PATANAKHON HATA NI DEBATA

VI DUNG TRINITATIS

16 JULI 2023

1. Marende Huria BE. No. 10:1-2 "Hupuji, hugulungap Ho"

2. Tangiang Pamuhai

3. Manjaha Turpuk: Lukas 10: 17-20

4. Hatorangan

NGOLU NA MARLAS NI ROHA

Patujolo

Songon halak Batak, tontu mansai las do rohanta molo jumpang hita hamoraon, hagabeon, dohot
hasangapan. Gariada tapangke do sude parbinotoanta ada jumpang na tolu i. Alai tung pe nunga
jumpangta nam tolu i, sai tong do hurang singkop pangkilalaanta. Boasa songon i? Alai hamoraon,
hagabeon, dohot hasangapon ndang gabe i jaminan las ni rohanta. Sipata olsoan do deba angka na
mora ala mabiar agoan arta; na mardakdanak mabiar ndang tarajaran dakdanakna; jala na
marsangap mabiar agoan sangap. Alanii didia do jumpangta las ni roha i? Las ni roha na tutu ndang
jumpang di gogonta sandiri, alai dibagasan Debata do jumpangta i.

Turpuk Lukas 10:17-20 paingothon hita, ia las ni roha ni angka na porsea ndang marojahan tu huaso
na adong di ibana, alai marojahan tu goarna naung tarsurat di banua ginjang. Ndang ala marhuaso
nasida patupahon halongangan dohot manaluhon musu manang sumbia ni sibolis, alai ala naung
targoar do nasida di banua ginjang. Antong tasigati ma jolo turpuk on, asa boi jumpangta las ni roha
na sintong di angka na porsea.

Hatorangan

Dung diajari Jesus angka na torop i, dipillit ma pitupulu halak siseanNa, asing ni na sampulu dua
halak i laho suruonNa duadua gabe patujoloNa tu angka huta dohot inganan laho mamboan Barita
Na Uli taringot tu harajaon ni Debata. Ndang apala dipatorang boasa ingkon pitupulu sisean na
pinillit ni Jesus Kristus. Alai hombar tu pande bisuk ni Padan Na Imbaru, Matthew Henry (lihat Alkitab
Sabda Online, tafsiran/catatan, rentang ayat Luk. 10:1-16) pamilliton ni sisean na pitupulu i
marhadomuan tu pitupulu halak sintua na pinillit ni si Musa di adopan ni Debata. Disuru Debata do si
Musa mamillit pitupulu sintua, asa adong mangurupi ibana mangusung boban panghobasion
manguluhon bangsa Israel tu Tano Kanaan (4 Musa 11: 16-17 & 24 25). Suang songon i do dipillit
Jesus pitupulu halak sisean sisuruonNa manjoloani Ibana tu ganup luat dohot inganan. Dilehon Jesus
huaso tu nasida laho mamangke goarNa patupahon halongangan, pamalumhon na marasahit,
pabalihon angka sibolis, tondi na hodar, dohot angka parjahat. Dipasahat Jesus tu nasida huaso i asa
margogo do nasida marBarita Na Uli; ndang na laho patuduhon huaso manang hajagoon ni nasida tu
na torop. Lapatanna, di bagasan huaso i adong ulaon manang tanggung jawab ni nasida, i ma
marBarita Na Uli. Asa ndada sihaginjanghonon ni sisean na pitupulu i huaso na pinasahat Debata tu
nasida. Baliksa, laho pasauthon parsuruon dohot lomo ni roha ni Debata umbahen na dipasahat
huaso tu angka siseanNa.
Dung mulak sisean na pitupulu i sian parsuruon ni Jesus, las do roha nasida mandapothon Jesus.
Dipabotohon nasida do tu Jesus halongangan bolon na pinatupa ni nasida marhite na mangasahon
goar ni Jesus. Mansai las do roha ni nasida paboahan, na margogo jala marhuaso sistutu do goar ni
Jesus maradophon angka musu dohot sumbia ni sibolis. Marhite goar ni Jesus tarpatupa nasida do
angka halongangan jala talu angka musu na mangambati nasida marBarita Na Uli. Adong las ni roha
na punjung (kebanggaan tersendiri) di angka sisean i, ala guru doknasida angka tondi. Ndang diorai
Jesus nasida di bagasan las ni roha i. Alai diajari jala dipaimbaru Jesus do pingkiran ni nasida laho
manguntusi las ni roha na sasintongna. Molo tung pe marlas ni roha sisean na pitupulu i, ndang ala
guru doknasida angka tondi i, alai ala naung tarsurat do goar ni nasida di banua ginjang. Di bahen i,
las ni roha na sasintongna ndang mansohot di bagasan huaso manang hagogoon na nilehon ni
Debata tu angka na porsea, alai dipanjangkonon ni Debata do tu nasida gabe parjambar dibanua
ginjang. Lapatanna, las ni roha na tutu (na sasintongna) ndang marojahan tu huaso manang
hagogoon, alai marojahan tu asi ni roha ni Debata na mambahen nasida gabe parjambar di banua
ginjang.

