1

LITURGI NATAL OIKUMENE KEC.PAGARAN 2007

Thema :
“Ai naung tubu do di hamu.... Kristus, Tuhan i?” ( Luk 2:11 )
Sub Thema:
Pesta Natal mangarahut hasadaon dibagasan roha na masihaholongan di
tonga ni huria, masyarakat dohot pamarenta membangun Kecamatan
Pagaran na sejahtera.

I. Liturgi I : ( Gereja-Gereja )

I.1. Ise do na jumadihon langit dohot angka panondang na

marsinondang uju arian dohot borngin i ? Ise do na
jumadihom angka suansuanan dohot angka hau nauli di
angka dolok dohot rura di tano i ? Tole rodi angka na
mangolu di laut dohot di tano, nang di awangawang i,
songon i muse na patupahon angka ragam ni halongangan
na masa di portibion ?

I.2. On do alus ni nasa sungkun-sungkun, ise do panompa i !

Tuhan Jahowa Debata do na tumompa dohot na jumdihon
sude angka naginoaranmuna i. Tung saluhutna do tahe
ditompa Debata na sun gogo, jala na gok huaso. Ibana na
do sitompana tarida dohot lan dope na so tarida di
matanta, jala na so hadodoan roha nang angka pikirann.

I.3. 1 Musa 1 : 1- 5 I.4. 1 Musa 1 : 6 – 8

I.5. 1 Musa 1 : 9 - 13 I.6. 1 Musa 1 : 14 - 19
I.7. 1 Musa 1 : 20 - 23 I.8. 1 Musa 1 : 24 - 26
I.9. 1 Musa 1 : 27 - 28 I.10. 1 Musa 1 : 29-31
II. LITURGI II : ( Kapala desa Se-Kecamatan )
II.1. Boha do ulaning rumang ni Porlak di Eden na binaritahon ni
Bibelta i ? Jala dia do imbarna sian tano na taingani sinuaeng
 2
on ! Dia dumenggan sian angka huta dohot kota na ribur na
adong di partingkianta nuaeng?, ai na so jumpang be disi
borngin na holom ? Tung boha do ngolu ni jolma na parjolo i
dibahen Debata Jahowa di Porlak na di Eden i?

II.2. Tangkas do dihatindangkon Hata ni Debata, sonang situtu do

jolma na parjolo i di Porlak na di Eden i. So adong na hurang di
nasida, gok las ni roha dohot dame do ngolu nasida arian dohot
borngin. Ndada sogon di tingkinta nuaeng on anggo di porlak di
Eden i. Bereng ma ! Anggo di tingkinta on, loja do jolma pahae-
pahulu laho mangalului hasonanganna be. Ndang jumpang hita
anggo saonari las ni roha dohot dame na manongtong songon
di Porlak di Eden i. Pamanat hamu ma angka dongan, molo di
tingkinta on, nunga torop jolma na mura mandele, marsak siala
so jumpang nasida dame dohot hasonangan dibagasan ngoluna
siala dosa i.

II.3. Atehe ! Na so hasuhatan balga ni holong ni roha ni Debata di

jolma i ! Jumolo do diparade Debata inganan na mansai uli di
jolma i, disarihon do ragam ni na boi sipananganon ni jolma.
Hape anggo nuaeng, ‘mutu do siborok mangalului angka
guluanna, mutu do roha ni hita jolma mangalului na tau
hangoluanna. Alai masa pe saluhutna i siala na mura do jolma
madabu tu pangunjunan huhut mangoloi hisap ni hajolmaon i.
 3
II.4. Eee tahe ! Tung na mangkus ma jolma i ! sude do naeng botoon
jala naeng panganonna. Olo muse mangahut na so jambarna.
Jala molo pinamanat jala pinatangkas angka pangalaho ni hita
jolma on, mansai godang do bangko dohot pangalaho na
mamboan hasusaan tu ngoluna sandiri. Di au nang di angka
dongan pe tung jotjot do jumpa pangalaho na sai mangalaosi
lomo ni roha ni Debata. Alai na jumorbut do pe tahe, ima
pangalaho na so marhabiaran jala na so parduli be tu hata ni
Debata. Atik pe nian naung sai dipabegebege do Hata ni
Debata, alai ndang haru manghorhon di ngoluna Holan na di
portibion sambingnama diharingkothon.

II.5. I ma da ! Dungkonsa jolma na parjolo i si Adam dohot si Hawa

mangalaosi Patik ni Debata uju di porlak di Eden i, gabe hona
uhum ma jolma i, laos dipabali Debata Jahowa ma nasida sian
hasongan i : “Dung i joujou ma Debata Jahowa di si Adam,
ninna ma mandok ibana: Didia do ho? Jadi ninna si Adam ma:
Hubege nian suaram di porlak i, gabe mabiar ahu, ai
marsaemara do ahu, umbahen na martabuni ahu. Dung i ninna
Debata ma: Ise na paboahon tu ho, na marsaemara i ho? Nda
tung dipangan ho sian hau na hupatikkon i mangorai
panganonmu? “( 1 Musa 3:9-11)

