Acara Kebaktian Model-A

Huria Kristen Indonesia Protestan

HKIP Agape Ressort Siantar-I

MINGGU SEXAGESIMA

ACARA KEBAKTIAN
HKIP AGAPE RESSORT SIANTAR-I
MINGGU SEXAGESIMA
 U : ULUAN R : RUAS

1. VOTUM

U Rim ma hita jongjong :

Marhitehite goarni Debata Ama, dohot goarni AnakNa Tuhan Jesus
Kristus, dohot goarni Tondi Porbadia na manompa langit dohot tanoon,
dipasaor ma dameNa tu tondinta. Amen.
Rap ma hita mandok hata ni tangiangta :

U+R Pasupasu hami, O’ Debata nami, sai sondanghon bohiMi, tu na pungu on

sude. Amen.

U Hundul ma hamu.

2. MARENDE B.E No. 1 : 1-2 “Ringgas Ma Ho Tondingku”

1. Ringgas ma ho tondingku Mamuji Debatanta i

Ai diparmudumudu Ho unang halupahon i
Disesa do dosamu Didaoni sahitmi
Diudut do hosamu Diburi tondimi
Huhut diapulapul Roham na marsak i
Asa tung lam humibul Mingot uhumNa i

2. Na tolhas do tu hita UhumNa na sumurung i

Dibaen holong rohaNa Di angka na porsea i
Ai ndada dilaluhon Tu hita rimas i
Sai lam dipatuduhon DengganbasaNa i
Ai songon hasundutan Dao sian purba i
Holang dibaen Ibana Sude dosanta i

3. INTROITUS :

U Beta ma hita manungkap marsomba, marsinggang ma hita tu adopan ni

Jahowa, sitompa hita, ai Ibana do Debatanta, jala hita bangso
pinarmahanna, jala birubiru ni iringiring ni tanganNa.

Martangiang Ma Hita : Ale Tuhan Debata Amanami nadibanua ginjang!

Ho do Ama na marasi roha, jala marroha Ama do Ho marnida hami
saluhutna. Hupangido hami tu Ho ; Sai parrohai ma angka ama dohot angka
ina, asa diboto nasida marparange hombar tu lomo ni roham, asa ditogutogu
 nasida angka anakkonna tu Ho marhitehite ajar dohot poda na sian hatam.
Sai pargogoi nasida manaon jumpa ro hagogotan, asa unang mandele
nasida manang marmungutmungut dompak Ho. Angkup ni i ramoti nasida
dibagasan las ni roha,asa unang dihalupahon nasida Ho, asa sai marsangap
GoarMu na badia i diganup na mardongan saripe mar hitehite AnakMu
Tuhan Jesus Kristus, Tuhan nami. Amen.

U Didongani Tuhan Debata ma hita on saluhutna Amen.

Haleluya, haleluya, haleluya.

U+R (Rap mangendehon) Haleluya...Haleluya...Halelu...u...ya.

U Tabegema Patik nasampului di Minggunta sadarion,

1. Ahu do Jahowa Debatam, ninna Debatanta. Ndang jadi marangkup Ahu
bahenonmu Debatam.
2. Ndang jadi ganaonmu jala ndang jadi sumanonmu, manang aha na dibanua
ginjang dohot na dibanua tongaon ro di na dibagasan aek, na ditoru ni tano,
ianggo tung gabe sisombaon manang sioloan.
3. Ndang jadi dohonon Goarni Debata, ianggo so ture dalanna, ai hona
uhumna do sogot angka na marsineang di GoarNa.
4. Ingot hamu ma pabadiahon Ari Minggu i, di na onom ari ma ula hamu nasa
siulaonmu, alai anggo ari papituhoni, ari paradianan ni Jahowa Debatam do
i, Ndang jadi ho mangula anggo di ari na sasada i, manang anakmu pe,
manang borum, manang naposom lahi-lahi, manang naposom boru-boru, ro
di pinahanmu, ro di isi ni huta ni halakpe na mangebati hutam. Ai di na
onom ari do ditompa Debata, langit dohot tano dohot laut dohot nasa isina,
dungi maradian do Ibana di ari papituhoni, dibahen i do umbahen na dipasu
pasu Debata Jahowa ari paradiananna i jala diparbadia i.
5. Ingkon pasangaponmu do natorasmu, asa martua ho, jala leleng mangolu di
tano na nilehon ni Jahowa Debatam di ho.
6. Unang ho mamunu.
7. Unang ho mangalangkup.
8. Unang ho manangko.
9. Unang ho olo manghatindangkon hata na so tutu maralohon dongan jolma.
10. Ndang jadi haliangan ni roham bagas ni donganmu. Ndang jadi haliangan ni
roham dongan saripe ni donganmu, manang naposona baoa, manang
naposona boruboru, manang lombuna, manang hodana, manang diape
ugasan ni donganmu.
Beha pandok ni Debata taringot tu Patik na sampulu i............?
On do ;Ahu do Jahowa Debatam ninna Debatanta, Pargogo na so hatudosan
 jala parrimas. Siluluhon dosa ni ama-ama tu pinomparna, ro di sundut
patoluhon, ro di sundut paopathon, pinompar ni angka na sogo roha di
Ahu.Alai asi do rohangku di angka na marriburibu, angka na marholong ni
roha di Ahu, na so mangalaosi patikHi.
U Ima sahatna, Antong rap ma hita mangido gogo sian Tuhanta!
U+R Ale Tuhan Debata, sai pargogoi ma hami, mangulahon na hombar tu
patikMi. Amen.
4. MARENDE B.E No. 522 : 4 “Surgo I Sambulonta Do I”

