Bahan Sermon Ressort HKBP Pasar Melintang, Minggu, 08 Oktober 2023, MINGGU XVIIII DUNG TRINITATIS

Epistel : Lukas 11:37-42

Topik: Dihalomohon Jahowa do Uhum dohot Hatigoran
I.Patujolo
Sada hasomalon na binahen ni jolma bertujuan asa lam tu denggan na parniulaan ni jolma i. Budaya na
pinatupa ni halak Jahudi “mamburi” sada gombaran na patuduhon budaya dan agama boi do rap mardalan. Budaya na
pinatupa ni jolma mangurupi asa unang mangulahon angka na jat. Isarana di halak Batak, didok do “pantang” molo
mandok angka hata na rurang, di pakke do hata “sattabi” di tinggki manghatai di jolo ni angka na torop na patuduhon
rasa hormat. Godang do jolma na so mangantusi budaya sada ulaon na hinalommon ni Debata, alani ido umbahen
nueng on godang angka ugamo na luli, didok doi panombombaan tu debata sileaban. Songoni ma nang di buku Lukas
dipataridahon do sada budaya manang na kebiasaan jala marhite i do pola muruk Jesus ala dirippu do roha ni nasida
nungga mardosa Jesus ala naung mangose patik ni nasida.
II.Hatorangan ni Turpuk
1. Ingkon uli luar nang di bagasan, ingkon uli dipanghataion nang dipangalaho
Di Judea dijou angka halak Farisi do Jesus laho mangan. Adong do sada kebiasaan manang ulaon na somal,
ikkon jolo marburi asa marsipanganon. Di adat ni halak Jahudi, marburi sada uhum naung tarsurat sian oppu ni
nasida. Alai uhum i ndada haiason nang tu hahipason. Dibahen nasida do marburii gabe sada ulaon na bersifat ritual
manang formalitas. Ditingki i Jesus dang diula na marburi i, jala on ma sada perhitean laho mencobai sekaligus
menyerang Ibana ima marhite halak Parisi dohot angka Siboto Surat. Sasintonga na dang na lomo roha ni nasida
marnida Jesus, alai di jou nasida do Ibana laho mangan di borngin i. Dilalui nasida do hahurangan manang cela ni
Jesus asa adong dalan ni nasida laho manjehehon Jesus. Sasitongana ulaon i (marburi) ndada na maralo tu patik ni
Debata, alai ndada ingkon siulahonon atau tidak wajib dilakukukan.
Diroha ni halak Parise ulaon agama ima mangulahon uhum nang angka ritual. Barclay manggombarhon aek na
pinakke ni halak Jahudi laho mamburi biasana disimpan asa unang hodar. Ditingki marburi di usehon ma aek sian
tangan atas sahat tu jari-jari, dung i digosok jala di paisa. Ia roha ni angka si boto surat i digohi angka ulaon na jat,
digosa nasida do angka na gale jala na so mardihadiha. Ringgas do nasida marburi tangan, marburi angka pinggan ni
nasida dung simpul mangan, alai dang adong roha laho paishon angka na jat sian roha ni nasida (37-41). Ia halak
Jahudi idaon do nasida badia dipanghataion nasida alai pangansi jala dang ture pangalaho ni nasida.
2. Mangulahon holong ni roha songon tanda na porsea di Tuhan Jesus
Ditingki mangetong pelean angka siboto surat nang halak Parise i sian angka na torop i, tung manasai manat.
Di etong nasida do sude arta pola do di etong piga kambona suan-suanana, mamoro arta ni dongan. Didok do nasida
angka si boto surat, alai dang di ulahon holong, asi ni roha nang hatigoran. Umbahen i do tung muruk situtu do Jesus,
di pinsang do angka halak Parise i, pola do didok “marjea ma hamu Parise”. Marhite hata ni Jesus na mandok marjea
ndada na patuduhon sogo ni rohaNa Ibana, alai paingothon do nasida ala sian ias roha jala unang marpangansi. Pelean
na didok ni turpukkon ndada na mandok salah pelean nasida, alai dilehon ma i marhite ias ni roha, unang pola di
paksa. Ia pelean na mangolu ima pangalaho na tontong sadalan dohot dalan ni Debata.
III. Panimpuli
Dihalomoon Debata do hasintongan, ai ikkon hasintongan sian roha nang parange. Godang do masa di ngolu
ni halak Kristen nuaeng on berengon badia marhite na ringgas ro tu parmingguan nang di angka panghataian, sai hira
na jonok hian dohot Debata, alai dang sadalan pangalaho na dohot na hinalomohon ni Debata, hape di ula do dosa.
