Bahan Sermon HKBP Distrik XXXVI Labuhan Batu

Evanggelium Minggu 12 November 2023

Turpuk sian 1 Tesalonika 5:1-11
Topik: “Masipauliulian manomu haroro ni Tuhan/Saling membangun dalam menantikan Tuhan.”
Patujolo:
Di turpuk on ditaringoti do pangalaho ni jolma laho mangadopi haroro ni Jesus na paduahalihon. Ndang
dipatorang si Paulus secara rinci taringot tu haroro ni Jesus na paduahalihon i, alai na ditaringoti ibana
paboa mansai ringkot do asa tongtong marjagajaga jala paradehon diri angka na porsea i laho
manomunomu haroro ni Jesus na paduahalihon i.
Jotjot do pangkataion taringot tu parousia, tongtong patubu sungkunsungkun: Andigan do i masa?
Sungkunsungkun na nionjar ni panghilalaan asa binoto partingkianna, jotjot patubuhon angka pandapot na
so nampuna ojahan na tangkas taringot tu haroro ni Jesus na paduahalihon i. Songoni do nang na masa di
huria Tessalonik, di nasida godang sungkunsungkun taringot tusi. Ringkot botoon nasida andigan do tingki
ni parhinsat (pengangkatan) ni angka na porsea i. 1 Tesaalonik 5:1-11 udut ni hatorangan surat ni si Paulus
taringot tu haroro ni Jesus na paduahalihon (Parousia). Alasan ni si Paulus manurathon turpuk on, ala
nunga masa pangantusion na so sintong di huria i taringot tu haroro ni Jesus na paduahon i.
Hatorangan:
1. Ayat 1-3: Songon haroro ni panangko borngin do haroro-Na, ndang binoto andigan pastina?
Dipatudos si Paulus do parousia i tu songon haroro ni panangko borngin. Ndang adong na umbotosa
partingkianna. Ai ndang adong panangko na paboahon naeng ro ibana manangko tu sada bagas. Molo
dipaboa tontu marjagajaga ma pangisi ni bagas i. Na ringkot sipingkirhononta, aha do na porlu
siparadeonta laho manundati panangko i asa unang masuk tu bagasta. Alani suang songoni do haroro ni
Tuhan Jesus na paduahon i, ndang pola ringkot botoon taringot tu tingkina dohot sadiharina. Ndang pola
ringkot angka na porsea i manjujur ari, mamboto andigan do ro Tuhan Jesus i. Na ringkot aha do
pangalaho na porlu siparadeonta laho manomunomu haroro ni Jesus na paduahalihon i.
Di angka na so porsea, na so mananda Tuhan i, dirimpu nasida dame do jala mara so adong, gabe so adong
pangaradeon diri di nasida, ala di roha nasida haroro ni Tuhan i ndang dipatujolo marhite angka tanda-
tanda na tangkas. Pangalaho na so adong pangaradeon, mambahen masa ma hasonggotan, disi ma tompu
tahop tu nasida hamagoan i, songon pambebeon tu na gabegabean. Adong ma lomos ni roha jala tompu
mabiar na dihilala nasida sahat tu na hamagoan.
2. Ayat 4-5: Anak ni Tuhan i ndang mangolu di bagasan haholomon alai di bagasan hatiuron do.
Molo huria Tessalonik nunga tangkas umbotosa taringot tu haroro ni Jesus na paduahalihon, paboa na pasti
do Tuhan Jesus ro muse, holan tingkina do na so binoto. Gabe hasonggoton jala tragis do di angka na so
rade manomu di haroro ni Tuhan i. Jala adong muse do na so porsea di haroro ni Jesus padualihon, gabe so
rade ma nasida. Jala adong muse ma na palelengkon/menunda pangaradeonnasida paima sahat tu na niida
nasida angka na masa na mambahen nasida porsea paboa akhir zaman nunga jonok.
Dibuhai si Paulus do di ayat on marhite angka hata na kontras, i ma: arian dohot borngin jala na holom
dohot na tiur. Hata “ari” martudutudu tu ari ni Tuhan (parousia) na pinaimaima i. Tiur dohot arian i ma
