PARTORDING NI ACARA PARPUNGUAN BODARI

PARNINGOTAN DI HATUTUBU NI TUHAN JESUS

Topik Minggu:
TU HITA DO DITONGOS HATA HALUAON

Kamis, 24 Desember 2015

Natal Umum HKBP 1

I. PANGARADEON DI BILUT PARHOBASAN
II. PROSESI :
(Parhalado mamongoti bagas joro, laos marende ma Song Leader
mangendehon: BE. No. 853 Haleluya (12x)
III. KEBAKTIAN

1. Joujou tu Parsombaon tu Debata: (U: Uluan ; H: Huria)

U: Patuginjang ma tohangmuna, hamu ale angka harbangan, patuginjang ma
hamu, ale angka pintu sian na robi, asa bongot Raja ni hamuliaon!
H: Ise ulaning Raja ni hamuliaon i? I ma Jahowa, na gogo jala Ulubalang,
Jahowa Ulubalang di hamusuon.
U: Patuginjang ma tohangmuna, hamu ale angka harbangan, jala
patuginjang ma hamu, ale angka pintu sian na robi, asa bongot Raja ni
hamuliaon i!
H: Ise ulaning Ibana, Raja ni hamuliaon i? I ma Jahowa Zebaot, Ibana do
Raja ni hamuliaon i.
U: Antong tapungka ma ulaonta sadarion, marningot naung tubu Tuhan
Jesus Kristus, gabe sipalua di hita saluhutna. Taparade ma roha dohot
pingkiranta, ai nunga ro Tuhan i tu portibi on, laho paluahon hita jolma
pardosa. Tapuji ma Tuhan i, marende ma hita !
2. Marende No: 57: 1-3 Nunga Jumpang Muse (BL. 202)

Nunga jumpang muse ari Pesta i, Hatutubu ni Tuhanta Jesus i
Tuat do Ibana sian surgo i, Mebat tu hita on
Reff: Hasangapon di Debata, dame,dame ma di jolma.
Las ni roha ni Debata, Hajolmaon muse.

Beta, ale dongan tu Betlehem I, I tasomba ma Dakdanak na disi.
Na tinongos ni parasiroha I, Debata Ama i
Reff: Hasangapon di Debata.
----------------Musik--------------------- (Jongjong)

Sombanami ma di Ho na tubu on, Ho siboan dame tu portibion
Sai pasaorhon ma tu rohanami on, DameMi o Jesus.
Reff: Hasangapon di Debata.
3. Votum Introitus :
U: Marhitehite Goar ni Debata Ama dohot Goar ni Anakna Tuhan Jesus
Kristus dohot Goar i Tondi Parbadia. Amen. Nunga Patar hangoluan i,
Natal Umum HKBP 2
 jala nunga huida hami jala nunga huhatindanghon hami dohot
hubaritahon hami tu hamu hangoluan na saleleng ni lelengna, na di
lambung ni Ama i hian jala naung patar di hami. Haleluya!
H: (Mangendehon) Haleluya.Haleluya..Haleluya
U: Martangiang ma hita: Ale Tuhan Debata, Amanami na dibanuaginjang.
Mandok mauliate do hami tu Ho, ala ni godang ni asi dohot holong ni
rohaM di hami; ai dibasabasahon Ho do AnakMu na sasada i tu hami na
di pardangolan on, asa malua hami marhitehite Ibana sian dosa dohot
hamatean salelelng ni lelengna. Hupangido hami tu Ho, sai sondangi ma
rohanami na holom i marhitehite Tondi Parbadia i; angkup ni i sai
parrohai ma hami, asa huboto hami mandok mauliate tu Ho, asa tarapul
situtu rohanami di hagogotan dohot dipangunjunan marhitehite AnakMu,
Tuhan Jesus Kristsu Tuhannami. Amen. (Hundul)
4. Marende No 605 : 1 - 2 Las ma roham (BL. )

Las ma roham Tuhanta ro,
Gumomgom sasude ungkap roham,
Jangkon rajam marende ma sude,
Marende ma sude, marende, Marende ma sude.

