BAHAN SERMON HEBER 5:7-10

I. Patujolo
Ari parningotan di hamamate ni Tuhanta Jesus digoari Jumat Agung (Good Friday),
napatuduhon tung na marmulia ma tutu na masa di ari, ima hamamate ni Jesus. Jumat agung
ima manaringoti haluaon. Jala sude na adong diportibion mangharingkothon haluaon. Ise do
na mangalehon haluaon na singkop?
II. Hatorangan ni Turpuk
Siboan haluaon na singkop ima Jesus Kristus, di Johanes 14:6 didok “Ahu do
dalan dohot hasintongan dohot hangoluan, dang adong nasahat tu amai ia so marhite
sian Ahu”. Jala di bagasan turpuk on digoari do ianggo Jesus ima sintua ni malim na
sempurna jala na terunggul. alani di pelehon ibana dirina gabe pelean pardamean na
padamehon hita dohot Debata. Marhite dagingna dohot mudarna na durus di hau
pinasilang i laho manesa dosata. Di bagasan ari nagok sitaonon dohot haholomon,
dipatuduhon Jesus holong ni rohana, dame, lambas ni roha, habasaron, habasaon,
halambohon dohot panghirimon,
Jesus gabe sihorhon haluaon salelenglelengna (Menjadi pokok keselamatan yang
abadi). Di ayat 9 didok nungga rade haluan salelenglelengna di bagasan Jesus, alai
tapamanat ma dipangujungi di ayat 9 i, “di sude na mangoloi Ibana”. Lapatanna
dipangido do sian angka jolma natinobusna, asa pangoloi di Ibana.
Asa olo hita pangoloi di Debata marhite angka sitaonon pinasonggop ni Debata
hita. Godang do halak na olo unduk, pangoloi siala dibagabagahon hadiah. Somal do
sisongoni. Alai boha do hita olo unduk tu Debata justru di tingki marsitaonon, ido
dipangido Debata, Jesus ma gabe sorminan, tiruan di hita, na olo unduk di sitaonong gabe
bona ni haluaon. Dihagogotan i do hita margogo, di hagaleontai do hita diurupi Jesus.
III. Sipahusorhusoron
1. Argado hita ditobus, arga do hita di adopan ni Debata, pola durus mudarNa laho
humokkop hita. Alani martua ma jolma naung tinobusNa.
2. Marhaunduhon jala satia. Songon Jesus na unduk tu AmaNa. Songoni ma hita
unduh tu Jesus. Satia mangihuthon Jesus tung pe renge sitaonon, atikpe godang
namasa di ngolu.
3. Jesus do Sipalua. Dang adong dalan haluaon, manesa dosa, asing ni Jesus. Alani
tahamuliatehonma jala unang be datdati mardosa.
IV. Panutup
Molo tapatupa pesta parningotan ni ari hamamate ni Jesus sadarion, ingkon marlas ni
roha do hita, ndang na naeng tangis, tariluilu. Las ma rohanta gabe malua hita, las ma
rohanta targarar dosanta, las marohanta disesa dosanta. Alani pangoloi ma hitadi
Tuhan Jesus, siboan haluaon, hatuaon dohot hangoluan salelenglengna. Amen