PARTORDING NI PARMINGGUON

DI MINGGU ADVENT II

Ev.Psalmen 85 : 9 - 14 Ep. Markus 1 : 1 - 8

TOPIK :
NUNGA JONOK HALUAON I

HURIA KRISTEN BATAK PROTESTAN

Minggu, 6 Desember 2020
01. PAMUHAI :
U : Huria na hinaholongan ni Tuhanta Jesus Kristus, Pinasahat ma tabe
tu sude hita ruas ni huria na marpungu di Minggu Advent na
paduahon sadari on: Selamat Advent ma di hita saluhutna.
R : Selamat Advent.
U : Nalom ma roham tu Jahowa ale Israel, ai parasi roha do Jahowa, jala
godang do haluaon di Ibana.
R : Pinuji ma Tuhan i, Debata ni Israel, ala ditopot bangsoNa jala
dipatupa haluaonNa. Dipatindang do di hita tanduk haluaon di
bagas ni si Daud naposoNa i.
U : Di ari sadari on tama hita mandok mauliate tu Debata na sai
mangaramoti pardalanan ni huriaNa. Nunga sahat hita tu Minggu
Advent Paduahon, na managam do hita di haroro ni Kristus i laho
mamboan haluaon di hita, asa malua hita sian parhatobanan ala ni
dosa, songoni dohot sian ragam ni hasusaan di portibi on. Nuaeng pe
NUNGA JONOK HALUAON I, taparade ma rohanta laho manjanghon.
Taendehon ma Tuhan i naung ro mamboan tua i.
02. Marende BE No. 40 :1,5 LAS BE MA ROHAMUNA BL. 153
 Las be ma rohamuna na tigor roha i
Naung ro do Rajamuna mamboan tua i
Ndang marpanggortap i anggo di haroroNa
Alai tuk do gogoNa padaohon jea i
 Hamu na marsak roha di hasiangan on (Jongjong)
Dibaen godang ni dosa na di portibi on
Sai hehe ma hamu padirgak ulumuna
Ai hamoraonmuna do Jesus i tutu.
03. VOTUM – INTROITUS – TANGIANG:
U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Porbadia na tumompa langit dohot tano
on. Amen. Paboa hamu ma tu boru Sion: Ida ma, nunga ro hatuaonmi!
Ida ma, ihut tu Ibana do upa silehononNa, jala pamalosonNa di
joloNa. Haleluya
R : (Mangendehon): Haleluya, Haleluya, Haleluya!

1
 U : Martangiang ma hita : Ale Tuhan Debata, ajarhon ma tu hami
aturanMu; unang tadingkon hami! Patonggor ma matanaMi, asa
hutanda hami hatuaonnami na sian Ho i; pargogoi hami marhitehite
HataM. Padao ma sian hami nasa poda na lipe, sai togihon ma hami di
angka dalanMu, asa hutanda hami Ho hangoluannami manang
mangolu manang mate pe hami, marhitehite Tuhannami Jesus
Kristus AnakMi. Amen. (Hundul)
04. Marende BE No. 41: 5 PARRIPE NI TUHANTA Bl. 153
 Godang do lehononNa di hita sasude
Sai naeng do bongotonNa nuaeng rohanta be
Tung ise hita on manjua paluaon
Manjua pasonangon ni Raja i antong ?
05. PATIK:
U : Tangihon hamu ma Patik ni Debata di Minggu ADVENT II on, i ma na
tarsurat di Pangungkapon 3: 20, Ida ma, na jongjong do Ahu di jolo
pintu i manuktuhi, ia adong na manangihon soarangKu dohot
mangungkap pintu i, bongot ma Ahu tu ibana, mangan ma Ahu rap
dohot ibana, jala ibana rap dohot Ahu. (Antong rap mangido gogo ma
hita tu adopan ni Debata).
R : Ale Tuhan Debata, sai pargogoi ma hami mangulahon na
hombar tu PatikMi. Amen.
06. Marende BE No. 733 : 1 - 2 DULO MA AU ON O TUHAN
 Dulo ma au on o Tuhan bege anggukkon,
Ro do Ho tu angka dongan topot ma au on.
Jesus Tuhan bege anggukkon,
Ro do Ho tu angka dongan topot nang au on.
------Jongjong--------
 Tu adopanMi o Tuhan marsomba au on,
Sai asi rohaM o Tuhan, jangkon ma au on.
Jesus Tuhan bege anggukkon,
Ro do Ho tu angka dongan topot nang au on.
07. MANOPOTI DOSA:
U : Huria ni Tuhanta, dibagasan roha na hohom tatopoti ma dosanta na
godang i tu adopan ni Debata, :
(tingki na hohom . . : Musik ........BE No. 541: 1. Bl. 373)
2
U : Ale Debatanami, na marasiroha jala na badia, Amanami, marhitehite
Tuhan Jesus Kristus! Sai na ro do hami tu joloM, ala huhilala hami,
ringkot do asi ni rohaM di hami saluhut halak pardosa. Nuaeng
hupaserep hami dirinami di joloM, jala huparhatopot hami, tung na
jotjot do hami manimbil sian angka dalanMu na badia songon
birubiru na lilu. Di Minggu Advent na paduahon on, na tungki do
hami di adopanMi mangido hasesaan ni dosanami sian Ho.
R : Ale Tuhan Debata, Asi ma rohaM di hami, jala sai parbadia i ma
hami.
U : Ale Debatanami, huida hami do pangiringiringonMu di hami huriaM,
atik pe sai godang angka hamaolon hubolus hami, alai dipademak Ho
do saluhutna i gabe tarbahen hami mamolus nasa partingkian.
Nuaeng nunga sahat hami tu Advent na Paduahon, jala dipaingot
hami naung jonok do haluaon sijaloonnami. Asi ma rohaM di hami,
sai otapi ma hami on mangulahon nasa dosa. Tung unang pabali hami
sian joloM ala ni dosanami i. Ajari ma hami mamangke partingkian
asa sai hobas rohanami paimaima haroroM mamboan haluaon i di
hami.
R : Ale Tuhan Debata, Asi ma rohaM di hami, lehon ma hamubaon
ni roha di hami be asa dapotan hangoluan sisalelengnilelengna
hami.
U : Sesa ma saluhut hageduhonnami dohot pangalaosionnami
marhitehite pangulunami na sasada i, AnakMu Tuhan Jesus Kristus.
Sai pahot ma asi ni rohaM di hami marhitehite panindangion dohot
hagogoon ni Tondi Parbadia asa tarapul situtu rohanami manjou Ho,
asa pantun, tigor jala daulat hami marpangalaho, bahen hasangapon
di GoarMu na badia i. Amen.
R : (Mangendehon): 541: 5 NA MULAK JESUS I BL. 373
 Tinggil ma pinggolhi di soaraNa i
So tung so begeonhu i di haroroNa i
Hutundalhon ma na di pudingki
Jesus ma haposanhi di haroroNa i.
U : Bagabaga ni Debata taringot tu hasesaan ni dosa: Songon on do
panghaholongi ni Debata di portibi on, pola do AnakNa na sasada i