Tano nang laut, harangan i nang awang-awang i,
Hauma i, nang sunge i, olophon Raja I,
Olophon Raja I, olophon, olophon Raja i.

5. Marningot Asi Ni Roha ni Debata marhitehite PanompaonNa di

Portibion. (U=Uluan; A=Ama, I=Ina, N=Naposo, D=Dakdanak)
U: Ai pardengganbasa do Jahowa, ro di saleleng ni lelengna do asi ni
rohana, jala marsundutsundut do hasintonganna. Pardengganbasa do
Jahowa di saluhutna, jala dilinggom asi ni rohana do jadijadianna
sudena.
A: Puji ma Jahowa, ale tondingku! Na bolon situtu do Ho, ale Jahowa
Debatangku, marpangkean hasangapon dohot hamuliaon do Ho.
Hatiuron dialithon Ibana hira ulos, Ibana pahembangkon angka langit
songon rimberimbe.
I : Ibana manggulanggulangi di angka aek bilutna parginjang; huretana do
dibahen angka ombun i, mardalandalan do Ibana di atas habong ni
alogo. Ibana mambahen angka alogo surusuruanna, api na
marjimburjimbur bahen parhaladona. Nunga dipaojak Ibana tano on tu
angka ojahanna i, asa unang lalolalo salelenglelengna.
Natal Umum HKBP 3
U: Lintong majoajo do pangkuphupina dibahen hira ulos, disalpui aek i do
angka dolok. Maporus do angka i dibahen pangasupim, humalaput do
nasida maporus maradophon soara ni ronggurmu. Hinsat ma angka
dolok, marongrong ma angka rura tu inganan, na pinaojakmu hian di
nasida.
N: Ibana manongos angka mual di angka rura, sian holangkolang ni
angka dolok do angka i mabaor. Dipasobur nasida saluhut binatang
harangan, gabe sombu ma uas ni angka halode harangan. Marasari di
lambungnasida i pidong angka na martongatonga langit, angka na
pahar soarana sian holangkolang ni angka dangka.
D: Ibana pasobur angka dolok sian angka bilutna parginjang i, sian parbue
ni angka jadijadianmu do butong tano on.
H: Mangendehon BE. No. 569 O Debata tung longang do
rohangku

O Debata tung longang do rohangku,
Molo hubereng na tinompaMi,
Saluhut bintang, hilap dohot ronggur,
Manghatindanghon hasangaponMi,
Marende au Tuhan mamuji Ho, O, Debata, sangap do Ho.
Marende au Tuhan mamuji Ho, O, Debata, sangap do Ho.
U: Ibana patubuhon duhutduhut di pinahan dohot ingkau rata bahen
parulian ni jolma, laho paruarhon roti sian tano on. Ro di anggur, na
palas roha ni jolma na gale i, asa marmiak bohina lobi sian na hona
miak, dohot roti na tumungkol roha ni jolma na gale i. Butongan ma
angka hau ni Jahowa, angka hau Ares ni Libanon, angka na sinuanna i.
Disi ma marasari angka pidong; siboru tasik i na marjabuhon hau
tusam. Angka bedu do nampuna dolok angka na timbo i, haporusan ni
angka antuasu do angka dolok batu.
A: Ho do mambahen haholomon, jadi tubu ma borngin, disi ma
gumamang saluhut binatang harangan; Singa na bajar, angka na
patungaor mangido sisoroonna jala mangalului sian Debata
sipanganonnasida.
I: Binsar mata ni ari, manginsurut ma nasida, laho manggompang
tubagasan liangnasida. Ruar ma jolma i tumopot ulaonna, na
pinuhutanna rasirasa bot ari. Tung na lan situtu do angka
jadijadianmu, ale Jahowa! Saluhutna i dipauli Ho marhitehite
hapistaran, tung gok jadijadianmu do tano on.

