LITURGI 3 PARTUBUH NI SI PALUAH

Prolog  : Bani na tubuh Jesus hu dunia on, parlobei do Malekat in manjumpahkon parmahan na
iparmahanan, patugahkon barita malas ni uhur in, bahasa domma tubuh tongon sahalak raja,
inma Raja Damei.

1 . Longang do tongon uhur mangidah partubuh ni dakdanak na marjuta-juta hu dunia on, tapi
lang dong ope na tangar songon pesta partubuh ni Jesus Sipaluah in. Tahun hu tahun bahat
tumang do bois panorang pakon habotohon laho mamestahon ari partubuh ni Jesus in.

2. Tongon do na hinatahonmu ai, tingki partubuh ni Jesus i huta Betlehem, laho do Parmahan na
iparmahanan manghamalaskon janah mambere panorangni laho mangidah tanda na ipatuduh ni
Malekat hubani sidea. Dob ididah sidea namasa ai, marsombah do sidea I lobei ni dakdanak ai,
aima Jesus in.

3. Sonai do homa Paruhuh na Hun Hapoltakan ai, misir do sidea hun huta ni sidea marhitei uhur
na bulus anjaha uhur na tongon masihol laho mangidah tanda-tanda bintang na i langit, anjaha
porsaya bani artini tanda ai.

4. Dob das sidea bani ianan na pinatuduh ni Tuhan in, aima harangni pinahan ianan partubuh ni
Dakdanak, Raja na baru tubuh in. Marsombah do sidea bani Dakdanak in ibagas unduk ni uhur,
lanjar ipadas ma omas, dahupa pakon mir.

5. Omas manggambarhon hasangapon ampakon hapansingon ni dunia on. Dahupa

manggambarhon unduk ni uhur na tongtong marsombah bani Naibata. Anjaha Mir
manggambarhon holong na roh humbani Naibata.

6. Lang halani banggal atap na etek ni Pesta Natal na siidahonta, tapi na porlu botohon aima
motivasi pakon dorongan ibagas na laho mamestahon Partubuh ni Jesus in do siparayakon.

7.  Anggo na legan do motivasi ni sasahalak ibagas na marnatal, lang na gabe malas ni uhur ai
bani hadirionni, tapi ra do gabe harugion ai bani paruhuran. Boi do ai gabe haila pakon halojaon
na roh hubanta, janah haroroh ni Tuhan in lang mararti bani uhurta.

8.   Halani ai, dear do namin pareksa hita ma dirinta marsada-sada, atap na dob salah do
motivasinta bei marnatal. Namin, songon panjalo ni Parmahan ai ma hita marnatal laho
marsombah bani Jesus, anjaha songon Paruhur na Hun Hapoltakan na mambere galangan na
mararga tumang hubani Jesus, aima uhurta, goluhta, ronsi keluarganta.