ACARA PARTANGIANGAN BONA TAON

PUNGUAN TOGA MANALU BORU BERE IBEBERE SE-KOTA DUMAI

Sabtu, 21 Maret 2020

I. IBADAH
1. JOUJOU TU PARSAORAN DOHOT DEBATA ( U : Uluan, R : Ruas )
U : Horas dohot Selamat taon baru ma di hita saluhutna. nahinaholongan di bagasan Kristus
Jesus, Na marpungu do hita di inganan on laho pasahathon mauliate ni rohanta tu Debata
siala asi ni rohaNa na tongtong mangaramoti pardalanan ni ngolunta ditaon 2019 naung
salpu.
R : Pinuji ma Debata Siramoti nasa hangoluan. Pinuji ma Jahowa, ai tung na sumurung do
asi ni rohaNa di hita.
U : Nunga itadai denggan basa ni Debata sian tingki na salpu sahat tu tingki on. Dipabongot
Debata do hita tu taon 2020 on dibagasan las ni roha. Godang do na itahirim silehonon ni
Debata tu hita, lumobi ma asa dilehon togu ni roha dohot gogo di hita mangulahon angka
ulaonta siganup ari dibagasan taon on. Taboto do, ndang tarula hita agia aha molo so
Debata na mandongani dohot na margogihon hita. I do nanaeng pangidoonta sian Debata
marhite partangiangan on. Antong , tapaunduk jala tapaserep ma rohanta. Martangiang
ma hita di bagasan rohanta be.
( Martangiang na hohom)
U : Songon pangaramotion ni Debata tu bangso Israel, songon i do nang pangaramotion ni
Debata tu hita, na Mandok : “Ai ingkon dibagasan las ni roha hamu borhat, jala dibagasan
hadameon hamu pataruon“. Ibana tahe marmahani hita di taon na salpu, Ibana nang
marmahani hita nang di taon 2020 nanaeng sibolusanta. Ibana ma maniroi hita asa talup
hita mambahen las ni rohaNa di pardalanan ni ngolunta. Antong, hamuna angka dongan,
di bagasan las ni roha ma hita marsomba tu joloNa, ai Ibana do Parmahan di hita. Jala
dibagasan lasniroha tapuji ma Debata naung mangalehon asi ni roha dohot denggan
basaNa.
2. Marende BE. No. 70 : 1 + 2 “Naung Salpu Taon Na Buruk i”
1. Naung salpu taon na buruk i , Ho ma hupuji Tuhanhi, Ai diramoti Ho tongtong tondingku
dohot dagingkon, Ai diramoti Ho tongtong tondingku dohot dagingkon.
(Jongjong)
2. O Jesus sai asi rohaM, Paian denggan ni basaM, Muse di taon na’mbaru on di nasa HuriaM
tongtong, Muse di taon na’mbaru on di nasa HuriaM tongtong.
3. VOTUM – INTROITUS – TANGIANG
U : Marhitehite goar ni Debata Ama, AnakNa Tuhan Jesus Kristus dohot goar ni Tondi Porbadia
na tumompa langit dohot tano, Amen. Asal pir tondim, jala marsihohot situtu
mangaradoti dohot patupahon hombar tu sude patik, angka na tinonahon ni si Musa,
naposongki tu ho. Unang manimbil ho sian i tu siamun manang tu hambirang, asa
marmulia ho manang dompak dia ho mangalangka. Unang meret buku ni patik on sian
pamanganmu, sai pingkirpingkiri ma i arian dohot borngin, asa diradoti ho, jala dipatupa
ho hombar tu sude na tarsurat di bagasan i, asa maruntung ho diangka dalanmu, jala
marmulia parulaonmu. Nda nunga hudok tu ho : Pir ma tondim jala Jahowa Debatam do
donganmu manang dompak dia pe ho mangalangka.

