ACARA PARTANGIANGAN SITUMORANG SIPITU AMA

ANAK BORU/BERE/IBEBERE
HATORANGAN : U : ULUAN R : RUAS

1. Jou – jou Tu Partangiangan

U : Hamu angka dongan na hinaholongan di bagasan goar ni Tuhanta Jesus, tama
situtu do hita mandok mauliate tu Debata parasi roha na sumurung i siala tongtong
diiringiring ngolunta sian ganup ari dohot tingki naung tabolus i. Boi hita taripar tu
taon 2018 on di bagasan las ni roha dohot olopolop. Godang do namangarsahi hita
di taon 2017 naung tabolus i jala laos godang situtu do na patupa angka las ni
rohanta. Masa pe i saluhutna i ma paboa huaso ni Debata do patupa i. Sopot di taon
2018 on naeng udutanta ma pardalananta, ndang ta antusi angka aha nanaeng
masa di pardalanan ni ngolunta tu joloan ni ari on, alai tapangido ma gogo dohot asi
ni roha ni Debata mandongani hita di na mamungka sahat rodi na paujunghon taon
on. Songon tanda ni hamauliateonta tu Tuhanta, tapuji ibana marhite ende
No. 11 : 1 – 2 “Aha Ma Endehononku”
R : (mangendehon) B.E. No. 11 : 1 – 2 “Aha Ma Endehonku”
- Aha ma endehononku, asa pujionku Ho,
Ale Tuhan Debatangku, sai urupi au gogo.
Ai ndang tarpajojor ahu, asi ni rohaM di ahu.
Alani hupuji Ho, tung marribu hali do.
- Sai sungguli ma rohangku mangendehon gogoMi.
Dohot asi ni rohaMu, ro di habasaronMi.
Ai i do dihatindanghon Tondi dohot pamatangku.
Alani hupuji Ho, tung marribu hali do.
U : Marhitehite Goar ni Debata Ama, dohot Goar ni AnakNa Tuhan Jesus Kristus dohot
Goar ni Tondi Porbadia na tumompa langit dohot tano on. Aman. Jahowa do
Partanobatoanhu dohot haporusanhu, jala sipalua ahu, Debatangku. Sitiopanhu,
marhaposan tu Ibana do ahu, lombulombungku dohot tanduk ni partuaonhu,
haporusanhu.
R : Ale Tuhan nunga dipataru Ho hami sian taon 2017 naung salpu i, jala dipasahat Ho
punguan Situmorang Sipitu Ama on dibagasan hahipason gok las ni roha. Mangido
ma hami asa Ho tongtong Tuhan manjagai ngolu nami di taon 2018 on.
U : Songon pangaramotion ni Debata di Bangso Israel uju i di parhorsihan, lobi songon i
do nang pangaramotionNa di hita angka naung hinongkopNa marhitehite Anakna
Jesus Kristus. Ala ni i; Sai marhaposan tu Ibana ma ho, jala Ibana ma bahen gabe
Partanobatoanmu.
R : Ho do Ale Tuhan haporusan nami marsundutsundut, ai Ho do Debata na tutu, na tuk
pasingkop ngolunami. Togutogu ma hami mardalan, marhite ombun uju arian jala
marhite api uju borgin.
 U : Ale Jahowa, Debata ni hatuaonnami, sai togihon ma hami tu parsaoran na denggan
rap dohot Ho, asa lam tu dasipna panghaporseaon nami tu Ho ale Debata na tutu.
R : (mangendehon) B.E. No. 15 : 4 + 8
- Mauliate ma rohangku di Ho, O Debata tongtong.
Dibaen sude denggan basaMu, naung nilehonMu di au on.
Ai dipatongon Ho. Tontong, sude na ringkot di au on.
- Sai pujionku do basaMu, saleleng na mangolu au.
Pasangaponku do goarMu, saleleng na marhosa au.
Maradu tos pe hosangki, naeng pujionku sangapMi.
U : Martangiang ma hita! Ale Tuhan Debata, pargogo na so hatudosan. Mauliate ma
rohanami tu Ho ala ni asi ni rohaM na mangaramoti hami sian nasailaon rasirasa
nuaeng, jala asi ni rohaM do na mangalehon barita na uli gabe hangoluannami.
R : Sai asi ma rohaM, sai buhai ma rohanami jala lehon tondiM na badia i, asa huantusi