II.6. Dung i ninna si Adam ma: Boruboru na nilehonmu bahen

donganku, i do na mangalehon tu ahu sian hau i, gabe
hupangan. Dung i ninna Debata Jahowa ma tu boruboru i:
Boasa songon i bahenonmu? Jadi ninna boruboru i ma: Ulok i
do paotooto ahu, gabe hupangan. Dung i ninna Debata Jahowa
ma tu ulok i: Ala dibahen ho songon i gumodang ma torungku tu
ho sian tu nasa pahanpahanan dohot sian tu nasa na
manggulmit di ladang. Butuham na ma jururhononmu, jala orbuk
panganonmu saleleng di ngolum. ( 1 Musa 3 :12-14)
 4
II.7. Jala bahenonku ma parbadaanmu dohot boruboru i, ro di
pinomparmu tu Pinomparna. Ibana mangalisathon ulum,
gabe pargutonmu tambihulna. Dung i ninna ma mandok
boruboru i: Ganda situtu bahenonku parniahapanmu
saleleng gabegabean ho; bernit taononmu laho manubuhon
anakkonmu, sinondukmu na ma ihutanmu, jala ibana
mangarajai ho. Jala didok ma tu si Adam: Ala ditangihon ho
soara ni jolmam, gabe dipangan ho sian hau na hupatikkon i,
mandok: Unang pangan sian i, hona torungku ma tano on
ala ho, porsuk ma ahaponmu manganhon gogona saleleng
di ngolum. ( 1 Musa 3:15-17 )

II.8. Jadi dipabali Debata Jahowa ibana sian porlak Eden, asa
diula tano pambuatanna i. Jadi dilele ma si Adam i, jala
dipaipahon angka kerubim tungkan habinsaran ni porlak
Eden i marpodang sidua baba marjimburjimbur, asa dijaga
dalan tu hau hangoluan.

II.9. Boha do di rohamuna, ale angka dongan ! Holan alani dosa ni

jolma na parjoloi do umbahen dohot hita mangae hasusaan
dohot uhuman sian Jahowa ?. Nda na parsidohot do hita
manean dosa i jala laos hita sandiri manambai ragam ni
dosa i nuaeng marhite angka pangalahonta be ? Nda jotjot
do masitihaan angka na mardongan saripe, masihosoman
angka na marhaha maranggi. Nda na jotjot do jolma i
mangampini dirinta huhut manutupi hahuranganna be, alai
paruakruak hahurangan ni dongan ?

II.10. Tabereng ma jorbut ni dosa ni jolma na parjolo i ! Ai tung

so adong do panolsolionna di angka hahurangan nasida di
adopan ni Debata. Gariada si Adam dohot si Hawa
masipabali hasalaanna tu na asing. Si Adam pabalihon tu
boruboru na nilehon ni Jahowa bahen jolmana. Si Hawa pe
ndang olo hatadingan. Ndang tardokna tu si Adam, gabe
dipabali ma tu ulok na paotootohon i. Panghorhonna, gabe
tarrimas ma Jahowa. Dipabali ma nasida sian porlak na
Eden na gok hasonangan i.
 5
II.11. Toho do i angka dongan ! Tung ala pangalaosion ni jolma
na parjoloi do umbahen gabe bangko ma nang di hita roha
hadosaon i; ai ndang adong imbar ni jolma i be, saluhutna
do mardosa jala ndang dapot pujion ni Debata hita. Alai
molo sai tapasiding do bangko ni na mardosa i, mulak do
hita tu hasonangan pinarade ni Debata di hita. Dibahen
tapangido ma gogo partondion i laho pasiding bangko ni
dosa na jorbut.

II.12. Molo tadok, naung saor hita tu Ibana, huhut taulahon na

holom, pargabus do hita, ndang siula hasintongan hita.
Alai molo taparangehon hatiuron, songon Ibana na di
bagasan na tiur, saor do hita sama hita, jala dipaias mudar
ni Jesus, Anakna i, do hita sian nasa dosa. Molo tadok, na
so adong dosanta, tapaotooto do dirinta, jala ndang di
bagasan hita hasintongan i. Molo tatopoti angka dosanta,
haposan do Ibana jala bonar, manesa dosanta jala
paiashon hita sian nasa hageduhon. Molo tadok, na so
mardosa hita, pargabus do Ibana tabahen, jala ndang di
bagasan hita anggo hatana. ( 1 Joh 1:6-10 )

II.13.1 Joh 2 :15-17

II.14.1 Joh 3:1-2
3. LITURGI III ( Guru-Guru SD se-Kecamatan )
3.1. Nunga pola marriburibu taon dung diparbagabaga Debata
Jahowa, na naeng ro ma Sipalua i jala nunga margantiganti
angka partogi ni angka bangso di tano on, songon i nang
angka raja nunga marnangkok tuat sian harajaanna be,
Malim dohot angka Panurirang nunga pola lan na
manghatindanghon Hata bagabaga i. Jala naposo ni Debata
nunga lan na mate martir siala manghatindanghon hata
Debata na pinasahat nasida tu tonga ni angka bangso di
tano on, hape ... laos so saut ro Mesias na pinarbaga ni
Jahowa. Ai andigan do huroha haroro ni na pinarbaga ni
Tuhan i!
 6
3.2. Ooo... tutu do pandokmuna dongan. Ngolngolan do roha na
paimahon. Jala boi do mandele angka na tarpaima. Sian na
robi nunga dilumbahon haroroNa i, jala songonon do pandok
ni panurirnga ni Jahowa: Jadi ninna si Jesaya ma: “Ua
tangihon hamu ma, ale pinompar ni si Daud! Ndang dope sae
hamu pauruuruhon jolma, dohot do Debatangku naeng
lojaanmuna. Dibahen i apala Tuhan i sandiri ma mangalehon
sada * tanda di hamu: ** Ida ma, gabegabean ma sada
namarbaju, jala tumubuhon sada anak, jala bahenonna ma
goarna: * Immanuel.”( Jes 7:13-14)

