Minggu TRINITATIS , 04 JUNI 2023

EVANGELIUM : 1 MUSA / KEJADIAN 1 : 1-2, 26-28

TEMA : DEBATA SITOLU SADA PANOMPA NASA NA ADONG (ALLAH
TRITNGGAL PENCIPTA SEGALA SESUATU)

Huria ni Tuhanta na hinaholongan! Sada panindangion na tung mansai tangkas

pabotohon hadirion ni Jahowa, i ma pandohan parjolo di buku na badia i - ,di mula ni mulana
ditompa Debata langit dohot tano on“. Debata manompa nasa na adong: langit dohot tano, angka
panondang na bolon dohot na metmet, na holom, tano na mahiang, tano dohot aek, binatang,
jolma nang nasa na marhosa. Di panindangion i dipaboa, na andul marasing panompaon tu jolma
,jadi ditompa Debata ma jolma i tumiru rupana, rupana ditiruanhon Debata laho manompa ibana,
baoa dohot boruboru nasida ditompa“. Ari na paonomhon do ditompa jolma i tumiru rupaNa.
Nasa jolma tudoshon Debata ai sian rupa ni Debata do ditompa. Nasa jolma dos diadopan ni
Debata, ndang mardia imbar. Ala suman ni Debata do jolma i gabe dipasahat ma huaso
patundukhon angka na tinompa, di laut dohot angka pidong na martongatonga langit ro di sude
binatang, angka na manjirir di atas tano on. Huaso dipasahat tu jolma laho mangarajai ndada
pasudahon hombar tu lomo ni rohana. Sian pangantusion do adong na mangalapati, jolma do
tumimbo sian nasa na tinompa ai suman ni Debata do jolma i jala dapotan huaso laho mangarajai
nasa na tinompa. Borhat sian panindangion on ma naeng tangkas antuasanta taringot tu hadirion
ni Debata Sitolu Sada i hombar tu goar ni minggunta sadari on Minggu Trinitatis.
Huria ni Tuhanta na hinaholongan! Molo tapaihutihut angka barita na masa di liat portibi
on ra tubu do tu bagasan pingkiranta ragam ni angka sungkunsungkun: molo tudos tu rupa ni
Debata do jolma i boa-sa ma adong parporangan na mamunu angka suman ni Debata? Boasa ma
sai masa angka pangarupaon di portibi on? Nda na manegai rupa ni Jahowa do angka pangalaho
i? Boi do tadok, manang ise na mamunu jolma na mamusa suman ni Debata do ibana disi? Asa
turpuk jamita on ndada holan laho manangkasi hajolmaon alai dohot hadebataon ni Tuhanta i:
Debata Ama, Anak dohot Tondi Porbadia. Aha na ingkon bahenon ni jolma molo dipasahat tu
ibana huaso? Tolu pulu taon na parpudi on marragam do hatorangan taringot tu hajongjongan ni
jolma na dipahebaheba sian turpuk on. Nunga marratus taon jolma marnida dirina sitiop huaso
alai ndang diida be Debata na pasahathon huaso i. Siala i do masa angka na patubu parmaraan di
portibi on. Adong poda na man-dok jolma do tumimbo sian nasa na tinompa, dipasahat Debata
tu jolma huaso laho patundukhon dohot mangarajai. Dilapati huaso i lobi sian na patut. Ala
dietong dirina boi mambuat dohot mamangke nasa na tinom-pa dalan ni hangoluanna dohot
hamoraonna diahut ma sude tu dirina: ditabai ma angka hau na di tombak dohot harangan jala
dibuat angka jadijadian ni Jahowa na dibagasan tano. Gabe mahiang ma tombak, dung i por ma
udan, matorban ma angka dolokjala masa ma aek na sumar. Salpu i,ro ma ari logo ndang tubuan
lata be ladang dohot hauma ala nunga sega tano na napu i. Lam mohop ma portibi on ala so
adong be hau na mangolani sihit ni ari.
 Songon i do na masa di partingkian na salpu jala nuaeng pe sai tong dope adong na
mangulahonsa. Nian nunga lam gogo soara tarbege asa unang didatdati manabai hau alai ndang
sude jolma mangoloi. Molo ta-jaha turpuk jamita on nuaeng, dia ma sidohononta manang
dohonon ni pomparanta sogot? Tatatap ma dua pulu taon na naeng ro. Dijaha sahalak naposo
bulung ma turpuk jamita on, aha ma dohononna? Boha do laho mangantusi turpuk on? Ra, i do
sungkononna.Boasa? Songon dia do patundukhon dohot mangarajai dengke angka na di laut
dohot pidong na martongatonga langit ro di sude binatang angka na manjirir di atas tano on?
Adong dope dengke di laut manang pidong martonga langit dua pulu taon na naeng ro, molo sai
torus jolma manegai hau,pamatehon angka dengke? Dia ma sipatunduhon dohot sirajaan molo
dung mago sude na tinompa i ala hamongkuson ni joIma mangahuti na tinompa i? Molo holan
na ringkot di parngoluan siganup ari do na dibuat jolma sian na tinompa ni Debata ndang gabe
mago manang sega saluhut na tinompa i. Alai, ala nunga dipasuda laho manggohi hisap dohot
pasuksuk arta nang hamoraon diahut na tinompa ni Tuhanta i, hamagoan manang hamatean do
na taparade tu pomparanta marsogot. Siala i mansai arga situtu tur-puk jamita on paingothon
dohot mamodai hita angka na mangihuthon poda na lipe i. Laho manangkasi angka naung
pinatorang i, taida ma dia do na pinaboa ni panindangion sian turpuk jamita sadari on.
