PARTURE NI ULAON KEBAKTIAN KELUARGA

DI PARPUNGUAN JUMAT AGUNG, 10 APRIL 2020

HKI RESORT SUKARAMAI DAERAH VIII RIAU-SUMBAGSEL
Sipangkeon ni Ganup Keluarga di Bagasna be

Tema : PANGHOKHOPON NI JESUS NA PALUAHON

Ev. Mateus 27: 45-56; Ep.Heber 10: 19-29
01. Votum U = Siuluhon Kebaktian; K = Anggota Keluarga; S = Sude
U : Marhitehite Goar ni Debata Ama, dohot Goar ni AnakNa Tuhan Jesus Kristus, dohot
Goar ni Tondi Parbadia, na tumompa langit dohot tano on. Dipasaor ma dameNa tu
tondinta. Amen! Rap mandok ma hita di tangiangta i,
K : Ale Jesus Tuhannami bereng hami na di son; PinarmahanMi do hami saluhutna na di
son; Sai asi rohaM di hami sai pangolu hami on, Amen!.
02. Marende BE. No. 78: 1-2 “O ULU NASAP MUDAR”
 O ulu na sap mudar, binaen ni bugangMi. Na sian jangarjangar sisungsang duri i. O ulu
hatongamon hian do tumpalMi. Ditaon Ho haleaon Ho naeng sombaonki?.
 O bohi parsinondang na sangap situtu. Beasa tung marlangan sap ijur hurumMu?.
Tung aha ma alana umbaen homur mataM?. Na mintop do sondangna di na lao tos
hosaM.
03. Ayat - Tangiang
U : Tongon do angka sahitta diusung Ibana, jala angka pardangolanta diporsan; alai anggo
rohanta mandok: Debata do maminsang, mamungkul dohot pasipal Ibana. Hape ala ni
pangalaosinta Ibana tartullang, binahen ni hajahatonta Ibana mabugang. Ampe tu Ibana
pinsangpinsang parhitean ni hasonanganta, jala binahen ni bugangNa malum
itahilala.(Jesaya 53: 4-5)
Martangiang ma hita; Ale Tuhan Jesus Kristus, Birubiru ni ni Debata Jahowa na
mamorsan dosa ni portibi on! Na pungu do hami nuaeng di bagasnami on, jala
marunduk ni roha marningot hamamateM na gantung di hau na pinarsilang i ala ni
dosanami. Asi ma rohaM, lehon ma TondiM na badia i di hami, asa diajari hami
mangauhon hinahansit dohot hinabernit ni na tinaonMu laho manobus hami. Sai pahot
ma haporseaonnami di Ho, asa taruli hami dipanghophopMi, Amen!. Haleluya.... .....
S : (Rap Mangendehon); Haleluya……haleluya….haleluya….!
04. Singkat ni Patik
U : Tatangihon ma hata ni Debata, singkat ni patikNa di parmingguonta ombas on, sian na
tarsurat di Ulaon ni Pilipi 2: 5, songon on ma tonaNa; Songon parrohaon ni Kristus
Jesus ma parrohaonmuna! Ima sahatna, rap ma hita mangido gogo sian adopan ni
Debata;
S : Ale Tuhan Debata, sai pargogoi ma hami na sakeluarga, mangulahon na hombar tu
hataM i, Amen

1
05. Marende BE. No. 90: 2+4 “SAI MAR LAS NI ROHA HITA”
 Anggo utang ni dosangku, digarari Jesus i. I do haporseaonku di na tinaonNa i. Nunga
tulus patik i, nunga mintop rimas i. Di na hehe i Ibana ro di au hangoluanNa
 Dohot ho o hamatean, nunga mago soropmi. Suruhonku pe udean, ndang na tinggal au
di si. “Anggo au mangolu do sai mangolu dohot ho!”. Ninna Jesus tu rohangku, molo
ro hamateanku
06. Manopoti Dosa – Bagabaga
U : Tatopoti ma dosanta nagodang i, martangiang ma hita; Ale Tuhan Debata Jahowa,
Amanami Pargogo na so hatudosan jala Parasiroha na sumurung! Huparhatopot hami
ma di joloM, paboa pardosa na godang do hami sian hatutubunami sahat ro di tingki
on, marhite angka parange dohot parulaannami na so hombar tu lomo ni rohaM. Alai
ianggo Ho na badia jala na timbul situtu do GoarMu.
