HKBP IMMANUEL BIDA AYU

RESSORT BARELANG
JUMAT, 04 MARET 2022
 PARTANGIANGAN PARHALADO DOHOT KELUARGA
HKBP SA-RESSORT BARELANG

 ACARA PARTANGIANGAN

 BAHAN SERMON

1. Evangelium & Epistel 06 Maret 2022 (Pdt. Juni Saor Parasian Sirait, S.Th)

2. Evangelium & Epistel 13 Maret 2022 (Pdt. Kristina Sibarani, S.Th)

3. Evangelium & Epistel 20 Maret 2022 (Bvr. Sumedang Elida Simanjuntak)

4. Evangelium & Epistel 27 Maret 2022 (Pdt. Parlaungan Pangaribuan, S.Th)

 INFORMASI

1
 ACARA PARTANGIANGAN PARHALADO DOHOT KELUARGA
HKBP SA-RESSORT BARELANG
1. Marende B.E No. 574: 1+3 “Puji Ma Debata”
 Puji ma, puji ma Debata, na nianNa do umpuji Debata
Nunga sesa dosami, malum dohot rohami
Puji ma, puji ma Debata, na nianNa do umpuji Debata
---Jongjong---
 Tagam ma, tagam ma Tuhan I, sai pagalak ma tongtong palitomi
Lam jonok ariNa I, salpu parungkilon i.
Tagam ma, tagam ma Tuhan I, sai pagalak ma tongtong palitomi
2. Votum/Introitus
U: Marhitehite Goar ni Debata Ama dohot Goar ni AnakNa, Tuhan Jesus
Kristus dohot Goar ni Tondi Parbadia, na tumompa langit dohot tano on.
Amen.
Songon on do didok Tuhan Jahowa: Jouonna ma Ahu, jala alusanku ma
ibana, sai dongananKu do ibana jumpang hagogotan, paluaonKu do ibana
jala marmulia ibana bahenonKu. Sai pamahaponKu do ibana sarimatua.
Martua do na hundul di pangondingan Natumimbul I jala na mian di
linggoman ni pargogo na so hatudosan, na mandok tu Jahowa:
Haporusanku jala partanobatoanku, Debataku, marhaposan tu Ho do ahu.
HALELUYA.
Martangiang ma hita: Ale Tuhan Debata, Ama ni saluhut parasirohaon!
Nunga ditatap Ho hami bangsoM on, ai ndang manjua Ho mangalehon
AnakMu na sasada I, Tuhan Jesus Kristus tu tangan ni pardosa, asa
taononNa haleaon dohot siak ni bagi sahat ro di hau na pinarsilang. Sai
tumpahi hami marhitehite asi ni rohaM, asa margogo hami jala marbenget
ni roha songon anak haholongan ni rohaM i di angka sitaonon, asa
marsangap GoarMu dohot AnakMu, Tuhan Jesus Kristus dohot Tondi
Parbadia marhitehite hami. Amen

2
3. Marende B.E No. 214: 1-2 “Sonang Di Lambung Jesus”
 Sonang di lambung Jesus, sonang na ro tusi
Unang be ho mabiar lao mandapothon i
Tongtong dijouhon Jesus: “Sai ro ma tu Au,
tadingkhon haholomon jala haposi Au.”
Sonang di lambung Jesus sonang na ro tusi
Unang be ho mabiar lao mandapothon i.
 Sonang di lambung Jesus, rap hita lao tusi
Inganan na umuli do di lambungNa i
Ai nunga diparade hasonanganta i,
Asa marhasonangan na ro tu Jesus i.
Sonang di lambung Jesus, rap hita lao tusi
Inganan na umuli do di lambungNa i
4. Konfessi HKBP 1996 Bindu 9
5. Marende B.E No. 651: 1
 Huria na huhaholongi hami napinajongjong ni Tuhanta i.
Tung naso lupa sian roha name. huria i dohot ruas na i.
Di nasa hasusaan tongtong do i Manahan.
Manggopo pe angka galumbangi, Tuhanta do na pademakho i
Martua do na hot di Tuhan i.
6. Manjaha Hata Ni Debata: Rom. 10: 8-13 (Epistel tu hari Minggu)
U: Hata ni Debata na gabe turpuk Epistel di partangiangan bodari on tarsurat di
Rom. 10: 8-13, tajaha ma marsingkat soring: On do tahe didok: “Talpe do
di ho hata I, di bagasan pamanganmu dohot di bagasan roham do.” I do
hata haporseaon i na hubaritahon hami.
H: Ai malua ma ho molo diparhatopot pamanganmi Tuhan Jesus I huhut
dihaporseai roham naung dipahehe Debata Ibana sian angka na mate.
U: Ai roha i do porsea, asa tu hatigoran; pamangan i do
manghatindanghon, asa tu haluaon. Ai didok surat i do: “Ndang
sipailaon nasa na porsea di Ibana.”
H: Ai ndang adong imbar ni Jahudi manang Gorik; ai sada do Tuhan ni
saluhutna, naung marbasabasahon sian hamoraonNa tu saluhut angka na
manjou Ibana.
U: “Ai malua do ganup na manjou goar ni Tuhan i.” Ima sahat na: Martua do
angka na tumangihon hata ni Debata jala naumpeopsa. Amen

3
7. Marende B.E No. 435: 3 “Marolopolop Tondingki”
 Tu Jesus sahat ngolungki saleleng ni lelengna i
Rap dohot au endehon ma endengku na imbaru da
Sonang ni tingki i, dung jumpang Jesus Tuhanki
Tondi Na mangajari au, Tarbahen marlas ni roha au.
Sonang ni tingki i, dung jumpang Jesus Tuhanki.
8. Responsoria: Tapangido Ma Gogo Sian Tuhan I
U: Ida ma, nunga dipatuduhon tu hamu habisuhon na sian TUHAN I, sai jalo
ma i, jala pangasahon i di nasa ulaonmu siganup ari.
H: suru ma hami TUHAN, jala lehon ma bisuk dohot hatuaon asa boi
hupajongjong hami hasintongan dohot hatigoran laho patujolohon
hasintongan dohot mangalo angka roha sipaulaula.
U: Tanda ma pasupasu na binasabasahon ni Debata di ngolumi; Tondi
pangantusion ma na patau hita mananda lomo ni rohaNa marhite panjouon
dohot ulaonta be.
H: Ale Tuhan, hujanghon hami ma Ho di ngolunami. Sai togutogu ma hami tu
dalan hasintonganMi.
U: Halak na bisuk dohot na marroha patuduhon haporseaonna marhite parange
na denggan, halambokhon, hadamehon, parasi ni rohaon, haundukhon,
dohot pasidinghon angka ragam ni pangarupaon.
H: Ale TUHAN, pargogoi ma hami pasauthon dameMi di tongatonga
portibion.
U: Habisuhon ni Debata manogunogu partigor mangulahon ulahonna.
Pangatusion na sian Debata patauhon huhut mangalehon sahala tu ulaon i,
na margogoi ibana pasidinghon angka pangarupaon dohot jengkeljengkel ni
portibion. Nang roha sipaulaula.
H: Ale Tuhan, hupangido hami ma tu Ho: Lehon gogo dohot hatauon tu sude
parhalado ni huriaM, lehon ma hasadaon di hami, hot ni haporseaon,
pauliulihon parsaoran ditongatonga ni huriaM, dohot pauliulihon bagas
joroMon, asa dipatiur jala dioloi hami Ho songon na binahen ni AnakMu
Tuhan Jesus Kristus; asa taruli hami di pasupasu nauli jala na denggan
hombar tu lomo ni rohaM asa gabe Ama na marsahala, Soripada na
marhuaso, jala angka ianakhon sioloi ajar hami saluhutna.
U: Ditogutogu habisuhon ni Debata do halak partigor di nasa ulaonna asa
marsihohot mangolu dibagasan na marhabiaran mida Debata. Jala
habisuhon ni Debata manjagai di nasa ulaonna, huhut dilehon huaso asa
4
 dipadao sian nasa mara dohot sangkapsangkap ni portibi on. Antong
habisuhon na sian Debata margogoihon angka na serep marroha laho
pajongjonghon hatigoran. Hatauan na sian Debata manjagai angka
naposoNa sian halak na geduk roha.
9. Marende B.E No. 250: 3 “Sitostosi Nasa Ihot”
 Ala nii togihon hami sahat tu na sun denggan
Sai oloi tangiangnami, lomo ni rohaM hian.
Tatap hami na marlea, ala pinarsilangMi.
Angka na tongtong porsea di hataM na sintong i.
10. Tangiang Pangondianon
11. Marende B.E No. 417: 1+3 “Rade Situtu Haluaon”
 Rade situtu haluaon na naeng tangkupon mu antong
Rade nang di ho hatuaon, si halashononmu tongtong
Bernit do di taon Tuhanmu pa saehon dosam sasude
Tung unang paujat Ibana, sai jangkon panghophopNa i.
 PanghophopNa i parangehon, pasangap Tuhanmu antong
Ibana buas mangalehon tu ho hasonangan tongtong.
Sandok sian holso malua, nang sian biarmu sude.
Sonang ma ho na martua, manghirim tongtong surgo i.
12. Jamita
13. Marende B.E No. 178: 1-3 “Ro Ma Tu Jesus” (Papungu Pelean)
 Ro ma tu Jesus, ro ma tibu, bege hataNa jangkhon burju
Na ro do Jesus pangoluho, asal porseaho
Mansai las rohanta i muse, molo ias sian dosa pe.
Sai ro ma hita tu surgo i, laos sonang ma disi.
 Ro ma tu Jesus, undukhon ma pambahenanmu na so tama.
Naeng sesaonNa do dosami dibaen mudarNa i.
Mansai las rohanta i muse, molo ias sian dosa pe.
Sai ro ma hita tu surgo i, laos sonang ma disi.
---Musik---
 Ro ma tu Jesus, hatop ho ro, ai so ditulak Jesus be ho.
Na asi roha do Jesus i, sai pos ma rohami.
Mansai las rohanta i muse, molo ias sian dosa pe.
Sai ro ma hita tu surgo i, laos sonang ma disi.
14. Tangiang Pangujungi + Pasupasu

