ACARA PARTANGIANGAN BONA TAON

PURAJA LAGUBOTI
Minggu, 09 Februari 2014

I. KEBAKTIAN :
1. Joujou Pahibul Roha :
U: Nunga diloas Tuhanta hita mamongoti sada taon na imbaru, i
ma taon 2014 on. Molo tabilangbilangi pambahenan ni Debata
di ngolunta di angka taon na salpu ndang tagamon so mandok
mauliate hita. Asing ni angka hahipason dohot pangaramotion
ni Debata di ngolunta marsadasada dohot keluarganta, adong
do sian tongatonganta na manjalo tamba ni hagabeon,
pahompu, sinamot, pangkat, kedudukan nang angka
pendidikan tu na tumimbo; adong na malum sian parsahiton,
malua sian parmaraan dohot lan na asing na so hagoaran hita
sadasada. Songon dia do panjahaon ni rohanta di angka na
masa i ?
H: Godang ma tongon pasupasu ni Debata di hita marsadasada.
Mauliate ma di denggan basa ni Tuhan i. Sai hipashipas ma hita
saluhutna laho mandalani taon on tumpahon ni Debata
Pardenggan basa i.
U: Alai taboto do saluhutna do manumpak tu na denggan di angka
na marholong ni roha di Debata, angka na jinouNa sian tahiNa
hian.
H: Bagas na i, antong hamoraon, hapistaran dohot parbinotoan ni
Debata ! Na so hasigatan do angka uhumNa jala na so
habogason do angka dalanNa ! Ai sian Ibana do saluhutna ro,
marhitehite Ibana jala marhapatean tu Ibana do sasudena i.
S: Di Ibana ma hasangapon dohot pujipujian saleleng ni leleng na.
Amen.

2. Marende BE. No. 309 : 1 + 4 “Raphon Tuhan Jesus i” BL. 164

 Raphon Tuhan Jesus i pungka ulaonmu. Ingkon tu Ibana i
parguruhononmu Baen Ibana donganmi. hehe dohot modom, dege
ma bogasNa I, rohami pahohom.
  Hupasahat ma antong, saluhut langkangku. Tu Tuhanku, na
tongtong, mian di rohangku. manang aha pe hubaen. Ho
hupangasahon, ale Tuhan tulus baen saluhutna, Amen.

3. Votum – Introitus – Tangiang :

U: Marhitehite goar ni Debata Ama dohot goar ni AnakNa Tuhan
Jesus Kristus dohot goar ni Tondi Porbadia na tumompa langit
dohot tano.
H: A m e n.
U: Jahowa do siparmahan ahu, ndang tagamon hurangan ahu.
Ama : Dipatongon do ahu tu jampalan angka na lomak, ditogutogu do
ahu di lambung aek hasonangan.
Ina : Dipasabam do ahu di dalan hatigoran ala ni goarna i.
Pengurus : Ai nang pe mardalan ahu di rura linggoman ni
hamatean, ndang huhabiari parmaraan, ai Ho do
mandongani ahu tungkotMu dohot batahiM mangapuli
ahu.
U: Ho do manutup meja di jolongku maradophon angka
musungku, dimiahi Ho do ulungku, suksuk do panginumanku.
S: Tongon tahe denggan basa dohot asi ni roha mangihutihut ahu
saleleng ahu mangolu, jala dung mulak ahu masuhanku ma
bagas ni Jahowa salelenglelengna. Haleluya !
U: Martangiang ma hita : Ale Tuhan Debata, sian asi ni rohaM do
umbahen sahat hami tu taon on; Ho do na mangaramoti hami
di bagasan taon na salpu i. Sai asi ma rohaM, sai unang tulak
hami nuaeng, sai dongani ma hami di bagasan taon naung ni
lehonMon. Pasupasu ma hami dohot angka ianakhonnami,
nang punguannami on ro di sude angka parhobasna pe;
pasupasu nang angka naniula ni tanganami ro di saluhut angka
program kerja nami di bagasan taon on asa anggiat mardalan i
sude manghorhon las ni roha di hami dohot di punguannami
on. Marhite Jesus Kristus Tuhannami. Amen.

4. Marende BE. No. 187 : 1 “Denggan do panogum” BL. 200

  Denggan do panoguM ale Jahowa diangka na pinarmahananMi.
Tagamon baheononMu ma na roa so tarbunihon Ho do burjuMi ?
Jotjot suhar do pambahenanMi di roha ni na so tumanda Ho, Alai
marhite sian i do ro tu hatiuron na tinoguMi.

5. Mandok Hata Sian Sahalak Ina :

6. Marende BE. No. 188 : 1 “Jahowa siparmahan au” BL. 131

 Jahowa Siparmahan au ndang hurang manang aha. Ai nasa jea
dipadao do sian dorbiana. Tongon dibaen na lomak i lao
pangoluhon tondingki, dibaen asi rohaNa.

