LITURGI NATAL HKBP BATU KAJANG

SENIN, 26 DESEMBER 2022

LITURGI I : HINAULI NI JADIJADIAN NI DEBATA

Prolog : Di pasahat Debata do nang huaso harajaon tu jolma i,, ai di pasahat Debata
do saluhut angka jadijadian na asing, nasa na tinompa ni Debata tu jolma i, asa di
radoti, jala di pauliuli hombar tu lomo ni roha ni Debata. Ala ni i molo pe boi
tarpatupa hita jolma angka na imbaru, naeng ta pangke i laho paulihon portibi on jala
hombar tu lomo ni roha ni Debata. Ai saluhutna sian Debata do i, songon i nang huaso
dohot parbinotoan i, sian Debata do i, Ai dang adong naso tarpatupa Debata.
1. Molo hutatap angka dolok dohot rura, tano dohot laut, molo huida langit rodi
sude isi ni portibi on, longang do rohangku marnida saluhutnai Dang
targombarhon denggannai dohot ulinai sude nasa na adong di portibi on.
2. Uju jumpang borngin na holom, ro do sondang sian ginjang, na mangalehon
hatiuron tu borngin na holomi. Sondang ni bintang nang bulan mambahen tiur
portibi on.
3. Salpu borngin na holomi, ro ma muse manogot ni ari, tarbege ma pidong na
marendeende, soara ni alogo na marngongos dohot manuk na martahuak
pabotohon tu jolma asa hehe manjalo ari na imbaru.
4. Ro ma muse sondang ni mata ni ari manondangi portibi on, asa boi jolmai
mangula ulaonna, asa mangolu nang angka suansuanan dohot duhut-duhut.
Saluhut maruli gogo sian sondang na tiur i.
5. Ulinai tahe saluhutnai. Ise do na jumadihoni? Ima napistar sian na umpistar, na
gogo sian na gumogo. Ibana do Debata na tumompa saluhutnai marhite
huasoNa. Ibana do Debata naung adong sian mulani mulana.
6. Olo tahe, tung so habilangan do jadijadian ni Debata. Tung tarpatudos ma angka
pambahenan ni Debata tu pambahenan ni jolma? Ai manghuling Ibana gabe
manjadi do, mandokkon Ibana jadi jongjong ma.
7. Jolma do na parpudi sahali di tompa Debata, jala andul, asing huhut lumobi do
panompaon ni Debata di jolma i sian angka jadi-jadian nasing na tinompa ni
Debata di portibi on.
8. Ndada holan i tahe, di tompa Debata do jolma tung singkop, so humurang di
pardagingon; marparnidaan, marparbinegean, marparnianggoan dohot
marpandaian, laho manghilalahon saluhut haulion ni angka jadijadian ni Debata
di portibi on.
9. Lobi sian i dope, ndada holan di pardagingon, dohot do nang di partondion. Ai
songgop do tondi ni Jahowa tu jolma i, ima; Tondi ni habisuhon dohot
hapistaran, tondi ni panuturion dohot hagogoon,. Tondi ni parbinotoan dohot
biar matadophon Jahowa.
10. Marhite panompaon ni Debata di jolma i, singkop di pardagingon dohot di
partondion,, targoar do jolma i gabe mahkota cipataan ni Debata, Ai di tompa
Debata do jolma i tumiru rupaNa jala tudos tu pangalahoNa.
LITURGI II : HINAJORBUT NI DOSA DI PORTIBI ON
Prolog : Sasintongna mansai uli do portibi on ditompa Debata. Dang adong na
hurang. Alai molo tabereng nuaeng, hira na mago do hinauli ni jadijadian ni
Debata i. Aha do ulaning mambahen i?
1. Ima tutu…. Mago ma tutu hinauli ni jadijadian ni Debata i ala gok dosa do jolma i.
Dao sian holong, alai holan hosom, late, pangiburuon, parbadaan, i do dipaulaula.
2. Di tongatonga ni na markeluarga pe jorbut do dosai. Ianakkon tu natuatua na
marbadai, na marhahamaranggi, mariboto tong marbadai, dang boi pajumpang.
Didia nama damei?
3. Dang dapot ma tutu dame, ala hita angka ina dang mardame dohot donganta ina,
bahkan sipata dohot amanta dohot ianakkonta pe dang boi hita masiantusan.
4. Dang holan i, hita angka ina jotjot lupa mulaulaon ala lalap manghatahatai, ipe
dang manghatai na ringkot. Ai holan donganta do na tapahatahata. Ujungna tubu
ma parbadaan.
5. Adong muse do hita on na papadothu mulaulaon, gabe lupa mamodai iananghon
tu lomo ni roha ni Debata. Marminggu pe dohot martangiang sipata dang sanga,
nda on do mambahen sega ngolunta dohot portibi on?
6. Ai hita pe angka ama jotjot dang taula angka tugasta ima songon malim di tonga-
tonga ni keluarga. Sasintongna ingkon hita do na mangajari ianakkonta
martangiang dohot Hata ni Debata, hape hita pe dang taboto i jala dang hea tu
gareja.
7. So holan i. Hita pe songon uluan di rumatangganta ingkon gabe tiruan do nian
pangalahonta, hape jotjot hita gabe partuktuhan di dongan saripenta tarlumobi
tu ianakkonta.
8. So holan i inang, bangso pe marporang maralohon bangso na asing, bahkan di
negaranta sandiri masibunuan do sama-sama hita, mambaen bom dohot
teror, songon na masa di Aceh, Maluku, Poso, dohot luat na asing.
9. Na jumorbut dope angka dongan, di huria pe tong tubu parsalisian. Nda
sasintongna huria do mamboan dame? Hape sama-sama ruasna pe olo
marsoal. Aha ma sidohononta?
10. Dang holan tu jolma hita masihosoman, alai tabereng ma godang ni angka
bencana alam na parpudion di negaranta. Nda rajumanta sabagian siani alani
pambahenanta do?
LITURGI III : (Bagabaga ni Debata taringot tu haroro ni Sipalua)
Pro : Tangkas do di paboa Debata taringot tu haroro ni Sipalua i, jala tangkas do
dipaboa tu hadirion ni Sipalua na naeng ro i, dohot patujolo ni Mesias, ima
sitontas nambur, asa tangks do dihatahon Debata marhite panurirang i

