MINGGU 12 DUNG TRINITATIS, TANGGAL 22 AGUSTUS 2021

Evangelium : Psalmen 34:12-18

Epistel : Rom 12:17-21
S. Patik : Epesus 6:16-17

“NA SINTONG DIADOPAN NI DEBATA”

1. Patujolo :

Molo tapamanat do Psalmen bindu 25 dohot tabandingkon tu bindu 52 dohot 34 taringot tu pengalaman
ni raja Daud saleleng na pinaburuburu (buronan) ni simatuana raja Saul na ni rante ni tondi
pangiburuon i, gabe digubah raja Daud ma Ende Pujipujian tu Jahowa marningot haluaonna sian tangan
ni si Saul, simatuana i (pat 1 Sam. 21-22, 30).

Nang dung bangkit raja Daud andorang di Hebron (Mamre) si 7,5 taon i, nunga gabe angka ende
sipodaon sian raja Daud angka pengalamanna i dibahen, na niendehon ni sandok bangso Israel dohot
halak Kristen sahat tu tingki on ala haluaon na pinatupa ni Jahowa (2 Sam 2:1-11, pat. Ende Psalm No.
356 s/d 365).

2. Hatorangan ni Turpuk :

Lam talpe do na deba marlomolomo na mangolu on, masibahen na binotona be, jala mangulahon na di
rohana be. Ndang pola dipingkiri na deba pangkorhon ni na binahenna i tu donganna manang tu na
humaliangna. Na penting saut na di rohana, tulus sangkapna, jala sombu panghilalaanna. Na deba
adong do na mamingkiri dohot na manimbangi di rohana sandiri sai hira na so adong be parasingan ni
parjahat sian siulahon hasintongan di bagasan parngoluon siganupari.

Alani i miduk do halak na tarboanboan mangulahon hajahaton so pola dipingkiri be aha pangkorhon ni
na niulahonna i tu dirina dohot panginonana tu masa depan ni ngoluna nang tu ianakhonna pe tahe.
Tangkas do dipaingothon turpuk on tu hita, asa tangkas tatimbangi angka ulaon na naeng ulahononta.
Ndada holan na manghalaputi pangomoan na songgot (untung yang tiba-tiba) na taeahi, alai ingkon
tangkas do timbangonta dasor dohot panghulahonon di na mangeahi pangomoan ro di pangkorhonna.

Dibahen i, adong tolu (3) bagian bolon na tama sibotoonta jala siulahononta na sinoarahon ni turpuk on
tu hita :

Parjolo :unang mura tarboan-boan (terpengaruh) mangulahon hajahaton ala hatop jumpang
pangomoan sian i.
Paduahon : asa tongtong hita sihabiari Debata di nasa ulaon di ngolunta on, ai tangkas do manatap jala
marpanarihon Debata maradophon sihabiari Ibana.
Patoluhon :sai unang mangapian hita tu halak parjahat atik pe marpangomo na sumalin nasida.

Memang sieahanta do ngolu na mambahen sonang roha jala na mensejahterakan. Alai tu dia ma
sundung ni ngolu atik pe gok pangomoan dohot artana anggo so sonang do rohana marsaulihonsa jala
so mensejahterakan ngolu ni rumatanggana (keluarga) rap dohot ianakhonna? Ndada holan na
pasonang-sonang roha sambing anggo angka na porsea i, alai ingkon mangarade do loja jala marhoi di
ngolu on, ala sian mulana pe nunga didok Debata : “ingkon hir hodokmu manganhon sipanganonmu,
jala porsuk ma ahaponmu manganhon gogo ni na niulam” (1 Musa 3:17+19).

Tangkas do didok hata ni Debata di Psalmen 92:8+13, “Lam martumbur pe angka parjahat songon
duhut-duhut jala marbunga pe sude angka siulahon hajahaton, asa siaphononhon do nasida
salelenglelengna. Alai anggo partigor i sai na martumbur do songon harambir, songon sada hau
ares di Libanon do ibana martunas”. Ndang panghuduson anggo angka partigor manghalaputi asa
mamora alai marruhut jala maraturan do (bertahap secara teratur). Tarjorgong di bagasan hajahatonna
sandiri do halak parjahat i, alai anggo halak partigor i marolopolop jala marlas ni roha do (Poda 29:6).
I do umbahen didok Tuhan Jesus tu angka siseanNa “ai aha ma antong gunana di jolma, nang liat
portibion diomo, anggo mago do tondina. Aha ma tarbaehn jolma bahen tobus ni tondina?” (Mateus
16:26). Ndada na mandok na so porlu arta dohot sinamot di angka na porsea di Tuhan i. Alai na porlu
adong ruhut dohot aturan na hinalomohon ni Tuhanta i di na laho majalahi dohot mangalului sinamot.
Di jamita dolok tangkas do digorahon Tuhanta Jesus : “Sai jumolo ma lului hamu harajaon ni Debata
dohot hatigoranNa, dung i tambahononna do sude angka ondeng tu hamuna” (Mateus 6:33).