7. Mandok Hata Sian Sahalak Ama :

8. Marende BE. No. 269 : 2 “Tu jolo ni Tuhanku” BL. 163

 Godang do halilian di tongan dalan i. Hatop do au mardalan tu
hasonangan i. Godang do hasusaan na humaliang au, Hubolus
parmaraan marningot Jesus au.

9. Mandok Hata Sian Pengurus :

10. Marende BE. No. 122 : 1 + 9 “Ida hinadenggan ni” BL. 13

 Ida hinadenggan ni angka na saroha i. Parpambaenan na burju
nang hatana pe tutu.
 Sai padomu ma muse na so olo saor dope. Nang pe rohanami on
sai pasada ma tongtong.
11. Tangiang Pangondianon :

12. Marende BE. 221 : 1 + 4 “Saleleng Jesuski” BL. 5

 Saleleng Jesuski na mandongani au. Maporus holsoholsongki sai di
Ibana au.
 Torop di tano on Mangkaliangi au. Sai Tuhan Jesus do tongtong
maniopniop au.

13. Renungan Situasional Bona Taon:

 U: Di naung taojakhon ngolunta di bagasan taon 2014 on, godang
ma tongon sipingkiran, sipatupaon dohot sihobasanta tu joloan
on. Pingkiranta do na paborhat ianakhon tu parsingkolaanna,
parbogason ni anak manang borunta, na pauli bagas;
Pingkiranta do nang na pamajuhon usaha, tigatiga, bisnis,
patimbohon pangkat, jabatan, dohot lan na asing. Behama
bahenonta mangadopi saluhutna i ?
H: Didok hata ni Tuhanta : “Eben-Ezer,…. rasirasa nuaeng diurupi
Jahowa do hita !”
(Mangendehon BE No. 268:1 ‘Debatangku do donganku’ BL.
127)
 Debatangku do donganku Ganup ari ganup taon.
TumpahanNa do langkangku urupanNa au manaon. Pos do
rohangki disi Debata do donganki Salelenglelengna i.
U: Atik tung adopanta angka peristiwa na mambahen hita
marungkil jala marsak, isara ni sahit, sitaonon, parsirangan
marhite hamatean, PHK, bencana alam, musim na manegai
hahipason dohot parngoluaon siganup ari. Beha do hita
mangadopi i saluhutna ?
H: Didok hata ni Tuhanta : “Eben-Ezer,…. rasirasa nuaeng diurupi
Jahowa do hita !”
(Mangendehon BE No. 268: ‘Debatangku do donganku’ BL.
127)
Ina : Ayat 2 : Debatangku do donganku Nang pe marsitaonon au.
Ai Ibana do Amangku Anak haholongan au.

Sude: Pos do rohangki disi Debata do donganki Salelenglelengna i.

Ama : Ayat 3 : Debatangku do donganku Tung na ganggu m’au disi?
Nda tongtong hangoluanku Asi ni rohaNa i ?

Sude : Pos do rohangki disi Debata do donganki Salelenglelengna i.

14. Marende BE. No. 481 : 1 – 2 “Godang dope Siguruhononmi”BL. 325

  Godang dope siguruhononMi, Asa tu dos ho dohot Tuhanmi. Sai
tong na hurang hatigoranmi. So tuk do pe haporseaonmi. Dirim
sambing dihaholongi ho. Donganmu laos dihalupahon.

 Tuhanta Jesus tiruanmu do. Na holong roha di au nang di ho ; Ai

diseahon do diriNa i, Singkatta lao tu hamatean i, Ndang na
dialang holong roha i, Ai naeng dihita hangoluan i.

15. Jamita/Renungan :

16. Marende BE. No. 763 : 1,… “Molo Jesus donganmi” BL. 763
 Molo Jesus donganmi las roham, Jesus i pangurupi, las roham, Hot
haporseaonmi do hot pos ni roha mi mardonganhon Jesus i las
roham. Las roham, las roham mardonganhon Jesus i. Las roham,
marsinondang ma di ho, bintang pangkirimon i mardonganhon
Jesus i las roham.
………………………….. holan Organ ……………………………..
 Molo Jesus donganmi las roham, JagaonNa tondimi las roham,
Tiruonmu ma tongtong dame nang holongNa i,Saleleng dingolumi
las roham. Las roham, las roham mardonganhon Jesus i. Las
roham, marsinondang ma di ho, bintang pangkirimon i
mardonganhon Jesus i las roham.
17. Pangauhononhon :
U: Debata do na paborhathon hita tu sude ulaonta, ala ni i, unang
mabiar hita, sai didongani Debata do hita dibagasan ngolunta,
marhitehite Jesus Kristus nang Tondi Porbadia pe.
H: Togutogu ma hami, asa tarbahen hami jongjong lao
mangadopi panggulmiton ni ngolunami na marragam i. Unang
paloas ganggu rohanami, arahon hami tu adopanMu, asa
unang mandao hami sian dalan hasintonganMu.
U : Ale Debata, Ho do pamuhai, jala Ho do na paujunghonsa.
Lehon hagogoon tu hami, asa unang tarlalap hami
diparlalapan, asa rade rohanami manjanghon Ho manang
sadihari pe Ho ro laho manjou hami.
 H: Hupasahat hami ma ngolu, daging nang tondinami tu Ho, asa
unang marisuang panghophoponMi di hami.
U : Ale Tuhan, tangihon pangidoan nami, asa marhitehite i, lam
marbungaran harajaonMu ditongatonga ni huriaM, songon i
nang ditongatonga ni bangso nami.
H: Marende BE. No. 691 : 6 “Hupasahat ma tu Jesus”
 Mauliate ma rohangku, ala au hinonghopMi, Pujionku ma
goarMu, Salelenglelengna i. Hupasahat ma tu Jesus,
saluhutna diringki. Hupasahat ma tu Jesus, saluhutna
ngolungki.
U: Antong, rap ma hita mangidohon Tangiang Ale Amanami.
H: Ale amanami, d.u.
U: Asi ni roha ni,…. du.
S: Amen………..Amen………..Amen. (diendehon)

