PARPUNGUAN BODARI

PARNINGOTAN ARI HATUTUBU

NI TUHAN JESUS
HKBP Sa-Resort Martoba Medan
“AI NAUNG BINSAR DO PANONDANG I DI HAGOLAPON”
Tgl. 24 Desember 2020

01. PAMUHAI :
U: Huria nahinaholongan ni Tuhan Jesus Kristus na marpungu do hita di borngin on
laho mamestahon parningotan ari hatutubu ni Tuhan Jesus Kristus. Na ro do
Ibana manopot hita jolma pardosa, dirumari do diriNa jala disolukhon rupa ni
hatoban, gabe suman tu jolma do Ibana jala rumang jolma dapot di Ibana.
R: Mariaia do tondingku mida Debata Sipalua ahu. Ai ditatap do haetehon ni
naposoNa on.
U: Naeng bongot ma hita tu parsaoran na badia rap dohot Debata. Alani tama do hita
mandok mauliate tu Tuhan Jesus Kristus Raja ni huria i, na mangalehon
partingkian na uli di hita. Antong manjonok ma hita jala marunduk ni roha di
adopan ni Debata, AI NAUNG BINSAR DO PANONDANG I DI HAGOLAPON.
Tapangiar ma soaranta mamuji Tuhanta pardengganbasa i, marende ma hita.
02. Marende BE No. 48 : 1,2 RIA MA HITA SASUDE
 Ria ma hita sasude mamuji Debata. Girgir ma parendenta be, ai i do na tama, ai i
do na tama. (Jongjong)
 Diungkap Debatanta i banuaginjang i. Disuru do AnakNa i, hangoluanta i,
hangoluanta i.
03. VOTUM – INTROITUS – TANGIANG:
U : Marhitehite Goar ni Debata Ama, dohot Goar ni AnakNa Tuhan Jesus Kristus,
dohot Goar ni Tondi Porbadia na tumompa langit dohot tano on. Amen. Bangso
na mardalani di bagasan haholomon marnida sada panondang na bolon. Binsar
do sada panondang di angka na mangingani tano na nilinggoman ni hamatean.
Marrongoman bangsoM ro sian lomona di ari parporanganMu; marpahean
habadiaon, songon nambur sian ampuan ni andos torang ro do tu Ho
paranganMu angka na umposo. Haleluya!.
R : (Mangendehon): Haleluya, Haleluya, Haleluya!
U : Martangiang ma hita: Ale Debata, Ama na di banua ginjang! Pujipujian,
hasangapon dohot hamauliateon husombahon hami tu Ho, marningot
silehonlehonMi na balga i tu hami jolma na di pardangolan on, i ma AnakMu,
Jesus Kristus, na sinuruMi sian banua ginjang ala ni hami. Gabe na dangol do
Ibana jala na pogos, pola tubu Ibana di bara ni Betlehem, asa mamora hami. Sai
rajai jala togutogu hami marhitehite TondiM, asa lam huida hami godang ni
holong ni rohaM na pinapatar ni AnakMi. Amen. (Hundul)