4. Holan sada nama holsongki, Unang tading haholonganki

Na tu au pinalumenhonmi, Nang nasida sai togu tusi
Surgo i, Surgo i, Ndang adong be siaeon disi
Surgo i, Surgo i, Surgo i, Ndang adong be siaeon disi

5. TANGIANG PANOPOTION NI DOSA DOHOT BAGA-BAGA

U Rim ma hita Jongjong :

Ta topoti ma dosanta nagodang i tu Amanta Debata,

Martangiang ma hita : Ale Tuhan Debata, Amani Tuhannami Jesus

Kristus, Ho do Debata Pargogo na so hatudosan, sitompa nasa na adong,
paruhum natigor, na manguhumi jolma manisia ! Na ro do hami tu jolom
marhatopot hon dosanami, angka na huula hami marhite sian pangalaosion
nami di patikmu, ima marhite sian tubutubu ni rohanami na roa i, nang sian
pangkataion nami na so ture, ro di pangoloion nami di hisaphisap ni
rohanami. Na tama situtu do hona uhum hami alani dosanami i, alai na
tarsolsol bagi do hami nuaeng alani i. Asi ma roham dihami, ale
Debatanami, Pardenggan basa jala Parasiroha do Ho alani Anak haholongan
ni roham, Tuhan Jesus Kristus Tuhan nami. Sai sesa ma dosanami
saluhutna, jala suru ma Tondi Porbadia tu rohanami be, asa tarbahen hami
mangoloi Ho dibagasan hatigoran dohot habadiaon, jala asa tarhalomo hon
roham hami, gabe sahat tu hami hangoluan na so ra suda, na pinarbaga
bagam diangka na porsea di Anakmu Tuhan Jesus Kristus, Tuhan nami.
Amen.

U Laos tabegema baga-baga ni Debata taringot tu hasesaan ni dosanta :

Humophop hita gabe dosa do Ibana, na so tumanda dosa dibahen Debata,
asa gabe hatigoranni Debata hita marhitehite Ibana.
 U Hasangapon ma di Debata na di ginjang.

U+R Amen.
U Hundul ma hamu.
6. MARENDE B.E No. 180 : 1-2 “Ro Tu Jesus Ho Na Loja”

1. Ro tu Jesus ho na loja Na maheu i

Lam lumbang do di lambungNa Rohami

2. Bereng di hau pinarsilang Daon ni sahitmi

Tuhanmi na hona uhum Singkatmi

7. MANJAHA EPISTEL
U Epistel di minggunta sadarion tarsurat di, 1 Musa 45 : 3-16
Songon na somal marresponsoria ma hita manjaha :
U Ima sahatna : Martua ma na umbege hata ni Debata, jala na umpeopsa.
Amen.
8. MARENDE B.E No. 501 : 1 “Sai Ditogutogu Jesus”

1. Sai ditogutogu Jesus tondingki na gale i

Asa unang be au ganggu di panoguonNa i
Maradian do rohangku, molo huhaposi i
Nang sitaonon dipasonggop, sai jonok do Tuhanki
Nang sitaonon dipasonggop, sai jonok do Tuhanki

9. MANGHATINDANGHON HAPORSEAON
U Rim ma hita jongjong.
Tahatindanghon ma hata haporseaonta i, songon donganta na sa haporseaon

na adong di liat portibion. Rap ma hita mandok:

