BAHAN SERMON HKBP RESORT AGAPE PANGKALAN KERINCI

JAMITA MINGGU LETARE

MINGGU 10 MARET 2024
TOPIK: LAM GANDA MA JESUS, LAM MORU MA ANGGO AHU
JOHANNES 3: 22-30
I. Pengantar

Injil Yohanes merupakan kita yang juga menceritkan banyak kisah tentang Yesus.
Yohanes ingin menunjukkan kesaksiannya tentang Yesus. Kesaksian yang diberikan oleh
Yohanes menunjukkan bahwa Yohanes mengenal dengan baik siapa itu Yesus. Sehingga
bisa dikatakan bahwa kitab Yohanes menerangkan tentang kehidupan dan pelayanan
Yesus, sehingga lebih muda untuk dimengerti. Dari pembuka kitab Yohanes ini bisa
dilihat bahwasanya, kitab ini menunjukkan identitas Yesus yang sesungguhnya. Seperti
Yesus adalah Firman yang kekal (1:1), Anak Tunggal Allah dan sumber kehidupan (Yoh.
1), Yesus yang datang menjadi manusia, hingga kepada orang-orang yang datang
kepadaNya.

II. Penjelasan Nats

Yohanes yang mempunyai murid dan banyak pengikut, bisa saja mengkalim
bahwa dirinyalah yang datang untuk diutus kedunia ini . Namun Yohanes
menyadari bahwa ada yang benar-benar datang yang diutus Allah kedunia ini,
yaitu Yesus kristus. Itu bisa dijelaskan melalui kesaksian yang diberikan Yohanes
ketika terjadi perdebatan antara murid-muridnya dengan orang Yahudi.
Perbedebatan yang ditampilkan ialah ketika mereka melihat bahwa Yesus juga
membaptis dan banyak yang pergi kepadaNya. Para murid seakan
memperdebatkan baptisan mana yang lebih baik. Muird Yohanes memiliki seakan
memiliki kekuatiran bahwa para pengikut Yesus akan menjadi lebih banyak dari
Yohanes. Namun Yohanes mengenal bahwa Yesus adalah Tuhan yang memang
diutus untuk datang kedunia. Karena dia tahu bahwa Yesus akan datang untuk
membaptis dengan Roh Kudus dan Api (Bdk. Luk 3: 16). Yohanes menyadari
bahwa dia harus merendahkan diri untuk lebih mengnall Yesus Kristus. Dalam arti
bahwa dia tidak layak berada diposisi yang sama dengan Yesus. Posisi Yohanes
datang hanya untuk mempersiapkan kedatangan Tuhan. Dalam arti bahwa dia
harus mempersiapkan diri untuk menyambut kedatangan Yesus. Karena Yesus
yang datang adalah Yesus yang maha besar. Sehinnga puncak dari kesaksian
 Yohanes dalam perikop ini ialah bahwa Yesus harus semakin besar. Artinya hanya
Yesus lah yang layak diagungkan, dan layak ditinggikan. Manusia

III. Kesimpulam

Kesaksian melalui pemberitaan Injil merupakan Tugas pokok yang harus dilakukan.
Karena salah satu Tujuan pemberitaan Injil ialah meberikan kesaksian tentang Yesus
Kristus. Kesaksian yang diberikan tentang Yesus Kristus tidak boleh terlepas dari berita
keselamatan yang Yesus sediakan bagi orang-orang percaya. Sehingga dengan kesaksian
yang diberikan maka Yesus akan semakin ditinggikan. Manusia yang memberikan
kesaksian tentang Yesus harus senantiasa merendahkan diri dihadapan Tuhan, sehingga
hanya Yesuslah yang semakin diagungkan dan ditinggikan.
 BAHAN SERMON JAMITA TU MINGGU JUDIKA TGL 17 MARET 2024
JEREMIA 31 : 35 - 37
TOPIK : HOT DO HOLONG NI ROHA NI JAHOWA
PATUJOLO
Jeremia ima anak ni malim Hilkia sian huta Anatot Benyamin. Tagan di bagasan bortian ni
inana dope ibana nunga diparbadiai jala dipillit Debata ibana gabe panurirang, na naeng
pasahathon ton ani Debata tu bangsoNa Israel. Ulaon ni si Jeremia ima mangaranapi
harajaon, laho mangurati dohot maniaphon, mangago dohotmangaloha, paulihon dohot
manuan (Jer. 1 : 10).