-1-
04. Marende BE No. 51: 1,2 TOLE PUJI MA TUHANTA
 Tole puji ma Tuhanta, tu Ibana ma rohanta; asa girgir parendenta, ale dongan
Kristen i.
 Dosa dohot hamatean, bolis dohot hamagoan; talu ala naung diboan, Jesus
hangoluan i.
05. PATIK:
U : Tangihon hamu ma Patik ni Debata di Parpunguan Bodari Natal on, i ma na
tarsurat di Johannes 8 : 12, Dung i diulahi Jesus muse manjamitai nasida, ninna
ma: “Ahu do Panondang ni portibi on. Na so tupa mardalan di na holom na
mangihuthon Ahu; di ibana do tahe Panondang hangoluan.” (Antong rap mangido
gogo ma hita tu adopan ni Debata).
R : Ale Tuhan Debata, sai pargogoi ma hami mangulahon na hombar tu
PatikMi. Amen.
06. Marende BE No. 61: 1,2 NA TAU LAS NI ROHA
 Na tau las ni roha hatutubu ni Jesus Sipalua haholonganhi, Jesus Sipalua
haholonganhi.
 Tung godang do dosa pangunjunan pe, Mangarsahi hita paima mate be,
mangarsahi hita paima mate be.(Tu jolo ma Liturgi I-Sikkola Minggu)
07. REFLEKSI – PAGALAK LILIN:
U : (Tu jolo ma Liturgi I-Sikkola Minggu) Ida jala parrohahonma jadi-jadian ni
Debatanta!, uli dohot denggan situtu do portibi on dohot sude pangisina, Tung
saluhut do tahe natinompa ni Debata. Tabege ma asa dipajojor ianakhonta
Liturgi I-Sikkola Minggu (2 halak dakdanak tiap Wijk)
U : (Tu jolo ma Liturgi II-Naposo) Angka dolok dohot rura nunga dihuphupi timus,
ndang adong be soara ni pidong na marhabong alani jolma na jotjot manegai
angka suansuanan laho pasauthon lomo ni rohaNa. Hadameon i pe nunga maol
be didapot jolma i nuaeng, alani porang dohot huaso dohot arta. Godang ni
hasusaan alani lalo manang alani aek magodang. Partangison alani hapogoson,
hageduhon dohot pangarupaon nang panggosagosaon di dongan, nang nasa
ulaon dosa tahe, sudena i alani jolma nunga dao jala ndang manghahalongi
Debata dohot donganna jolma.
Liturgi II-Remaja-Naposobulung (2 halak Naposo tiap Wijk)
U : (Tu jolo ma Liturgi III-Ina) Di tingki na parpudi on, masa do sorimago Covid-19
na pola mambahen godang jolma marmatean, ngolu perekonomian na hurang
denggan, godang ni huria na so boi patupahon pesta Natal dohot ragam ni angka
parungkilon na taadopi di partingkian on. Alani Tuhan asi ma rohaM di hami.
Patogu ma haporseaonnami asa unang mabiar jala mandele hami alani
parngoluan on. Patupa ma hami gabe panondang maradophon dongananmi

-2-
 songon hataM na mandok: Tung sura lam marpogos donganmu, lam surut tahe
parbohalon di lambungmu, ingkon tolonganmu do ibana, nang halak dagang
nang halak paisolat ibana, asa mangolu ibana di lambungMu.
Liturgi III-Ina (2 halak Ina tiap Wijk)
U : (Tu jolo ma Liturgi IV-Ama) Huria ni Tuhanta, nunga ro Tuhanta manopot
bangsoNa jala mamboan haluaon. Ido na tahalashon di borngin on. Alai
haholomon do jotjot manghuphupi tano on jala lam tu jorbutna do pangela ni
sibolis i mangihoti torop jolma, disegai do tondi, haporseaon dohot panghirimon
sogot. Digunturi na marrumatangga, disegai nang roha ni ianakhon asa tois tu
hata ni Debata. Alani i tama do pahusorhusoronta dibagasan rohanta be.
Liturgi IV-Ama (2 halak Ina tiap Wijk)
R : (Mangendehon): 733 : 1,4 DULO MA AU ON O TUHAN
 Dulo ma au on o Tuhan, bege anggukhon. Ro do Ho tu angka dongan, topot
nang au on. Jesus Tuhan bege anggukhon. Ro do Ho tu angka dongan, topot
nang au on.
 Ho do siapuli roha, ni na marsak i. Na soada tudosanNa, Ho haposanhi. Jesus
Tuhan ………
U : (Tu jolo ma Liturgi V-Lansia) Lam godang pe angka parungkilon na masa di
tongatonga ni ngolu on, ingot ma Tuhanta do na mandongani hita. Molo lam
lumlam angka parrohaon ni jolma di partingkian on, ingot ma, alani i do umbahen
na ro Tuhan Jesus sian banua ginjang sorang tu portibi on, asa disondangi sandok
ngolunta na dibagasan hagolapon. Alani ndang jadi papeolonmu uhum, ndang
jadi ho marnidanida bohi, jala ndang jadi jaloonmu silua, ai sisip do papitung
mata ni halak na pistar jala pabalikbalik parhataan ni halak na tigor. Antong
songon dia pe rumang ni parngoluan na niadopanmu nuaeng, di arsak manang
las ni roha, sai ungkap ma roham manjangkon Tuhan i asa sorang Ibana di
bagasan ngolum.
Liturgi V-Lansia (2 halak Lansia tiap Wijk)
Solo: (Mangendehon BE No. 616 : 3 “Ulina i di borngin na badia”)
Uli na i sude marlas ni roha, ala naung songgop harajaonNa i.
Huria i ria do ro marsomba, mamuji Raja na sun sangap i.
Ibana do panondang hangoluan, na mangalehon panghirimon i.
Uli na i marende do suruan di borngin i do tubu Kristus i
Di borngin i do tubu Kristus i.
Pdt : (Tingki marende solo ro ma na pagalakhon lilin. (Pandita/parjamita, Ama, Ina,
Napos, Sikola Minggu, Lansia, Parhalado)
(dohonon ni pandita/parjamita ma): Hamu angka dongan sahuria, dihorhon
hatutubu ni Jesus i do, ombas na imbaru, parsaoran na imbaru dohot holong na