tingki marjagajaga na maralo tu haholomon dohot borngin, i ma tingki modom. Hata “anak hatiuron”
(halak Kristen) diperlawankan tu “anak haholomon”. Pandohan i mandok paboa angka na porsea i ndang
mangolu di bagasan dosa dohot paraloan dompak Tuhan i. Anak haholomon i ma angka halak na so porsea
tu Jesus Kristus. Halak na so porsea di ari parousia, na mangolu di bagasan lomolomona sambing na so
porlu marjagajaga, dung ro parousia i gabe tarsonggot ala so rade manjangkon haroro ni Tuhan i. Halak na
sai tongtong rade marasing do pangalahona laho mangadopi haroro ni Tuhan i.
3. Ayat 6-8: Pangalaho sipatuduhonon ni angka na porsea i laho mangalinggomi diri sian angka
musu.
Sipasingot ni si Paulus tu huria Tessalonik asa pangaradeon i tarida ma sian partondionnasida asa unang
hona rimas ni Debata nasida di ari parousia i. Tubu ma partondionnasida sahat tu haroro ni Jesus i. Gabe
halak Kristen na burju, di haporseaon dohot di holong ni roha. Pandohan hata “dungo” (Gorik:
γρηγορεω/Gregoreuo), marlapatan ndang modom, marjagajaga, mangolu. Jadi dungo lapatanna di son
marjagajaga, siap-siaga sian mental manang parrohaon dohot jasmani paimahaon haroro ni Jesus
paduahalihon i. Dungi hata marroha na torang/sadar (Gorik:νεγω/Nepho) lapatanna mangarajai diri, menak
marpingkir. Hata marroha na torang/sadar di son na marlapatan balik ni hata mabuk. Ala somalna halak na
mabuk ndang sadar diri, gabe ndang diboto aha na naeng masa tu dirina. Jadi naeng dohonon ni si Paulus
asa unang modom songon halak na mabuk, alai sadar ma nian jala manjamothon (mengawasi) diri laho
paimahon haroro ni Tuhan i. Ditogihon si Paulus do huria i asa sadar di hadirion nasida/jatidiri nasida
songon angka anak arian (anak hatiuron) na marpangalahohon: marroha na torang, marhaporseaon dohot
marholong ni roha. Jala ditaringoti si Paulus do muse ulaula partondion na binuat sian angka istilah
soldadu ni Romawi, i ma baju partahanan/mangondingi angka organ-organ vital songon jantung, paruparu,
hati (haporseaon dohot holong) dohot tahuluk sian tombaga laho mangondingi simanjujung (panghirimon).
Marhite baju partahanan i gabe pos ma roha ni soldadu i laho mangadopi musuh so mardongan biar ni
roha. Jala marhite tahuluk sian tombaga tarondingi ma simanjujung ni soldadu i, tarjaga ma pingkiranna,
asa boi soldadui efektif marpingkir jala manghirim di hamonangan dohot haluaon. Patuduhon paboa halak
Kristen ingkon dungo jala marjagajaga paimahon haroro ni Jesus songon sahalak soldadu na tongtong siap
siaga di ganup tingki.
4. Ayat 9-10: Sangkap ni Debata tu angka na porsea i asa dapotan haluaon do marhite Jesus
Kristus.
Molo dipaingot si Paulus angka na porsea i asa rade jala dungo paimahon haroro ni Jesus i, ala ndang
dipadiri Debata angka na porsea i bahen sirimasan; alai naeng dapotan haluaon do marhite sian Tuhanta
Jesus Kristus. Mauliate ma di Debata, ai na burju situtu do Ibana tu hita, ai sangkap hatuaon dohot haluaon
do diparade tu hita di angka na sai tongtong rade manjaga haporseaon, holong dohot hasatiaonna tu Debata
Jahowa. Ai haroro ni Jesus Kristus na paduahon gabe apulapul na balga do i di angka na porsea, paboa
paluaon-Na do angka na posrea i sian parpiarpiar ni rimas ni Debata. Jala hata dungo (mangolu) manang
