PARTORDING NI PARMINGGUON

DI MINGGU XXIII dung TRINITATIS

Ev. Jeremia 29: 1 – 7 Ep. Jakobus 5: 1 – 6

TOPIK:
PATULUSHON HADUMAON

HURIA KRISTEN BATAK PROTESTAN

RESSORT KEDATON
(Kedaton, Hanura, Bergen, Wiyono, Hajimena, Dame Tulang Bawang, Talangjawa)
Minggu, 15 Nopember 2020 - Pkl. 09.30 wib

Melalui Chanel Youtube

“MARTURIA HKBP KEDATON”

1
01. PAMUHAI :
U : Huria ni Tuhanta, hami saluhut Parhalado, pasahathon tabe ma tu sude hamu
ruas ni huria: Selamat Ari Minggu ma di hita saluhutna.
R : Selamat Ari Minggu!
U : Sai tong do huhaposi Jahowa, jadi dipaeleng Ibana diriNa tu ahu, jala
ditangihon alualungku. Torop do angka halongangan dohot sangkapsangkap
dibahen Ho humongkop hami, ale Jahowa, Debatangku, ndang tarpajojor tu
Ho, nang pe naeng baritahononku jala paboaonku, ndang tarpajojor tahe
dibahen toropna. Ingkon dohonon ni angka na mangkaholongi hatuaonMi
ma: “Timbul do Jahowa!”
R : Dangol pe ahu jala pogos, Tuhan i do sumarihon ahu. Ho do
pangurupingku dohot sipalua ahu! Ale Debatangku, sai unang pabenda!
U : Marhite parmingguonta sadari on tarjou do hita laho PATULUSHON
HADUMAON marhite na mangaringkoti hasonangan ni huta di dia hita
maringanan dohot manangianghon nasida tu Jahowa. Ai molo
marhasonangan huta i, marhasonangan ma dohot hita. Antong marsaor ma
hita marhite parmingguonta sadari on. Marlas ni roha ma hita mamuji Debata
ala nunga bongot asi ni rohaNa i tu hita. Marende ma hita.

02. Marende BE No. 125 1,2 MARLAS NI ROHA HITA ON BL. 82

❖ Marlasniroha hita on mamuji Debata
Ai asi ni rohaNa i do bongot tu rohanta i
Umbaen nuaeng mardomu i dison sadari on, dison sadari on
~~Jongjong~~
❖ Dibaheni manggogo be ma hita on sude
Mamuji Tuhan Jesus i parasiroha godang i
Sibaen las ni rohanta i, nuaeng nang sogot pe, nuaeng nang sogot pe

03. VOTUM – INTROITUS – TANGIANG:

U : Marhitehite Goar ni Debata Ama, dohot Goar ni AnakNa Tuhan Jesus Kristus,
dohot Goar ni Tondi Porbadia na tumompa langit dohot tano on. Amen. Na
mamolus do anggo portibi on rap dohot na pinangido ni rohana, alai na mian
ro di saleleng ni lelengna do na mangulahon lomo ni roha ni Debata.
Haleluya!.
R : (Mangendehon): Haleluya, Haleluya, Haleluya!
U : Martangiang ma hita : Ale Tuhan, Debata, Pargogo na so hatudosan,
Amanami saleleng ni lelengna! Asi ni rohaM do na mangaramoti hami sian
nasailaon rasirasa nuaeng, jala asi ni rohaM do na mangalehon Barita na Uli i,

2
 gabe hangoluannami. Sai asi ma rohaM, sai buhai ma rohanami jala lehon
TondiM na badia i, asa huantusi hami sude panogunoguM dohot
pambahenanMu na balga i. Paian ma HataM di bagasan rohanami, asa
mardame jala sonang hami jala lam imbaru rohanami marhitehite AnakMu,
Tuhan Jesus Kristus Tuhannami. Amen.
~~Hundul~~
04. Marende BE No. 118: 1,2 PAIAN MA DI HAMI BL. 6
❖ Paian ma di hami, o Jesus asiMi.
Asa tung unang hami, diansi musu i.