{1}
 R : Ida ma, Debata do hatuaonku, Ibana huhaposi jadi ndang mabiar ahu. Ai Tuhan Jahowa
do hagogoonku dohot pujipujianku dohot manjadi hatuaon di ahu. Jahowa do
donganku, ndang mabiar ahu, tung aha ma tagamon bahenon ni jolma tu ahu ?
U : Ida ma, sai donganKu jala ramotanKu do ho manang tudia pe ho mangalangka, jala
togihononKu do ho mulak tu tano on, Ai ndang tadingkononku ho nda jolo sahat Hubahen
na Huparbaga i tu ho .
R : Di Ibana ma hasangapon dohot hamuliaon saleleng ni leleng na
U : Martangiang ma hita. Ale Tuhan Debata, na so marmula na so marpansohotan, Debata na
manongtong ro disaleleng ni lelengna. Nang pe marsalpuan angka ariarinami, alai ndang
salpu ianggo asi ni rohaM. Di bahen i hupuji hami Ho marhitehite Tuhan Jesus Kristus
Tuhannami, ala ni godang ni asi ni rohaM na mangaramoti hami sahat tu tingki on. Mansai
godang do denggan ni basaM hujalo hami manipat taon na salpu i, jala huingot hami do i
sadarion. On pe mauliate ma tu Ho, ala dipangolu jala di ramoti Ho hami, dilehon Ho
sipanganon dohot parulosan di hami jala dipasupasu Ho na niula ni tangannami. Angkup
ni i dilehon Ho do tu hami hasonangan, dipalua Ho hami sian ragam parmaraan, jala di
ramoti Ho hami dihagogotan. Molo huingot hami sude pambahenannami tu Ho, na maila
do hami maradophon Ho, ala jotjot magopo ariarinami dohot asi ni rohaM hubahen hami.
Ale Debatanami, sai huphupi ma pambahenannami na hurang i marhitehite asi ni rohaM.
Patuduhon ma ganup ari tu hami dalan sidalanannami dohot ulaon siulaonnami. Pasupasu
ma hami ro diangka ulaon na denggan na huula hami marhitehite goarMu. Alai na
gumodang, pasupasuhon ma hataM na badia i tu rohanami, asa gabe imbaru rohanami
marhitehite AnakMu Tuhan Jesus Kristus, Tuhannami. Amen. ( Hundul )
4. Marende BE. No. 69 : 1 - 2 “Jesus Sai Urupi Hami”
1. Jesus sai urupi hami dohot di taon baru on, Paimbaru gogonami mangihuthon Ho tongtong.
Pasupasu ma muse na porsea sasude.
2. Pingkiranhu, ulaonhu tau pasangap Ho ma i. Dungo manang modom ahu, Ho tongtong di
lambungki. Nang lao ruar masuk pe, Ho ma donganhi muse.
5. NALOM NI ROHA MIDA DEBATA
U : Hata ni Debata dihita turpuk dipartangiangan bona taonta di tingkion i ma na tarsurat di
Psalmen 27 : 1 - 7. Jahowa do panondangiku dohot hatuaonku, tung ise ma habiaranku ?
Jahowa do partanobatoan ni ngolungku, tung mida ise ma ahu biahaton ?
R : Molo tung ro angka parjahat mangarongrong ahu naeng manganhon sibukku, angka
sisosak ahu dohot angka musungku, gabe martinggangan do nasida, jala marragean.
U : Nang pe marhoronhoron parangan angka na manungkum ahu, ndang dihabiari rohangku,
nang pe hehe parmusuon dompak ahu, sai pos do rohangku disi.
R : Sada do naung hupangidohon sian Jahowa, sai i do hulului. Naeng mian ahu di bagasan
joro ni Jahowa saleleng mangolu ahu, paidaida hinadenggan ni Jahowa dohot
mamingkiri ganup sogot di bagasan joroNa i.
U : Ai diondingi do ahu di bagasan undungundung di ari hinamago, ditabunihon do ahu di
partabunian ni undungundungNa, tu dolok partanobatoan do ahu dipanangkok.
R : Asa mandirgak ulungku mida musungku, angka na humaliang ahu, jadi pelehononhku
ma di bagasan undungundungna i angka pelean pujipujian, marende ma ahu huhut
mamalu parhinaloan mamuji Jahowa.