Natal Umum HKBP 4

 N: Tole laut i na balga jala na lambas, disi do rumamang angka
gulokgulok na so habilangan, binatang angka na metmet rap dohot
angka na balga. Disi do mardalani angka parau, tole buea, na
jinadihonmu, asa marmeammeam disi. Saluhut nasida mangaranap tu
Ho, asa lehononmu sipanganonnasida di tingkina be.
D: Molo dilehon Ho di nasida, dijomputi nasida, molo dipatedek Ho
tanganmu, butongan nasida di na denggan i.Molo ditabunihon Ho
bohim, holsoan ma nasida, ditait Ho ma hosanasida, monding ma
nasida, jala mulak nasida tu orbuknasida hian.
U: Puji hamu ma Jahowa, baritahon hamu ma goarna i, pabotohon hamu
di tongatonga ni angka bangso angka pambahenanna i! Endehon hamu
ma Ibana, palu hamu ma parhinaloan umpuji Ibana, marnonangi ma
hamu taringot tu halongangan angka na binahenna i sudena. Amen
6. Koor:
7. Patik :
U : Antong tangihon hamu ma hata ni Debata di hita sadarion na
paingothon huriaNa laho mangaradoti PatikNa, i ma na tarsurat di
Heber 10:25 songonon ma didok disi:
H : Unang tatadingkon parpunguanta hian, songon na hinasomalhon ni na
deba; tung masipaingotan ma hita, jala lam i ma nian, ala lam jonok
diida hamu ari i!
U: Antong, rap mangido gogo ma hita sian Tuhan Debata.
H: Ale Tuhan Debata sai pargogoi ma hami mangulahon na hombar tu
patikMi. Amen.
8. Marende No. 727: 1 Hupillit asa marparbue (BL. 727)
Songon on didok Tuhanta Jesus : Ahu do na mamillit hamu
Asa lao hamu na marparbue jala mian parbuemuna i,
Hupadiri asa lao marparbue; jala mian parbuemuna i.
Hita na pinillit ni Tuhanta, ingot ma hata ni Tuhan I
Parbuehonna nasa na denggan, na hombar tu patik ni Tuhan I
Na tarjou do hita paimbaru diri, dibagasan Kristus Tuhanta i.
Tarsolsolli ma nasa dosanta tapauba ma rohanta,
tapelehon ma nasa dirinta, baen pelean na mangolu na badia
di Tuhanta na hinalomohon ni Debata. Amen.
(Jongjong)

Natal Umum HKBP 5

9. Liturgi II : Marningot Denggan basa ni Debata manesa dosa ni jolma na
mangido hasesaan ni dosa na: (U=Uluan; A=Ama, I=Ina, N=Naposo,
D=Dakdanak)
U : Huria ni Tuhanta, ro ma hita manjonok tu adopan ni Debata,
taokuhon ma angka dosanta jala tapangido ma hasesaan ni dosa di
bagasan Goar ni Tuhan Jesus Kristus.
(. . tingki na hohom . . : Musik mengalunkan BE No. 182, BL.
24)
U : Ale Debatanami, na marasiroha jala na badia. Amanami, marhitehite
Tuhan Jesus Kristus. Manang piga hali hami ro tu joloM, huhilala
hami, ringkot do asi ni rohaM di saluhut hami halak pardosa.
H : Marende BE. No. 182 : 1 Haholongon na badia (BL. 24)

Tu joloM o Debatangku Sai use do rohangkon
Sai pasiat tangiangku Dohot iluilungkon
U : Alani i do umbahen na hupaserep hami dirinami sadari on di joloM,
jala huparhatopot hami, tung na jotjot do hami manimbil sian angka
dalanMu da badia songon biru-biru na lilu.
A : Marende BE. No. 182 : 3 Haholongon na badia (BL. 24)

Sai jotjot do hutadingkon DalanMi na tigor i
Kristen au, hape hutondong Dalan hamagoan i.
U : Sai unang paingotingot angka dosa ni haposoonnami dohot
pangalasionnami, sai ingot ma hami hombar tu asi ni rohaM dohot
denggan ni basaM ala ni GoarMu.
N : Marende BE. No. 182 : 2 Haholongon na badia (BL. 24)

