 Ev: Johannes 1 : 1 - 14  Ep: Jesaya 9 : 1 - 6

TOPIK:
GABE DAGING MA HATA I

(Pesta Natal I)
Natal HKBP 1
 Minggu, 25 Desember 2022
I. PANGARADEON
Parhalado Partohonan mangarade di Bilut Parhobasan tagan so borhat
prosesi.
II. PROSESI :
Uju mardalan Parhalado Partohonan sian pintu masuk bagas gareja marende ma
ruas sian BE. No. 853 “Haleluya (12x)” niluhon ni MC. Laos jongjong ma
parhalado Partohonan di jolo ni langgatan mangadop dompak ruas ni huria.

III. KEBAKTIAN

1. Joujou tu Parsombaon tu Debata: (U: Uluan ; H: Huria)

U: Huria ni Tuhanta, sadari on tanggal 25 Desember taon 2022, i ma pamusatan ni
sude las ni rohanta mamestahon Parningotan Hatutubu ni Tuhanta Jesus Kristus.
Marpungu do sude angka na porsea manghamauliatehon balga ni asi ni roha ni
Debata na manongos AnakNa na sasada i gabe haluaon ni sandok manisia.
Antong sian hami parhalado hupasahat hami ma tu hamu saluhutna “Selamat
Ari Natal”
H: “Selamat Ari Natal” ma nang tu hamu angka amanami dohot inanami
Parhalado di Huria on.
U: Gabe daging ma hata i jala maringanan di tongatonga ni hita on. Antong
tapahibul ma rohanta manjanghon Ibana tubu di rohanta nang di parsaoranta
marhite parmingguonta di ombas on, marende ma hita!
2. Marende BE. No. 57 :1 – 3 “NUNGA JUMPANG MUSE ARI PESTA I” BL. 202
(Tingki marende, digalahi ma lilin laos mulak ma Parhalado Partohonan tu
ingananna be)
♫♪♫
Nunga jumpang muse ari Pesta i, hatutubu ni Tuhanta Jesus i. Tuat do Ibana sian
surgo i, mebat tu hita on. Hasangapon di Debata, dame,dame ma di jolma.
Las ni roha ni Debata, hajolmaon muse.
♫♪♫
Beta, ale dongan tu Betlehem i, itasomba ma Dakdanak na disi. Na tinongos ni
Parasiroha i Debata Ama i. Hasangapon di Debata, dame,dame ma di jolma. Las
ni roha ni Debata, hajolmaon muse
---Musik---
♫♪♫
(Jongjong) Sombanami ma di Ho na tubu on, Ho siboan dame tu portibi on. Sai
pasaorhon ma tu rohanami on, dameMi o Jesus. Hasangapon di Debata, dame,
dame ma di jolma. Las ni roha ni Debata, hajolmaon muse.
3. Votum – Introitus :

Natal HKBP 2
 U: Marhitehite Goar ni Debata Ama dohot Goar ni AnakNa Tuhan Jesus Kristus
dohot Goar i Tondi Parbadia. Amen. Dung i gabe daging ma Hata i, jala
maringanan di tongatonga ni hita on, jadi huida hami ma hasangaponNa songon
hasangapon ni anak sasada na sian Ama i, gok asi ni roha dohot hatutuon.
Haleluya!
H: (Mangendehon) Haleluya….Haleluya…..Haleluya.
U: Martangiang ma hita: Ale Tuhan Debata, Amanami na di banua ginjang!
Mandok mauliate do hami tu Ho, ala ni godang ni asi dohot holong ni rohaM di
hami; ai dibasabasahon Ho do AnakMu na sasada i tu hami na di pardangolan
on, asa malua hami marhitehite Ibana sian dosa dohot sian hamatean saleleng ni
lelengna. Hupangido hami tu Ho, sai sondangi ma rohanami na holom i
marhitehite Tondi Parbadia i; angkup ni i sai parrohai ma hami, asa huboto
hami mandok mauliate tu Ho, asa tarapul situtu rohanami di hagogotan dohot di
pangunjunan marhitehite AnakMu, Tuhan Jesus Kristus Tuhannami. Amen.
(Hundul)
4. Marende BE No. 602 : 6 “DI NATAL NA PARJOLO I ” BL.602
♫♪♫
Antong marende hita on, di Raja ni langit nang tano on. Na paluahon hita on
sian huaso ni portibi on. Noel, Noel, Noel, Noel, tubu Raja ni Israel.

