ACARA PARTANGIANGAN LAHO MANABURHON BONI

HKBP URATAN RESORT ANDAM DEWI

SELASA 04 OKTOBER 2022

(Sude boni nanaeng sisaburhononhon tu ladang i asa dipapungu ma tu jolo

ni langgatan on)
1. Marende No. 6 : 1 + 4 “Puji Jahowa na Sangap”
Puji Jahowa nasangap huhut marmulia,
hamu sudena parroha naringgas naria.
Marpungu be marolop-olop sude, hamu sude manisia.
Puji Jahowa situmpak sude ulaonmu,
Ai di tumpakko tu ho tongtong hangoluanmu.
Ingot ma I denggan basaNa do i, tomutomuna sambing do

2. Votum
Pdt : Marhitehite Goar ni Debata Ama, dohot Goar ni AnakNa Tuhan
Jesus Kristus, dohot Goar ni Tondi Parbadia namanompa langit
dohot tano on. Amen.

H : Holong situtu do rohangku di Ho ale Jahowa sipargogoi ahu ala

dilehon Ho angka naringkot di ngolunami, jala Ho do napangoluhon
ahu ido umbahaen so humasusa be ahu salelenglelengna.

Pdt : On pe, saleleng adong tano on, ndang jadi mansohot saburon dohot
gotilon, ari ngali dohot ari las, ari logo dohot rondo ni ari, arian
dohot borngin. Martangiang ma hita: Ale Tuhan Debata Ama nami
na di banua ginjang. Sasada Ho do siparmahan nadenggan roha.
Namarpungu do hami nuaeng martangiang, laho pasahathon
pangidoan nami tu Ho. Huhaporseai hami do, Ho do Debata mula ni
nasa na adong, Ho do sitompa na adong hian naso adong hian, jala
mambaen manjadi sude nasa naniula. Nuaeng huboan hami do boni
on tu joloM, asa jumolo pasu-pasuonMu andorang so husuan hami.
Asi ma roham ale Debata, sai ramoti ma na huula hami, asa dao sian
angka bala, isara ni aek magodang, antingango, gulok-gulok ni tano,
alogo manang ambolas, ro di manang aha pe tahe na tau manegai na
huula hami. Lehon ma udan dohot las ni ari ditingki halehetanna asa
 tung mansai denggan tano hatubuan ni suansuanan natau gabe
hangoluan nami. Hupangido hami ma tu Ho, sai parrohai jala ajari
ma hami marhaseanghon gogo ni naniulanami ia tung maruli
pasupasu sian Ho, asa hupatupa hami i tu namarguna di hami, jala
tau pangalapan sangap di goarMu. Sai tangihon jala oloi ma
pangidoannami on, marhitehite Tuhan Jesus Kristus Tuhannami,
Amen.

3. Marende No. 309 : 1 – 2 “Raphon Tuhan Jesus i “

Raphon Tuhan Jesus i pungka ulaonmu, ingkon tu Ibana i parguruhononmu,
baen Ibana donganmi hehe dohot modom. Dege ma bogasNa i rohami
pahohom.

Ganup sogot ingkon do Jesus jouhononmu, Asa urupanNa ho di siulaonmu.

Ai arian borngin pe naeng ho dongananNa. Dosami pe sasude Naeng
taluhononNa.

4. Manjaha hata ni Debata.

a. 1 Musa 8 : 22 (St. R. br. Sitanggang)
b. Parjamita 11 : 6 (St. br. Pandiangan)
c. Poda Raja Salomo 28 : 19 (St. Br. Butarbutar)
d. Psalm 126 : 5 – 6 (St. P. Simamora)
e. Psalm 67 : 7 – 8 (St. P. Simatupang)
f. Psalm 107 : 37 – 38 (CSt. J. Maihuruk)
g. Hesekiel 34 : 26 – 27 (St. P. Marbun)

5. Marende No: 194: 1 - 2 “Aut so asi roham”

Aut so asi rohaM, aut so godang basaM tudia au
Alai dibaen basaM dohot asi rohaM, tu surgo au.