-3-
 imbaru. Jangkon ma Sipalua i! Sondang ni lilin on ma songon tanda paboa na
marpadan hita borngin on, na so taulahon be dosa, huhut rade hita manesa dosa
ni donganta. Tuhanta do mandok: Ahu do Panondang diportibi on. Na so tupa be
mardalan di na holom nasa na mangihuthon Ahu.
JONGJONG MA HITA MARENDE :
MARENDE : BE. No. 54 : 1 – 3 “SONANG NI BORNGIN NA I”
 Sonang ni borngin na i, uju ro Jesus i. Sonang modom do halak sude, holan dua
na dungo dope; mangingani Anakna, Jesus Tuhanta i.
 Denggan ni bornginna i, uju ro Jesus i. Tu parmahan di Betlehem i, dipaboa na di
surgo i; nunga ro Sipangolu, Jesus Tuhanta i.
 Godang ni tua disi, di na ro Jesus i. Tung malua pardosa muse, sian hamagoanna
sude; ala ro Sipangolu, Jesus Tuhanta i .
~ hundul~
Pdt : Hamuna angka dongan, las ma roham nunga saor be Tuhanta Jesus Sipalua i tu
portibi on, jangkon ma Ibana sian ungkap ni roham jala hatindanghon ma Ibana
di ngolum.
R: Haluaon do di boan Tuhan Jesus marhite hatutubuNa, alani hami pe naeng
ma hobas manghatindangkon Tuhan Jesus marhite ngolunami.
08. Marende BE No. 62 : 2 HALALAS NI ROHA GODANG
 Ai saborngin on do binsar bintang di na holom i. Sumondangi hagolapon, na di
rohanta i. Hasangapon di Debata, laos dame, dame, dame ma di jolma. -Lomo ni
roha ni Debata do hita jolma on.
09. E P I S T E L :
U : Turpuk di Parpunguan Bodari Natal on i ma na tarsurat di Titus 2 : 11 – 15, Ai
nunga tarida asi ni roha ni Debata, sibahen haluaon ni saluhut jolma.
R : Diajari do hita, asa tasoadahon roha na so daulat ro di angka hisaphisap
tano on, asa taparangehon hatomanon, hatigoran dohot hadaulaton, tagan
di hasiangan on.
U : Laos diajari do hita, paipaimahon hatuaon na tahirim i dohot hapapatar ni
hasangapon ni Debata na balga i dohot Kristus Jesus, Sipalua i.
R : Ai dilehon do diriNa humophop hita, asa ditobus hita sian nasa hajahaton,
asa urasonNa di diriNa bangso naung Ibana nampunasa, na olo
manghapadothon angka ulaon na denggan.
U : I ma hatahon, paingothon jala ajarhon sian nasa gomos ni roham! Unang ma
adong na marhu ni roha mida ho! I do sahatna: Martua ma angka na
tumangihon Hata ni Debata jala na umpeopsa. Amen.
10. Marende BE No. 58 : 4,5 MARTUMBUR TUNGKOTUNGKO

