LITURGI NATAL AMA SA-RESORT MARIHAT

Minggu, 15 Desember 2019

PARTORDING NA

Liturgi I - III : Ama Marihat Sabungan (32 Halak)

Liturgi IV - VI : Ama Marihat Ulu Muda (27 halak)
Liturgi VII - VIII : Ama Riama (16 Halak)
Liturgi IX – X : Ama Mrihat Ulu Tua (23 Halak)

Catatan: Molo hira-hira hurang Liturgi, boi dope tinambaan, alai tibu ma tapaboa, anggo mangorui
sotung tuan nami. Titik.

Prolog liturgi I : Saluhut do ditompa Debata, langit, tano laut dohot nasa isina. Ditompa do
angka suansuanan, pahanpahanan, dungi jolma. Saluhutna i manjadi do marhite
sian hapistaran dohot hagogoon ni Debata di bagasan huasoNa na badia i.
Nuaeng tabege ma pangantusion na sintong taringot tu panompaon ni Debata.

Liturgi 1.no 1 Mansai uli saluhut na tinompa ni Debata, angka dolok dohot rura, angka suansuanan
na rumatarata, saluhutna i patuduhon hinauli ni panompaon ni Debata, tung na so
hadodoan do parbinotoanNa. Boha do ulaning i? Songon dia do dibahen Debata
manompa nasa na adong i? Sian dia do bahan manang alat ni Debata laho manompa
saluhutna i?

Liturgi 1.no 2 Ia panompaon na pinatupa ni Debata songon on do i. Ndada marhitehite alat manang
ulaula Debata manompa, ai ndada songon pande Debata manompa nasa na adong,
alai lobi sian i do. Holan marhite hataNa sambing do. Molo didok Debata “jadi ma
ho na tiur:, jadi do. Songon i do sude. Sandok molo didok Debata “jadi”, manjadi ma
songon na nidokNa i.

Liturgi 1.no 3 Ai marhitehite Hata ni Jahowa do manjadi angka langit, jala marhitehite hosa ni
pamanganNa sude angka paranganNa. Sai marhabiaran maradophon Jahowa ma sude
tano on, jala marsomba tu Ibana ma sude pangisi ni portibion

Liturgi 1.no 4 I do tutu, tung halongangan do panompaon ni Debata, ai ndang sian na adong Debata
manompa, alai sian naso adong do gabe adong. Ndang adong na so tarpatupa Debata.
Angka dia ma na tinompaNa i?
Di mula ni mulana ditompa Debata ma langit dohot tano. Ditompa ma muse na tiur.
Digoar Debata ma na tiur i arian, jala dibahen Debata ma parsirangan ni na tiur sian
na holom, goar ni na holom i borngin.

Liturgi 1.no 5 Di ari paduahon ditompa Debata ma hajanghajang di parsitongaan ni angka aek,
bahen parsirangan ni aek tu aek. Di ari patoluhon ditompa Debata ma tano manang
darat asa tarida na mahiang. Jala parpunguan ni angka aek, digoari laut. Jadi
dipantubuhon tano i ma duhutduhut dohot suansuanan na marparbue tudos tu
mansamna.

Liturgi 1.no 6 Di ari paopathon, ditompa Debata ma panondang di hajanghajang ni langit asa
 disondangi tano on. Di ari palimahon, ditompa Debata ma angka dengke dohot nasa
na marhosa, angka na manjirir di bagasan aek, ro di na sa pidong na martongatonga
langit na masiboan mansamna.

Liturgi 1.no 7 Di ari paonomhon, ditompa Debata ma jolma tumiru rupaNa, tudos tu pangalahoNa,
baoa dohot boruboru nasida ditompa, asa dirajai sandok tano on. Dungi diida Debata
ma sude na tinompaNa i nunga denggan situtu.
Liturgi 1.no 8 Ro be ma hamu marnida angka pambahenan ni Debata, tung na songkal do
pangarajaionNa di manisia. Ibana mambahen hosanta mangolu jala ndang diloas totta
tarsulandit. Dok hamu mandok Debata : Tung na songkal do angka pambahenanMu
Binahen ni hinatimbul ni gogoM ingkon marsomba tu ho angka musuM.

