ACARA IBADAH MAMASUHI BAGAS

J. SITOMPUL/R. Br. SILABAN

=====================================

I.ACARA MEMASUHI JABU (DILUAR)

O1. Marende BE. No.188:1-2 BL.No.131
♫ Jahowa Siparmahan au Ndang hurang manang aha, Ai nasa Jea
dipadao, Do sian dorbiana. Tongon dibaen na lomak i lao
pangoluhon tondingki. Dibaen asi rohaNa.
♫ Ditogu au tu na tio Aek mata hangoluan, Dibaen do tondingki sio
Di dalan hasonangan. Sabam rohangku do tongtong saleleng au di
tano on.Baen sangap di goarNa.
02. Penyerahan Kunci sian parjabu Tu Pandita
03. Mangungkap Pintu ni Bagas
04. Martangiang
II. ACARA KEBAKTIAN (DIBAGAS JABU)
01.Marende BE.SDJ No.754 :1, 5 “Gok las ni roha do au”
♫ Gok las ni roha do au di ngolungkon, Di ngolungkon, di
ngolungkon. Gok las ni roha do au dingolungkon tontong di
rohangkon. Mauliate gok las ni roha maringan holongMi Tuhan di
au, mauliate gok las ni roha, maringan holongMi Tuhan di au.
♫ Marlas niroha do au di ngolungkon, di ngolungkon,di ngolungkon.
Marlas ni roha au di ngolungkon. Tongtong di rohangkon.
Mauliate.............
02.Votum(U:Uluan; S:Sude; K:Keluarga)
U : Dibagasan Goar ni Debata Ama, Anak dohot Tondi Porbadia ma
tapungka mamasuhi bagas on. Ai molo so Jahowa paulihon
bagas, loja sambing do angka na mamandei : molo so Jahowa
marhal huta i, ndang marniula hadudungo ni parhal. Haleluya !
S : Amen
U : Pelehon ma tu Debata hamauliateon jala garari ma angka baga-
bagami tu na tumimbuli. Manang ise na mamelehon
hamauliateon, ido napasangap Ahu jala mambahen lapang asa
hupatuduhon di ibana hatuaon ni Debata.
 S : (Rap mangendehon) Haleluya….. Haleluya ….. Haleluya
U : Martangiang ma hita ! Ale Debata Amanami Pardenggan basa na
sumurung. Na ro do hami tu joloM mamboan puji-pujian dohot
mauliate ni rohanami tu adopanMu. Apala di tingki on dilehon
Ho do di hami las ni roha, hahipason, gabe ni angka na niula
dohot sinur ni na pinahan. Dipasu-pasu Ho do hami sonang so
haribo-riboan, mardamedame jala mardengan-denggan di
angka parsaoran siganup ari.
S : Tung balga do las ni rohanami sadarion, siala bolas keluarga J.
Sitompul/R. Br. Silaban pauli bagas nasida on sian mamungka
pajongjonghonsa sahat ro di nuaeng mamasuhi bagas.
K : Sai inganan pangalapan ni tua, pasupasu jala hadamehon
na sian Tuhanta ma bagas on di hami saluhutna; padao ma
na mambahen parmaraan, songgot-songgot manang
parsahiton di hami sude. Patongon hombar jabu dohot
dongan sahuta ro di ale-ale na marsihohot di hataM di luat
on. Tambai nang pansarian dohot pangabahan na tama di
hami, asa lam tau hami mamuji jala pasangaphon Ho
marhite-hite Jesus Kristus Tuhannami.
U : Paingot hami saluhutna ale Tuhan Jahowa, asa unang holan arta
portibion huringkoti hami, alai asa mangarade hami di bagas na
sumurung di banua ginjang naung pinaradeM, na so targagat
ngitngit dohot tasik. Dibagasan Goar ni Jesus Kristus
Tuhannami, Amen.
03.Marende BE.No 6:4-5BL.No.56
♫ Puji Jahowa situmpak sude ulaonmu;Ai ditumpakhon tu ho tongtong
hangoluanmu, ingot ma i denggan basaNa do i, tomutomuna
sambing do.
♫ Puji Jahowa tondingku, pasangap goarNa ! Dohot sude na marhosa
mamuji ibana. I do ture baenon ni hita sude. Sai taendehon ma
amen.
04.Epistel :
U : Hata ni Debata sibegeonta songon patujolo ni Jamita sibegeonta