3.3. Dung i * ruar ma sada tunas sian tungko ni si Isai, jala

marparbue sada tubis na tubu sian uratna. Jadi songgop ma
tu ibana * Tondi ni Jahowa, Tondi ni habisuhon dohot
hapistaran, Tondi ni panuturion dohot hagogoon, Tondi ni
parbinotoan dohot biar maradophon Jahowa.( Jes 11:1-2 ).

3.4. Jala halomohononna do hadaulaton maradophon Debata, jala

ndang manguhum ibana marguru tu parnida ni matana, jala
ndang manguhum ibana marguru tu na binege ni pinggolna.
Marhitehite * hatigoran tahe uhumonna angka na pogos, jala
marhitehite hasintongan patingkosonna uhum tu angka na
dangol di tano on, jala marhitehite * batahi ni pamanganna
libasonna tano on, jala marhitehite tondi ni bibirna bunuonna
halak parjahat i.( Jes 11:3-4 ).

3.5. Jala hatigoran do hohos ni gontingna, jala habonaron hohos

ni akna. Disi ma * maringan gompul di lambung ni birubiru,
jala manggompang babiat di lambung ni hambing, jala
tampak do anak ni lombu, babiat dohot pinahan na
pinamokmok, jala dakdanak na metmet marmahan nasida.
Rap manjampal ma lombu dohot babiat, jala tampak modom
angka anakna be, jala panganon ni singa duhutduhut songon
dorbia. ( Jes 11:5-7).
 7
3.6. Jala posoposo marmeameam di lambung ruang ni ulok dari,
jala dakdanak nambura sirang susu mangarorohon tanganna
tu ruang ni libe. Ndang be manjahati manang mangago
nasida di sandok dolok habadiaonku, ai * gok parbinotoan di
Jahowa tano on sogot, songon aek ni laut mangalungkupi
tondolanna. Jadi masa ma di na sadari i: Usouso ma angka
parbegu di * urat ni si Isai, na pinatindang bahen partonggol
ni angka bangso, jala pangulonanna do hamuliaon. ( Jes
11:8-10 ).

3.7. Alai anggo ho, * ale Betlehem Eprata, mametmethu do ho

nian anggo tung pola jujuron tu angka huta marriburibu di
Juda; hape sian ho do haroroan ni na gabe panggomgomi di
Israel, jala * angka haroroanna sian na nahinan, sian angka
ari na robi salelenglelengna. Dibahen i pasahatonna ma
nasida sahat ro * di tingki pangintubuan ni na manubuhon,
jala * mulak pasipasi ni angka hahaanggina tu angka anak ni
Israel. (Mika 5:1-2 ).

3.8. Di tingki dohot ombas naung binuhul ni Jahowa sandiri

manontuhon hasasaut ni angka bagabagaNa i, asa dung
jumpang tingki dohot ombasna gabe “...disuru Debata ma
pardisurgo Gabariel tu Nasaret, i ma sada huta di luat Galilea,
manopot sada anak boru, oroan ni sada baoa na margoar
Josep, na sian pomparan ni si Daud; si Maria do goarna.
Laho mamasuhi jabuna i, ninna ma: Tabi di ho, na niasian!
Didongani Tuhan i ma ho! (Lukas 1:26-28 ).

3.9. Alai tarsongot do nasida umbege hata i, ninna rohana do,

parsantabian dia do i ulaning? Jala didok surusuruan i ma tu
nasida: Unang ho mabiar, ale Maria; ai dapotan asi ni roha do
ho di Debata! Gabegabean ma ho, tubuan anak ma ho; Jesus
ma bahenonmu Goarna! Balga ma Ibana muse, goaron do
Ibana Anak ni Natumimbul i; lehonon ni Tuhan Debata do tu
Ibana habangsa ni si Daud, amana i. ( Lukas 1 :29-32 )
 8
3.10.Rajaanna do pomparan ni si Jakkob salelenglelengna, jala
ndang marhaujungan harajaonna i.Didok si Maria ma
mandok surusuruan i: Songon dia ma pangalaho ni i, ai so
adong hutanda baoa. Jadi dialusi surusuruan i ma nasida:
Songgopan ni Tondi Parbadia ma ho jala linggoman ni
hagogoon ni Natumimbul i do ho; ala ni i na badia do
dohonon na tubu i, Anak ni Debata. (Lukas 1:33-35 ).

3.11. Lukas 1 :36-38

3.12. Johanes 1 :11-14

Liturgi IV : ( Gereja-gereja )

4.1. Hamu angka dongan, anggo haroro ni Mesias, Sipalua i,

ndang holan bagabaga sambing be i di ngolu ni angka na
porsea. Ai tangkas do dibaritahon Buku Nabadia, hatutubu ni
Raja i, jala halonganngan do Barita HatutubuNa, pola do
tarsonggot raja ni portibion umbege hatutubuNa. Ai pikkir
rohana, Mesias na naeng ro i laho manoluk huaso dohot
hundulan harajaon i, songon na jotjot masa di partingkianta
on. Tangihon hamu ma baritaNa.

