TATA IBADAH

NATAL SEKSI BAPA GKPS

2023

Tema:
Hasadaon pakon Pangidangion na Marbuah
(Kolosse 1:10)

Sub Tema:
“Marmalas ni Uhur ma Hita Pataridahkon Buah ni Haluahonta
anjaha Gabe Pasu-pasu i Tongah-tongah ni Gareja, Masyarakat,
ampa Negara Tanda ni na dob Matoras Haporsayaonta.”
(1 Tessalonika 5:16-18; Jesaya 9:2; Psalmen 118:24)
A. PERSIAPAN
1. Persiapan Petugas Ibadah
2. Praeludium
P Shalom ma hubanta haganupan!
Mamestahon partubuh ni Tuhan Jesus aima malas ni uhur banggal, halani iahapkon hita do
banggal ni holong pakon haluahon na ipasirsir Naibata hubanta. Dihut do malas ni uhur ai
ipestahon Seksi Bapa i kuria on. Songon na isobut Sub tema GKPS, ase marhitei malas ni
uhur borngin on boi homa lambin marhataridahan buah ni haluahon in bani gereja, keluarga,
masyarakat sonai homa negara halani domma tongon matoras haporsayaonta. Halani ai,
pasirsir hita ma hadirionta bani ibadah on. Gok ibagas malas ni uhur ma hita mamestahon
partubuh ni Tuhan Jesus. Riap ma hita jongjong, ondoskon hita malas ni uhurta marhitei
doding Haleluya No. 313:1-3
(barisan Prosesi masuk hu ruangan ibadah)
1. Humbai pulou ge banua sai tarbogei do torus. Doding na mamuji Tuhan Sipanobus jolma in.
Gloria, puji ma Tuhanta. Gloria, puji ma Tuhanta.
2. Haganupan na i surga pasangapkon Naibata. Rap mandoding do sidea i lobei ni Naibata.
Gloria, puji ma Tuhanta. Gloria, puji ma Tuhanta.
3. Soridadu ni Tuhanta hormat bani Naibata. Haganup puji-pujian ondos bani Naibata.
Gloria, puji ma Tuhanta. Gloria, puji ma Tuhanta.

3. Pagara Lilin
Na pagara lilin:
a. Parambilan e. Pengurus Seksi Bapa
b. Paragenda f. Sahalak Seksi Sekolah Minggu
c. Pengantar Jemaat g. Sahalak Seksi Namaposo
d. Ketua Panitia Natal h. Sahalak Seksi Inang

B. KEBAKTIAN
1. Votum-Introitus-Tonggo
P. Ibagas Goran ni Naibata Bapa, pakon Tuhan Jesus Kristus, ampa Tonduy Napansing,
Sitompa langit pakon tanoh on.Amen. Tongon, sai paluahonni do halak na masombuh, na
mangindo pangurupion ni halak na madoyuk ampa halak na so dong pangurupi bani.
K. Maidop do uhurni bani halak na malumat pakon na musil, anjaha paluahonni do tonduy ni
halak na masombuh.
P. Paluahonni do hosah ni sidea humbani panokohon pakon pangkilangon, harga tumang do
daroh ni sidea bani panonggorni.
K. Sai manggoluh ma ia, anjaha ibere ma hubani omas na hun Seba;
P. anjaha sitonggoonkon do ia tongtong, ganup panorang sipasu-pasuon do ia. Haleluya.
Martonggo ma hita. Ham Tuhan Naibata Bapanami, ipuji anjaha ihatarimakasihkon hanami do
dear layak pakon idop ni uhur-Mu hubannami na dob pasirsirhon haluahon marhitei Tuhan
Jesus Kristus. Marhitei mardingat partubuh-Ni Tuhan Jesus gabe tangkas ma hubennami
porluni matoras hanami ibagas Ham anjaha marhataridahan haluahon in marhitei goluhnami.
Bahen Ham ma ibadah nami on gabe dalan hubannami ase totap marhataridahan haluahon in
bani goluhnami. Ibagas Kristus Jesus Sipaluah in, ipadas hanami tonggo nami on. Amen.
(hundul Kuria)

2 Natal Seksi Bapa GKPS Gunung Datas

2. Mandoding Haleluya No. 32:1-3
1. Riap ma hita haganup, mamuji Naibata.
Mesek ma pandodingta rup, ai in do na tama, ai in do na tama.
2. Iungkab Naibatanta in, nagori atas in.
Isuruh do AnakNi in, hagoluhanta in, hagoluhanta in.
3. Paratas ni BapaNi do, tinadingkonNi in.
Hu hasiangan Ia roh, ianan marsik in, ianan marsik in.