Marhite turpuk on boi idaonta dua ojahan ni las ni roha. Parjolo, ojahan las ni roha hombar tu
pangantusion ni sisean na pitupulu i, ima huaso na ni lehon ni Jesus tu nasida. Las ni roha na
marojahan tu huaso manang tu hagogon boi do mambahen jolma i gabe marginjang ni roha
maradophon angka na so marhuaso. Boi do jumpang parange na menguasai manang mangasangi
angka na so adong huasona. Dibahen i las ni roha ala ni huaso ndang las ni roha na manongtong. Las
ni roha na songon i, las ni roha na semu do i. Dung salpu huaso i gabe ndang be marlas ni roha ibana.
Marhusor do huaso i, alani ndang boi bahenon gabe jaminan las ni roha na sasintongna di angka na
porsea. Ndang huaso i na manontuhon angka na porsea gabe parjambar di banua ginjang, alai asi ni
roha ni Debata naung jinalona do.

Paduahon, ojahan las ni roha hombar tu pangantusion ni Jesus, ima asi ni roha ni Debata. Di bagasan
asi ni roha ni do Debata manurat goar ni angka porsea di banua ginjang. Angka naung tarsurat i, laos
i do dipillit Debata laho mangulahon parsuruonna mambaritahon Barita Na Uli. Nunga taruli nasida
di haluaon dohot di hangoluan saleleng ni lelengna, na pinarbaga ni Debata marhite Jesus Kristus.
Alani, huaso na nilehon ni Jesus tu angka na porsea laho mangasahon goarNa marhadomuan do i tu
ulaon marBarita Na Uli tu sandok portibi on. Dihirim Jesus do lam torop jolma na porsea tu Ibana jala
parjambar di Harajaon ni Debata marhite parsuruonNa tu angka porsea. Dibaheni, las ni roha ni
halak Kristen na sasintongna, i ma las ni roha ala naung tasurat goarna di banua ginjang; ndang ala
huaso na adong di ibana.

Molo huaso dasor ni jolma marlas ni roha, tontu angka na marhuaso ma na boi marlas ni roha. Alai
molo asi ni roha ni Debata do dasor ni jolma marlas ni roha, sude jolma boi do marlas ni roha. Asa
ganup jolma na porsea jala dapotan asi ni roha ni Debata di bagasan Jesus Kristus tarpatupa nasida
do tongtong marlas ni roha. Asi ni roha ni Debata (sola gratia) na jinangkon marhite haporseaon
(sola fide) do dalan ni angka na porsea marlas ni roha. Di bagasan haporseaon dohot asi ni roha i do
adong pos ni roha naung tarsurat goarta di banua ginjang, jala angka naung tarsurat goar na di
banua ginjang angka i do na gabe parjambar di Harajaon ni Debata. Dibahen i, las ni rohanta
sasintongna songon halak Kristen hita ndang marojahan tu huaso na adong di hita, alai ala naung
tarsurat i do goarta di banua ginjang.

5. Diskusi

a. Ganup jolma sai disangkapi do ngoluna asa marlas ni roha. Aha do na mambahen ngolunta
asa boi marlas ni roha?
 b. Aha do na mambahen las roha ni sisean na pitupulu i dung mulak nasida sian parsuruon ni
Jesus?
c. Dia do las ni roha na sasintongna hombar tu pangajaran ni Jesus Kristus sian turpuk on, jala
boasa i gabe las ni roha na sasintongna?

6. Marende Huria BE. No. 754: 1-2 “Gok las ni roha do au”

7. Tangiang Pangondianon

8. Marende Huria BE. No. 435: 1-3 “Marolopolop tondingki”

9. Tangiang Panutup