Aha do lapatanna ,,ditompa Debata ma jolma i tumiru rupaNa?“ Di hadirion ni jolma na
ditompa Debata adong na sarupa dohot hadirion ni Debata, i ma habadian, holong dohot lan na
asing. Hadirion na dos tu Debata di jolma i sega dung mangalaosi, madabu tu bagasan dosa, alai
nunga dipasuang Jesus marhite panobusionNa. Di poda ni apostel Paulus ( Eps. 4 : 24 didok,,
Jala solukkon hamu ma jolma na imbaru, na tinomins suman tu Debata, di bagasan hatigoran
dohot hapolinon na marhasin Ala suman tu Debata do jolma ingkon sorminhonon ni jolma do
hadirionni Debata di parngoluonna. I do tujuan umbahen ditompa Debata jolma tu miru rupaNa,
asa marsinondang hadirion ni Debata sian nadirion ni jolma i ma hasintongan, hatigoran,
habadiaon, holong, halambohon,halambason dohot angka na asing. Sian i do boi idaon haulion ni
jolma di na disondanghon hadirion ni Debata. Molo tapadomu tu 1 Musa 2:7 na mandok“Dung i
dijadihon Debata Jahowa ma jolma i sian orbukni tano on jala diullushon tu bagasan bungbung
ni igungna hosa hangoluan i, gabe martondi na mangolu jolma i", boi ma singkop pangantusionta
taringot tu hadirion ni jolma. Ala diullus Jahowa tu bagasan bungbung ni igung ni jolma hosa
hangoluan gabe martondi na mangolu jolma. Hosa di Debata do na diullushon tu jolma ia so i
ndang mangolu jolma. Jala molo tajaha di Padan Na Imbaru lam tangkas ma pangantusionta, ia
hajolmaonta nunga sega alani dosa, alai dipasuang Jesus do i marhite hamamate dohot
haheheonNa. Jolma na manolukkon haimbaruon di ngoluna ndada ala pambahenanna sandiri,
alai ala tongtong do dipaimbaru Tondi ni Debata, i ma Tondi Porbadia. Hosa hangoluan na lohot
di jolma di ari panompaon dipaimbaru Tondi Porbadia jala Tondi i do na mambahen jolma boi
mangolu dibagasan hahipason dohot hasonangan. Molo tondi na asing songgop tu jolma, sahit do
na manggoppang tu dagingna, alai ala Tondi Porbadia do na marhuraja di ngolunta gabe
tarbahen hita do denggan mangolu. Sian pangantusion i do ro poda ni apostel Paulus di Eps.
5:18b-20 mandok, “alai gok Tondi ma hamu! Hatahon hamu ma sama hamu angka ende
psalmen, angka ende pujipujian dohot ende partondion, endehon jala puji hamu ma Tuhan i di
bagasan rohamuna! Manongtong ma hamu mandok mauliate siala saluhutna tu Debata Ama, di
bagasan goar ni Tuhanta Jesus Kristus!"
Huria ni Tuhanta na hinaholongan! Tondi Porbadia, i ma Tondi ni Debata Jahowa jala i
do nang Tondi ni Anak ni Debata. Tondi i do na patauhon hita marparsaoran dohot Debata. Siala
i do hita digoar anak ni Debata na marnampunahon hangoluan na saleleng ni lelengna. Siala
Tondi ni Debata i do hita dipatau manjou Jahowa Debata Ama songon na tadok di tangiangta
“Ale Amanami.." jala di sude partingkian hita boi manghatai di bagasan tangiang dohot Ibana.
Ala anak ni Debata do hita umbahen boi pajumpang dohot Ibana. Asa na marhasurungan do hita
di adopan ni Debata. Angka na manondanghon hadirion ni Debata i do na gabe anak hasurunganNa.
Angkup ni dohononta sian dibagasan haporseaonta,ala anak ni Debata do hita umbahen dipahehe sogot
sian hamatean jala dijou tu lambungNa, i ma hangoluan na so ra suda i. Asa hadirionta i do na mambahen
boi hita pajumpang bohi dohot Debata. Alai nuaeng, taida ma jo hadirionta be. Nang pe naung songgop tu
hita Tondi ni Debata, hira so godang dope parniulanta nionjar ni Tondi i.
Hamu angka dongan sahaporseaon! Songon dia Tondi i mangula di dirinta? Di
partingkian nuaeng ndang apala maol mangantusi i. Nunga hira sude hita mamangke HP
(Hand Phone/cellular phone). Marhite i boi do hita manghatai tu liat portibi on nang
holan umbege soara alai dohot nunga boi masipaidaan. Boasa? Angka na bisuk mandok,
boi pe hita manghatai marhite HP ala na adong do “elektromagnetik" na boi padomuhon
hita dohot dongan di luat na dao. Hira songon i do Tondi i padomuhon hita tu Debata. Na
martangiang di bagasan Tondi boi ma pajumpang dohot Debata. Tondi ni Debata na
manggomgomi ngolunta i do mambahen hita sada dohot Ama i. Na parpudi sian turpuk
jamita on pabotohon dipasupasu Debata do hita asa marpinompari jala laos dipasahat
ulaon tu hita. Adong ma nuaeng dua hatorangan taringot tu pandohan di ayat 28. Parjolo,
andorang so madabu tu bagasan dosa, ia pasupasu i marpardomuan tu na manggohi
sandok tano on; alai dung madabu tu bagasan dosa adong ma ulaon na imbaru i ma
manghara don-gan angka na so porsea di haluaon pinatupa ni Jesus asa porsea jala taru-li
di haluaon i. Asa molo torop pomparan ni sasahalak ingkon lam torop ma nang na ro
mangoloi joujou tu haluaon. Aha ma gunana torop jolma alai otik na mangoloi Tuhani?