Liturgi 1.no 9 Hamu angka dongan! Sian sude panindangion i, pabotohon tu hita : Debata Jahowa
do pargogo na so hatudosan, sasada Ibana do sioloanta, ai gok di Ibana do liat
portibion. Asa dang adong na patut sitengatengahonon ni jolma i, ianggo holan
marhitehite na sian dirina sandiri, ai Debata do jumadihon ibana.

Liturgi 1.no 10 Dibagasan ibana do hita marhosa jala mangolu. Alani i, hombar tu hata ni Debata na
mandok: pasangap ma Debata marhitehite dagingmuna dohot marhite tondimuna, ai
Debata do nampunai.

Liturgi 1.no 11 Alai dung ditompa Debata nasa na adong, didok Bibel i, maradian do Ibana di ari
papituhon. Songon dia do lapatan nii? Ai naung maradian do Debata sahat tu
nuaeng? Manang ndang adong be ulaon ni Debata dung panompaon i?

Liturgi 1.no 12 Ndang songon i lapatan ni i. Bege hamu asa hupatorang. Dung sun ditompa Debata
nasa na adong, maradian do Ibana tutu sian nasa ulaon panompaon, alai ndang
maradian Ibana sian ulaonNa, torus do Debata mangulahon angka na denggan na
ringkot di ngolunta, dipasupasu do hita saluhutna. Tapuji jala tapasangap ma Debata
naung manompa hita dohot na ringkot di hita jala dipasingkop do marhite
pasupasuNa di ngolunta. Antong taendehon ma pujipujian di Debata, sian Buku Ende
No. 116:1 ‘ditompa Ho do au”. rap dohot sude ruas
Prolog liturgi II : Diginjang ni roha i do marhabangsa sibolis i laho mangelaela jolma i asa lam
tangkang jala mangalaosi Patik ni Debata, panghorhonna gabe uhum ni Debata
ma. Tapaihutihut ma liturgi on.

Liturgi 2.no 1 Mansai sonang jala denggan do inganan ni jolma na parjolo i dibahen Debata di porlak Eden i.
Ndang adong na hurang, singkop do sude diparade Debata di jolma na tinompaNa i.

Liturgi 2.no 2 Nuaeng tabege ma mula ni dosa dohot pangonai na tu jolma na parjolo i. Didok di Bibelta i;
ulok do na paotootohon jolma i gabe dibuat jala dipangan si Hawa parbue ni hau i, laos
dilehon tu si Adam.

Liturgi 2.no 3 Ia parbue ni hau i, i ma parbue ni hau na di parsitongaan ni porlak i, na so boi jama on apalagi
ma panganon. Didok Debata do : “unang pangan hamu sian i, jala unang jama hamu, asa
unang mate hamu”. Alai tung mansai bisuk do sibolis mangelaela jolma i asa manundali
Debata. Disuanhon sibolis ma roha diri tu jolma i gabe pia matana marnida, laos dipangan,
gabe mardosa ma.

Liturgi 2.no 4 Alai anggo nuaeng ndang adong be songon ulok dohot parbue ni hau songon na tarsurat i.
Alai, panginona ni dosa i do di hajolmaon sahat tu tingki on, na mambahen uhuman ni Debata.
Ia gombaran ni parbue ni hau na di parsitongaan ni porlak Eden i nuaeng, i ma : hisaphisap
manang hinagiot ni pardagingon na sai tongtong mangalaosi Patik, aturan dohot Hata ni
Debata.

Liturgi 2.no 5 Alai tandap do parulaon ni daging, i ma : parmainanon, hahodaron, pargadombuson,

hasipelebeguon, hadatuon, parmusuon, parbadaan, pangiburuon, lessem, teal, rimas,
ungutungut dohot angka na so tama diadopan ni Debata.

Liturgi 2.no 6 Lam rarat do pangalaho dohot bangko pardosaon i. jotjot do mardosa hita marhite pangkuling,
dohot marhite pingkiran. Atik pe diboto jolma I mangulahon na denggan, alai ndang haru saut
dipatupa.