K : Ndang tau hami nian ro tu adopanMu, ala jolma na ramun do hami huhut na tangkang
marroha. Jotjot do huramuni hami dirinami marhitehite roha, pingkiran nang hatanami,
jala lupa do hami paboa naung diuras jala diparbadiai Ho marhitehite mudar ni AnakMu
Tuhan Jesus Kristus Tuhannami.
U : On pe ale Debata Jahowa, na mangido ma hami tu Ho, lehon ma TondiM tu hami, asa
diparbadiai roha ro di sandok ngolunami, jala asa lam tangkas panandaonnami di asi ni
rohaM, gabe margogo hami manirang dirinami sian angka ulaon haramunon dohot na
humurang i.
K : Sai urupi ma hami pabadiahon parsaorannami dohot Ho di tongatonga ni huriaM, nang
parsaoran dohot dongannami jolma. Asi ma rohaM, sesa ma saluhut dosa dohot
pangalaosionnami di HataM, ala ni AnakMu Tuhan Jesus Kristus Sipangolu hami.
Amen
S : (Mangendehon BE. No. 165: 3) “O JESUS NAPANGOLU”
O Tuhan hutopoti ma, luhutna dosangki. Asi rohaM sai sesa ma, di Ho ma tondingki
U : Tabege ma bagabaga ni Debata taringot tu hasesaan ni Dosanta: Hape ala ni
pangalaosinta Ibana tartullang, binahen ni hajahatonta Ibana mabugang. Ampe tu Ibana
pinsangpinsang parhitean ni hasonanganta, jala binahen ni bugangNa malum itahilala
(Jesaya 53: 5). Hasangapon ma di Debata na di ginjang,
S : Amen
07. Marende BE. No. 174: 1+4 “TOROP DOPE”
 O Torop do pe na siat i, di hasampuran rea. I pe hamu pardosa i, sai olo ma porsea. Ai
Debata manjou hamu, tu hasonangan situtu. Hamu, hamu, dijou Debatamu.
 Haporseai ma hata i, ai i do hatuaon. Haposi Tuhan Jesus i, mudarNa i ma golom. Ai
nang gok dosa rohami, malua ho bahenon ni. Tutu, tutu, malua baenon ni
08. Manjaha Epistel: Heber 10: 19-29
U : Tabege ma hata ni Debata, turpuk epistel di minggunta sadari on, sian na tarsurat di
Heber 10: 19-29, songon on ma hataNa: Antong, ale angka dongan, adong do di hita
hiras ni roha, laho bongot tu bagasan na badia i, di bagasan mudar ni Jesus;
2
 K : Ai dibungka do di hita dalan na imbaru jala na mangolu, sian rimberimbe i, i ma
dagingna i;
U : Jala adong do di hita Malim na bolon, sigomgom bagas ni Debata.
K : Dibahen i, tadapothon ma, marroha na sintong, di bagasan hagogok ni haporseaon,
dung diurasi rohanta, unang be disolsoli panggora ni roha i hita, jala dung diburi
dagingta dohot aek na ias!
U : Momos ma tatiop pangkirimon na taparhatopot i, ai haposan do na marbagabagahonsa!
K : Masiantoan ma hita, masipajujuan tu haholongon dohot tu angka ulaon na denggan!
U : Unang tatadingkon parpunguanta hian, songon na hinasomalhon ni na deba; tung
masipaingotan ma hita, jala lam i ma nian, ala lam jonok diida hamu ari i!
K : Ai anggo tatuntun mardosa, dung jolo tajalo parbinotoan di hasintongan i, ndang adong
be dapot pelean pasaehon dosa.
U : Uhum na jorbut nama sipaimaon dohot api ni haririmas, siallang angka na mangalo.
K : Sitompas patik ni si Musa ingkon mate do, anggo adong dua manang tolu sitindangi,
so siat asi ni roha.
U : Timbang hamu ma: Sadia dumokdok ma uhum mangonai tu jolma, na mandegedegei
Anak ni Debata jala na mansoadahon mudar parpadanan, parhitean ni habadiaonna
nian, jala na manoisi Tondi Parasiroha i! Ido sahatna, martua ma angka na umbege
jala na umpeop hata ni Debata!.
S : Amen
09. Marende BE. No. 84: 1-2 “AUT NA GINORGA TU ROHANGKU”
 Aut na ginorga tu rohangku, bohiM di na lao mate Ho. Aut na huingot o Tuhanku,
tongtong pangkophopMi di au. Ai Ho do paluahon ahu, dosangku do pinorsanMi.
Didaoni Ho parsahitonku, martua au binahen ni i.