Ndang dihalomohon Debata sian jolma molo holan ibana dapotan pasupasu, alai ingkon
lam torop do na ingkon dapotan pasupasu marhite joujounta tu nasida. Ingkon lam
godang do jolma na patubegehon asi ni roha ni Debata Sito Sada i asa lam tangkas
hadirion ni Debata marsinondang sian dirinta, Amen!
Minggu 1 SET. TRINITATIS, 11 JUNI 2023
EVANGELIUM : MATEUS 9 : 18-26
TEMA : HAPORSEAONMI DO NA PALUAHON HO (DISELAMATKAN KARENA
IMAN)

Adong dua na masa di turpuk on, na parjolo boru ni si halak na sangap, na mangolu muse sian
na mate. Na paduahon, sada boruboru na tamaningon bulan on, leleng ni sampuludua taon, na
ro sian pudi ni Jesus manjama rambu ni ulosna gabe malum ibana. Sahali masa do duansa
halongangan na pinatupa ni Jesus na dipatorang di turpukta on. Songoni ma balga ni huasoNa na
masa tu godang jolma na ro mangido hamalumon sian Jesus hatiha mangolu dope Ibana songon
jolma di portibi on.
Na parjolo taida ma di ayat 18 pangidoan ni sahalak na sangap na ro marsomba tu Jesus
asa diampehon tanganNa tu boruna naung mate (ayat 18). Godang do angka na sangap na
marsogo ni roha tu Jesus, alai ro ma sahalak na sangap marsomba tu Jesus mangido asa
dipangolu Jesus boruna naung mate. Boi do tapanghilalahon halak na matean boru, mansai
habot, magopu jala bonsa rohana. Turpuk on patuduhon tu hita di tingki ro habot ni roha na
mambahen ponjot rohanta, di si do ingkon ro hita mandapothon Jesus, songon na masa di turpuk
on. Hamatean na masa tu keluarganta manjou hita ro mandapothon Jesus, ndang boi holan na
tumatangis hita jala marsak. Alai naeng tadapothon Jesus marsomba tu Ibana pasahathon sude na
adong di bagasan rohanta mangido gogo dohot pangapulion.
Ndang bawahanna disuru na sangap i manjumpangi Jesus, alai ibana sandiri do langsung
ro marsomba tu Jesus. Di hata Gorik didok:"-proskuneo"lapatanna menyembah, menghormat,
marsomba, patuduhon haserepon ni rohana. Hatiha i sada haleaon do molo olo sahalak na san-
gap marsomba tu Jesus, ala sai dihasogohon angka na sangap do Jesus hatiha i. Alai ndang
parduli halak na sangap i, boasa? Ala ummarga do di ibana huaso ni Jesus, na boi pangoluhon
boruna sian na mate daripada hasangaponna. Tarida patar haporseaonna marhite parsombaonna
dohot pangidoanna tu Jesus, dihaporseai ibana do na marhuaso Jesus pangoluhon boruna naung
mate i. Ndang tarbahen jolma paulakhon hosa ni jolma naung mate, alai huaso ni Jesus ndang
tardodo manang ise pe i, dao gumogo sian sude huaso na adong di portibi on, na boi do
pangoluonNa sian na mate molo dihalomohon rohaNa.
Aha do naeng dohonon ni turpuk on tu hita nuaeng? Haradeon ni Jesus manggohi
pangidoan ni halak na sangap i, patuduhon holong ni rohaNa tu angka na olo paserephon dirina
ro marsomba tu Ibana. Ro do Jesus tu bagasna patupahon pangidoan ni halak na sangap i, laho
papuashon roha ni halak na sangap i. Dipatuduhon i do tu hita, ndang tarhirim angka halak na
olo paserephon dirina mandapothon Jesus, marsomba tu Ibana. Songoni ma nang hita pe, di
tingki ponjot rohanta ala masa habot ni roha, naeng tapaserep rohanta marsomba tu Jesus. Ditilik
Jesus do sahat tu bagasan rohanta, diboto do aha na ingkon patupaonNa tu hita hombar tu na
taadopi. Diboto Jesus do batas ni kemampuanta mangadopi hasusaan i, dilehon solusi jala
dipargogoi hita.
Dung sahat Jesus di bagas ni na sangap i, diida ma angka pangondasi dohot natorop i
gabe ribut. Disuru ma lao nasida, dungi bongot ma Jesus,ditiop ma tangan ni dakdanak i gabe
mulak mangolu. Molo masa hamatean, ribur do jolma na ro, adong musik alai huhut godang na
tu-matangis. Naeng dohonon hata ni Debata tu hita, molo masa hamatean, di situasi na
mencekam, na membingungkan hita, naeng talehon inganan tu Jesus di bagasan rohanta, asa
margogo hita mangadopi na masa i. Un-ang taloas dirinta kalut, panik jala holan na sai
tumatangis. Di turpuk on didok, diboto Jesus do tutu na mate do dakdanak i hombar tu parnidaan
ni jolma, alai ndang songoni anggo dli Jesus, na modom do halak na mate i. Jala di Rom 4:17
didok, "Di adopan ni Debata ma i, na hinaporseaanna Sipangolu angka na mate jala Sijou na so
adong hian gabe adong".