Liturgi 2.no 7 On do di Paulus tu halak Rom :” Ai atik pe diboto nasida Debata, ndang di pasangap Ibana
songon na tama di Debata, jala ndang dipuji nasida, gabe dipaotooto pingkiranna do nasida,
jala mangholom ma rohanasida na so mangarti i.

Liturgi 2.no 8 “Saluhut nasida nunga manimbil, tung sange do nasida marroha mago; ndang adong sibahen
na denggan nanggo sada”

Liturgi 2.no 9 Di bahen I songon na bongot dosa I tu portibion marhite sian sada halak jala marhitehite dosa I
ro hamatean, songon I sahat hamatean I tu saluhut jolma, ala sude nasida mardosa.

Liturgi 2.no 10 Ia si Hawa gambaran nuaeng i ma : angka parompuan manang ina na so jolo marpanungkun tu
si Adam, sinondukna i. Atik pe naung pinadomu ni Debata nasida jala nunga diaturhon baoa i
do ulu di rumatangga, songon Kristus, Ulu ni Huria i.

Liturgi 2.no 11 Dibahen i ndang denggan molo so jolo masisungkunan laho mambuat haputusan di
rumatangga, ai i do bossir hasesega ni keluarga. Songon i do ngolu ni marhuria, ingkon
sungkunon jala niundukhon do angka aturan ni huria hombar tu lomo ni roha ni Debata.

Liturgi 2.no 12 Nang si Adam pe mardosa do, ai diloas ibana do si Hawa pulik gabe mura dihusipi angka
sibolis. Sai tongtong ma marsada ni roha ama dohot ina jala rap mangula asa ndada mura
dipalindaklindak angka parjahat na laho manegai parrumatanggaon. Rap renta ma ama dohot
ina dohot iananghonna tu Gareja, asa unang diunjuni sibolis i. Amen.
Prolog liturgi III : Ragam cara dibahen sibolis i laho mangago jolma i, alai ndang dipasombu
Debata songon i masa sahat tu ujungna, ai Parasiroha godang do Ibana, alani i
diparbagabaga do laho paluahon jolma i sian dosa.

Liturgi 3.no 1 Anggo ninna rohanta nian pintor diuhum Debata ma jolma i saleleng ni lelengna ala
nunga mardosa; alai ndang songon i sangkap ni rohaNa, ai so tardodo holong dohot
asi ni rohaNa i. dilehon dope tingki parasian laho paubahon roha.

Liturgi 3.no 2
Songon sintong na mangolu Ahu, ninna Jahowa; tung so lomo do rohangKu mida
hamatean ni parjahat, na lomo do rohangKu mida hamumulak ni parjahat i
tumadinghon dalanna, asa mangolu ibana.

Liturgi 3.No 3 Parasiroha jala Pardenggan basa do Jahowa,lambat tarrimas jala parasiroha godang.
Ndang dibahen tu hita hombar tu angka dosanta, jala ndang dibaloshon tu hita
hombar tu angka hajahatonta. Songon asi ni roha ni ama ama mida angka anakna, asi
ni roha ni Debata di angka na manghabiari Ibana.

Liturgi 3.no 4 Ro ma hamu tu Ahu, asa mangolu tondimuna, ninna Jahowa. Tung sura rara
dosamuna songon abit bunga dapdap, bontar do bahenonKu songon itak, nang pe
rara songon abit hasumba gabe songon hapas do muse.

Liturgi 3.no 5 Songon on do Hata ni Jahowa : nunga pola hupasisi angka pangalaosim songon
ombun, jala songon ombun manorop angka dosam. Sai mulak ma ho tu ahu, ai Ho do
sipalua ahu.

Liturgi 3.no 6 Ai songon on do holong ni rohaNa mida portibi on, pola do AnakNa na sasada i
dilehon, asa unang mago ganup na porsea di Ibana asa hangoluan na hot ro di
saleleng ni lelengna di Ibana.
(Sidung liturgi III.2, marende ma parliturgi III rap dohot sude ruas, no.173;1)

Liturgi 3.no 7 Molo tongtong do hita mangolu di bagasan Hata ni Debata, pos ma rohanta, sai na
donganan ni Debata do hita laho mangalo hisaphisap ni daging dohot maninggalhon
dosanta.