naung modom pe di ayat 10 di turpuk on martudu tu gombaran mangolu dohot na mate. Jadi molo
mangolu dope manang naung mate pe, tongtong do hita mangolu rap dohot Debata Jahowa, ala hamamate
ni Kristus nunga mangalehon hamonangan di angka na satia porsea di Tuhan i.
5. Ayat 11: Ulaon sipatupaon tu angka dongan sahaporseaon, asa masipaingotan jala
masipauliulian.
Songon sada bentuk haraan do ayat 11 on sian si Paulus tu huria Tessalonik asa sama nasida
masipaingotan jala masipauliulian, asa lam martamba ma jala lam matoras partondion ni huria na di
Tessalonik. Tung songon dia pe hamaolon na masa tu nasida asa ingkon tongtong do nasida masitoguan
roha. Dipuji si Paulus do angka ruas ni huria Tessalonik, na sai tongtong dope mangulahon lomo ni roha ni
Debata. Dison si Paulus ndang holan na paingothon, alai dohot do mamuji pangalaho nasida na sai
tongtong mangulahon lomo ni roha ni Debata jala na patuduhon ngolu na gabe sorminan songon halak
Kristen na togu.
Aplikasi/Sipahusorhusoron:
1. Godang do halak naeng umbotosa taringot tu ngolu sogot, isarana songon sirongkap ni tondina,
ulaon (karier) dohot hahipason. Songon halak Kristen, tarajumi do pardalanan ngolu ni jolma i di bagasan
tangan ni Tuhan i do. Agia sada pe jolma i ndang adong na umbotosa taringot tu aha na naeng masa di
tingki na naeng ro. Hasimoon ni Debata do i, ala holan Tuhan i do na umbotosa. Tung pe songoni, sai
adong do halak na sai naeng umbotosa taringot tu ngolu sogot. Manghirim nasida marhite na mamboto
saotik pe taringot tu ngolu sogot i, asa gabe marhamanaton ma nasida di angka pardalanan ni ngoluna. Alai
ala ni i gabe adong do jolma i laho mangido petunjuk sian paranormal. Gabe lilu ma haporseaonna.
Ra tubu do sungkun-sungkun di rohanta na mandok, boasa pola ndang diungkap Debata Jahowa hahomion
ni masa depan ni ngolunta? Adng dua alusna. Parjolo, asa tongtong hita marsigantung jala manghirim tu
Debata Jahowa. Hahomion i mambahen hita marsiajar na mangoluon marhite haporseaon (belajar
bersandar sepenuhnya kepada Tuhan). Paduahon, asa unang mangolu hita di bagasan biar ni roha. Molo
sude mara dipabotohon tu hita gabe mangolu dibagasan lomos ni roha ma hita, sai holsoan ma hita. I do
umbahen na diajarhon Tuhan Jesus “Sae do molo masiporsan hasusaanna be angka ari i” (Mat. 6:34).
Ndang taboto aha na naeng masa di ari marsogot, alai na pasti: ‘uli do masa depanta di bagasan Tuhan
i/masa depan kita indah di dalam Tuhan’. KITA MEMANG TIDAK BISA MELIHAT MASA DEPAN,
TAPI KITA BISA MEMPERCAYAKAN MASA DEPAN KITA KEPADA TUHAN
2. Ndang adong na umboto taringot tu andigan ujung ni portibi on, jala ndang ringkot i di hita. Naringkot
di hita, songon dia do ngolunta saleleng mangolu dope hita di portibi on. Pangalaho na ringkot
sihangoluhononta i ma:
- Dungo jala marroha na torang (ay.6)
- Marhaporseaon na togu jala marholong ni roha (ay.8)
- Dapot ni Tuhan i hita so martihas, so hasurahan, jala di bagasan dame (2 Petrus 3:14).
Jala molo so ro dope sahat tu tingki on ujung ni portibi on, ingkon anggaponta do i songon kesabaran ni
Tuhan i, na gabe kesempatan di hita laho paubahon parangenta dohot ngolunta (2 Petrus 3:15). Amen.
Pdt. Rudy Sinarto Lumbanraja, Panai Hilir