Toho do anggo di bagasan Tuhan i sude angka na mate ndang na mate didok, alai na
modom do. Umumna sude do ugamo mandok songoni ala mabiar mangadopi hamatean jala
ndang tarpasiding jolma hamatean i, gabe didok ma na modom do na mate i. Jala sai didok do,
na rap modom do na mate i rap dohot angka naung jumolo monding. Di Padan Narobi didok,
"Jala torop sian halak na modom di bagasan orbuk ni tano" (Daniel 12:2). Alai pangantusion
molo didok "modom do angka na mate", holan pamatangna do na modom, ndang dohot tondina
modom di bagasan tano. Jala adong do hata na mandok,"tidur adalah mati yang sebentar, dan
mati adalah tidur yang lama". Jala hamatean ni angka na bonar didok, "na maradian do nasida di
angka podomanna" (jaha:Jesaya 57:2). Angka na mate di bagasan Tuhan i, ndang holan
maradian sian ulaonna, alai maradian di bagasan panghirimon, na hehe do muse angka na mate
di bagasan las ni roha di ngolu na imbaru, marpahean na imbaru saleleng lelengna (jaha:1
Tesalonik 4:13-14).
 Di hata Gorik angka halak na mate jotjot do didok "na modom do nasida", sian hata
koimētērion na marlapatan inganan ni halak na modom (tempat di mana orang tidur), jala di hata
Inggris didok cemetery (pemakaman). Adong dua hata na mandok "modom" di hata Gorik,na
parjolo hata "koimasthai" na jotjot dipangke mandok "modom secara alami dohot modom alani
na mate". Hata na paduahon hata "katheudein" hata na jarang dipangke molo mandok modom
alani hamatean, alai di-pangke mandok "modom secara alami". Hata na dipangke di turpukta on
hata "katheudein". Angka teolog pe mandok pangantusion tu hamatean di Padan Naimbaru jotjot
do dibuat sian Padan Narobi, tarlumobi ma hata "katheudein" dohot hata “koimaomai” (jaha:
Joh.11:11; Mat.27:52; 1Ko-rint.15:6; 1Tes.4:13-14; 5:10 na binuat sian Daniel 12:2), laho
patuduhon hapatean ni haheheon angka naung mate di bagasan Tuhan i, na holan bersifat
sementara do hamatean i. Jala holan Tuhan Jesus do na marhuaso pahehehon angka naung mate.
Marhite hata ni Debata disungguli do rohanta, naeng taantusi lapatan ni hamatean ni
angka na hinaholongan ni rohanta. Naeng ma suan di bagasan rohanta, ndang na mago nasida, na
jumolo do nasida mandapothon Debata; ndang na mate nasida alai na maradian do nasida di
inganan parsatongkinan i asa dipahehe Kristus muse di ari haheheon (jaha:1 Korint.15:18). Alani
molo taapuli pe angka na marhabot ni roha, naeng ma tapasahat hata pangapulion na
manggombarhon ngolu na naeng ro di banua ginjang, inganan na gok hamuliaon dohot las ni
roha, na naeng taida dung ro Kristus pahehe sude angka na maradian sian tanoman i. Lapatanna,
ndang maralo tu na tahaporseai dohot tu na tapingkiri pandohan ni Jesus di turpuk on, "ndang na
mate, na modom do" (ayat 24). Naeng tahaporseai hata ni Jesus nang pe hira na maralo tu
pingkiran ni jolma. Halongangan na binahen ni Jesus patuduhon na marhuaso do Ibana paheheon
angka na mate, ala di tanganNa do huaso hangoluan nang hamatean pe.
Di ayat 24c disurathon "diparengkeli nasida do Ibana" ala didok Jesus na modom do
dakdanak i. Tontu ndang masuk angkal nasida pandohan ni Jesus i ala ndang ditanda nasida
huaso ni Jesus. Jala ndang diboto nasida lapatan ni hamatean di bagasan Tuhan i. Dung
dipangolu Jesus dakdanak i, diida angka natorop i ma na masa i, gabe sar ma barita I. Marhite na
masa i, dipatuduhon Jesus hadirionna nang huasoNa lobi sian malim ni halak Jahudi. Ndang jadi
malim ni halak Jahudi jumonok tu halak na mate (jaha:3Musa.21:11), alai Jesus ditiop do tangan
ni halak na mate jala dipahehe,ndang gabe hodar Ibana nang pe ditiop angka halak na mate.
Lapatanna, Jesus do Tuhan ni angka na mangolu nang angka na mate, Ibana do na boi
pangoluhon halak na mate hombar tu na sinangkap ni rohaNa.
Di ayat 26 didok gabe sar ma barita i. Jotjot do sar barita halongangan na pinatupa ni
Jesus, alai ndang godang na olo porsea di huaso-Na. Nuaeng pe tong do songoni, taida ma
godang halak na manaringoti angka halongangan na pinatupa ni Jesus alai ndang olo porsea di
Ibana, ndang olo mangulahon na nidokNa,ndang olo mangihuthon Ibana. Hita na so marnida
angka halongangan na pinatupa ni Jesus hatiha i, naeng ma tajalo parsiajaran sian na tarsurat di
Bibel i, porsea di angka na masa i nang pe ndang taida marhite simalolongta, alai taida do i
marhite mata ni haporseaonta.
Na mangihut taida ma na masa tu sada parompuan na taman-ingon bulan on, saleleng 12
taon (ayat 20-22). Mansai marsiak do dihilala parompuan i, nunga suda artana laho marubat tu
angka pangubati asa malum, alai tong ndang malum. Lam hansit dihilala ibana ai nunga
marpogos hape ndang marna malum sian parsahitonna. Jala alani parsahitonna ndang diloas
ibana masuk tu bagas joro ni Debata, ala na hodar do i hombar tu aturan Patik ni ugamo Jahudi.