3. Liturgi pasal Habanggalon ni Kuasa ni Jahowa

P. Mamestahon partubuhni Tuhan Jesus dihut do pabotohkon hubanta pasal habanggalonni
kuasa ni Jahowa na manompa langit pakon tanoh. Bona ni haporsayaon na sintong do mula ni
Jahowa manompa langit pakon tanoh on. Ijin Naibata manompa langit pakon tanoh on, talar
ma homa haganup sura-sura pakon bagah-bagah ni Naibata hubani hita jolma pakon hubani
haganup na tinompa in. Halani ai, buha hita ma uhurta laho padearhon paruhuran pakon
parlahou mangidah haganup pambahenan ni Jahowa na torus marhorja ronsi nuan on.
1. Jahowa do Raja, hitir ma sagala bangsa; marhotak do Ia bani Herubim, dugur ma tanoh on.
Banggal do Jahowa i Sion, anjaha timbul do Ia i atas ni sagala bangsa. Ipuji sidea ma goran-
Mu na timbul anjaha matunggung in! Pansing do Ia! (Psalmen 99:1-3)
2. Ai gok Bamu do, alo Jahowa, habanggalon pakon hasangapon, hagogohon pakon hamuliaon,
hamonangan ampa hajombuton; ai Ham do simada haganup na i nagori atas ampa na i tanoh
on, ai Ham do simada harajaon, alo Jahowa, anjaha ipatimbul Ham do diri-Mu mangatasi
haganup. (1 Kronika 29:11)
3. Ia do na patalarhon na bagas pakon na ponop; ibotoh do atap aha ibagas na golap, anjaha
Bani do marianan na lihar ai. (Daniel 2:22)
4. “Ham Tuhan Jahowa! Ham do na manjadihon langit ampa tanoh on, marhitei gogoh-Mu na
banggal in ampa marhitei tangan-Mu na pinagostong-Mu! Seng dong na so tarbahen Ham.
(Jeremia 32:17)
5. Banggal do Jahowa, anjaha sipujian tongon, seng tardodou hatimbulon-Ni. Marsipatugahan do
sundut-sundut pasal pambahenan-Mu, anjaha ipatugah do horja-Mu na banggal in. (Psalmen
145:3-4)
6. Ise do na mambahen pakon na mandalankon ai? Ise do na mandilo sundut ni jolma humbani
mungkahni? Ahu do, Jahowa, na parlobei anjaha na parpudi, Ahu do ai. Ididah pulou do ai
gabe mabiar, ujung ni tanoh on gobir do; roh ma sidea hundohor anjaha martumpu-tumpu ma.
(Jesaya 41:4-5)
7. Pargogoh Na So Tarimbang in seng tarjumpahi hita Ia; parhagogohon banggal do Ia anjaha
parhabonaron, seng ra Ia papeolhon uhum. Halani ai, talup do Ia habiaran ni jolma; seng
kawahkonon-Ni halak na mangahap pentar ia. (Job 37:23-24)
8. Tapi tarbahen-Si do lobih humbani na pinindonta barang na piningkiranta, domu hubani
hagogohon na marhorja ibagas hita. Bani ma hasangapon ibagas kuria in ampa ibagas Kristus
marsundut-sundut ronsi sadokah ni dokahni. Amen. (Epesus 3:20-21)

4. Mandoding Haleluya No. 45:1-2

1. Malas ni uhur na banggal na huambilankon on; Domma tubuh Sipaluah bai hita jolma on.
Sangap bani Naibatanta, damei damei damei ma bani jolma.
Malas uhur ni Naibatanta bai hita jolma on.