Husolsoli do rohangku Na gok dosa i tongtong
Ai godang ariaringku Na hubahen ambolong
U : Sai unang pabali hami sian joloM ala ni dosanami i, ai ndang
dihalomohon rohaM hamatean ni angka pardosa alai hamubaon ni
rohana do lomo ni rohaM, asa mangolu.
I : Marende BE. No. 182 : 4 Haholongon na badia (BL. 24)

Ala nii tungki rohangku Jongjong di adopanMi
Sai asi rohaM Tuhanku Sesa nasa dosangki.
U : Sesama saluhut hageduhonnami dohot pangalasionnami marhitehite
pangulunami na sasada i, AnakMu Tuhan Jesus Kristus.

D : Marende BE. No. 182 : 5 Haholongon na badia (BL. 24)

Mangihuthon Ho, Tuhanku i ma las ni rohangki
I ma naeng padanhononku Dok ma amenmi disi
Natal Umum HKBP 6
 U : Sai pahot ma asi ni rohaM di hami marhitehite panindangion dohot
hagogoon ni Tondi Parbadia asa tarapul situtu rohanami manjou
Ho, asa pantun, tigor jala daulat hami marpangalaho, bahen
hasangapon di GoarMu na badia i. Amen
H : Marende BE. No. 421 : 1 Marsomba au dijoloMon (BL. 281)

Marsomba au dijoloMon, ponjot, targogot rohangku,
dibaen godang ni dosangkon, sai jangkon dohot au.
Sai jangkon ma au on, na ramun diringkon,
tung pos do rohangki di Ho, dijangkon Ho au on.
U : Tabege ma Hata bagabaga taringot tu hasesaan ni dosa.
Ise be mangaluhon angka na pinillit ni Debata? Debata do na
mamintori. Ise do na mandabu uhum hamagoan? Kristus Jesus do
naung mate; alai ndada holan i, naung mulak mangolu do, jala di
siamun ni Debata do Ibana mangondihon hita. Ai ndang adong
imbar ni i; ai saluhut do pardosa jala hurangan maradophon
hasangapon ni Debata, alai angka na gabe pintor, binahen ni
basabasa marhite sian asi ni rohaNa, hinorhon ni panobusion na
marhitehite Kristus Jesus i, na pinajongjong ni Debata bahen
habangsa parasian marhitehite haporseaon di mudarNa.
Hasangapon ma di Debata na di ginjang!
H : Amen!

10. Koor:
11. Epistel:
U : Tabege ma Hata ni Debata turpuk dibagasan parpunguanta borngin on i
ma tarsurat di Psalm 89:16-27, songon on ma na tarsurat disi, marsingkat
sorin ma hita manjahasa: Martua ma bangso na umboto olopolop! Angka
na marpangalaho di bagasan hatiuron ni bohim, ale Jahowa.
H : Sai marolopolop do nasida manipat ari marhitehite goarmu, jala timbul
do nasida hinorhon ni hatigoranmu.
U : Ai Ho do saudara ni hagogoonnasida, jala hinorhon ni habasaonmi do
manuarang tanduknami.
H : Ai sian Jahowa do lombulombunami, jala sian na badia ni Israel do
rajanami.
U : Uju i mangkatai do Ho di bagasan alatan tu angka na niasianmu, jala
nimmu do: Nunga hupasahat pangurupion tu sada ulubalang, nunga
hupabangkit sada dolidoli sian bangso i.
H : Nunga jumpang Ahu si Daud, naposongku, nunga humiahi ibana, dohot
Natal Umum HKBP 7
 miak habadiaonki.
U : Sai tong do donganan ni tanganku ibana, nang botohonku margogoihon
ibana.
H : Na so tupa onjaron ni musu ibana, manang rupaon ni anak ni hajahaton
ibana.
U : Sai ropuhanku do angka alona maradophon ibana, jala ragehononku do
angka na mangkosom ibana.
H : Jala hasintonganku dohot asi ni rohangku mandongani ibana, jala
manuarang do sogot tandukna marhitehite goarhu.
U : Jala pampeongku tanganna tu laut, jala siamunna tu angka sunge.
H : Ianggo ibana jouonna ma Ahu: Damang do Ho, Debatangku dohot
partanobatoan ni hatuaonku!
U : I ma sahatna: Martua do angka na tumangihon Hata ni Debata, jala
na umpeopsa. Amen.
12. Marende BE. No. 607 : 1-2 Nunga tubu Kristus I (BL. )

