ACARA SYUKURAN MAMASUHI BAGAS

T SIANIPAR/ BR SIRAIT (BAPAK ESTER)

Sabtu 27 Maret 2021
Wilayah Gereja Atas

I. Di Alaman.
1. Pangaradeon : Sude Keluarga dohot undangan nunga marpungu di jolo ni bagas na
naeng masukan.
2. Marende B.E. 188 :1-2 (Jongjong mangadop pintu ni bagas)
 Jahowa Siparmahan au Ndang hurang manang aha. ai nasa jea dipadao Do sian
dorbiana. Tongon dibaen na lomak i Lao pangoluhon tondingki. Dibaen asi
rohaNa.
 Ditogu au tu na tio Aek mata hangoluan. Dibaen do tondingki sio Di dalan
hasonangan. Sabam rohangku do tongtong Saleleng au di tano on. Baen sangap
di goarNa.
3. Pamujion
Nampuna Bagas : Sian asi dohot holong ni roha ni Jahowa do hupungka jala hupasidung
hami bagas on. Mauliate ma di Debata, dipasupasu Tuhan I ma hami saluhut pangisi ni
bagas on.
U : Bagas pangalapan tua, pasu-pasu jala hasonangan ma bagas on di hamu tumpahan
ni Debata marhitehite Tuhan Jesus Kristus
4. Mangungkap bagas
Tukang (Pasahat kunci ni bagas tu Uluan, dungi didok ma songonon): Hupasahat hami
ma kunci ni bagas on tu hamu parhaladonami. Dipasupasu Tuhanta do hami saleleng on
na paulihon bagas on sahat tu na dimpos. Ungkap hamu ma asa masuk keluarga on rap
dohot sude naginokhonna. Sai dipasupasu Tuhan I ma sude pangisi ni bagas on.
U : Huungkap ma bagas on, marhitehite goar ni Debata Ama, dohot goar ni AnakNa
Tuhan Jesus Kristus, dohot goar ni Tondi Porbadia. Amen. Hoaras ma hamu mangingani
bagas on. Inganan na ginohan ni Dame dohot holong ni roha ni Tuhanta ma bagas on di
hamu. (Masuk ma tu bagas laos hundul be ma)
II. ACARA PARTANGIANGAN DI JABU
01. Marende B.E No. 361 : 1
 Na denggan situtu do mamuji Debata. Jahowa na tumimbo Na sai tongtong basa.
Denggan do paboahon Manogot asiMi. Bodari mangendehon BurjuM nang sintongMi
02. VOTUM
U: Marhite-hite goar ni Debata Ama dohot goar ni AnakNa Tuhan Jesus Kristus dohot goar
ni Tondi Porbadia, na manompa langit dohot tano on.
1
 H : Amen
U : Pelehon ma tu Debata hamauliateon, jala garari ma angka bagabagami tu Natumimbul.
Manang ise mamelehon hamauliateon, ido pasangap Ahu, jala mambahen lapang, asa
hupatuduhon di ibana hatuaon ni Debata.
S : (Mangendehon) Haleluya…haleluya…haleluya…
U : Martangiang ma hita : Ale Tuhan Debata Amanami pardenggan basa nasumurung. Na
ro do hami tu joloM mamboan pujipujian dohot mauliate ni roha nami tu adopanMu.
Apala di tingkion dilehon Ho do di hami las ni roha, hahipason, gabe ni angka na niula
dohot sinur ni pinahan. Dipasupasu Ho do hami sonang so hariboriboan,
mardamedame jala mardenggan denggan di angka parsaoran siganup ari.
S : Tung balga do las ni roha nami sadarion, siala bolas keluarga ni amanami T Sianpar /Br
Sirait ro di sude keluarga nasida mamasuhi bagas nauli on
K : Sai inganan pangalapan tua, pasupasu jala hadameon sian Ho ma Tuhan bagas on di
hami saluhutna. Padao ma na mambahen parmaraan, songgot-songgot, manang
parsahiton di hami sude. Patongon hombar jabu dohot dongan sahuta ro di ale ale na
marsihohot di hataM di luat on. Tambai nang pansarian dohot pangabahan na tama di
hami, ajari nang angka ianakhon nami asa magodang di bagasan lomo ni roham.
U : paingot hami saluhut ale Tuhan Jahowa, asa unang holan arta portibion huharingkoti
hami, alai asa mangarade hami di bagas na sumurung di banua ginjang naung
pinaradem, na so tarngatngat ni ngitngit dohot tasik. Jalo ma tangiang namion marhite
hite Jesus Kristus Tuhan name. Amen..
03. Marende B.E. No. 12: 2-3
 Huboto Ho do mual ni na denggan sasude. Dilehon Ho do sian I godang di hami be.
 Ai aha na adong hian di hami na lea. Sude dilehon ho nian o Tuhan debata.
04. Sipaingot tu nampuna bagas
U : Di na marlas ni roha hita mamasuhi bagas ni keluarga T Sianpar /Br Sirait Amang dison,
tama do pahusorhusoronta poda ni Debata tu angka naung tarpasupasu di ngolu
siganup ari, dohot na pauli angka bagasna songon na tarsurat di 5 Musa 8 : 11-20 :
“Antong ramoti ma dirim, asa unang lupa roham di Jahowa Debatam, gabe dang diradoti
ho angka tonaNa i, uhumna dohot aturanna, angka na hutonahon I tu ho sadarion.
K : Asa unang ia dung mangan ho jala bosuran, jala dipauli ho angka bagas na uli diingani
ho. Tole lombum dohot birubirum lam sinur do jala ganda perak dohot sere di ho, ganda
huhut saluhut na di ho.
S : Hape lam dipaginjang ho roham jala lupa ho di Jahowa Debatam, na mangalehon
pasupasu di ho saleleng ngoluM.
U : Ibana manogunogu ho di halongonan na bolon jala na jorbut, inganan ni ulok tulung api
dohot naga dohot hala, tano hasang huhut na so marisi aek; Ibana tahe paruarhon di ho
aek sian dolok batu na pir sahali.
S : Ibana mangalehon ho mangan Manna di halongonan, na so tinanda ni angka ompum,
asa Ibana paserep roham dohot mangunjuni ho, asa marhasonangan ho bahenonna di
ujung.

