseaonmi, Jamot tongtong Tuhanmu manjaga ngolumi.
 Jahowa las ni roha saleleng ngolumi, Ibana haroroan ni nasa na uli, Ai disarihon
Jesus sude naringkot i, Halashon panoguon ni Jesus Tuhanmi.
---- Musik ----
 Jahowa pandongani di na porsea i, Ibana patuduhon nang sidalananmi
Asa marolop-olop ho di ujungna i, Ibana do donganmu nuaeng nang sogot i.
14. JAMITA: 1 Tessalonik 5: 16 – 24
15. Pasahat Pelean II dohot Pelean Bulanan
U : Hamuna dongan sahaporseaon di bagasan Tuhan Jesus Kristus, pasahatonta
ma pelean bulanan di bulan Desember 2020 on, marhite panandaonta di
basabasa ni Tuhanta na tajalo di bagasan na sabulan on; di Kantor, di
ladang, di hauma, di swasta, ro di angka partigatiga dohot angka ragam ni
ulaonta na asing, tung tama do hita mandok mauliate disaluhutna i; alani

-4-
 tapasahat ma i rap dohot Pelean II jala tapasahat ma sian las ni rohanta
unang ala na so tarjua. Marende ma hita BE HKBP No. 40:1…. (LAS BE MA
ROHAMUNA)
H: (Mangendehon) BE No. 40: 1-- LAS BE MA ROHAMUNA BL. 153 (Pel. II +
Pel. Bulanan)
 Las be ma rohamuna na tigor roha i, Naung ro do Rajamuna mamboan tua i,
Ndang marpanggortap i anggo di haroroNa, Alai tuk do gogoNa padaohon jea i
 Ndang dilului rohana dison sonangNa i, Di surgo habangsaNa, harajaonNa i,
Ai naeng buni dope di tano on sangapNa, Dung tulus pe sangkapNa patar ma i
sude
---- Musik ----
 Hamuna angka raja oloi ma Raja on, Ai hangoluanmuna do dipatupa on, Ai
molo tois hamu manjua di hataNa, Sai talu do rimasNa mangago tu hamu
 Hamu angka na sangap didok portibi on, Ibana do sumangap di hasiangan on,
Sai bege hatai sai unang ma mandali, HataNa nang sahali tu rohamuna i
U : Nunga tapasahat be sian angka pasupasu ni Tuhanta na gabe pelean
bulananta tu Huria ni Tuhanta, sai dipasupasu Tuhanta ma hita saluhutna
Huriana dohot sude ulaonta na marragam i, taingot ma hata ni Tuhanta na
mandok di 2 Korintus 9:5–7 “Dibahen i huringkoti hami mangapoi angka
dongan, asa dipajolo nasida mandapothon hamu, laho paradehon pasupasu
naung pinarbagabagamuna, asa rade i, songon na hinabuashon, unang
hinolithon.
R : Ingot ma: Na manaburhon otik, otik do gotilonna; jala na manaburhon
managam pasupasu, mangalap pasupasu di na manggotil.
U : Ganup ma nionjar ni rohana, unang ma sian muruk manang sian na so
tarjua; ai dihaholongi Debata do na las roha mangalehon! Alani pos ma
rohanta disarihon Debata do ngolunta. Amen.
16. PANGUJUNGI: (Jongjong)
U : Nunga tabege Hata ni Debata na paingothon hita asa mangolu so hasurahan
di haroro ni Tuhan i. Tongtong ma hamu marlas ni roha molo pe mangadopi
hamaolon di portibi on. Unang mansadi hamu martangiang. Mandok
mauliate ma hamu siala saluhutna! Ai i do dipangido Debata sian hamu
marhitehite Kristus Jesus. Unang intopi hamu tondi i. Unang lea rohamuna
di panurirangon. Tangkasi hamu ma saluhutna; na denggan i ma tiop hamu.
Pasiding hamu ma nasa rumang ni na roa. Diparbadiai Debata pardame i
ma hamu gabe sun denggan, jala diramoti ma tondimuna, nang roha, nang
daging, asa ias, so hasurahan di haroro ni Tuhanta Jesus Kristus.
R : Ale Tuhan Debata, rajai ma hami asa mangolu so hasurahan di haroro ni
Tuhan i.

-5-
U : Taida jala tapanghilalahon do godang ni angka parsorion di tongatonga ni
portibi on. Alani i, ulaonta do patoguhon roha ni angka donganta na na
dibagasan pardangolan, asa marsigorgor panghirimon na mangolu di nasida
dibagasan holong ni roha ni Debata. On pe, borhat ma hamu, rade ma hamu
manarihon, mangurupi dohot manangianghon angka dongan na di bagasan
arsak ni roha, angka na gale, angka na marsangkot bulung dohot ragam ni
parsorion ala ni portibion, asa mangolu so hasurahan hita di haroro ni
Tuhanta i.
R : (Mangendehon) BE No. 539: 1 SAI HUTAGAM DO TUHANHU
 Sai hutagam do Tuhanku, sai masihol rohangki, Diharoro ni Tuhanku, songon
na nidokNa i. Sai mardongan olopolop, huriaM managam Ho. Maranata, ro, o
Tuhan, Amen, sai tibu ma ro!
U : Tatangianghon ma peleanta: Ale Debata, Amanami na di banua ginjang, Ho
do haroroan ni saluhut silehonlehon na denggan dohot nasa ulibasa na
mauliutus. Hupasahat hami ma sian na nilehonMi tu hami, peleannami tu
Ho. Sai jalo ma i gabe uap na hushus di joloM. Pasupasu ma i jala ramoti asa
huparhaseang hami pelean on, patimbulhon harajaonMu di tongatonga ni
huriaM dohot di portibi on. Buhai ma rohanami marhitehite TondiM, asa
lam hutanda hami godang ni silehonlehonMi tu hami, asa lam girgir hami
mandok mauliate tu Ho, marhitehite Jesus Kristus Tuhannami. AMEN
R : (Mangendehon) BE No. 204: 2 NDANG TADINGKONONHU HO
 Nasa na nilehonMi, tondi ro di pamatanghu. Hosa dohot gogongki, ro di saluhut
artanghu. Hupasahat i tu Ho, na so unsatonhu do.
U : Ale Amanami na di banua ginjang! Sai pinarbadia ma GoarMu! Sai ro ma
harajaonMu! Sai saut ma lomo ni rohaM di banua tonga on songon na di
banua ginjang! Lehon ma tu hami sadari on hangoluan siapari! Sesa ma
dosanami songon panesanami di dosa ni dongan na mardosa tu hami!
Unang hami togihon tu pangunjunan! Palua ma hami sian pangago!
R : (Mangendehon):
 Ai Ho do nampuna harajaon, dohot hagogoon. Ro di hasangapon, saleleng ni
lelengna, Amen
U : Pasupasu !
R : (Mangendehon ) Amen… Amen… Amen...

-6-