annon ima natarsurat di Pslm. 23 : 1-3, Marsoring-soring ma
hita !
 Jahowa do Siparmahan Ahu, ndang tagamon hurangan ahu.
S : Dipatongon do ahu tu jampalan angka na lomak, ditogu-togu do
ahu dilambung aek Hasonangan.
U : Dipasabam do rohangku, ditogu do ahu didalan hatigoran, ala ni
goarNai. Ima sahatna, Martua do angka jolma na tumangihon
hata ni Debata jala naumpeopsa.
S : Amen
05.Hata Sipaingot tu nampuna Bagas
(U:Uluan; S : Sude ; K:Keluarga;)
U : Di na marlas ni roha hita mangompoi bagas ni keluarga J.
Sitompul/R. Br. Silaban, tama do pahusor-husoron ni rohanta
Poda ni Debata tu angka naung tarpasu-pasu di ngolu siganup
ari, dohot pauli angka bagasna songon na tarsurat di 5 Musa
8:11-20 : “antong ramoti hamu ma dirimu, asa unang lupa
roham di Jahowa Debatam, gabe dang diradoti ho angka tano i,
uhumNa dohot aturanNa, angka na hutonahon i tu ho sadari on.
S : Asa ia dung mangan ho jala bosuran, jala diapuli ho angka bagas
na uli diingani ho. Tole lombum dohot birum-birum sinur jala
ganda perak dohot sere di ho, ganda saluhut di ho.
U : Hape lam dipaginjang ho roham jala lupa ho di Jahowa Debatam
na mangalehon pasu-pasu di ngolum.
S : Ibana manogu-nogu ho dihalongonan bolon na jorbut, inganan
ni ulok tulong api dohot naga dohot hala, tano hasang huhut na
so marisi aek. Ibana tahe paruahon di ho aek sian dolok batu na
pir sahali.
U : Ibana mangalehon ho mangan manna na so tinanda ni ompum,
asa Ibana paserep roham dohot mangunjuni ho, asa
marhasongan ho bahenonna diujung.
S : Asa unang dohononku dibagasan rohangku gogongku sandiri
dohot huaso ni tanganku mangomo di au hamoraon on.
U : Ingkon paingot-ingoton ni roham tahe Jahowa Debatam, ai
Ibana do na mangalehon tu Ho mangomo angka arta i. Asa
pahothon padanNa naung niwarishonNa tu angka ompum,
songon na andar sadari on.
 S : Songon bangso parbegu angka naung niago ni Jahowa
maradophon hamu, suang songoni ma hamu mago, molo so
maradophon hamu soara ni Debatamuna i.
K : Sai tangihon jala dipeop rohanami ma saluhut tona ni Debata na
hujalo hami sadari on. Jala sai dipargogoi ma hami saripe
manghamauliateon pasu-pasu ni Debata, baen sangap di goarNa
na badia i.
S : Ima tutu, Amen (mangendehon BE.No.470:5-6 BL.No. 317)
♪ Sere, arta, hepeng pe, buat ma di Ho sude:Tondi nang
pamatangki, ingkon Ho oloan nii
♪ Pinangido ma tu Ho rohangki pe dohot do,BahenonMu,
Tuhanki, tong tu harajaonMi.
06.Jamita : Pdt. H.J. Siregar, S.Th,MM
07.Tangiang sian Hula-hula
08.Marende BE.SDJ No. 697:1 “Molo Ho do huihuthon”
♪ Molo Ho do huihuthon dame sonang rohangki,Sai horas jala
martua nasa hinophopMi. Ho tongtong ihuthonongku, Jesus na
palua au.Ho sambing do oloanhu ala nii martua au.
09.Tangiang sian Dongan Tubu
10.Marende BE.SDJ No.691:1-2“Hupasahat ma tu Jesus”
(Papungu Pelean tu Huria)
♫ Hupasahat ma tu Jesus saluhutna ngolungki,Roha nang
pambaenanku saluhutna tingkingki.Hupasahat ma tu Jesus
saluhutna diringki, Hupasahat ma tu Jesus saluhutna ngolungki.
♫ Pangkeonku ma tanganku, mangula lomoNa i,Langka nang
simanjojakku mangihuthon Tuhanki. Hupasahat ma Jesus
saluhutna diringki,Hupasahat ma tu Jesus saluhutna ngolungki.

11.Tangiang Pelean, Ale amanami, Pasu-pasu-amen-amen-amen.

HJS.reg 2019