Pdt.

Walter Aritonang
SERMON PARHALADO HKBP RESORT MEDAN MILLENIUM
Ev. Pangungkapon 15 : 1-4
Nasa Na Marhosa Mamuji Debata
KANTATE
I. Patujolo
Tarbuang do si Johannes anak ni Zebedeus tu pulau Patmos Alani haporseaonna tu Jesus. Laos sian i do
ditongos ibana buku on tu angka ruas na tongtong marsihohot haporseaonna tu Jesus. Tu ise do parjolo sahali
dipasahat surat ni pangungkapon on? Tu pitu huria na adong di Asia na metmet na ginoaran nuaeng gabe
Negara Turki.1 Tartunggu do nasida di haroro ni Jesus paduahalihon hatiha i, ala dokdok ni sitaonon na binahen
ni panggomgomi dohot Kesar tu angka na porsea di Jesus. Tole nasida houm na minoritas gabe lam
marlomolomo angka uluan ni Romawi tu nasida pola godang na mate martir (Pang. 6:9-10). 2 Aha do na
mambahen di pusa angka na porsea i? Ala dang olo nasida mangongkuhon jala manomba Kesar gabe Debata.
Ai sanga do dipamasa disi slogan na mandok “Caesar is Lord” manang di hata Batak didok “Debata do Kesar”3
Sahat ma barita i tu si Johannes taringot tu na masa i. I do na mangonjar rohana manurathon buku on laho
pasahatonna hombar tu parnidaan (Penglihatan) na songgop tu ibana laho mangapuli saluhut ruas na tarhirim
jala bobonosan ala ndang gira ro ari ni Tuhan Jesus paduahalihon laho mamonanghon nasida saluhutna.
Mansai porsuk do panaonon nasida binahen ni panindosan pamarenta Romawi, na niuluhon ni Kesar na
margoar Domitianus tingki i. Ndang holan i tahe, alai laos dohot do tinuju ni buku on laho maminsang angka
ruas ni huria na lemba jala lipe dohot na olo pasaorhon dirina tu roha ni portibion, manimbil sian
haporseaonna.4 Hirim do roha ni si Johannes asa martahan angka ruas i jala marpanghirimon, ai angka na
songon i do na monang jala boi mangendehon Ende naimbaru. Na satia ro di salelenglelengna dihamonanghon
Debata, marlas ni roha dibagasan Ende pamujion nasida tu Debata ala balga ni holongNa. Tolhas do surat on tu
hita nuaeng na tongtong manghirim asa nang hita pe songon angka na porsea hatiha i ma nian, nang ro pe
sitaonon asa martahan ro di ujungna, ai pamonangon ni Debata do angka jolma na marsihohot di goarNa.
II. Manguhal Turpuk
Ndang boi malua gombaran ni turpuk on sian gombaran ni bangso Israel na malua dibahen Debata sian
tano Misir. Tudos tusi do digombarhon si Johannes panurat ni buku on hamonangan i, i ma ditingki na masa
tula tu halak Misir ala parulan ni raja Parao. Pitu surusuruan manggombarhon hasisingkop ni huaso ni Debata
na mangalehon hamonangan.5 Ala dibagasan tradisi ni halak Yahudi pitu i ma gombaran ni na singkop. Molo
digombarhon pe pitu marujung rimas ni Debata, naeng manggombarhon songon i do sogot singkop ni uhum ni
Debata tu angka na so manghabiari Ibana di tano on (Ayat1). 6 Jala halak na manjalo uhum i digombarhon
songon sorminan na marsaor tu api. Sian dia do ojahanna? I ma manggombarhon beha uhum ni Debata tu raja
Parao dohot angka soldaduna na di uhum di bagasan laut na rara gabe mate. Songon i ma angka parjahat i
sogot na so olo unduk tu Debata gabe di bongot tu paruhuman marsaor tu api, gariada umborat uhum i sian
uhum ni bangso Misir di laut na rara ala marsaor tu api do sogot uhum i. Jongjong ma sogot di topi ni api i
angka na porsea i na maralohon binatang songon na ginombarhon di hasomalan ni halak Rom. Lapatanna, talu