2
 taringot tu haroro ni Sipalua. Nuaeng begeonta ma bagabaga ni Debata
taringot tu haroro ni Sipalua na laho manondangi haholomon.
1. Nunga marhinamago jolma i ala panghorhon ni dosa i, dohot do tano na napu
tinompa ni Debata, nunga gabe dipantubuhon angka duhutduhut na
marsugasuga.
2. Masa ma dohot haleon nang marragam angka hapursukon. Asa tung so adong do
tahe haluaon ni jolma i ianggo sian dirina dohot sian portibi on.
3. Holan on do pos ni rohanta: Munsat pe angka dolok jala humuntal angka robean,
anggo asi ni roha ni Debata naso tupa munsat sian ho, jala padan ni hadameonNa
naso tupa humordit, jala sahat rodi salelengna do asi ni rohaNa.
4. Disi ma dipatuduhon Debata holongNa, dipungka ma patolhashon bagabagaNa
paboahon naeng ro ma sipalua i hatuaon dohot haluaon tu jolma i. On ma
bagabaga i:
5. Marribu taon na salpu, di papatar Debata holongNa di portibion, ima hasasaut ni
haluaon na pinarbagabagaNa i, tu jolma naung di bagasan hasusaan di portibi
on.
6. Ianggo hatutubu ni Jesus Kristus songon on do: Uju oroan ni si Josep i dope
inana, si Maria i, gabegabean do ibana sian Tondi Parbadia, andorang so
masipadonohan dope nasida. Ala parroha na bonar si Josep, na mangoro si
Maria, ndang adong rohana paurakkon nasida, gabe ditahi rohana nama, naeng
sirangkononna songon i.
7. Alai di na songon i dope tahi ni rohana, diida ma di nipina surusuruan ni Tuhan i,
na mandok tu ibana: O Josep, anak ni si Daud, unang alang roham mangalap si
Maria, gabe donganmu saripe muse, ai na sian Tondi Parbadia do na naeng tubu
di ibana. Tumubuhon Anak ma ibana; Jesus do Goarna, bahenonmu, ai paluaonna
do bangsona sian angka dosanasida be.
8. Dung i ro ma uju i parenta sian Kesar Augustus, ingkon suratan nasa jolma di
gomgomanna. Pamilangon parjolo ma i, uju digomgomi si Kirenius tano Siria.
Jadi borhat ma sasude, asa disurati, ganup tu bona ni pinasana.
9. Borhat ma nang si Josep, na sian Galilea, sian Nasaret, nangkok tu luat Judea, tu
huta ni si Daud, na margoar Betlehem, ala sian pomparan jala marga ni si Daud
ibana, pasurathon dirina rap dohot si Maria, oroanna i, naung gabegabean.
10. Jadi di na disini nasida, gok ma ari ni hangoluanna. Ditubuhon ma anak
buhabajuna, diborhos ma, dipeakkon ma tu bagasan panggagatan, ala so adong
inganan na asing di parmianannasida. Hasangapon ma di Debata di ginjang,
dame ma di tano on, di angka jolma halomoan i.
Liturgi IV :Hatutubu ni Sipalua
Pro : Hasasaut ni bagabaga ni Debata, ima hatutubu ni Jesus Kristus, Ibana do
Debata na ro tu portibion, na gabe jolma humongkop hita. Nuaeng begeonta
ma hatutubu ni Sipalua i.
1. Asa molo di bagasan Kristus halak, na tinompa na imbaru ma i. Nunga salpu
pangalaho na robi, gabe na imbaru.