Nunga tubu Kristus I Haleluya, Di huta Betlehem I Haleluya.
Daging Hata I Haleluya, Di mula ni natal I Haleluya. Gabe ya.

Narade tarsilang I Haleluya, Dipartangkurahan I Haleluya.
Mangoloi Amana I Haleluya. Lao manghophop jolma I Haleluya
13. Liturgi III: Barita Haroro ni Sipalua (U=Uluan; A=Ama, I=Ina, N=Naposo,
D=Dakdanak)
U: Alai dung dapot gok ni tingkina, disuru Debata ma Anakna, tubu sian
boruboru, ginomgoman ni patik i;
A: Ianggo hatutubu ni Jesus Kristus songon on do: Uju oroan ni si Josep i
dope inana, si Maria i, gabegabean do ibana sian Tondi Parbadia,
andorang so masipadonohan dope nasida.
I: Dung i ro ma uju i parenta sian Kesar Augustus, ingkon suratan nasa
jolma di gomgomanna.
A: Pamilangon parjolo ma i, uju digomgomi si Kirenius tano Siria. Jadi
borhat ma sasude, asa disurati, ganup tu bona ni pinasana.
N: Borhat ma nang si Josep, na sian Galilea, sian Nasaret, nangkok tu
luat Judea, tu huta ni si Daud, na margoar Betlehem, ala sian
pomparan jala marga ni si Daud ibana, pasurathon dirina rap dohot si
Maria, oroanna i, naung gabegabean.
U: Jadi di na disini nasida, gok ma ari ni hangoluanna. Ditubuhon ma anak
buhabajuna, diborhos ma, dipeakkon ma tu bagasan panggagatan, ala
so adong inganan na asing di parmianannasida.

Natal Umum HKBP 8

 A: Jadi adong ma marborngin di ladang na disini angka parmahan,
mangingani pinahannasida.
I: Jadi didapothon sada surusuruan ma nasida, jala marsinondang ma
sangap ni Tuhan i humaliang nasida, gabe mabiar situtu ma.
D : Alai didok surusuruan i ma tu nasida: Unang mabiar hamu;
N : Ai barita halalas ni roha godang do huboan tu hamuna, parsaulian ni
sandok bangso i.
U : Ai naung tubu do di hamu saborngin on, di huta ni si Daud, Sipalua i, i
ma Kristus, Tuhan i!
H: Mangendehon BE. No. 607 Nunga tubu Kristus i

Nunga tubu Kristus i, Haleluya, Di huta Betlehem i, Haleluya.
Daging Hata i, Haleluya, Di mula ni natal I, Haleluya. Gabe ya.
14. Koor:
15. (Diiringi Vocal Solo lagu BE. 616 Uli nai di borngin na badia, huhut
pagalak lilin)
U: Nunga sahat be tu hita Barita Haluaon i jala na marningot do hita di
tingki on dipanjanghonta di Jesus Tuhanta na gabe Sipalua hita sian
uhum ni dosa. Tapagalak ma lilin tanda las ni roha huhut mandok
mauliate tu Tuhanta.
- Parjamita :
- Mewakili Parhalado :
- Mewakili Dewan :
- Mewakili Seksi-seksi : Singkola Minggu, Remaja/Naposo, Ina, Ama
- Mewakili Lingkungan:
(Dung sidung pagalak lilin di jolo udut ma muse sude ruas ni huria
pagalak lilin diinganan na be ni urupan ni parhalado)
U: Jongjong ma hita saluhut huhut marende ma hita sian BE No: 54:1-
2 Sonang ni Bornginna i (BL.64)

Sonang ni bornginna i, uju ro Jesus i. Sonang modom do halak sude;
Holan dua na dungo dope, mangingani Anakna, Jesus, Tuhantai.