5
 SERMON PARHALADO HKBP SA-RESSORT BARELANG
MINGGU INVOCAVIT 06 MARET 2022
EVANGELIUM (ROM 10 : 8 – 13)
TOPIK : MALUA DO GANUP NA MANJOU GOAR NI TUHAN I

1. Diturpuk on diondolhon Ap Paulus asi ni roha dohot haluaon ni jolma jaloon

marhite haporseaon, ndada marhite na mangulahon patik songon na pinodahon ni
Jahudi. Malua do ganup na manjou goar ni Tuhan i, ninna si Paulus di turpuk on.
Haluaon do sintasinta ni jolma, malua sian hamatean, sian hapogoson, sian
parungkilon, sian halojaon, dohot sian parsahiton. Mangeahi haluaon i dilului
jolma do ragam ni pangurupi, dohot boi do marhite na “maraskese
(bermeditasi)”, hape ndang jumpang haluaon na sasintongna i di ngoluna.
Mangihuthon Jahudi, marhite na mangulahon patik do ro haluaon, ala ni poda i do
ditulak Jahudi Tuhan Jesus Kristus. Ndang dihaporseai nasida Jesus Kristus siboan
haluaon, marhite na manghaporseai hatutubuNa, hamamateNa dohot haheheonNa
sian mate, disi do jumpang jolma i haluaon na sasintongna.
2. Didok Ap Paulus ndada marhite na mangulahon patik malua jolma sian dosa,
holan marhite asi ni roha ni Debata sambing do. Ringkot do patik i radotan na
mangihuthon Jesus Kristus, alai fungsi ni patik ndada mambahen jolma tu
haluaon, alai mamboan tu panandaon di hadirion na gok dosa dohot hagaleon do.
Ai ndang tarjalo jolma haluaon marhite pambahenan, alai marhite haporseaon do.
I do naniondolhon ni Ap Paulus (ay.9). Pandohan, molo diparhatopot pamanganmi
Tuhan Jesus i, ima patuduhon marhite panopotion ni Dosa do boi jaloon asi ni
roha i. Boi do sahalak mangulahon patik, alai ndang diparhatopot dosana. Asi ni
roha ni Tuhan i dipatuduhon Ap Paulus di (Rom 3 :24-26), marhite hata
“dipintori”, “dihophop” dohot “ditobus”. Marhite hata dipintori dipatuduhon
hadirion ni jolma di panguhuman/pengadilan ni Debata. Ala dosa ni jolma ingkon
madabu uhum ni Debata tu jolma. Hape ala asi ni rohaNa dipintori jolma asa
malua sian dosana, ima asi ni roha ni Tuhan i. Marhite pandohan dihophop
dipatuduhon na dihophop Jesus do jolma umbahen malua, ndada ala pambahenan.
Aut so ro Jesus manghophop jolma ndang mardame jolma dohot Debata
3. Marhite pandohan “ai roha i do porsea, asa tu hatigoran, pamangan i do
manghatindanghon asa tu haluaon”. Dipaingot si Paulus Jahudi
dihasomalannasida na ringgas pasahathon pelean hombar tu patiknasida, hape
ndang porsea di Tuhan i, ditulak do, diparsilanghon jala dibunu do Tuhan Jesus
Kristus Sipalua i. Mangihuthon pingkiran nasida marutang do Debata tu nasida
6
 molo diulahon patik i. Alani i ma didok si Paulus, jolma i do na marutang tu
Debata, ndang adong sipangasahonon ni jolma i tu Debata. Molo nunga porsea
sada halak tu Debata, nunga pasti ibana mangulahon na denggan dijolo ni Debata.
Ndang dijamin pangaradotion di patik haporseaon tu Debata, ai boi do diradoti
patik i ala hasomalan dohot ala mabiar tu sangsi ni patik i sandiri. Alai angka na
porsea tu Debata dipangke do patik i manogunogu pardalananna laho
mandapothon Tuhan i, huhut paingothon ngoluna di jorbut ni dosa na sai
mangelaela ngoluna. Haporseaon nanidok ni Ap Paulus ima kepatuhan dohot pos
ni roha di hagogoon ni Tuhan i. Ringgas do Jahudi mangulahon patik, alai ndang
unduk tu Debata, ai diula do sogo ni roha ni Tuhan i. Diradoti do patik i alai
mangunsande tu hagogoon ni portibi on.
4. Tubu haporseaon di rohanta marhite na manangihon hataNa. Ndang sian dia
dalanna tubu haporseaon di rohanta molo so tangkas hita manangihon hataNa.
Ndang tubu haporseaon di ngolu ni halak Jahudi, ala so olo nasida manangihon
hata ni Tuhan i. Aut porsea nasida di hata ni Tuhan i janghononna do Tuhan Jesus
naung dibaritahon mulai sian Padan Narobi. Asa tubu haporseaon ingkon rade
manangihon Hata ni Tuhan i. I do nanidok ni Ap Paulus (ay.17) “Ai sian na
tumangihon do ro haporseaon, ia panangihon i sian hata ni Kristus do”. Domu
tusi ingkon ingotonta do, na tarjou do hita manghatahon, mamaritahon manang
manghatindanghon Hata ni Tuhan i, asa marhite i lam porsea portibi on tu Jesus
siboan haluaon i. Ingkon hobas jala barani hita manghatahon Hata ni Tuhan i
marhite parange, dohot pambahenan, gabe sira dohot panondang di portibi on.
Marhite on disungguli ma hita asa borhat mamaritahon Hata i tu angka ianakhonta
asa lam porsea nasida di Jesus, jala marhite i margogo nasida mangadopi angka
tantangan zaman. Asa marhite i unang talu hita ala ni angka habisuhon na di
portibi on na sai berusaha mengklaim kebenaran/hasintonganna sandiri, tung holan
hasintongan na di bagasan Jesus Kristus do na gabe hangoluanta, jala jumpang
hita i molo mangolu jala mangula hita di bagasan HataNa. Amen.