Alai nang pe songon i parniahapan na niadopanna, ndang adong na boi mangambati ibana
mandapothon Jesus maniop ulosNa ala ni haporseaonna na mansaibalga. Dipasahat parompuan i
do dirina tu Jesus mangido asiasi ni roha marhite na maniop ulosNa (di tingki mardalan Jesus
manopot bagas ni halak na sangap i). Tingki diboto Jesus na binahen ni parompuan i, di bagasan
hata na lambok gok holong ni roha, didok Jesus, "Pos ma roham, ale inang, haporseaonmi do na
pangoluhon ho!" Taida ma hata ni Jesus na mansai lambok tu parompuan i, tung tangkas diantusi
Jesus hagaleonna ala ni parsahitonna. Hira na manangkonangko do ibana manjama ulos ni Jesus.
Alai sasintongna ndang na manangkonangko ibana manjama ulos ni Jesus. Na mansai gale do
pamatangna ala marsahit saleleng 12 taon, gabe ndang tarbahen ibana manghatai tu Jesus
mangido hamalumon, ala di adat Jahudi diorai do parompuan na marsahit manghatai dohot baoa
di jolo ni natorop. Alai mansai gogo do haporseaonna, gabe mabaor huaso ni Jesus tu ibana
marhite ulosNa. Dijangkon Jesus do hagogoon ni haporseaon ni parompuan i
Na taida sian i, asi ni roha ni Jesus na mansai balga tu parompuan na marsahit i, pintor
tompu malum ibana alani haporseaonna, nang pe holan na manjama ulosNa. Dapotna
hamalumon sian Jesus alani haporseaonna. Songoni ma nang hita pe, unang mabiar
mandapothon Jesus nang pe bunibuni hita mandapothon Ibana, nang pe mabiar hita mar-tangiang
diida halak di hatoropon,alai diida Jesus do roha parbagasanta laho mandapothon Ibana di angka
na buni. Didok Jesus tu parompuan i, "ale inang pos ma roham", na patuduhon holong ni rohaNa
tu angka na gale alani parsahiton nang hasusaan. Hata ni Jesus "ale inang pos ma roham” i ma
laho paposhon rohana unang mabiar, alai asa tenang jala dame rohana. Lapatanna pos ma roham,
unang ganggu roham, unang mabiar, nunga malum be ho alani haporseaonmi. Tu hita do hata ni
Jesus sadari on, "pos ma roham" hamu sude ruas ni huria na porsea di huaso ni Jesus,
haporseaonmuna do na paluahon hamu. Tu angka na marsahit, unang mabiar, unang tahutan,
unang marsak, nang pe gale pamatang-muna, ala haporseaonmuna do na pamalumhon hamu di
bagasan huaso ni Jesus Kristus. Papos hamu ma rohamuna, dihalomohon Jesus do asa tongtong
dame rohanta, asa malum hita sian angka parsahiton.
Sian dia do ro haporseaonta tu Jesus? la haporseaonta silehonlehon ni Debata do i tu hita
(jaha; 1Kor.12:9), ala ni i ingkon taargahon i jala tapangke haporseaonta i hombar tu lomo ni
rohaNa. Marisuang do haporseaonta molo ndang taargahon jala tapangke hombar tu lomo ni
roha ni Debata. Alani do didok angka na pistar, gabe tu hajahaton do parbinotoan molo ndang
adong haporseaon. Tapangke ma haporseaonta i pasangaphon Debata marhite na porsea tu huaso
ni Jesus. Molo ndang tahaporseai huaso ni Debata marhite Jesus, ndang dapot hita manang aha,
marisuang (sia-sia). Dipangke par ompuan i haporseaonna, gabe dapotna hamalumon dohot
dame sian Jesus. Penghargaan na balga dapotna sian Jesus marhite hata ni Jesus, "ale inang, pos
ma roham, haporseaonmi do na paluahon ho". Penghargaan manang pujian na luar biasa do i
sian Tuhanta Jesus tu parompuan i gabe malum ibana jala dapotna dame ní roha. Marhite
haporseaonta tu Jesus tarpatupa hita do lobi sian na tapingkiri, ala diargahon Jesus do angka na
mangasahon haporseaonna.
Hamalumon na jinalo ni parompuan i, tontu ndang holan hamalumon di pardagingonna,
alai dohot di partondionna. Gabe ndang mabiar jala tahutan be ibana. Halak na sai dikucilhon
sian masyakarakat alani parsahitonna tontu sai mabiar jala tahutan songon na nialaman ni
parompuan i andorang so malum dope ibana. Dung malum ibana, gabe boi ibana marsaor dohot
masyarakat, ndang dikucilhon masyarakat be ibana. Lapatanna malum do nang partondionna,
gabe tenang dihilala ibana, ndang marsak be rohana, gabe di bagasan dame ibana. Angka naung
malum partondionna marhite huaso ni Jesus, tontu mangihut ma hamalumon di pardagingonna.
Marhite hata ni Debata, naeng tutu porsea hita di huaso ni Jesus na mutlak di sude na
masa, di angka naung masa, di angka na masa nuaeng di portibi on, nang di angka na naeng
masa tu joloan on. Ndang adong kondisi manang situasi na membatasi huaso ni Jesus patupahon
na sinangkap ni rohaNa. Marhuaso do Ibana pangoluhon halak na mate nang pe idaon hira naung
tarlambat. Alai ndang adong na tarlambat di Jesus. Margogo do huaso ni Jesus pabalikkon na
masa di ngolunta, ulaon habot ni roha boi do gabe ulaon las ni roha, ala di tanganNa do
hangoluan. Marhuaso do Jesus paubahon angka na mambahen arsak ni roha gabe mambahen las
ni roha tu hita. Antong tapangasahon ma haporseaonta tu Jesus di sude angka na masa di
ngolunta. Amen!