5. Patik :
U : Tatangihon ma Patik ni Debata sian Josua 24 : 14. On pe sai habiari hamu ma
Jahowa, jala marsihohot rohamuna mangoloi Ibana di bagasan hasintongan,
H : Jala paholang hamu debata sileban, angka na nioloan ni ompumuna di
bariba ni batang aek i dohot di Misir,
U : Jala oloi hamu ma Jahowa!
I do sahatna. Antong, rap mangido gogo ma hita tu Debata.
U+H : Ale Tuhan Debata sai pargogoi ma hami mangulahon na hombar tu
patikMi. Amen.

6. Marende BE No. 172 : 1 - 2 “O JESUS PANONDANG” BL. 143

♫♪♫
O Jesus panondang di portibi on. Mula ni na torang tangi hatangkon. Sai asi
rohaMu di pardosa on. Ho ma mangapuli au na marsak on.
(Jongjong)
♫♪♫
Sesa ma dosangku, ale Tuhanhi. Ala ni mudarMu na nilehonMi.
Asal ma rohangku, salelengna i. Ingot di hansitMu, dohot mudarMi.

7. Manopoti Dosa dohot Bagabaga Hasesaan Ni Dosa.

U: Tatopoti ma dosanta, martangiang ma hita! Ale Tuhan Debata, Amanami na
di banua ginjang! Ho do na patupahon hasesaan ni dosa di hami halak na
dangol on marhitehite Anak haholongan ni rohaM. Sai asi ma rohaM di hami,
Natal HKBP 3
 angka na mangarsakhon dosanami.
H: Sai sahapi ma tu bagasan rohanami hasesaan ni dosanami i. Lehon ma tu
hami TondiM na badia i, asa unang ganggu rohanami di asi ni rohaM,
alai asa hot rohanami marhaporseaon laho manggotaphon nasa dosa
dohot roha portibi on.
U: Asa hupasahat hami dirinami tu Ho, gabe pelean na mangolu jala na badia
marhitehite Tuhan Jesus Kristus Tuhannami. Amen.
Tabege ma Hata bagabaga taringot tu hasesaan ni dosa! Songon on do
panghaholongi ni Debata di portibi on, pola do AnakNa na sasada i dilehon,
asa unang mago ganup na porsea di Ibana, asa hangoluan na saleleng ni
lelengna di ibana. Hasangapon ma di Debata na di ginjang!
H: Amen!

8. Marende BE No. 610 : 1 “PASANGAP MA” BL. 610

♫♪♫
Pasangap ma, pasangap ma Debatanta, Debatanta na di ginjang. Dame ni
Tuhan saor tu hita angka jolma halomoanNa. Pasangap ma Debatanta,
pasangap ma Debatanta. Dame ni Tuhan, saor tu hita, dame ni Tuhan saor tu
hita; angka jolma, angka jolma halomoanNa. Angka jolma halomoanNa,
halomoanNa. Pasangap ma ! Pasangap Ma ! Debatanta, Debatanta na di
ginjang. Dame ni Tuhan, saor tu hita angka jolma. HalomoanNa. Amen, Amen.

9. Epistel:
U : Tatangihon ma Hata ni Debata turpuk Epistel di Minggunta sadari on, tarsurat
Jesaya 9 : 1 – 6. Bangso na mardalani di bagasan haholomon marnida sada
panondang na bolon.
H : Binsar do sada panondang di angka na mangingani tano linggoman ni
hamatean.
U : Nunga dipatorop ho bangso i. Nunga dipadiri ho di ibana halalas ni roha na
bolon:
H : Marlas ni roha nasida di jolo ni bohim, songon las ni roha di gotilon,
songon parolopolopon di na marbagi tabantaban.
U : Ai nunga diponggolhon ho auga na ampe tu ibana, dohot batahi ni abarana
dohot linsinglinsing ni na mangadu ibana, songon uju di ari Midian.
H : Ai masoksok do sogot nasa sinjata ni parsinjata di hatuturtar ni
tongtangan, ro di ulos na marsapu mudar, gabe sipanganon ni api.
U : Ai nunga tubu di hita sada posoposo dilehon tu hita sada Anak, pampe tu
abarana do sogot harajaon, jala bahenonna goarna:
H : Sipartahi Halongangan, siulubalang ni Debata, Ama saleleng ni lelengna,
Raja ni hadameon.

Natal HKBP 4
 U : Bahen hagaganda ni harajaon dohot hadameon na so marujung di habangsa ni
si Daud dohot di harajaonna i,
H : Pahothon dohot patoguhon marhitehite patik dohot hatigoran, olat nion
ro di salelenglelengna. Hamuruhon ni Jahowa Zebaot patupahon songon
i.
U : I do sahatna. Martua do angka na tumangihon Hata ni Debata jala na
umpeopsa. Amen.