3
2. Alai angka on do parbue ni Tondi: Holong dohot las ni roha, dame dohot lambas
ni roha, habasaron, habasaon, haporseaon, halambohon dohot hatomanon.
3. Ai Kristus do ujung ni patik i, laho mamintori nasa na porsea.
4. Ai arga do hamu ditobus: Dibahen i pasangap hamu ma Debata marhitehite
dagingmuna dohot marhitehite tondimuna; ai Debata do nampuna i.
5. Alai molo anak hita, dohot ma panean; panean di Debata, dongan panean ni
Kristus; molo tung donganna hita di sitaonon, gabe donganna hita sogot nang di
hasangapon.
6. Ditangihon na marpinggol ma na nidok ni Tondi i tu angka huria: Na monang i
ma bahenonku manganhon parbue ni hau hangoluan, na di Paradaiso ni Debata!
Sai burju ma ho rasirasa mate; dung i lehononku ma tu ho tumpal hangoluan i!
7. Nang pe nunga mangararati dosai, jala nang pe hona uhum jolmai ala ni dosana,
alai anggo holong ni roha ni Debata dang tarsirang sian jolmai. Dang dipasombu
Debata jolmai mate dibagasan dosana.
8. Ai songonon do holong ni roha ni Debata di portibi on, pola do AnakNa na
Sasadai dilehon, asa unang mago ganup na porsea di Ibana, asa hangoluan na
salelenglelengna di ibana.
9. Jala ido na naeng pabotohonon ni Pesta Natal on tu hita. Ai na ro do Tuhanta
Jesus Kristus tu portibi on laho paluahon hamu dohot ahu, paluahon hita sian
dosanta, uhumta dohot ragam ni persoalanta.
10. Antong tanda naung dohot hita malua, muba ma hita angka ina tu joloanon.
Unang be olo hita lalap holan na manghatahatai, apalagi manghata dongan.
11. Ima tutu, ala nunga tubu Jesus di rohanta, burju ma hita mula ulaonta di bagasan
tangiang huhut tapodai anakkonta tu Hata ni Debata.
12. Ala naung dipalua Debata hita sian dosa dohot sibolis marhite holongNa, nda
tama nian hita manghaholongi Debata? Tahaholongi ma Debata sian nasa
ateateta, hosa, roha dohot gogonta.
13. Alani, molo tutu hita na porsea, na manghaholongi Debata, tahaholongi ma
donganta jolma songon irinta sandiri, ai do Patik na ummarga.
14. Hita pe angka ama, taoloi ma Debata, taalo ma sibolis asa maporus sibolis sian
hita. Ima parbue ni Pesta Natalta sadarion.
15. Antong, marhite Natalnta sadarion, hita angka ama tatadingkon mabuk dohot
parjujion. Alai tahaholongi ma inanta dohot anakkonta. Gabe malim na sintong
ma hita di rumatangganta.
16. Nunga las rohanta marpesta Natal di borngin on, tapauba ma rohanta gabe
parholong roha asa jumpang dame di rumtangganta dohot di hutantaon. Selamat
ari natal ma di hita saluhutna.