TATA IBADAH

NATAL SEKSI NAMAPOSO GKPS

2021

Tema:
Hasadaon pakon Pangidangion na Marbuah
(Kolosse 1:10)

Sub Tema:
 “Mangarahkon Kuria Marsitungkolan pakon
Marsipatoguhan ampa Marsipardiateian Mandompakkon
Paruntolon ni Goluh.”

A. PERSIAPAN
1. Prosesi (Jongjong Kuria)
(Sanggah prosesi, kuria mandodingkon Haleluya No. 315:1+3)
Sangap, sangap bani Jesus Tuhankin,
na roh do Ham hun surga hun rumah-Mu.
Sangap, sangap bani parroh-Mu hu tanoh on,
gabe doskon jolma Tuhan parholong in, sangap, sangap.

Ai ididah Majus do bintang-Ni in,

roh sidea manombah Tuhanta in.
Mas, hamonan, minak do na isombahkon in,
pasangap Rajanta siboan damei in, sangap, sangap.

2. Pagara Lilin
Na pagara lilin:
a. Siparambilan e. Ketua Seksi Namaposo
b. Siparagenda f. Ketua Seksi SM
c. Pengantar Jemaat g. Ketua Seksi Inang
d. Ketua Panitia Natal h. Ketua Seksi Bapa

B. KEBAKTIAN
1. Votum, Introitus, pakon Tonggo
P. Ibagas Goran ni Naibata Bapa, pakon Tuhan Jesus Kristus,
ampa Tonduy Napansing, Sitompa langit pakon tanoh on.
Amen.
Gabe daging ma Hata in anjaha marianan i tongah-
tongahta;
K. jadi ididah hanami ma hasangapon ni Anak sasada na
humbani Bapa in, gok idop ni uhur ampa hasintongan
(Johannes 1:14).
 P. Haleluya. Martonggo ma hita:
Ham Tuhan Naibata Bapanami, paridop ni uhur na
tarsulur. Puji-pujian, hasangapon pakon tarima kasih ma
isombahkon hanami hu Bamu, mardingat na dob isuruh
Ham Anak-Mu Jesus Kristus hubannami jolma. Gabe
madoyuk janah sombuh do Ia, tubuh i huta Betlehem bani
harang ni pinahan, ase gabe bayak hanami. Pasaor Ham
ma diri-Mu marhitei Tonduy-Mu, ase lambin ididah
hanami banggal ni pangkopkopon-Mu bannami marhitei
Jesus Kristus. Amen. (Hundul
Kuria)

2. Doding (Haleluya No. 317:1-2)

Martumpu ma hita malas ma uhurta, laho ma hita hu Betlehem.
Tonggor malekat mamuji Tuhanta.
Sai sombah puji Ia, sai sombah puji Ia, sai sombah puji Ia,
Rajanta in.

Mandoding ganupan malekat ni Tuhan, rap pakon jolma

mandoding ma.
Puji Tuhanta Sipaluah hita.
Sai sombah puji Ia, sai sombah puji Ia, sai sombah puji Ia,
Rajanta in.

