Bahan Sermon Epistel HKBP Distrik VII Samosir

Selasa, 27 Februari 2018

Ev. Jesaya 43:16-21 Ep. Pilippi 3 : 13 - 16

Patujolo
Surat ni Apostel Paulus tu halak Pilippi on, paandarhon panghobasion dohot haporseaon ni Apostel Paulus
asa gabe tiruan tu saluhut ruas ni Tuhanta. Di dok ibana do songon sada si paingot tu halak manang huria Filipi asa
hot marhaporseaon di Tuhanta Yesus, tarlumobi di pardalanan ni ngoluna, na tongtong solhot jala manghaposi
Debata. Asa mangulahon ulaon parasinirohaon, halambohon ni dirina, dohot pangaradeon na pinatupa, andorang so
di ulahon panghobasion parjolo sahali jumolo pasahathon dirina tu Kristus.
Hatorangan Ni Turpuk
Di pabotohon ap. Paulus do pardalanan ni ngoluna andorang so manjalo Jesus Kristus (ay.4-7); tung holan
tu na niida ni mata do ibana porsea, manusai huria atik pe naung marsunat ibana di ari paualuhon, sian tongatonga
ni halak Israel, pomparan ni si Benjamin, Halak Heber, halak Farise, unduk tu Patik. Alai ndang di janghon ibana
Jesus Sipalua i ala so tu Debata ibana mangadophon bohina.
Alai narumingkot ima ngoluna songon natarsurat di ay. 7, " Alai naung paruntungan hian di ahu, harugian
do i hujujur ala ni Kristus i". Hata on manungguli hita tu panjouon dohot hamubaon ni rohana di Ul. Apostel 9. di
pardalananna (gorna uju i "Saulus") tu Damaskus na tung marapipurun laho manusai dohot mamunu siihuthon
Kristus, napinaborhat ni Surat sian Sintua ni Malim. Alai uju di tongandalan ibana, mardonokkon huta Damaskus,
tompu ma sumillam sondang sian ginjang humaliang ibana. Jadi tinggang ma ibana tu tano, dung i dibege ma soara
na mandok tu ibana: Saulus, Saulus! Boasa leleanmu Ahu? Alai didok ma: Ise do Ho, Tuhan? Jadi didok Ibana:
Jesus do Ahu, na nileleanmi. Dibege angka donganna sauduran do hata i, alai ndang di ida nasida ise na mandok i.
Jadi hehe ma si Saulus sian tano i; alai dung diungkap matana, sandok ndang marnida be; laos ditiop nasida nama
tanganna, manogu ibana tu huta Damaskus. Asa tolu ari lelengna ndang marnida matana jala ndang mangan
manang minum ibana. Di huta Damaskus i sada sisean na margoar Ananias na di suru Debata laho mangampehon
tangan tu ibana, asa sumuang marnida. Didok Tuhan i ma tu ibana: Laho ma ho, ai hupillit do ibana ulaulangku,
asa diboan Goarhu tujolo ni angka bangso, nang tujolo ni angka raja dohot tujolo ni angka anak Israel. Dungi i ma
si Paulus gabe ulaula ni Debata. Andorang i, sahalak parjahat do ibana, alai dung tarjou ibana, gabe parbarita Nauli
ma ibana atik pe ingkon mamolus godang hamaolon dohot hasusaan. Jala marhite ulaon ni ibana, gabe torop halak
porsea di Tuhan Jesus.
Tontu do adongbe ngolu haholomon (na jahat) di hita di angka ari naung salpu; pargabuson, mangahut tu
diri, pangarimason, marbadabada dohot lan naasing. Alai nuaeng naung di jou Tuhan Jesus hita laho mangadophon
bohi, ngolunta tu ibana. Hinorhon ni pamelehonon ni diriNa dohot holong ni rohaNa i, naeng ma hita mangolu
hombar tu lomo ni rohaNa i.
Paulus boi gabe tiruan di ngolunta songon na ni dokna: "Huhalupahon na di pudingku, hueaki angka na di
jolo. Dompak pandang i do hupuspus, dompak upa hamonangan na sian panjouon ni Debata sian ginjang, di
bagasan Kristus Jesus i." (ay. 14).
Manghalupahon ndang lupa ingatan (amnesia), pikun, kecelakaaan/ sakit, manang manghapus memori
ingatan. Alani aha? Ala taboto do manirang na roa sian nadenggan. Jala ingkon ingotonta do pangalaho na holom i
asa tangkas ingotonta naung dipalua do hita sian hajahaton dohot dosa i. Ala ndang tau hita mandok "nunga
marhamubaon au, nunga dipalua" alai ndang taboto sian dia hita dipalua, manang sian dia hita marhamubaon. Jadi
’manghalupahon’ dison ndang marlapatan lupa sian parningotan, alai manadinghon, ndang patupahon alai
marlojong mardompakhon Jesus Kristus.
Di portibi on, hea do hita manjalo silehonlehon; nametmet manang na balga, naarga dohot lan naasing.
Tontu do tung las roha manjalo silehonlehon manang hadiah. Isara ni sahalak parsingkola namanjalo hadiah ala
prestasina di singkola, manang kado ala ulang tahun. Tontu do tung mansai las rohana manang bangga manjalosa.
Alai naeng ma umlas rohanta manjalo silehonlehon nasian Tuhan Jesus Kristus, ima; las niroha, dame, pasupasu
partondion dohot pardagingon, lumobi tahe ngolu nasaleleng nileleng na di harajaonNa i. Silehonlehon i dipasahat
tu na mangadophon ngoluna tu Tuhan i dohot panjounNa i. Apostel Paulus mandok, ingkon marsiadu (marlojong)
do hita mandapothon Ibana jala manadinghon pangalaho na holom i. Burju ma hamu marlojong, asa dapotan hamu!

Panimpuli
Naeng songon i ma nian hita marroha jala marpangalaho. Di minggu Okuli on (Sai tong mangaranapi matangku tu
Jahowa) naeng ma pandang situjuon ni ngolunta mardompakhon Tuhan i. Holan tu Ibana ma hita mangido
pangurupion jala tu Ibana ma tatujuhon ngolunta, ai holan dibagasan Ibana do dapot hita pangurupion,
hamamalum, haluaon dohot haimbaruon ni ngolunta. Jala naeng tongtong mardompakhon Tuhan i hita di ngolunta
i asa tundal sibolis sian hita rap dohot angka pangalaho haholomon i; hajahaton dohot dosa i. Manang ise na
mambahen Debata gabe tujuan ni ngoluna, dompakhonon ni Debata do nang bohiNa maradophon hita; jala
parsaulihononna godang pasupasu partondion nang pardagingon. Amen.