Liturgi 3.no 8 Antong rap ma hita manjanghon Sipalua i, taungkap ma rohanta asa bongot Raja i di
rohanta. Lam marsihohot ma hita umbege, mangguruhon dohot mangulahon hataNa
jala dapotan upa ma hita di haroroNa i. Amen

Prolog liturgi IV : Lam dipatuduhon Debata do tu jolma i, holong dohot asi ni rohaNa,
diparbaga do haroro ni Sipalua laho paluahon jolma I sian ihotihot ni sibolis i.
Liturgi 4.no 1 Nunga mandate roha ni bangso paimahon haluaon sian Debata, ai tarbuang do bangso Israel
ala ni dosana, masihol bangso Israel mulak tu bona pasogitna tu huta Jerusalem, asa
sumuang muse marsaor nasida di Bagasjoro. Sai hira na ditadinghon Debata do panghilalaan
nasida, alanii maimaima do bangso i di haroro ni Mesias Sipalua i.

Liturgi 4.No 2 Ro do Hata ni Debata tu Panurirang Jesaya mandok ; apuli, apuli hamu ma bangsoKi, ninna
Debatamuna. Hata apulapul ma dok hamu tu roha ni isi ni Jerusalem, jala jouhon hamu ma
tu nasida “Nunga marujung parungkilonna, ai nunga salose dosana i, ai nunga dijalo sian
tangan ni Jahowa silompit dua singkat ni saluhut dosana”.

Liturgi 4.no 3 Ro do Hata ni Debata tu panurirang Jesaya mandok : “tung sura rara dosamuna songon abit
bunga dapdap, bontar do bahenonku songon itak; nangpe rara songon abit hasumba, gabe
songon hapas do muse. Di ari na sasada i sogot, uli jala marmulia tunas ni Jahowa, gabe
huhut uli parbue ni tano i di angka na malua sian Israel.

Liturgi 4.no 4 Ai ndada pingkiranKu, pingkiranmuna i, jala ndada dalanmuna angka dalanKu, ninna
Jahowa. Tagan diparpiar ni murukKu Hutabunihon do bohingKu satongkin maradophon ho,
alai marhitehite denggan basa salelenglelengna asianKu ho, ninna Jahowa sipalua ho.

Liturgi 4.no 5 Jala on do pos ni rohanta: Munsat pe angka dolok jala humuntal angka robean, anggo asi ni
roha ni Debata naso tupa munsat sian ho, jala padan ni hadameonNa naso tupa humordit,
jala sahat rodi salelengna do asi ni rohaNa.

Liturgi 4.no 6 Disi ma dipatuduhon Debata holongNa, dipungka ma patolhashon bagabagaNa paboahon
naeng ro ma sipalua i hatuaon dohot haluaon tu jolma i. angka on ma bagabaga i:

Liturgi 4.no 7 Alai anggo ho huta Betlehem Eprata, mametmethu do ho nian anggo tung pola jujuron tu
angka huta marriburibu di Juda, hape sian ho do haroroan ni na gabe panggomgomi ni Israel,
jala angka haroroanna sian nahinan, sian angka ari na robi salelenglelengna.

Liturgi 4.no 8 Ida ma, gabegabean ma sada na marbaju jala tumubuhon sada anak, jala bahenonna goarna :
“Immanuel”. Hehe ma ho, marsinondang ma ho, ai na ro ma panondangmu, jala hamuliaon
ni Jahowa binsar di atasmu. Alani pauli hamu dalan ni Jahowa, patigor hamu di adaran dalan
balobung ni Debata. Ingkon gohan do nasa rura, jala parejeton nasa dolokdolok dohot
buntulbuntul, jala gabe na hornop do na marnangkok tuat, jala gabe rura tanggurung ni
dolok.

Liturgi 4.no 9 Ai nunga tubu di hita sada posoposo, dilehon tu hita sada Anak, pampe tu abaraNa do sogot
harajaon, jala bahenonna goarNa : “Sipartahi halongangan, siulubalang ni Debata, Ama
saleleng ni lelengna, Raja Hadameon.

Liturgi 4.no 10 Alai jongjong anggo Ibana, jala marmahan mangasahon gogo ni Jahowa, marhitehite
hamuliaon ni goar ni Jahowa Debatanta; jadi maringan ma nasida, ai timbul ma ibana disi ro
di angka ujung ni tano on. Amen.