Minggu II DUNG TRINITATIS , 18 JUNI 2023

EVANGELIUM : 2 MUSA 19 : 1-8
TEMA : MARSIHOHOT MANGULAHON HATA NI TUHAN (SETIA MELAKUKAN
FIRMAN TUHAN)

Tontu las situtu do rohanta molo gabe anak hasian manang boru hasian hita di bagas ni damang
dohot dainang.Adong ma hasurunganta molo gabe anak hasian hita. Aha pe na tapangido sian
natorasta, molo angka na denggan jala na marguna,tontu intap ni na tarbahen lehonon ni natoras
do i tu anak hasian dohot boru hasian i. Anak dohot boru hasian ima songon anak mata ma i, na
tinggal di jabu jala menikmati sude fasilitas na adong di jabu i. Alai molo anak somang tinggal
di duru ni jabu do i songon hatoban.
Ima hasurungan ni bangso Israel dibahen Debata. Gabe anak hasian ni Debata do nasida.
Sumurung do holong ni roha ni Debata tu bangso i. Patar do i di bagasan pardalanan ni
ngolunasida jala sada hapataranna ima marhite pambahenan ni Debata na paruar nasida sian
parhatobanan Misir. Ganjang do dipatorang di buku 2 Musa taringot tu proses pardalanan ni
bangso Israel sian tano Mesir (tano parhatobanan) tu tano Kanaan (tano parpadanan).
Sasingtongna nunga dilumbahon i di buku 1 Musa ima di bindu 50. Disi dibaritahon do
hamamate ni si Josep (anak ni si Jakob na gabe pejabat di Mesir), jala dibaritahon do tonana tu
hahaanggina: "Na mate ma anggo ahu, alai sai tingkiron ni Debata do hamu sogot jala
togihononNa hamu ruar sian tano on tu tano na niuarihonNa í tu si Abraham, si Ishak dohot tu
si Jakob" (1 Musa 50:24).
Ditogihon Debata do bangso i ruar sian Misir ala bernit jala parir do diae nasida di
parhatobanan Misir. Tutu di buku 2 Musa jumpang hita do catatan taringot tu
hasosofar/hagabeon ni bangso Israel. Denggan do ngolunasida jala berkembang do nasida di tano
Misir. Alai gabe tubu ma kegelisahan ni bangso Mesir mamereng godang ni pinompar ni bangso
Israel. Pangkorhon kegelisahan i gabe dipatupa raja Firaun ma 2 strate-gi laho mangorui laju
pertumbuhan pinompar ni bangso Israel, ima: (1) Marhite kerja paksa/kerja rodi asa loja situtu
angka baoa na karejo i jala marmatean di inganan kerja paksa i; (2) Mamunu posoposo baoa na
tubu. Di peristiwa si songon i ma tubu si Musa jala magodang do ibana di Istana raja Firaun.
Laos dipajongjong Tuhan i do si Musa gabe naposoNa ilaho manguluhon bangso i ruar sian tano
Misir.
Di bindu 19 on dibaritahon do pardalanan ni bangso Israel na niuluhon si Musa sahat tu
halongonan Sinai jala jonok na ma i tu dolok Sinai. Marsaro (berkemah) ma nasida di
halongonan i. Hirahira sataon ma nasida tinggal disi jala dipajongjong nasida ma kemah nasida
menghadap/tondong ni dolok Sinai i. Dung maringanan bangso Israel di halongonan Sinai
mardompakhon dolok Sinai, nangkok ma si Musa tu dolok Sinai tumopot Tuhan i. Jadi dijouhon
Tuhan i ma naposoNa i sian dolok i, ninna ma: "Songon on ma dohononmu tu pinompar ni si
Jakob, paboa-onmu tu halak Israel." Sian on boi berengonta hadirion ni si Musa songon
pemimpin ni bangso Israel (na manguluhon bangso i) huhut songon naposo ni Tuhan i (na
pasahat angka hata dohot tona sian Tuhan i tu bangso Israel).
Songon on ma hata ni Tuhan i tu bangso Israel: "Nunga diida hamu na Hubahen i tu
halak Mesir, na huboan hamu hira di atas ni habong ni pidong rajawali pasahat hamu tu Ahu."
Sian hata on boi do jumpang hita ondolan na mansai arga, ima nunga diida. Tangkas situtu do
nunga diida (ndang holan dibege manang diboto, alai nunga diida) bangso Israel pambahenan
dohot huaso na dipatupa Tuhan i tu halak Mesir umbahen na boi malua nasida sian parhatobanan
Mesir. Dipatupa Tuhan i do hukuman (tulah) tu halak Mesir jala ndang adong gogo nasida palua
dirina sian uhuman ni Tuhan i. Laos Tuhan i do, marhite huasoNa, mamboan bangsoNa ruar sian
pahatobanon Mesir. "Huboan hamu hira di atas ni habong ni pidong rajawali", on ma sada
gombaran na dipangke panurat buku 2 Musa on laho manggombarhon hagogoon dohot huaso ni
Tuhan i na marhapataran situtu di na ruar bangso Israel sian parhatobanon Mesir.
Dung disunggulhon Debata do tu nasida saluhut pambahenanNa i, didok ma muse
songon on: "On pe molo ditangihon hamu soarangKu jala diradoti hamu padan na Hubahen i,
jadi hasianKu ma hamu sian nasa bangso, ai gok di Ahu do liat portibi on. "Sasintongna
andorang so dipasahat Tuhan i hata on nunga tung tangkas asi ni roha ni Debata tu bangso i.
Diasii do naslda, hasian ni Debata do nasida,bangso ni Debata do nasida. Alai lam dipatota ma i
marhite hata on. “Molo ditangihon hamu soarangKu jala diradoti... jadi hasianKu ma hamu."
