HURIA KRISTEN BATAK PROTESTAN

PARTURENA PARMINGGUON DI
PARNINGOTAN ARI HAMAMATE NI TUHAN JESUS
 Ev: Lukas 23: 44 - 48  Ep: Psalmen 22 : 2 - 12

TOPIK: DISEAHON JESUS DO HOSANA

Jumat, 02 April 2021
HKBP SE- DISTRIK XXV JAMBI
I. P A N G A R A D E O N
2. Parhobas mandapothon ingananna be (huhut mangkuling organ BE. 449:1).
II. JOUJOU TU PARSAORAN (U = Uluan ; R = Ruas)
U : Hamu angka dongan sahuria, marpungu do hita nuaeng di Bagas Joro on di ari
Parningotan Hamamate ni Tuhan Jesus. Hamamate ni Tuhan Jesus i ma
hataridaan ni holong ni roha ni Debata tu jolma pardosa. Di hamamateNa i,
tongon do angka sahitta diusung Ibana, jala angka pardangolanta diporsan. Ala ni
pangalaosionta Ibana tartullang, binahen ni hajahatonta Ibana mabugang. Ampe
tu Ibana pinsangpinsang parhitean ni hasonanganta, jala binahen ni bugangNa
malum itahilala. Tapasada ma rohanta manghangoluhon panghophoponNa i.
R : (Mangendehon) BE. 200 : 4 “Di Surgo Do Alealenta” BL. 106.
Humophop hita do tinaonNa na bernit i di Golgata/ Sude dosanta pinorsaNa pasaehoni
tu Debata./Antong tabaen ma Jesus i, tongtong alealenta i.
U : Beta ma hita marsomba Ibana, marsinggang ma hita tu adopan ni sihophop
hita. Tapatubegehon ma soaranta, marende ma hita :
III. PARMINGGUON.
01. MARENDE BE. 449 : 1 - 3 "Sai Solhot Tu SilangMi" BL.300
Sai solhot tu silangMi, Jesus ingananhu./Mual na mabaor disi, i ma inumon hu./SilangMi,
Tuhanki i ma pujionhu, Paima sogot sahat au, i endehononhu.
Lao ma au tu silangMi, i haporusanhu./ Sai asi ma rohaMi unang tulak
ahu./SilangMi…..
Domu ma tu silangMi, i ma tioponhu./Asa unang lilu au, Ho ihuthononhu./SilangMi…..
02. VOTUM – INTROITUS – TANGIANG.
U : Marhitehite Goar ni Debata Ama dohot Goar ni AnakNa Tuhan Jesus Kristus
dohot Goar ni Tondi Parbadia, na tumompa langit dohot tano on. Amen. Na gabe
pangoloi do Kristus paima mate, pola tung mate tarsilang. Di dia angka soropmi, ale
hamatean? Di dia pangagoonmu, ale banua toru? Haleluya
R : (Mangendehon): Haleluya, Haleluya, Haleluya!
U : Martangiang ma hita! O Tuhan Jesus, Birubiru ni Debata, na mamorsan
dosanami! Na jongjong do hami di joloM, marningot Ho, na targantung i. tangkas do
huantusi hami habebernit ni na tinaonMu di dolok Golgata. Tungki do hami marningot
dosanami na mangkorhon hamamateMi. Asi ma rohaM, urupi ma hami, asa gabe upa
ni halojaonMu hami. Amen. (Hundul)
1
03. MARENDE BE. 82: 1 + 3 “O Jesusku tu BugangMu” BL. 21
O Jesusku, tu bugangMu, ro marsomba rohangkon./ Sai tarpuji, sai tarpuji, na pamalum
tondingkon.
Tu tanganMu ma tondinghu, jumpa hamamatengki./ Tu lambungMu, o Tuhanhu, alap na
tinobusMi.
04. P A T I K.
U : Patik ni Debata di hita dibagasan tingki on, i ma na tarsurat di 1 Korint. 1 : 18 -
21, songon on ma didok disi: Ai haotoon do hata na taringot tu silang i di roha ni
angka na laho mago; alai hagogoon ni Debata do i di hita na dapotan haluaon.
R : Ai na tarsurat do: “Huagohon habisuhon ni na bisuk jala hubolongkon roha ni
parroha.”
U : Didia ma na bisuk? Didia ma sibotosurat? Didia ma parsinabul di tano on?
Nda gabe haotoon habisuhon ni portibi on dibahen Debata? Ai mangihuthon
habisuhon ni Debata, ndang ditanda portibi on Debata marhite dalan habisuhon;
gabe dihalomohon Debata ma paluahon angka na porsea i marhitehite jamita
haotoon. Rap martangiang ma hita mangido gogo sian Debata laho mangulahon na
hombar tu patikNa!
R : Ale Tuhan Debata sai pargogoi ma hami mangulahon na hombar tu patikMi.
Amen.
05. MARENDE BE. No 84 : 1 - 2 “Aut Na Ginorga Tu Rohangku” BL.195
Aut na ginorga tu rohangku, bohiM di na lao mate Ho/Aut na huingot o Tuhanhu,
tongtong pangkophopMi di au/ Ai Ho do paluahon ahu, dosangku do pinorsanMi/
Didaoni Ho parsahitonhu, martua au binahen ni i.
Sai jalo m’au ale Tuhanku, baen upa ni na tinaonMi./Sai naeng ingoton ni rohangku, tung
sasude na binaenMi./Humophop au pardosa godang, dibahen holong ni rohaM./Hinorhon
nii tarbaen au sonang, laho mandapothon banuaM.
06. MANOPOTI DOSA .
U : Tatopoti ma dosanta na godang i tu adopan ni Debata, martangiang ma hita! Ale
Tuhan Debata, Amanami na di banua ginjang, Parasiroha na sumurung! Na mandok
mauliate ma hami tu Ho sian nasa rohanami, ala dilehon Ho AnakMu na sasada i tu
hamatean humophop hami, asa unang mago na porsea di Ibana, alai asa hangoluan na
saleleng ni lelengna di nasida. Tatap ma hami, ale Amanami di bagasan AnakMu
Tuhan Jesus Kristus, na gabe habadiaon dohot hatigoran di hami.
R : Ale Tuhannami, mansai godang do dosa dohot pangalaosionnami di adopanMu.
Tung jotjot do hami mangulahon na so lomo ni rohaM na mambahen ingkon hona
uhum hami ala ni i. Mauliate ma dipasahat rohanami tu Ho, ai disuru Ho anakMu
Tuhan Jesus Kristus mamintori hami, sumeahon hosaNa asa malua hami sian
uhumMu. Ale Tuhan, binsan huingot hami panghophoponNa i sadari on, sai suru
TondiM paubahon rohanami, asa unang be hudatdati hami mangulahon dosa.