II. MARSIPANGANON : (Diatur Tersendiri)

Partording ni Acara Bona Taon

Puraja Laguboti
Boru,Bere dohot Ibebere Se-Kecamatan Balige
Minggu, 05 Februari 2017
 Acara Partangiangan
Gomparan Raja Ujung Sinurat dohot Boruna
Di Desa Ujung Tanduk Kecamatan Laguboti
Ari Selasa, 27 Juni 2017
 Tapatuduhon ma hinadengganni na marhahamaranggi, na sahundulan
dibagasan Tuhan i (Psalm 133 : 1)
Marhite Partangiangan on Pomparan ni Raja Ujung Sinurat , anggiat mamboan
pasupasu tu keluarga dohot tu na humaliang.
01. Joujou tu Parsaoran Nabadia:
L: Hamuna angka dongan sahaporseaon! Sadari on ari Selasa, 27 Juni 2017 on,
Marpungu do hita Pomparan ni Raja Ujung Sinurat rap dohot boruna laho mandok
mauliate tu Tuhanta Pardenggan basa i na paloashon hita rap marparsaoran di
bona pasogit on. Antong! Dia ma dohononta di adopan ni Debata Pardenggan basa
i di tingki on?
S: Mangendehon BE No. 36: 1”Pasupasu hami” BL. 4
- Pasupasu hami, O Debatanami. Sai sondangkon bohiMi tu napungu on sude.
L: Pardenggan basa do Jahowa, Ibana do Siapuli roha ni angka na marsak jala na loja
ala ni holong ni rohaNa di hita jolma pardosa. Dijalo Ibana ma tangiangta ala
denggan ni basaNa. Jala saluhut jea dipadao sian hita asa tung sonang rohanta
mandalani ari-ari ni ngolunta sahat tu partingkian on. Nuaeng pe, taendehon ma
tangiang dohot elekelekta tu Tuhanta Pardengganbasa i:
S: Mangendehon BE No. 36: 2 - 3”Pasupasu hami” BL. 4
- Lehon ma di hami, dame ganup ari, Sai pasaor ma tondiMi tu na pungu on
sude.
L: I do tutu. Alai molo tapamanat haporseaon dohot parrohaonta siganup ari, jotjot
do hita lupa di denggan ni basaNa. Nuaeng pe, asa tung haru singkop las ni
rohanta manghamauliatehon denggan ni basaNa, dia ma dohononta di adopan ni
Debata Pardenggan basa i?
P: Ale Jahowa, Debatanami Ho do siapulirohanami, pahot ma haporseaonnami ala
denggan ni basaM, jalo ma tangiangnami na tedek di adopanMu na badia i. Sai
pagomos ma rohanami manundalhon saluhutna dosa, jala sai lam paganda ma
ringgas ni rohanami mangulahon nanidok ni hataM. Patau ma rohanami
mamingkiri denggan ni basaM asa unang lalap rohanami di portibi on. Sai ramoti
roha, pingkiran dohot saluhut ngolunami mandalani taon nabinasabasahonMi tu
hami. Asa tung las rohanami manghaporseai Ho.
L: Nunga tapangidohon tu Debata asa di pahot las ni roha, panghirimon dohot
haporseaonta mandalani ariari ni ngolunta tu joloan on, nuaeng pe, taelekhon
jala tasombahon ma ende puji-pujianta tu Ibana, rap ma hita mangendehon: “Las
rohang-ku lao mamuji Debata Parholong i......”
02. Marende No. 565: 1 + 4 “Las rohangku lao mamuji” BL. 565
 Las rohangku lao mamuji Debata Parholong i, songon bunga na mangerbang di
nabinsar ari i. Arsak dosa haporsuhon mago di baen asiMi. Las ni roha na
manongtong lehon di au Tuhanki.
……………………. Jongjong ……………………………
 Rap ma hita mangendehon sangap di GoarNa i, tapangiar soaranta lao mamuji
Tuhan i. Sun do holong ni rohaNa na so marnamontok i. I do pasadahon hita
salelenglelengna i.
03. Votum – Introitus – Tangiang:
 L: Marhitehite Goar ni Debata Ama, AnakNa Tuhan Jesus Kristus dohot Tondi
Parbadia, na manompa langit dohot tano on. Amen. Mandok mauliate ma hamu di
Jahowa, ai na basa do Ibana, ai ro di salelenglelengna do Asi ni rohaNa i.
P: Sai urupi ma hami ale Jahowa Debatanami Sai tumpahi ma ngolunami hombar tu
asi ni rohaM.
L: Jala halomohon Jahowa jadi lehononNa ma tu ho pinangido ni rohaM. Pasahat ma
dalanmu tu Jahowa jala haposi Ibana asa Ibana paturehon.
P: Taoloi ma Jahowa marhitehite las ni roha, ro be ma hita tu joloNa marhitehite