Pdt. Juni Saor Parasian Sirait, S.Th

SERMON PARHALADO HKBP SA-RESSORT BARELANG

7
 MINGGU INVOCAVIT 06 MARET 2022
EPISTEL ( 5 Musa 26 : 6-10a )
TOPIK : MALUA DO GANUP NA MANJOU GOAR NI TUHAN I
I. Patujolo :
Buku 5 Musa ima na marisihon panghataion ni si Musa dompak Bangso Israel,
andorang so bongot nasida tu tano bagabagai, ima tano Kanaan. Alani i jumolo ma
dipaluhut si Musa bangsoi di adaran Moab, laho paingothon nasida asa unang lupa
maniop tongtong padan nasida dohot Debata, jala mangulahon sude naung pinatikhon
ni Debata sihangoluhonon nasida. Panghangoluhonon nasida di tona dohot patik ni
Debata, i do hataridaan ni kesetiaan nasida tu Debata Jahowa naung mamboan dohot
manaruhon nasida tu tano habaoran ni susu dohot situak ni loba i. Alani i ingkon sude
do parsidohot na di bagasan luhutan i, baik pemimpin agama dan sekaligus pemimpin
pemerintahan, ingkon mangulahon ulaonna berpatokan tu Patik ni Debata. Di
turpukon, dipaingot si Musa do nasida, marhite parenta ni Debata tu bangso Israel asa
pasahathon pelean sian patumonaan ni parbue ni na niula nasida tu Debata dung
bongot nasida jala maringan di tano bagabaga i, ido tanda ni mauliate ni roha nasida tu
Debata, na mamboan nasida haruar sian Misir jala pasahathon tu nasida tano bagabaga
i, dibahen i pelean i ido hataridaan ni haunduhon dohot pangoloion nasida, di padan
naung binahen ni Debata tu bangsoi.
II. Hatorangan :
a) Pasahat pelean hamauliateonmu sian patumonaan ni ulaonmu tu Debata
Dung dimasuhi bangso Israel tano Kanaan, jala diula nasida tano i huhut manggotil
nasida sian i, ditonahon ma tu bangsoi asa mambuat patumonaan sian sandok parbue
ni tano i, gabe pelean nasida tu Debata. Ndada asal ditaruhon boti tu bagasjoro ni
Debata, alai mansai tangkas do diaturhon i di angka ruhut parugamoon nasida. Malim
do na gabe hasahatan ni pelean i, jala pasahathon i tu adopan ni Debata, marhite
langgatan pamelean tu Debata. Boasa diondolhon patumonaan (hasil pertama,buah
sulung), namarlapatan doi, ia pelean sipasahaton i ingkon sian na dumenggan do (yang
terbaik), pelean sian naniaula na sandiri, usahana sandiri, gogona sandiri, ido na tama
sipasahatonna tu Debata, ala dirajumi do saluhutna hasil naung nidapotna i holan ala
pasupasu, asi dohot holong ni roha ni Debata.
b) Aha do motivasi ni angka na porsea pasahat peleanna tu Debata
Di na pasahathon pelean i, ingkon tangkas do disi panandaon dohot panindangion di
balga ni pambahenan ni Debata di ngoluna. Asa motivasi di na pasahathon pelean i,
ingkon tangkas tarida disi panandaon dohot roha panopotion mardongan mauliate, di
saluhut pambahenan ni Debata di ngoluna. Manaili do satongkin nasida tu pudi,
marnida pardalan ni Ompunasida si Jakob, sahalak pengembara hian do, jala na
mardagangdagang tu Misir, otik do nasida martimbanghon halak Misir, alai gabe
bangso na bolon do muse. Tung ditindas, dipasiaksiak raja Parao do bangsoi di Misir,
mardangol situtu parniahapan nasida, ulaon na poran (na dokdok situtu) dipatuhukhon
8
tu nasida. I do mamboan roha, ngolu dohot tondi nasida ro mangangguhi tu jolo ni
Debata, jala dipalua Debata nasida sian hangaluton i. Ima na so boi halupahonon
nasida saleleng ngoluna, paboa Debata Jahowa do na paluahon jala na pasahathon
bagabagaNa tu nasida, songon naung pinadanhon ni Debata tu Ompunasida si
Abraham, Isak dohot si Jakob. Alani i di tingki na pasahathon pelean i ingkon
dohononna ma :”Nuaeng pe, ida ma, ahu mamboan patumonaan niparbue ni tano
na nilehonMi, ale Jahowa”. (ay.10). Adong panindangion na tangkas di jolo ni
Debata, paboa na unduk, jala pangoloi do ibana tu parenta dohot tona ni Debata, laos i
do nang pangokuhononta di na pasahat pelean hita tu adopan ni Debata, ala tarajumi
do saluhutna i marbona jala marharoroan sian Debata. Di ujung ni turpuk on (ay.11)
tangkas do ditonahon tu bangsoi paboa ingkon dibagasan las ni roha saluhut halak na
dohot pasahathon peleanna tu Debata. Marlas ni roha jala mardongan mauliate, saluhut
halak pasahathon peleanna rap dohot pangisi ni bagasna/keluargana. Alani i angka
halak na pasahathon peleanna ndada hea i dibagasan gondok ni roha, marungutungut,
manang ala ni na tarpaksa manang ala na so tarjua. Alai tung dibagasan las ni roha do,
siala panandaonna di denggan basa dohot pambahenan ni Debata di bagasan ngoluna
manang pangisi ni bagasna (keluargana). Laos i do panindangionna di napasahat
pelean i ibana tu Debata, ala nunga dipalua Debata ngoluna sian parhatobanan,
pangarupaon, hapariron, pardangolan na niahap ni bangsoi pola marratus taon di
parhatobanan Misir. Jala ima na ingkon hangoluhonon ni sandok angka na porsea tu
Debata, di na borhat ibana laho pasahathon peleanna tu adopan ni Debata, ala dipalua,
di dongani jala dipasupasu Debata sandok panggulmiton ni ngoluna/keluargana.
III. Sipahusorhusoron :
a) Manongtong do hasatiaon ni Debata di sandok angka bagabagaNa, jala dipatupa
do haluaon tu ganup halak angka na ro joujou mangido asi ni roha tu Debata.
Dipasahat Debata do patikNa jala ditonahon doi asa diradoti huhut diulahon angka
na hinaholonganNa. Ditonahon Debata do asa tung tangkas di ingot bangsoNa
(Israel) laho pasahathon pelean sian angka parbue ni na niulana, jala parbue angka
na dumenggan i do sipasahaton tu Debata, ima hataridaan ni haunduhonna dohot
pangoloionna tu Debata. Alani i tapasahat jala tapelehon ma angka na dumenggan
tu adopan ni Debata, panghirimonta songon Debata na pasahathon tano habaoran
ni susu dohot situak ni loba tu bangsoNa, laos songon i do nang tu hita, na
pasahaton dohot pasupasuhonon ni Debata do angka naummuli di ngolunta.
b) Ingkon parhatopoton ni angka na porsea tu Debata do di ngoluna, paboa sian
basabasa ni Debata do nasa na adong di hita, pamatang, hosa, pingkiran,roha
dohot tondi, ro di angka nasa na tahaporluhon di ngolunta siganup ari (BE.204 :
2). Alani i tama do hita marlas ni roha dohot mandok mauliate tu Debata di tingki
na pasahat peleanta hita tu Ibana. Amen
Pdt. Juni Saor Parasian Sirait, S.Th
BAHAN SERMON PARHALADO HKBP RESS. BARELANG
9
 Evangelium tu Minggu Reminiscere 13 Maret 2022
Topik: “Marguru tu Lomo ni Roha ni Debata”
1 Musa 15: 1 – 6
I. PATUJOLO
Di na mulak si Abraham dohot sinonduk na sian Misir ima sada sejarah
utama haluaon di bagasan padan na robi. Dibagasan padan i dipasahat Debata
ma tu si Abraham tano dohot pinompar na gabe sada bangso ni Debata. Padan
ni Debata ima padan na so hea mose sian parngoluan ni jolma. Dibagasan
turpuk on, dipasahat do padan ni Debata tu Si Abram (na gabe Abraham) na so
boi mose, ima sada jaminan angka nadenggan sian Debata tu ibana jala lehonon
ni Debata ma pinompar tu si Abram.
II. HATORANGAN
Ay 1. Hata ni Debata diturpuk on, ima sada pandohan ni Debata na ingkon
saut taringot tu si Abram. Sada haputuson na resmi jala marmulia tu ibana.
“Unang ho mabiar ale Abram, Ahu do lombulombum,” ima sada parmulaan
hata ni Debata dinalaho mamuhai bagabaga haluaon sian Debata. Mangihuthon
hatorangan di bindu 14, terlibat do si Musa di sada kejadian na balga
dingoluna ima habaranian ni ibana manghokhop anak ni hahana namargoar si
Lot. Lombulombu ( perisai) ima na boi mangalinggomi jolma sian angka
podang, hujur, dohot sumbia ni musu di parporangan. Perisai Abram adalah
sesuatu yang hidup dan bukan manusia, merupakan Allah sendiri (Allah sendiri
yang melindunginya). Ai Debata sandiri do na gabe pangusandean di ibana,
jala ndang mangasahon gogona sandiri gabe boi ma ibana malua sian na naeng
pangagohon ibana. Tiruan namansai arga do on, diparngoluanta. Mansai
godang do na naeng mangago hita, asa lam holang hita sian Ibana. Alai molo
mangasahon Debata do, malua do hita. Jaminan hangoluan ndang holan
manghokhop hosana, alai tong do mangalehon upah sian pengorbanan ni si
Abram. Dibagasan 1 Musa 12: 2-3 nungga dilehon Debata pasupasu tu si
Abram, ima marhitehite arta na godang. Alai dibagasan ngoluna adong dope na
so singkop diibana ima taringot tu hagabeon. Alai didok hata ni Debata do tu si
Abram “upam mansai balga”. Mengikut Allah bukanlah hal yang sia-sia,
10
melainkan sebuah keuntungan besar. Mansai singkop do upa sijaloon ni jolma
naporsea tu huasoNa hombar tu nanaung dibagabagahon Ibana.
Dirajumi si Abram, gabe si Elieser anak ni naposona na tubu di bagasna na
ma sitean saluhut na niuraihon ni Jahowa tu ibana. Sian on boi putihonta, molo
dung surasura na mangula di roha ni jolma jala molo dung tapaumbuk ngolunta
hombar tu n adong di hita dohot gogonta, sai hira hita na ma na mangatur dohot
menyelenggarakan ngolunta, disi ma tubu lomos, ganggu, dohot biar ni roha.
Alani i, molo didok Debata di turpuk on “unang mabiar” naeng ondolhononNa
ma, holan Debata do na boi pasohothon biar di ngolunta on. Ai holan Ibana do
na tuk patupahon sian naso adong gabe adong, na tuk paubahon hamatean gabe
hangoluan, dohot lan na asing.
Ay 2-6. Dibege si Abram do hata ni Debata jala dialusi ibana do hata i.
Dipapuas ibana do na di rohana. Nunga marumur be si Abram dohot si Sara
hatiha i, jadi sai hira ndang adong pe panghirimon dirohana asa mandapot
hagabeon, gabe didok ibana ma alusna “si Elieser na sian Damaskus na ma
sitean bagashu”. Molo mate ma si Abram mago ma goarna i ala so adong na
mamboansa. Di tradisi ni bangso nasida, ndang adong hukum tertentu molo
mangalehon angka warisan. Alai molo adong tuan na so marianakhon, boi ma
hatobanna na gabe sitean bagasna. Ndang na so adong rasa puas di si Abram
disude angka pasupasu na sian Debata, alai dibagabaga ni Debata tu ibana gabe
pasupasu tu sude bangso jala gabe bangso na balga, ndang boi be tarpatupa
ibana. Tubu do ganggu ni roha di si Abram. Alai sasintong na aha na so
mungkin be masa dijolma, boi do tupa dibagasan Ibana. Holso ni roha ni Si
Abram pintor dialusi Hata ni Debata. Na gabe sitean bagas ni si Abram na
ingkon sian Ibana do ndang na asing. Firman Allah hadir untuk mencabut
ketakutan dan kegelisahan hati manusia dan memberikan kepastian serta
ketetapan hati. Mansai luar biasa do cara ni Debata laho mangalusi ganggu ni
roha ni si Abram jala dipapos rohana hatihai, ndang holan marhite parbinegean
sajo, alai diuduti marhite pamereng ni si Abram. Di dok Hata ni Debata do “ua
tailihon ma dompak langit i jala bilangi angka bintang di langit i molo
habilangan ho, songoni ma pinomparmu sogot”. Sada gombaran do i na