hami sude panogugoguM dohot pamahenanMu na balga i. Paian ma hataM di
bagasan rohanami, asa mardame jala sonang hami jala imbaru rohanami
marhitehite AnakMu Tuhan Jesus Kristus Tuhannami. Martambatamba umur dilehon
Ho dipunguan nami on, sai pahot ma haporseaon nami TU HO marhite mamaelehon
dirinami tu bagas jaoroMi Amen!
2. Marende No. 186 : 1 – 2 “Tongtong Tutu Na Denggan Do”
- Jahowa do haposanki, na mangapoi rohangku,
Na patiurhon dalanki, bulus di baen langkangku,
Sonang tongtong rohangkinon binaen ni Debatangku,
Patik na do lomongku
- Na tau haposan situtu do Ho, o Debatangku!
Ai Ho do na tongtong burju mambaen hangoluanku,
Na gogo Ho; Sai tulus do sinangkap ni rohaMu,
Pasaut na pinungkaMu.
3. Manjaha Ayat : Psalmen 66 : 13 – 20
U : Dibahen i masuhangku ma jabum, mamboan angka pelean situtungon, manggarar
angka bagabagaku tu Ho.
R : Angka naung pinapuas ni bibirhon, jala naung pinarbagabaga ni pamangankon, uju
hagogotan ahu:
U : Angka pelean situtungon sian biru-biru na tinaruan pelehononku tu Ho, angkup ni
daupa sian hambing ro di lombu dohot birubiru tunggal pelehononku tu Ho. Sela!
R : Ro be ma mananginangi sude hamu angka na mangkabiari Debatam asa
hujamitahon naung binahen ni Debata tu tondingku.
U : Tu ibana do joujou pamanganku, jala pujipujian mampe tu dilangku.
R : Tung sura hajahaton ditahi rohangku, ndang tagamon tangihonon ni Tuhan i ahu.
U : Tongon do, nunga ditangihon Debata ahu, nunga diparateatehon soara ni
tangiangku.
R : Pinuji ma Debata, na so manulakkon tangiangku manang asi ni rohana pe sian ahu.
4. Marende No. 464 : 1 – 2 “Huboan Ma Diringku”
 - Huboan ma diringku, Tuhan, hibul tu Ho. Ai au do tinobusMu,
Umbaen tarbaen au ro. Pagalak ma rohangku, dison managam,
Au TondiMi ma suru, na boi manggomgom au.
- Ho sipalua ahu, sun hinagogoMi HataM do huhaposi,
Na so boi muba i. Pagalak ma rohangkum dison managam,
Au TondiMi ma suru, na boi manggomgom au.
5. Jamita
6. Marende No. 238 : 1 + 7 “Ihuthon Au Sude Hamu”
- Ihuthon Au sude hamu! Didok Tuhanta Jesus,
Sai soadahon dirimu, hatangku ma patulus;
Alai bolongkon ma sude parulanmu na so ture.
- Antong girgir ma hita be lao mangihuthon Jesus.
Dagingta, nang tondinta pe talehon ma tu Jesus;
Ai na manjua Tuhan i ndang dapot hasonangan i.
7. Tangiang Pangondianon ( Sahalak Sian Pengurus ni Punguan )
8. Marende No. 467 : 1 – 3 “Asi Ni Roham Hupuji” (Papungu Pelean)
- Asi ni rohaM hupuji ala Ho Manobus au.
Dipaias Ho rohangku, gabe soranganMu au.
IngananMu rohanami. Tondimi manggohi i.
Pangke dohot ngolunami gabe ulaulaMi
- Sai ramoti ma rohangku, asa boi gohanMu au.
Sai mabaor ma pasupasu nang marhite sian au,
IngananMu rohanami. Tondimi manggohi i.
Pangke dohot ngolunami gabe ulaulaMi.
- Naeng huhatindangkon hami hagogoonMi tongtong,
Paluahon na mardosa, nang parjahat na bolong.
IngananMu rohanami. Tondimi manggohi i.
Pangke dohot ngolunami gabe ulaulaMi.
9. Tangiang Penutup

Acara Na Mangihut Diaturhon Punguanma

C.Pdt. Susetio Lumbantoruan S.Th
PARTORDING NI ACARA KEBAKTIAN
PUNGUAN SITUMORANG SIPITU AMA
ANAK, BORU, BERE DOHOT IBEBERE
GANG DAME PERANGINAN

KAMIS, 08 FEBRUARI 2018