3 Natal Seksi Bapa GKPS Gunung Datas

 2. Ai saborngin on do poltak bintang bai na golap in; Na lao palihar na golap bani uhurta in.
Sangap bani Naibatanta, damei damei damei ma bani jolma.
Malas uhur ni Naibatanta bai hita jolma on.
5. Liturgi pasal Hamagouan ni Jolma halani Dousa
(Sipambobai (P) jongjong i tongah anjaha 8 (ualuh) halak marsidompak-dompakan atap
pe hampit siamun opat halak pakon hampit sambilou opat halak (nomor genap hampit
siamun, nomor ganjil hampit sambilou)
P. Hinabanggal ni partubuhni Tuhan Jesus, aima marhitei na itobus Naibata hita jolma
humbani dousa ampa hamateian. Kuasa pakon sorod ni dousa totap do hape
manggomgomi pakon mandoit buei jolma, mambahen pargoluhan on lambin kasou janah
parrohkon hamagouan. Halani ai, marhitei partubuh ni Tuhan Jesus, ipagolpa do hubanta
ase intei janah totap manjaga diri humbani dousa. Age bani zaman hamajuan on, selaku
bapa, ibagas keluarga, masyarakat pakon negara, sai hotop do dousa in marhorja ampa
pakahouhon hita jolma.
1. Hotop ope tarbogei barita pasal parlahou pakon dousa ni paramangon hubani parinangon
aima berlaku kasar secara fisik pakon non fisik. Adong ope na marosuh marhata na koras,
mambollang ampa marhata sumsam. Sonai homa adong kekerasan dalam bentuk lang sai
parduli be bani komunikasi langsung halani handphone.
2. Hape domma ipadas hata ni Naibata hubanta bani Kolosse 3:19, “Nasiam paramangon,
haholongi nasiam ma parinangon nasiam, anjaha ulang ma kasar dompak sidea.” Tongon
do hape, lang sibahenon kasar dompak parinangon, niombah sonai dompak hasoman
jolma. Mubah ma tongon humbani parlahou na kasar.
3. Bani buei na masa nuan on, hotop ope jumpah pasal rumah tangga na marsirang-sirang.
Adong homa rumah tangga na igoran sirang so sirang. Sonai homa buei ope jumpah
parinangon na padaskon na ibagas uhurni halani lang jumpahan holong ampa kasih
sayang be humbani paramangon. Urah ni in mando nuan on mangkatahon sirang.
Hinorhonni ai, gabe maseda ma rumah tangga. Jangin ni in tene pangkorhonni dousa.
4. Hape bani hata ni Naibata bani Mateus 19:6 mangkatahon, “Ase seng be dua sidea ai,
tapi sada daging do. Ai pe, na dob pinadomu ni Naibata, seng bulih sirangon ni jolma.”
Halani domma ipasada Naibata bapa pakon inang ibagas rumah tangga, na tang porlu
ihagoluhkon aima marsihaholongan, marsiarusan, marsianjuan pakon riap patorsahon
rumah tangga marhitei holong na humbani Naibata.
5. Bani hamajuan ni zaman on, domma buei homa keluarga songon biri-biri na lang adong
siparmahan bani. Lang sai adong be bolat-bolat na sintong bani parsahap, paruhuran,
sonai homa parlahou. Songon na bebas mando nuan on mangkorjahon atap
mansahapkon age aha. Songon na magouan siparmahan buei keluarga hinorhonni
paramangon na lang pataridahkon tanggung jawab ampa hajongjongan sebagai malim.
6. Tugas ampa tanggung jawab ni bapa aima gabe siparmahan. Bani Johannes 10:9
ihatahon do, “Ahu do labah in; barang ise na masuk hun Bangku, maluah do, kaluar
masuk ma ia, anjaha dapotan sampalan.” Gabe bapa aima gabe sipambobai janah
siparmahan, ase keluarga jumpahan sampalan na mombur. Marubah ma tongon bapa ase
gabe siparmahan na bujur.