3
 dilehon, asa unang mago ganup na porsea di Ibana, asa hangoluan na
saleleng ni lelengna di ibana. Hasangapon ma di Debata di ginjang!
R : Amen (Hundul)
08. Marende BE No. 45: 4,6 HOSIANNA ANAK NI RAJA DAVID BL. 73
 Hosianna! Tatap ma hami na nirajaanMu
Togu ma tu Debata hami angka siseanMu
Sai sungguli hami on mangoloi hataM tongtong.
 Hosianna! Pargogoi hami sasude o Tuhan
Asa gabe pangoloi hami na di pardangolan
Di hataM na denggan i asa pinatulus i.
09. E P I S T E L :
U : Tabege ma Hata ni Debata turpuk ni ari Minggu Advent pa- II on i ma
na tarsurat di Markus 1: 1 – 8, On ma mula ni Barita na Uli ni Jesus
Kristus.
R : Hombar tu na tarsurat di Panurirang Jesaya: "Husuru ma
suruanHi, patujolo ni bohiM, sipature sidalananMi.
U : Soara ni na manjoujou di halongonan: Pature hamu ma dalan di
Tuhan i; pahornop hamu ma sidalananNa i."
R : Di halongonan do si Johannes mandidihon jala manjamitahon
pandidion hamubaon ni roha, laho pasesahon dosa.
U : Jadi ruar ma sude pangisi ni tano Judea ro di sude halak Jerusalem
manopot ibana jala dipandidihon do nasida di batang aek Jordan,
dung ditopoti be dosana.
R : Ianggo si Johannes i, imbulu ni unto do ulosna jala hulinghuling
do hohosna, angka sihapor dohot situak ni loba do
sipanganonna.
U : On do jamitana; “Na ro ma sian pudingku na gumogo sian ahu; na
hurang tama do ahu paunduk ahu mangharhari tali ni sipatuNa.
R : Aek do hudidihon tu hamu; alai Tondi Parbadia do didihononNa
tu hamu.”
U : I do sahatna: Martua ma angka na tumangihon Hata ni Debata jala
na umpeopsa. Amen.