❖ Paian Tuhannami, hataM di hami be

Asa martua hami, nuaeng nang sogot pe
05. PATIK:
U : Tangihon hamu ma Patik ni Debata di Minggu XXIII dung TRINITATIS sadari
on, i ma na tarsurat di Jakobus 1:27. On do hadaulaton na ias jala na so
marlindang, di roha ni Debata Ama: Mandulo angka na so marama, so marina
dohot angka na mabalu di haporsuhonnasida, huhut mangaramoti diriniba
maralohon portibi on, unang marlindang. (Antong rap mangido gogo ma hita
tu adopan ni Debata).
R : Ale Tuhan Debata, sai pargogoi ma hami mangulahon na hombar tu
PatikMi. Amen.

06. Marende BE No. 165: 1,2 NA BASA DO ROHAM DI AU BL. 19

❖ Na basa do rohaM di au, o Jesus Tuhanki
Diihuthon Ho au tu na dao, mambuat rohangki
~~Jongjong~~
❖ Pardosa na godang do au, badia anggo Ho
Sai tu na roa do au lao, sai tu na jahat do.

07. MANOPOTI DOSA:

U : Huria ni Tuhanta, dibagasan roha na hohom tatopoti ma dosanta na godang i
tu adopan ni Debata, asa tama hita manjalo bagabagaNa taringot tu hasesaan
ni dosanta.:
(tingki na hohom . . : Musik ........BE No. 171 : 1)
U : Ale Tuhan Debata, Pargogo na so hatudosan, Parasi roha na sumurung.
Tongon do hami mangadopi sorimago Covid-19 na pola mambahen godang
marmatean, ngolu ekonomi na hurang denggan, songon i nang di ngolu
parhuriaon na so apala sude mardalan. Sai hira na tarbuang do hami ala ni
panosak ni parngoluan on. Ise na ma sihaposannami? Adong ma na deba na
3
 mamangke partingkian on holan tu pangomoanna sandiri alai laos godang do
na gabe humasusa ala ni maol ni perekonomian sinuaeng on. Alani Tuhan asi
ma rohaM di hami, ajari jala pargogoi ma hami asa tarjou hami laho
mangaringkoti hasonangan ni huta di dia hami maringanan, unang be holan
dirinami huringkoti hami alai dohot ma na tu humaliang. Ajari ma hami asa
tongtong satia manangianghon uluannami, pamarentanami asa tung denggan
saluhutna dirajai jala diramoti angka na pinarmahanna. Padao ma hami sian
roharoha na holan mangharingkothon diri sandiri alai patupa ma hami gabe
pasupasu manang di dia pe hami maringanan.
R : Ale Tuhan Debata, Pargogo na so hatudosan, Parasi roha na sumurung.
Patupa ma hami gabe pasupasu manang di dia pe hami maringanan.
U : Ale Tuhan Debata, Pargogo na so hatudosan, Parasi roha na sumurung, Ama
ni Tuhan Jesus Kristus Sipangolu hami! Hami, halak pardosa na dangol on ro
tu jolo ni habangsa habadiaonMi manopoti jala manganggukhon dosanami.
Mansai jotjot huarsahi hami Ho marhitehite pingkiran dohot hata dohot
pambahenannami na roa i. Ndang huhaholongi hami Ho sian nasa rohanami
dohot nasa ateatenami dohot nasa tondinami dohot nasa gogonami; nang
dongannami, ndang doshon dirinami hubahen hami. Dibahen i tama do
rimasanMu jala uhumanMu hami tu hamatean saleleng ni lelengna i. Alai na
maporus ma hami nuaeng tu asi ni rohaM na godang i mangido sian nasa
rohanami hasesaan ni dosanami saluhutna. Sai urupi ma hami paubahon
rohanami ala ni Tuhan Jesus Kristus, Anak haholongan ni RohaM, Sipangolu
hami dohot ala ni GoarMu na badia i. Ale Tuhan, sai asi ma rohaM di hami
halak na dangol on ! Amen.
R : (Mangendehon): 171: 2 TANDAI MA AU BL. 49
❖ Asi ma rohaM, taringot tu pangalahongku.
Olo tutu, jotjot do na lilu dalanku.
Sesa dosangku, sude Debata.
U : Tabege ma Hata bagabaga taringot tu hasesaan ni dosa: Satongkin do
Hutadingkon ho, alai papungupunguonHu ma ho muse marhitehite angka asi
ni roha godang! Tagan di parpiar ni murukHu Hutabunihon bohingKu
satongkin maradophon ho, alai marhitehite dengganbasa salelenglelengna
asianHu ho, ninna Jahowa Sipalua ho. (Jes. 54: 7, 8). Hasangapon ma di
Debata na di ginjang!
R : Amen ~~Hundul~~
08. Marende BE No. 390: 1 NUNGA SAE DOSAM BL. 259
❖ Nunga sae dosam ulaning, malum ho? Naung diauhon ho mudarNa i?
Ai ias do ho, na saksak bajumi? Na di auhon ho mudarNa i?