olopolop.
L: Taboto ma: Jahowa do Debata; Ibana do na jumadihon hita, jala Ibana nampuna
hita, bahen bangsoNa dohot birubiruNa.
P: Martua ma ganup na manghabiari Jahowa, na marparange di angka dalanNa i. Sai
panganonta do na niula ni tanganta, martua ma hita jala sonang. Tapuji ma
Jahowa, ai Pardenggan basa do Ibana; taendehon ma goarNa, ai hasudungan ni
rohanta do Ibana.
L: Martangiang ma hita: Ale Tuhan Debata, huboto hami, ndada ala ni gogo dohot
habisuhonnami sambing umbahen na tarbahen hami marpungu jala patupa
partangiangan sadari on; tung holan ala asi ni rohaM sambing do. Hupasahat hami
ma ngolunami tu Ho mandalani ariari na pinasahatMu tu hami, manang dibagasan
las ni roha manang arsak ni roha hami, holan Ho sambing ma huhaposi hami. Ala
ni, tambai ma nang haporseaonnami, asa tongtong hami marsigantung tu Ho.
Unang mandele hami molo ro pangunjunan tu hami. Hupagomgomhon hami ma
nang punguannami on tu adopanMu nabadia i, asa anggiat punguannami on lam tu
sadana tau mamparbuehon godang angka na denggan tu saluhut ruasna nang na
humaliang hami pe. Hupasahat hami ma tangiangnami on tu Ho, marhite Tuhan
Jesus Kristus na pasadahon hami mandok mauliate tu Ho. Amen. (Hundul ma hita
saluhutna)
04. Marende No. 707: 1 + 3 “Hagogoon dohot apulapul” BL. 707
 Hagogoon dohot apul-apul do dilehon Tuhan i tu au. Ganup ari au ditogutogu,
ganup tingki di ondingi au. Ai hombar tu lomo ni rohaNa, do dilehon Tuhan i tu
au. Ro marsorin arsak las ni roha, haporseaonku di patau.
 Songon Ama do tu anakhonna, holong ni Tuhanta i tu au. Ndang mansadi
pangurupionNa, hombar tu padanNa na tu au. Debata Amanta na di ginjang, i do
haposanku sai tongtong. Dipang-iringiring ni tanganNa dame sonang do
rohangkinon.
05. GABE PARROHA MAULIATE MA HITA TU DEBATA: (L=Liturgis, H=Hulahula, B=Boru)
L: Mandok mauliate ma hita tu Debata na mangolui, ala denggan ni basaNa dohot asi
ni rohaNa na so halompoan i mangaramoti ngolunta. Mansai balga situtu do holong
ni roha ni Tuhanta mangaramoti hita Pomparan ni Raja Ujung Sinurat, sian tingki
naung salpu sahat tu tingki on.
H: Dilehon do las ni roha dohot panghirimon na mangolu tu hita, nang pe marombas-
ombas arsak nang las ni roha taadopi. Ndang tarasam hita denggan basa ni Jahowa
na mangaramoti ngolunta. Alani, patut tapuji Ibana jala taoloi na nidokNa.
 L: Idama, pangarimpunan ni na denggan naung huida i: Lehet do mangan minum
jolma i jala dipasonang rohana mangihutihut sandok ulaonna hian na niulana di
hasiangan on saleleng di ngoluna. Na nilehon ni Debata tu ibana; ai i do jambarna.
B: Angkup ni i, molo dilehon Debata tu manang ise hamoraon dohot sinamot, diloas
ibana mangan dohot mambuat jambarna sian i, huhut marlas ni roha diulaonna,
silehonlehon ni Debata do i.
L: Jahowa do silehon tua dohot pasupasu tu hita, Ibana do hatuaonta. Soara ni
olopolop dohot hatuaon marsaringar di undung-undung ni angka partigor: Siamun
ni Jahowa do sibahen hamonangan dohot las ni roha di hita. Hamu ale angka na
manghabiari Jahowa, marhaposan tu Ibana ma hita! Ibana ma tutu Pangurupi
dohot lombu-lombunta dipardalanan ni ngolunta ganup ari.
H: Diingot Jahowa do hita: Ibana ma tutu mamasumasu ngolunta. Ibana do
mamasumasu nang pinompar ni sude Pomparan ni Raja Ujung dohot boru na di
tano parserahan nang na di Bona Pasogit pe; martua ma hita jala sonang.
L: Ibana mamasumasu angka na manghabiari Jahowa, angka na metmet dohot angka
na magodang. Sai ambaambaan ni Jahowa do pasupasuNa tu hita dohot tu
pinomparta sogot.
B: Martua ma ganup na manghabiari Jahowa, na lomo roha situtu di angka patikNa!