1
Agus Santoso, Tujuh Gereja di Kitab Wahyu, (Tangerang: Yayasan Scriptura Indonesia, 2018), Hlm. 81
2
Crosby Howard, The Seven Chruces of Asia, (New York: Funk And Wagnalls Company, 1980), Hlm. 168
3
John R.W. Stott, Basic Introduction to The New Testament, (Grand Rapids : Eerdmans, 1985), Hlm. 145
4
Donald Guthrie, The Relevance of John’s Apocalypse, (Grand Rapids : Eerdmans, 1987), Hlm. 33
5
J.J. De Herr, Tafsiran Alkitab Wahyu Yohanes, (Jakarta : BPK. Gunung Mulia, 2008), Hlm. 223
6
David H. van Daalen, Pedoman ke Dala Kitab Wahyu Yohanes, (Jakarta: BPK. Gunung Mulia, 2004), Hlm. 180
1
 Pdt. Walter Aritonang
do angka na porsea i di roha ni portibion, alai hamonangan do dung di adopan ni Debata (Ayat 3). Para martir
mati dengan cara yang biadab, tetapi kemudian mereka tampil sebagai pemenang pada hari penghakiman oleh
karena kematiannya di dalam iman kepada Kristus. Ala ni i gabe panindangion ma di hita Pilippi 1 : 21 na
mandok Kristus do hangoluan di ahu laba nang hamatean. Na mate dibagasan kristus ndang dietong harugian
hamatean i, gariada laba do ala ni haporseaonna.7
Di endehon si Musa do ende tu Debata hinorhon ni haluaon na pinasahat ni Debata tu bangso Israel. Sai
ganup tingki do diendehon nasida ende i ala ni las ni rohana (2 Musa 15:1-9). Ise do na mangendehon songon
Ende ni si Musa naung bolas gabe parhitean ni Debata paluahon bangso Israel? I ma angka naung monang
saonari dohot sogot, mangendehon Ende naimbaru nasida ala hamonangan, parbue na pinalua ni Debata.
Marpesta ma dibagasan Tondi na marlas ni roha angka na monang i ala malua sian paruhuman (Eksodus-
Paskah-Pesakh).8 Disoarahon muse balga situtu halongangan na binahen ni Debata (Ayat 3). Jala ndang holan i,
alai disoarahon do ende Birubiru ni Debata. Dia ma lapatanna? Ibana do na paluahon na porseai, i ma Kristus
Jesus na sumeahon hosanna paluahon angka pardosa i, aha ma endena? I ma na boi taida di ayat 4 na mandok
sasada Ho do na badia, na ro ma saluhut bangso marsomba tu joloM (Kristus Jesus), ai nunga patar
panguhumMu na tigor i (Psalm. 86:9). 9
III. Pangarimpuni
a. Unang ganggu rohanta manghaporseai Kristus Jesus, sisogo do di roha ni portibion angka na porsea alai
halomoan ni Debata do angka na marsihohot di goarNa.
b. Masa angka penyerangan ni gareja, terror tu angka halak Kristen. So tung mabiar hita mangadopi, nunga
parjolo Kristus manaon i dohot angka halak na porsea na parjolo, alai dilehon jaminan paluaonNa do sogot di
ari paruhuman i.
c. Sai diendehon halak Jahudi do endehon ganup ari di borngin na i di tingki laho modom marningot haluaon na
sian Debata, jala dohot do di sinagoge ganup sabbat diendehon rap dohot angka dongan sapunguan i. naeng
songon i nian hita angka na porsea i pasomal diri martangiang dohot mangendehon ende pujian, ndang holan
di jabu dohot di gareja. Nda tama do hita mangendehon ende las ni roha? Ai nunga dipalua hita sian
parhatobanan ni dosa i, laos paluaonNa muse hita sogot di ari paruhuman i. Buku ende nomor 11 mandok “Ala
ni i hupuji Ho tung marribu hali do”. Boasa marribu hali? Ala ndang tarbilangan las ni roha i.
d. Ise do na boi mangendehon Ende las ni roha i? Angka naung monang, ndang tagamon las roha ni halak na talu
lumobi tu paruhuman. Antong ise ma na monang i? Na satia marhaporseaon di Jesus. Nasida ma na
markantate.
e. Bagi saya Buku Ende Nomor 251 : 1-8 “Na Monang I Do” sangat kuat menjadi landasan teologi untuk
menggambarkan jiwa orang yang menang dan dibangkitkan bersama Kristus (Pdt. Walter Aritonang).

7
Dianne Bergant, Tafsiran Alkitab Perjanjian Baru, (Yogyakarta: Kanisius, 2002), Hlm. 505
8
David H. van Daalen, Pedoman ke Dala Kitab Wahyu Yohanes, (Jakarta: BPK. Gunung Mulia, 2004), Hlm. 181
9
William Barclay, Wahyu Kepada Yohanes Pasal 6-22, (Jakarta : BPK. Gunung Mulia, 2007), Hlm. 177-180
2