10. Marende BE No: 56 : 1 + 4 “SAI RO MA HAMUNA” BL. 139

♫♪♫
Sai ro ma hamuna angka na porsea. Sai ro ma hamuna tu Betlehem.
Ida dakdanak, sipalua hita, tasomba ma Ibana, tasomba ma Ibana, tasomba ma
Ibana, Rajanta.
(Jongjong)
♫♪♫
O Jesus Tuhanhu sai naeng pujionhu pambaenMu di ahu pardosa on. Ai gabe
jolma Ho humophop ahu, tasomba ma Ibana, tasomba ma Ibana, tasomba ma
Ibana, Rajanta.

11. Manghatindanghon Haporseaon:

U : Tahatindanghon ma haporseaonta i, songon na hinatindanghon ni donganta
sahaporseaon di sandok portibi on. Rap ma hita mandok!
H : Ahu porsea ….. du. Amen !
(Hundul)
12. Tingting.

13. Marende No. 616 : 1…. “ULINA I DI BORNGIN NA BADIA” BL.616

(Papungu pelean 1a + 1b)
♫♪♫
Uli na i di borngin na badia, humirdop-hirdop do bintang disi.
Di borngin i do tubu Sipalua, di panggagatan di Betlehem i.
Portibi on dangol gok haholomon, marnida sondang ni Tuhanta i.
Uli na i marende do suruan, di borngin i, do tubu Kristus i
Di borngin i, do tubu Kristus i.
♫♪♫
Sian na dao parroha sian purba, ro do tinogihon ni bintang i.
Marsinggang be nasida lao marsomba, tu Jesus Kristus Sipalua i.
Ibana ro sian banua ginjang, laho paluahon hita jolma i.
Uli na i marende do suruan, diborngin i, do tubu Kristus i
Di borngin i, do tubu Kristus i.
---Musik---
♫♪♫
Ulina i sude marlas ni roha, ala naung songgop harajaonNa i.
Huria i ria do ro marsomba, mamuji Raja na sun sangap i.
Ibana do panondang hangoluan, namangalehon panghirimon i.
Uli na i marende do suruan, diborngin i, do tubu Kristus i
Di borngin i, do tubu Kristus i.
Natal HKBP 5
14. Jamita : Johannes 1 : 1 – 14.

15. Marende BE No. 62 : 1 - 5 “HALALAS NI ROHA GODANG” BL.172

(Papungu Pelean Namarboho tu Diakoni Sosial Caritas Emergency HKBP)
♫♪♫
Halalas ni roha godang, na hubaritahon on.
Nunga tubu Sipalua di hita jolma on.
Hasangapon di Debata, laos dame, dame, dame ma di jolma.
Lomo ni roha ni Debata do hita jolma on.
♫♪♫
Ai saborngin on do binsar bintang di na holom i.
Sumondangi hagolapon, na di rohanta i.
Reff : Hasangapon di Debata,………………
---Musik---
♫♪♫
Tuhan Jesus hadomuan, na disuru Debata,
Na pasaehon sude dosa di dolok Golgata.
Reff : Hasangapon di Debata,………………
♫♪♫
Sai sondangi ma rohangku, ale Tuhan Jesus i.
Asa dohot au maruli, di hatutubuMi
Reff : Hasangapon di Debata,………………
---Musik---
♫♪♫
Halalas ni roha godang sai songgopi rohangkon
Asa dohot au ummalo Mamuji goarMi
Reff : Hasangapon di Debata,………………

