ACARA PERAYAAN BONA TAON PUNGUAN raja nainggolan

Minggu, 12 Februari 2023 .

Tema : “Mandok mauliate ma hamu siala saluhutna! Ai i do
dipangido Debata sian hamu marhitehite Kristus
Jesus” (1 Tesallonika 5 : 18)
I. KEBAKTIAN :
01. Joujou Marsomba Tu Debata :
(U : Uluan, Hl : Hulahula; Br : Boru ; S : Sudena)
U : ‘Selamat Taon Baru ma di hita Pomparan ni ompunta Raja Nainggolan, boru,
bere dohot ibebere a na pungu nuaeng on’. On ma ulaon las ni roha na tapatupa
Partangiangan Bona Taon di taon 2023 on. Naeng ma tabungka parpunguan on
marhite tu Tuhanta Debata di bagasan las ni roha. Songon na nidok ni umpasa :
“Eme do gabe boras jala boras ni lompa bahen indahan na las’. ‘Dame do na
binoan ni Tuhanta ima sibahen na horas jala pasupasuNa mambahen roha na las”.
Antong las ma rohanta di parsaoranta di Pestanta sadari on tarlumobi mambongoti
taon na imbaru na pinasahatNa tu hita.
Hl : Mauliate ma di Debata, na paloas hita angka Pomparan ni Ompunta Raja
Nainggolan na adong di luat on dibagasan hahipason, sonang dibagasan sada ni
roha na patupa parsaoran dibagasan parmargaonta dohot dibagasan Tuhanta i.
U : Hata syalom do dohononta di punguanta on, ala boi hita marsonang jala
masipaolooloan, songon na ni dok ni natuatua : “Balintang pagabe ma na
tinabotaboan. Ari ni sude na sa-Pomparan Ompunta Raja Nainggolan ma mardame
sonang, ala olo sude hita masipaolooloan”. Antong Ibana ma na marsangap di ulaon
las ni roha dipartangian bona taon 2023 on.
BR : Dison do hami ale Jahowa marpungu angka boru sian Pomparan ni Ompunta Raja
Nainggolan jalo ma parpunguan nami on jala ingani rohanami sudena.
U : Saut do antong na taparsinta ala sude hita masihaholongan dibagasan holong ni
Tuhanta i, laos ido tiruan di hita angka na marhahamaranggi, na marhulahula, dohot
na marboru. Songon ni dok ni na tuatua ma : “Marguru ma siborok, di julu ni
tapian. Tuhan Debata ma na marorot jala dilehon ma dihita Pomparan ni Ompunta
Raja Nainggolan angka parsaulian”. I ma na tapangido di na mandalani bona taon
2023 on.
S : Joujou do hami lao marsomba tu adopanMu na gok hamuliaon, hasangapon dohot
hagogoon. Antong hupangke hami ma ulaon nami on laho patupa parsaoran na lam
martamba dibagasan rap hami dohot angka keluarganami laho mamuji dohot
manangihon hataM gabe ojahan di ngolunami ditaon na imbaru on.
U : (martangiang na hohom ma hita dibagasan rohanta be. ….Amen).
Antong nunga be singkop panghobasionta laho marparsaoraan dohot Ibana, songon
na ni dok ni natuatua : “Turtur ninna anduhur, tio ma ninna lote. Barita na uli ma
sijaloonta dipartangiangan bona taon ni ompunta Raja Nainggolan di tingki on
dibagasan hasadaon sipatupaonta, sai unang ma i antong muba unang ma muse”,
 ala dibagasan goarNa na marmulia hita patupahon punguan bona taon 2018 on.
Marende ma hita:
02. Marende BE. SdJ. No. 565 : 1, 4 “Las rohangku lao mamuji”
 Las rohangku lao mamuji Debata Parholong i, Songon bunga na mangerbang di na
binsar ari i. Arsak, dosa, haporsuhon mago dibaen asiMi. Las ni roha na
manongtong lehon di au Tuhanki.
 Rap ma hita mangendehon, sangap di GoarNa i, Tapangiar soaranta lao mamuji
Tuhan i. Sun do holong ni rohaNa na so marnamontok i, i do pasadahon hita
salelenglelengna i.
03. Votum : (U : Uluan, S : Sude)
U : Marhitehite goar ni Debata Ama dohot goar ni Anakna Tuhan Jesus Kristus dohot
goar ni Tondi Parbadia na tumompa langit dohot tano on.
S : Amen.
U : Mandok mauliate ma hita tu Debata ala asi ni rohaNa tu hita ganup, mangalehon di
hita taon 2023 on, alani tapuji ma Ibana dibagasan hadameon jala tasomba Ibana.