MINGGU XXIV DUNG TRINITATIS 19 NOVEMBER 2023

5 MUSA 8: 7-18
UNANG LUPA ROHAM DI JAHOWA
I. Patujolo

Buku 5 Musa on ima buku na marisihon angka jamita ni si Musa andorang so sahat dope bangso Israel tu
tano na naeng sitopoton nasida, ima tano Kanaan. Tangkas do di buku 5 Musa on ima songon
jamita/sipasingot si Musa tu halak Israel taringot parange ni bangso i dung sahat jala masuk tu tano Kanaan i.
Ingkon marbinoto jala marningot do bangso i, ndada ala ini gogo manang hamaloon manang hadirion ini
halak Heber di tano Misir na umbahen malua nasida sian parhatobanon i. Holan ala huaso dohot hamuliaon ni
Jahowa sambing do na patar diida bangso i umbahen gabe malua bangso i. Sian status halak hatoban, gabe
halak naung malua.
II. Hatorangan ni turpuk

Ayat 7-10 tangkas do diajarhon asa marparange ma halak Israel songon sada bangso naung pinalua jala
songon hataridaan na mar-Debatahon Jahowa. Nunga godang angka naung binahen ni Jahowa tu bangso
Israel uju di halongongan bangso i. Molo masa parporangan sian angka bangso na asing, dipamonang Jahowa
do bangso i (isarana parporangan sian halak Amalek; . Tung na so hea do ditadinghon Jahowa bangso i, nang
pe jotjot halak Israel jotjot madabu tu panombaon debata sileban. Di turpuk on dipaingot do bangso i, ia tano
Kanaan, ima tano silehonon ni Jahowa, Debata bahen partalian tu nasida. Ndada ala ni haulion manang gogo
ni bangso i dilehon Debata Kanaan i, alai holan ala asi ni roha ni Jahowa sambing dohot inisiatif Debata
sambing. Jala marhite ayat on, paboahon guru tu Debata do sude angka tano na di portibi on, jala guru tu
Ibana do manang tu ise dilehon Debata tano on. Holan sada do na ringkot idaonta, martua ma na niasian ni
Jahowa Debata, jala halak naung niasian ni Jahowa taruli angka na denggan jala taruli ragam las ni roha sian
Jahowa songon na pinatuduhon ni Jahowa di haulion ni tano kanaani.

Ayat 11-16 ima lumbalumba asa unang manghalupahon dengganbasa ni Debata na mandongani nasida
saleleng 40 taon di halongonan andorang so sahat dope di kanaan. Di ayat 11 dipaingot mansai tangkas asa “
ramoti dirim asa unang lupa roham di Jahowa” (bhs Ind. Hati-hatilah supaya jangan engkau melupakan
Tuhan Allahmu). Alana tangkas do jala suan do diparningotan nasida konsekuensi molo mangalupahon
Jahowa di pardalanan ngolu nasida, ima na diparo Debata ragam ni angka parmaraan. Hata unang lupa roham
diterjemahkan doi gabe melupakan na marlapatan ndang na lupa ingatan, manang adong sahit gabe pelupa,
manang lupa-lupa ingat, alai tangkas doi molo melupakan ima marningot jala sengaja gabe lupa. Ido
umbahen dipaingot si Musa asa unang marmeammeam di angka tona manang patik ni Debata, tarlumobi
molo diihuthon angka debata sileban huhut mangoloi jala marsomba tusi, tontu na ingkon mago do nasida
(ay. 19). Alani porlu marningot angka na binahen ni Debata Jahowa tarlumobi na pinatorangna bukti
silehonlehon ni Debata mulai ayat 12-16 ima: na mangalehon angka sipanganon, mangalehon angka perak,
sere, paruarhon sian parhatobanon misir, manogunogu di halongonan na gabe inanganan ni angka ulok
tudung api, naga, hala, nang ragam ni angka parmaraan. Tontu pengalaman ngolu na ekstrim saleleng di
halongonan dang boi dibolus nasida molo so mardonganhon Debata, alani do tangkas si Musa manungguli
jala paingothon muse asa sude bangsoi mangaramoti dirina be jala unang lupa rohana tu Debata.