Prolog liturgi V : Nunga jumpang tingkina hombar tu bagabaga ni Debata taringot Sipalua,
natinubuhon ni si Maria, na gabegabean sian Tondi Porbadia di huta Betlehem.
 Liturgi 5.no 1 Dungi ro ma uju i parenta sian Kesar Agustus, ingkon suraton nasa jolma di gomgomanna.
Pamilangan parjolo ma i, uju digomgomi si Kirenius tano Siria.

Liturgi 5.no 2 Jadi borhat ma sasude, asa disurati, ganup tu bona ni pinasana. Borhat ma nang si Josep
dohot si Maria, na sian Galilea, sian Nazareth, nangkok tu luat Judea tu huta ni si Daud na
margoar Betlehem, ala sian pomparan jala marga ni si Daud ibana. Pasurathon dirina rap
dohot si Maria, oroanna i naung gabegabean. Jadi di na disi ni nasida, gok ma ari ni
hangoluanna.

Liturgi 5.no 3 Ditubuhon ma anak buhabajuna, diborhos ma, dipeakhon ma tu bagasan panggagatan, ala so
adong inganan na asing di parmianannasida. Jadi adong ma marborngin di ladang na disi ni
angka parmahan, mangingani pinahan nasida. Jadi didapothon sada Surusuruan ma nasida,
jala marsinondang ma sangap ni Tuhan i humaliang nasida, gabe mabiar situtu ma.

Liturgi 5.no 4 Alai didok Surusuruan i ma tu nasida ; unang mabiar hamu, ai barita halalas ni roha
godang do huboan tu hamuna, parsaulian ni sandok bangso i. ai naung tubu do di
hamu saborngin on, di huta ni si Daud, Sipalua i, i ma Kristus Tuhan i. on ma
partinandaan di hamu: posoposo do dapotonmuna, na binorhos peak di panggagatan.
Liturgi 5.no 5 Jala tompu ma adong dongan ni surusuruan i torop angka parangan parbanua ginjang.
Saluhut do nasida Marolopolop jala marlas ni roha, dipuji nasida ma Debata mandok:
“Hasangapon ma di Debata di ginjang, dame ma ditano on, di angka jola halomoan i”.

Liturgi 5.no 6 Hansitna i tutu na tinaon ni si Josep i, tarlumobi ma si Maria naung gabegabean, alai ingkon
oloan nasida ma parenta ni Kesar, jala mardalan mansai dao jala maol situtu sidalanan i.
Boasa ingkon songon i?

Liturgi 5.no 7 Ai toho do i hansit, alai unang alo tu haporseaonta, molo ingkon songon i sitaonon ni si
Josep dohot si Maria. Ai laos disi do sangkap hatuaon ni Debata. Dipardalanan na tu
Betlehem i do masa hasasaut ni bagabagaNa marhite hatutubu ni Jesus, Tuhan Sipalua hita.
Liturgi 5.no 8 Sasintongna mansai maol do siat tu pingkiran jala ndang tarjalo roha. Hape laos songon i do
dibahen Debata dalanNa jala hurang tarjalo roha do, boasa diinganan na lea hatutubu ni
Sipalua i, di bara ni pinahan.

Liturgi 5.no 9 Ai songon timbo ni angka langit sian tano on, songon i do tumimbo angka dalanKu sian
dalanmuna i, jala angka pingkiranKu sian pingkiranmuna i, ninna Jahowa. Alani unang
manigor maralo tu rohanta, molo pe songon i dalan dibahen Debata. Nang di pardalanan
ngolunta on pe, molo masa pangunjunan dohot parungkilon, unang pintor mandele, atik
dalan ni Debata do i laho mambahen hasonangan di hita. Tapuji ma goarNa na marmulia i.
Amen.

Prolog liturgi VI : Nunga ro rajanta Sipalua i, ndada holan hita dipalua, alai dohot do nang
portibi on. Sude ma na sa na manggulmit, na sa ulu ni tot marsomba tu Ibana,
Raja Hadameon i.