Jeremia bindu 31 on ima taringot asiniroha ni Debata na marpamuati di dosa naniula ni
bangso Israel, jala nunga manolsoli Debata na paloashon bangsoNa ingkon mandalani sada
proses na borat ima natarbuang tu Babel 70 taon lelengna jala nunga torop sian bangsoi
naung mate di habuangan.
HATORANGAN NI TURPUK
Ayat. 35 - 36. Debata ima naung jumadihon mataniari panondang arian, bulan bintang gabe
panondang borngin, manggunsang laut gabe marhasak. Tung sura mansohot angka i, mansadi
ma pinompar ni Israel, unang betargoar bangso di jolongku salelenglelengna.
Tung mansai bagas do lapatan ni pandohan on, ima patuduhon ha-hotan ni hatigoran ni
Hatani Debata. Molo mansadi mataniari marsinondang, molo mansadi bulan bintang ipe asa
mansadi asinirohaNa tu Israel. Baliksa saleleng marsinondang dope mataniari arian,
marsinondang bulan bintang bodarina, ima hataridaan ni asiniroha dohot pandonganionNa tu
bangsoNa nang tu saisi ni portibion. Sasada Debata do na marhuaso patupahon songoni, sada
mataniari alai boi patiurhon saluhut portibi di arianna, songoni nang bulan bintang gabe
manondangi di bornginna I, gabe boi angka na tinompaNa i bergerak, berkembang, jala mula
ulaon. Jala gabe sada tanda ma i na manongtong dope pandonganionna sahat tu sadarion. (Boi
tapatudos tu pardalanan ni bangso Israel natarsurat di 2 Musa 13 ).
Ayat. 37. Molo tung dapot suhaton langit na di ginjang, jala dapot dodoon ojahan toru ni
tano, dohot ma Ahu mambolonghon pinompar ni Israel. Ise ma na tuk laho manuhat langit
dohot mandodo na di toru ni tano ? Nian godang do angka ahli/ na bisuk na menjelajah/
meneliti jala membukukan hasil ni angka penelitianna i taringot tu lapisan ni langit nang
angka na adong di awang awang isarani penelitian ni si Anaximandros, suang songoni nang
peneliti lapisan tanah, laut ima Doktor Hoang, alai terbatas do, pola do sahat tu na mago
jolma na meneliti i, lapatanna ndang sude boi tarsigat ni habisuhon ni jolma. Jala didok molo
tarsuhat jala tardodo angka i, dohot ma Ahu mambolongkon Israel. Lapatanna ndang tarsuhat
jala ndang tardodo bidang ni holong ni Debata tu bangsoNa, dao umbalga jala dao umbidang
sian langit, tano, laut.
APLIKASI
1. Aha do na dihasiholi halak natarbuang ? alusna ima jaminan na pasti taringot haluaonna.
Pandohan tung sura mansadi mataniari bulan bintang, dohot tung sura dapot suhaton langit
dohot toru ni tano, ima patuduhon jaminan na pasti pandonganion ni Debata di bangsoNa na
tarbuang i. Dung dipasahat Debata marhite Jeremia padanna laho paluahon bangso I, diuduti
ma muse mangalehon jaminan na pasti asa boi tenang jala ndang tahuton be bangso i. Setiap
kali melihat matahari di siang hari, bulan minting di malam hari, itu menunjukkan bahwa
segala Firman dan ketetapan Allah akan tetap terjadi, jaminan perjanjian Allah memberikan
ketenangan, kelegaan dan pemulihan.
2. Ndada holan martudutudu tu haluaon ni Israel natarbuang, alai na umbidang ima gereja/
huria/ pamatangNa na marserak di liat portibion. Alani i manang aha pe na tapergumulhon,
proses dohot silang situhukonta nuaeng, unang mandele, porsea ma di Hata dohot padan ni
Debata. Unang ma tapangido asa unang ro udan habahaba, hasilsungsung dohot galumbang ,
alai pangido ma hagogoon sian Ibana asa tartolhas hamaolon i, ingot ma umbalga do
holongNa sian rimasNa, umbalga do huasoNa sian saluhutna. Marsihohot manghaporseai
Hata dohot Hatigoran ni Debata, unang ma marhaposan tu hata dohot hatigoran suhat ni
hajolmaon, ido na disosohon minggu Judika. Amen.