Sangap ma pinomparna i sogot di tano on, dapotan pasupasu ma sundut ni angka
partigor sogot.
P: Hamoraon marlobilobi dibagasan jabuna, jala hot do hatigoranna i ro di
salelenglelengna. Idama, sai songon i do tongon dapotan pasupasu ganup jolma na
manghabiari Jahowa. Amen.
06. Marende No 697:1 “Molo Ho do huihuthon” BL. 697
 Molo Ho do huihuthon, dame sonang rohangki, sai horas jala martua nasa na
hinophopMi. Ho tongtong ihuthononku, Jesus na palua au. Ho sambing do oloanku
ala ni martua au.
07. Jamita:
08. Marende No 656: 1,.. “Parhahamaranggion” (P. Pelean) BL. 697
 Parhahamaranggion i, lam hot jala togu, Singhop ma hasadaon i, di Jesus i burju,
Rap sauduran hita be marholong na tutu, Mardame, marlas roha ma di Jesus i
tutu.
 Togu ma hasadaon i; di ojahanna i, Sada haporseaon i, di Tuhan Jesus i. Ai sada
pandidion i, ai sada Ama i, Sada ma hita Kristen i manomba Tuhan i.
 Ai disagihon do ganup asi-asiNa i, Asa ringgas huhut burju, di ulaonna i, Sai lam
serep ma rohamu hombar tu Hata i,Parholong roha ma hamu maniru Tuhan i.
09. Doa Syafaat (Tangiang) sian sahalak natua-tua ni punguan:
10. Marende No. 435: 1 “Marolopolop tondingki” BL. 294
 Marolopolop tondingki, ai naung ditobus Jesus i. Hamu sude bege ma i sai las
rohangku mandok i. Reff. Sonang ni tingki i dung jumpang Jesus Tuhanki. TondiNa
mangajari au, tarbaen marlas ni roha au. Sonang ni tingki i, dung jumpang Jesus
Tuhanki.
11.Pujipujian marningot denggan basa ni Jahowa:
 L: Hamuna angka dongan na hinaholongan ni Kristus! Sai songon na mardalan tabolus
angka taon, disi dope hosanta diudut Debata. Ai songon asi ni roha ni ama-ama na
manjagahon anakhonna, umbalga sian i do asi ni roha ni Tuhanta manjaga hosanta.
Taparhatopot do di ngolunta, paboa na so haramotan hita dirinta. Pinuji ma
Debata dibaen sude denggan ni basaNa mangalehon na hasea di hita jolma
pardosa. Nuaeng pe, taelekhon ma tu Tuhanta Pardenggan basa i marhite na rap
hita mangendehon:
S: Mangendehon Reff BE No. 792 ”Pasupasu hami on Tuhan” BL. 792
- Pasupasu hami O Tuhan, Sai usehon dameMi, Sai ampehon tanganMi Tuhan,
lehon di au gogoMi.
L: Marsalpuan do ari-ari ni ngolunta, alai ndang na olo salpu ianggo asi ni roha ni
Debata. Dibahen i do ingkon sai pujion ni rohanta Ibana, ala ni godang ni asi ni
rohaNa mangaramoti ngolunta. PangaramotionNa dohot holong ni rohaNa i do na
mangonjar rohanta mandok mauliate tu Tuhanta Pardenggan basa i marhite
partangiangan on. Nuaeng pe tapangidohon ma tu Tuhanta Pardenggan basa i:
S: Mangendehon Reff BE No. 792 ”Pasupasu hami on Tuhan” BL. 792
- Pasupasu hami O Tuhan, Sai usehon dameMi, Sai ampehon tanganMi Tuhan,
lehon di au gogoMi.
L: Mauliate ma rohanta tu Debata, ala diramoti ngolunta sahat tu tingki on, dilehon
do tu hita sipanganon dohot paruloson, jala dipasupasu do ngolunta
marhasonangan. Tutu marsingkat sorin do partingkian taadopi di ngolunta, adong
do sian keluarganta na matean, na rugi, na agoan, na dapot karejo dohot na so
dapotan karejo. Sipata jut pingkiranta jala sipata marsak hita. Nuaeng, dilehon
Debata do tu hita apul-apul na margogoihon hita, ai diudut Debata do hosanta
paidaida hita saleleng mangolu di portibi on. Alani i tung gomos ma tapangidohon
sian nasa roha dohot haporseaonta tu Tuhanta Pardenggan basa i. Laos jongjong
ma hita saluhutna.
S: Mangendehon Reff BE No. 792 ”Pasupasu hami on Tuhan” BL. 792
- Pasupasu hami O Tuhan, Sai usehon dameMi, Sai ampehon tanganMi Tuhan,
lehon di au gogoMi.
12. Tangiang Panutup: Ale Amanami – Pasupasu – Amen 3X diendehon

