Program S1-Pendidikan Agama Kristen STGH-HKBP

Mahasiswa : Joni Tambunan

Nim : 16.130
M. Kuliah : Liturgika
Dosen : Pdt.Hiburyanti Marbun,M.Th

Liturgi Ibadah Pada Minggu Kantate

Marende : BE. NO. 3:1-3.
3. PUJI JAWHOWA ALE TINDINGKU (BL.137).
Puji Jahowa ale tondingku, puji Ibana Debatami.
Tagan so suda dope bohalhu, naeng pujionku basaNa i.
Sitompa daging tondi pe, ingkon dipuji sasude.
Haleluya, Haleluya.

Tubu ni jolma do nang na sangap jala na mulak tu tano i.

Tahitahina pe laho do monjap, molo dibondut tanoman i.
Ndang jolma hasonanganki, Debata do haposanhi.
Haleluya, Haleluya.

Martua halak na niondingan  ni Debatanta Jahowa i.

Angka na hot marhaporseaon , di Jesus Kristus Tuhanta i.
Molo Debata donganmu, ndang adong hurang tuamu.
Haleluya, Haleluya.
Paragenda :
Marhitehite Goar ni Debata Ama dohot Goar ni AnakNa, Tuhan Jesus Kristus dohot
Goar ni Tondi Parbadia, na tumompa langit dohot tano on. Amen.
Endehon hamu ma di Jahowa ende na imbaru, ai nunga dipambahen Ibana angka
halongangan. Nunga dipabotohon Jahowa hatuaonNa, nunga dipapatar Ibana hatigoranNa di
adopan ni angka sipelebegu. Nunga ditumpahi tangan siamunNa na badia I Ibana. Haleluya!.
Huria : Haleluya! Haleluya! Haleluya!.
Paragenda :
Ale Tuhan Jesus, Tuhannami! Na mandok mauliate do hami tu Ho, ala ditaluhon Ho
do dosa dohot hamatean marhitehite hamamateMi, ala disondangi Ho tanomannami, asa
marpangkirimon na mangolu hami ala ni haheheonMi. Ndang pola be mabiar hami mida

1
hamatean, ai Ho do ulunami, ruasMu do hami. Dipaunsat Ho do hami sian haholomon tu
hatiuron, sian hamatean tu hangoluan. Antong pargogoi ma hami mamuji dohot mangoloi Ho
ariari, pasangaphon Ho di bagasan haporseaon na mangolu, paima sahat hami tu lambungMu.
Amen.
Marende : BE. NO. 11:1-2.
11. AHA MA ENDEHONHU (BL.185).
Aha ma endehonongku asa pujionku Ho?
Ale Tuhan Debatangku sai urupi au gogo.
Ai ndang tarpajojor ahu asi ni rohaM di ahu.
Ala ni hupuji Ho tung marribu hali do.

Sai sungguli ma rohangku mangendehon gogoMi.