 Sai jalo ma’au ale Tuhanku, baen upa ni na tinaonMi. Sai naeng ingoton ni rohangku,
tung sasude na binaenMi. Humophop au pardosa godang, dibahen holong ni rohaM.
Hinorhon ni tarbaen au sonang, laho mandapothon banuaM
10. Manghatindanghon Hata Haporseaon
U : Raphon donganta sahaporseaon di liat portibi on, tahatindangkon ma hata
haporseaonta i, rap mandok ma hita;
S : Au porsea di Debata, i do Ama Pargogo na so hatudosan, na tumompa langit dohot
tano. Ahu porsea di Jesus Kristus, Anak ni Debata Jahowa nasasada i: ima na
tinubuhon ni si Maria, na gabegabean sian Tondi Parbadia andorang so habubuhan; I
do Tuhanta na tumaon na bernit di panguhuman ni si Latus, na mate tarpajal do Ibana
di hau na pinarsilang, natuat tu banuatoru, dung ditanom, na mulak mangolu di ari
patoluhon, na manaek tu surgo laho hundul tu siamun ni Debata Jahowa, Amana i,
pargogo na so hatudosan i. Di si ma Ibana, paima mulak sogot tu tano on manguhumi
halak na mangolu dohot na mate. Ahu porsea di Tondi Parbadia, jala adong sada Huria
na badia, Huria hatopan ni halak Kristen angka na badia, dohot dihasesaan ni dosa,

3
 dohot di Hata i na mandok: Mulak mangolu do sogot daging ni halak naung mate,
dohot di hangoluan na so ra suda! Amen
11. Marende BE. No. 210: 1-2 “O TUHAN NA MARASI ROHA” (Pelean I & II)
 O Tuhan na marasi roha, na so tardodo jolma i. Torop do halak sipardosa, na rap
mamuji goarMi. Dibaen basaM na godang i, marhitehite Jesus i.
 Dibahen Ho do pardengganan, pasaehon dosa i sude. I do manghorhon haluaon, di hita
na tarjea i. I pe mauliate ma, au on di Ho O Debata.
12. Jamita: MATEUS 27: 45-56
13. Marende BE. No. 186: 5 “TONGTONG TUTU NADENGGAN DO”
 Antong sai sahat ma tu Ho, au on O Debatangku. Asi rohaM sai tait gogo, tu Ho
sandok rohangku. Sai togu i, tu surgoMi. Ai di na tos hosangku Ho do dapothononku.
14. Tangiang Pangondianon
15. Marende BE. No. 88: 1+4 “DI SURGO DO ALEALENTA” (Pelean III & IV)
 Jesusku naung manobus ahu, sai naeng haholonganku Ho. Tu dolok Golgata Ho laho,
nionjar ni holongMu do. Hupuji nasa asiMi, alai gumodang holongMi.
 Bagas uhirhon tu rohangku, pangkophopMi humophop au. Tusi ma togu pingkiranku,
guru di Ho sambing ma ahu. Hupuji nasa asiMi, alai gumodang holongMi
16. Pangujungi
U : Tapasahat ma peleanta on tu adopan ni Debata, martangiang ma hita: Ale Tuhan
Debata Jahowa, Amanami na di banuaginjang! Na ro do hami tu joloM, mamelehon
tondi, daging, roha nang gogonami tu Ho. Siangkup ni i, di son adong huboan hami
parbue ni ngolunami sipelehononnami tu Ho. Jalo ma on Tuhan, sai las ma rohaM.
Pasupasu ma peleannami on, pangkeon ni huriaM bahen hararat ni harajaonMu di liat
portibi on. Nuaeng pe, na mangido ma hami tu Ho, sai pasupasu ma ulaonnami
nasakeluarga. Sai bahen ma gabe na huulahami, sinur na pinahan, mangomo
pansarian, asa tongtong adong jala tugodangna arta sipelehononnami tu Ho. Di
bagasan goar ni AnakMu, Jesus Kristus, Tuhan, Sipangolu hami, Amen! Rap mandok
ma hita tangiang hatopanta i,
S : Ale Amanami na di banua ginjang ....du....
U : (Molo parhalado do parbagas i, dibahen ma tangiang pasupasu, alai molo ndang,
langsung ma diuduti mangendehon “Amen 3 x”)
S : (Rap mangendeon) Amen....!, Amen....!, Amen....!