U+R Ahu Porsea di Debata Jahowa, Ido Ama pargogo na so hatudosan na
tumompa langit dohot tano.
Ahu Porsea di Jesus Kristus, Anak ni Debata Jahowa na sasada i, ima na
tinubuhon si Maria, na gabegabean sian Tondi Porbadia andorang so
habubuhan. Ido Tuhanta na Tumaon na bernit, di panguhuman si Latus, na
 mate tarpajal do ibana di hau pinarsilang, na tuat tu banua toru dung di
tanom na mulak mangolu di ari patoluhon, na manaek tu surgo laho hundul
tu siamun ni Debata Jahowa, Amanai pargogo na so hatudosan i, disi ma
Ibana paima mulak sogot tu tano on manguhumi halak namangolu dohot na
mate.
Ahu Porsea di tondi Porbadia, jala adong sada Huria na badia, Huria
Hatopan halak Kristen Angka na badia, dohot di hasesaan ni dosa, dohot di
hata i na mandok, mulak mangolu do sogot daging ni halak naung mate,
dohot di hangoluan na so ra suda. Amen.
U Hundul ma hamu.
10. MARENDE B.E No. 255 : 1 “Holan Sada Do Na Ringkot”

1. Holan sada do na ringkot Jesus lehon i di au

Manang aha pe na dapot ndang tuk pasonanghon au
Nang arta nang sangap sude hamoraon
Ndang tau mangalehon di au hasonangan
Alai molo dapot na sasada i
Tongtong las rohangku hinorhon ni i

11. TANGIANG PANGONDIANON

12. MARENDE B.E No. 248 : 1 . . . “Saleleng Ho Di Tano On” Pel. I+II

1. Saleleng ho di tano on patigor ma roham

Paingotingot ma tongtong Nidok ni Debatam

2. Sai songon hau na denggan do ramos parbue ni

Bulungna pe na uli do antong sai tiru i

3. Godang do hinauli ni Aek mata i tongtong

Pasuman ma dirim tusi sai baen roham sintong

4. Bolongkon sian rohami luhut na so ture

Alai na sian Tuhan i ramoti ma sude

13. EVANGGELIUM
 a. Martangiang
b. Manjaha Ayat Ni Turpuk Ni Jamita : Lukas 6 : 27-37
c. Dung Dijaha, Marende “Hatami Ale Tuhanku”
Hatami Ale Tuhanku, Hata Hangoluan I
Sai Parade Ma Rohangku Laho Manangihon I.
Hatani, Tuhanki, Las Ni Rohangki Do I
d. Dipatorang Ma Jamita I
e. Dung Dipatorang, Marende “Dung Hutangihon, Hatana I”
Dung Hutangihon, Hatana I Tondingku Sonang Las
Rohangki. Sai Pujionku, Tuhanta I. Ala Hatana Las Rohangki.
Tabaritahon Holongna I, Didia Tuhan Tudoshon I.
Tuk Manumpahi Tarlobi Da. Sasada Jesus Pinuji Ma.
f. Martangiang

14. MARENDE B.E No. 424 : 1 . . . “Soara Ni Tondi” Pel. III

1. Soara ni Tondi ni Tuhanta i, Jotjot dilaosi, ditulak ho i

Sai tanda jeamu, pauba roham, Dapothon Tuhanmu, Sisesa dosam

2. Marunduk ni roha topoti sude, Pambaenmu na torbang, jengkelmu sude

Pasahat tu Jesus sandok dirimi, Sai tong pasunggulhon panghophopNa i

3. Tangihon HataNa, parguru ma i, Rajumi ruasmu ginomgomNa i

Pangido : Sai lehon tu au tondiMi, Pargogo, mangula sandok lomoMi

4. Tarsor ho mardosa, manurut lomom, Tung unang datdati, sai alo langkam
Dompakkon Tuhanmu, Pargogo do i, Manesa, pamalum sude dosami

15. AGENDA PANUTUP

a. TANGIANG PELEAN :
U Ale Amanami na dibanua ginjang, Ho do haroroan ni saluhut silehonlehon na
denggan dohot nasa ulibasa na Mauliutus. Hupasahat hami ma sian na
nilehonMi tu hami, pelean nami tu Ho.Sai jalo ma i gabe Uap na hushus
dijoloM.Pasupasu ma i jala ramoti, asa huparhaseang hami peleanon
patimbulhon HarajaonMu ditongatonga ni Huriam dohot diportibion. Buhai
ma roha nami marhitehite TondiM, asa lam hutanda hami godang ni
silehonlehonMi tu hami, asa lam girgir hami mandok mauliate tu Ho,
marhitehite Jesus Kristus Tuhan nami. Amen.
 b. TANGIANG HATOPAN
U RAP MA HITA MANDOK DITANGIANG HATOPAN I :
U+R Ale Amanami na dibanua ginjang, sai pinorbadia ma GoarMu, Sai ro ma
HarajaonMu, Sai saut ma lomo ni roham dibanua tonga on songon na di Banua

Ginjang. Lehon ma tu hami sadari on hangoluan siapari. Sesa ma dosa nami,

songon panesa nami didosa ni dongan na mardosa tu hami. Unang hami
togihon tu pangunjunan. Palua ma hami sian pangago, ai Ho do nampuna
Harajaon, dohot Hagogoon, ro di Hasangapon saleleng ni leleng na . A m e n.
c. PASU – PASU
d. (Mangendehon ): Amen . . . Amen . . . A . . a . . men . .