Biv.M.Manalu Sp v/ 110324
 BAHAN SERMON PARHALADO RESSORT AGAPE PANGKALAN
KERINCI
JAMITA MINGGU PALMARUM, 24 MARET 2024

IDA MA, NA RO MA RAJAM MANOPOT HO

(MATEUS 21 : 1-11)

PATUJOLO
Minggu Palmarum ima sada partingkian na jotjot tapangke laho mangarimangi diri di na marningot
hajojonok ni ari parningotan di hamatean ni Tuhan Jesus, hata palmarum i sandiri marlapatan maremare,
ima bulung poso ni hau palem. Di bagasan turpuk on tumangkas ma muse jumpang hita barita taringot
tusi, ima uju dibongoti Tuhan Jesus huta Jerusalem huhut hundul di atas ni halode. Mangihuthon
evanggelium Matius, nunga disangkapi Tuhan Jesus hian na ingkon laho do Ibana tu Jesrusalem manaon
na porsuk (Matius 16:21). On ma pardalanan ni Jesus na parjolo laos na parpudi tu Jerusalem
mangihuthon Evanggelium Matius. Andorang so sahat Jesus rap dohot siseanna di Jesrusalem adong do
pangaradeon di Betbage, ,mardonokkon dolok Jetun. Jesus bongot tu Jerusalem ndada na laho marpesta.
Haorona ima laho paujungkon parsuruon ni Ama i na ingkon masa songon na sinuriranghon ni angka
panurirang di padan Na Robi. Jesus rotu Jerusalem, tubagasan joro i ndada na laho marpesta manang mar
ari raya alai laho pasauthon sangkap hatuaon ni Debata. Songon dia do pangaradeon ni Jesus laho bongot
tu Jesrusalem?
HATORANGAN
Ayat 1-5 : Jesus gombaran ni Raja na lambok jala marsahala naung dibagabagahon di Padan na robi .
Panurat ni evanggelium Matius on manghatindanghon songon dia pangaradeon ni Tuhan Jesus laho
paujungkon panghobasionna tagan so tarsilang Ibana. Di Betbage di suru Ibana do 2 halak sian siseanna
laho paradehon halode si hundulanna mamongoti Jerusalem. Halode i gabe sada gombaran na
patuduhon songon dia hinalambok dohot sahala ni na manghundulisa. Andul marasing tu hoda na jotjot
di hunduli angka panglima na mangasahon gogo dohot parporangan. Laos ido na paingothon ganup halak
na manjalo baritaon di panurirangon naung di patolhas ni si Zakarias mandok , “ Marria ia ma ho ale boru
Sion, marolopolop ma ho ale boru Jesrusalem !. idama na ro ma rajam tumopot Ho, partigor Ibana jala
siparmonang; na serep do rohana jala marsihundul di halode dohot di anak ni halode inaina ”. Partigor do
Jesus i umbahen na talup Ibana mamolus harbangan ni hatigoran tu Jerusalem ( Pat Psalmen 118:19-20).
Sahala ni Jesus i di gombarhon do muse marhite hata na pinasahatna mandok: na ringkot do i di Tuhan i;
tutu do, dioloi halak na marnampuna halode i di paloas do sisean ni Jesus mamboan halode rap dohot
anakna gabe hundulan ni Jesus mamongoti Jerusalem.
Ayat 6-8: Marsitutu do angka sisean ni Jesus patupahon nanidok ni guruna tu nasida.