3. Liturgi 1 (Bagah-bagah pasal Partubuhni Sipaluah)

P. Seng paturuton ni Naibata jolma in lalab ibagas
hagolapan, pangkorhon ni dousa in. Humbani buei ni
sitaronon na idompakkon jolma, pangkorhonni dousa,
ibagah-bagahkon Naibata do homa hubani jolma in
Sipaluah laho paluahkon sidea humbani hagolapan.
Bagah-bagah ai itongos Naibata marhitei nabi-Ni.
1. Halani ai bereon ni Tuhan sandiri ma bannima sada tanda,
ʻTonggor ma, boratan rumah ma sada anak boru, anjaha
tubuhkononni ma sada anak, anjaha bahenonni ma
goranni: Immanuel.ʼ Mantega pakon manisan do
 sipanganonni, paima ibotoh manulak na jahat ampa
mamilih na madear. (Jesaya 7:14-15)
2. Ai domma tubuh banta sada na etek-etek, ibere do banta
sada Anak, tampei bani abara-Ni do panggomgomion,
anjaha ibahen do goran-Ni: Paruhur Halongangan, Naibata
Parkuasa, Bapa sadokah ni dokahni, Raja Damei. Parrarat
ni harajaon-Ni ampa hadameion-Ni seng marpunsa ai bani
hotak ni si Daud ampa bani harajaonni, halani ipatotap
anjaha ipatoguh do ai marhitei uhum pakon hapintoron
humbani sonari nari ronsi sadokah ni dokahni. Simburu ni
Jahowa Zebaot do mambahen sonai. (Jesaya 9:5-6)
3. Dob ai mandarat ma sada tunas humbani tutuho ni si Isai,
anjaha marbuah sada tumbor na roh humbani uratni.
Sogop ma hubani Tonduy ni Jahowa, Tonduy hauhuron
ampa pangarusion, Tonduy panuturion ampa hagogohon,
Tonduy habotohon ampa biar bani Jahowa. (Jesaya 11:1-
2)
4. Tonggor ma, ibagas hapintoron marrajai sada raja, anjaha
pambobai romban hubani habonaron manggomgom.
Anjaha ganup sidea songon parlingodan humbani logou
madoras do, songon panisioan humbani haba-haba,
songon bah mardalan bani tanoh na horah, anjaha songon
linggom ni dolog batu na banggal i tanoh dorging-dorging.
Jadi seng be tutupon mata ni halak na marpangidah,
anjaha tangi do pinggol ni halak na marpanangar. (Jesaya
32:1-3)
5. Pateleng pinggolnima, anjaha roh ma hanima hu Bangku!
Tangihon ma, ase manggoluh tonduynima! Bahenon-Ku
do bannima padan sisadokah ni dokahni, ai ma idop ni
uhur na bani si Daud, na manongtong in. Tonggor ma,
Hubahen do ia gabe hasaksian bani bangsa-bangsa, gabe
raja pakon panggomgom bani bangsa-bangsa. (Jesaya
55:3-4)

4. Doding (Haleluya No. 32:1-2)

Riap ma hita haganup mamuji Naibata.
 Mesek ma pandodingta rup, ai in do na tama, ai in do na tama.

Iungkab Naibatanta in nagori atas in.

Isuruh do Anak ni in, Hagoluhanta in, Hagoluhanta in.

5. Liturgi 2 (Partubuhni Sipaluah)

P. Hatengeran ni uhur do Naibata. Igoki do padan-Ni hubani
jolma in. Haganupan ai ibahen Naibata aima halani sihol
ni uhur-Ni ase dapotan haluahon jolma in marhitei
partubuh-Ni Sipaluah, in ma Jesus Kristus.
1. Jadi roh ma ijia parentah humbani Kesar Augustus, ase
isuratkon sagala jolma na ibagas gomgomanni. Panuratan
na parlobei ma ai, sanggah si Kerenius manggomgomi
tanoh Siria.
2. Jadi misir ma haganup, ase isuratkon, ganup hu huta
hasusuranni bei. Misir ma homa si Josep hun Galilea, hun
huta Nasaret, laho hu Judea, hu huta ni si Daud, na
margoran Betlehem, halani hun marga ampa humbani
ginompar ni raja Daud ia. Laho ma ia pasuratkon dirini
rap pakon si Maria, tunanganni ai, na dob boratan rumah
ai.
3. Anjaha sanggah na ijai sidea, jumpah ma panorangni
tubuhan tuah ia. Jadi itubuhkon ma anak bunga tubuhni,
ibaluti ma bani ampan, anjaha ipatibal bani panggagatan,
halani seng dong ianan bani sidea i rumah parbornginan.
Jadi adong ma parmahan marborngin i sampalan na bani
ianan ai, manjagai pinahan ni sidea.
4. Jadi roh ma sada malekat marayak sidea, anjaha
marsinalsal ma sangap ni Tuhan inggot sidea, gabe mabiar
tumang ma sidea. Tapi nini malekat ai ma hubani sidea,
“Ulang mabiar hanima! Tonggor ma, ai ambilan malas ni
uhur banggal do huboan bannima, parulihan ni ganup
bangsa. Ai domma tubuh bannima saborngin on, i huta ni
si Daud, Sipaluah in, in ma Kristus Tuhan in!
5. On ma partinandaan bannima: Jumpahonnima do sada na
etek-etek, ibaluti bani ampan, tibal bani panggagatan.”
 Jadi sompong adong ma hasoman ni malekat ai, buei bala
parnagori atas, ipuji sidea ma Naibata, nini ma,
“Hasangapon ma bani Naibata na i babou, damei ma i
tanoh on bani jolma hinarosuhkon-Ni in.”
6. Dob laho malekat ai humbani sidea dompak nagori atas,
nini parmahan ai ma samah sidea, “Laho ma hita hu
Betlehem mengidah na masa ai, na pinabotohkon ni Tuhan
in banta.” Jadi podas ma sidea laho hujai, anjaha jumpah
sidea ma tongon si Maria ampa si Josep ampa Dakdanak
ai ibagas panggagatan. Ase dob ididah sidea Ia, ipatugah
sidea ma sahap na dob ihatahon bani sidea pasal
Dakdanak ai.
7. Anjaha haganup na manangar ai, longang bei do pasal na
hinatahon ni parmahan ai bani sidea. Ia si Maria
iparimbagaskon do haganup hata ai, anjaha ipingkir-
pingkiri ibagas uhurni. Mulak ma parmahan ondi,
ipasangap anjaha ipuji sidea do Naibata halani haganup na
tinangar ampa na nididah ni sidea, songon na dob
hinatahon hinan bani sidea.