Ringkot adong parsitutuon laho manangihon soara ni Tuhan i dohot mangaradoti
uhumNa. Ringkot adong ungkap ni roha dohot roha na serep jala haoloon laho tumangihon dohot
mangulahon hata ni Debata. Ido na dihirim Tuhan i sian bangsoNa. Molo rade nasida
mangulahon dohot mangaradoti, dibagabagahon Tuhan i: gabe hasian ma bangso i di joloNa.
Dung dipasahat Tuhan i hataNa tu si Musa, turun ma ibana sian dolok Sinai jala disi ma
tarida hadirion ni si Musa songon sahalak na pistar jala ahli management. Ndang langsung ibana
pasahathon hata ni Tuhan i tu saluhut bangso Israel. Alai dijou si Musa do angka sintua ni
bangso i jala diaturhon tu jolo nasida sude angka hata dohot tona ni Jahowa na dijalo ibana di
dolok Sinai. Dipatupa ibana si songon asa boi nian hantus jala bagas huhut torang diantusi
bangso i hata dohot tona ni Tuhan i. Laos borhat ma angka sintua ni bangso i jala dipasahat
nasida ma hata ni Tuhan i, gabe ro ma bangso i mangalusi: "Saluhut na pinaboa ni Jahowa
bahenonnami ma." Jadi marpungu ma muse sintua ni bangso i paboahon tu si Musa angka alus
sian bangso Israel i, na rade do bangso i manjalo jala mangulahon hata ni Tuhan i. Laos borhat
ma muse si Musa mamboan alus na denggan sian bangso i tu Jahowa tu dolok Sinai i.
Marhite na masa i naeng taantusi, haunduhon dohot roha pangoloion do dipangido Tuhan
i sian bangso Israel. Laos songon i do na dipangido Tuhan i sian hita angka na porsea di Ibana.
Naeng marsihohot hita mangoloi hata ni Tuhan i di bagasan gulmit ni ngolunta. Ai anak dohot
boru hasianNa do hita, na dipatau gabe parjambar di pasupasu dohot hasonangan na
dibasabasahonNa tu hita. Ala ni i naeng jongjong ma nian hita gabe anak hasian, anak mata, na
mangantusi lomo ni roha ni Tuhan i. Unang ma songon anak somang manang hatoban, na dao
rohana sian Tuhan i. Ai nunga godang situtu asiasi na dipasahat Tuhan i tu hita, tajalo jala tadai
ma i di bagasan roha mauliate huhut taargahon di bagasan roha pangoloion di adopan ni Tuhan i.
Amen.
Minggu 3 SET. TRINITATIS, 25 JUNI 2023
EVANGELIUM : MATEUS 10 : 32 - 39
TEMA : MANGIHUTHON JESUS JALA MAMORSAN SILANG (MENGIKUT YESUS
DAN MEMIKUL SALIB)

Huria ni Tuhannta na hinaholongan di bagasan Jesus Kristus, songon halak Kristen hita naung
tardidi tu bagasan goar ni Debata Ama, Anak dohot Tondi Porbadia, ndada holan na umbege boti
hita alai ingkon tarida do i di bagasan ngolu siganup ari. Jala umarga sian i muse Barita ni Jesus,
ingkon marparbue marhite panindangion haporseaon. Ingkon marsihohot do halak na porsea tu
Barita Nauli i, jala ingkon tagamon do panghorhonna (konsekuensi) molo dung porsea ibana.
Ima mangadopi angka parungkilon, siteanon, hamaolon, nang hasusaan pe ingkon tagamon do
molo dung dijangkon Jesus Kristus di ngoluna.
Mateus bindu 10 on ima taringot tu panjouon jala dipaborhat Jesus do sampuludua
siseanNa i laho mangalo dompak angka tondi na hodar, laho pabalihonsa, jala laho pamalum
nasa sahit dohot tihas (ay.1). Diuduti ma muse di turpuk on, Jesus na paboahon sitaononNa
dohot poda na giot mangihuthon Ibana. Jala ndada holan sitaonon ni Jesus sandiri, di pudian ni
ari dohot do nang angka sisean i marsitaonon ala ni Kristus. Ala ni i do marhite turpuk jamita on
laos dipaingot do angka siseani asa paradehon dirina tu angka parungkilon na ingkon bolusonon
nasida.
Sasintongna mansai maol do antusan ni halak Gorik taringot tu Barita Na uli na binoan ni
Jesus i. Jala partuktuhan (sihailahononhon) do i di halak Jahudi. Ai maila do nasida
maghatindanghon “Debata na gabe jolma" (inkarnasi), tarlumobi ma hadirion ala na tinanda
nasida ima Jesus sian Nazaret i,haleaon do i dietong roha nasida. Ndang tarjalo ni pingkiran ni
halak Gorik manjalo haluaon marhite sahalak jolma laos huhut Debata na margoar Jesus. Alai
nang pe songoni, na ingkon do por-sea nasida di Barita Na Uli i,ai i do haluaon.
Huria ni Tuhanta na hinaholongan di bagasan Jesus Kristus,di ayat 34-37 didok do hata
“Panirangon”, sasintongna hata na suhar do i sian hadameon. Marhite hata on tangkas do naeng
didok tu angka na naeng mangihuthon Jesus Kristus, ndada holan laho pamenakmenakhon jolma
haroro ni Jesus tu portibi on. Dung ditangihon jolma i Ibana, tarhalomong ma angka na torop i.
Mangihuthon hata ni Jesus on, ingkon tangkas ma alusanta panjouon ni Jesus, jala unang
dangoldangol sisilon.