11
pinasahat ni Debata tu si Abram, paboa gabe bangso na bolon do ibana
haduaan. I ma cara ni Debata laho paposhon roha ni si Abram di na hinirimna
dibagasan ngolu ni pardongansaripeonna. Ndung dibege si Abram hata i gabe
porsea ma ibana ala andul sian na piningkiranna, diparade Debata do.
Boi do tangkas idaonta harosuon dohot haulion ni parsaoran ni Debata
dohot di Abram. Dipatajom Debata do bagabagaNa tu si Abram paboa na
ingkon sian butuha ni si Abram do na gabe panean di padan na binahen ni
Jahowa tu ibana. Mamilangi bintang di langit dohot pasir di topi ni laut sada
pandohan na simmbolis paboahon terbatas do pangantusion ni jolma, ndang tuk
mamilangi pambahenan nang gogo ni Debata.
III. PANIMPULI
Godang do ditongtongata sahat tu tingkion sai tarpaima di hasasaut ni
sangkap ni roha, adong na marpangidoan asa jumpang rongkapna, adong na
manghirim dihagabeon, adong na manghirim di hamamalum sian sahit, dohot
lan na asing dope. Alai disude angka ragam ni na sinangkapan dibagasan
pardalanan ni ngolu on, ingkon marpangusandean do tu Debata asa Ibana na
mangalusi jala pasauthon na hinirim ni rohanta hombar tu lomo ni rohaNa. Jala
ingkon togu do nang pos ni roha di Debata, asa unang olo hita gabe manuntun
lomonta sandiri. Ndang tuk gogo nang pingkiranta pe mandodo pambahenan ni
Debata di bagasan ngolunta. Sipata boi do masa balik sian na tahirim, jala boi
do tong masa andul sian na tahirim i. marragam cara na pinatupa ni Debata
laho patuduhon pangaramotionNa nang huasoNa tu hita.
Topik ni minggu mandok “Marguru tu Lomo ni Roha ni Debata”. Dipaingot
tema ni minggu on do hita asa marguru tu lomo ni roha ni Debata ngolunta,
sangkapta, nang ulaonta. Di sosoi do hita asa marpos ni roha di Jahowa ala
parasi roha do Ibana, jala manongtong do asi ni rohaNa i laho manarihon dohot
mangurupi hita. Ala asi ni rohaNa i do umbahen na mngolu hita sahat tu tingki
on. Asi ni roha ni Tuhan i tu si Abram na paposhon roha na manghirim di
bagabaga ni Debata. Jala tangkas do diboto Tuhan i aha na gabe sihol ni roha
na di ngoluna. Suang songoni do nang hita, diboto Tuhan i do aha na ringkot
jala na tahirim di bagasan ngolunta on.
12
 Pdt. Kristina Sibarani, S.Th

BAHAN SERMON PARHALADO HKBP RESS. BARELANG

Epistel tu Minggu Reminiscere 13 Maret 2022
Topik: “Marguru tu Lomo ni Roha ni Debata”
Pilippi 3: 17 – 21
Jotjot do tabege pandohan: “Orang sabar dikasihi Tuhan”. Alai nang pe
jotjot dibege, ndang sude jolma nampuna kesabaran. Hape tung mansai ringkot
do i di bagasan pardalanan ni ngolunta. Ala memang salah satu kunci ni ngolu
on ima molo tongtong jumpang hasabaron, ala memang ragam do hamaolon na
tabolus. Asa boi ma dohononta, salah satu kunci sukses ni ngolu do hasabaron i
jala parbue ni haporseaon tu Debata. Molo tajaha di evangelium Mateus diajari
Jesus do angka siseanNa dohot angka siihuthon Ibana asa mian di bagasan
hasabaron. “Pangido hamu ma sai na lehononna do tu hamu, lului hamu ma sai
na jumpangan do hamu, tuktuhi hamu ma sai na ungkaponna do di hamu (Mat.
7: 7). Apostel Paulus sandiri pe dipodahon do tu huria Rom asa jumpang
hasabaron i. “Marlas ni roha ma hamu manghirim, marbenget ni roha di
haporsuhon, jugulhon hamu ma tangiang” (Rom 12: 12). Boasa ingkon sabar?
Ala nunga jumolo Jesus gabe tiruan ni angka na porse tu Debata na
manghangoluhon hasabaron dohot habengeton di na mangadopi sitaonon na
masa tu diriNa. Dileai, ditijuri, dipauruuru, gariada dituhas tu Jesus na so patut
tu Ibana alai tongtong do Ibana sabar. Sahat tu na mate Ibana di hau na
pinarsilang, tongtong do Ibana benget.
Pangalaho sisongon on do maol jumpang di deba halak Kristen di huria
na di Pilippi umbahen sai dipaingot Apostel Paulus huria i. asa unang
sarombang nian dohot halak na so porsea tu Kristus, na mangulahon hagiot ni
daging dohot parange na so badia di adopan ni Debata. pamusatan ni
pangajarion ni Apostel Paulus ima hamamate dohot haheheon ni Jesus Kristus
ima na patuduhon panghophopNa tu portibi on. Sian ngolu ni Kristus i do
marguru Apostel Paulus taringot tu hasabaron, holong ni roha, panghirimon
dohot haporseaon. Ido umbahen na marsitutu ibana mamaritahon Barita na Uli

13
i. gabe jongjong huria nang parpunguan na manghaporseai Jesus i. Ndada na
mandok naung singkop ngolu ni Apostel i, gariada dirajumi ibana do dirina
songon ulaula na so tama. Alai mangasahon asi ni roha ni Debata tarpatupa
ibana do ulaon i. Godang do haporsuhon naung binolusna, alai benget do ibana
manaon i.
Poda dongon pangajarion na sisongoni ma na naeng pasahaon ni turpuk
epistel on tu hita. Songon ruas ni huria, asa tatiru Jesus na tongtong benget jala
sabar mangadopi angka na masa tu diriNa. Torop do jolma naung taruli
diparbue ni hasabaron i. tung gabe sitiruon do ngalu ni Apostel Paulus tu angka
na porse. Atik pe mamolus hita di godang ni hamaolon alai marguru tu lomo ni
roha ni Debata na boi do adopanta sude angka i. Unang ma mangasahon gogo
nang pingkiranta, alai gogo ni Tuhan i ma. Angkup ni i, nang pe mangadopi
hamaolon huhut ma hita manatap tu jolo ima ngolu na pinarade ni Debata.
Didok Apstel Paulus: “Ai di banua ginjang do sambulonta, sian i do tapaima
Sipangolu hita, Tuhan Jesus Kristus i”. Ndada di tano on sambulonta, di banua
ginjang do. Jala taingot ma tongtong paboa na disarihon Debata do hita di
bagasan ngolunta siganup ari.
1. Naeng maniru ngolu ni Kristus songon nahinangoluhon ni Apostel
Paulus. Ido na nidok na: “Rap sitiru ahu ma hamu ale angka dongan, jala
pamanat hamu ma angka na marparange songon hami” Sitiruon do angka na
denggan na binahen ni halak jala gabe parsiajaran na arga nang di hita. Jadi
ndang marguru na hurang denggan na bunahen ni halak. Gariada tahe ingkon
barani do hita maninsang na hurang denggan i asa unang gabe ditiru halak.
2. Unang ma harhar haporseaon i maradophon Kristus. Songon naung
binaritahon ni Apostel Paulus paboa godang naung so porsea di silang ni
Kristus i. gariada tahe gabe musu do nasida. Ndang porsea di hamamate dohot
haheheon ni Kristus, hape i do pamusatan ni Barita na Uli i. Mangasahon gogo
ni Debata, dijamitahon ibana do silang ni Kristus i, so pola mabiar jala ganggu
rohana disi atik pe godang naso marlomo ni roha tu ibana dohot tu Barita na
Uli i. Dipaingot Apostel Paulus do huria Pilippi asa unang mangolu songon