{2}
 U : Sai tangihon ma soarangku ale Jahowa, molo joujou ahu, asi ma roham mida ahu, jala alusi
ahu. I do sahatna. Martua do angka na tumangihon Hata ni Debata jala naumpeopsa.
Amen.
6. Marende BE. No. 753 : 1 “Di Pardalanan Jesus Di Jolongku”
Di pardalanan Jesus di jolongku, holong ni tanganMi manogu ahu. Nang dingolungku Ho do
sombaonku, tung sonang mardalan raphon Ho. Huboto do tangkas panoguonMu, diiringiring
Ho do langkangki. Sahat ro di ujung ni pardalanku, togu ma ahu jonok tu lambungMi.
7. MARNINGOT DENGGAN BASA NI JAHOWA
U : Puji ma Debata na manompa saluhutna, puji ma Ibana na mangaramoti ngolunta. Puji ma
Ibana, ai ro di saleleng ni lelengna do asi ni rohaNa.
R : Tung na balga do asi ni rohaM Tuhan tu hami, alani pujionnami ma Ho di tongatonga ni
ngolunami.
U : Hamu angka dongan sahaporseaon, tadok ma mauliate tu Debata pardenggan basa i, ala
tongtong do diramoti Tuhan i hita saleleng mandalani tahun 2019 na salpu i, jala
taparhatutu do ,Ibana do na mandongani jala na mangaramoti hita di ulaonta, di Huria, di
keluarga, songon i nang angka ianakhonta, dohot angka sisolhotta.
R : Tung na balga do asi ni rohaMi Tuhan tu hami, Alani i pujionnami ma Ho di tongatonga
ni ngolunami.
U : Dilehon Ibana do dihita nang angka na ringkot dibagasan ngolunta ganup ari dohot ganup
tingki. Dilehon do dihita gogo, pos ni roha dohot panghirimon laho mangalului ngolungolu
siapari.
R : Tung na balga do asi ni rohaMi Tuhan , alani i pujionnami ma Ho di tongatonga ni
ngolunami.
U : Tutu, ragam do angka na masa na boi mambahen hita mabiar mandalani ngolu di taon na
salpu i. Ragam do nang angka na masa na boi mambahen hita marungkil di tongatonga ni
parngoluan i. Alai saluhut na do manumpak tu na denggan di angka na marholong ni roha
di Debata.
R : Tung na balga do asi ni rohaMi Tuhan, alani i pujionnami ma Ho di tongatonga ni
ngolunami.
U : Nuaeng, bongot ma hita tu taon 2020 on ima sada taon na imbaru taon parasinirohaon
dihita. Alani i aha ma sidohononta.
R : Ale Tuhan, holongMu na manongtong i ma sijaloon nami nang dibagasan taon 2020 on.
Patiur ma tongtong rohanami jala sungguli hami laho mangoloi Ho, asa holan Ho huoloi
hami jala husomba hami saleleng ngolunami.
U : Ndang taboto angka na masa nanaeng siadopanta. Ndang adong na hot ianggo na di tano
on, tung saluhut do mubauba. Alai dohononta ma :
U+R : Sai na donganan ni Debata do hita ganup ari rasi rasa ro ajal ni hasiangan on. Amen.
8. Marende BE. No. 581 : 2 “Sangap di Jahowa”
Tung so hasuhatan do basaNa i, marhita anakNa ni lehonNa i. MudarNa durus do di hau silang
i, rara pe dosanta ias dibaen i. Puji ma Debata, Ale manisia. Las roham, las roham, somba ma
Debata. Dapothon Jahowa na sun timbul i, Marhite anakNa Tuhan Jesus i.
9. TANGIANG PANGONDIANON (Doa Syafaat)
10. Marende BE. No. 697 : 1 + 3 “Molo Ho Do Huihuthon”