Liturgi 6.no 1 Puji ma Jahowa ale todingku, jala nasa rohangku dibagasan mamuji goarNa na badia
i. Ibana manesa dosam sudena. Ibana pamalum angka sahitmu sudena, Ibana
 paluahon ngolum sian hamagoan, Ibana martumpalhon denggan basa dohot asi ni
roha.

Liturgi 6.no 2 Puji ma Jahowa ale tondingku, dipamahap do rohangku marhitehite denggan basa,
Ibana do patupahon angka pambahenan hatigoran, Ibana do pabotohon angka
dalanNa.

Liturgi 6.no 3 Puji ma Jahowa, hamu angka parrangan parbanuaginjang, na mangoloi angka
parentaNa, na sai tongtong tangi tu angka hataNa. Hamu angka naposoNa na
mangulahon lomo ni rohaNa.

Liturgi 6.no 4 Puji ma Jahowa, hamu ale angka na tinompaNa, di sude inganan ma hinarajaanNa.
Puji ma Jahowa, ale tondingku. Jahowa do nampuna sude portibi on dohot nasa
isina.

Liturgi 6.No 5 Ibana do nampuna portibi on dohot nasa na mangolu di bagasanna. Ai Ibana do
paojakhon i di bagasan ni aek na bagas di toru ni tano on, jala pahothon i di atas ni
laut angka na bagas i.

Liturgi 6.no 6 Puji ma tuhan i, Debata ni Israel, ala ditopot bangsoNa jala dipatupa haluaonna.
Dipatindang do di hita tanduk haluaon, di bagas ni si Daud naposoNa i. Hombar tu
na hinatahonNa marhite soara ni angka panurirangNa na badia i sian na robi.

Liturgi 6.no 7 Ari on do najinadihon ni Jahowa, marolopolop jala marlas ni roha ma hita disi. Iale
Jahowa sai manumpak ma Ho! Iale Jahowa sai Ho ma mambahen manjadi!
Pinasupasu ma na ro marhitehite goar ni Tuhan i.

Liturgi 6.no 8 Beta ma hita saluhutna mamuji Goar ni Jahowa na marmulia i, ai Parasiroha bolon
jala Pardenggan basa, hamoraon dohot hasangapon dohot hagabeon na
salelenglelengna dilehon tu hita. Amen

Prolog liturgi VII : Nuaeng begeonta ma hatorangan na dumasip taringot tu Jesus Sipalua i.
Ibana do Sipalua naung rot u Portibi on manaluhon dosa dohot hamatean,
asa malua jala mamora saluhut angka na porsea di Ibana.

Liturgi 7.no 1 Dung i toropan do nasida na gabe porsea ala ni Hata ni Jesus. Gabe didok nasida
ma tu boruboru i; ndang be ala ni pandokmi, umbahen na porsea hami; ai nunga
hubege jala hutanda hami sandiri, Ibana do tutu Sipalua portibi on.
 Liturgi 7.no 2 Dung i ninna si Petrus dohot angka apostel i ma mangalusi : Ingkon oloan do iba
di Debata asa di jolma. Di pahehe Debata ni angka amanta do Jesus,
napinusamuna, uju digantung hamu Ibana tu hau. Tu siamunNa do dipabankit
Debata Ibana gabe Partogi jala Sipalua, laho mangalehon tu halak Israel hamubaon
ni roha dohot hasesaan ni dosa.

Liturgi 7.no 3 Mandok mauliate ma hamu di Ama i, naung patauhon hamu, manjalo tohap na di
bagasan hatiuron i, siteanon ni angka na badia i. Ai nunga diroro hita sian
gomgoman haholoman i, jala dipaunsat hita tu bagasan harajaon ni Anak,
haholongan ni rohaNa.

Liturgi 7.no 4 Di bagasan Ibana do adong di hita haluaon i, i ma hasesaan ni angka dosanta. Ibana
do suman ni Debata na so tarida i ; na parjolo tubu sian na sa na tinompa dohot
andorang so haoojak ni tano on.

Liturgi 7.no 5 Ai marhite sian ibana do ditompa saluhutna, na di banuaginjang dohot na di banua
tonga on, na tarida dohot na so tarida i, angka habangsa, angka harajaon, angka
gomgoman, angka parhuasoon, saluhutna i do ditompa marhitehite Ibana, jala
marhapatean tu Ibana.