4 Natal Seksi Bapa GKPS Gunung Datas

 7. Salah sada tanggung jawab ni bapa na nuan on lang sai taridah be aima memberikan rasa
aman. Sebagai malim pakon pemimpin bani keluarga, iharapkon do ase kehadiran ni bapa
parrohkon malasni uhur ampa hasonangan sonai homa haganup pangianni rumah
jumpahan perlindungan. Tapi sai adong ope masa, bapa na ihabiari parinangon, lang
dohor tumang hubani niombah, mahol berkomunikasi antar niombah hubani bapa, ampa
bapa lape gabe ianan “curhat” na terbaik hubani niombah. On pe boi do gabe dalanni
sibolis parrohkon dousa bani keluarga.
8. Hape bani Kolosse 3:21 domma ihatahon, “Nasiam bapa, ulang ma makorastu nasiam
dompak niombah nasiam, ase ulang mandolei sidea.” Kehadiran ni hita bapa aima
parrohkon damei, malas ni uhur ampa kebahagiaan. Bapa na bujur aima bapa na boi gabe
hasoman saparuhuran pakon pangaduan ni haganup pangisi ni rumah. Sai jumpah hita
ma haganupan in marhitei na marpesta natal borngin on. Amen.
P. Gabe sahalak bapa, boi do domma gabe bapa na bujur hita. Tapi anggo isungkun hita
hubagas uhurta, “Domma nani hudalankon haganup tanggung jawab sebagai bapa ibagas
na habujuron pakon hasintongan?” Tongon, lang adong hita on na sempurna. Boi do hita
lolei ampa lupa bani tanggung jawab in. Halani ai, maningon konsisten ma hita. Pitah
marhitei tonggo pakon parsaoran na sintong dompak Naibata ma mambahen hita boi
jumpahan gogoh laho mandalankon in ase gabe bapa pangguruan ampa bapa na bujur
ma hita haganupan.
6. Mandoding Haleluya No. 385:1-2
1. Ai domma tubuh saborngin on, Panondang ni dunia on.
Usih songon angkulanta in, Immanuel goran-Nin.
Tarbogei doding ni malekat, i talun Efrata. Mamuji Tuhanta na sangap, panggomgom na totap.
2. Age sombuh partubuh-Ni in, daulat do tong uhur-Ni in.
Ase ganup na tinompa in mamuji goran-Nin.
Ai Ia simada kuasa, gok bai do ganup in. Mangimbang sibolis ‘ge dousa, seng dong usihan-
Nin.
7. Liturgi pasal Pangarapan bani Bagah-bagah ni Naibata
P. Parrohni Tuhan Jesus hu dunia on, domma humbani na ijia nari ibagah-bagahkon Naibata.
Bagah-bagah ai patalarhon pasal Naibata na totap pasirsirhon na tang sijengesan pakon na
tang siporlunan bani hita jolma. Sai marbagei do tanggapan ni jolma bani bagah-bagah in.
Tapi dob tubuh Tuhan Jesus gabe talar ma haganup anjaha ipasaud Naibata. Gogoh na
sonai do homa porlu ipataridahkon hita bani panorang on. Bani bagei ni na masa bani
pargoluhan on, totap ma hita porsaya, riap do Tuhan pakon hita laho mangkasomani pakon
mambobai.
1. Ai sonon do holong ni uhur Naibata bani dunia on, pala do Anak ni na sasada in iberehon,
ase ulang magou ganup na porsaya Bani, tapi ase hagoluhan sadokah ni dokah ni bani.
2. Nini Tuhan Jahowa: Songon sintongni manggoluh Ahu, nini Tuhan Jahowa, sabonar seng
marosuh uhurhu mangidah hamateian ni parjahat, tapi ase mulak do parjahat ai
manadingkon dalanni, ase manggoluh ia.
3. Hamateian do rupeini jolma na ibagas dousa. Tapi lang marosuh Naibata anggo magou
jolma in halani ai Naibata sandiri roh hu tongah-tongah ni jolma marhitei Jesus Kristus na
paluahkon jolma humbani uhuman ni Tuhan Naibata. Ipasirsir Naibata do haluahon bani
jolma marhitei idop ni uhurni na manongtong in.

