LITURGI I :PANOMPAON : PHD TARUTUNG KOTA

Pdt.J. Sihotang (Dohot Keluarga)

Ai manghuling Ibana gabe manjadi do, mandokkon do ibana jadi jongjong ma. Molo binereng dompak langit
di borngin ni ari, adong ma bintang na marhilophilop. Mansai uli jala dame situtu idaon gabe dohot roha dame
marnidasa.

Molo ro manogot ni ari, idaon ma binsar mataniari mamboan sondangna paboahon naung manogot ari jala di
na sundut muse ibana paboahon naung borngin. Sipata ro ma udan mambahen lambok saluhutna. Hamu angka
dongan, ise do na binoto hamu mambahen asa adong sisongon i?

St. N. Manalu(Dohot Keluarga)

Molo nirimangrimangan parngoluan on. Sian na tubu hita di portibi on, dungi magodang ma. Marsiajar
mangalangka, marsiajar manghatai, sahat ma tu tingki saonari. Adong do hita naung matua, adong na poso,
adong na dakdanak.

Molo nirimangrimangan angka dongan, boi do holan gogo ni sipangaon manang ala ni siadongan boi sahat hita
tu tingki saonari? Hosa, hahipason, parsaoran, hagogoon dohot roha na pantas sian dia do dapotta i, jala ise
do na sumarihon i tu hita?

Ny. St. A. Simamora/ br. Sinaga (Dohot Keluarga)

. Angka suansuanan mamparbuehon angka na di ibana. Gabe angka na niula sinur angka na pinahan. Taruli
hagabeon dohot parhorasan ma angka jolma di ngoluna.

Angka partigatiga dapot angka silaniroha sian na partigatigaonna, angka parhauma dapotan silasniroha sian
haumana, angka pangula, angka pande, angka siboan sigilingiling dapotan silasniroha sian na niulana nang
songon i na mangula di pamarenta sude angka pangula jala parhobas dapotan silaniroha sian saluhutna i.
Antong sian gogonta do i dapotta angka dongan? Ise do na jumadihon jala parrohon angka silaniroha i angka
dongan?

Ny.St.B. Lumbantoruan / br. Manalu (Dohot Keluarga)

Ro galumbang, ro alogo, udan potir, angka sillam dohot ronggur. Na gogo do i saluhutna jala boi manegai
angka na di humaliangna. Ise do tahe mambahen saluhutna i?

Adong do na umgogo sian angka galumbang nang alogo dohot udan potir nang songon i angka sillam dohot
ronggur? Molo adong ise ma i angka dongan?

St. I. Panggaben (Dohot Keluarga)

Tano hapeakhan jala mangalehon mangan angka gilokgilok dohot angka na tinompa ditoru dohot di atas ni
tano.

Aek mangalehon mangan angka dengke dohot angka na tionmpa di aek, jala jolma dapotan hangoluan
marhite parbue ni tano nang angka na di bagasan aek. Ai ise do mula ni saluhutna na masa on?

St. A. br. Panggabean (Dohot Keluarga)

Marmula do na uli marbona do na denggan, marmula do angka na uli jala marbona do saluhut angka na
denggan. Boto ma ale angka dongan! Di mulana i nunga adong hata i, jala marhite Hata i, ditompa
dimulanimulana ditompa Jahowa do langit dohot tano on.

Jala ditompa do nasa na uli jala denggan. Dame do sude na tinompa, jolma i pe mardame dohot dirina, nang
dohot humaliangna. Marhasonangan jolma i rap dohot angka na tinompa.
St. J. Simanullang (Dohot Keluarga)

Jahowa do mula ni saluhutna i angka dongan. Ibana ma Debata Panompa saluhut angka na denggan jala
singkop do sude na tinompa i. Marhasonangan do jolma i rap dohot angka saluhut angka tinompa.

Suansuanan marlasniroha patuduhon parbuena, angka pahanpahanan marlasniroha mangalului siallangonna.

Uli na i tahe molo jumpang sisongon i di tingki sadari on.