Didok ibana halak Kristen alai diparhatoban, digosa jala dilonjan do donganna, ibuat do arta naso artana. Jala
dinueng do godang do angka pemimpin gereja songon angka naung pinilit ni Debata alai dang diulahon hata ni
Debata. Godang do angka sintua nang pandita naso mangulahon ulaon na pinasahat ni Debata tu nasida. Attong
tapelehon ma dirita gabe pelean na mangalu tu Debata na tontong basa dibagasan ngoluta. Amen
 Bahan Sermon Ressort HKBP Pasar Melintang, Minggu, 08 Oktober 2023, MINGGU XVIII DUNG TRINITATIS
Evangelium: Jesaya 5 : 1-7
Topik: Dihalomohon Jahowa do Uhum dohot Hatigoran
I.Patujolo
Na mangula do Panurirang Jesaya di Juda dohot Jerusalem, uji ngolu ni si Usia, Jotam, Ahas, Hiskia, angka
raja ni Juda (740 – 701 Andorang so Kristus/Sebelum Masehi). Na manurirangi do si Jesaya tu bangso ni Debata,
pinagodanggodang ni Debata (Jes. 1:2), na gabe marbalik sian Debata. Mansai roa do pangalaho ni bangso i di adopan
ni Debata. Manjahati (Jes. 1:16, mangulahon pangarupaon, papeol uhum tu na sopot so marama, ndang olo
mangondingi angka na mabalu (Jes. 1:17), angka sintua gabe panggunturi dohot gabe dongan ni angka panangko.
Saluhut nasida mangapian di sisip, jala dilului angka silehonlehon (Jes. 1:23), dapot tabantaban sian na dangol di
bagasan angka jabunasida (Jes. 3:14-15). Tabantaban sian na dangol naeng bahenonna pamonangkon parporangan,
asa mendapat kenyamanan politik, paundukhon bangso-bangso na gabe musu.
Gok roha utiutian sian habinsaran do nasida, jala angka parsibalik mata, songon halak Palistim, jala satahi tu
anak ni na pulik marga. Gok perak dohot sere tanonasida i, jala ndang tarlilit artanasida i, jala gok angka hoda
tanonasida, pola ndang habilangan angka huretanasida. Gok angka ajiajian tanonasida, marsombado nasida tu
jadijadian ni tanganna, tu na pinauli ni jarijarina (Jes 2:6-9). Marnida pangalaho angka parjahat i, digurithon
panurirang i ma ende taringot tu bangsona, hasianna i na marporlak anggur di punsu ni sada dolok na napu/subur (Jes.
5:1), denggan do diurus porlaki, dipature angka pangula ni porlak do tano nang parbuena. Tung manghirim do di
parbue na tonggi, hape na asom do diparbuehon, gabe tarhirim ma ibana (menghasilkan kekecewaan).
II. Hatorangan ni Turpuk
1. Punsu ni dolok na napu (ayat 1)
Tubu do sada sungkunsungkun marhite ayat on, adong do punsu ni dolok na napu? Ai somalna di rura/toruan do
habaoran ni aek, laos ido mamboan angka unsur hara gabe mambahen napu tano na adong di toru ni sada dolok.
Alai marhuaso do Debata manarihon dolok i, dibahen do napu marhite na parohon aek marhite ombun nang udan.
Jala somalna, lam ummetmet do tano di punsu ni dolok sian na di toruan/kaki gunung. On ma gombaran na
patuduhon, na dipillit Debata do bangso Israel; bangso na metmet gabe bangso na sangap (berada di puncak), laos
sian bangso i do haroroan jala hataridaan ni huaso nang hasangapon ni Debata.
2. Debata mangarade saluhut (ayat 2)
Songon pangula di hauma, dung jumpangna tano na napu; pungkaonna ma paulihon tano i, dipangkuri, dijomputi
angka batu sian tano i, laos disuanhon lopok (bibit) na denggan tusi
3. Parbue na asom (ayat 3-4)
Kecenderungan pingkiran ni jolma sai holan mangula na jat di adopan ni Debata. Nungnga godang dibahen
Debata pangurupionNa, panarihononNa, laho marmudumudu jolma i, alai tumagon do di roha ni jolma i mangolu
di bagasan hajahatonna. Ndang adong be na so pinarade ni Debata, ala ni umbahen didok “Tung aha dope
sibahenon nian tu porlak anggurhu na so Hubahen tusi, boasa sai hupaimaima parbuena, parbue na tonggi hape na
asom do diparbuehon”. Partingkian na arga jala na denggan i ndang diparar dohot denggan.
4. Uhum sipatupaon ni Jahowa tu hasudungan ni rohaNa na tangkang i (ayat 5-7)
a. On pe pabotohononHu ma tu hamu sibahenonku tu porlak anggurhu, umpatonhu ma handangna, ndang adong
be hasonangan. Bangso na asing sai ro laho manurbu bangso i. Asa suda digagat binatang, lohaonku ma
parikna asa diluntak.
b. Bahenonku ma ibana gabe halongonan, asa unang dirantingi manang dipangkuri. Asa tubuan suga dohot
sihupi. Jala dohononku angka ombun asa unang mangalehon udan tu ibana
III.Panimpuli
Alai porlak anggur ni Jahowa Zebaot ima pinompar ni Israel dohot angka baoa sian Juda, suansuanan
hasudunganNa. Songon i do hita angka Ruas ni Tuhanta, naung tinobusNa marhite mudar ni Kristus. Nungnga tajalo
asi ni roha ni Debata, marhite ragam ni angka na denggan. Molo naung tajalo angka na denggan, sai taparbuehon ma
na denggan, gabe pasupasu ma hita ala nungnga pasupasu sian Debata. Amen.