S : Ale Debata parholong roha di ganup jolma, sai tugotogu ma hami di taon naimbaru
na pinasahatMu tu hami tarlumobi di pomparan ni ompunami on, jala pahot
rohanami mandalani taon on asa marlas ni roha hami huhut roha nat tontong
mandok Mauliate.
U : Dengganna i jala lehetna i hami Tuhan molo rap hami sahundulan, saparsaoran di
bagasan Ho, antong sai saut jala tulus ma sude hataM tu hami ala olo hami
marhaporuson tu Ho.
U+S: (Mengendehon, BE. HKBP No. 122 : 1 “Ida hinadenggan ni” BL. 13)
 Ida hinadenggan ni angka na saroha i. Parpambaenan na burju nang hatana pe
tutu.
U : Martangiang ma hita : Ale Tuhan Debata! Sian asi ni rohaM do umbahen sahat
hami tu taon na imbaru on; Ho do na mangaramoti hami dibagasan taon na salpu i.
Sai asi ma rohaM, sai unang tulak hami nuaeng, sai dongani hami dibagasan taon na
imbaru on. Pasupasu hami ro di angkaulaon na denggan, na hula hami marhitehite
GoarMu. Alai na gumodang, pasupasuhon ma hataM na badia i tu rohanami, asa
gabe na imbaru rohanami, asa tarpamasuk Ho hami tu banua gingjang di hasusuda
ni bohalnami.
U+H: Amen !
04. Marende BE No. 64 : 1 “Naung moru do muse sataon” BL 192
 Naung moru do muse sataon, huhut lam suda bohalhi, beha do au nasai laon, ture do
pangalahongki, lam ganda haporseaonku,nang holong ni rohangku pe di Jesus dohot
Debatangku, nang di donganku sasude.
05. Responsoria Marningot Pangurupion ni Jahowa di hita : (U : Uluan, S : Sude)
U : Sian nasa rohanta, tahalashon ma Taon Baru on, laos taparade ma rohanta
mamilangi angka naung ta jalo diganup keluarganta be di taon na salpu i sian
Debata, huhut naeng tataponta ma tu jolo dia ma muse na boi sipatupaonta di taon
2023 on. Tapangido ma tu Dabata asa tangkas tahangoluhon denggan jala sonang
ni na marhahamaranggi di parmargaonta dohot di Tuhan i.
 S : Ragam na tabolus na sataon naung tasalpuhon i dingolunta dohot di Pomparan on.
Boi do i jut ni roha patubu panaritaan, olo do ganggu ni roha, asa sudena pe i las
ma rohanta manjalo taon na imbaru on di na pinasahatNa di hita.
U : Holan Ho do Tuhan si sombaon nami, alani i ro hami tu joloM asa gabe jolma na
marhabiaran holan tu Ho hami. Ajari hami gabe sioloi Ho tu joloan ni ari on, jala
ajari hami dina manogunogu anakhonnami tu dalanmu na sintong i.
S : Dang hoboto hami Tuhan tu dia hami mangalangka, alani i Tuhan, Ho ma na
pasadahon rohanami, marsitangiangan, marsiurupan, marsitungkaran pingkiran,
gabe las ma rohanami mangula ulaon na pinasahatMi tu hami ganup.
U : Ale Tuhan, sude partingkian na hubolus hami, angka na maol, na hansit, sai urupi
hami Tuhan manalpuhon i, asa boi marlas ni roha hami mamuji goarMu na Badia i.
U+S : Amen.
06. Marende BE. No. 70 :1 - 2 “O Jesus Sipangolu au” BL. 36
 Naung salpu taon na buruk i, Ho ma hupuji Tuhanki, ai diramoti Ho tongtong,
tondingku dohot dagingkon, ai diramoti Ho tongtong tondingku dohot dagingkon.
 O Jesus sai asi roham, paian denggan ni basaM, muse ditaon na imbaru on, dinasa
huriaM tongtong, muse ditaon na imbaru on, di nasa huriaM tongtong.
07. Epistel Psalmen 106 : 1 - 5, songon on ma didok disi : (U : Uluan, S : Sude)
U : Halleluya! Mandok mauliate ma hamu di Jahowa, ai na basa do Ibana, ai ro di
salelenglelengna do asi ni rohana i.a.
S : Tung ise ma tuk mangkatahon angka hagogoon ni Jahowa, patubegehon baritana i
sudena?
U : Martua ma angka na mangaradoti uhum, na tongtong patupahon hatigoran.
S : Sai ingot ma ahu, ale Jahowa, hombar tu halolomo di bangsom, sai tingkir ma ahu
marhitehite hatuaonmi!
U : Asa hupaidaida hadoharon ni angka na pinillitmu, asa huhalashon halalas ni roha ni
bangsomi, mamujimuji rap dohot partohapanmi. I ma sahatna : Martua do na
tumangihon hata ni Debata jala na umpeopsa.