St. I. Simatupang (Dohot Keluarga)

Debata do manggomgomi, langit dohot tano on, haholomom digomgomi dohot hatiuron on, dirajai tanganna i
nasa na tinompa i.
Tung mansai bagak do angka hauma jala ida ma tung mansai rade jala uli do ditompa Debata angka duhut
duhut dinalaho sipanganon ni angka binatang na manggulmit.

St. J. Sitanggang (Dohot Keluarga)

Angka langit do mamaritahon hamuliaon ni Debata, jala jadijadian ni tanganna do pinaboa ni na rata-rata
ni langit, masipaboaan do angka ari, jala masilehonan parbinotoan do angka borgin.
Sian topi ni langit do habibinsarna jala tolhas ro di angka topina muse parhusorna i, jala ndang adong na
buni maradophon mohopna i.

Liturgi Ib : PHD TARUTUNG KOTA

Urut Nama Ayat

1 Cal. St. F. Sinaga / Kel Psalm 89:9+12-13
2 Cal. St. SImanjuntak/Kel Jes 40:28 ,Jes 41:20
3 Op. Maranatha br.Panggabean/Kel Jes 42:4-5
4 Tn. Hutabarat/Kel Jes 43: 15, Jes 45:7
5 Ny. Pasaribu/br. Tobing/Kel Jes 45: 8 +12
6 Ny.Pdt.S.Simamora /br.Aritonang/Kel Jes 54:16, Jes 57:19
7 Ny.D.Sihotang /br. Manalu/Kel Jes 65 :18
8 Op.Vito br Simatupang/Kel Amos 4: 13
Liturgi 2 : HADADABU NI JOLMA TU DOSA : PHD SIPOHOLON

St.T.Simanungkalit (Voorganger) Dohot Keluarga

Hamu angka dongan, mansai uli jala singkop situtu do sude angka na dijadihon Jahowa, jala naeng ma angka
na nitompana mian di hasonangan rap marparsaoran dohot Debata. Alai dia ma tahe, sai busisaon do sibolis
molo marhasonangan hita jala tonggi parsaoranta dohot Debata. Dibahen sibolis do ragam dalan boha ma
asa sega parsaoran na denggan i di jolma dohot Debata na Manompa i. Antong sian dia do mula ni sibolis?

Ny. St. L.M Situmeang/br. Sianturi Dohot Keluarga

Si bolis i, ima surusuran na maralo dompak Debata. Surusuruan na tinompa ni Jahowa alai ndang olo unduk
di aturan na masa hombar tu na pinatikhon Debata. Diuhum Debata do surusuruan i, jala dang dapot
hasonangan be sibolis i ala mansai susa do hadirionna nang pe sonang di hapataronna. Boto ma angka dongan,
portibi on ima ampuna ni Debata jala saluhut angka na tinompa ni Jahowa, Debatanta ingkon do marguru tu
Ibana saluhutna. Sude nunga diaturhon asa atur saluhutna. Alai molo na so olo diatur jala mian di aturan i,
nda tung dapot hasonangan disi.

Ro do sibolis i na mian di rupa ni ulok. Ulok do na umbisuk sian nasa na manggulmit di ladang, angka na
jinadihon ni Debata Jahowa alai laos marhite ulok i do na dipangke sibolis i manegai parsaoran jolma dohot
Debata i, asa dialo jolma tona manang hataNa na Badia i.

St. H. Siregar Dohot Keluarga

Dirimpu parhunihan hape pargadongan, dirimpu parsaulian hape hamagoan. Ido na masa tu jolma na parjolo
i. Mansai tonggi angka elaela ni sibolis pangagoi i boha ma asa diulahon jolma angka na maralo tu naung
pinatikhon Jahowa tu nasida. Dibagabahon Jahowa do hangoluan tu jolma i, alai hasonangan parsatongkinan
na dibagabagahon sibolis i do dihalomohon jolma i. Dangol nai ngolum i ale jolma. Tumagon do hape
hasonangan parsatongkinan na marhapatean tu hamagoan dohot hamatean do dipillitho sian hangoluan na
sian Jahowa.