2
 U : Sai sesa ma dosanami saluhut ala ni pelean na sun denggan, na pinelehonNa i
humophop hami. Sai paeleng ma pinggolMu tu tangiangnami jala asi ma rohaM di
hami!
R : Ale Tuhannami, di parngoluan on, di na marragam hamaolon manosaknosak
hami, tung gale situtu panghilalaannami jala jotjot tarela hami mangulahon dosa. Sai
patau ma hami mangihuthon Tuhan Jesus Kristus na mamolus di sitaononNa i, asa
tung dao hami sian dosa, jala unang tarela hami tu haholomon i.
U :Na tungki do hami sadarion di adopanMu, marningot Ho na targantung di hau
parsilang i. Huboto hami do na ingkon hami manaon na tinaonMi ala hami do na
mangulahon dosa i. Alai tung asi do rohaM di hami, ditobus Ho do hami sian bura ni
dosa i, pola mate Ho humonghop hami. Sai uhirhon ma tu tondinami
panghophoponMi di hami, anggiat hupauba hami rohanami na so tama asa tung arga
panghophoponMi di hami.
U : Bagabaga ni Debata Taringot tu hasesaan ni dosanta : Parasiroha jala
pardengganbasa do Jahowa, lambat tarrimas jala parasiroha godang. Ndang dibahen
tu hita hombar tu angka dosanta, jala ndang dibaloshon tu hita hombar tu angka
hajahatonta. Songon asi ni roha ni amaama mida angka anakna, asi ni roha ni Jahowa
di angka na manghabiari Ibana. Hasangapon ma di Debata na di ginjang!
R : Amen. ----Hundul-----
07. MARENDE BE. 83 : 3 "Na Lao Do Birubiru I" BL.214
Na olo au, ale Amang, sian sandok rohangKu./Pasauthon lomo ni rohaM, rohaM sambing
do guru”/O holong ni rohaNa i, tung aha do tudosanMi, na songon Ho margogo./Dilehon
Debata hape, AnakNa lao manaon sude sitaonon ni na mago.
08. EPISTEL :
U : Hata ni Debata turpuk Epistel di ari parningotan hamamate ni Tuhan Jesus sadari
on, tarsurat di Psalmen 22 : 2 - 12 “Ale Debatangku, Debatangku! Boasa tung
tadingkononmu ahu? Sai mandaodao do angka hata ni anggukkon sian
hatuaonku.
R : Ale Debatangku, sai joujou do ahu arian, alai ndang mangalusi Ho, jala borngin
pe ndang jumpang ahu hasonangan.
U : Alai nabadia do anggo Ho, marhabangsahon angka pujipujian ni Israel.
R : Marhaposan tu Ho do angka ompunami, pos do rohanasida, jadi dipalua Ho do
nasida.
U : Tu Ho do nasida mangangguhi, jadi malua ma nasida, marhaposan tu Ho do
nasida, jadi ndang tarurak.
R : Alai gea nama ianggo ahu, ndada jolma, haeleson ni halak jala parbilean ni
natorop.
U : Sude angka na marnida ahu marengkelengkelihon ahu, dipangangang do babana
huhut mangupirupir.
R : Tu Jahowa ma nian dipasahat, asa dipalua ibana, dipangolu ma nian ibana, ai
lomo do rohana mida ibana.