14
jolma na so marhaporseaon dohot so marpanghirimon. Pola didok Apostel i
“hamagoan do ujung nasida”
3. Molo tajanghon Kristus i, dapot hita do tumpal hangoluan. Nunga
diparade Kristus ngolu na saleleng ni leleng na marhite haheheonNa. Asa
ndada holan di tano on be jambarta, alai nunga rade nang di banua ginjang i.
ninna Apostel Paulus di pangujungi ni turpuk on: “PaubaonNa do dagingta na
lea on doshon gabe dagingNa na sangap i, hombar tu hagogoonNa i, ai
tarpaunduksa do saluhut tu Ibana”. Alani i, unang ma holan mamingkiri na
diportibi on, so mamereng harajaon na sian Debata di ari sogot i. Ringkot do
arta nang angka sinamot, hagabeon, hasangapon, pangkat, dohot na asing, alai
unang ma gabe lalap disi marhalianghaliang ngolunta on, unang tading
parsaorang tu Debata, unang gabe angka i mangarajai dohot mangatur hita.
Tutu ma nidok ni Jesus i: “Sai jumolo ma lului hamu harajaon ni Debata dohot
hatigoranNa, dung i tambahononNa do sude angka ondeng tu hamu (Mat. 6:
33).
Pdt. Kristina Sibarani, S.Th

BAHAN SERMON JAMITA TU MINGGU OKULI, 20 Maret 2022

LUKAS 13 : 1 – 9
MARHAMUBAON NI ROHA ASA UNANG MAGO
Turpuk on manaringoti pardalanan ni Jesus manopot huta Jerusalem,
manjou tu hamubaon ni roha ( pertobatan ). Dihaporluhon do komitmen na
gok, sian saluhut roha nang haporseaon laho mangihuthon Jesus, manangihon
Ibana sian tulus dohot bulus ni roha. Dipanghataion ni Jesus dohot angka
siseanNa nang angka na torop na sai mangihuthon Ibana, disungkun nasida
Jesus, adong angka halak Galilea na mate ala dipusa si Latus jala di durushon
mudar nasida gabe saor tu na pinelehon nasida (ay.1). Gabe tubu ma di rohana
manungkun i, angka pardosa ma angka halak Galilea na mate i na pasahathon
pelean i tu bagas joro ni Debata, ala nunga saor mudar nasida tu pelean na
pinelehon nasida. Hira na ambal alus ni Jesus, “ asa muba ma nasida, molo
dang muba nasida laos songon i do muse nasida mago : (ay.3). Songon i do
15
tong na 18 halak na mate ditinggang palaspalas ni Siloam na di Jerusalem, hira
na gumodang ma hasalaan nasida sian hasalaan sude halak pangisi ni
Jerusalem? Alus ni Jesus mandok, ndang! Jala “ ingkon muba nasida, molo
ndang olo muba, songon i do nasida mago muse “. Boasa dipamate si Latus
angka halak Galilea i? Ala mangalo/ membrontak nasida tu parhuaso na di
Jerusalem tu pamarenta Rom gabe dibunu si Latus angka halak Galilea i.
Ndang diparsoada Jesus na halak pardosa angka halak Galilea na mate i, alai
dipatandap Jesus naso adong imbar nasida na manungkun i songon bangso
naso olo porsea, ingkon songon i do muse nasida mago molo ndang muba
nasida (ay.3). Ditaringoti Jesus muse, ndang gumodang dosa ni 18 halak na
mate di tinggang palaspalas na di Siloam sian dosa ni halak na mate di
Jerusalem na dilengse soldadu Rom. Jala tutu do masa nanidok ni Jesus i ai
ndang gok 40 taon na i, diae nasida ma songon na niae ni angka halak Galilea,
na dipusa/dilengse si Latus marhite soldadu Rom huta Jerusalem taon 70
Masehi, ala ndang siap nasida mardame dohot halak na marmusu tu nasida.
Dua peristiwa na masa i ma songon lumbalumba taringot tu uhum na naeng ro
sijaloon nasida muse molo ndang olo nasida bertobat.

Dungi diajarhon Jesus do taringot tu hau ara na so marparbue hombar tu

konteks historis ni tindakan ni si Latus na mansai jorbut, na mancampurhon
mudar ni angka halak Galilea na di pusa ibana tu pelean na pinelehon nasida
(Ay.2). Dipatudos Jesus ma keadaan nasida songon hau ara na tarlambat
marparbue. Ahado na naeng dohonon ni umpama i ? Ala lokasi ni partubu ni
hau ara i di porlak anggur do, tontu dirawat pangula na di porlak i do hau ara i
dohot denggan ala tubu hau ara i di tano na memiliki kelembapan gizi di tonga
ni hau anggur na manghaliangi ibana. Alai sian taon tu taon sahat tu taon na
patoluhon, ndang marna adong parbue ni hau ara i. Hape hau anggur na
humaliangna marparbue do, boasa ma hau ara i ndang marparbuae? Tontu
adong do batas kesabaran ni nampuna porlak i. Nunga rade nampunasa porlak i
laho manaba hau ara i, ala so marguna jala pola magopo tano i bahenon ni hau
ara naso marparbue i. Diparentahon ibana ma pangula na di porlak anggur i asa
ditaba hau ara i. Alai roma pangula na di porlak i mandok tu nampuna porlak i,

16
asa diloas hau ara i tubu nanggo apala sataonna i, asa sanga dipangkur
humaliang bonana mambahen napu (pupuk) tu si, anggiat olo marparbue tu
taon na ro, alai anggo so marparbue tabaon ma ( ay.6-9).

Umpama ni Jesus i manggombarhon bangso Israel songon hau ara naung

tarlambat marparbue. Debata do nampunasa porlak anggur i, jala Jesus do
pangula di porlak anggur i. Sude ulaon ni Jesus laho mamboan bangsoNa nang
sude bangso tu hamubaon ni roha, asa marparbue di haporseaon. Ndang naso
sapandapot Jesus dohot Debata. Alai na digombarhon disi, asi ni roha ni Jesus
tu bangsoNa, anggiat diargahon nasida asi ni roha ni Debata jala olo nasida
muba (bertobat) mangihuthon hata ni Jesus. Porlu do penghukuman
(pinsangpinsang) sian Debata, alai tong do ditawarhon Jesus dalan tu nasida
asa malua jolma sian panguhumon ni Debata asa unang mago nasida.

Marhamubaon ni roha marlapatan olo mangihuthon nanidok ni Jesus,

mangolu dibagasan holong, songon holong ni Jesus tu sude bangso sahat tu na
tarsialang Ibana di hau na pinarsilang alani holongNa, naeng ma songon i
holong nasida tu sude jolma nang tu bangso Rom dohot pamarenta Rom na
menjajah nasida hatiha i. Hamubaon ni roha na marsitutu ima na manghasiholi
haluaon na sian Debata na pasombu uas ni tondinta songon siihuthon Jesus.
Naeng adong sihol ni roha laho bertobat maninggalhon dalan hageduhon, ai ido
didok di Jesaya 55 : 7 : “ Sai ditadinghon halak parjahat i ma dalanna, jala
jolma pargeduk i, angka sangkapna, sai mulak ma ibana tu Jahowa, asa
marpangulahi rohaNa mida ibana dohot tu Debatanta, ai buas do rohaNa
manalesei “. Ndang lomo roha ni Debata mate angka pardosa dibagasan
dosana, alai lomo do rohaNa mulak tu Ibana (bertobat). Ima asi ni roha ni
Debata. Pertobatan na sejati ndang cukup holan menyesal, alai ingkon adong
sihol ni roha na tubu sian roha na ias jala tulus olo maninggalhon sude ngolu
hagolapon tu ngolu hatiuron. Angka na manghaholongi Jesus di ginjang ni
saluhut di ngoluna, pasti do ditantang gabe halak na komit jala konsisten
mangihuthon Jesus, rade maninggalhon hagolapon jala mangolu di hatiuron,
manghasiholi Jesus di ginjang ni saluhut na adong di ngoluna. Jesus do na

17
ummarga jala prioritas di ngoluna, parenta ni Jesus do na tumimbo di ibana
sian sude hata ni jolma jala mangulahon lomo ni roha ni Debata.

Dipaingot Jesus hita, uhum ni Debata bersifat adil jala sintong. Ditingki di
ida Debata bangsoNa ndang mangolu di bagasan hasatiaon, gabe dipatudos
Jesus ma tu hau anggur dohot hau ara naso marparbue. Gagal do bangsoNa
padomuhon hak istimewa dohot tanggungjawab nasida tu Debata. Di kegagalan
nasida i, ndang boi be ditunda panguhumon na sian Debata. Hadadabu ni hau
ara marhite na ditaba Debata, ima gombaran panguhumon ni Debata na naeng
ro di ari parpudi. Tontu mabiar do hita molo ingkon mate hita ditaba
salelenglelengna dibagasan hinadangol ni hamatean, ala ndang mangolu hita
dibagasan asi ni rohaNa. Asa unang ditaba Debata hita di panguhuman di ari
parpudi, naeng ma hot hita di Jesus Kristus rodisalelenglelengna. Alani binsan
dilehon Debata dope tingki tu hita bertobatlah! Amen.