St. L.br Sinaga Dohot Keluarga

Alai dia ma tahe, roha na manolsoli pe ndang jumpang di ngolu ni jolma i. Sai pasintongsintonghon diri do
jolma i, jala mansalahon angka na asing. Ibana do na mambahen gabe mardosa ahu, manang huulahon dosa i,
ninna. Ise na mardosa manang na mangulahon dosa ingkon do hona uhum. Jala ndang dapot hasonangan ni
roha dohot hasonangan tondi di angka siulahon dosa, jala dang boi sipardosa mian di inganan habadiaon ni
Jahowa.

St.Hutauruk Dohot Keluarga

Mate do jolma i dung dipangan parbue na dipatikhon Jahowa asa unang dipangan i? Ido. Tutu do mate jolma
i. Mate di partondion, mate di parsaoran na denggan i. Dipalao do jolma i sian porlak na gok las ni roha,
porlak na jumpang hadameon dohot angka na denggan, so jo jadi masa disi angka iluilu; porlak na gok haulion
na sian Jahowa. Masuk ma jolma i tu porlak na gok hasusaan, gok iluilu dohot arsak; porlak na masa parmusuon
dohot parbadaan; porang, porlak na na di bagasna dang dapot hasonangan ni roha dohot tondi. Godang elaela
mangalehon hasonangan ni daging alai hamagoan tu tondi.

St. T. Simanungkalit Dohot Keluarga

Aha be jambarmu ale jolma? Hamatean jala hamagoan ma jambarmu. Dilehon do patik hangoluan tu ho, alai
hamagoanmu do dipillit ho marhite na mangulahon dosa i. Dilehon na denggan tu ho, alai ndang tarjalom holan
manggohi na di roham dohot di pingkiranmu sandiri.

St. E. Sihombing Dohot Keluarga

Ndang adong na tigor nanggo sada, ndang adong na marroha, na usouso di Debata. Saluhut jolma nugga
manimbil, tung sange do nasida marroha mago ndang adong sibahen na denggan naggo sada,
Sai manumpak ma Ho ale Jahowa ai nungga lam moru angka na daulat marroha i, lamotik do manisia, angka
na burju marroha, na so hasea i do dihata i be dohot donganna, marbibir na landit, jala mardua roha nasida
mangkatai.

Cal. St.br. Hutauruk Dohot Keluarga

Saluhut do manisia sumurut, tung sange do nasida marroha mago, ndang adong sibahen na denggan, nanggo
sahalak.

Dibagasan jolma mangkuling pangalaosian tu parjahat i : ndang marhabiaran tu Debata be roha ni jolma
jala jumojotan do manisia di elaela simalolong na dinalaho mangulahon angka na jat.

Cal. St. Sidabutar Dohot Keluarga

Hamoraan, hagabeon dohot hasangapon i do na pinarsinta ni halak Batak, Toho tutu namora do luhut halak
batak alai tung mansai godang do angka HOTEL jongjong di hita. Hotel ima; hosom, teal dohaot late, da
hinorhon ni dosa saluhutna i ???

St. R. br.Situmeang (Dohot Keluarga)

Soara ni Tondi ni Tuhanta i jot-jot dilaosi, ditulak ho i. Sai tanda jeamu, pauba roham, dapothon
Tuhanmu, si sesa dosam. Tarsoar ho mardosa, manurut lomom, tung unang datdati, sai alo langkam.
Dompakkon Tuhanmu, Pargogo do i, manesa, pamalum sude dosami

Tambahan Molo Hurang

1 2 Musa 23 : 21 8 Psalm 65 : 3
2. 2 Musa 34 : 7 9 Psal 103 : 12
3. 1 Sam 2 : 24 10 Poda 10 : 12
4 1 Raj 8 : 50 11 Poda 28 : 24
5 Job 7 : 21 12 Poda 29:16
6 Psalm 25 : 7 13 Hes 14 :11
7 Psalm 51 : 3 14 Mika 3 : 8
Liturgi III : BAGA BAGA HARORO NI SIPALUA