4
 Ias ho, malum ho, dibaen mudar ni Tuhanta i? Ai naung saksak bajum songon
hapas i? Ai ias ho dibaen mudar i?

09. E P I S T E L :
U : Tabege ma Hata ni Debata turpuk ni ari Minggu XXIII dung TRINITATIS on i
ma na tarsurat di Jakobus 5: 1 – 6, E hamu angka na mora, tumatangis ma
hamu jala mangangguhi managam haporsuhon, na naeng songgop tu hamu.
R : Nunga busuk hamoraonmuna, nunga ngitngiton ulosmuna.
U : Naung tasihon do sere dohot perakmuna, jala sitindangi dompak hamu do
tasik i, na manggagat tu sibukmuna songon api. Dipapungu hamu do arta di
angka ari na parpudi.
R : Na maungaung do na nidobomuna, i ma upa ni angka pangula na
manggotil angka haumamuna, jala panjouon ni angka panabi, nunga
sahat tu pinggol ni Tuhan Sebaot!
U : Tarlobi do pargadombusonmuna di tano on, dipamokmok hamu do dirimuna
di ari pamotongan.
R : Diuhumi dibunu hamu do Partigor i; ndang dialo Ibana hamu!
U : I do sahatna: Martua ma angka na tumangihon Hata ni Debata jala na
umpeopsa. Amen.

10. Marende BE No. 482: 1,2 ASA ON MA NA TUTU BL. 326

❖ Asa on ma na sintong, Jesus i do na burju.
Mago pe portibion, tu Ibana rohangkon.
~~Jongjong~~
❖ Jesus do ummaol di au, ai arga ditobus au,
Nang musuNa au nian, jala mago au hian.

11. MANGHATINDANGHON HAPORSEAON:

U : Tahatindangkon ma haporseaonta i, songon na hinatindangkon ni donganta
sahaporseaon di sandok portibi on. Rap ma hita mandok:
R : Ahu Porsea……d.u……… ~~Hundul~~
12. TINGTING :
13. Marende BE No. 758: 1-- JAHOWA PANGURUPI (Pel. Ia – Ib tu Huria)
❖ Jahowa pangurupi di si ulaonmi.
Dilehon pos ni roha di ganup tingki i,
Nang pe sipata ganggu haporseaonmi
Jamot tongtong Tuhanmu manjaga ngolumi.

5
 ❖ Jahowa las ni roha saleleng ngolumi,
Ibana haroroan ni nasa na uli
Ai disarihon Jesus sude naringkot i,
Halashon panoguon ni Jesus Tuhanmi.
---- Musik ----
❖ Jahowa pandongani di na porsea i
Ibana patuduhon nang sidalananmi
Asa marolop-olop ho di ujungna i,
Ibana do donganmu nuaeng nang sogot i.

14. JAMITA: Jeremia 29 : 1 – 7

15. Marende BE No. 763 : 1-- MOLO JESUS DONGANMI

( Pel. II tu Ulaon Kategorial Ama)
❖ Molo Jesus donganmi las roham,
Jesus i pangurupim, las roham,
Hot haporseaonmi dohot pos ni roha mi
Mardonganhon Jesus i las roham.
Las roham, las roham mardonganhon Jesus i
Las roham, marsinondang ma di ho,
bintang pangkirimon i mardonganhon Jesus i las roham.