4.2. Dung i ro ma uju i parenta sian Kesar Augustus, ingkon

suratan nasa jolma di gomgomanna. Pamilangon parjolo ma
i, uju digomgomi si Kirenius tano Siria. Jadi borhat ma
sasude, asa disurati, ganup tu bona ni pinasana. Borhat ma
nang si Josep, na sian Galilea, sian Nasaret, nangkok tu luat
Judea, tu huta ni si Daud, na margoar Betlehem, ala sian
pomparan jala marga ni si Daud ibana, pasurathon dirina rap
dohot si Maria, oroanna i, naung gabegabean. ( Luk 2:1-5 ).
 9
4.3. Jadi di na disini nasida, gok ma ari ni hangoluanna.
Ditubuhon ma anak buhabajuna, diborhos ma, dipeakkon ma
tu bagasan panggagatan, ala so adong inganan na asing di
parmianannasida. Jadi adong ma marborngin di ladang na
disini angka parmahan, mangingani pinahannasida. Jadi
didapothon sada surusuruan ma nasida, jala marsinondang
ma sangap ni Tuhan i humaliang nasida, gabe mabiar situtu
ma. ( Lukas 2:6-9 ).

4.4. Alai didok surusuruan i ma tu nasida: Unang mabiar hamu; ai

barita halalas ni roha godang do huboan tu hamuna,
parsaulian ni sandok bangso i. Ai naung tubu do di hamu
saborngin on, di huta ni si Daud, Sipalua i, i ma Kristus,
Tuhan i! On ma partinandaan di hamu: Posoposo do
dapotonmuna, na binorhos peak di panggagatan. ( Lukas 2 :
10-12 )

4.5. Jala tompu ma adong dongan ni surusuruan i torop angka

parangan parbanua ginjang, dipuji nasida do Debata,
mandok: Hasangapon ma di Debata di ginjang, dame ma di
tano on, di angka jolma halomoan i. Jala di na laho i angka
surusuruan i sian nasida dompak ginjang, masipandohan ma
angka parmahan i: Beta ma hita tu Betlehem, taida ma na
masa on, na pinabotohon ni Tuhan i tu hita! Jadi hatop ma
nasida laho tusi, gabe jumpangsa si Maria dohot si Josep
dohot Posoposo i, na peak di panggagatan i. ( Lukas 2: 13-16
)
 10
4.6. Asa dung diida, dibaritahon nasida ma boaboa, naung
dihatahon tu nasida taringot tu Dakdanak i. Jadi sude na
umbegesa, longang be do siala na hinatahon ni angka
parmahan i tu nasida. Ia si Maria, dipeop do hata i sudena
jala dipahusorhusor di bagasan rohana. Mulak do angka
parmahan i, dipasangap jala dipapujipuji do Debata ala ni
sasude na binege jala na niidanasida, songon naung
dihatahon i tu nasida. ( Lukas 2:17-20).

4.7. Asa dung tubu Jesus di huta Betlehem, di luat Judea, uju
hinarajahon ni si Herodes, ro ma angka parhapistaran sian
purba tu huta Jerusalem, angka ninna ma: Didia do Raja na
imbaru tubu i? Naung huida hami do bintangna di tano
habinsaran; ala ni i ro do hami sumomba Ibana! Alai disi
dibege raja Herodes hata i, tarsonggot ma ibana ro di sude
pangisi ni huta Jerusalem. Jadi dipapungu ma angka sintua ni
malim ro di sibotosurat ni bangso i, dipamanat ma tu nasida
huta hatubuan ni Kristus i. ( Mateus 2:1-4 ).

4.8. Jadi didok nasida ma tu ibana: Huta Betlehem na di luat

Judea do, ai songon on do pandok ni panurirang i: "Ia ho,
huta Betlehem, apala tung na ummetmet ho di tongatonga ni
angka huta na di luat Judea, ai ho do huta haroroan ni Raja i,
na marmahan Israel, bangsongki!" Dung i marhusip ma si
Herodes manjou angka parhapistaran i tu jolona disihirsihiri
ma tu nasida lelengna, dung tarida bintang i. Dung i disuru
ma nasida tu huta Betlehem, ninna ma: Laho ma hamu,
tangkas ma diori hamu Dakdanak i! Ia dung jumpang, paboa
hamu ma tu ahu, asa dohot ahu ro marsomba tu Ibana.
( Mateus 2:5-8)
 11
4.9. Asa dung dibege nasida hata ni raja i, laho ma nasida. Anggo
bintang i, naung niidanasida hian di tano habinsaran i, sai di
ginjangnasida do muse, rasirasa sahat tingkos di ginjang ni
inganan ni Dakdanak i. Marnida bintang i, mansai las situtu
ma rohanasida. Laos dibongoti ma bagas i, gabe diida ma
Dakdanak i dohot si Maria, inana i. Dung i manungkap ma
nasida marsomba tu Dakdanak i, dirungkari ma artanasida:
Sere, haminjon dohot angka na angur, parsombanasida tu
Ibana. ( Mateus 2:9-11 ).