Dohot asi ni rohaMu ro di habasaronMi.
Ai i do dihatindangkon tondi dohot pamatanghu.
Ala ni hupuji Ho tung marribu hali do.
Paragenda : “Tangihon hamu ma patik ni Debata ima patik pa 1-10 dohot
lapatanna”.
1. Ahu do Jahowa Debatam, ninna Debatanta. Ndang jadi marangkup Ahu bahenonmu
Debatam.
2. Ndang jadi ganaonmu jala ndang jadi sumanonmu manang aha na di banuaginjang dohot
na di banuatonga on, ro di na dibagasan aek na di toru ni tano, ianggo tung gabe sisombaon
manang sioloan.
3. Ndang jadi dohonon goar ni Debata, ianggo so ture dalanna, ai hona uhumNa do sogot
angka na marsineang di GoarNa.
4. Ingot hamu ma pabadiahon ari Minggu i! Di na onom ari ma ula hamu nasa siulaonmu; alai
anggo ari papituhon i, ari paradianan ni Jahowa, Debatam do i. Ndang jadi ho mangula anggo
di na sadari i, manang anakmu pe manang borum, manang naposom lahilahi manang
naposom boruboru, ro di pinahanmu, ro di isi ni huta ni halak pe na mangangebati hutam. Ai
di na onom ari do ditompa Debata langit dohot tano dohot laut dohot nasa isina, dung i
maradian do ibana di ari papituhon i. Dibahen i do umbahen na dipasupasu Debata Jahowa ari
paradiananNa i jala diparbadiai.
5. Ingkon pasangaponmu do natorasmu, asa martua ho jala leleng mangolu di tano na nilehon
ni Jahowa Debatam di ho.
6. Unang ho mamunu!
2
7. Unang ho mangalangkup!
8.Unang ho manangko!
9. Unang ho olo manghatindanghon hata na so tutu maralohon dongan jolma.
10. Ndang jadi haliangan ni roham bagas ni donganmu, ndang jadi haliangan ni roham
dongan saripe ni donganmu, manang naposona baoa manang naposona boruboru manang
lombuna manang hodana, manang dia pe ugasan ni donganmu.
Beha do pandok ni Debata taringot tu patik na sampulu i?
On do: Ahu do Jahowa Debatam, ninna Debatanta. Pargogo na so hatudosan jala
parrimas, Siluluhon dosa ni amaama tu pinomparna, ro di sundut patoluhon, ro di sundut
paopathon, pinompar ni angka na sogo roha di Ahu; alai asi do rohangKu di angka na
marriburibu, angka na marholong ni roha di Ahu, na so mangalaosi patikHi.
Huria : Ale Tuhan Debata! Sai pargogoi ma hami mangulahon na hombar tu
patikMi.
Marende : BE. NO. 223:1-2.
223. HU SOMBA HO TUHAN (BL.224).
Husomba Ho Tuhan, tangihon au! SangkapMu ma tongtong pasaut tu au.
Lam ganda baenonmi holong ni rohangki, sai lam gandai holong tu Ho.

Uju na lilu au, dao sian Ho. sai dilului Ho au, laos jumpang do.
Ala nii holong do rohangkinon di Ho. Sai lam gandai holong tu Ho.
Paragenda :
Tatopoti ma dosanta! Ale Tuhan Debata, pargogo na do hatudosan jala Amanami!
Hujou hami do goarMu na badia I, ala targogot hami marningot dosanami. Sai marasi ni roha
ma Ho mida hami on. O Tuhan Jesus Kristus, Anak ni Debata na gabe jolma ala ni hami, na
mate jala na hehe sian na mate, na manaek tu banua ginjang do ho mangondihon hami! Ro
ma Ho mangingani hami, asa marlasniroha hami mangulahon lomo ni rohaM. Ho do
parhitean ni nasa asi ni roha, sai unang tulak hami. Sai tangihon ma hami, Ho ale Debata,
Ama, Anak dohot Tondi Parbadia!Amen.
Paragenda :
Tabege ma hata bagabaga taringot tu hasesaan ni dosa. Ro ma hamu tu Ahu, asa
mangolu tondimuna, ninna Tuhan Jahowa. Tung sura rara dosamuna songon abit bunga
dapdap, bontar do bahenonHu songon itak; nang pe rara songon abit hasumba, gabe songon
hapas do muse. Hasangapon ma di Debata na di ginjang! Amen.

3
Marende : BE. NO. 683:1-2.
683. DI ADOPANMU JESUS.
Di adopanMu Jesus lea tutu do diringkon.
Dibaen godang ni dosangkon di adopanMu Jesus.

Di adopanMu Jesus, marsomba au huhut tungki.

Lao manopoti dosangki, di adopanMu Jesus.
Paragenda :
Tabege ma Hata ni Debata na gabe patujolo ni jamita di ari Minggu on ima sian 2
Timoteus 2:1-7.
1.Onpe, ale anaha, margogo ma ho marhitehite asi ni roha ni Kristus Jesus.
2.Jadi na binegem sian ahu di adopan ni torop sitindangi, i ma pasahat tu halak haposan,
angka na tau mangajari na asing.
3.Gabe dongan manaon haporsuhon ma ho songon parangan na denggan di Kristus Jesus.
4.Ndang olo alit parporang tu angka ulaon pandaraman, asa halomoan ibana di na marsuru
ibana.
5.Nang na marsiadu pe ndang dipartumpali, ia so tigor paraloonna i.
6.Ingkon siula hauma i jumolo taruli di parbuena.
7.Antusi na hudok i; ai lehonon ni Tuhan i do tu ho roha mangarti saluhutna i.
“Martua do angka na tumangihon Hata ni Debata, jala na umpeopsa. Amen”.
Marende : BE. NO. 30:1-2.
30. JESUS LEHON HATORANGAN (BL.135).
Jesus lehon hatorangan, hapistaran mangantusi hataMi.
Lehon mata na marnida dohot roha na umboto dalanMi.
Asa tongtong maradophon bohiMi mardalan hami.
Asa digomgomi TondiMi ma hami.

