MINGGU, 30 JULI 2023

VIII DUNG TRINITATIS 2 Korint 13 : 5 – 13

PANDONGANION DOHOT PANGARAMOTION NI DEBATA

Huria na hinaholongan ni Tuhanta Jesus Kristus! Ndang pola ulaon na maol mamereng
hasalaan dohot hahurangan ni dongan, ndang pola na maol mandok angka dia ma hahurangan ni
dongan. Andul do ummaol mamereng manang mandok hahurangan niba. Hape lupa hita
dipanudu ni jarijari i sada doi tu dongan, tolu tu hita, lapatanna ingkon gumodang do hita
intropeksi diri molo tasalahon dongan sahali ingkon tolu hali berengonta dirinta. Ido ra umbahen
na ditompa Debata jari telunjuk songon i, sada manudu tu dongan na tolu na i tu hita. Menilai
keburukan orang lain tidaklah sulit, justru yang sulit menilai diri sendiri. Di Mateus 7 : 3 didok
“aha ma pola pabereng-berengonmu silbaksilbak na di mata ni donganmu, ia nasa tiang nadi
matami dang diantoi ho“.

Sai diparsinta huria Korintus do taringot tu hajongjongan ni apostel Paulus songon

Apostel napinanghulingan ni Debata jala na manghatai dohot apostel i, asa dipapatar marhite
haporseaon ni apostel i sandiri. Dipaingot apostel Paulus huria Korintus asa manongtong hot
nasida marhaporseaon di barita na uli napinasahat ni apostel i tu nasida. Unang lalap nasida
holan namarpanungkun taringot tu ha-apostelon ni Paulus. Jala naeng tongtong nasida radot
dihaporseaonna tu Jesus Kristus manang na so ditanda nasida dirina naung Jesus Kristus di
bagasan nasida. Alani, tung mansai ringkot do intropeksi diri, apakah mereka beriman teguh
kepada Allah. Asa marhitehon haporseaonna tu Jesus Kristus margogo nasida laho mangantusi
huhut mananda apostel i di tongatonga ni parsaoran nasida. Ai molo so Kristus di bagasan
nasida, ndang tarbaen nasida manaon, ndang tau nasida lao mangadopi ragam ni parungkilon.
Alani, ingkon tangkas botoon nasida na mian di bagasan Kristus manang na ndang ngolunasida.

Hamu dongan sahaporseaon, diboan apostel Paulus do huria i di bagasan tangiang asa
manongtong nasida mangula nasa ulaon na denggan, i do parbue ni panandaion di Jesus Kristus.
Dirajumi apostel i do, ia so mardonganhon Kristus ndang margogo ibana mangula angka ulaonna
(mamaritahon barita na uli), nang huria pe, laos so tandaonna do haluaon natu ibana molo so
tangkas panandaonna di Jesus Kristus. Alani, sai ditogutogu si Paulus huria i asa tung tangkas
manghatindanghon haporseaonna holan tu Jesus Kristus marhite barita na uli napinasahat ni
apostel i.

Dipasahat apostel Paulus do hata parujungan asa di bagasan las ni roha jala olo nasida
patoguon jala apoan di bagasan nasa roha mangaradoti dame na sian Tuhanta. Tongtong nasida
masitabian di bagasan dame dohot las ni roha. Hata panimpuli dipaujung si Paulus marhite hata
pasupasu “Sai didongani asi ni roha ni Tuhan Jesus Kristus dohot holong ni roha ni Debata
dohot parsaoran ni Tondi Porbadia ma hamu saluhutna“. Amen!
 MINGGU, 6 AGUSTUS 2023
IX DUNG TRINITATIS Parjamita 3 : 11 - 15
SILEHONLEHON NI DEBATA DO SIPANGANON DOHOT
SIINUMON