4.10.Anggo raja Herodes nunga sai busisaon, ndang

marhasonangan be umbege barita hatutubu ni Mesias,
Sipalua i. Sai dilului ma dalan, aha do na naeng bahenonna
mangaramothon huaso dohot harajaonna i. Tung mabiar
situtu do ibana mangadopi posoposo na imbaru tubu i. Gabe
ingkon torop ma hape bunuonna posoposo na so marsala,
siala biar ni rohana.

5. Liturgi V : ( Gereja-gereja )

5.1. Hamu angka dongan na hinaholongan ! Tongtong do ganup

taon tapatupa Pesta Natal marhite ragam ni punguan di
tonga huria, nang di parsahutaon, parmargaon, di sikola, di
kantor dohot di angka punguan na marragam i. Asa ndada na
paimahon haroroNa tubu di pardagingon tu portibion be hita,
alai na paingothon hita nama i, asa tung tangkas
panjangkononta di panghophopon ni Tuhan Jesus Kristus,
jala tongtong dungo haporseaonta managam haroroNa
paduahalihon mangalap angka naung ni asianNa.
 12
5.2. Molo songon i do sintuhu Natal i, tama do hape arga jala
ringkot bahenonta panghobasion dohot haroronta tu Pesta
Natal na tahobasi i. Naeng mambahen pujipujian dohot
olopolop di Tuhan Jesus Kristus ma saluhutna angka Pesta
Natal i. Sintong ma panindangionta i mandok :”TUBU
TUHANTA”, jala unang ma songon pangantusion ni deba
halak tabahen di rohanta pangantusion marnatal laho “TU
BUTUHANTA’, “Ai ndada sipanganon manang siinumon
harajaon ni Debata; hatigoran do dohot hadameon dohot las
ni roha di bagasan Tondi Parbadia. Ai molo dioloi ho Kristus
disi, dihalomohon Debata do ho jala arga ho di jolma”(Rom
14:17-18).

5.3. Songon naung tabege panindangion ni angka bibelta na

hinatahon ni donganta, paboahon halak naung pajumpa
dohot Tuhan Jesus di ari hatututuNa i, saluhut do nasida
sumomba Tuhan Jesus. Ingot hamu ma angka parroha sian
purba i. Dipelehon nasida do arta dohot tingkina ro sian luat
nasida asa tung pajumpa tu raja Sipalua i. Nang angka
parmahan na di ladang Eprata pe, marlas ni roha sumomba
Sipalua i. Jala dibaritahon nasida do na binega jala na ni ida
nasida i, songonon do panindangion ni si Lukas :” Jala di na
laho i angka surusuruan i sian nasida dompak ginjang,
masipandohan ma angka parmahan i: Beta ma hita tu
Betlehem, taida ma na masa on, na pinabotohon ni Tuhan i tu
hita! Jadi hatop ma nasida laho tusi, gabe jumpangsa si
Maria dohot si Josep dohot Posoposo i, na peak di
panggagatan i. ( Lukas 2 :15-16)

5.4. Asa dung diida, dibaritahon nasida ma boaboa, naung

dihatahon tu nasida taringot tu Dakdanak i.Jadi sude na
umbegesa, longang be do siala na hinatahon ni angka
parmahan i tu nasida. Ia si Maria, dipeop do hata i sudena
jala dipahusorhusor di bagasan rohana. Mulak do angka
parmahan i, dipasangap jala dipapujipuji do Debata ala ni
 13
sasude na binege jala na niidanasida, songon naung
dihatahon i tu nasida. ( Lukas 2 :17-20)

5.5. Jala hatutubu ni Tuhan Jesus tu ngolunta jangkononta ma i

songon joujou do tu hita, songon pandok ni Tuhan Jesus: “Ro
ma hamu tu Ahu, hamu angka na loja jala na sorat, asa
hupasonang hamu! Jangkon hamu ma augangku, marguru
ma hamu tu Ahu, ai na lambok do Ahu jala na serep marroha,
asa dapotan hasonangan tondimuna. Ai lambok do augangku
jala neang do dohot na hupaporsanhon”. (Mat 11:28-30).

5.6. Laos disuru do hita muse mamaritahon Barita haluaon i ai

didok do : “Laho ma hamu, podai hamu ma saluhut bangso,
didi hamu ma nasida tubagasan Goar ni Ama. Anak dohot
Tondi Parbadia! Laos ajari hamu ma nasida mangaradoti
nasa hata naung hupatikkon tu hamu. Ai ida ma, sai na
dongananku do hamu ganup ari, rasirasa ro ajal ni hasiangan
on”( Mat 28:19-20).

5.7. Songon i muse diparhani Tuhan Jesus do hita sahat tu

nuaeng, ai didok tu siseanNa: “Digoar hamu do Ahu Guru jala
Tuhan, jadi ture do pandokmuna disi; ai i do Ahu tutu. Asa
molo Ahu, Tuhan jala Gurumuna, mamburi patmuna, tama ma
nang hamu masiburian pat! Ai sitiruon do hulehon tu hamu,
asa dibahen hamu songon naung hubahen i tu hamu! Na
tutu situtu do na marsuru ibana” (Joh 133-16).