6. Doding (Haleluya No. 41:1-2)

Domma jumpah use ari pesta in, partubuhon ni Tuhanta Jesus in.
Turun hape Ia roh hun surga in, roh manohu hujon.
Hasangapon bai Naibata damei-damei bani jolma.
Megah uhurni Naibata hajolmaon use.

Laita hita misir hu Betlehem in, sombah hita ma Dakdanak na

ijin.
Tinongoskon ni Parholong atei in, Naibata Bapa in.
Hasangapon bai Naibata damei-damei bani jolma.
Megah uhurni Naibata hajolmaon use

7. Refleksi Natal
P. Parroh ni Jesus Kristus hu tanoh on lang pitah
manghorhon haluahon hubani jolma, tapi dihut do homa
parrohkon malas ni uhur na banggal, tarmasuk hubani
 Seksi Namaposo GKPS. Age pe ibatasi Pandemi Covid-19
ope, totap do hita boi marmalas ni uhur bani Natalta on.
Partubuh ni Jesus maningon do mambahen tubuh homa
biak-biak na madear i tongah-tongah ni Namaposo, anjaha
ulang taruyun halani Pandemi na masa ope i tongah-
tongahta.
1. I toruh ni dolog Simarsolpah,
aima ianan parjumpahanta.
Domma tubuh Sipaluah,
aima Kristus Jesus Tuhanta.
2. Iroboh hayu sihala,
i lambung ni hayu tuba.
Ulang sangsi hita pala,
Jesus do hansa na talup isombah.
3. Paima marhorja ulang lupa mangan.
Salpu mangan, borhat ma hu tujuan.
Natal aima Naibata turun tangan.
Balosi hita ma marhitei na marsitogu-toguan.
4. Padan ni Tuhan Jesus aima padan na mantin.
Na marsinalsal bai hagolapan songon apuy ni lilin.
Age pe hita namaposo domma manjalo vaksin,
anggo protokol kesehatan ai totap ma disiplin.
5. Dolog Simarsumpit dohorhon ni bah Bolon.
Monkey Forest dohorhon Girsang Sipangan Bolon.
Age pe pandemi Covid laho gok ma dua tahun bolon,
Namaposo GKPS maningon boi monang ibagas sitaronon.
6. Iboli ma tilam sapaket pakon bantal,
sedo laho pakeion, tapi laho gabe siluah.
Tandani hita namaposo domma marnatal,
hasadaon pakon pangidangion maningon ma marbuah.
7. Tubuhan ma lata-lata,
dohorhon juma partidahan.
Selamat ari Natal ma hubanta,
sai tongtong ipasu-pasu Tuhan.

8. Galangan Pujian
 9. Doding (Haleluya No. 39:1-2)
Sonangni, bornginni in, sanggah roh Jesus in.
Sonang modom do halak ganup, dua mando napuho in rup.
Mangoromi Anak-Ni, Jesus Tuhanta in.

Dearni borngin in, sanggah roh Jesus in.

Bai parmahan i Betlehem in, ipatugah na hun surga in.
Domma roh Sipagoluh, Jesus Tuhanta in.

10. Ambilan

11. Doding Galangan (Haleluya No. 421:1-2)

Girah sogod golap ijin, misir do lao parmahan in.
Mangidah Kristus, songon tonah ni malekat in.
Ididah do ijin, ididah do ijin,
ididah na dob tubuh Sipaluah in.

Seng pala sangsi hita on, na marianan i na daoh.

‘Ge bangsa na i tanoh on, bogei ma hata on.
Sai eta ma tongon, sai eta ma tongon,
ai domma tubuh Kristus banta borngin on.

12. Tonggo Galangan, Tonggo Panutup, pakon Pasu-pasu

(Agenda GKPS – Jongjong Kuria)

C. PERAYAAN NATAL
1. Kata Sambutan
2. Persembahan Pujian
3. Ramah Tamah
4. Kata Penutup