Sipata ro do tu angka na porsea hamaolon molo mangihuthon Jesus Kristus, na boi ma i
pola tubu parsalisian angka ma markeluarga. Tutu, ndada na giot roha Jesus laho manirang
sasahalak tu keluargana sandiri, alai naeng tangkasan ni Jesus do marhite haporseaon tu Debata,
ringkot do parsitutuon laho mangalusi/merespons Barita Na Uli, ima paangalaho na mansai borat
na boi niadopan angka na porsea tu Ibana.
 Huria ni Tuhannta na hinaholongan di bagasan Jesus Kristus, nunga dipatandahon Jesus
hadirionNa tu angka sisean, jala ala halongangan na pinatupa ni Jesus gabe torop ma jolma
naeng mangihuthon Ibana. Marhite turpuk jamita on tung mansai tangkas dipaandar Jesus angka
dia ma na ingkon siboluson ni angka sisean laho mangihuthon Ibana, ima:
Mansoadahon Diri, namarlapatan ma i na rade mamelehon dirina hibul tu Debata.
Naolo patujolohon Tuhan i (memprioritaskan) di bagasan ngoluna sian kepentinganna sandiri.
Jala dipatuduhon angka na porsea i ma marhite ngolu sipangoloi di Hata ni Debata sian na
mangoloi sangkap, roha nang pingkiran-na sandiri. Astuanna, molo adong halak na mambahen
hansit rohanta, boi do ro panghilalaan na muruk, manghosomi, dohot roha naeng mambalos. Alai
molo nunga gabe siihuthon Jesus, ndada ulahononta be angka sisongon i. Taingot ma, natarjou
do hita songon Kristus i manesa nasa dosanta, laos tarjou do hita manesa dosa nang hasalaan ni
dongannta jolma tu hita.
Mamorsan Silang, godang do halak na mandok molo tahatai mamorsan silang, na
marlapatan ma i mangadopi parungkilon. Haporseaon ni halak Kristen mandok, ia silang ni
Tuhan i ima: mangulahon lomo ni roha ni Debata. Ala ni i dohononta ma ia silang na ingkon
porsanonta, i ma lomo ni roha ni Debata na naeng siulahononta. Mangolu pe hita di portibion na
laho mangulahon lomo ni roha ni Debata do, ndang lomo ni rohanta sandiri. Asa boi taporsan
silangnta i ingkon soadahononta ma dirinta, i pe asa tulus sangkapni Debata di bagasan ngolunta.
Huria ni Tuhannta na hinaholongan dibagasan Jesus Kristus, mamorsan silang, lapatanna
ima rade mangadopi hamaolon dohot parsorion na umborat ima agoan hosa laho mangihuthon
Jesus. Tung aha pe na masa di bagasan parngoluonna, tung resiko aha pe i, dohot angka bentuk
pengorbanan, tung di bagasan situasi na songon dia pe, mamor. san silang i ma na marlapatan ma
i laho maghatindangkon dirina songon siihuthon Jesus. Jala di bagasan situasi na songoni, molo
tongtong mar-sihohot do hita di haporseaon tu Jesus Kristus, na lehonon ni Tuhan i do dalan
hangoluan dohot hagogoon tu hita.
Huria ni Tuhannta na hinaholongan di bagasan Jesus Kristus, mangihuthon Jesus ndada
sada pillhan alai sada panjouon do on, namarlapatan ma i natarjou do hita gabe silhuthon Ibana
ala tahaporseal do Ibana ima dalan tu hangoluan na saleleng lelengna. Molo naeng gabe
siihuthon Jesus, ingkon rade do tong paubahon roha, pingkiran nang pangalaho dohot parangena
homba tu na hinalomohon ni Debata. Ala adong do deba halak Kristen mandok dirina siihuthon
Jesus, asa dao ma sian angka sahit, molo ro pe angka sahit pintor malum ma, dao sian hasusaan,
ngoluna lam gabe, lam mamora, sinur na pinahan gabe naniulana. Ima songon pangantusion ni
gerakan New Age Movement (gerakan zaman baru). Dao ma angka pangantusion na sisongon on
sian angka siihuthon Jesus.!
Huria ni Tuhannta na hinaholongan dibagasan Jesus Kristus, di pardalanan ni ngolu ni
angka na porsea tu Kristus Jesus, naeng do rajuman na mardalan do ibana raphon Jesus nanaeng
pasahathon diriNa tu Debata, ndada tu sangkap ni portibi on. Ala ni i do tarjou do ganup angka
siihuthon Jesus asa marsihohot tongtong jala satia di ngoluna tung aha pe na masa, arsak,
sitaonon, parmaraan, hamaolon, hasusaan, ndada na gabe sumurut ibana mangihuthon Jesus
molo mangadopi angka na sisongon i.
Mangihuthon Jesus ingkon patuduhononta ma i marhite sikap pangoloion, unduk dohot
serep ni roha mangulahon lomo ni roha ni Debata. Songon haunduhon ni Jesus Kristus tu Debata
Ama i, sadalan na nidok ni Apostel Paulus di Pilippi 2:5- 11, songon parrohaon ni Kristus ma
parrohaonmuna.! Atik pe rupa ni Debata di Ibana, alai dirumari do diriNa jala disolukkon rupa ni
hatoban, gabe suman tu jolma pardosa do Ibana jala rumang ni jolma dapot di lbana. Dipatutoru
do diri-Na, na gabe pangoloi do Ibana pola tung mate tarsilang! Ala ni i do dipatimbo Debata
Ibana jala dibasabasahon tu Ibana Goar na sumurung asa nasa goar, asa marsomba tu Goar ni
Jesus Kristus nasa ulu ni tot, na di banua ginjang i dohot na di tano, nang na ditoru ni tano, jala
asa nasa na marsoara marhatopothon: Jesus Kristus do Tuhan, bahen hasangapon ni Debata
Ama. Amen.