5.8. Patik na imbaru ma hulehon tu hamu: Naeng ma

masihaholongan hamu; songon holong ni rohangku di hamu,
naeng ma songon i dohot hamu masihaholongan. Apala
sian on ma tandaon ni halak saluhutna, hamu siseanku:
Molo masihaholongan hamu.”(Joh 13:34-35).
 14
5.9. Na tutu situtu do na hudok on tu hamu: Ndang umbalga anak
somang sian indukna, ndang sumurung suruan sian na
marsuru ibana. Molo diboto hamu i, martua ma hamu
mangulahonsa! Ndada tu saluhut hamu hatangki; na hutanda
do angka na hutodo i. Alai naeng ma jumpang na nidok ni
Surat i: "Donganku sapanganan, i do manjungkangkon patna
dompak Ahu!"9 Hupaboa i hian tu hamu, andorang so
songgop dope; asa ia dung saut, gabe porsea hamu: Ahu do
na nidok ni hata i. Na tutu situtu do na hudok on tu hamu: Na
manjangkon na husuru, Ahu do jinangkonna disi; alai nasa na
manjangkon Ahu, manjangkon na marsuru Ahu do!

( Joh 13 :16-209)

5.10.Ndang hugoar be hamu anak somang, ai ndang diboto anak

somang na niula ni indukna; aleale do hamu hudok, ai nunga
hupabotohon tu hamu saluhutna na hubege sian Damang.
Ndada hamu mamillit Ahu; Ahu do mamillit hamu jala
hupadiri hamu, asa laho hamu marparbue, jala asa mian
parbuemuna i; asa dilehon tu hamu nasa sipangidoonmuna
sian Ama i marhitehite Goarhu. On ma hupatikkon tu hamu.
Masihaholongan ma hamu! Molo dihosomi portibi on on
hamu, boto hamu ma, naung jumolo Ahu dihosomi ( Joh
14:15-18)

VI. Liturgi VI : ( Guru-Guru SD sekecamatan )

VI.1. Hamu dongan na hinaholongan ! Dalan mangahon
panghophopon ni Tuhantai, tama do tangihononta barita
hatutubu ni Tuhan Jesus tu portibion, asa taparhatopot
hasisintong ni Barita ni Tuhan Jesus paluahon jolma sian
dosana : ( uduti ma manghatindangkon Lukas 1:1-5 ).

VI.2. Lukas 2:6-8

VI.3. Lukas 2:9-10
VI.4. Lukas 2:11-13
 15
VI.5. Lukas 2 :14-15
VI.6. Lukas 2 :16-19
VI.7. Lukas 2:20-21
VI.8. Antong hamu angka donganku, na hinaholongan ! Rade
ma rohanta tontong sumomba goar ni Tuhan Jesus.
Tapasangap ma Debata na mangalehon haluaon i di
bagasan Jesus Kristus. Rap ma hita marsomba Ibana
ganup tingki di angka rumang ni parsaoran na
tahangoluhon siganup ari. Rap ma hita marsomba songon
pangalaho ni parmahan i, na masibetaan tu angka
donganna, dibagasan las ni roha marende huhutr mamuji
Tuhan i.

VI.9. Pilippi 2:9-12

VI.10. Asa ndang adong haluaon di bagasan manang ise na

asing; ai ndang adong goar na asing ditoru ni langit dilehon
tu jolma, parhiteanta tu haluaon ( Ulaon 4:12). Ai malua
ma ho, molo diparhatopot pamanganmi Tuhan Jesus i,
huhut dihaporseai roham, naung dipahehe Debata Ibana
sian angka na mate. Ai roha i do porsea, asa tu hatigoran;
pamangan i do mangkatindangkon, asa tu haluaon. (Rom
10:9-10 )

VI.11. Rom 10:11-13+17

VI.12. Joh 3:16-18
 16
VII. LITURGI PAPITUHON

VII.1. Hamu angka dongan na hinaholongan ! Sian panuturion ni

angka parbarita nauli. Nunga leleng naung sahat barita nauli
tu tonga ni bangsonta, di tonga ni bangso Batak. Aha do
panghorhon ni Barita Nauli di hita dohot tu angka na
humaliang hita ?. Hubege do barita ni angka pardalan ni
Barita nauli ari na salpu, mambahen bangsonta gabe bangso
na maju, haruar sian haholomomon dohot haotoon i. Torop
angka na sukses di angka ragam ni parngoluan i, siala
tangkas diradoti jala dipodahon nasida barita Nauli tu angka
anakhon nasida dohot di ragam ni parsaoranna pe.

VII.2. Nang hita pe, boi saotik mangantusi Hata ni Debata jala
mangalehon roha tu angka ulaon harajaon ni Debata,
rajumanta do i, siala pamodaion ni angka natorasta dohot
angka parjamita, na pasahathon hata ni Debata. Antong aha
ma naung tamemehon tu anakhonta, na paposhon rohanta na
mian do angka sundutta muse dibagasan hata ni Debata?.
Sotung do holan magodang anakhonta i di pamatangna, alai
ndang tubu hata ni Debata di ngolu nasida !

VII.3. Hamu angka dongan.. hubege tuk ma umur ni Barita na uli di

tano Batak on 146 taon di taon 2007. Pasupasu ni Debata do
i, na paloashon barita nauli i, hot mian di tonga ni bangsonta
sahat tu sadarion asa gabe bangso na satia hita di adopanNa.
Na huparungkilhon, las ni roha na songon dia ma na boi
jaloonta tu joloanon, silehonon ni Tuhan i ?. Aha ma
pangaradeon na ingkon sihobason ni ganup ruas dohot
parhalado, asa tung sintong boi marlas ni roha hita hombar tu
lomo ni roha ni Debata.