5 Natal Seksi Bapa GKPS Gunung Datas

4. Malekat Gabriel do isuruh Naibata marayak sada anak boru na margoran si Maria, tunangan ni
sada dalahi na margoran si Josep. Tarsonggot do si Maria bani tugah-tugah ni malekat hubani,
na mangkatahon, “Ulang ma mabiar ham Maria, ai dapotan idopni uhur do ham humbani
Naibata, boratan rumah ma ham anjaha tubuhan Anak, bahen ma goranni Jesus.”
5. Ase, dob ipintori hita halani haporsayaon, mardamei ma hita pakon Naibata, marhitei Tuhanta
Jesus Kristus. Marhiteihonsi do boi masuk hita hubani idop ni uhur haporsayaon, ai ma
hajongjanganta nuan, anjaha megah do hita halani pangarapan bani hasangapon ni Naibata.
6. Dob ai mandarat ma sada tunas humbani tutuho ni si Isai, anjaha marbuah sada tumbor na roh
humbani uratni. Sogop ma hubani Tonduy ni Jahowa, Tonduy hauhuron ampa pangarusion,
Tonduy panuturion ampa hagogohon, Tonduy habotohon ampa biar bani Jahowa.
7. Ase lambin maluah ma hita nuan humbani ringis in marhiteihonSi, dob ipintori hita ibagas
darohNi ai. Tapi seng pitah ai, megah do homa hita ibagas Naibata, marhitei Tuhanta Jesus
kristus, ai marhiteihonSi do ijalo hita nuan pardameian in.
8. Ham Tuhan, hatengerhon do ganup bagah-bagah-Mu. Urupi Ham ma ahu ase totap mardalan
bani dalan-Mu. Ham Tuhan, sai manumpak ma Ham. Ham Tuhan, pasu-pasu Ham ma hanami.
Amen.
8. Galangan Koor/Vokal Grup
9. Mandoding Haleluya No. 316:1-2
1. Sai puji ma Tuhanta in, ai tubuh Jesus in. Sai jalo ma Rajanta in, pasirsir ma uhurmu in.
Mandoding puji ma, mandoding puji ma, mandoding puji Tuhan in.
2. Megah ganup dunia on, marsangap Tuhan in. Ganup mamuji Tuhan in, pakon ganup
tinompa-Niin. Mandoding puji ma, mandoding puji ma, mandoding puji Tuhan in.
10. Liturgi pasal Pataridahkon Buah ni Haluahonta anjaha Gabe Pasu-pasu
P Bani tahun 2023, domma ipatotap GKPS na gabe Sub tema, aima: Marmalas ni Uhur ma Hita
Pataridahkon Buah ni Haluahonta anjaha Gabe Pasu-pasu i Tongah-tongah ni Gareja,
Masyarakat, ampa Negara Tanda ni na dob Matoras Haporsayaonta. Bani na sihol iujungi
hita tahun 2023, panorang ni ma bani panorang Natal on, isaksihon hita kuasa pakon gogoh
ni hata ni Naibata na mangojur hita ase pataridahkon malas ni uhur pakon buah ni haluahon
ase tongon gabe pasu-pasu hita, tanda ni na dob matoras haporsayaonta.
1. Tarsurat bani 1 Musa 17:5, “Seng be si Abram goranmu, tapi si Abraham ma, ai domma
Hupabangkit ho gabe bapa ni buei bangsa.” Songon Abraham na gabe sitiruon bani
haporsayaon ampa pambalosion bani Naibata. Sanggah ipangindo Naibata si Isak gabe
galangan, lang pala mardua uhur ia, halani porsaya do Abraham bani rencana terbaik na
humbani Naibata, anjaha jumpahsi do tongon.
2. Tarsurat bani 1 Musa 25:21, “Dob ai igogohkon si Isak ma manonggohon parinangonni ai
bani Jahowa, ai na lambang do ia; jadi itangihon Jahowa ma tonggoni, boratan rumah ma si
Rebekka parinangonni ai.” Si Isak gabe bapa sipartonggo. On ma homa na porlu
ipataridahkon hita bani haganup tanggung jawab na ipaondos Naibata hubanta. Marhitei
bapa sipartonggo, pos uhurta, ipasaud Tuhan haganup sura-sura na madear bani keluarga,
gereja, masyarakat pakon negara.
3. Tarsurat do bani Lahoan ni Apostel 13:22, “Jadi dob ipaturun ia, ipabangkit Naibata ma si
Daud gabe raja bani sidea, isaksihon do pasalsi, nini, ʻDomma jumpah Ahu si Daud, anak ni
si Jesse, harosuh ni uhur-Hu, sipadas sura-surang-Ku.” Gabe bapa harosuh ni Tuhan ampa