1. St. Drs.B. Sirait Dohot Keluarga

Mansai holong situtu do Jahowa marnida jolma na ditompa tumiru rupaNa tudos tu pangalahoNa i.
Nang pe naung terrimas Jahowa marnida angka hajahaton manang dosa angka ni niula dohot dipingkiri
jolma, alai tung na so tarbunihon do holon ni rohaNa. Diungkap do tingki parasinorahon tu jolma i,
boha ma asa mulak ma jolma i tu hangoluan, jala asa unang marisuang angka ngolu ni jolma i di ngoluna
be.
Dipillit Jahowa do angka panurirang laho mambaritahon taringot haroro ni Sipalua, asa unang be
hamagoan ujung ni jolma i, alai ingkon do mulak muse songon panompaon na parjolo i, ima mulak tu
tumiru ni Jahowa Debata, tudos tu pangalaho ni Jahowa Debata.

2. St. Dr. S.R Sitompul dohot Keluarga

Ro do hata ni Jahowa marhite panurirangNa si Jesaya asa dipaboa tu angka jolma manang bangso na
hinaholonganna mandok: Ndang dope sae hamu pauruuruhon jolma, dohot do Debatangku naeng
lojaanmuna. Dibahen i apala Tuhan i sandiri ma mangalehon sada * tanda di hamu: ** Ida ma,
gabegabean ma sada namarbaju, jala tumubuhon sada anak, jala bahenonna ma goarna: * Immanuel.
Sihapor dohot situak ni loba panganonna, paima diboto mambolongkon na jat, jala mamillit na denggan.
Ai * tagan so diboto dakdanak i dope mambolongkon na jat, jala mamillit na denggan, * tarulang ma
tano i na nirajaan ni na dua raja hinabiaranmu i. Boha do rohanta manomunomu haroro ni Immanuel i
angka dongan?

3. St. P. Panggabean Dohot Keluarga

Laos didok do muse: Bangso na mardalani di bagasan haholomon marnida sada panondang na bolon.
Binsar do sada panondang di angka na mangingani tano linggoman ni hamatean. Ai nunga tubu di hita
* sada posoposo dilehon tu hita sada Anak, pampe tu ** abarana do sogot harajaon, jala bahenonna
goarna: Sipartahi * Halongangan, ** siulubalang ni Debata, Ama saleleng ni lelengna, Raja ni
hadameon.
Bahen hagaganda ni harajaon dohot * hadameon na so marujung di * habangsa ni si Daud dohot di
harajaonna i, pahothon dohot patoguhon marhitehite patik dohot hatigoran, olat nion ro di
salelenglelengna.”

4. St. A.Br. Sinaga Dohot Keluarga

Boto ma angka dongan, nda tung disangkapi Jahowa jolma i ditompa asa hamagoan manang hamatean
ujung ni ngoluna manang hapatean ni ngoluna.
Panurirang Sakaria mandok: Mariaia situtu ma ho, ale boru Sion, marolopolop ma ho ale boru
Jerusalem! Ida ma, na ro ma rajam tumopot ho, partigor ibana jala siparmonang; na serep do rohana
jala marsihundul di halode dohot di anak ni halode inaina. Beta hita parsidohot di parolopolopon dohot
di hariaon ni angka ni asian ni Jahowa.

5. St. G. Panggaean Dohot Keluarga

Nunga mandate roha ni bangso paimahon haluaon sian Debata, ai tarbuang do bangso Israel ala ni
dosana, masihol bangso Israel mulak tu bona pasogitna tu huta Jerusalem, asa sumuang muse
marsaor nasida di Bagasjoro. Sai hira na ditadinghon Debata do panghilalaan nasida, alanii
maimaima do bangso i di haroro ni Mesias Sipalua i.