Ganup ari ma ajari hami na di haotoon i dope.

Asa lam porsea hami Ho sambing do hangoluannami i.
Lam lumeleng, lam pasolhot tu rohaM ma rohanami
Hombar tu HataM ma pangalahonami.
Paragenda :
Tahatindangkon ma haporseaonta i, songon na hinatindangkon ni donganta
sahaporseaon di sandok portibi on. Rap ma hita mandok:
4
 Ahu porsea di Debata Jahowa, I do Ama, Pargogo na so hatudosan, na tumompa
langit dohot tano.
Ahu porsea di Jesus Kristus, Anak ni Debata Jahowa, nasasada i; i ma na tinubuhon ni
si Maria na gabegabean sian Tondi Parbadia andorang so habubuhan; I do Tuhanta, na
tumaon na bernit di panguhuman ni si Latus; na mate tarpajal do Ibana di hau pinarsilang, 
na tuat tu banuatoru dung ditanom, na mulak mangolu di ari patoluhon, na manaek tu surgo
laho hundul tu siamun ni Debata Jahowa, AmaNa I, pargogo na so hatudosan i, disi ma Ibana,
paima mulak sogot tu tano on manguhumi halak na mangolu dohot na mate.
Ahu porsea di Tondi Parbadia, jala adong sada Huria na badia, Huria hatopan ni halak
Kristen angka na badia, dohot di hasesaan ni dosa, dohot di Hata i, na mandok: Mulak
mangolu sogot daging ni halak naung mate, dohot di hangoluan na so ra suda. Amin.
Tingting : -------
Marende : BE. NO. 569:1--- (Pelean 1a dan 1b).
569. O DEBATA TUNG LONGANG DO ROHANGKU.
O Debata tung longang do rohangku, molo hubereng na tinompaMi.
Saluhut bintang, hilap dohot ronggur manghatindanghon hasangaponMi.
Marende au Tuhan mamuji Ho, o Debata, sangap do Ho.
Marende au Tuhan mamuji Ho, o Debata, sangap do Ho.

Di ladang di adaran dohot tombak, marende pidong tung mansai sonang.

Punsu ni dolok, sunge dohot rura, mamaritahon sangapMi Tuhan.
Marende au Tuhan mamuji Ho, o Debata, sangap do Ho.
Marende au Tuhan mamuji Ho, o Debata, sangap do Ho.

Molo huingot balga ni holongMu marhite Jesus na tarsilang i.

Anak sasadaMi, o Debatangku, dilehon Ho manobus jolma i.
Marende au Tuhan mamuji Ho, o Debata, sangap do Ho.
Marende au Tuhan mamuji Ho, o Debata, sangap do Ho.

Molo ro Kristus lao mangalap ahu tu hasonangan salelengna i.

Di surgo i Ho do pasangaponku rap dohot angka na badia i.
Marende au Tuhan mamuji Ho, o Debata, sangap do Ho.
Marende au Tuhan mamuji Ho, o Debata, sangap do Ho.

5
Jamita : Jakobus 4:13-17.
13. E hamu, didok hamu do: Sadari on manang marsogot laho ma hami tu huta adui, asa disi
hami sataon martigatiga jala mangomoomo.
14. So adong diboto hamu na masa marsogot; ai aha do hosamuna. Suman ma hamu tu timus
na tarida satongkin, dung i gabe so haidaan be.
15. Singkat ni i ma nian dohononmuna: Molo na lomo roha ni Tuhan i, mangolu ma hami,
jala bahenonnami ma on dohot an.
16. Hape ditengatengahon hamu do hata manggang muna; na jahat do nasa panenganengahon
sisongon i.
17. Antong na umboto mambahen na denggan gabe ndang diulahon, na mardosa ma ibana
disi.
Marende : BE. NO. 763:1--- (Pelean 2).
763. MOLO JESUS DONGANMI.
Molo Jesus donganmi las roham, Jesus i pangurupim, las roham.
Hot haporseaonmi dohot pos ni rohami, mardonganhon Jesus i las roham.
Las roham, las roham, mardonganhon Jesus i las roham;
Marsinondang ma di ho, bintang pangkirimon I, mardonganhon Jesus i las roham.