3
 U : Ho do tongon na manait ahu sian ampuan, sipapos rohangku, mangonsop bagot
ni dainang.
R : Dung tubu ahu, sai Ho do parsigantunganku, sian butuha ni dainang dope sai Ho
do Debatangku.
U : Unang mandaodao Ho sian ahu, ai donok nama parmaraan, ai soadong
sipartumpak Ima sahatna. Martua do angka na tumangihon Hata ni Debata jala
na umpeopsa. Amen.
09. MARENDE BE.622: 1 - 2"Mansai Nalnal Di Angka Partingkian" BL. 622
Mansai nalnal di angka partingkian, sinondang ni silangMu Tuhanhi./Sian hatiuron na
marsinondang, holongNa na so halompoan i./Sude na bangso do marpanghirimon, tu
sondang ni asi ni roha i,Songon parluga na manghalungunhon, parbinsar ni mata ni ari i.
SilangMu Kristus tanda ni holongMu, pahisar tondi na magopu i,/Mangalononghon
sasude dosangku, mabaor tu laut asi ni rohaMi./Naung tubu hami gabe na imbaru, na ni
urasan sian dosa i,Ala mudarMu na ni usehonMu, di Golgota di hamamateMi.
10. MANGHATINDANGKON HAPORSEAON.
U : Tahatindangkon ma haporseaonta i, songon na hinatindangkon ni donganta
sahaporseaon di sandok portibi on. Rap ma hita mandok :
R : Ahu porsea di Debata Jahowa, …du.
11. SUNGGULSUNGGUL
12. MARENDE BE. 81: 1.."Jesus Mual Ni Ngolungku” BL. 185 (Pelean I a + I b)
Jesus mual ni ngolungku, Sipangolu tondingki,/Ai dibunu Ho musungku, i ma hamatean
i./Ho manaoni hamagoan, patupahon hangoluan,/Alani hupuji Ho, tung marribu hali do.
Haleaon, insakinsak, reherehe, tijur pe,/Tali dohot pastappastap, tung ditaonhon Ho
sude./ Paluahon au na pogos, sian tangan ni siboli,Alani hupuji Ho, tung marribu hali do.
Bugang sada tanggurungMu di na hona linsing i,/ Hamamalum ni buganghu na di
rohangki do i./Ho do gabe binuraan au dapotan hangoluan,/Ala ni hupuji Ho Tung
marribu hali do.
Sungsang duri ditumpalhon panginsahi i tu Ho,/ Jala tolong dilibashon tu uluM, pasiak
Ho./I ditaonhon Ho, Tuhanhu ala ni hajungkatonhu,/Ala ni hupuji Ho Tung marribu
hali do.
13. J A M I T A : Lukas 23: 44 - 48
14. MARENDE BE. 88 : 1-4 "Jesushu Naung Manobus au " BL. 106 (Pelean II)
Jesushu naung manobus ahu, sai naeng haholonganhu Ho./Tu dolok Golgata Ho laho
nionjar ni holongMu do./Hupuji nasa asiMi, alai gumodang holongMi.
Tarsolsolbagi do rohangku paidaida dangolMi./Marningot sasude dosangku, ai i do na
tinaonMi./Hupuji nasa asiMi alai gumodang holongMi.
Jotjotna i husoadahon Ho Sipangolu tondingkon./Mabiar lao manghatindanghon Ho na
manghophop au tongon./Hupuji nasa asiMi alai gumodang holongMi.
Bagas uhirhon tu rohanghu panghophopMi humophop au./Tusi ma togu pingkiranhu,
guru di Ho sambing ma au./ Hupuji nasa asiMi alai gumodang holongMi.
15. tangiang panutup+pasupasu
4