Alai didok Debata marhite angka panurirangNa; apuli, apuli hamu ma bangsoKi, ninna Debatamuna.
Hata apulapul ma dok hamu tu roha ni isi ni Jerusalem, jala jouhon hamu ma tu nasida Nunga
marujung parungkilonna, ai nunga salose dosana i, ai nunga dijalo sian tangan ni Jahowa silompit dua
singkat ni saluhut dosana.
6. St. Saragih Dohot Keluarga

Ro do Hata ni Debata tu panurirang Jesaya mandok : tung sura rara dosamuna songon abit bunga
dapdap, bontar do bahenonku songon itak; nangpe rara songon abit hasumba, gabe songon hapas do
muse.

Di ari na sasada i sogot, uli jala marmulia tunas ni Jahowa, gabe huhut uli parbue ni tano i di angka
na malua sian Israel.

7. CSt. M. Simamora Dohot Keluarga

Ai ndada pingkiranKu, pingkiranmuna i, jala ndada dalanmuna angka dalanKu, ninna Jahowa. Tagan
diparpiar ni murukKu Hutabunihon do bohingKu satongkin maradophon ho, alai marhitehite denggan
basa salelenglelengna asianKu ho, ninna Jahowa sipalua ho.

Alai anggo ho huta Betlehem Eprata, mametmethu do ho nian anggo tung pola jujuron tu angka huta
marriburibu di Juda, hape sian ho do haroroan ni na gabe panggomgomi ni Israel, jala angka
haroroanna sian na hinan, sian angka ari na robi salelenglelengna.

8. St. M. Sitanggang Dohot Keluarga

Ida ma, gabegabean ma sada na marbaju jala tumubuhon sada anak, jala bahenonna goarna :
Immanuel. Hehe ma ho, marsinondang ma ho, ai na ro ma panondangmu, jala hamuliaon ni Jahowa
binsar di atasmu. Alani pauli hamu dalan ni Jahowa, patigor hamu di adaran dalan balobung ni
Debata.

Ingkon gohan do nasa rura, jala parejeton nasa dolokdolok dohot buntulbuntul, jala gabe na hornop
do na marnangkok tuat, jala gabe rura tanggurung ni dolok.

9.Ny. St. G. Sinaga(+)/br. Hutagaol

Jongjong do anggo Ibana, jala marmahan mangasahon gogo ni Jahowa, marhitehite hamuliaon ni
goar ni Jahowa Debatana; jadi maringan ma nasida, ai timbul ma ibana disi ro di angka ujung ni tano
on. goaron do ibaNa Kristus, Raja Sipalua Saluhut hajolmaon sian nasa Dosa dohot hamatean.

10. Ny. St. Saragih/ br. Silaban (Op. Marune)

Patuginjang ma tohangmuna, hamu ale angka harbangan, jala patuginjang ma hamu, ale pintu sian
robi, asa bongot Raja ni Hamuliaon I !

Ise ulaning Ibana, Raja ni Hamuliaon I ? ima Jahowa Zebaot, Ibana do Raja ni Hamuliaon i.

Molo Adong na Hurang

Psalmen 24 : 7-8
Psalmen 110 :4
Yesaya 11 : 1-2
Maleaki 3: 1-2
Liturgi IV : HATUTUBU NI SIPALUA : PHD PAGAR BATU

1.Vic Pdt. B. Girsang, S.Th

Gabe daging ma Hata I jala maringan di tongatonga ni hita on, jad huida hami mahasangaponNa, I ma
hasangapon ni Anak sasada na sian Ama I, gok asi ni roha dohot hasintongan.

2. Op. Jeremia Dohot Keluarga

Nunga rap hita mambege angka dongan taringot tu baga-baga haroro ni Sipalua i, ima Immanuel. Alai
boha do partording ni masa angka dongan? Na tubu do Sipalua i di bagas ni na gok hamoraon manang
sian ripe na gok arta?

Nda tung di bagasan parripeon na mora manang sian keluarga na harajaon ibana tubu angka dongan. Alai
ro do ibana dibagasan haserepon. Tubu sian sada na marbaju na margoar si Maria, naung gabegabean
sian Tondi Parbadia.