VII.4. Tung tama situtu do saluhut hita na liat naloloon

mamparungkilhon pasupasu las ni roha na songondia do na
 17
teahi di ngolunta ombas on. Tapamanat ma jala tasigatma
satongkin di ganup rohanta be. Nda naung lam denggan di
dilehon Debata nasa na ringkot di ngolunt on ?. Pasupasu
hahipason dohot ragam ni hamajuon i nunga tajalo be, jala
dao dumenggan sian angka tingki na salpu ? Hape jotjot do
lupa hita mangaramothonsa. Di na deba pasupasu na jinalona
i, godang dipasuasaehon, lalap di angka hasomalan na di
portibion. Na so mabiar do hita dipinsangpinsang dohot rimas
ni Debata
VII.5. Anggo di rohangku na sai huparungkilhon, jala na sai dilului
rohangku alus tu angka pangalaho na masa nuaeng on:
murana i harhar roha na masihaholongan , ragat tarbege
angka parsalisian di tonga ni masyarakatta, sega parsaoran ni
angka na marhahamaranggi, marpuntaran angka paradatan,
di deba luat adong na sampe na masipusaan. Nda lam tu
jorbutna do angka pangalaho i ? Damang, dainang na liat na
lolo....Aha do alus na boi jaloonta sian adopan ni Tuhanta laho
mangadopi angka na masa i ?
 18
VII.6. Tutu ma i... pangarujion ni rohamuna i. Nunga sada
pandohan sitangihonon ni sipareon jala siparrohahonon ni
partondion huhut sipeopon ni ateate angka na masa i. Jala
saluhut ma hita mangalualuhonsa tu Debata silehon ngolu i,
asa angka las ni roha boi jaloonta tujoloanon !. Tasomba ma
Debata, nampuna ngolu i, asa diusehon bisuk dohot sahala
pangajarion tu ganup hita, gabe tuk margogo hita
mamaritahon Hata ni Debata, di tonga ni partingkianta
ombason. Tung so margogo do hita mangula na ture, so
mardonganhon Tuhan i. Gabe jumpa ma hasadaon ni roha
laho pauliulihon luatta on gabe hombar tu lomo ni roha ni
Debata.

VII.7. Hamu angka dongan na hinahololongan ! Tasigati ma sian

hata ni Debata laho paingothon hita. On do na hujaha di
Bibelta i:”Tangihon ma, ale Israel, anggo Jahowa Debatanta i,
Jahowa Sasadasa do. Jala ingkon haholonganmu Jahowa,
Debatam sian nasa roham dohot sian nasa ateatem dohot
sian nasa gogom. Jala ingkon parateatehononmu luhut hata
on, angka na hutonahon tu ho sadarion.”( 5 Musa 6:5-5)

VII.8. “Jala ingkon gogoonmu mangajarhon angka i tu angka

anakmu, jala taringotanmu angka i, molo hundulhundul ho di
bagasan jabum, manang mardalani ho di pardalanan, manang
laho modom pe ho, nang dung hehe muse. Jala ingkon
rahuthononmu angka i bahen partinandaan di atas tanganmu,
jala bahen parningotan di holangholang ni matam. Jala ingkon
surathononmu angka i tu tohang ni jabum dohot tu
panggumbanganmu”( 5 Musa 6:7-9).
 19
VII.9. Nang Tuhan Jesus sandiri pe dipaingot do siseanNa uju i,
nang tu hita ombason, songon on hataNa:”Loas hamu ma ro
angka dakdanak i sahat tu Ahu; unang orai hamu nasida, ai di
angka sisongon i do harajaon ni Debata! Situtu do hatangkon
tu hamu: Na so manjalo harajaon ni Debata songon
dakdanak, ndang saut bongot tusi. Dung i dihaol ma nasida,
diampehon ma tanganna tu nasida laho mamasumasu” (Mark
10:14-16).

VII.10. Las ma roha umbege Hata ni Debata na paingothon hita

songon huria, sumarihon pamodaion tu angka sundut na
umposo, asa tung tangkas tahaporseai Jahowa do silehon
hangoluan i, jala parsidohot mamboan angka anakhonta tu
angka pangajaran na tama di tonga huria i. On ma parbue ni
pesta Natal siparhanalomon ni rohanta. Marlas ni roha ma
hita saluhutna di tingki na pinarade ni Tuhan laho mamuji
Ibana ro di salelenglelengna.

VIII. LITURGI PAUALUHON:

 20
VIII.1. Nunga mulakulak songon na mangusa botohon tabahen laho
tumangihon dohot manghatindanghon Barita Hatutubu ni
Tuhan di ganup pesta Natal. Nuaeng di Pesta Natal
sadarion, naeng papataronta las ni rohanta marhite
pambahenan na manghorhon na denggan di tonga ni
nglunta be. Taloas ma hata ni Debata mangarajai rohanta,
asa nasa gulmit ni ngolunta boi mambahen marsangap
Tuhan i.