Laos sigop do nasida mangampehon ulos nasida tu ginjang ni halode i, jala dipahundul ma Jesus tu atasna
i. ndang adong haboratan manang sungkunsungkun nasida, tung bulus do diulahon dipungka nasida ma
tutu mangudurhon Guru nasida mamongoti Jesrusalem. Deba sian halak na torop na marnida i parsidohot
pahembangkon ulos nasida tu dalan si boluson ni Jesus. Na deba nari manallihi angka ranting ni hau jala
di peakhon tu dalan i. sudena diulahon nasida nionjar ni panghirimon dohot panandaon nasida di Jesus,
Nang pe panghirimon dohot panandaon nasida i ndang apala hombar tu na sasintongna. Dihirim nasida
do Jesus i gabe sipalua dinasida, ima paluahon halak Jahudi dohot Jerusalem sian gomgoman ni halak
Rom. Panandaon ni natorop di Jesus ima songon sahalak panurirang ( ayat 11) tudos tu panurirang Elia na
hea bangkit maralohon raja Ahab dohot Izebel (Mat 16;14). Panghirimon na sala mandasor ima muse na
mamboan na torop i gabe tarhirim. Ala sipalua na manobus saluhut na tinompa do Debata sian
gomgoman ni dosa do Jesus. Panurirang do tutu Jesus na patolhashon hata ni Debata, alai ndada holan i
laos Ibana do Tuhan i, na pasahathon hatana laho mangapuli jala paluahon bangsona dohot sude na
tinompana i sian hamagoan. Panandaon ni angka sisean dohot angka na torop di sahala ni Tuhan Jesus
ndang singkop dope, alai jotjotan parnidaan pardagingon sambing do dipangke nasida laho mananda
hadirion ni Jesus
Ayat 9-11 Sude do nasida disi marlas ni roha mangolopolophon: Hosianna! Lapatanna : Tung palua ma.
Balga situtu do panghirimon nasida, alai borhat sian panandaon na jempek. Di tagam roha ni natorop do
marhite i gabe rade ma nean Jesus laho hehe manguluhon halak Jahudi maralohon panggomgomi Rom
jala manguluhon nasida marhite hamonangan di parporangan. Gabe tarsunggul do hita dipanindangion ni
Evanggelium Johannes na manghatindanghon hea do Jesus laho pasidingkon manoro ibana jala
pabangkithon Ibana gabe raja mangihuthon ruhut ni portibion ( Joh 6:15). Ndang pangghirimon sisongoni
na sintong di Tuhan Jesus. Alai nang pe songoni, tong do marsihohot ibana di parsuruon naung jinalona i,
ima ingkon mamolus sitaononNa do Ibana di bagasan haserepon dohot haunduhon ni roha. Ala marhite
sian porsuk ni sitaonon dohot hamateanna do gabe dalan laho paluahon dohot manobus saluhut na
tinompa ni Debata sian gomgoman ni dosa dohot hamatean.
Dung diida nasida Jesus ndang songon pingkiran dohot na dihirim nasida, sumurut ma haporseaon nasida,
marsak jala mago ma nang las ni roha nasida disiala Jesus dihirim nasida gabe raja nasida, nunga di
tangkup jala dipusa angka soldadu Rom. Songoni nang angka siseanna i dibagasan haporseaon na
sumurut i, boi do i taida sian hadirion si Petrus na mansoadahon Jesus 3 hali. Memang dipardalanan na
mangihut, dung hehe Jesus sian hamatean dipapatar Jesus do sude na masa i sampe sude siseanna i
tangkas jala bagas mangantusi dia do lapatanni i sude, haporseaon ni angka siseanna sumurut i, gabe lam
togu jala lam tang di pahot Jesus.
PANUTUP
Tangkas ma panandaonta di Jesus na manaon na bernit i. Tatomu jala tajangkon ma haroro ni Jesus i ima
raja hadameon i ai nunga ro Ibana manopot hita asa dapotan pasupasu na umbalga di ngolunta. Haroro
ni Jesus manopot ngolunta i do na umbalga ndada aha na dihunduli Jesus gabe patohanna. Di bagasan las
ni roha dohot olopolop ma hita manomu jala manjangkon Jesus i. Tapabotohon ma hadameon na binoan
ni Jesus i tu saluhut jolma.
 BAHAN SERMON HKBP RESORT AGAPE PANGKALAN KERINCI
Jamita Parningotan Hamamate Ni Tuhan Jesus.