Liturgi 7.no 6 Jala di jolo ni saluhutna do Ibana, jala saluhutna i do hot di bagasan Ibana. Ibana do
ulu ni pamatang i, i ma huria i. Ibana do parmulaan, naung parjolo tubu sian angka
na mate, asa Ibana parjolo di na saluhutna. Ai ditontuhon Debata do naeng
maringanan di bagasan Ibana sandok hagogokna i.

Liturgi 7.no 7 Nang sian Jesus Kristus, sitindangi haposan i, na parjolo tubu sian angka na mate
sigomgom angka raja ni tano on! Ibana do manghaholongi hita jala dipalua hita
sian angka dosanta marhitehite mudarNa na badia i.

Liturgi 7.no 8 Dijadihon do hita gabe harajaon hamalimon ni Debata, AmaNa i. Di Ibana ma
hasangapon dohot hagogoon ro di salelenglelengna. Ida ma, na ro ma Ibana di
bagasan ombun! Idaon ni nasa mata do Ibana, nang angka naung manullang
Ibana, gabe mangangguhi be ma saluhut bangso ni tano on mida Ibana. I ma tutu.
Amen.

Prolog liturgi VIII : Parbuehon ma haporseaon dohot pamujianmi tu Debata di bagasan ngolum
marhitehite parange na tama, daulat, burju mangula jala masihaholongan.

Liturgi 8.no 1 Diungkap Sipalua i do pintu harajaon ni Banuaginjang laho mangarahon angka na
niasianNa, asa malua nasida sian gomgoman dosa jala maringan di huta na pinauli
ni Debata.
 Liturgi 8.no 2 Didok Jesus, Sipalua i do; “Ahu do pintu i, paluaon do ganup na bongot sian Ahu,
na laho bongot jala laho ruar ma ibana, dapotan jampalan, asa adong hangoluan di
nasida.

Liturgi 8.no 3 Nunga taboto jala nunga diungkap pintu i tu hita, alai mansai dao do i sian portibi
on, sian roha ni na so tumanda Ibana. Hita pe soratan jala loja digosagosa portibi on
dipardalananta laho manjumpangi pintu i, antong boha na ma?

Liturgi 8.no 4 Didok do muse : “Ro ma hamu tu Ahu, hamu angka na loja jala na sorat asa
hupasonang hamu” Ahu do panondang ni portibi on, naso tupa mardalan di na
holom na mangihuthon Ahu.

Liturgi 8.no 5 Haporseai ma na tutu do Ibana pangapul na sumurung dohot pandaoni bolon di
angka na marsak dohot na marsahit, dilehon do tu hita aek dohot roti hangoluan asa
ndada be mauas dohot male angka na manganhon sian i.

Liturgi 8.no 6 Dung i dipaborhat do hita tu portibi on laho mangarahon angka donganta, ai didok
do : “Ahu do mamillit hamu jala Hupadiri hamu, asa laho hamu marparbue, jala asa
mian parbuemuna i”. Alani i dungo jala hobas ma hita mangulahon tona
parsuruonNa i, hohosi ma gontingmu jala pagalak ma palito di tanganmu.

Liturgi 8.no 7 Beta hamu dongan laho mangula di porlak ni Tuhan i, asa dapotan na tama hita,
jala parangehon ma na tama jala marroha na daulat ma hita asa masihaholongan
sama hita songon Kristus i manghaholongi hita.

Liturgi 8.no 8 Antong solukhon hamu ma holong na sian Kristus Jesus, Tuhanta i. Ai i do
patukhon hita laho manghaholongi dongan jolma. Amen

Prolog Liturgi IX:

Ro do Tuhanta Jesus Kristus tu portibi on asa malua angka jolma pardosa sian pangalaho na roa i.
Ingkon ma tarida i di perilaku ni hita jolma, jala on do di halomohon Tuhanta, i ma : hamubaon ni roha
manang pertobatan. Antong, tabege ma joujou ni Tuhanta taringot tu : ngolu na imbaru, songon na
tarsurat di Rom 12 : 2, “Jala unang sarombang hamu dohot portibi on, alai gabe imbaru ma hamu, dung
muba pingkiranmuna, asa tau hamu manimbangi lomo ni roha ni Debata, i ma na uli, na hinahalashonNa
dohot na sun denggan.”
 Liturgi 9. No.1 1. Galatia 5 : 6 + 22

