TATA IBADAH

PARTONGGOAN OLOB-OLOB
KELUARGA GKPS
Jumat, 2 September 2022

Tema:
Hasadaon pakon Pangidangion na Marbuah (Kolosse
1:10)

Sub Tema :
Mangarahkon Kuria Marsitungkolan pakon
Marsipatoguhan ampa Marsipardiateian
Mandompakkon Paruntolon ni Goluh
I. Doding Pamungkah
Mandoding Haleluya No. 408:1-2 “ Haleluya Puji ma Tuhan”
1. Haleluya puji ma Tuhan, pasangap marhiteihon gondrang na laingan
Irandu pakon inggou na lurlur homa tangaron
Dodingkon ma doding na baru, Puji ma Ia bai hotakNi na ibabou
Janah olobkon ma riap marmalas uhur.
Sai tarbarita baen goran-Ni, Gok halongangan ganup jadi-jadian-Ni
Puji Tuhan Haleluya!
2. Marmegah gok tarima kasih, Halani ganup pasu-pasu ‘ge layak-Ni
Hubanta na totap sirsir tong mambalosi.
Tunggung tumang do tong Tuhanta, Ia do Raja ni ganup sagala raja
Ningon hu Bani do unduk ganup marsombah
Sai tarbarita baen goran-Ni , gok halongangan ganup jadi-jadian-Ni
Puji Tuhan Haleluya

II. IBADAH
1. Votum – Introitus – Tonggo
P : Ibagas goran ni Naibata Bapa pakon Tuhan Jesus Kristus pakon Tonduy
Napansing sitompa langit pakon tanoh on. Amen
“Ai idop ni uhur-Mu dearan do ai ase hagoluhan; sai pujion ni bibirhu do
Ham. Sonai ma, sihol do pujionku Ham sadokah ahu manggoluh, marhitei
goran-Mu hupaherbang do tanganku dompak datas.”
P+K : Haleluya
P : Martonggo ma hita!
Ham Tuhan Naibata Bapanami marhitei Jesus Kristus na tongtong
mangkaholongi hanami. Diateitupa ma isombahkon hanami hu Bamu, halani
iramoti anjaha ipaluah Ham do hanami humbani gomgoman ni dousanami.
Domma 119 Tahun ondos Ambilan na Madear in hutongah-tongahnami, in
ma hataridahan ni idop ni uhur ampa dear layak-Mu. Halani ai useihon Ham
ma Tonduy-Mu mambuhai uhurnami ase lambin marhasadaon hanami janah
sirsir mangidangi Ham sadokah goluhnami. Ibagas Jesus Kristus Raja ni Kuria
janah Sipaluah in hanami roh martonggo. Amen

2. Doding Haleluya No. 219 : 1, 3 “Marmegah-megah hita on”

1. Marmegah-megah hita on mamuji Naibata.
Ai idop ni uhur-Ni do na masuk bai uhurta in.
Ibaen nuan mardomu in,
ijon sadari on, ijon sadari on
2. Halani ai sai gogoh bei, ganupan hita on.
Mamuji Tuhan Jesus in, parholong atei banggal in.

2
 Sibahen hamegahon in
Ronsi magira pe, ronsi magira pe.

3. MAMBASA PSALMEN 23: 1-6 (RESPONSORIA)

P. Jahowa do siparmahan ahu, seng anjai hurangan ahu .

J. Ipatudu do ahu bani sampalan na mombur,
P. anjaha itogu-togu do ahu hu bah parsaranan.
J. Ipahisar do tonduyhu,
P. Itogu do ahu bani dalan hapintoron
J. halani goran-Ni in.
P. Age pe mardalan ahu bani lombang bagas ni hagolapan,
J. seng mabiar ahu,
P. ai Ham do mangkasomani ahu;
J. tungkot-Mu pakon simambu-Mu do na mangapohi ahu.
P. Ham do na mangidangi ahu
J. i lobei ni munsuhku,
P. Iminaki Ham do ulungku anjaha sirnib do panginumanku.
J. Dear layak ampa idop ni uhur do mangirik-irik ahu sadokah goluhku;
P. janah sihol do marianan ahu i rumah ni Jahowa sadokah ni dokahni.