Jumat, 29 Maret 2024
Topik: Dibungka Jesus do di hita dalan na imbaru jala na mangolu
Ev: Heber 10 : 16 – 25 Ep: Psalmen 22 : 1 6
=======================================================================
I. PATUJOLO
Ganup taon do dipatupa huria pesta parningotan hamamate ni Tuhan Jesus. Marragam do rumang ni
pesta i dipatupa huria, marhite angka parhalado manang seksi di huria songon dalan anggiat lam tu
tangkasna ruas ni huria i manghilalahon paboa mansai arga do jolma i di tobus marhite sitaonon ni
Tuhan i sahat ro di na mate marhite silang i. Natinaon ni Jesus i, gabe las ni roha ma i di ganup jolma
na porsea di Tuhan i. Ido sintuhu ni pestanta sadarion, naeng tama hita mandok mauliate huhut
marlas ni roha ala saut baga-baga ni Debata hombar tu angka naung sinurirangkon ni angka
panurirang taringot tu Mesias Sipalua i (1 Musa. 49 : 10, 2 Sam. 7 : 10 – 15, Jes. 7 : 10 – 17; Jer. 9 : 1 –
6; Jes. 11 : 1 – 5, du)
Haluaon dohot hatuaon do sangkap ni Debata tu jolma i. Hatuaon dohot haluaon na naeng sijaloon
ni jolma i, ndang be merhite uhum dohot angka patik, alai marhite anakNa nasasada i, ima Tuhan
Jesus Kristus. Dibagasan holong na mamolin do Debata patupa haluaon i tu jolma dohot portibi on
(ida Joh. 3 : 16). Ro do Debata tu portibi on marhite Tuhan Jesus Kristus ima dalan patulushon
sangkap hatuaon dohot haluaon ni jolma dohot portibi on. Tulus do saluhutna sangkap ni Debata,
dibagasan haunduhon dohot hasatiaon do Jesus i patulushon sangkap ni Ama i. Mangolu jala
marsaor do Jesus i di tongatonga ni angka na ramun dohot angka pardosa saleleng di portibion
Ibana, alai tung lias do Ibana sian haramunon dohot hadosaon i. Ai on do dipatupa Debata:
Humonghop hita gabe dosa Ibana, na so tumanda dosa, asa gabe hatigoran ni Debata hita dibagasan
Ibana (2 Korint. 5 : 21)
II. HATORANGAN
Molo tapamanat sian bindu 7 ni buku Heber on, dipatupa panurat heber on do sada pamingkirion
huhut pahantushon taringot tu hadirion dohot hajongjongan ni malim di Padan na robi dohot di
Padan na imbaru. Hira sarupa do Malim di Padan na robi dohot Malim di Padan na imbaru, alai
ndang dos. Ia Malim bolon na di Padan na robi songon Melkisedek rupani, malim ni halak Lewi na di
patudos tu Anak ni Debata (Heb. 7 : 3), ima gabe parhitean (perantara), pasahat tona ni Debata tu
bangso i, dungi pasahat pangidoan manang alu – alu ni bangso i tu Debata marhite angka pelean
situtungon na di pillit sian angka dorbia (mengorbankan hewan atau ternak) singkat ni hadirion ni
jolma i hombar tu partingkianna be. Lapatanna, haluaon i hot do sian Debata ndang marhite hadirion
ni Melkisedek nang pe dipatudos Ibana dohot Anak ni Debata, ima Jesus Kristus. Ia Jesus Kristus
malim bolon di Padan na imbaru, ima parhitean ni Debata Ama i na gabe hataridaan ni holongNa, na
rade sumeahon dirina sandiri (singkat ni jolma i) na gabe pelean pardamean ni jolma nang portibi on
dohot Debata Ama i. Ala ni mudarNa na badia i, taruli ma jolma dohot portibi on di haluaon na
manongtong i.
Diboto jala ditanda Debata do sasintongna gollit ni pingkiran dohot gogo ni jolma i na mura munggil
do jala na mura tarela na so adong dapot hatongtongon. Ala ni i do, dao andorang so haroro ni Jesus
tu portibi on nunga di lumbahon Debata sangkap haluaon dohot hatuaon na naeng sipatupaonNa
humonghop portibi on, ima marhite na paimbaruhon angka parpadanan naung pinatupa ni Debata
tu bangso Israel na di Padan na robi i songon na tarsurat di Jeremia. 31 : 31 – 34, na mandok: “ Ida
ma, na ro do angka ari sogot,” ninna Jahowa, pungkaonHu ma padan na imbaru tu pinompar ni si
Israel dohot tu pinompar ni si Juda... laos pandohan on do na di ulanghon panurat heber, ima na di
Heber. 8 : 8 – 12 dohot di Heber. 10 : 16 – 18.