Ayat 17-18, didok, “dohononmu dibagasan roham: gogongku sandiri dohot huaso ni tanganhu mangomo
di ahu hamoraon on”, molo istilah saonari didok ma on sahit mental Megalomania. Ima sahit kepribadian /
delusi na menganggap ibana na do lebih hebat, menganggap realita dalam hidupnya tidak benar ada campur
tangan Tuhan dan orang lain. On dang sahit alani faktor usia manang alam, alai sahit na binaen sandiri gabe
haginjangon ni rohai ma na mangarajai dirina. Asa unang ma nian israel gabe madabu tu pangalaho na
songoni tarlumobi ma molo dung diida jala di dai bangso Israel hinauli ni tano kanaani. Alai naeng ma
tongtong holan Debata diingot nasida di rohana na mangalehon sasude na uli i.
III. Panimpuli

Topik minggu ima unang lupa roham di Jahowa. Ima na manungguli angka na porsea di Debata asa unang
masa di ngoluna na mangalupahon Debata, tarlumobi mangalupahon angka na adong dingoluna, issrana: hosa
hangoluani, keluarga, suami/istri, dakdanak, parkarejoan, arta nang sinamot, tarajumi mai sasudena sian
Debata. Naeng ma nian manang didia hita maringanan ima na gabe kanaan di hita, tano na dumenggan na
gabe parmianan dipatupa Debata , alani i gabe pasupasu ma hita disi.
Pdt. Argha Bona Fernando Tambunan,
S.Th

Evangelium: Pangungkapon 21: 1-4

Manomunomu Banua Ginjang Dohot Tano Na Imbaru
Minggu Ujung Taon Parhuriaon, 26 Nop 2023
I. Pamuhai
Bongot ma hita tu Minggu Ujung Taon Parhuriaon, jala di goari do minggu on songon Minggu
“Parningotan ni na monding”. Jala tu Minggu na ro, bongot ma hita tu Minggu Advent manang Minggu
Taon Baru Parhuriaon. Minggu Parningotan ni na monding ndada na manungguli sidangolon i, alai na
paingothon hita do taringot tu hamamatenta “Memento mori : Ingot Hamamatem”.

Jamita di Minggu Ujung Taon Parhuriaon dienet do sian Buku Pangungkapon. Umumna Buku
Pangungkapon na tu si Johannes marisihon taringot tu angka aha do na masa di partingkian na naeng ro tu
angka halak na porsea tu angka huria na pitu i. Jala, tontu manosoi angka haporseaon ni ruas huria i asa
tang huhut toras laho manghaporseai Tuhan i, atik pe mangadopi angka hamaolan Nang hamatean. ala
manghatindangkon haporseaonna. Dibagasan tingki on, turpuk na gabe ojahan ni jamita mangurupi hita
laho mangadopi angka biar ni roha. Alai manang boha pe ingkon bolusanta do hamatean i, songon naung
masa tu angka donganta naung jumolo monding i. Anggiat marhite turpuk on na marpardomuan tu ujung
taon parhuriaon on, laos huhut marningot angka donganta naung jumolo i, ndang be mabiar hita,
alai mambahen lam togu haporseaonta sadihari pe ro pangalap ni Tuhan i tu hita angka na tinompaNa.