U+S : Amen.
08. Marende BE. No. 18 : 5 “Ungkap bahal na umuli” BL. 84
 Baen togu haporseaon dibagasan rohangki. Asa unang be rampason ni sibolis
artangki. Sai ditogu hataMi ma au on tu surgo i.
09. Manopoti Dosanta na godang i tu adopan ni Tuhanta :
U : Molo manaili hita di taon na salpu di punguanta on, godang do na hurang lobi na
taula. Mardosa do tangan, mata, pamangan, luhutna marsala do hape. Alani i, di
na mamungka di taon 2023 on, tapangido ma asi ni roha sian Debata asa tama hita
di joloNa.
S : Di Partangiangan Bona Taon on Tuhan, pahehe ma partondion nami, pahehe
pamatang nami, pahehe hami laho mangulahon ulaon nami tu lomo ni rohaM.
U : Huparhatopot hami do hagogoonMu jala porsea do hami di angka hinadenggan ni
rohaM, alani i urupi ma hami asa margogo manghhatindanghon Ho ditonga-tonga
ni torop halak na manaon na bernit.
S : Urupi ma hami Tuhan, togu hami tu haluaon na singkop, asa tongtong
hupataridahon hami hasadaonmami di Pomparan on dohot tu na humaliang hami.
 U : Tabege ma bagabaga taringot tu hasesaan ni dosanta : Ise be mangaluhon angka
na pinillit ni Debata? Debata do na mamintori, ise do na mandabu uhum
hamagoan? Kristus Jesus do naung mate. Alai ndada holan i, naung mulak
mangolu do jala di siamun ni Debata do Ibana mangondihon hita. Hasangapon
ma di Debata na di ginjang!
S : Amen.
10. Marende BE. HKBP SdJ. No. 656 : 1 – 2 “Parhahamaranggion”
 Parhahamaranggion i, lam hot jala togu, Singhop ma hasadaon i, di Jesus i burju,
Rap sauduran hita be marholong na tutu, Mardame, marlas roha ma di Jesus i tutu.
 Togu ma hasadaon i; di ojahanna i, Sada haporseaon i, di Tuhan Jesus i. Ai sada
pandidion i, ai sada Ama i,Sada ma hita Kristen i manomba Tuhan i.
11. Jamita :
12. Marende BE. No. 369 : 1-- “O Jesus Panondang” (P. Pelean) BL. 143
 Na marhahaanggi hita sasude. Ndang mardia imbar manang ise pe. Asing be hatanta
nang luatta pe. Sada do Amanta i taingot be.
 Sada do Amanta Sipangolu i. Sumarihon hita salelengna i. Sasude ngolunta nang
bohalta i. Sada do Amanta paradehon i.
 Sai diranapranap hita on sude. Jumpa marsikola nang marmeam pe. Ndang tarula
hita sasude tahe. Molo so Amanta di lambungta be.
13. Parsuruon :
U : Ale Tuhan Debata mauliate ma di denggan ni basaM tu hami na paloas Pomparan
ni Ompu Raja Nainggolan tolhas tu Bona ni Taon 2023 on. Antong jalo ma sude na
husombahon hami tu Ho jala ajari hami na sapunguan on asa olo hami mamboan
barita nauli i naung hubege hami.
S : Lam martamba ma tutu taon ni ngolunami, tamba taon ni punguan Pomparan ni
Raja Nainggolan on, antong lam tamba ma tutu di hita angka na hinadenggan ni
parsaoranta na sapunguan on di taon 2023 on.
U : Mandok maulitae ma hamu tu Jahowa ai pardenggan basa do Ibana, ai di
salelenglelengna di asi ni rohaNa. Ibana do patariparhon hita sahat tu taon na
imbaru on, hagogoonna do na mandongani hita sahat tu tingki on.
S : Marsada ni roha do hape na pinangido ni partangiangan bona taon on di hita, ai ido
mual ni hangoluan na paimbaru diri dibagasan holong ni Tuhanta i.
U : Ale Tuhan Raja ni Huria, sai lam pasada ma hami di Punguan Pomparan ni Op.
Raja Nainggolanon, asa boi sada rohanami laho manguduti punguan taon 2023 on
na so huboto hami aha sipatupaonnami jala ajari hami mandalani ariari ni ngolu
nami ala ni Ho Debatanami.
14. Ale Amanami/Pasupasu/Amen.
15. Masijalangan.
II. ACARA RAMAH - TAMAH.
Dalihan Natolu : Somba marhulahula, elek marboru, manat
mardongan tubu. Taingot ma i !!!
“SELAMAT TAHUN BARU MA di HITA SUDENA”