PARTORDING NI ACARA MAMASUHI BAGAS

M. Hutahaean/K. br. Sirait (A. Charli)
Sabtu, 30 September 2017
I. Acara Kebaktian :
01. Marende BE No. 6 : 4 – 5 “Puji Jahowa Na Sangap BL. 56
 Puji Jahowa situmpak sude ulaonmu; Ai ditumpakhon tu ho tongtong
hangoluanmu, Ingot ma i denggan basaNa do i, tomutomuNa sambing
do.
 Puji Jahowa tondingku, pasangap goarNa! Dohot sude na marhosa
mamuji Ibana. I do ture baenon ni hita sude. Sai taendehon ma amen!

U: Hamu angka dongan sahaporseaon di bagasan Goar ni Tuhanta Jesus

Kristus! Ari las ni roha do di hita sadari on, ala asi ni roha dohot basa-
basa ni Debata na jinalo ni keluarga M. Hutahaean/K. br. Sirait ( A.
Charli) na patupa partangiangan mamasuki sibagandingtua sadarion.
Hupangido hami ma saluhutna na niontang ni suhut sihabolonon on asa
rap hita manangiangkon dibagasan rohanta, asa dibagasan hahipason
nasida manginganton bagas nasida mulai sadarion sahat tu ari nanaeng
bolousonna dope.

Kel.: Horas ma di hamu angka amang dohot inanami ro di saluhut na

hugonghon jala hupio hami tu ulaon partangiangan mamasuhi
bagasnami sadarion. Anggiat ma dibagasan dame dohot sonang ni
roha hamu mandohoti partangiangan mamasuhi bagasnami
sadarion. Laos hupangido hami ma asa dohot hamu manangianghon
hami na marulaon on, asa tung sonang hami manginganton
sibaganding tua on. Mauliate ma di haroromuna sude.

S: Mauliate ma tutu di Tuhanta Jesus Kristus na mangiringiring jala

manogunogu dohot mamasumasu amanta/inanta dohot saluhut
keluarga nasida, pola boi jongjong sibagandingtua on dibagasan las
niroha. horas ma hamu manginganhon bagas sibagandingtua on,
Mardangka bulung bira martampuk bulung labu; Mauliate ma di
Tuhan ai nunga tipak hamu marjabu. Tuhanta ma na mamasumasu
hamu rodi sude ianangkonmuna dohot ulaonmuna.
 U: Na pungu do hita sadarion di adopan ni Debata, antong rap hita lao
mamuji jala pasangaphon Debatanta Parasiroha i, marhite endenta
No. 125 : 1 + 3

02. Marende No 125 : 1 + 3 “Marlas ni roha hita on” BL. 82

 Marlasniroha hita on Mamuji Debata. Ai asi ni rohaNa i Do bongot tu
rohanta i. Umbaen nuaeng mardomu i Dison sadari on Dison sadari on.
 Alai taingot ma huhut Mambaen sangap tongtong. Barita ni Tuhanta i
Marhite parangenta i. Di jolo ni donganta i Di atas tano on Di atas tano
on.

03. Votum – Introitus – Tangiang :

U : Marhitehite Goar ni Debata Ama dohot Goar ni AnakNa Tuhan
Jesus Kristus dohot Goar ni Tondi Parbadia na tumompa langit
dohot tano on.

S : Amen.

U: Puji ma Jahowa, hamu ale angka na mangkabiari Ibana, sude

pinompar ni si Jakkob pasangaphon Ibana, jala sude pinompar ni
Israel mangkabiari Ibana!

Kel.: Puji ma Jahowa, ale tondingku, jala nasa rohangku di bagasan

mamuji goarNa na badia i.

U: Puji ma Jahowa, hamu ale angka surusuruanna, hamu ale angka

ulubalang na gogo, angka na patupahon hataNa, di na
tinangihonmuna soara ni hataNa i!

S: Halleluya! Puji ma Jahowa, hamu ale angka sian banua ginjang,

puji hamu Ibana di angka banua ginjang!

U: Ibana pamahap roham marhite denggan basa, asa mulak poso ho

songon pidong rajawali.
 S: Parasi roha jala pardenggan basa do Jahowa, ro di saleleng ni
lelengna do asi ni rohaNa, di angka na manghabiari Ibana.