4
 Tema: PANGHOKHOPON NI JESUS NA PALUAHON

Adong pitu pandohan ni Jesus dung di hau silang i Ibana. Sada sian i ima natarsurat di turpuk
jamitanta on, ima na di ayat 46b. Sian pandohanNa na di turpuk jamita on, dia do naeng dohononNa tu
hita?
1. Bernit ni partinaonan ni Tuhan Jesus laho paluahon hita.
Di ayat 46 i didok, "Ale Debatangku, Debatangku, boasa tung tadingkononMu Ahu (Eli, Eli, lama
sabachtani)?" (Patudos tu na tarsurat di Mark.15:34). Urutan di pandohan na paopathon ma on, sian
pandohanNa na di hau pinarsilang i. Pandohan on ma ummaol antusan sian napitu pandohan i. Boasa?
Ala sai hira na mandele do idaon Jesus sian pandohanNa i, hape anggo na sasintongna, ndang. Antong
dia do naeng dohononNa di son? Jala aha do maksudna? Pandohan i naeng patuduhon na tung mansai
bernit do partinaonanNa; sahat do Ibana tu titik nol di na gantung Ibana di hau pinarsilang i. Dokdok
situtu do parniahapanNa holan laho manghophop hamu dohot ahu. Ndang targombarhon Ibana hancit
jala parirna. Dibahen i dikutip Ibana ma hata na tarsurat di Psalmen 22: 2, na marrumangkon ende
dohot tangiang ni sahalak na tigor roha na dipasiaksiak angka parjahat/musu. Jadi pandohanNa on
ndada patuduhon holsoNa manang pandeleanNa. Laho mangantusi i unang hita fokus holan tu
pandohan "boasa tung tinggalhononMu ahu," alai siparrohahononta panjouonNa tu Debata i do na
mandok, “Ale Debatangku, Debatangku". Dia do lapatan ni i? Tangkas ma tarida na so putus hubungan
ni Tuhan Jesus tu Debata; na so mandele Ibana; baliksa marsigantung do lbana tu Debata, ala Debata
do digorahon di hinabernit ni panghophoponNa i.
Ndang holan “Debata” didok Tuhan Jesus, alai “Debatangku” do. On patuduhon hasolhotonNa,
parsigantunganNa tu Debata. Alai marhite hata “boasa tung tadingkononmu Ahu”, mura ma antusanta
na tung mansai hancit do dihilala Tuhan Jesus; ndang adong ilmu kebal di ibana, ndang gabe so
dihilala ibana hansit ni na dilinsingi, dipangku, digantunghon; Alai nang pe songon i, ditaon, dituhuk
Tuhan Jesus do saluhutna i di bagasan haunduhonNa tu parsuruon ni Ama i holan laho paluahon hita
pardosa.
Boha angka dongan, molo songon i hancitna diae Tuhanta Jesus i holan humonghop hita, laos so
auhononta be panghophoponNa i?. Datdatanta dope mardosa? Torushonononta dope ngolu na
mangoloi hagiot ni daging? Unang be nian; nunga dilohothon Jesus saluhutna i di hau pinarsilang i.
Nunga mate be dosa dohot hamatean i. Ala ni i, tajangkon jala tahamauliatehon ma pengorbananNa i na
taperingati sadari on. Burjuna i Tuhanta i ate amang, inang?. Antong hita pe tahaburjuhon ma
manghaporseai Ibana, Sipalua hita i.
2. Hamamate ni Tuhan Jesus Puncak Hagogok ni Bagabaga i
Tolu hali Psalmen 22 i disurathon di Matius 27 on. Na parjolo ima sinangkin. Na paduahon ima
andorang so turpukta on, di Ayt. 35, "Alai dung diparsilangkon nasida Ibana, martondung ma nasida
taringot tu angka abitna" (Psalm.22:19). Patoluhon i ma di Ayt. 43, "Naung dihaposi Debata; antong, i
ma paluahon Ibana nuaeng, molo na lomo rohana, ai ninna do: Anak ni Debata do Ahu" (Psalm.22:9).
Jala sasintongna, ndang holan Psalmen 22 dikutip laho manggombarhon pamiahapan ni Jesus di hau
pinarsilang i, dohot dope tahe na tarsurat di Psalmen 69:22, ima di Ayt. 34, 48, "Disi ma dipainum
nasida tu Ibana tuak anggur na marsaor pogu; jadi dung didai, ndang olo Ibana manginum... Dung i
pintor marlojong ma sada sian nasida mangalap limut, dibutongi ma i tu na asom, dipalohot ma tu
tolong painumhon lbana"
5
 Marhite na dua Psalmen on diondolhon si parevanggelium Mateus on ma, ia Tuhan Jesus
marsitaonon ala ni hatigoran do, ndang ala ni dosana. Sian on marsiajar do hita marnida hasatiaon ni
Jesus tu Padan na Robi (tu Buku na Badia ala holan Padan na Robi dope na adong). Laho
manganggukhon hinabemitNa pe, hata ni Debata do dipangke Ibana.