Bvr. Sumedang Elida Simanjuntak

BAHAN SERMON EPISTEL TU MINGGU OKULI, 20 Maret 2022

JESAYA 55: 6-9
MARHAMUBAON NI ROHA ASA UNANG MAGO
Diulahon bangso Israel do ritus-ritus parugamoon, diboan nasida do
pelean tu Debata alai lao nasida mangido pangurupion sian Mesir (ndang tu
Debata), manomba ganaganaan, manghosomi donganna, dohot mangulahon
angka ulaon na ramun ujungna gaba ditaban ma Israel Utara dohot harajaon
Juda jala tarbuang nasida tu Babel. Marsingkor ma ngolu nasida, alai lam rarat
do hajahaton diula nasida. Mangido pangurupion sian hagogoon portibi sarupa
do i tu na membrontak tu Debata, ndang adong ketaatan dohot hasatiaon tu
Debata. Mansai jorbut jala ramun dosa nasida, maninggalhon Debata, ndang
diboto dia na sintong na hombar tu lomo ni roha ni Debata, holan pingkiran
nasida sambing na gabe ukuran di hasintongan, ndang be hasintongan ni
Debata. Angka malim pe ndang mangantusi angka aha do na masa na
sasintongna ditongatonga nasida. Holan ritus-ritus na hombar tu doktrin
18
parugamoon dohot angka oraora na hombar tu tradisi adat istiadat ni
hajahudion sambing diulahon nasida, alai ndang diantusi nasida diado lomo ni
roha ni Debata na sasintongna di ngolu na marpardomuan tu keadaan sosial
pilitik, ekonomi nang parugamoon, ujungna liluma bangso i ndang mangantusi
diama lomo ni roha ni Debata, lam lumlam ma ngolu nasida, ndang adong be
hasonangan dohot hadameon. Disituasi na songon i roma hata ni Debata tu
panurirang Jesaya, asa ro bangsoNa mulak tu Debata, manjalo hangoluan na
sonang jala na gok pasupasu dohot dame. Asa boi masa i ingkon muba nasida
jala mulak tu Debata. Asa dilului Debata sian sihol ni rohana nasida. Molo
didok : “ Binsan tarbahen dope jumpang Ibana “ lapatanna molo dijou Debata
nasida, ingkon alusan nasida do Debata, ingkon adong tanggapan/ respon sian
bangsoNa marhite na ro nasida mandapothon Debata huhut manjou goarNa. Di
ayat 7 didok : “ Sai ditadinghon halak parjahat i ma dalanna, jala jolma angka
pargeduk i angka sangkapna “, pertobatan memerlukan perobahan di
sikap/tindakan marhite na maninggalhon hajahatonna dohot angka sangkapna.
Adong 4 kata kerja na diondolhon di ayat 7 i ima : maninggalhon, mulak,
marpangulahi, manelesei “. Bangso na olo mangungkap rohana manjalo holong
ni roha dohot hasesaan ni dosa sian Debata pasti tubu di bagasan dirina gogo na
imbaru dohot pangkirimon na mangolu, na buas do roha ni Debata manelesei
(mengampuni). Rade Debata manjanghon mulak bangsoNa, manesa dosa
nasida huhut paimbaruhon ngolu nasida.

Di ayat 8 – 9 dipatorang, singkop jala badiado haputusan – haputusan ni

Debata, lobi sian rancangan ni bangsoNa na holan marsigantung tu hagogoon
portibi (huaso ni Misir). Terbatas do hagogoon ni Misir, talu do Misir dibahen
Ashur, gabe tartaban ma bangso Israel gabe hatoban ni halak Babel. Alani
dipangido Debata asa ditinggalhon nasida angka sangkap na mambahen nasida
lam marporsuk di Babel. Asa mulak tu sangkap ni Debata na sempurna jala na
badia, na gabe dalan hangoluan di nasida ndang be dalan tu hamatean
(hamagoan). “ Lului hamu ma Jahowa “ na marlapatan talului jala
marpanungkun hita tu Debata na gabe panogunogu di hita, aha na ingkon
taulahon asa dame rohanta huhut masihol mangalului lomo ni roha ni Debata.

19
Alani ingkon talului ma Ibana sian roha na marsitutu jala tagogo ma
mandapothon Ibana marhite cara naung nitotophon ni Debata asa pajumpang
hita dohot Ibana, ima marhite Kristus na gabe dalan asa boi sahat tu Ibana jala
Tondi Parbadia manogunogu hita dohot hata ni Debata na gabe panorangion
(palito) di hita. Ingkon berjuang do hita mangalului harajaon ni Debata dohot
hasintonganna asa di hita hangoluan na salelenglelengna. Molo didok “ sai
ditadinghon halak parjahat i ma dalanna, sai mulak ma ibana tu Jahowa ima
panjouon asa manadinghon hajahaton, dijou mulak tu dalan na sintong,
bertobat, paimbaru diri ai buas do Debata manalesei. Jala ido lapatan ni na
bertobat, maninggalhon dosa jala pingkiranna pe mamingkirhon (merancang)
angka ulaon na denggan na hombar tu lomo ni roha ni Debata.

Joujou tu hamubaon ni roha i ma songon hataridaan ni asi dohot holong

ni Debata, paboa ndang lomo rohaNa mida hamatean ni parjahat i, alai
hamubaon asa mangolu (Hesekiel 33 : 11), ima marhite na ditadinghon
parjahat i dalanna, jala pargeduk sangkapna. Panjouon ni Debata tu hamubaon
ni roha ima manogihon bangsoNa asa lam mananda di angka pambahenan ni
Debata, asa molo pe andul sian na piningkiran ni jolma jala alo tu roha, ido
hadirion ni Debata. Ai ndang hasigatan angka uhumNa jala naso habogasan do
angka dalanNa. Alani i do asa unang mago jala mate bangso ni Debata marhite
pingkiran dohot sangkapsangkapna, ido umbahenna dijou asa mulak tu dalan ni
Jahowa jala mangihuthon pingkiran ni Jahowa na timbo i. Marhamubaon ni
roha ido patauhon bangso ni Debata manjalo bagabaga padan parasian
salelenglelengna, alani i naeng tangkas mangarade hita di bagasan parsitutuon
dohot di bagasan nasa roha.

Antong mian jala hot ma hita di asi ni roha ni Debata naung manjou
hita tu hamubaon, asa tau hita mamparangehon parange na tama hombar tu
panjouon naung sahat tu hita jala manongtong ma hita mian dibagasan Tuhan
Jesus Kristus, Raja ni huria i. Amen.

Bvr. Sumedang Elida Simanjuntak

20
 BAHAN SERMON HKBP RESSORT BARELANG
MINGGU LETARE, 27 MARET 2022
MARLAS NI ROHA DIBAGASAN TUHAN
Ev: Psalmen 32 : 8 – 11
Huria niTuhan ta na hinaholongan,
“Ing ngarso sung tulodo, ing madyo mbangun karso, tut wuri handayani, “
ima sada semboyan di dunia pendidikan na pinasahat ni Ki Hajar Dewantara,
na marlapatan “di depan menjadi teladan, di tengah membangun semangat, di
belakang memberikan dorongan. “Di parsikolaan martudutudu tu ulaon ni guru
do semboyan I, alai laos boi dihonahon tu na umbidang ima ulaon ni sahalak
uluan. Molo tung pe hupangke jamita on marhite semboyan ondeng, dang apala
taringot tu ulaon (peran) ni guru na naeng ondolhononku, alai inganan ni guru I
do, ima ndada holan di jolo, ndada holan di tonga, jala ndada holan di pudi.
Inganan ni guru mangihuthon semboyan ima sipata di jolo, dipata di tonga, jala
sipata di pudi. Hurang lobi songoni do na nidok ni turpuk jamita on di ayat 10
marhite hata haliangkononNa (Indonesia : dikelilingi-Nya). Lapatanna di sude
inganan. Tu ise do didok hata on, ise manghalianghon, jala aha na di
haliangkon ima siguruhononta na gabe bohal nii partondionta di minggu Letare
on.