U: Dai jala ida ma denggan basa ni Jahowa, martua ma manang ise na

marhaposan tu Ibana, AMEN. Martangiang ma hita! Ale, Jahowa
Debata, Amanami di bagasan Goar ni Tuhan Jesus Kristus! Mandok
mauliate do hami sadarion di godang ni pasupasu dohot basabasaM, na
hujalo hami di bagasan ngolunami. Buas do Ho, mangalehon nasa na
ringkot i; diramoti jala diparmudumudu Ho do ngolunami be, lumobi
keluarga ni amanami M. Hutahaean/br. Sirait (A. Charli),
pajongjonghon sibagandingtua nasida, jala mamongoti dibagasan
sadarion. Ndang hasuhatan tahe denggan basa dohot asi ni rohaM, naung
jinalonasida saleleng di ngoluna; diiringiring jala dipargogoi Ho do
nasida mamolus ragam ni hamaolon. Dipalumehon Ho di nasida dua
anak dohot sada boru; di pasupasu Ho ulaonna. Tung sirsir do
basabasaMi dingolu nasida. Mauliate ma di Ho, ale Tuhan. Pasupasu ma
bisuk dohot hapistaran dinasida saluhutna. Songon i nasida na
manginganton sibagandingtua nasida on, bahen bagas on, gabe bagas
manaringoti hatam, bagas partangiangan bagas partahian ni natuatua,
bagas hasorangan ni nauli, hasorangan ni anak dohot boru, bagas
partamueon. Jala bahen bagas on gabe bagas na gok dame di pangisina
gok hahipason dohot bisuk. Padao ma tahi ni angka parjahat, Ho ma
manjagai nasida sian sumbia ni sibolis. Ho ma mangaromiti nasida molo
ruar sian bagas on, jala manomunomu molo laho masuk pe tu bagas on.
Ale Debata hupasangap hami ma Ho dibagasan Kristus Jesus
Tuhannami. Amen.

04. Marende BE No. 327 : 2 “Aut na saribu hali ganda” BL.103

 Hupuji Ho, o Debatangku! Mauliate au di Ho, Dibaen sude na
nilehonmu, di au huhut huboto do, Las do roham di endengki,
marhitehite Jesus i.

05. Renungan Situasional :

U: Sadari on, marningot do hamu keluarga di pasupasu ni Debata, na
mangaloas hamu pajongjong bagas sibagandingtua muna on huhut
 mamasuhi dibagasan tingki on. Antong dia do panindangionmuna
di basabasa ni Debata?

Kel : Dipuji rohangku do Debata ala sude denggan ni basaNa naung

hujalo hami, diudut do hosanami boi tulus paulihon dohot
mamasuhi bagas on. Mauliate ma di Debata, ala hipashipas do
hami mamolus sude angka na masa di pardalanan ni ngolunami; di
lehon Debata do di hami habisuhon dohot hapistaran, songon i
nang sada ni roha, nang hadameon, dipatiur saluhut angka ulaon
nami dohot na sinangkapan ni rohanami, ido umbahen boi
tamasuhi bagas on sadarion. Pinuji ma goar ni Tuhanta parholong
i.

U: Godang ma tongon basabasa ni Tuhanta di hamu. Antong dia ma

bilang-bilang ni rohamu keluarga taringot tu angka na masa i
saluhutna?

Kel : Anggo mamereng godang ni parungkilon, sitaonon dohot

pergumulan ni ngolu nami saleleng di hasiangan on, tung mansai
tahutan jala monditondit do roha nami nian. Ndang hurang arsak,
lomos, ganggu ni roha na boi manggugai pingkiran dohot
tondinami; marsorin-sorin do hamaolon dohot las ni roha, na paet
dohot na tonggi, arsak dohot parsaulian hubolus hami. Songon
hopal na mardalan di tonga ni laut huhilala, sipata ditompas alogo,
udan haba-haba dohot halisungsung do ngolunami; ragam
parmaraan na mandosak hami mambahen talu jala tinggang. Alai,
tau do hami jala benget di saluhutna i. Hurajumi hami do i
pasupasu ni Debata, mauliate ma di Debata pardenggan basa i!

06. Tangiang sian Natoras :

07. Marende BE No. 06 : 4 “Puji Jahowa na Sangap” BL. 56

  Puji Jahowa situmpak sude ulaonmu; Ai ditumpakhon tu ho tongtong
hngoluanmu, ingot ma i denggan basaNa do i, tomu-tomuna sambing
do.

08. Renungan di panogunoguon ni Debata

U: Di naung tabege panindangion ni keluarga na mamasuhi bagas na
sadarion. Nalnal do disi pangaramotion ni Debata di sandok
pardalanan ni ngolunasida. Alai naeng do tangkas ojahan ni
hajongjongan ni bagas nasida on. hombar tu hata ni Debata na
mandok:

S: Ai ndang tarpauli ojahan na asing, dungkon ni naung ojak i, i ma

Jesus Kristus i.