Marhite angka ulaonta na hinalomohon ni Tuhan i do taripar panarihon dohot pasupasu ni Tuhan i di
angka na porsea jala ndang marnahurang dibahen. Ndada pangasahonon gogo dohot habisukon laho
mangula ulaonta, alai tongtong ma hita marhaporsan tu Ibana jala ndang mansohot hita manjou goarNa
huhut mangido pasupasu sian Ibana. Sandok taoloi ma hataNa na mandok : “Jala jou ma Ahu jumpa
di hagogotan asa Hupalua ho, asa dipuji ho ahu” (Psalm 50:15).

Ndada manghudus anggo angka na porsea di angka na ringkot di ngoluna, alai tongtong
marhagengeton, huhut dibagasan pos ni roha martangiang tu Tuhan i paboa na lehononNa do na ringkot
di ngoluna. Didok apostel Paulus do tu huria Rom : “Marlas ni roha ma hamu manghirim, marbenget
ni roha di haporsukon. Jugulhon hamu ma martangiang” (Rom 12:12).

Sotung adong sian hita mangarimpu, molo angka na porsea tu Tuhan i, ndang adong hurangan jala
ndang hea jonok tu parmaraan manang tu parungkilon. Tongtong do hobas angka na porsea i
mangadopi manang aha na masa di ngoluna, alai tongtong marhaposan tu Tuhan i, ai didok do di hata
ni endenta :”Manang aha pe na masa, las ni roha arsak pe; tioponku Ho Na basa na marholong
roha pe”. Porlu do parsitutuon manghaporseai Tuhan i, di nasa ngolu dohot ulaon jala ndang
tarboanboan (terpengaruh) tu angka ragam ni ulaon hajahaton di na humaliang ngolunta on. Angkup ni
i, ingkon hatindanghononta do : Dipalua Debata do angka na porsea sian hagogotan molo tajou goarNa.
Sandok unang marsipaula hita manghaposi Tuhan i di angka ragam ni na masa di ngolu on. Alai
tangkas ma tahajongjonghon haporseaonta nang di angka hamajuon ni zaman na taadopi nuaeng.
Ndang tama mangapian hita tu halak na mora anggo sian dalan hageduhon dohot sian hajahaton (na
nidobo) do dipahimpu artana i. Naeng ma tongtong hita sihabiari Debata jala ingkon halaputanta do
mangulahon hatigoran di nasa ulaon dohot di sandok ngolunta. Tujuan ni sandok panghirimonta, i ma
asa tongtong hita mangolu di bagasan jala raphon Kristus (hidup bersama dan di dalam Kristus).

3. Panimpuli :

Torop do jolma maol mangulahon hatigoran dohot ulaon na denggan di portibion. Ragam do angka alus
na binahen ni jolma na sasintongna na mangambati jolma i laho mangulahon angka hatigoran.
Parungkilon ni angka partigor boi do marharoroan sian hata na so tutu na pinasahat ni angka jolma tu
ibana na boi mambahen ibana songon na marisuang jala ganggu manguduti ulaon hatigoran.

Ulahon ma ulaon hatigoran nang pe torop jolma manghahosomi ho, ai ditatap Jahowa do ulaonmu na
tigor i. Alualuhon angka parniahapanmu tu Jahowa huhut haposi ma Ibana. Ai ditanda do angka
parngoluonmu huhut ditangihon do angka angguk-anggukmu, ai ndang dipaloas Jahowa angka jolma
partigor i punjung di parniahapanna.

Halak na marhaposan tu Jahowa tontu boi do ibana manahan molo ro pe angka hata sian dila ni angka
parjahat dohot bibir ni angka sipaotooto, ai ndang marisuang angka ulaon hatigoran i maradophon
Jahowa.