Anggiat ma holong rohangku sai tongtong burju tu Ho.

Sai dongananMu au manang tudia lao sonang tutu.
6. Martangiang Sian sahalak Parhalado
(Manangianghon angka ruas ni huria asa dibagasan  hahipason dohot ringgas
ni roha laho manngula-ulaonna tarlobi manaburhon boni sisaburhonon
songoni nang tu parmingguan.)

7. Marende No. 711 : 5 “Songon Ursa na Binuru”

Di parbaga Debatangku asi ni rohaNa i
Di au, jadi las rohangku molo sai huigot i
Borgin nang arian pe, huendehon do sude
Denggan basa ni Jahowa na manolong naposoNa.

8. Martangiang sian sahalak ina

(Manangianghon boni sisaburhonon asa dipajengkar Debata,  dipadao nang
angka gulok-gulok namanegai, dilehon nang udan paremean, songoni nang
angka las ni ari,  angka hahipason, angka ama asa ringgas mula-ulaon tarlobi
tu parmingguan.)

9. Marende No. 373 : 1 “Mangula hita jolma”

Mangula hita jolma Manabur boni i Alai anggo jadina di Debata do i.
Dilehon las ni ari nang nambur udan pe. Tongtong di panumpakNa marguru
sasude. Nasa ulibasa ro sian Debata, i pe Ibana puji ma huhut haposi da.

10. Pasahat Boni

Pdt : Huria na hinaholongan di bagasan Krsitus Jesus. Sadarion, 04
Oktober 2022 Tapatupa do partangiangan manabur boni. Paingothon
hita do ulaon on paboa ndada ala ni gogonta manjadi saluhut na
taula, alai na ro ma hita tu adopan ni Debata pasahathon nasa
hadirionta di na laho mangula ulaonta i. Na ro ma hita tu adopan ni
Debata asa Ibana na mandongani, mangurupi, manumpahi jala
mamasumasu ulaonta i.

H : Ale Tuhan, mangasahon HataM na badia i do hami. HataM na

mandok : Manang ise na mangula tanona, bosuran ma di sipanganon;
alai anggo halak na mangolooloi marlanggelangge, hurangan roha
do. ( Poda 12 :11).
 Pdt : Adong do hata pangkirimon ni halak batak na mandok “Tu sanggar
ma amporik, tu lubang ma satua. Sinur ma napinahan gabe naniula, “
Habang ambaroba, songgop tu hau sitorop. Debata na martua luhut
ma hita diparorot”. Togu ma haporseaonmu, radoti ma poda hombar
naung niajarhon tu hamu, ingotma hata ni Tuhan namandok “Na so
ra mangula unang ma ibana mangan”. Ima tiop, paringgas ma roham
mangula-ulaonmu.

H : Ale Tuhannami, Sapala naung di loas asi ni rohaM hami manguduti

ulaonnami di hauma manang di porlak, sai paborhat ma hami di
bagasan pos ni roha dohot panghirimon na togu. Pasupasu ma hami
laho mangulahonsa, pasupasu ma nang na ni ulanami.

Pdt : (Pasahat Boni, ro ma ruas ni huria tu jolo mangalap boni na be laos

pasahat hamauliateon ni rohana)
Mangasahon asi ni roha ni Debata Ama dohot Jesus Kristus dohot
Tondi Parbadia do au mandok tu hamu “Pos ma rohamu, ulahon
hamu ma tano i, ai sian Jahowa sitompa langit dohot tano on do ro
pangurupion tu hamu”

11. Marende No 14 : 1 + 2 “ Puji Hamu Jahowa Tutu”

Puji hamu Jahowa tutu
Pardengganbasa, parasiroha salelengna i
Pardengganbasa i, parasiroha i
Ingot tongtong ale tondingkon
Sude na denggan na dipasonggop Debata tu ho
Denggan basaNa do na pangoluhon ho

12. Tangaing Panutup Ale Amanami, Pasupasu, Amen 3X