❖ Molo Jesus donganmi las roham,

JagaonNa tondimi las roham,
Tiruonmu ma tongtong dame nang holongNa i,
Saleleng dingolumi las roham
Las roham ………d.u……

16. PANGUJUNGI: ~~Jongjong~~

U : Nunga tabege Hata ni Debata na paingothon hita asa tongtong patulushon
hadumaon. Dalan patulushon i naeng ma rade rohanta laho mangaringkoti
hasonangan ni huta di dia hita maringanan. Unang be sai holan dirinta
taharingkothon alai dohot ma nang na humaliang. Tangianghon hamu ma
huhut angka uluanta nang pamarentanta asa tung denggan saluhutna dirajai
jala diramoti angka na pinarmahanna. Tangianghon hamu ma nang huta di
dia hamu maringanan tu Jahowa, ai molo marhasonangan huta i,
marhasonangan ma dohot hamu.
R : Ale Tuhan Debata, patupa ma hami laho mangaringkoti hasonangan ni
huta di dia hami maringanan.

6
U : Borhat ma hamu tu tongatonga ni portibi on. Ulahon ma na denggan, patupa
ma parsuruon ni Tuhan i asa gabe pasupasu hamu di tongatonga ni portibion.
Unang hamu mabiar ai Debata do na mandongani hamu. “Onpe, on do
sipaingothu, naeng ma ulahononhon parjolo situtu pangidoan,
partangiangon, parpangondianon dohot hamauliateon humongkop saluhut
halak, humongkop angka raja dohot saluhut parhuaso, asa marsonangsonang
jala so hariboriboan hita marpangalaho, di bagasan sandok hadaulaton dohot
hahormaton. Na denggan do i, jala halomoan ni roha ni Debata, Sipalua hita.”
R : (Mangendehon) BE No. 820: 2 PANGKE MA TINGKIM
❖ Pangke tingkim unang ho marnalemba, Topoti urupi na dangol i.
Sai marsinondang ma baen palitomu, Baen hasangapon di Tuhanta i,
Ai ndang adong na hot di atas tano on nasa na uli
Lao salpu do i, holong ni roha na hot na manongtong
Holan di Jesus do boi jumpang i.
U : Tatangianghon ma peleanta: Ale Debata, Amanami na di banua ginjang, Ho
do haroroan ni saluhut silehonlehon na denggan dohot nasa ulibasa na
mauliutus. Hupasahat hami ma sian na nilehonMi tu hami, peleannami tu Ho.
Sai jalo ma i gabe uap na hushus di joloM. Pasupasu ma i jala ramoti asa
huparhaseang hami pelean on, patimbulhon harajaonMu di tongatonga ni
huriaM dohot di portibi on. Buhai ma rohanami marhitehite TondiM, asa lam
hutanda hami godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. AMEN
R : (Mangendehon) BE No. 204: 2 NDANG TADINGKONONHU HO BL. 73
❖ Nasa na nilehonMi, tondi ro di pamatanghu.
Hosa dohot gogongki, ro di saluhut artanghu.
Hupasahat i tu Ho, na so unsatonhu do.
U : Ale Amanami na di banua ginjang! Sai pinarbadia ma GoarMu! Sai ro ma
harajaonMu! Sai saut ma lomo ni rohaM di banua tonga on songon na di banua
ginjang! Lehon ma tu hami sadari on hangoluan siapari! Sesa ma dosanami
songon panesanami di dosa ni dongan na mardosa tu hami! Unang hami
togihon tu pangunjunan! Palua ma hami sian pangago!
R : (Mangendehon):
❖ Ai Ho do nampuna harajaon, dohot hagogoon.
Ro di hasangapon, saleleng ni lelengna, Amen
U : Pasupasu !
7
 R : (Mangendehon ) Amen… Amen… Amen...

PELEAN PARMINGGUON DI GANUP BAGAS

MINGGU XXIII DUNG TRINITATIS, 15 NOPEMBER 2020
--------oOo-------

Mauliate ma di Debata pardengganbasa i, ai diramoti jala dipasupasu

do hami sakeluarga mamolus angka partingkian. Tarlumobi sadari on,
dipasupasu do Parmingguonnami sakeluarga. Sian balga ni roha
dohot las ni rohanami keluarga, hupasahat hami peleannami:
Keluarga : ………………………………………………………
Lunggu : ………………………………………………………
Godang ni Pelean : ………………………………………………………
Torop ni na mandohoti Parmingguon : …………………………halak

Persembahan diserahkan di dalam Amplop kepada Sintua Lunggu

Atau langsung di Transfer ke Rekening HKBP Kedaton
BRI Cab. Tanjungkarang : 0098-01-003906-30-7