Parjolo, Jahowa manghaliangkon asi ni roha tu angka na marhaposan tu

Ibana (ayat 8 – 10)
Di ayat 10 tarsurat, “Tung na lan do parniahapan ni parjahat, alai
manang ise na marhaposan tu Jahowa, haliangkononna tusi asi ni roha.”
Marhite ayat on diajarhon hatandian ni angka parjahat sian angka na
marhaposan tu Jahowa. Angka parjahat, parniahapan (kesakitan) do jambarna.
Baliksa, na marhaposan tu Jahowa ima na rade mardalan di dalan ni Jahowa, na
manghaporseai pangiringngiring ni Jahowa, asi ni roha (kasih setia) do
jambarna. Asa tung mansai tangkas jambar ni angka na marhaposan tu Jahowa,
dipangke parpsalmen do hata “haliangkononNa,” na manghamham posisi di
jolo, di tonga, di pudi, di siamun, di hambirang. Manghaliang lapatanna dang
adong sada sisi pe sian ngolu nii angka na marhaposan tu Jahowa na so
21
mardongan asi ni roha. Sandok di sude arah. Molo guru di semboyan
pendidikan di jolo, di tonga, di pudi do, alai ianggo Jahowa marhite asi ni
rohaNa lobi sian I tu angka na marhaposan tu Ibana. Pandohan on gabe
hagogoon di angka na porsea. Molo tung sipata mabiar hita di pardalanan ni
ngolunta ala godang ni mara dohot sipingkiran, taingot ma dihaliangi asi ni
roha ni Jahowa do hita. Umbalga do asi ni roha ni Jahowa sian angka na naeng
manusai hita, gumogo do asini roha ni jahowa sian angka nasa hagogoon ni
portibi on. Tung so adong do na boi manusai manang mangagohon hita ala
dihaliangi asi ni roha ni Jahowa do hita. Mabiar dope hita di ngolunta on?
Bobonosan dope hita? Molo tutu marhaposan tu Jahowa hita, tontu dang
mabiar jala bobonosan hita ala taboto di jolo, di tonga, di pudi di siamun, jala
di hambirangta do asi ni roha ni Jahowa.
Angka dia ma asi ni roha ni Jahowa na manghaliangi hita? Nunga
tangkas dipatorang ia asi ni roha ni Jahowa di ayat 1 – 5 rade manesa dosa, di
ayat 6 – 7 paluahon sian parmaraan dohot mangalehon haluaon, jala na parpudi
di ayat 8-9 ima pandonganion. Asi ni roha sisongoni ma tongtong dihalianghon
tu angka na marhaposan tu Jahowa. Ndada holan gabe hagogoon tu angka na
marhaposan tu Jahowa ayat 10 on, alai huhut gabe joujou asa marhaposan tu
Jahowa, singotsingot asa unang marjahat.
Pandohan di ayat 10 ondeng sasintongna nunga didok di ayat 8 marhite
pandohan “Huiringiring pe ho dohot pamereng ni matangKu.” Dihangham
pandohan I do na tongtong dipaihutihut Jahowa pardalanan ni ngolu ni angka
na olo tumangihon podaNa; dang hea ditadinghon. Marpadan do Jahowa laho
patuduhon dalan asa unang lilu angka na porsea di Ibana; rade do Jahowa
mandongani hita asa unang marmara. Jadi hata “huiringiring dohot
halianghononNa” di ayat 9 dohot ayat 10 manggombarhon jaminan
pandonganion ni Jahowa di angka na manghaporseai Ibana. Boha. Tahaporseai
do Jahowa? Molo ido, adong do jaminan di hita. Alai molo marjahat, angka na
so mangoloi dalan ni Jahowa, na so marhaposan tu Jahowa, ndang dohot di
nasida jaminan pandonganion on; baliksa parniahapan do jambar nasida. Dia
do di hita? Jaminan pandonganion manang parniahapan? Tapillit ma di bagasan
haporseaon dohot ngolu si ganup ari.
22
Paduahon, Soso-Soso asa Marlas ni Roha jala Marolopolop (ayat 11)
Pola tolu hali hata na dos lapatanna digurithon di ayat 11 on, ima
marlas ni roha, marolopolop dohot marende, patuduhon parsitutuon manosoi
asa marlas ni roha. Olo do ra tubu sungkunsungkun di hita; “Boha do bahenon
marlas ni roha dohot marolopolop di portibi na gok hamaolon on?” Turpuk
jamita Psalmen 32 on mangajarhon asa marlas ni roha nang pe gok hamaolon
ala manghaporseai padan pandonganion ni Jahowa, ala manghaporseai na
dihaliangi Jahowa do hita marhite asi ni roha. Tung maol pe dalan siboluson,
tung godang pe angka hamaolon tarlumobi ala panghorhon ni pandemic Covid-
19, ayat 8 mangajarhon patuduhon ni Jahowa do dalan sidalananta asa unang
lilu jala marmara hita. Molo tung godang pe mara, marpadan do Jahowa
mangiringiring hita asa dang tarhahua ni mara I hita. Nunga digohi Jahowa
padanNa on marhite hamamate ni Tuhan Jesus na paluahon hita sian musu na
jumorbut di portibi on ima dosa dohot hamatean sisalelengnilelengna. Ido
umbahen didok Tuhan Jesus tu siseanNa andorang so manaek Ibana tu banua
ginjang, “Sai na dongananKu do hamu ganup ari, rasirasa ro ajal ni hasiangan
on!” (Mat. 28:20b). Nda gabe tubu las ni roha di hita umboto nunga tolu musu
na jorbut? Nda gabe marolopolop hita ala asi ni roha ni Jahowa na
manghaliangi hita nunga singkop di na gabe daging Tuhan Jesus Kristus? Nda
gabe marende hita ala tangkas tapanghilalahon na didongani Tuhan Jesus do
hita ganup ari? Dang adong sidalian ni halak na porsea so marlas ni roha.
Ojahan ni olopolopta ndada situasi kondisi di portibi on alai pandonganion ni
Tuhan Jesus do.
Antong, di Minggu Letare on, manang songon di pe parngoluonta, mora
manang pogos, marpangkat manang dang, marlas ni roha ma hita ala
tahaporseai pandonganion ni Tuhan Jesus. Dang holan di jolo, di tonga, di pudi
songon semboyan pendidikan na di bona ni jamita on posisi asi ni roha ni
Jahowa maradophon hita. Asi ni roha ni Jahowa di bagasan Tuhan Jesus
Kristus ido na manghaliangi hita, laos on ma ojahan nil as ni rohanta. Amen.
Pdt. Parlaungan Pangaribuan, S.Th

23
 BAHAN SERMON HKBP RESSORT BARELANG
MINGGU LETARE, 27 MARET 2022
MARLAS NI ROHA DIBAGASAN TUHAN
Epistel : Lukas 15 : 1- 7
Mansai las roha dung dipamasuk ende Amazing Grace tu Buku Ende ni HKBP
ima di no 699; “Singkop do asi ni Roham tu au na dangol on, na lilu ahu nahinan,
nuaeng jumpang do. “ Nunga jumolo ende on tarsurat di Kidung Jemaat nomor 40:
“Ajaib benar anugerah pembaru hidupku; kuhilang buta bercela, olehNya
kusembuh.”Di hata aslina, hata inggris, on ma hatana: Amazing Grace how sweet the
sound, that saved a wretch like me; I once was lost but now I am found, was blind but
now I see.
Boasa hubungka Jamita on marhite ende ondeng? Ala mansai ampit tu turpuk
Episteltaon, ima tudosan taringot tulas ni roha ni parbirubiru ala jumpang birubiruna
na mago hian. Adong dua karakter di turpuk on ima Debata dohot jolma, jala disagi tu
dua karakter ma ianggo karakter ni jolma ondeng ima jolma pardosa dohot jolma
partigor. Karakter ni jolma na dua ragam ondeng digombarhon di umpama I marhite
sada birubiru na mago dohot siapulusia birubiru na so mago.

Parjolo, Pardosa manang partigor do hita?