Ndang boi tarulahon bangso Israel angka padan naung pinasahat ni Debata tu nasida tarlumobi ma
dung di pillit Debata nasida gabe bangsoNa. Mangihuthon panurat Heber on, hira songon halinu
(bayangan – tiruan/ ndang singkop – kurang efektif) do angka pelean haluaon na tinonahon ni
Debata marhite patik i (Heber. 7 : 19; 8 : 5; 10 : 1). Alani i, ringkot ma di paimbaru parpadanan i,
marhite haroro ni Jesus. Diharoro ni Jesus i tu portibi on, tung apala mansai singkop ma dipatupa
Debata haluaon ni jolma dohot portibi on marhite hamamate ni Tuhan Jesus. Ndang be nasida
mangadop di angka pelean marhite dorbia na pinapulik sipelehonon nasida tu Debata asa dapotan
haluaon dohot hasesaan ni Dosa, alai nunga di pasingkop Debata be saluhutna marhite na tarsilang
Tuhan Jesus i (Heber. 10 : 17 – 18).
Alani i, diarahon ma hita nuaeng “bongot tu bagasan na badiai ”. Di arahon panurat Heber on ma
angka na porsea i mamongoti inganan naung pinapulik, ima bagasan na badia i. Saluhut na porsea i,
boi bongot tu bagasan na badia i, inganan naung tinontuhon ni Debata di bagasan harajaonNa i, ai
nunga di ungkap Debata dalan bongot tusi ima marhite sitaonon dohot hamamate ni Tuhan Jesus i.
Ibana do malim bolon, na marhuaso di habangsa harajaon habadiaon i. Lapatanna, holan Tuhan
Jesus do na gabe parpintoranta, na tuk mamintori jolma pardosa i. Marhite mudarNa nabadiai ma
mamuri angka jolma na dibagasan dosa i gabe taruli di habadiaon dohot haluaon (Rom. 3 : 26; 5 : 1;
1 Korint. 6 : 11). Jesus Kristus do malim bolon na boi mandok: “Bongot ma hamu tu habangsa
harajaonHu!”. Ndang adong na boi bongot tusi so ingkon marhite Ibana. Hombar hata ni Tuhan Jesus
na mandok: “Ahu do dalan i dohot hasintongan dohot hangoluan. Ndang adong na sahat tu Ama i, ia
so marhite sian Ahu” (Joh. 14 : 6).
Tangkas jala tung nalanal do panghophopon ni Tuhan Jesus i di portibi on, parhitean ni Debata
mangungkap dalan tu haluaon dohot hangoluan na manongtong i. Ala ni i, di angka na porsea i
naeng tangkas patuduhon haporseaonna paboa na rade manjalo haluaon na pinatupa ni Jesus i
marhite gulmit ni ngoluna siganup ari, alani i:
1. Dipajonok ma dirina tu Debata di bagasan roha na marhabadiaon na sintong, ai ndang
dihalomohon Debata roha manang pangalaho na marsipaula (sipalensem – 1 Joh. 3 : 18 - 21), alai
ganup jolma nanaeng bongot tu bagasan habadiaon i, ingkon marhite ngolu na marhaporseaon na
togu di Jesus na gabe Malim bolon na marhuaso di portibi on nang di banua ginjang. Ndang mura be
di palindaklindak angka na masa di portibi on, ala naung Jesus di haposi na tuk patupa haluaon na
manongtong i.
2. Ingkon togu marhaporseaon. Ragam do angka na masa na boi mangela roha ni jolma i di
ngoluna siganup ari laho maninggalhon Tuhan i manang mambahen dua dasor ni haporseaonna. Ido
umbahen na tangkas di paingot asa ingkon dibagasan hagogok ni haporseaon (keyakinan iman yang
teguh), ndang mura munggil, ndang mura tarela, ai angka na marbalik sian haporseaon di Tuhan i,
tung so tarpaimbaru do nasida asa muba muse, ai naung mangulahi pasilanghon Anak ni Debata do
nasida di dirina, jala dipaurak (Heb.6 : 4 – 6). Asa angka naung manghaporseai Kristus i gabe sipalua
di ngoluna hatindanghononna ma: “Ia mangolu pe ahu nuaeng dibagasan daging, mangolu
marhitehite haporseaon di Anak ni Debata na manghaholongi ahu jala na mangalehon diriNa
humonghop ahu” (Gal. 2 : 20).
