TATA IBADAH

MINGGU KEMITRAAN
Minggu Kantate
7 Mei 2023

TEMA:
“Hasadaon pakon Pangidangion na Marbuah.”
(Kolosse 1:10)

SUB TEMA:
“Marmalas ni Uhur ma Hita Pataridahkon Buah ni Haluahonta anjaha
Gabe Pasu-pasu i Tongah-tongah ni Gareja, Masyarakat, ampa Negara
Tanda ni na dob Matoras Haporsayaonta.”
(1 Tessalonika 5:16-18; Jesaya 9:2; Psalmen 118:24)

1
DILO-DILO MARHASADAON
P. Horas janah selamat hari Minggu ma hubanta haganup. Bani panorang Minggu
Kantate sadari on, iadongkon hita do Minggu Kemitraan, na patandahon paboa na
marhasoman do GKPS pakon gareja-gareja na adong i tanoh on, bani lingkup lokal,
regional, nasional, age internasional. Parhasomanonta pakon gareja-gareja nalegan ai
aima laho pataridahkon hasadaon ni gareja i tanoh on. Marsiurupan do hita pakon
hasomanta hun gareja na legan ai, aima marhiteihonni horja pangidangion pakon
hasaksian, sonai age hasadaon. Haganupan ai lambin patubuhkon semangat na
maroikumene banta, na isuratkon homa bani ruhut-ruhut ni garejanta. Piga-piga
hataridahan ni parhasomananta pakon gareja-gareja na legan, aima marhitei na
marsitohuan pakon marsiurupan ibagas horja marhasadaon ampa pangidangion pakon
mitranta i Jerman, UEM (United Evangelical Mission), ELCA (Evangelical Lutheran
Church in America), LWF (Lutheran World Federation), PGI, KNLWF, POUK Rindam
Pematang Siantar, sonai age marhitei na patumpuhon Dana August Theis (DAT). Halani
ai, ibagas ibadah Minggu Kemitraan sadari on, ipatumpu hita do galanganta hubani
Dana August Theis (DAT) GKPS, na mangurupi parsikolahanni 120 halak siswa/i
pagori GKPS na hurang mampu secara ekonomi tapi berprestasi. Sadalan hujai,
topik ibadah Minggu Kemitraan sadari on, na bertepatan homa pakon Minggu
Kantate aima, “Dodingkon ma Jahowa, Nasiam Ganup Tanoh on.” Halani ai, riap ma
hita jongjong, puji hita ma Tuhanta, mandoding ma hita.
PRAELUDIUM/PROSESI (Jongjong Kuria)
Doding Haleluya No. 501:1+3
Sada ma ganup na tardilo rup, manjalo Tuhan in. Mandoding rumbuk, marmegah pe rup,
mamuji GoranNiin. Mandoding rumbuk, marmegah pe rup, mamuji GoranNiin.
Sauhur ganup, na porsaya in, ibagas Tuhan in. Lurlur do ijin, pandodingni in, mamuji
GoranNiin. Lurlur do ijin, pandodingni in, mamuji GoranNiin.