2
 K : Asa unang dohononmu di bagasan roham: Gogongku sandiri dohot huaso ni tanganku
mangomo di ahu hamoraon on.
U: Ingkon paingotingoton ni roham tahe Jahowa, Debatam, ai Ibana do na mangalehon
gogo tu ho mangomo angka arta i, asa pahothon padanna naung niuarihonna tu angka
ompum, songon na andar sadarion. Alai tung sura lupa roham di Jahowa, Debatam, jala
diihuthon ho angka Debata sileban huhut mangoloi jala marsomba tusi,
hatindangkononku hian ma tu hamu sadarion, ingkon mago situtu hamu. Songon
bangso parbegu, angka naung niago ni Jahowa
maradophon hamu, suang songon i hamu mago, ala so ditangihon hamu soara ni
Jahowa, Debatamuna. Ido sahatna.
K : Sai ditangihon jala dipeop rohanami ma saluhut tona ni Debata na hujalo hami sadarion.
Jala sai dipargogoi ma hami manghamauliatehon pasu pasu ni Debata, baen sangap di
goarna na badia i..
U : Martua ma hamu ala ditangihon jala dipeop hamu hata ni Debata. Amen
05. Marende B.E. No. 497 : 4
 Marlas ni roha do au on, ai Jesus donganhi tongtong. Sai ro do sinondangNa I, tongon tu
rohangki. Ipe huingot ma tongtong, dang boi holsoan rohangkon. Ai damang na di surgo I
pasingkop bohalhi.
06. LITANI. NGOLU NA MARPANGHIRIMON
U : Molo tauji mangarimangrimangi pardalanan ni ngolunta, tarlumobi ma hamu keluarga, T
Sianpar /Br Sirait na marlas ni roha di bagasan sadarion. Sipata do hita mamolus
ragam ni hamaolon dohot las ni roha, sipata mabiar hita mangadopi angka na masa.
Adong dope hasonangan di ari sogot? Manang ingkon mangolu do hita di bagasan
ngolu na tahutan?
K : Ale Tuhan togu-togu ma hami di pardalanan ni ngolu nami.
U : Molo dirimangi hamu pardalanan ni ngolumuna na saleleng on, aha do naung dipatupa
hamu di keluarga, aha do naung dipatupa hamu di masyarakat, aha do naung dipatupa
hamu di huria? Aha do naung dipatupa Debata di ngolumuna. Godang ma tongon
naung pinatupa ni Jahowa di hamu, dibaheni marlas ni roha ma hamu di si huhut
mandok mauliate.
…………………………………….hohom……………………………………..
Gabe sorminan ma angka ari naung didalani hamu laho mardalan tu joloanon. Molo biar
rohamu, ingot ma hata ni Debata na mandok: “Unang mabiar hamu”, ai dang
pasombuonna hamu mardalan sasada hamu.
K : Sai dongani ma hami tongtong ale Tuhan asa unang lilu jala tahutan hami.
U : Masiantoan ma hita, masipajujuan tu haholongon dohot tu angka ulaon na denggan
(Heber 10:24). Manongtong ma holong ni roha di dongan (Heber 13:1). Tapareahi ma
hasadaon di bagasan Kristus tu joloanon.
K : Hagogoon dohot pos ni roha di bagasan Ho ma ale Tuhan napatauhon hami mandalani
ari-ari ni ngolu nami.
07. Marende B.E. No. 470: 1+6