2. Op.Kiel Simamora Dohot Keluarga

Bege ma angka dongan asa hupaboa partording ni haroro ni Sipalua i. Di paonombulanhon naung dapotan
hangoluan si Elisabeth naung hol i, ima jolma ni malim Sakaria ro ma surusuran na margoar Gabariel
mandapothon na marbaju na margoar si Maria.

3. St. Lumban tobing Dohot Keluarga

Ndada sian sangkapsangkap manang pangulahon ni jolma hatutubu ni Immanuel i angka dongan, alai
dapotan tua do si Maria i, ndang marhasotan.
Didok surusuruan i ma tu na marbaju i, ima si Maria mandok: : Tabi di ho, na niasian! Didongani Tuhan i
ma ho! Alai tarsongot do si Maria umbege hata i, ninna rohana do, parsantabian dia do i ulaning? Jala
didok surusuruan i ma tu si Maria: Unang ho mabiar, ale Maria; ai dapotan asi ni roha do ho di Debata!

4. St. G. SImamora Dohot Keluarga

Gabegabean ma ho, tubuan anak ma ho; Jesus ma bahenonmu Goarna! Balga ma Ibana muse, goaron do
Ibana Anak ni Natumimbul i; lehonon ni Tuhan Debata do tu Ibana habangsa ni si Daud, amana i. Rajaanna
do pomparan ni si Jakkob salelenglelengna, jala ndang marhaujungan harajaonna i.

Didok si Maria ma mandok surusuruan i: Songon dia ma pangalaho ni i, ai so adong hutanda baoa. Jadi
dialusi surusuruan i ma nasida: Songgopan ni Tondi Parbadia ma ho jala linggoman ni hagogoon ni
Natumimbul i do ho; ala ni i na badia do dohonon na tubu i, Anak ni Debata. Ia si Elisabet, sisolhotmi na
sai tua i, naung digoar na hol, marhangoluan anak do; paonombulanhon ma nuaeng.

5. Cal. St. br. Hombing Dohot Keluarga

Ai ndang adong na so tarpatupa Debata. Gabe didok si Maria ma: Naposo ni Tuhan i do ahu. Sai saut
ma tu ahu songon na nidokmi! Dung i ditadingkon surusuruan i ma nasida. Di tingki i ma borhat si Maria
dipahatop ma laho tu dolok, tu huta Juda. Bagas ni si Sakarias do dibongoti, ditabi ma si Elisabet.

6. Cal. St. Lbn Tobing dohot Keluarga

Umbege tabi ni si Maria i si Elisabet manggunjal ma posoposo di bagasan bortianna, jadi gok Tondi
Parbadia ma si Elisabet. Laos marsoara na gogo ma ibana, dijouhon ma: Dapotan pasupasu do ho di
tongatonga ni angka ina; dapotan pasupasu do na pinarorotmi!

7. Bapak Donni Lumban Tobing dohot Keluarga

Marhua ma pola ro ina ni Tuhanki manopot ahu on! Ai disi dapot pinggolhu soara ni tabimi, manggunjal
do posoposo i di siubeonku, sian las ni rohana. Martua ma ho, ala dihaporseai ho, ingkon tulus na
tinonahon ni Tuhan i tu ho! Gabe didok si Maria ma: Dipatimbul rohangku do Tuhan i

Molo Adong na Hurang

Yohannes 1 : 1-3
Yohannes 1 : 4-5
Liturgi 5 : Kemuliaan :

Liturgi VI Psalmen 146:1-2 Pdt. Jinto Sihotang,M.Pdk

Liturgi VI Psalmen 145:1-3 St. N. Manalu
Liturgi VI Psalmen 145:9-10 St. Drs. B. Sirait
Liturgi VI Psalmen 145:18-19 St. T. Simanungkalit
Liturgi VI Psalmen 145:21 St. G. Simamora
Liturgi VI Psalmen 149:1-2 Vic.Pdt.B.Girsang, S.Th
Liturgi VI Psalmen 149:5-6 Pdt. K. Sinaga, M.Th
Liturgi VI Psalmen 150:1-2 dst
Liturgi VI Psalmen 150 : 3-4
Liturgi VI Psalmen 150 : 5-6