Denggan ni bornginna i, uju ro Jesus i. Tu parmahan di Betlehem i,
dipaboa na di surgo i, Nunga ro Sipangolu, Jesus, Tuhanta i. (Hundul)
16. Koor :
17. Marende No. 47 :1... Aut Na Saribu Haliganda (Huhut papungu pelean)

Di na saborngin i do binsar panondang di tondinta i.
Padaohon saluhut na simper, lao patiurhon sasude.
Sondangon ni panondang on muse sandok portibi on..
Natal Umum HKBP 9

I anggo ho, ale tondingku, sai jangkon ma panondang i.
Sai unang ma lea rohamu dibaen hametmetonna I ;
Pabalionna do sude, sibolis dohot dosa pe.
-------------------------Musik-------------------------

Panondang on do papatarhon Na so hea niidami.
Dibahen i sai hangoluhon, sondangna i tu tondimi ;
Ai ido hasonanganmi Di na lao sego sasude.

Dibahen i sai marsinondang Ma baen haporseaonmi
Padenggan jala sai patorang Roham ro di parangemi
Paboa na marguna do Panondang na ro i di ho
-----------------------Musik-------------------

Jesus panondang na ummuli Na pasonangkon rohangki
Togihon ma tondingku muli Tu surgo tu ingananmi
Sai pujionku Ho disi Saleleng ni lelengna i.
18. Renungan Natal : Ulaon ni Apostel 13:16-26
19. Marende No. 52:1...Hatuaon do (huhut papungu pelean)

Hatuaon do las ni roha do hatutubu ni Jesus i
:,: Mago do jolma, ro ma Tuhanta, las be las be ma rohanta i :,:
-------------------------Musik-------------------------

Hatuaon do las ni roha do hatutubu ni Jesus i
:,: Domu do hita tu Debatanta, las be las be ma rohanta i :,:
-------------------------Musik-------------------------

Hatuaon do las ni roha do hatutubu ni Jesus i
:,: Las ma rohanta mida Tuhanta, las be las be marohanta i :,:

20. Parsuruon:
U: Nunga ditongos Hata Haluaon i.
H: Hujanghon hami ma i.
U: Didok Tuhan Jesus: Laho ma hamu tu liat portibi on; jamitahon hamu
ma barita na uli i tu nasa na tinompa
H: Dison do hami Tuhan, suru ma hami.
U: Boan barita na uli tu angka na pogos, baritahon tu angka na tarhurung
asa malua, baritahon tu angka na mapitung asa marnida, palua ma
angka na ginosagosa, baritahon ma taon parasinirohaon ni Tuhan i."
H : Dison do hami Tuhan, patau ma hami manghatahon hasintongan,
mangulahon na denggan, asa gabe siboan dame hami di portibion.

Natal Umum HKBP 10

 U: Antong hamuna dongan sahaporseaon songon tanda ni
pangoloionmuna tu Debata, tapataridahon ma ngolu na hombar tu
Barita Haluaon i di huriaNa dohot di portibi on.
Sude: Mangendehon BE.No.720: 1, 4 Naeng marsinondang ngolungku.
1. Naeng marsinondang ngolungku di igil Jesus I,
Manang didia pe ahu tongtong huingot i.
Reff: Tiur marsinondang ido ni igil ni Jesus tongtong
Marsinondang panondang do au tutu.

4. Naeng oloanku Tuhanku, saleleng ngolungki,

Sogot di surgo I, endengku pasangap Tuhan i.
Reff: Tiur marsinondang

21. Tangiang Pelean + Tangiang Ale Amanami + Pasupasu.

Natal Umum HKBP 11