PJ. Mandodingkon Haleluya No. 127:1

Jahowa siparmahan au, aha pe lang hurangni. Na sambor pe sai ipalao do
humbai pinahan-Ni. Tudu ibaen na lambut in. lao pagoluhkon tonduyhin,
ibaen holong atei-Ni

4. Doding Haleluya No. 448: 1-2 “Mantin ni in do hape”

1. Mantin ni in do hape, padan ni Tuhan Jesus
Pamalas uhur tene, bai ganup na tinobus
Dear tumang padan-Nin, na gabe sijoloman
Patoguh uhur do in bai na marpangarapan
Sai hagolukon ma in baen rudang hajengeson
Ase sonang ham ijin gok Tonduy Hasintongan
Hinalayak-Ni do in pasirsir haluahon
Janah damei uhurmin jumpahan hagoluhan

2. Sai jalo Ham Tuhan in na gabe Siparmahan

Baen hatengeran do in ronsi na ondos padan
Seng habiaran be in pori aha na masa
Ai seng ijin ujungnin, goluh ni na porsaya
3
 Sai hagolukon ma in baen rudang hajengeson
Ase sonang ham ijin gok Tonduy Hasintongan
Hinalayak-Ni do in pasirsir haluahon
Janah damei uhurmin jumpahan hagoluhan

5. Renungan 1 Johannes 4:14

“Domma iidah anjaha isaksihon hanami, paboa domma isuruh Bapa in
Anak-Ni, ai ma Sipaluah dunia on.”
“Dan kami telah melihat dan bersaksi, bahwa Bapa telah mengutus
AnakNya menjadi Juruselamat dunia.”

Horas ma hubanta haganupan …

Bani panorang sadarion, gok ma 119 tahun Ambilan Na Madear in
marianan i tongah-tongah ni halak Simalungun, na ipungkah marhitei
pardas ni Pandita August Theis pakon hasomanni i Pamatang Raya bani
tanggal 2 September 1903. Ijia, Pandita August Theis isuruh badan
zending na i Jorman, na margoran Rheinische Missiongesellschaft (RMG),
ase misir hu Sumatera Timur laho mambaritahon Ambilan Na Madear in.
Sasintongni lang pitah ia hansa na isuruh badan zending ase roh hu piga-
piga ianan laho mambaritahon Ambilan Namadear, tapi dihut do homa
misionaris na legan, songon Pandita Guillaume. Aha do na iambilankon
sidea hubani halak Simalungun ijia? Seng dong na legan sobali barita pasal
Tuhan Jesus Kristus. Tujuan ni ganup misionaris ai ase pala manadingkon
huta ni bei aima laho mambaritahon Ambilan Namadear hu huta na
madaoh janah sonaha ase ganup bangsa mananda anjaha porsaya bani
Jesus Kristus, paboa Ia do Sipaluah bani jolma humbani dousa pakon
hamateanni. Isuruh Naibata do Jesus hu tanoh on laho paluahkon jolma
humbani dousa, marhitei na dihut Ia manaronkon dousa ni jolma bani hayu
parsilang. Ai do na ibaritahon misionaris hu ianan-ianan na irohi sidea. Ai
homa do na iidah anjaha isaksihon susian ni Jesus, songon na isuratkon
Johannes ibagas teksta sadari on. Ia mangidah, mangarusi anjaha
manaksihon paboa Jesus aima Sipaluah ni dunia on.

Kuria ni Tuhan …
Hunja do mungkah ni pangarusion? Balosni aima humbani habotohon.
Hunja do mungkahni habotohon? Balosni aima humbani biar mangidah
Jahowa do (Podah 1:7). Ase, halak na mabiar mangidah Jahowa do na
marpangarusion ronsi marhabotohon. Mardomu hujai, hunja do mungkah
4
 ni hasaksian pasal Jesus Kristus? Balosni aima humbani aha na ididah
pasal-Si. Tapi, boi do halak marsaksi pasal-Si age pe lang ongga
mangidah-Si? Balosni aima pitah halak na marhaporsayaon hu Bani do.
Ase, halak na mangidah ronsi porsaya hu-Bani do na marsaksi pasal-Si. Ai
ma homa na gabe ruji-ruji banta bani pardingatan 119 tahun pardas ni
Ambilan Na Madear hu tanoh Simalungun. Dihut do hita gabe halak dob
mangidah, marhaporsayaon, pakon marsaksi pasal Kristus?.