Patujolo
Huria na hinaholongan ni Tuhanta Jesus Kristus! Dipatupa Debata do saluhut na masa di
portibi on hombar tu lomo ni rohaNa. Ndang diantusi jolma anggo ulaon ni Debata hombar tu
panompaonnNa, alai dilehon di jolma i pangantusion songon dia Debata manompa nasa na adong
di portibi on. Lapatanna, huaso hohot hata ni Debata do na pajadihon angka na di portibi on
sudena ndang adong boi jolma manompa songon panompaon ni Debata, ala jolma i terbatas do
pamingkirionna dohot pangantusionna, alai anggo Debata ndang terbatas. Alani, didok di
parjamita on: dipatupa Debata do saluhutna di tingki halehetanna. Pangantusion ni jolma taringot
tu Debata paboa na so adong do hape gellok ni jolma i di adopanNa, ala dang boi jolma i
mangantusi ulaon ni Debata mamungka sian panompaon sahat ro di ujung ni portibi on muse.
Salah satu contoh “taringot tu partingkian” songon dia pe malo ni jolma dohot sangap ni jolma
tung so boi do jolma i paulakhon sada ari naung salpu, ndang boi mulak i gabe ari marsogot, i do
umbahen didok martiti be do: adong tingki sorang adong tingki mate, adong tingki manuan
adong tingki marpanen adong tingki mengkel adong tingki tangis dohot na asing dope.

Hatorangan
Silehonlehon ni Debata do sipanganon, siinumon, parabiton dohot partingkian. Sada na
mansai arga di paingot turpuk on i ma taringot tu “partingkian”. Ia partingkian i, i ma pasupasu
ni Debata tu hita manisia, asa molo boi hita mangolu sahat tu tingkion tung asi ni roha ni Debata
do i tu hita. Asa tung tangkas do hita nuaeng diajari turpuk on, songon dia ma angka na porsea i
mamangke tingki na nilehon ni Debata di ganup hita, asa unang sampe ndang marguna tingki i
berlalu sambing, ndang tarparhaseang, di partingkian i do boi hita mangula ulaonta siganup ari,
di partingkian i do hita boi marungkil dohot marlas ni roha, ai marputar do tingki i songon roda
ni padati.
Dipaingot turpuk on do hita, asa molo mangolu pe hita las ni roha naeng ma tangkas
parsaoranta dohot Debata, ala godang jolma on lupa tu Debata molo ngoluna di bagasan las ni
roha, sipata na lupa ibana tu Tuhan i. Jotjot jolma on marningot Debata holan di parungkilon
dohot di arsak ni roha do godangan. Dipatangkas do muse tu jolma i tung songon dia pe na
talului di hasinganon baik hamoraon, hasangapon, hagabeon, parsatongkinan do i ala ndang
manontong i na laho salpu do sude na i, molo dung ro tingki panjouonNa i tu hita manisia na
tinompaNa. Alai, inganan na manontong na naeng pasahaton ni Debata i ma “surgo sambulon ni
tondinta” ala ingkon dohot do tong sarihononton tusi, ndang holan arta na di portibi on.
 Molo diloas Debata hita mangolu jala diloas hita menikmati na di portibi on dohot
haulion ni portibi on naeng tangkas ngolunta i ma ngolu na marguna tu keluargata, tu donganta,
tu lingkunganta, tu huria, tu bangso dohot tu manang ise pe taho asa gabe siboan las ni roha hita
siboan pasupasu tu na humaliang. Asa boi hita mangulahon na nidok ni Tuhani tontu “ingkon si
habiari Debata do hita di ngolunta on” ai angka jolma na mangulahon lomo ni roha ni Debata na
patut mangulahoni, ai angka i do jolma na marbisuk, na mamangke tingki na nilehon ni Debata
di ngoluna. Jolma na mamangke tingki i ma jolma na mamparhaseang ngoluna asa boi mangula
angka na ringkot di portibi on, gabe diboto jolma i paboa sian Debata do saluhut pasupasu na
jinalona.
Debata siboto saluhutna jala hasahatan ni saluhut ngolu ni jolma. Hatop manang lambat
partingkian i di Debata do hapateanna. Alani, di ajari do hita jolma mangulahon na ringkot di
parngoluonta on, i do umbahen didok adong do tingki manuan adong tingki marpanen, adong
tingki male adong tingki butong. Sian i boi ma tangkas taboto paboa jolma na dihasiangan on
ndang boi holan pasif/diam, alai ingkon karejo do ingkon mangula do asa ingkon
berpengharapan na ingkon pasupasuon ni Debata angka na taula i, ai molo dung taulahon tontu
bosuran ma hita di sipanganon pardangingon, jala gabe boi ma hita mangulahon lomo ni roha ni
Tuhani di pardalanan ni ngolunta. Amen