3. Ingkon ungkap rohana marsaor dohot saluhut halak. Asa boi denggan marsaor dohot saluhut
halak, ingkon rade manadingkon bangko na hurang tama diadopan ni Debata, ima: na sai
manghilalahon hadirionna dumenggan sian halak (paburnang diri – 1 Kor. 13 : 4), manuanhon hosom
(dendam – 3 Musa. 19 : 17) tu angka na humaliang. Ai angka na sai manuanhon dumenggan ngoluna
sian na asing boi do i mangorui di angka parsaoran na denggan. Alai naung tangkas manjalo basa-
basa na sian Debata ala asi ni rohaNa na gabe manghorhon haluaon tu hangoluan na manongtong i,
rade ma pauliulihon parsaoranna dohot na humaliang, marhite roha na ungkap masiantoan,
masipajujuan tu haholongon dohot tu angka ulaon na denggan (ay. 24). Ndang jolma na mamunjung
jolma i di tompa Debata, alai jolma na marparsaoran do (makhluk sosial). Ingkon dibagasan
parsaoran do dohot dongan jala marhite i ma hilalaon ni halak naung mangolu dibagasan
hasintongan, haporseaon dohot habadiaon hita angka naung hinonghop ni Debata dibagasan Jesus
Kristus.
III. PANIMPULI
Marroha mauliate ma saluhut jolma naung manjalo panghophopon ni Tuhan i. Dibagasan holongNa
na mamolin i do Debata manghaholongi jolma pardosa i, gabe ungkap ma dalan di angka jolma
pardosa tu hangoluan na manongtong i, dung jolo di urasi marhite mudarNa na badia i.

Mansai arga do jolma i di tobus Debata. Songon nidok ni Ap. Paulus di 2 Korint. 5 : 21 na mandok: Ai
on do dipatupa Debata: Humonghop hita gabe dosa Ibana, na so tumanda dosa, asa gabe hatigoran
ni Debata hita dibagasan Ibana. Rade do Tuhanta i mangarumari diriNa jala manolukhon rupa ni
hatoban, gabe suman tu jolma do Ibana jala rumang jolma dapot di Ibana. Dipatutoru do diriNa;
gabe pangoloi do Ibana paima mate, pola tung mate tarsilang (Pil. 2 : 7 – 8). Marhite panghophopon
ni Tuhanta dibagasan holongNa na mamolin i, ima patauhon hita mamongoti habangsa habadiaonNa
i, naung pinaradeNa di angka na porsea i.
Marhite minggu parningotan hamamate ni Tuhanta Tuhan Jesus sadarion, di sungguli do hita
marningot sitaonon ni Tuhanta i di bagasan holongNa na mamolin i parhitean ni jolma manjalo ngolu
na manongtong ima di habangsa habadiaonNa i. Dibungka Jesus do di hita dalan na imbaru jala na
mangolu, ala ni i, rap ma hita pauliulihon parsaoran di bagasan holong na polin, manongtong ma hita
manghangoluhon roha na marpanghirimon na togu jala badia so hasurahan, ai ido na hinalomohon
ni Debata (Epesus. 1 : 4; Pilippi. 2 : 15; 1 Tessalonik. 5 : 23).
Pdt. DPS
 BAHAN SERMON HKBP RESORT AGAPE PANGKALAN KERINCI
PESTA PARJOLO HAHEHEON NI TUHAN JESUS MINGGU, 31 MARET 2024
Ev : Jesaya 25:6-9
TOPIK: MARLAS NI ROHA MIDA HATUAONNA I
=============================================
Patujolo
Lao mangantusi turpuk on, ingkon jahaonta do mamungka sian ayat sada di bindu on.
Mamungka sian ayat 1 tung tangkas do tarida tung mansai tangkas do panandaon dohot
parsaoran ni si Jesaya maradophon Debat,a ai di parhatopot ibana do pambahenan ni Debata
di ngoluna na gok halongangan nang di ngolu ni bangsoNa. Ido na mangonjar rohana
patimbulhon Jahowa jala mamuji pambahenanNa. Nang hita pe di pardalanan ni ngolunta
nang taadopi pe sipata na maol jala na dokdok, tung taparhatopot do pandonganion ni Tuhan i
na jotjot lobi sian na tapingkiri. Ido mambahen boi hita margogo jala dibagasan las ni roha
mandalani ngolu on ala porsea hita ndang angka na dokdok i ujung ni saluhutna.