SY ALOM
EPISTEL 1 MUSA 45 : 3-16
3. Dung i ninna si Josep ma mandok angka hahana i: Ahu do si Josep, mangolu dope
amanta i? Jadi ndang haalusan angka hahana i ibana, ai tarhatotong do rohanasida
mida bohina i.
4. Dung i ninna si Josep ma mandok angka hahana i: Ua pajonok hamu ma tu
lambungkon; gabe dipajonok nasida ma. Jadi ninna ibana ma: Ahu do si Josep,
anggimuna, na ginadismuna i tu tano Misir.
5. On pe, unang mabiar hamu, jala unang serbeng matamuna, ala ginadismuna i ahu
tuson, ai mangarade hangoluanmuna, umbahen disuru Debata ahu parjolomuna.
6. Ai padua taon on dope masa haleon di tano on, alai lima taonnari dope na so masa
saburon manang gotilon.
7. Alai disuru Debata do ahu parjolomuna, pajophon di hamu ebaeba di tano on dohot
pangoluhon hamu, mambahen haluaon bolon.
8. On pe, ndada hamu marsuru ahu tuson, Debata do, dipabangkit do ahu gabe ama ni
raja Firaun, dohot gabe induk ni sandok bagasna, jala pangarajai di sandok tano
Misir.
9. Asa pahatop hamu ma ne nangkok tu damang i, paboa hamu ma tu ibana: Songon
on do tona ni anakmu, si Josep: Dipabangkit Debata do ahu gabe raja ni sandok
tano Misir; tuat ma ho mandapothon ahu, unang togangtogangon.
10. Maringan di tano Gosen ma ho, asa jonok di lambungku, ho dohot anakmu dohot
angka pahompum, ro di birubirum dohot lombum dohot nasa na di ho.
11. Ahu do marmuduhon ho disi, ai lima taonnari dope haleon on, asa unang raparan
ho dohot isi ni bagasmu, ro di sude na di ho.
12. Antong matamuna dohot mata ni anggingki, si Benjamin i, marnidasa, paboa apala
pamanganku manonahon hata i tu hamu.
13. Paboa hamu ma tu damang i sude hasangaponku di tano Misir, ro di sude na
niidamuna i. Pahatop hamu ma ne tuat tuson rap dohot amanta.
14. Dung i dihaol ma rungkung ni si Benjamin, anggina i huhut tangis, si Benjamin i
pe, sai tumatangis do mangkaol rungkungna.
15. Dung i diumma si Josep ma sude angka hahana i huhut tumatangis be; dung pe
salpu i, asa mangkatai angka hahana i dohot ibana.
16. Dung i tarbortik ma barita i tu bagas ni raja Firaun, angka ninna do: Nunga ro
angka haha ni si Josep; jadi denggan ma roha ni raja Firaun dohot angka naposona
i.
EVANGELIUM LUKAS 6 : 27-37
27. Alai hudok ma tu hamuna na manangi: Haholongi hamu ma musumuna; na
denggan ma bahen hamu tu na mangkosomi hamu.
28. Pasupasu hamu ma angka na mamburai hamu, tangiangkon hamu ma angka na
mangasupi hamu.
29. Anggo dipastap hurummi, tarehon nang na sambariba i; jala anggo dibuat ulosmu,
unang jua nang bajubajum.
30. Nasa na mangido tu ho, lehon; jala unang tunggu halak, naung mambuat ugasanmi.
31. Ia i na pinangidomuna, naeng bahenon ni halak tu hamu, i ma bahen hamu tu
nasida!
32. Ai molo dihaholongi hamu na marholong ni roha di hamu, parulian dia ma i di
hamu? Ai nang angka parjahat dihaholongi do na marholong ni roha di nasida.
33. Jala anggo dibahen hamu na denggan tu angka sibahen na denggan tu hamu,
parulian dia ma i di hamu? Nang angka parjahat i, songon i do pambahenna.
34. Jala molo mangkirim hamu mambuatsa muse, laho pasali dongan, parulian dia ma i
di hamu? Ai dipasali parjahat do donganna parjahat, asa dijalo muse hepengna.
35. On ma tahe: Haholongi hamu ma musumuna bahen hamu ma na denggan jala
pasali hamu ma, di na so hirim rohamuna di balosna; balga ma upamuna, gabe
angka anak ni Natumimbul i ma hamu, ai basa do Ibana di na tois marroha jala di
na jahat.
36. Gabe parasiroha ma hamu, songon Amamuna, Parasiroha i!
37. Unang ma hamu manguhumuhumi, gabe ndang uhumanna hamu! Unang hamu
manorui, gabe ndang toruanna hamu! Palua hamu, gabe paluaonna hamu!