U: Ai dipauliuli do hamu diatas ojahan ni angka apostel dohot

panurirang; Kristus Jesus sandiri do batu parsuhisuhi disi.

HL: Ai dipaimaima do bagas na marojahan na hot, na pinandean jala na

pinauli ni Debata. Tudoshon hau anggur na marparbue do ianggo
jolmam di bagasan angka bilut ni jabum, tudoshon tunas ni hau
jetun do angka anakmu humaliang mejam.

DT: Antong, hamu angka haholongan, ala naung diboto hamu i hian,
jaga ma, unang tarela hamu, dibahen haliluon ni angka na so
maruhum i, gabe madabu hamu maon sian haojahanmuna.
Manginona do torutoru ni Jahowa tu jabu ni parjahat, alai
dipasupasu do ianggo undungundung ni halak partigor.

U: Hapistaran ni angka parompuan pajongjong jabuna, alai anggo na

oto, laos tanganna sandiri mangalohaisa.

HL: Dengganan maringan iba di halongonan, asa marsajabu dohot

parompuan parbadabada dohot na murhing. Arta na arga dohot
miak na hushus do di jabu ni halak na pistar, alai anggo jolma na
 oto mansuasaehonsa do. Binahen ni gurbak ni ulu jomba angka
parhau ni bagas, jala binahen ni hagaleon ni tangan, tiris jabu i.

U: Nda on do, dihalomohon Debata sian ho, molo diponggoli ho rotim

tu halak na male, jala ditogihon ho tu jabum halak na dangol dohot
panangkarnangkar? Molo diida ho halak na marsaemara, gabe
diabiti ho ibana, jala ndang martabuni ho maradophon sibukmu.

Kel: Anggo dijagai ulubalang na gopas marsinjata jabuna, sinok ma

ugasanna.

U: Alai molo tung sogo rohamuna mangoloi Jahowa, pillit hamu ma

sadarion manang ise naeng oloanmuna, manang debata sileban
angka na nioloan ni ompumuna di bariba ni batang aek i, manang
debata ni halak Amori nampuna tano na niingananmuna i!

Kel : Alai anggo ahu dohot donganku sajabu, ingkon Jahowa do

oloannami..

09. Tangiang Pangondianon sian Sirait (Hula-hula)

10. Marende BE No. 299 : 5 “Debata do manggomgomi” Bl. 86

 Togu au ale Tuhanku, mangihuthon hatami. Saipature ma langkangku,
asa tung hasea i. Sai ramoti ma au on, asa sonang rohangkon.

11. Renungan : Lukas 19 : 9

12. Marende BE No.186: 1,-“Tongtong tutu” (Pasahat Pelean) BL.173

 Jahowa do haposanki, na mangapoi rohangku, napatiurhon dalanki,
bulus dibahen langkangku. Sonang tongtong, rohangkinon, binaen ni
Debatangku, patikna do lomongku.
 Na tau haposan situtu, do Ho, o Debatangku! Ai Ho do na tongtong
burju, mambaen hangoluanku. Na gogo Ho; sai tulus do, sinangkap ni
rohamu. Pasaut na pinungkaMu.
  Ndang dung dihalupahon Ho, sude na holong roha di Ho; ai sai
dapotsa do na tau apul-apulna. Tung sonang do, dibahen Ho, na sai
tongtong porsea, malua sian jea.

13. Parsuruon tu ngolu siapari – Tangiang Pelean – Ale Amanami – Pasupasu.

U: Molo tapatupa partangiangan mamasuhi bagas on, ndada nanaeng
mangalindangkon na adong hamu keluarga, asa diboto jolma na
liat na lolo on hinadeak ni sinadonganmuna. Alai naeng mananda
basabasa dohot panarihon ni roha ni Debata do di hamu di
ngolumuna saleleng on, Hata ni Tuhanta mandok :

S: “Jadi marlas ni roha ma ho mida Jahowa, jala ahu manogu-nogu ho

di atas ni angka buntul-buntul ni tano on, jala parmudumuduonku
ma ho..”

U: I pe ingani hamu ma bagas on, borhat ma hamu tu ngolu

siaparimuna, dalani ma ari-ari ni ngolum jala haposi Debata.
Torang ma roham, gara haporseaonmu, jala tiurma roham
mandalani tingki na pinasahat ni Debata tu hamu. Unang solsoli
Debata ua tung aeonmu dope hamaolon tu joloan on, nang pe torop
manghaliangi ho, alai Tuhan Jahowa dibagansan Jesus Kristus
dohot Tondi Porbadia do tongtong mandongani hamu.Tapasahat
ma pelean na tapapunguon tu Debata martangiang ma hita! Ale,
Debata, Amanami na dibanua ginjang…………….d.u! Amen, rap
mangido ma hita ditangiang na ni ajarhon ni Kristus Jesus tu hita!

S: Ale Amanami…………d.u. Amen

U: Pasahat tangiang pasu-pasu!

II. ACARA ADAT : (Diatur Hasuhuton)