II. Hatorangan ni turpuk

Ay. 1-2. Parnidaan na imbaru, ima: banua ginjang na imbaru dohot tano na imbaru. Hata “Imbaru” dipake
ma bahasa aslina ima “Kainos” na laho menekankan kualitas, ndang taringot tu kronologis. Ala nunga
salpu banua ginjang dohot tano na parjolo i, jala tuat sian Banua Ginjang sian Debata ima Jerusalem na
imbaru, na pinature songon oroan na sinanggulan mandapothon harajaonna. Dang na songon na parjolo i
be angka gombaran na imbaru i, sude na adong di portibion na laho salpu do i. Molo dapotan angka na
imbaru hita tontu las do rohanta sialani i haimbaruon i martingki do sudena, Marasing do molo taringot tu
haimbaruon na sian Debata ima marhite Banua Ginjang dohot tano na imbaru i. Molo nunga imbaru
Banua ginjang dohot tano i lapatanna dang adong be masa disi angka uhum ala ni dosa, gok haluaon ma
angka rura, londut dohot holbungna, naung pinasuang ni Jahowa sian ujung tu ujungna.
“Laut i pe dang adong be” sian Pangungkapon 4:6 taringot tu laut didok do sada cara laho paingothon
taringot tu hahomion ni Debata na maniranghon Debata sian angka dosa ni jolma, jala sian Pang. 20:13
didok do ia laut i salah satu inganan ni halak na jumolo marujung ngolu. Na marlapatan do on gabe sada
tudosan na so tupa be masa hagurgaron manang halumlamon ni ngolu, ala ni i molo hata tudosan do hata
“laut”
na dipangke dibagasan turpuk on, ingkon sijamothonon jala sipadengganonta do nasa hangoluan na
denggan di tongatonga ni angka laut na di patupa Debata.
“Huida ma huta na badia i, i ma Jerusalem na imbaru” molo di Palestina Jerusalem didok do “Kota
Kudus” (Jes. 52:1) Sian gombaran na pinatuduhon ni turpuk on, astuanna marhite parnidaan ni si Johannes
on tung patar do hape las ni roha, na marparbuehon parolopolophon marhite Banua Ginjang dohot tano na
imbaru i, ima Jerusalem na imbaru i. Ido jaminan di hita halak na porsea na pinasahat ni Debata tu hita.
Aha do hataridaan ni las ni roha na dipasahat Debata di Banua Ginjang dohot tano na imbaru i? Idaonta
ma i sian na mangihut di toru on.

Ay. 3-4. Patar do Banua Ginjang manang Surgo i, jala Debata do na mangapus angka iluilu. Di na binege
ni si Johannes soara na mandok: “On do joro ni Debata di tongatonga ni angka jolma; na maringanan ma
Ibana di tongatonga nasida, jala nasida ma gabe bangsoNa, jala Debata sandiri saor tu nasida”. Sian turpuk
on ma hajongjong on ni Jahowa na mambahen las ni roha ni angka na porsea tu Debata. Haroro ni Jahowa
rap dohot angka bangsoNa ima songon hahomion ni Debata. Angka halak na porsea i Banua Ginjang na
imbaru i do na gabe jambar di ibana, laos Debata patuduhon na di tongatonga nasida do Debata. Jala,
saluhutna i na Debata sandiri do na saor di hita. Laos udut ni i, adong jaminan di angka na porsea i na
apusan ni Debata iluilu sian mata ni angka na porsea i, jala ndang adong hamatean, arsak ni roha dohot
anggukangguk, na hansit, jala nunga salpu na parjolo i.

Sian gombaran naung pinatorang ondeng, manosohon hita asa unang mandele di saluhutna na masa di
ngolunta on, apuson ni Debata do angka iluilunta, dang adong be dukacita. Parsotingkinan do sude na
masa dingolunta di portibion. Molo pe ro las ni roha nang arsak ni roha di ngolunta saleleng di portibion
ndada manongtong i, adong be do tingki na. Holan sada do na manongtong ima Banua Ginjang dohot tano
na imbaru naung pinarade ni Debata i do na manongtong di hita. Holan on, ingkon porsea do hita tu Ibana
naung paradehon inganan na imbaru i, jala ndang adong be angka iluilu, arsak, hansit disi.