6 Natal Seksi Bapa GKPS Gunung Datas

 sipadas sura-sura-Ni, ai do homa iharosuhkon Naibata hubanta. Dapot hita do pangarusion
pasal harosuh ni Tuhan marhitei na mambasa ampa mangarusi hata ni Tuhan.
4. Tarsurat bani Job 1:1, “Adong ma sapari sada halak i tanoh Us, na margoran si Job; na
daulat anjaha na bujur do paruhuran ni halak ai, sada halak sihabiari Naibata, anjaha ipadaoh
do uhurni humbani hajahaton.” Gabe bapa na daulat anjaha bujur bani paruhuran, sihabiari
Naibata ai do tongon na boi ipataridahkon hita marhitei na marpesta Natal.
5. Tarsurat bani Psalmen 103:13, “Songon idop ni uhur ni bapa bani niombahni, sonai do idop ni
uhur ni Jahowa bani sagala na mangkabiari-Si.” Gabe bapa paridop ni uhur aima na
iharosuhkon keluarga. Halani ai, pasirsir hita ma tongon dirinta ase totap gabe bapa paridop
ni uhur.
6. Tarsurat bani Podah 4:1-2, “Tangar ma, ale anakku, pangajarion ni bapanima, paruhurhon
ma, ase dapotan pangarusion. Ai ajaran na madear do sihol bereonku bennima, podahkai
ulang ma tadingkon hanima.” Gabe bapa sipangajari ase dapotan pangarusion na sintong
haganup keluarga. Ulang ma tongon rosuhan niombah manjalo podah humbani dunia maya
marimbangkon humbani bapa. Gabe bapa na mambere ajaran na madear ma tongon hita.
7. Tarsurat bani Podah 13:24, “Halak na malang manlonsingkon hotang, anakni do
nihagigihonni ijai, tapi na holong uhur bani, ipagirah do mangajarsi.” Gabe bapa na setia
anjaha bujur, na lang mamanjahon niombah atap paturutkon niombah manlahoi sandiri
lahoanni. Bapa na mambahen niombahni gabe niombah na disiplin marhitei holong, ase gabe
niombah na tertib, disiplin anjaha marhabiaran hubani Naibata.
8. Tarsurat bani Podah 13:22, “Halak sidear uhur martading-tadingan do ronsi pahompuni, tapi
habayakon ni halak pardousa ipagugun do ai bani halak parpintor.” Gabe bapa na bujur aima
bapa na adong bani perencanaan pasal masa depan ni niombah. Bapa na bujur sedo bapa
na mamboiskon arta pakon sinadongan pakon mansuhuni hisap ni daging. Bapa na bujur
aima bapa na ringgas, bekerja keras ase adong tading-tadingan na boi ijumpahkon
haganupan keluarga. Amen.
11. Mandoding Haleluya No. 314:1-2
1. Doding ni malekat in, pasangapkon Tuhan in. Na manbere hasonangan,
Raja na dob tubuh in. Haganupan bangsa-bangsa, sai mamuji bani Tuhan
Jesus na hun surga in tubuh i Betlehem in, doding ni malekat in pasangapkon Tuhan in.
2. Ganup na i surga in, sai manombah Tuhan in. Tuhan Jesus jadi jolma, roh bai hajolmaon in.
Lao mamboan haluahon, ganup dousa isalpuhon. GoranNiin Immanuel, rapkon hita Tuhan in.
Doding ni malekat in, pasangapkon Tuhan in.