Liturgi 9. No.2 2. Efesus 4 : 22 + 24

Liturgi 9. No.3 3. Efesus 5 : 1 – 2

Liturgi 9. No.4 4. 1 Tesalonik 4:3–4

Liturgi 9. No.5 5. Efesus 5 : 21-22+25

Liturgi 9. No.6 6. Josua 24 : 15

Liturgi 9. No.7 7. Ulaon Ap 16 : 31

Liturgi 9. No.8 8. 1 Timoteus 6 : 6–8

Liturgi 9. No.9 9. Filipi 1 : 9

Liturgi 9. No.10 10. Filipi 1 : 10 – 11

Liturgi 9. No.11 11. Jakobus 4 : 7

Liturgi 9. No.12 12. Jakobus 4 : 8

Liturgi X
Prolog liturgi X : Nunga ro jala nunga marsaor Ibana di hita nang di rohanta, aha do
panghorhonna molo sai burju hita mangihuthon Ibana dohot mangulahon lomo
ni rohaNa? Tangkas ma tapaihutihut liturgi on.
Liturgi 10.no 1 Martua ma na pogos tondi, ai di nasida do harajaon banua ginjang. Burju ma
ibana mangulahon lomo ni roha ni Debata asa dipamora ibana.

Liturgi 10.no 2 Martua ma na marsak roha, ai siapulon do nasida. Benget ma rohana jala sabam
manaon angka parungkilon i, apusan ni Debata do iluilu sian mata nasida.

Liturgi 10 .no 3 Martua ma na lambok roha, ai teanon ni nasida do tano on. Halambohon do
paombunhon rimas jala hahilashononna hinadeak ni hadameon.

Liturgi 10.no 4 Martua ma na mauas male mida hatigoran, ai sipabosuron do nasida. Jaloon na
ma jala daion na ma denggan basa ni Jahowa.

Liturgi 10.no 5 Martua ma na asi roha, ai siasian do nasida. Martua ma parroha na ias, ai idaon
nasida do Debata. Tatingkathon ma marngolu masiurupan, mardiakoni sosial,
asa dipabosur Debata hita marhitehite asi ni rohaNa na godang i.

Liturgi 10.no 6 Martua ma sibahen dame, ai goaron do nasida anak ni Debata. Molo dung anak ni
Debata nasida, marhuaso ma nasida di sude hamoraon dohot hamuliaon ni
Debata. Taradoti ma hadameon di luatta, di huria nang di tonga ni bagasta be, ai i
do dihalomohon Debata.

Liturgi 10.no 7 Martua ma na pinaburuburu ni halak ala ni hatigoran, ai di nasida do harajaon

 banuaginjang. Las ma rohamuna jala marolopolop, ai godang do upamuna di
Banuaginjang i, ai songon i do dipaburuburu angka panurirang na jumolo sian
hamu.

Liturgi 10.no 8 Martua ma hamu molo marhapantunon hamu tu sasude, haholongi ma angka
dongan, habiari ma Debata jala pasangap ma angka raja.

Liturgi 10.no 9 Martua ma angka na mamio angka na pogos, angka na martihas, na pangpangon
dohot na mapitung asa lehononmu mangan, ai baloson ni Debata ma di hamu rap
mangan di harajaonNa i.

Liturgi 10.no 10 Laos didok ma tu ahu: Surathon ma: Martua do angka na jinou tu panganon ujuan
ni Birubiru I, ai teanon ni na monang I ma saluhutna. Didok Ibana na
manghantidanghon on: Olo, na ro ma ma Ahu tibu. Amen. Ro ma ho Ale Tuhan
Jesus. Sai didongani Asi ni roha ni Tuhan Jesus ma angka Nabadia.

Liturgi 10.no 11 Antong paserep ma roham jala parbadia i laho manjanghon hata ni Debata dohot
mangulahon, ai didok do : “Martua ma angka na tumangihon Hata ni Debata jala
na umpeopsa” Amen.