III. Hahonaan
1. Ganup jumpang Minggu ujung taon parhuriaon, taingot do angka donganta naung jumolo
monding. Di Konfessi HKBP tahun 1996 Pasal 15 didok do “Taringot tu halak na marujung
ngolu” hamatean ima ujung ni ngolu manisia di portibi on, jala adong do haluaon tu halak na
porsea. Gereja patupahon on ima songon dalan laho paingothon hita asa tongtong
marpanghirimon tu Jesus laho manaluhon hamatean i. Taparade ma dirinta laho mangadopi
hamatean i, unang be adong biar di hita.
2. Sude do hita ingkon mananda Banua Ginjang na imbaru dohot tano na imbaru, marhite i na
paradehon dirinta do hita laho mandai las ni roha i jala dapotan asi ni roha ni Debata.
Pangaradeonta ima marhite na manongtong haporseaonta tu Ibana manang andigan pe ro
Kristus paduahalion.
Cal. Pdt. Putri Pasaribu S.Th
 MINGGU ADVENT I , 03 Desember 2023
(Markus 13 : 24 - 37)
Topik : Dungo laho manomunomu haroro ni Kristus
I .Patujolo:
Markus Bindu 13 on, i ma namasa di dolok Jetun dialaman ni bagas Joro i, jala taida do; Sungkunsungkun ni
angka sisean tarigot tu tingki hamamasa ni pangungkapon ni Tuhan Jesus (ayat 1-4), rumang ni na masa di
zaman on (ayat 5-13), harongkingon ni namasa (ayat 14-23), haroro ni Kristus na paduahalihon ( ayat 24-
27), poda manang tona asa jaga (ayat 28 -37).
Dung simpul Tuhan Jesus patupahon pangajarion di bagas joro na di Jerusalem ( Mark 13). Borhat ma Ibana
manadingkon bagas Joro i, alai ro sahalak sian angka siseanNa, mamuji hamuliaon batu dohot togam angka
jabu na di hutai (ayat 1). Alai dialusi Jesus ma; “Di ida ho do angka jabu na bolon on? Ndang pasombuon
nanggo dua batu martinditindi na so gargaranna” (ay 2). Hata on martudutudu tu hasesega ni bagas i. Alus
ni Jesus naralo do tu hata pamujion na didok ni sisean i (ay 1). Haulion ni bagas i di sada tingki sega jala
ma gargar do saluhutna. Ndang adong na hot jala na so marhaujungan do saluhutna na masa dihasiangan on.
Alus ni Jesus i tarigot tu hasesega ni bagas i laos martudutudu do i tu ajal ni hasiangan on dohot haroro ni
Anak ni jolma i na ro dibagasan hasangapon dohot hamuliaon ni Jahowa, jala haroro ni Anak ni Jolma i
manalpuhon hamuliaon, hasangapon dohot hatogamon ni saluhut na adong dihasiangan on.
II. Hatorangan :
1. Hagogoon dohot hasangapon ni Debata (ayat 24 - 27)
Dung salpu haporsuhon ondeng mangkolom ma mataniari jala ndang masinondang be bulan, mardabuan ma
angka bintang sian langit i jala humuntal hagogoon ni parlangitan ayat 24-25. Haporsuhon nadidokna dison: i
ma angka pangaleleion, panggosagosaon, pangalaho na so uhum nang angka horong na so manjangkon
manang na manulak Jesus sipalua dna. Saluhutna i martudutudu tu haulion dohot hasangapon na masa di
hasiangan on, sude harajaon, hagiot dohot huasona. Laos songon i do bangso dohot harajaon saluhutna i
ingkon marujung jala dang adong na hot diharajaonna dohot dihasangaponna i. “Dung masa HaroroNa i,
papunguonna ma saluhut angka na pinillitna i sian desa na ualu i....” i ma na patuduhon saluhut jolma na
mangolu dohot na mate saluhut na do papunguonna di adopan ni habangsa ni Anak ni jolma i. Ise do Anak ni
jolma na didokna diturpuk on? Ima Jesus Kristus. Panjouon “Anak ni jolma” marpardomuan do i tu