16. Parsuruon : (Jongjong)

U : Gabe daging ma Hata i, jala maringan ditongatonga ni hita on! On ma barita
Natal mangihuthon si Johannes, laos i do nang panghorhon ni pesta Natal di
hita, asa tapatuduhon Jesus Kristus i ‘mangolu’ di bagasan diri, keluarga
dohot hurianta. Antong tajanghon ma ibana mian di bagasan ngolunta dohot
keluarganta; taboan ma ibana mulak sian parpestaan on tu angka bagasta asa
mian ibana di tongatonganta ganup ari!
H : Barita na ummuli, hutangi hami be, sorang ma Ho di ngolungki, ale
Immanuel.
U : Di bagasan partondionta nunga dohot hita nuaeng jongjong di bara ni pinahan
na di Betlehem i; di adopanta do Posoposo i, i ma Jesus Kristus Tuhanta i.
Somba ma ibana marhite ngolum dohot ulaonmu, parangehon hataNa,
mangolu ma ho dibagasan dame na sian Tuhanta i.
H : (Mangendehon) BE. HKBP No. 608: 4 “O Betlehem Na Metmet i”
(Jongjong )
♫♪♫
O Anak na badia i, ro Ho tu hami be.
Natal HKBP 6
 Bongoti daging tondi i, parbadiai sude.
Barita na ummuli, hutangi hami be.
Sorang ma Ho di ngolungki, ale Immanuel.
17. Tangiang Pelean:
U : Tatangianghon ma peleanta. Ale Debata, Amanami na di banua ginjang! Ho
do haroroan ni saluhut silehonlehon na denggan dohot nasa ulibasa na
mauliutus. Hupasahat hami ma sian na nilehonMi tu hami, peleannami tu Ho.
Sai jalo ma i gabe uap na hushus di joloM. Pasupasu ma i jala ramoti asa
huparhaseang hami pelean on, patimbulhon harajaonMu di tongatonga ni
huriaM dohot di portibi on. Buhai ma rohanami marhitehite TondiM, asa lam
hutanda hami godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. Amen.
H : (Mangendehon) BE. HKBP No. 204 : 2 “NDANG TADINGHONONHU
HO” BL 73
♫♪♫
Nasa na nilehonMi, tondi ro di pamatanghu.
Hosa dohot gogongki, ro di saluhut artangku.
Hupasahat i tu Ho, na so unsatonhu do.

U : Ale Tuhan Debata, Debata na tongtong, na so marmula, na so marpansohotan!

Hupuji hami ma Ho ala saut sude tahiM, naung sinangkapMu, andorang so
marojahan dope hasiangan on. Ndang tarambat sibolis sangkapMu; ndang
sundat tahiM na badia i dibahen dosanami, ala ni holong ni rohaM na balga na
so hadodoan i. Dibahen i mauliate ma rohanami tu Ho, ala naung saut
sangkapMu, i ma parsuruM di AnakMu gabe Sipalua jala Sipangolu di hami,
asa malua hami sian dosa, hamatean dohot sian uhum jala mansohot hami
mangulahon dosa. On pe, sai asi ma rohaM di hami, togihon ma hami tu
AnakMu. Sai bahen ma hami gabe siluaM tu Ibana, asa upa ni halojaonNa
hami, ala na tinaonNa na bernit i dohot hangaluton humophop hami, asa Ibana
nampuna hami, jala hami nampuna Ibana. Sai sungguli ma HuriaM sadari on,
asa diingot habalgaonMu dohot haroro ni AnakMu gabe jolma, laho
pangoluhon hami pardosa. Sai sungguli ma angka parhalado di HuriaM,
mamaritahon Barita na Uli i tu saluhut halak, naung patar hasangaponMu, jala
naung jumpang dame dohot hasonangan. Sai lehon ma pintu na ungkap tu
halak sipelebegu dohot tu parugamo na asing asa ro nasida mangoloi
Tuhannami Jesus Kristus. Sai rajai ma saluhut raja dohot angka suruanna, asa
diboto nasida naung dilehon Ho Raja, jala Tuhan na sumurung i ro di saleleng
ni lelengna. Sai lehon gogo tu angka na di bagasan pangunjunan, apuli angka
na marsak jala palua angka na targogot. Sai tatap jala ondingi angka na
pinaburuburu ni halak ala ni GoarMu. Sai dongani jala pasupasu hami sude,
angka na magodang ro di dakdanak di bagasan Tuhan Jesus Kristus,
Tuhannami. Amen.

Natal HKBP 7
 Ale Amanami na di banua ginjang! Sai pinarbadia ma GoarMu! Sai ro ma
harajaonMu! Sai saut ma lomo ni rohaM di banua tonga on songon na di
banua ginjang! Lehon ma tu hami sadari on hangoluan siapari! Sesa ma
dosanami songon panesanami di dosa ni dongan na mardosa tu hami! Unang
hami togihon tu pangunjunan! Palua ma hami sian pangago!
H : (Mangendehon): BE HKBP No. 841 : 1 “AI HO DO NAMPUNA
HARAJAON” BL 841
♫♪♫
Ai Ho do nampuna harajaon, dohot hagogoon, ro di hasangapon,
saleleng ni lelengna. Amen.

U : Tangiang Pasupasu

H : (Mangendehon ) BE No. 845 : 1 “AMEN, AMEN, AMEN” BL 845

Amen, Amen, Amen.

Natal HKBP 8