12. Liturgi pasal Partubuh ni Jesus

1 Jadi roh ma ijia parentah humbani Kesar Augustus, ase isuratkon sagala jolma na ibagas
gomgomanni. Panuratan na parlobei ma ai, sanggah si Kerenius manggomgomi tanoh Siria.
Jadi misir ma haganup, ase isuratkon, ganup hu huta hasusuranni bei.
2 Misir ma homa si Josep hun Galilea, hun huta Nasaret, laho hu Judea, hu huta ni si Daud, na
margoran Betlehem, halani hun marga ampa humbani ginompar ni raja Daud ia. Laho ma ia
pasuratkon dirini rap pakon si Maria, tunanganni ai, na dob boratan rumah ai. Anjaha
sanggah na ijai sidea, jumpah ma panorangni tubuhan tuah ia.

7 Natal Seksi Bapa GKPS Gunung Datas

3 Jadi itubuhkon ma anak bunga tubuhni, ibaluti ma bani ampan, anjaha ipatibal bani
panggagatan, halani seng dong ianan bani sidea i rumah parbornginan. Jadi adong ma
parmahan marborngin i sampalan na bani ianan ai, manjagai pinahan ni sidea. Jadi roh ma
sada malekat marayak sidea, anjaha marsinalsal ma sangap ni Tuhan inggot sidea, gabe
mabiar tumang ma sidea.
4 Tapi nini malekat ai ma hubani sidea, “Ulang mabiar hanima! Tonggor ma, ai ambilan malas
ni uhur banggal do huboan bannima, parulihan ni ganup bangsa. Ai domma tubuh bannima
saborngin on, i huta ni si Daud, Sipaluah in, in ma Kristus Tuhan in!
5 On ma partinandaan bannima: Jumpahonnima do sada na etek-etek, ibaluti bani ampan, tibal
bani panggagatan.” Jadi sompong adong ma hasoman ni malekat ai, buei bala parnagori
atas, ipuji sidea ma Naibata, nini ma, “Hasangapon ma bani Naibata na i babou, damei ma i
tanoh on bani jolma hinarosuhkon-Ni in.”
6 Dob laho malekat ai humbani sidea dompak nagori atas, nini parmahan ai ma samah sidea,
“Laho ma hita hu Betlehem mangidah na masa ai, na pinabotohkon ni Tuhan in banta.” Jadi
podas ma sidea laho hujai, anjaha jumpah sidea ma tongon si Maria ampa si Josep ampa
Dakdanak ai ibagas panggagatan. Ase dob ididah sidea Ia, ipatugah sidea ma sahap na dob
ihatahon bani sidea pasal Dakdanak ai.
7 Anjaha haganup na manangar ai, longang bei do pasal na hinatahon ni parmahan ai bani
sidea. Ia si Maria iparimbagaskon do haganup hata ai, anjaha ipingkir-pingkiri ibagas uhurni.
Mulak ma parmahan ondi, ipasangap anjaha ipuji sidea do Naibata halani haganup na
tinangar ampa na nididah ni sidea, songon na dob hinatahon hinan bani sidea. Amen.

13. Mandoding Haleluya No. 39:1-2 (sanggah mandoding on, jongjong kuria anjaha
haganup kuria pagara lilin)
1. Sonang ni, bornginni in, sanggah roh Jesus in; Sonang modom do halak ganup dua mando na
puho in rup. Mangoromi Anak-Ni Jesus Tuhanta in.
2. Dear ni borngin ni in, sanggah roh Jesus in. Bai parmahan i Betlehem in,
ipatugah na hun surga in; Domma roh Sipagoluh, Jesus, Tuhanta in.

14. Ambilan
15. Mandoding Haleluya No. 383:1-2 (irik patumpu galangan)
1. Marhitei diatei tupa roh do au Tuhan, mamboban buahni horja na binereMu.
Jesus, Jesus, jalo Ham ma au, bai hurangni panurdukhu, anju Ham ma au.
2. ‘Ge buei na dob hujalo pasu-pasuMu, tapi hurang do hubahen, malas uhurMu.
Jesus, Jesus, jalo Ham ma au, bai hurangni panurdukhu, anju Ham ma au.

16. Tonggo Galangan, Tonggo Panutup, Pasu-pasu (Agenda GKPS)

C. PERAYAAN NATAL
1. Hata Sambutan
2. Galangan Pujian
3. Ramah Tamah
4. Hata pakon Tonggo Panutup

8 Natal Seksi Bapa GKPS Gunung Datas