1. VOTUM, INTROITUS, TONGGO

P. Ibagas Goran ni Naibata Bapa pakon Tuhan Jesus Kristus ampa Tonduy Napansing,
Sitompa langit pakon tanoh on. Amen.
P. Dodingkon nasiam ma Ia, dodingkon ma puji-pujian Bani, sahapkon nasiam ma
ganup horja halongangan-Ni in.
K. Marmogah-mogah ma nasiam ibagas goran-Ni na pansing in;
P+K. marmalas ni uhur ma sagala sipindahi Jahowa.
P. Haleluya, Haleluya, Haleluya.
K. (mandodingkon) Haleluya, Haleluya, Haleluya.
P. Martonggo ma hita:
Ham Naibata paridop ni uhur na tarsulur. Domma ipasirsir Ham haluahon ampa
hagoluhan marhitei pangkopkopon ni AnakMu Jesus Kristus Tuhannami. Na so ongga
niidah ni mata, na so ongga binogei ni pinggol, anjaha na so ongga tubuh ibagas uhur
ni jolma, ai do ipasirsir Ham bannami janah ai do bona ni puji-pujian na idodingkon
hanami ibagas uhur na martarimakasih hu Bamu sadokah goluhnami. Bamu ma puji-
pujian sonari, ronsi sadokah ni dokahni. Amen. (hundul Kuria)
2
2. DODING HALELUYA NO. 404:1-2
Ganup ari do in, ronsi tahun hu taun, sihol do hudodingkon GoranMu.
Ham Tuhan Naibata, sai hupuji do Ham, halani haganup layakMu. Ham arta na harga,
poltik hujolom in, humbani na hinan, Ham do tong Naibatangkin. Bonani na dear, ronsi
sadokahnin, Panondang na lihar, bai ganup na golap in.
HataMu do Tuhan, hupindahi nuan, bahen suluh bai pardalanankin. Pitah Ham
hansa in, na mambotoh ijin, aha na huporluhon Tuhan. Ham arta na harga, poltik
hujolom in, humbani na hinan, Ham do tong Naibatangkin.
Bonani na dear, ronsi sadokahnin, Panondang na lihar, bai ganup na golap in.
3. HASASAPAN NI DOUSA
P. Riap ma hita jongjong.
Martonggo ma hita, sopotkon hita ma dousanta hubani Tuhan Naibata. Ham Tuhan
Naibata Bapanami, pardear layak anjaha parholong ni uhur hubani haganupan jolma.
Domma ihatahon Ham ase totap hanami marhasadaon, manggoluh ibagas damei ampa
marsihaholongan. Hape gati do ibahen hanami na so hinarosuhkonMu bani goluh
nami. Hurang sirsir do hanami paingathon hasoman. Hotop do pambahenan ampa
parsahapnami mambobai hasoman hubani na hurang dear. Ra ope hanami mamakei
hasoman laho padaskon hisap ampa sura-sura ni uhurnami tumang.
————————– saat hening————————–
P. Ambah ni ai, gati lupa hanami mandalankon tanggungjawabnami i tongah-tongah ni
keluarga ampa rumah tangganami bei. Halani in ma ase roh hanami ibagas unduk
pakon toruh ni uhur hu lobeiMu mansopotkon dousanami
————————– saat hening————————–
P. Maidop ma uhurMu bannami, sasap Ham ma dousanami in. Tompa Ham ma uhur na
bayu bannami, ase ulang inunut hanami mardousa dompak Ham age dompak
hasomannami jolma. Ipindo hanami on hu Bamu, ibagas goran ni AnakMu Jesus
Kristus Tuhannami. Amen.
Tangar anjaha haporsayai hita ma Hata ni Naibata, bagah-bagah pasal hasasapan ni
dousa.
“Ibagas Ia do dapot hita haluahon marhitei daroh-Ni, ai ma hasasapan ni
panlanggaron, domu hubani habayakon ni idop uhur-Ni, na unjah binerehon-Ni banta
ibagas hapentaron ampa hauhuron.” (Epesus 1:7-8)
Ibagas holong ni Naibata, domma isasap haganup dousanta. Halani ai, pataridahkon
hita ma tanda-tanda ni pargoluhon na bayu. Hasangapon ma bani Naibata i babou.
K. Amen.
(hundul Kuria)
4. DODING HALELUYA NO. 151:1-3
Dong do bah tubuh dear in, bai na mardousa in;
Jenges tumang bah tubuh in, pasonang uhurhin.
Bah tubuh na mapansing in, in ma Jesusta in;
Isasap do siningta in, ibuat horungkin.
Ai daroh ni Tuhanta in, in do bah tubuh in,
durus i Golgata do in, manghopkop hita on.
3
5. HATA HAPORSAYAON
P. Riap ma hita jongjong!
Saksihon hita ma haporsayaonta in, songon na sinaksihon ni haganup halak na porsaya
bani sab tanoh on!
P+K Ahu porsaya bani Naibata Bapa. Amen.
(hundul Kuria)
6. REFLEKSI PASAL KEMITRAAN HUMBAGAS BIBEL
P. Hita haganupan, mamungkah humbani na hinan domma ibotoh jolma in pasal
kemitraan ni jolma samahjolma. Kemitraan ai pataridahkon paboa sahalak jolmalang
boi manggoluh pitah sahalaksi i tanoh on. Porlu do jolma marsiurupan, laho
patorsahon janah pajengeskon goluhni sonai homa mambaen tanoh on gabe ianan na
talup iiankon. Aima semangat ni kemitraan pakon gerakan oikumene i tanoh on,
tarmasuk ma banta i GKPS. Hata ni Tuhan na ibagas Bibel pe mangajari hita
pasal goluh ni jolma na marmitra pakon na legan.
Namaposo 1 Ise na lang manandai Musa? Ia do na mambobai halak Israel manadingkon
Masir manuju hu tanoh Kanaan. Adong hira-hira onom ratus ribu dalahi na
ibobaini, leganni naboru pakon dakdanak. Siap sogod, marrohando sidea
manjumpahi Musa laho manungkun uhum humbani Naibata. Roh ma
Musa padaskon uhum hubani sidea anjaha pabotohkononni ma paraturan ni
Naibata pakon titahNi. Tapi, seng dear na binahenni ai anggo mangihutkon
pangidahni tulang simatuani, aima Jetro. Mandatei do ia halani maborattu
horja ni ai.
Loja ia mamodahi bangsa ai, anjaha bangsa ai pe loja dopaima-imahon
panorangni pajumpah pakon Musa. Ipodahi Jetro ma Musa marhitei
na mangkatahon ase bermitra ma ia pakon pagori ni bangsa ai, aima
marhiteihon na ipabangkitni pangintuai, na manggomgom bangsa ai mar
sasaribu, mar sasaratus, marlima-lima puluh ampa mar sasapuluh. Ibahen
Musa ma ai anjaha jenges do hadobanni. Musa lang marbois gogoh
mamodahi bangsa ai, anjaha bangsa ai pe lang loja paimahon panorang
manjalo uhum pakon parentah ni Naibata humbani.
P. Kemitraan ai pajonamhon potensi na dong i tongah- tongahta ase ipakei laho
mangidangi hasoman. Ganup pagori ni GKPS boi mamakei potensi na dong bani
bahen hatotorsa ni horja pangidangion i tongah- tongahni kuria in. On ma kemitraan
internal na boi imaksimalhon hita i tongah-tongah ni gareja.
Namaposo 2 Idingat hita do raja Salomo? Raja na sangap do ia. Maruhur homa. Seng
dong raja na manggoluh songonsi i lobeini barang na tubuh i pudini. Ibere
Tuhan do habayakon pakon hasangapon bani. Tapi age pe sonai goluhni,
totap do ia marmitra pakon na legan. Lang sempurna harajaonni. Sanggah
laho pajongjongkon rumah panumbahan ijia, marpangindoan do ia hubani
raja ni Tirus, aima Hiram, ase isuruh Hiram ma pagorini manroboh hayu ares
hun Libanon pakon hayu ingul hu bani, halani seng dong i tongah-
tongah ni halak Israel na mambotoh manroboh hayu. Ihadearhon Hiram do
pangindoanni raja Salomo ai, tapi ia pe mangindo do hubani raja Salomo ase