Lobih ma 2 tahun idompakkon hita pandemi Covid-19. Anggo isungkun,

adong do humbanta na ongga mangidah bentuk ni virus Corona ai? Ra
mahol tumang do ase boi iidah hita bentuk ni virus Corona ai. Tapi,
porsaya do hita paboa adong do virus ai, halani gati do itangar hita
hatorangan humbani dokter atap pemerintah pasal virus ai i media cetak
atap elektronik. Ase, age pe lang iidah hita bentuk ni virus nidokan, tapi
halani marlambin-lambin do itangar hita pasal virus ai ronsi pangkorhonni,
gabe tubuh ma haporsayaon paboa maningon jorgit do angkula diri ase
ulang terpapar bani virus ai. Ai do ase ra hita mamakei masker, disiplin
cuci tangan, anjaha manjaga jarak, sonai homa manjalo vaksin. Domu
hujai tangkas ma, paboa humbani na manangar tumang pe (tanpa
mangidah) boi do patubuhkon haporsayaon. Ai do homa na isuratkon
apostel Paulus ibagas Rom 10:17, “Ai humbani na manangar ambilan do
roh ni haporsayaon, anjaha ambilan ai roh humbani hata ni Kristus.” Jadi,
Ambilan Namadear na dob ipatangarhon hubanta sadokah 119 tahun on,
lang mungkin lang patubuhkon haporsayaon i tongah-tongahta, paboa
Jesus do Sipaluah banta, lang adong na legan.

On ma na selanjutni maningon gabe hasaksianta. Jadi, sebagai kuria ni

Tuhan na mamestahon 119 tahun pardasni Ambilan Namadear, tugasta
aima marsaksi pasal Ambilan Namadear na dob ijalo hita. Hasaksian ai
lang pitah maningon i gareja. Boi do homa i tongah-tongah ni iananta
marhorja atap i tongah-tongah ni keluarga. Na tang siporlunan humbani
hasaksian aima barita na dos pakon aha na masa sasintongni. Ibagas hata
na legan, na ipindo humbani sahalak saksi aima integritas atap pe
kejujuranni pasal aha na isaksihonni. Ai do ase bani mungkahni
renunganta i atas, itekanhon do paboa maningon iarusi na marsaksi do
pasal na isaksihonni. Sonaha ase boi mangarusi na isaksihonni? Balosni
aima halani ibotoh. Sonaha ase boi ibotoh? Balosni aima anggo tubuh biar
5
 ibagas dirini mangidah Jahowa. Ase, hasaksianta aima hasaksian na tubuh
humbani biar mangidah Jahowa, sedo mabiar mangidah jolma. Hunjon ma
hita heja mareta-etah, aima marsiarahan laho marsaksi, ija bei pe hita nuan
marianan. Amen.

6. Doding Haleluya No. 299: 1-2 “Domma ihopkop Tuhanku Tonduyhu”

(irik patumpu galangan olob-olob)

1. Domma i hopkop Tuhanku tonduyhu ase maluah tonduyhu tongtong

Domma isasap Tuhanku dousangku ase manggoluh tonduyhu tongtong
Malas uhurhu megah uhurhu lao pasangapkon Tuhan bai goluhkon.
Nai ma hapeni holongni ateiNi hita pe patut marholong tongtong
2. Domma ipilih Tuhanta ge hita, lao manaksihon holongni tongtong.
Domma isuruh Tuhanta ge hita, lao mangkatahon Hata-Ni tongtong.
Laho ma hita misir ma hita, mangambilankon Tuhan parholong in.
Ase maluah homa hasomanta, gabe manggoluh bai Tuhanta in.

7. Tonggo Pangapition – Panutup – Pasu-pasu

(Martonggo margantihan)
Sitonggohonon:
 Pangkorhon Covid-19 na lang marnasalpu ope, hasoman na terpapar
pakon keluarga na marpusok ni uhur.
 Pargoluhon ni keluarga pakon horja siganup ari ase totap ipasu-pasu
Tuhan janah mangkorhon buah na madear
 Kuria (PHMJ, Majelis Jemaat, Pandita pakon Penginjil, ampa
Pimpinan Sinode GKPS) ase margogoh laho mangkorjahon haganup
horja pangidangion bahen hasangapon ni Tuhan.
 Bangsa ampa Negara, Pemimpin ronsi masyarakat ase margogoh
mandompakkon ampa mangatasi na masa nuan.
 Pakon na legan …

P. Riap ma hita martonggo marhitei tonggo na niajarhon ni Tujan Jesus

hubanta!
P+K. Ham Bapa nami………………..Amen.
P. Idop ni uhur ni Tuhan Jesus Kristus, pakon holong ni atei ni Naibata
Bapa ampa parsaoran ni Tonduy Napansing ma mangkasomani hita
haganupan. Amen.
P+K (Mandodingkon) Amen, Amen, Amen.
6
Ijon iondoskon hanami galangan olob-olob humbani keluarganami:

Keluarga : _____________________________________

Bueini Rp.______________ ( ……………………………………………………. )

Humbannami Na Manjalo

( )
( )

7
8