3
 a. Jesus Ho nampuna au dohot na adong di au. Gogo dohot hosangki sahat ma tu
tanganMi.
b. Pinangido ma tu Ho, rohangki pe dohot do baenonMu, Tuhanki, tong tu harajaonMi.
08. Martangiang pangondianon sian hula-hula
09. marende B.E. No. 467 : 1
 Asi ni rohaM hupuji ala Ho manobus au. Dipaias Ho rohangku gabe soranganMu au.
ingananMu rohanami tondiMi manggohi i. pangke dohot ngolunami gabe ulaulaMi.
10. JAMITA : Jeremia 29 : 5
11. Marende B.E. No. 753 : 1+2 (Papungu pelean)
Di pardalanna Jesus di jolongku, holong ni tanganMi manogu au. Nang di ngolungku Ho do
sombaonku, tung sonang mardalan raphon au. Huboto do tangkas panoguonMu, diiring-iring Ho do
langkangki. Sahat ro di ujung ni pardalanku, togu ma au jonok tu lambungMi
 Patogu ma Tuhan haporseaonku, asa polin tu Ho manghirim au. Tu surgoi patulus
pardalanku, tondiMi maringan ma di au. Huboto do……….
12. PARSURUON
U :Ale Tuhan Debata, parasi roha na sumurung. Mauliate ma dipasahat rohanami tu Ho,
ala godang ni asi dohot holong ni rohaM. Diurupi Ho do dongan nami on pauli bagas na
uli on sian na mamungka sahat tu na paujunghonsa. Ndang tagamon so godang
halojaon, parungkilon, dohot holso-holso ni roha nasida papungupungu sinamot na
ringkot tu pembangunan ni bagas on. Alai tung dipasingkop Ho do na ringkot tu ulaon I,
gabe dimpos jala sirsir saluhutna songon na hubereng hami nuaeng. Pasu-pasuM do I
Tuhan, jala hupuji hami ma goarMu alani saluhutna i.
K : I ma tutu Tuhan, di Ho ma puji-pujian nami arion ro di saleleng ni lelengna.
U : Di naung hubongoti hami jala dihalashon hami bagas on sadarion, hupasahat jala
hupanggomgomhon hami ma tu Ho saluhut pangisi ni bagas on, mulai sian na metmet
saht ro di na magodang, sisolhot, ale-ele, ro di angka arta nasida. Mian ma Ho di bagas
on marhite-hite TondiM, sai ramoti ma nasida mangingani bagas na uli on asa tongtong
di bagasan hahipason..
Kel : Ima tutu ale Tuhan, suru ma Tondi Parbadia tu ganup hami pangisi ni bagas on, asa
jumpang hami dame, las ni roha, hatuaon, parsaoran na tama, asa masa di hami holong
na masihaholongan marhite-hite goar ni Tuhan Jesus Kristus Tuhannami.
S : Sai parrohai ma hami mamilangi angka ariarinami, asa dapotan roha na bisuk hami.
U : Antong borhat ma hita tu halasan ni rohanta, sai saut ma angka na tasangkapi
saluhutna, di ulaon sadarion dohot di angka ulaonta siganup ari, ai nunga ro Debata tu
tonga-tonganta.
U : Tangiang Pelean+Ale Amanami…….+ Pasupasu
H : AMEN….AMEN….AMEN
III. Acara Paradaton pinasahat ma tu protocol (diatur tersendiri)