Hatorangan
Di na tartaban bangso Juda tu Assur, gabe mangido pangurupion tu Mesir do bangso i. Di
situasi na songon i dipaingot si Jesaya do nasida asa unang tu harajaon Mesir nasida
mangalualu jala marpangunsandean alai ingkon tu Debata ma. Nian ala ni dosa ni Juda do
umbahen dipangke Debata harajaon Assur manguhum bangso Juda alai Assur pe uhumon ni
Debata do ala ni ginjang ni rohana, songon i nang Mesir. Jala ndang holan harajaon Assur
dohot Mesir sude harajaon na humaliang Israel dohot Juda ingkon lengsehononna.
Di na masa hahansiton na songon i, disuru Debata do si Jesaya mangapuli nasida paboa
paluaon ni Debata do nasida sian parungkilon na borat i. Ai nang pe dipaloas Debata nasida
tartaban/tarbuang hot do ianggo holong ni roha ni Debata di nasida. Asa gabe parsiajaran do
i di nasida asa tu dengganna pangalaho nang pambahenan nasida tu joloan ni ari.
Ndada na mangago sangkap ni Debata, na manogunogu do asa porsea nasida tu Debata.
Diajar, dilincing nasida marhite habuangan i asa lam matoras nasida di pangoloion
maradophon Debata. Ala ni i ma dibagabagahon Debata do pasahatonNa las ni roha di nasida,
masa di nasida haroan bolon, haroan na talmis, haroan sian tuak anggur na galia na pita jala
pasisionNa ma hirehire (ayat 6-8). Jala ndang holan sipanganon diparade, disarihon do nang
na mambahen sonang partondion ni bangsoNa.
Sudena i patuduhon holong ni roha ni Debata tu bangso i nang tu hita, nang pe ingkon
mandalani na maol alai diparade Debata do las ni roha. Umbalga do holong ni roha ni Debata
sian rimasNa.
Olopolop dohot las ni roha , ima panghorhon ni pambahenan ala holong ni Debata,
marsingkat angka na hansit gabe las ni roha (ayat 8). Na so tarpatupa hita sian pingkiran
dohot gogo nang pambahenanta di patupa Tuhan i do.
Panghorhon ni pambahenan ni Debata songon naung tangkas taida di ayat 6-8 i . “ Jadi
dohonnon ni halak ma di ari na sasada i: ida ma on do Debatanta, na tahaposi, na mangurupi
hita, dison do Jahowa na itahaposi. Marolopolop ma hita jala marlas ni roha mida hatuaonNa
i” (Ayat 9). Dung didai bangso i haluaon na pinatupa ni Debata, dipatubegehon nasida ma
olopolop dohot las ni roha. Angkup ni i dihatindanghon nasida ma Jahowa do parhuaso, Ibana
do sisombaon. Ndang pola marhite hagogoon ni sinjata, manang marhite porang nasida
paluaonNa sian tangan ni Assur. Tung marhuaso do Debata paluahon nasida marhite hataNa
sambing.

Sipahusorhusoron:
Topet di Minggu Paskah, Minggu parningotan haheheon ni Tuhan Jesus do jamita on.
Haheheon ni Tuhan Jesus manungguli hita mamuji dohot manghatindanghon huaso ni Tuhan
i di atas ni saluhutna. Dihamonanghon do huaso ni dosa, sibolis dohot banua toru.
HaheheonNa i, ima patuduhon huasoNa na tuk manaluhon hamatean dohot banua toru.
Dung tartangkup Jesus mabiar angka sisean i, alai dung dipapatar Jesus hadirionNa naung
hehe sian hamatean i gabe disungguli i do nasida manghatindanghon Jesus naung monang i.
Haheheon ni Tuhan Jesus mangambolongkon roha biar sian angka sisean i.
Tontu panindangion na songon i do dipangido sian hita, tahatindanghon ma Jesus naung
hehe, naung monang i so pola hita mabiar. Jala tahatindanghon ma Jesus naung hehe i
marhite na mamparangehon lomo ni rohaNa nang marhite na gabe pasupasu hita di
parngoluonta siganup ari.
Tapapatar ma las ni rohanta di haheheonNa na balga i marhite na so olo be hita diparhatoban
sibolis dohot dosa.
Biv. RS