Ayat 1-2 ima pamuhai ni Lukas 15 na manggombarhon dua karakter na
masialoan (bertentangan), na parjolo, gombaran na positif ima sijalo beo dohot
sipardosa na ro manangihon hata ni Tuhan Jesus; na paduahon, gombaran na negative
ima halak Parise dohot siboto surat na marmungutmungut. Parmungutmunguton ni
halak parise on ma na manbonsiri tolu umpama taringot tu na mago di bindu 15 on.
Lukas 15 marisihon tolu umpama taringot tu “na mago alai ujungna jumpang,” ima
birubiru (15 : 1-7), hupang (15 : 8-10), dohot anak (15:11-32). Birubiru, hupang, nang
anak na mago I digoari sipardosa (ayat 4, 6, 8, 9 17, 24, 32), alai ndang digombarhon
dosa na niula nasida diupama na parjolo dohot na paduahon. Di umpama na patoluhon
do adong dipatorang taringot pambahenan ni anak na mago i. Boasa songoni? Ala tolu
umpama on dang naeng mangondolhon ragam ni dosa, baliksa mangondolhon
haradeon ni Debata mangalului nang manjanghon pardosa huhut haradeon ni pardosa I
paubahon rohana: jala on ma na gabe ojahan las ni rohanta, hombar tu topic di Minggu
Letare on “ marlas ni roha di bagasan Tuhan.”
Parise ima sada aliran di hajahudion na mangondolhon habadiaon ritus. Bahat
angka aturan disurathon nasida laho manjamothon habadiaon isarana taringot
parasinirohaon (Mat. 6:1-4), tangiang (Mat. 6:5 – 15), puasa (Mat. 6:16-18: Luk. 5:33-
35), angka na boi dohot na so boi siulaon di ari Sabat. Manang ise na so mangulahon
angka ruhutruhut I dirajumi do halak pardosa, nang pe sipata dang marpardomuan tu
hal-hal moral. Dipasiding do angka pardosa sian parsaoran, Alani dang boi rap
24
mangan dohot halak pardosa. Jotjot ma nasida maralo tu Tuhan Jesus ala rade Tuhan
Jesus marsaor dohot halak pardosa.
Mansai uli do cara ni si Lukas manurathon patujolo ni umpama taringot tu “na
mago” on. Di ayat 1 disurathon, “Dung I dipasolhot torop angka sijalo beo dohot
sipardosa dirina tu Ibana, laho tumangihon hatana. “Ayat 1 gabe pangaradeon tu
pangujungi ni umpama on di ayat 7 na mandok “pardosa na olo paubahon rohana. “
Sian bonana nunga dipatuduhon parange na denggan sian angka na digoari halak
Parise “horong pardosa.” Ro do “pardosa” I mandapothon Jesus laho tumangihon
hataNa. Marmungutmungut ma Parise marnidasa, gabe dialusi Jesus ma marhite
umpama “birubiru na mago” ima turpukta sadari on. Sahalak na marnampuna birubiru
saratus,
agoan sada birubiru; nang pe sada na mago I, ditadinghon ibana do na siapulusia I
holan laho mangalului na mago i.
Ise do partigor na nidokna di ayat 7, “Hudok ma tu hamu: Suman tusi do
gumodang las ni roha di banua ginjang mida sipardosa sahalak, na olo paubahon
rohana, asa mida siapulu sia partigor, na so pola paubahon rohanasida?” Partigor
martudutudu tu halak Parise dohot sibotosurat na marmungutmungut tu haredeon ni
Jesus manjanghon sipardosa. Halak Parise dohot sibotosurat mangarajumi diri
partigor, na so pardosa, Alani ndang ringkot paubahon roha.
Mangihuthon Jesus, halak Parise dohot sibotosurat pe sasintongna pardosa do
umbahen digoari Jesus nasida pangansi (6: 42; 12:56; 13:15), Alani ringkot do nang
nasida paubahon roha, alai dang I ondolan ni turpuk on. Impola ni umpama on ima
haredeon ni Debata mangalului nang
manjanghon pardosahuhut haredeon n pardosa I paubahon rohana gabe jumpang ma
las ni roha bolon.
Ise do sipardosa na di ayat 7 ondeng na digombarhon songon birubiru na
mago? Diarahon do hita asa mangantusi na hita do birubiru na mago i. Dang adong
jolma na so hea marsala, dang adong jolma na singkop. Pangula ni huria nang ruas dos
do halak pardosa, birubiru na mago. Sipata pambahenanta, sipata pandohanta, sipata
statusta di media social, sipata pangalangkanta, dohot lan na asing maralo tu lomo ni
roha ni Debata, Sipata tasadari, sipata sotasadari manimbil hita sian dalan hasintongan.
So tung madabu hita tu ginjang ni roha ni partondion marhite na mangarajumi dirinta
badia/partigor, jala halak na asing tarajumi pardosa. Unang tapangolu bangko songon
Parise nang sibotosurat di turpuk on na mangarajumi diri”partigor” na so ringkot
paubahon roha. Ai molo tarajumi dirinta partigor na so ringkot hamubaon ni roha,
madabu ma hita tu panguhumion nang parmungutmunguton.
Alai, dang gabe mandok asa tadatdati mardosa. Na naeng paingoton ni turpuk
on ima asa unang olo hita marginjang ni roha secara partondion (sombong rohani)
marhite na mangarajumi dongan pardosa. Rap pardosa do hita, rap tungki ma hita di
jolo ni Debata jala rap mangido gogo asa unang tadatdati mardosa. Songon pardosa di
25
turpuk on ma hita na ringgas ro manangihon Hata ni Debata, dungi tapauba ma
rohanta. Nasa bangko na hurang denggan nasailaon sian dirinta, tabolongkon ma I,
songon na tarsurat di ayat 10, “Suman tusi do masa las ni roha di jolo ni angka
surusuruan ni Debata mida sahalak sipardosa na paubahon rohana.: Dang na asa
tadatdati mardosa molo taongkuhon hita pardosa, alai asa taongkuhon do dosanta,
dungi marhamubaon ni roha ma hita.

Paduahon, Debata mangalului na mago jala marlas ni roha

Sada do na tardempar alai laho do nampuna birubiru I mangaluluisa pola
ditinggalhon na siapulusia I di ladang. Unok ni umpama on ndada di pambahenan
“manadinghon” angka na so tardempar, alai di pambahenan “ mangalului” na
tardempar do. Taridaparsitutuon ni parbirubiru I, ai dilului do sahat tu na jumpang;
dang mulak ibana so jolo jumpangsa na mago i. Dang hapalang las ni roha ni
parbirubiru I ala jumpang birubiru na tardampari, Dua cara ni parbirubiru I
manggombarhon las ni rohana, ima: parjolo, mangampehon birubiru I tu abarana (ayat
5), paduahon, papunguhon hombar hundulna (ayat 6). Nang pe dang apala disurathon
di turpuk on na di patupa parbiru I sipanganon tu hombar hundul na jinouna alai
mangihuthon angka na pistar, hombar tu tradisi, dipatupa ibana do marsipanganon.
Lam tangkas mai molo tahubunghon tu umpama na patoluhon taringot tu anak na
mago.
Puncak ni umpama on jumpang di ayat 7 ima las ni roha di banua ginjang.
Hata “banua ginjang” martudutudu tu Debata. Ala habadiaon ni goar ni Jahowa, tung
manat do halak Jahudi mandok goar ni Jahowa hombar tu patik patoluhon, jala ido na
jumpang di turpuk on. Gombaran ni Debata do parbirubiru na mangalului na mago di
umpama ondeng. Ro do Debata di bagasan Tuhan Jesus manadinghon habangsaNa tu
portibi on holan laho mangalului hita jolma na mago (pilipi 2: 6 – 8), ido Barita na Uli
di turpuk Episteltaon. Dang dipasombu Debata hita tongtong di bagasan hadosaonta.
Dang adong dosa na pabalgahu na so boi sesaon ni Debata. Disoro do hita sian gambo
lisop ni dosa. Nunga boi singkop digohi/digenapi na di Hesekiel 34:16 “LuluanHu ma
na mago I, jala mulak boanonHu na tardempar I, jala lilitanHu do na mabugang I, jala
pargogoanHu do na marsahit i. “Dilului Debata do hita molo lilu, Alani olo ma hita
diboan mulak. Dang dipasombu Debata hita di hadosaontai, dang dipasombu Debata
hita uju lilu, baliksa diboan do hita mulak di bagasan las ni roha bolon.
Antong di Minggu Letare on, las ma rohanta ala dang dipasombu Debata hita
mago; dilului jala nunga jumpang hita marhite mudar ni Jesus di dolok Golgata.
Statusta sonari ima” na lilu ahu nahinan, nuaeng jumpang do” songon BE. No. 699
(KJ. No. 40; Amazing Grace) Amen.
Pdt. Parlaungan Pangaribuan, S.Th

26
 INFORMASI
1. Tahun Kesehatian
Domu tu tahun kesehatian 2022 di HKBP, denggan ma ganup huria
sumangkapi ulaon na pahehehon togu ni parsaoran na saroha jala
sapikingkiran.
2. Parhusoran Parjamita dohot Pelean tu Distrik
Di ari Minggu on, 06 Maret 2022 dipatupa Distrik do parhusoran parjamita
di ganup huria. Laos pasahat pelean do hita disi tumpak tu Distrik. Angka
uluan ni huria denggan ma koordinasi patangkashon parjamita di hurianta
be.
3. Uraian ni Angka Siulaon (Songon SOP)
Marhite sinode Distrik na salpu dipatupa do hatorangan ni godang siulaon
di huria (songon SOP). Fotocopy ni uraian i pinasahat tu ganup huria
godangna 10 copy/huria, asa boi tiopon ni Uluan, Sekretaris, Parartaon,
Dewan, dohot Panitia di huria. Boi ma ganup huria manambaisa molo tung
diporluhon.
4. Pelean II & Namarboho, Gugu tu Ressort
Taingot ma manongos pelean II dohot namarboho ganup bulan tu pusat;
songon i muse gugu sian ganup huria tu Ressort.
5. Peresmian HKBP Ressort Marturia
Ari Minggu, 13 Maret 2022 saut ma patupaon ni uluanta marhite amanta
Preases, peresmian HKBP Ressort Marturia gabe Ressort na Gok.
Tatangianghon ma asa denggan mardalan ulaon i jala ria ma hita mandohoti
peresmian i. Molo tung adong na naeng sipaboaon/sipatorangon ni
panitia/parhalado HKBP Marturia, tingki on pinasahat tu nasida.
6. Sermon Ressort April 2022
Patupaonta ma muse Sermon Ressort di bulan na ro, i ma di, ari Jumat 08
April 2022 maringanan di HKBP ….(sihataanta dison)

27