Molo Jesus donganmi las roham, jagaonNa tondimi las roham.

Tiruonmu ma tongtong dame nang holongNa I, saleleng di ngolumi las roham.
Las roham, las roham, mardonganhon Jesus i las roham;
Marsinondang ma di ho, bintang pangkirimon I, mardonganhon Jesus i las roham.
Paragenda :
Ale Debata, Amanami na di banua ginjang, Ho do haroroan ni saluhut silehonlehon na
denggan dohot nasa ulibasa na mauliutus.
Hupasahat hami ma sian na nilehonMi tu hami, peleannami tu Ho. Sai jalo ma I gabe
uap na hushus di joloM. Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni huriaM dohot di portibion.
Buhai ma rohanami marhitehite tindoM, asa lam hutanda hami godang ni
silehonlehonMi tu hami, asa lam girgir hami mando mauliate tu Ho, marhitehite Jesus Kristus
Tuhannami. Amen.
Huria : Nasa na nilehonMi, tondi ro di pamatangku. Hosa dohot gogongki, ro
di saluhut artangku. Hupasahat ma tu Ho, na so unsatonhu do.

6
Paragenda :
Ale Tuhan Debata, Amanami jala Parasiroha! Mauliate ma rohanami jala pujionnami
Ho, ala naung ditubuhin Ho hami paduahalihon sian godang ni asi ni rohaM tu pangkirimon
na mangolu marhitehite haheheon ni Tuhan Jesus Kristus sian na Mate. Nunga gabe Sipalua
jala Sipangolu AnakMi di hami, jala Ibana Tuhannami, Ibana Ulunami, siihuthonnami. Na
marlas ni roha do hami nuaeng marningot haheheonNa i. Nunga talu sibolis, talu hamatean,
talu banua toru. Ndang mabiar be hami mida hamatean dohot soropna, ai nunga monang
Tuhannami. Ulubalang na gogo i. ibana do manogihon hami sian hamatean tu haheheon
sogot. Ala ni I umbahen hupangido hami: Sai asi ma rohaM, patogu ma haporseaonnami
maniop Barita na Uli I, asa unang ganggu rohanami di na hubolus hami hamatean i. Sai
sungguli ma rohanami dohot roha ni dongannami, asa rap hehe hai sian parrohaon na buruk i;
asa tarulahon hami parange na imbaru. Sai pasupasu ma Huriam dohot Parbarita na uli, na
mamaritahon haheheon ni Tuhannami, asa lam tarsunggun angka na pedem roha jala hehe
sian dosana be. Sai papos ma rohanami manghaporseai, naung mardame jala mardomu hami
tu Ho ala ni pardengganan na pinatupa ni AnakMu. Sai pasabam jala pamalum ma rohanami.
Tompa ma roha na ias dohot tondi na marsihohot di bagasan hami, asa tarhajongjongkon
hami, naung pintor hami ala ni hatigoran na pinatupa ni Tuhan Jesus Kristus. Sai sungguli ma
pangkirimon na mangolu di hami, asa tarapul rohanami marningot angka dongannami naung
jumolo nialapMi, jala asa tarapul rohanami manaon sitaonon di hasiangan on. Sai apuli ma
angka na matean, na dangol, na pogos, na so marina, angka na mabalu dohot angka na
malungun tu banua ginjang marhitehite haheheon ni Tuhan Jesus Kristus, Tuhannami. Amen.
Ale Amanami na di banua ginjang! Sai pinarbadia ma GoarMu! Sai ro ma
harajaonMu! Sai saut ma lomo ni rohaM di banua tonga on songon na di banua ginjang!
Lehon ma tu hami sadari on hangoluan siapari! Sesa ma dosanami songon panesanami di
dosa ni dongan na mardosa tu hami! Unang hami togihon tu pangunjunan! Palua ma hami
sian pangago!.
Huria : Ai ho do nampuna harajaon dohot hagogoon ro di hasangapon
saleleng ni lelengna. Amen!.
Paragenda :
Dipasupasu jala diramoti Tuhan Debata ma ho (hita)! Disondangkon Tuhan Debata
ma bohiNa tu ho (hita) jala asi ma rohaNa mida ho (hita)! Didompakhon Tuhan Debata ma
bohiNa tu ho (hita) jala dipasaorhon ma dameNa tu tondim (tondinta be). Amen.
Huria : Amen. Amen. Amen.