4
 ipasirsir raja Salomo ma bohal bani pangisi ni rumahni. Jadi iberehkon raja
Hiram ma hayu ares pakon hayu ingul hubani Salomo, anjaha iberehkon
raja Salomo ma dua puluh ribu kor gandum pakon dua puluh bat minak na
pinoroh. Ihorjahon sidea ma ai ganup tahun ronsi jongjong rumah
panumbahan in.
P. Kemitraan ai sirsir mamberehkon aha na dong banta. Sedo na lang dong. Jadi aha na
dong banta sonari, domma boi gabe bohal laho marmitra pakon na legan. Lang
maningon ipaima-ima hita lobei bayak janah marhinadongan kurianta ase boi marmitra
pakon na legan. On ma kemitraan eksternal na boi iadongkon antara kurianta pakon
kuria na legan. Halani na marsanina do hita on haganup ibagas Tuhanta Jesus Kristus.
6 halak ASM (mandodingkon) “Dalam Yesus Kita Bersaudara”
(hata Indonesia pakon Jerman)
Dalam Yesus kita bersaudara. Dalam Yesus kita bersaudara.
Dalam Yesus kita bersaudara, sekarang dan selamanya.
Dalam Yesus kita bersaudara.
Wo Jesus wirkt, sind wir alle vereint.
Wo Jesus wirkt, wird der Fremde zum Freund. Wo Jesus wirkt,
schafft er uns Einigkeit,
jetzt und für alle Ewigkeit.
Wo Jesus wirkt, sind wir alle vereint.
7. ACARA KHUSUS
a. Mambasa/Manaksihon Video Tonah ni Pimpinan Sinode GKPS
b. Galangan Koor/Vokal Grup
c. Tingting Kuria
d. Tonggo Pangapition

8. DODING PELENGKAP KIDUNG JEMAAT (PKJ) NO. 15

Kusiapkan hatiku, Tuhan, menyambut firmanMu, saat ini.
Aku sujud menyembah Engkau dalam hadiratMu, saat ini.
Curahkan pengurapanMu kepada umatMu saat ini.
Kusiapkan hatiku, Tuhan, mendengar firmanMu.
FirmanMu, Tuhan, tiada berubah,
sejak semulanya dan s' lama-lamanya tiada berubah.
FirmanMu, Tuhan, penolong hidupku,
kusiapkan hatiku, Tuhan, menyambut firmanMu.