Tontu lobi sian na nialaman ni par Psalmen do nialaman ni Jesus i. Tuhan Jesus ma puncak
penggenapan ni sude panurirangion (nubuatan) na di Padan na Robi i. On ma na naeng ondolhonon ni
turpuk jamita on. Ndada holan asa taboto hinahansit ni na diae Tuhanta i. Lobi sian i tahe, asa taboto
jala tahaporseai do ia hamamate ni Tuhan Jesus i na laho patulushon bagabaga haluaon ni Debata do,
ima angka na tarsurat di padan narobi i. Ndang paimaonta be Mesias na dibagabagahon di Padan na
Robi, songon nidok ni par advend dohot saksi Jahowa; Tuhan Jesus do Mesias, Sipalua i. Dibahen i
tajanghon ma panghonghopon ni Tuhan Jesus na tu hita. Unang be talului sipalua na asing, isara ni
datu, sumangot ni ompunta naung monding. Holan tu Tuhan Jesus ma hita marhaporseaon ala lbana
do hagogok ni bagabaga ni Debata, ai Ibana do Sipalua hita.
3. Panindangion na tutu do Tuhan Jesus Anak ni Debata
Dung masa angka ondeng, mangholom sude hape hos ni ari do (ayt.45) tarlumobi dung humuntal
tano dohot marigat angka batu mamak (ayt.51), gabe mabiar ma induk ni soldadu dohot angka
donganna. Diantusi nasida ma na so jolma biasa hape Jesus i, Tuhan do Ibana. Didok nasida ma, "Tutu
do On Anak ni Debata." Ndang halak Jahudi nian nasida, halak Rom do, na so mananda Padan na Robi,
na so dohot paimaimahon Mesias, Sipalua i. Dung diida nasida na masa i gabe diantusi nasida ma, jala
tangkas dihatindanghon na Anak ni Debata do Jesus na pinarsipal nasida i. Molo apala halak Rom, na
so tumanda Padan na Robi, na so paimaimahon Mesias, boi mangantusi jala manghatindanghon na
tutu do Jesus Anak ni Debata, nda tarlumobi ma hita on nian?
Hita angka naung porsea di Tuhan Jesus, naung dipalua sian parhatobanon ni dosa, naeng ma
tahatindanghon na Anak ni Debata do Tuhan Jesus. Songon dia carana? Tontu tarida ma sian
parngoluonta siganupari na so sarombang dohot portibi on. Molo angka na so manghaporseai Tuhan
Jesus mangalului haluaon dohot pangurupion sian hagogoon ni portibi on, ndang songon i be nian
ianggo angka hita on. Molo torop jolma mangulahon na jat, tontu ndang dohot be hita di si. Molo torop
na menghalalkan segala cara demi mencapai sesuatu, tontu ndang songon i be angka naung pinalua ni
Tuhan Jesus. Unang be sai tadatdati mardosa. Mudar ni Tuhan Jesus naung durus di dolok Golgata,
naung mamuri hita sian dosanta, i ma margogoihon hita manghatindanghon na tutu do Jesus Anak ni
Debata di ngolunta si ganup ari.
Antong, tahaporseai ma, uju dianggukhon Tuhan Jesus di hau pinarsilang, "Ale Debatangku,
Debatangku, boasa tung tadinghononMu Ahu", di si tulus ma sangkap haluaon na pinarbagabaga ni
Debata mulai sian na robi. Di tingki dipainum Jesus marhite limut na asom, tahaporseai ma na Ibana do
Mesias na diparbagabaga i. Di tingki maribak hirehire ni bagasjoro, tahaporseai ma nunga sesa sude
dosanta umbahen boi hita langsung mangadop tu Debata. Ala ni i, tahalashon ma Parningotan Ari
Hamamate ni Tuhan Jesus sadari on ala nunga tangkas tahaporseai na so margogo be dosa dohot
sibolis di ngolunta. Tahatindangkon ma marhite hata nang pambahenanta na Anak ni Debata do
Tuhanta Jesus i, na paluahon hita sian dosa, Amen.