-4-
  Pinuji ma Jahowa na asi roha i. Dilehon do AnakNa hangoluanta i. Girgir ma
hita on mamuji Debatanta ala basaninon. (Jongjong)
 O Jesus Tuhannami naung ro tu tano on. Tu pardangolannami di hasiangan on
asi ma rohaMi. Sai togu tondinami tu hasangaponMi.
11. MANGHATINDANGHON HAPORSEAON:
U : Tahatindanghon ma haporseaonta i, songon na hinatindanghon ni donganta
sahaporseaon di sandok portibi on. Rap ma hita mandok:
R : Ahu Porsea….. (Hundul)
12. SUNGGULSUNGGUL
13. Marende BE No. 49 : 1- SAI RO MA TU BARA (Pel. IA/Ib)
 Sai ro ma tu bara di Betlehem on, hamu na porsea, hatop ma tuson
Marnida halasan ni rohanta i, Tinongos ni Ama na di surgo i.
 O ida hamu ma di bara inon, Dakdanak na tubu disi borngin on
Uli do rupaNa, mataNa tiur, o bereng Ibana, ho gabe tiur !
---- Musik ----
 Las roha Maria, nang Josep disi, marnida na metmet, na sorang tusi
Marsomba tu patNa do parmahan i, di ginjang marende pardisurgo i.
 Pasinggang ma totmu hamuna sude, marnida parmahan marsomba muse
Marende hamu na marlas roha i, maniru suruan na di ginjang i.
---- Musik ----
 Sai dok ma, O Anak ni Debata i, Ho ro sian ginjang dibaen asiMi
Di hami sudena na mardosa on, mambaen haluaon di hami tongtong
 Tung aha ulaning denggan ni rohaM, silehononnami baen las ni rohaM
Ndang sere, ndang perak, ndang pinangidoM, ai roha na ias sambing do lomoM.
---- Musik ----
 Antong rohanami ma peleanMi, o Jesus hasian sai jalo ma i
Ias jala sonang ma baen angka i, tongtong gabe domu ma tu rohaMi.
14. JAMITA: Jesaya 9 : 1 – 6
15. Marende BE No. 75: 1- NAUNG BINSAR DO PANONDANG I ( Pel. II tu
STT/SIKOLA PANDITA)
 Naung binsar do panondangi, na mangatasi sasude, na olo marsinondang.
Sondangan ni do sasude, na di na holom i dope, malungun di na torang. Jesus, tulus
ma sangkapMu, sondanganMu nasa jolma asa unduk di Debata.
 Ho do mangapul rohangkon, o Raja ni portibi on, saleleng au mangolu. Sai Ho ma
parjambaranki, ndang olo au lohotan ni sude na olo salpu. Tu Ho ro do au na lea
na porsea di hataMu mangidohon panumpakMu
---- Musik ----

-5-
  Tung ise pasonangkon au, manang tu dia pe au lao, sasada Ho huboto.
Panghilalahon holong ni rohaM di au na bojok i, na pogos jala oto. Unang loas au
be lilu hinophopMu do tondingku, ingkon Ho do tioponku.
 Las do rohangku mida Ho, o Jesus Kristus na dung ro, mamboan hangoluan.
Naeng pujionku Ho tongtong, saleleng au di tano on, nang di banua ginjang.
Sangap, sangap di goarMu Ho Rajangku huendehon hamuliaonMu, Tuhan.
16. PANGUJUNGI: (Jongjong)
U : Nunga tabege Hata ni Debata na pabotohon tu hita: AI NAUNG BINSAR DO
PANONDANG I DI HAGOLAPON. Tuhanta i do panondang di bagasan ngolunta.
Na ro do Ibana manondangi hagolapon marhite holongNa asa hita na mardalan di
bagasan hagolapon marnida hatiuron na binoan ni Tuhanta asa dapotan las ni
roha hita songon las ni roha di gotilon, songon parolopolopon di na marbagi
tabantaban. Antong angka naung manjalo hatiuron i patut do manghatindanghon
i di bagasan ngolunta. Unang be mangolu dibagasan hagolapon. Hata ni Debata
mandok: ”Marburi ma hamu, urasi hamu dirimuna, paholang hamu ma hinaroa ni
pambahenanmuna sian jolo ni matangKu, pasohot hamu ma manjahati. Guruhon
hamu ma mambahen na denggan, lului hamu ma uhum, pintori hamu na nirupa,
patingkos hamu ma uhum tu nasopot so marama, ondingi hamu angka na
mabalu.”
R : Ale Tuhan Debata, sondangi ma hami asa gabe panondang hami di portibi
on.
U : Kristus do Tuhan naung ro tu portibi on laho paluahon dohot sumondangi hita
saluhut na tinompaNa. Martua ma angka na porsea di Jesus Kristus ai Ibana
hatuaon i. Ibana do hagogoonta di angka parungkilonta, Ibana do na manongtong
asa manang ise na mian di bagasan Tuhan Jesus dapotan hatongtongon saleleng
ni lelengna, Ibana do Raja Dame na padamehon hita tu Debata Ama. Alani
mangolu ma hamu dibagasan dame rap dohot na humaliang. Ibana ma na
mangaramoti langkanta di bagasan panghirimon na imbaru.
R : (Mangendehon) BE No. 597a : 2 BARITAHON DI DOLOK
 Baritahon di dolok di rura di sude inganan, Baritahon di dolok naung tubu Kristus
i. Di na pinabangkitMu au gabe naposoM, Patau ma au Tuhanku marhobas di
joloM. Baritahon di dolok……….
17. TANGIANG PANGUJUNGI:
- Tangiang Pelean: (Agenda HKBP)
- Tangiang Ale Amanami:
- Pasupasu:
- Amen, Amen, Amen
“Selamat Ari Natal”.

-6-