parsuruon ni Jahowa Debata tu AnakNa, i ma Jesus Kristus (Joh 3 : 16 -17).
2. Dang adong na umboto arina dohot tingkina (ayat 28 – 32)
Diumpamahaon Jesus saluhut na masa i marhite umpama” hau ara” (Luk 13: 6 – 9), tarigot tu hau ara na so
marparbue, tarida do hau sian bonana molo marparbue marharoroan do i sian bonana, molo hau ara tontu
ingkon do marparbuehon hau ara. Dipangke Tuhan Jesus do angka tanda na masa di hau ara i, i ma
tarigot tu partingkian na masa. “Ia dung matunasi punsuna jala rungkar ....
“(ayat28). Hata on martudutudu tu angka na masa i ma ragamni sitaonon, ragam ni angka ulaon na jat,
pangoseose, penindasan manang ketidak adilan i ma tanda na lam jonok nama ajal ni hasiangan on, masa
saluhutna i naung jonok hasosonggopna (ayat 29), i ma hasonggopon ni hasiangan on dohot haroro ni anak
ni jolma i. Laos dipertegas Jesus do muse marhite hata: “ situtu do hatangkon tu hamu; na so tupa salpu
bangso on, so jolo songgop sasudena i” (ayat 30).
Dang adong na hot di hasiangan on, jala marujung do saluhutna (ayat31), ise do naumboto masa ni
partingkian haroro ni Anak ni jolma i? Ndang adong na umbotosa nang surusuruan di banua nginjang, nang
Anak i pe, nda holan Ama i (ayat 32). Ayat on pabotohon hahomion dohot huaso ni Debata na manggohi
saluhut portibion na so adong tudosanna, holan Debata do naumbotosa ala ditanganNa do saluhut
partingkian nasa na adong, guru di Ibana saluhut partingkian na masa.
3. Tagam jala dungo (Ayat 33- 34)
Dipangke Jesus do umpama taringot tu halak na marhuta sada na manadingkon jabuna, disagihon do huaso
tu angka naposona, tu ganup siulonna be, jala sijaga pintu didok marjaga. Alai dang diboto naposo i sadihari
mulak tuan nampuna bagas i, ayat on paingothon jala mempertegas asa dungo ma angka na porsea jala
managihon hata i (ayat 37), somalna halak na tarpodom dang diboto aha na masa jala ndang diboto be
siulahononna.
III. Sipahusonhusoron
1. Masuhanta ma minggu-minggu Advent, i ma manomunomu Pesta Parngingotan ni Tuhanta Jesus (Natal)
laos mangihut ma i namanagam do hita di haroro ni Anak ni jolma i, i ma haroro ni Jesus Kristus na
paduahalihon ndada songon haroroNa na parjolo be harorona napaduahalihon on. Harorona napaduahalihon
na ro ma Ibana laho manguhumi halak na mangolu dohot na mate, jala Ibana do panguhum na tigor dohot
na sintong. Aha ma na boi siparadeonta andorang so masa dope haroroNa? Siparadeon ni rohanta i ma
parbue ni haporseaonta, mian dibagasan Jesus Kristus. Halak na mian dibagasan Jesus Kristus i ma halak na
marparbuehon ulaon na denggan, marhadaulaton na sintong, pajongjong uhum na sintong, magulahon
ulaon parasirohan dna.
BAHAN SERMON HKBP DISTRIK XXVI LABUHAN BATU (Aek Batu 02 Oktober
2023)
2. Dibagasan Minggu Advent na parjolo on di togihon do hita asa tongtong ma dungo. Torop do halak Kristen
molo nungga masuk tu Minggu Advent gabe gok sihobasan, sipingkiran, sipatupaon gabe mangkorhon
ungutungut dohot patubu parsalisian. Dungo ma hita unang be lalap holan mangoloi hisaphisap ni daging dohot
hagiot ni portibi on. Dungo ma hita ai uju di hasiangan on boi hita paradehon diri maimaimahon las ni roha
diharajaon napinatupa ni Debata di angka na porsea.

Bvr.Enny Pandiangan, S,Mis (HKBP Rantauprapat)