4
10. Marende BE No. 574 : 2 - 3 PUJI MA DEBATA
 Olophon-olophon Tuhan i, hatindanghon denggan ni basaNa i,
Sai arahon donganmi, ro tu sipalua i,
Olophon-olophon Tuhan i, hatindangkon ma denggan basaNa i.
-----Jongjong-----
 Tagam ma, tagam ma Tuhan i, sai pagalak ma tongtong palitomi,
Lam jonok ari na i, salpu parungkilon i, tagam ma tagam ma Tuhan i
Sai pagalak ma tongtong palitomi.
11. MANGHATINDANGHON HAPORSEAON:
U : Tahatindangkon ma haporseaonta i, songon na hinatindangkon ni
donganta sahaporseaon di sandok portibi on. Rap ma hita mandok:
R : Ahu Porsea….. (Hundul)
12. TINGTING + TANGIANG PANGONDIANON
13. Marende BE No. 417: 1-- RADE SITUTU HALUAON BL. 278 (Pel. IA-IB)
 Rade situtu haluaon na naeng tangkuponmu antong
Rade nang di ho hatuaon, si halashononmu tongtong
Bernit do di taon Tuhanmu pasaehon dosam sasude
Tung unang paujat Ibana, sai jangkon panghophopNa i.
 Patedek sude hahurangan, topoti sandok dosami
Pangido: Sai sesa o Tuhan, sude pangalaosionhi
Datdati, sai saut botoonmu naung sesa dosam sasude
Mardame dagingmu nang tondi, maniop tongtong Tuhan i.
-----Musik-----
 PangkophopNa i parangehon, pasangap Tuhanmu antong
Ibana buas mangalehon tu ho hasonangan tongtong.
Sandok sian holso malua, nang sian biarmu sude,
Sonang nama ho na martua, manghirim tongtong Surgo i.
14. JAMITA: Psalmen 85: 9 – 14
15. Marende BE No. 802: 1-- PANGKE TINGKIM SAONARI (Pel. II tu Pusat)
 Pangke tingkim saonari, dapothon ma Tuhan i
Unang godang sidalian, ingot jempek ngolumi
Nunga rade hasonangan di Surgo i, di Surgo i
Unang adong nanggo sada na so parjambar disi.
 Suan ma holong ni roha, tiru ma Tuhanta i

5
 Las ma roham digotilon, jalo ma balos ni i
Nunga rade hasonangan di Surgo i, di Surgo i
Unang adong nanggo sada na so parjambar disi.
----Musik-----
 Molo taida donganta, na sai marungkil tongtong
Unang pasombu sai susa, togu urupi antong
Nunga rade hasonangan, di Surgo i, di Surgo i
Unang adong nanggo sada na so parjambar disi.
16. PANGUJUNGI: (Jongjong)
U : Nunga tabege Hata ni Debata na paingothon hita asa sai tatangihon
na ni dok ni Debata Jahowa. Diparbaga do hasonangan tu bangsoNa
nang tu hita angka na niasianNa. Nunga jonok hasonangan i, ima
haluaon na binoan ni Jesus Kristus AnakNa i. Tongon do, donok do
hatuaon i di angka na manghabiari Ibana. Antong tapapos ma
rohanta, jala hibul rohanta paimaima hasasaut ni bagabaga na sian
Debata.
R : Ale Tuhan Debata, sai patinggil sipareonnami tumangihon
bagabagaMi bahen haluaonnami.
U : Sai tapanghilalahon dope biar ni roha hinorhon ni Covid-19 na so ra
marhaujungan sian portibi on. Tapanghilalahon do nang pangontak
ni covid-19 gabe humurang angka pandaramanta di parngoluonta on.
Alai pos ma rohanta di bagabaga ni Tuhanta sadari on, nunga jonok
haluaon i. Masitungkolan jala masiapulan ma hita jala tangi di hata na
nidok ni Debatanta.
R : (Mangendehon) BE No. 539 : 2 SAI HUTAGAM DO TUHANHU Bl. 371
 Lasniroha ndang hapalang do manggohi rohangki
Dung binege soaraNa di na ro Tuhanta i
Sai mardongan olopolop huriaM managam Ho
Maranata ro o Tuhan amen sai tibu ma ro
U : Tatangianghon ma peleanta: Ale Debata, Amanami na di banua
ginjang, Ho do haroroan ni saluhut silehonlehon na denggan dohot
nasa ulibasa na mauliutus. Hupasahat hami ma sian na nilehonMi tu
hami, peleannami tu Ho. Sai jalo ma i gabe uap na hushus di joloM.
Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni huriaM dohot di portibi

6
 on. Buhai ma rohanami marhitehite TondiM, asa lam hutanda hami
godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. AMEN
R : (Mangendehon) BE No. 204: 2 NDANG TADINGKONONHU HO BL. 73
 Nasa na nilehonMi, tondi ro di pamatanghu.
Hosa dohot gogongki, ro di saluhut artanghu.
Hupasahat i tu Ho, na so unsatonhu do.
U : Martangiang ma hita: Ale Amanami na di banua ginjang! Sai
pinarbadia ma GoarMu! Sai ro ma harajaonMu! Sai saut ma lomo ni
rohaM di banua tonga on songon na di banua ginjang! Lehon ma tu
hami sadari on hangoluan siapari! Sesa ma dosanami songon
panesanami di dosa ni dongan na mardosa tu hami! Unang hami
togihon tu pangunjunan! Palua ma hami sian pangago!
R : (Mangendehon):
 Ai Ho do nampuna harajaon, dohot hagogoon.
Ro di hasangapon, saleleng ni lelengna, Amen.
U : Pasupasu !
R : (Mangendehon ) Amen… Amen… Amen...