9. AMBILAN: 1 KRONIKA 16:23-28

10. GALANGAN
P Paima iondoskon hita galanganta, tangar hita ma lobei hata ni Naibata na gabe onjolan
banta laho manggalang, aima na tarsurat bani 2 Korint 9:7, “Ganup ma jinuljul ni
uhurni, ulang ma humbani borat ni uhur atap halani paksa, ai ihaholongi Naibata do
halak na malas uhur mambere.”
Sonari ondoskon hita ma galanganta!
5
K (mandodingkon “Betapa Hatiku”)
Betapa hatiku berterima kasih, Yesus.
Kau mengasihiku, Kau memilikiku.
Hanya ini Tuhan, persembahanku, segenap hidupku, jiwa, dan ragaku.
S’bab tak ku miliki harta kekayaan,
yang cukup berarti 'tuk ku persembahkan.
Hanya ini Tuhan, permohonanku, terimalah Tuhan persembahanku.
Pakailah hidupku sebagai alat-Mu seumur hidupku.

11. TONGGO PAKON DODING GALANGAN

P Riap ma hita jongjong!
Martonggo ma hita mangondoskon galanganta hubani Naibata!
Ham Tuhan Naibata Bapanami, harohan ni haganup. Hun Bamu do harohan ni pasu-
pasu hu bannami. Ibere Ham do bannami goluh ampa hagoluhan ari-ari. Ham Tuhan,
ijon iondoshon hanami do hu Bamu goluh pakon pasu-pasu na dob binereMu in
bannami. Sai lambin margogoh ma tongon hanami ihasomani idop ni uhurMu ampa
pasu-pasuMu bani na mandalankon horjanami. Papansing Ham ma galangan na
ginalangkonnami on gabe galangan na misbou i lobei-lobeiMu, ase lambin
ihargahon hanami tongon dear layak pakon pasu-pasuMu in marhitei na pasaudhon
harosuhMu humbani gogoh, pingkiran ampa sinadongannami. Tarima kasih ma Bamu
Tuhan. Marhitei Kristus Jesus Tuhannami, jalo Ham ma galangan pakon
tonggonami on. Amen.

K (mandodingkon Haleluya No. 5:4)

Bamu sadokah ni dokahni, au on o Jesus Tuhankin; Ham ma lah haganup ompungni,
gogohku pakon artangkin; Ai iberehon Ham darohMu, manggalar utang ni dousangku.

12. TONGGO HAM BAPANAMI

P Ham Bapanami na i nagori atas. Sai na papansing ma Goran-Mu. Sai roh ma
harajaon-Mu. Sai saud ma harosuh ni uhur- Mu i nagori tongah on songon na
i nagori atas. Bere Ham ma bannami sadari on hagoluhan ari-ari. Sasap Ham ma
dousanami songon panasapnami bani dousa ni hasoman na mardousa dompak
hanami. Ulang hanami bobai Ham hu parlajouan. Paluah Ham ma hanami
humbani pangagou.
K (mandodingkon) Ai Ham do simada Harajaon pakon Hagogohon ampa Hasangapon
sadokahni-dokahni. Amen.

13. PAINGKATKON
P Misir ma nasiam, janah gabe siboan pasu-pasu ma ham,anjaha sari bani ganup
halak.

14. PASU-PASU
P Jalo ham (hita) ma pasu-pasu humbani Tuhan Naibatanta: Ipasu-pasu anjaha iparorot
Tuhan Naibata ma ham (hita). Isondangkon Tuhan Naibata ma bohi-Ni hu bamu (hu
banta) janah maidop ma uhur-Ni mangidah ham (hita). Idompakkon Tuhan Naibata na
bohi-Ni hu bamu (hu banta) janah ipasorap ma damei-Ni bani tonduymu (tonduyta

6
 bei). Amen.
K (mandodingkon) Amen. Amen. Amen.