VIII.2. Borhat ma hita dibagasan las ni roha tu ulaonta laho

sumarihon nasa na ringkot tu ngolu siganup ari dohot di
ngolu partondionta. Tu angka parhalado, songon on do
pamodaion ni hata ni Debata: Ala ni i hupaingot ho, asa
diparatarata ho silehonlehon ni Debata, na tu ho i, di na
huampehon tanganki tu ho. Ai dilehon Debata do tu hita
tondi hagogoon, tondi haholongon, tondi pangarajaion diri,
ndada tondi hatahuton.
 21
VIII.3. Onpe, unang ho maila, mangkatindangkon Tuhanta i, jala
unang hailahon ahu, na tarhurung humongkop Ibana; dohot
ma ho tahe mangkongkop barita na uli, sian hagogoon ni
Debata! Ai dipalua jala dijou do hita marhitehite panjouon na
badia; ndada marguru tu ulaonta, tung sian tahina dohot sian
asi ni roha, na binasabasahon tu hita di bagasan Kristus
Jesus, na sian mula ni mulana. “Alai anggo ho, sandok
unang ma mabuk roham, taon ma na jat i; radoti na tama
ulaon ni parbarita na uli; sahat ula tohonanmi!.

VIII.4. Hamu angka anak, oloi hamu ma angka natuatuamuna di

bagasan Tuhan i; ai i do na tigor. "Parsangapi amangmu
dohot inangmu!" I do patik na parjolo mardongan bagabaga:
"Asa martua ho jala leleng mangolu di tano on!" Hamu
angka ama, unang gintali hamu angka anakkonmuna;
pagodanggodang hamu ma nasida di bagasan ajar dohot
poda ni Tuhan i!

VIII.5. Hamu angka anak somang, oloi hamu ma angka indukmuna

di hasiangan on mardongan biar dohot lomos ni roha;
marroha na bulus songon na maradophon Kristus! Unang
hamu pangoloi di mata, songon na mambuat roha ni jolma;
songon naposo ni Kristus ma ulahon hamu roha ni Debata,
sian nasa rohamuna. Sian burjumuna ma hamu mangoloi:
Songon di Tuhan i, unang di jolma i!

VIII.6. Ai diboto hamu do: Sumuang jaloon ni ganup sian Tuhan i na

denggan na niulana, manang hatoban ibana manang anak
mata. Hamu angka induk pe, laos songon i ma bahen hamu tu
nasida; antahi hamu ma na mangasupi i, ai diboto hamu do, di
banua ginjang do nang Tuhanmuna, jala ndada siida bohi
Ibana.

VIII.7. Martoruk ni roha situtu, marlambok jala marlambas ni roha,

masihaehean di bagasan roha na holong! Haringgashon
hamu ma mangaradoti hasadaon ni Tondi, pinadomu ni
 22
dame! Ai sada do daging i, jala sada do Tondi; ai songon i
do hamu tarjou di bagasan sada pangkirimon di panjouon i.
Sada do Tuhan, sada do haporseaon, sada do nang
pandidion. Sada do Debata, Ama ni sasude, sigomgomi
saluhut, sitorusi saluhut jala siingani saluhut. ( Galatia 4:2-6)
VIII.8. Alai tu ganup hita be do dibasabasahon asiasi i, marguru tu
panagihon ni pangalehon ni Kristus. Dibahen i ninna do: "Nunga
manaek Ibana tu ginjang, ditaban do na tarhurung; dilehon do
silehonlehon tu angka jolma!" Alai nangkok pe Ibana, naung tuat
do Ibana jumolo tu inganan na ditoru ni tano. Ibana, naung tuat i,
laos I do na manaek tu ginjang ni saluhut banua ginjang, asa
digohi sasude. Laos Ibana do mangalehon deba gabe apostel,
deba panurirang, deba evangelist, deba muse parmahan jala
pangajari, patureturehon angka na badia i, laho mangulahon
tohonan i, pauliulihon daging ni Kristus: (Gal 4:7-12)

VIII.9. Paima sahat hita saluhut tu hasadaon ni haporseaon nang

parbinotoan di Anak ni Debata, gabe jolma na tang jala matoras
situtu, mangihuthon hagogok ni rimpas ni Kristus. Asa unang be
hita dakdanak, angka na pinalindaklindak jala na
pinamboanboan ni pangombus ni ragam ni poda, binahen ni
pangaliluhon ni jolma dohot angkal na paotootohon. Gabe
parhasintongan hita tahe di bagasan haholongon i, jala lam
magodang ma hita di na saluhut, mangeahi Ibana, Ulu i, i ma
Kristus.
( Gal 4:13-15 )

VIII.10. Unang hamu lilu; ndang olo Debata leaan! Ai ia i disabur

halak, i do gotilonna! Ai na manabur tu dagingna, manggotil
do sian dagingna hamagoan; alai na manabur tu tondi,
manggotil do sian tondi i hangoluan salelenglelengna! Alai
unang marnaloja hita mambahen na denggan, ai na
manggotil do hita muse di tingkina i, anggo so pargale hita
nuaeng. Antong, binsan sadihari dope, taulahon ma na
denggan di saluhut halak, alai gumodang ma tu donganta
sahaporseaon ( Gal 6:7-10 )
 23
VIII.11. Alai mauliate ma di Debata, na pamonang hita marhitehite
Tuhanta Jesus Kristus! Onpe, hamu angka donganku na
hinaholongan, marsihohot jala so mubauba ma hamu, jala
lam sumurung ma tongtong di bagasan ulaon ni Tuhan i, ai
diboto hamu do: Ndang magopo halojaonmuna di bagasan
Tuhan i ( 1 Korint 15:57-58)
Disusun oleh :
Pdt.R.Harianja,STh.