{3}
 1. Molo Ho do huihithon dame sonang rohangki. Sai horas jala Martua nasa na hinophopMi.
Reff : Ho tongtong ihuthononku, Jesus na palua au. Ho sambing do oloanku, ala ni
martua au.
2. Hupelehon ma diringku, mangihuthon lomoMi. Ndada be na olo salpu, na manggohi
rohangki. Reff : Ho tongtong ihuthononku...
11. JAMITA
12. Marende BE. No. 763 : 1 - 2 “Molo Jesus Donganmi” (Pelean)
1. Molo Jesus donganmi las roham, Jesus i pangurupim las roham. Hot haporseaonmi dohot
pos ni rohami, Mardonganhon Jesus i las roham. Reff : Las roham,las roham,
mardonganhon Jesus i las roham. Marsinondang ma di ho bintang panghirimon i.
Mardonganhon Jesus i las roham.
------------------------- Musik .----------------------
2. Molo Jesus donganmi las roham. JagaonNa tondimi las roham. Tiruonmu ma tongtong
dame nang holongNa i, saleleng dingolumi, las roham. Reff : Las roham...
13. Parsuruon tu Ngolu Siganup Ari (P : Parjamita, R : Ruas)
P : Hamuna angka dongan, nunga patar itaida asi dohot holong ni Jahowa Debata di hita.
Dipataridahon do i marhite pangaramotionNa tu hita mamolus taon na salpu jala bongot
hita tu taon 2020 0n. Antong di ragam ni angka na masa na ingkon taadopi di taon on,
ingkon dohononta ma holan Jesus do hubahen donganhu.
R : (Mangendehon BE.No.260 : 1 “Holan Jesus do hubaen donganhu”)
Holan Jesus do hubaen donganhu, ai Ibana pasonanghon au. Ingkon sai tongtong tiur
langkangku, molo raphon Jesus i au lao. Molo raphon Jesus i au lao.
P : Jahowa do jumadihon hita, Ibana do nang nampuna hita. Antong tapatuduhon ma
haburjuon dohot hasatiaonta mangoloi Debata mangulahon lomo ni rohaNa disandok
ngolunta. Nunga dijou jala disuruh hita tu liat portibion asa marparbuehon na denggan.
Sai saut do angka ulaonta dohot na sinangkapan ni rohanta, molo Debata Tabahen
donganta.
R : (Mangendehon BE. No. 66 : 3 “Debata Baen Donganmi”)
Debata baen donganmi, sai na saut do ulaonmu. Sai na tulus do sangkapmu, jala
sonang rohami. Debata baen donganmi, Debata baen donganmi.
P : Pos ma rohanta, ditonga ni ragam parungkilon i di urupi jala di apuli Debata do hita.
Ditonga ni hagaleon soluk do Tondi ni Debata margogoihon dohot patubu panghirimon. Di
na deba dilehon kesuksesan, di na deba malum sian parsahiton, nang ragam angka las ni
roha tahe. Ia sipata pe masa angka parungkilon dohot na hansit, naeng auhononta ma i
laho patoguhon roha dohot haporseaon asa lam marsihohot tu Tuhan i. Pir ma Tondim
jala marsihohot, unang manonditnondit roham, jala unang tahutan, Ai Jahowa Debata do
donganmu, manang dompak dia pe ho mangalangka “ .
R : (Mangendehon BE. No. 268 : 1 “Debatangku do Donganhu” )
Debatangku do donganhu, ganup ari ganup taon. Tumpahanna do langkangku,
urupanNa au manaon. Pos do rohangki disi, Debata do donganhi salelenglelengna i.
14. Tangiang Pelean – Ale Amanami – PasuPasu – Amen 3x

II. Makan Bersama (Acara Diatur Panitia Pesta)

{4}