PANTAI BINASI 20 MARET 2022 I. IBADAH 1. Marende BE.792: 1 + 4 “Pasu-Pasu Hami O Tuhan” Pasu-pasu hami O Tuhan sai usehon dameMi, Sai ampehon tanganMi Tuhan, Lehon tu au gogoMi di portibion baen ma au Tuhan habaoran ni las ni roha Tu na marsak i tu na dangol i gabe pangapuli i. Pasu-pasu hami O Tuhan sai usehon dameMi, Sai ampehon tanganMi Tuhan, Lehon tu au gogoMi Diportibion, baen ma au Tuhan, Siradoti haholongon, Togu-togu ma, hami on Tuhan, Marparange na denggan. Pasupasu hami O Tuhan ……… 2. Votum-Introitus-Tangiang : U : Marhitehite Goar ni Debata Ama, dohot goa ni AnakNa Tuhan Jesus Kristus, dohot Tondi Parbadia, na manompa langit dohot tano on. Amen. Mandok mauliate ma hamu di Jahowa, ai na basa do Ibana, ai ro di salelenglelengna do Asi ni rohaNa i. H : Pujionku ma Jahowa sian nasa rohangku, pajojoronku ma sude halongangan angka na binahenMu. U : Ale Jahowa sigomgom hami. Mansai sangap do goarMu di liat portibi on H : Marlasniroha jala marolopolop ma ahu mida Ho, endehononku ma goarMu, ale Natumimbul U : Endohonon hamu ma Jahowa, na marhabangsa di Sion, baritahon hamu ma angka pambahenanNa tu angka bangso. H : Timbul do Tuhanta i jala pargogo situtu, ndang habilangan parbinotoan-Na i UH : Dihalomohon roha ni Jahowa do tahe angka na manghabiari Ibana, angka na manghalungunhon asi ni roha-Na i. U : Martangiang ma hita Ale Debata Amanami, Debata parasi roha na sumurung mida hami. Mauliate dohot puji-pujian ma hupasahat hami tu Ho, dibahen asi dohot denggan ni basaM umbahen boi marpungu di inganan on ; Ima Punguan ni Toga Purba Boru dohot Bere na. Dirajumi roha nami do na Ho do tongtong mandongani, mangiring dohot manarihon hami, sian taon tu taon nang mulai borhat hami sian huta sahat tu inganan on. Ho do namangalehon gogo diganup hami, nang roha na tiur mandalani dohot mangula angka ulaon nami ganup. Dipargogoi jala dilehon Ho do habengeton di hami ditingki marungkil asa monang, ditungkoli Ho do hami di ari hagogotannami. Ale Tuhan holongMu na manontong i ma si jaloon nami nang tu joloan ni ari on. Patiur ma tongtong rohanami jala sungguli hami ale Tuhan laho mangoloi Ho, asa holan Ho huoloi jala husomba hami saleleng ngolunami. Sai pasada ma roha nami saluhutna anggota ni Punguan Toga Purba Boru dohot Bere on. Asa manongtong hami saroha, sapingkiran, sapanghilalaan, tarlumobi naeng sada roha dohot pambahenannami laho mangoloi Ho martitehite punguan nami on. Sai tangihon ma tangiangnami on ale Tuhan, Marhitehite goar ni anakMu Tuhan Jesus Kristus Tuhannami. UH : Amen 3. Marende BE.733 : 1 + 4 “Dulo Ma Au On O Tuhan” Dulo ma au on o Tuhan bege anggukkon, Ro do Ho tu angka dongan topot ma au on. Jesus Tuhan bege anggukkon, Ro do Ho tuangka dongan topot nang au on. Denggan ni basaM O Tuhan, papos rohangkon, Mandapothon Ho o Tuhan pahisar au on. Jesus Tuhan ……… 4. TANGIANG MANOPOTI DOSA U : Ale Tuhan Debata, marpungu do hami nuang Punguan Toga Purba Boru dohot Bere on, marlas ni roha do hami, di na tolhas hami marhite pangiringiringonMu. Hupatupa hami do Kebaktian Retreat on laho pahothon hasadaon nami, ima songon tanda ni las ni rohanami, songoni nang tanda ni hamauliateon nami tu Ho, ala naung boho umur ni punguan nami on 14 taon. Alai Tuhan, nangpe marlas niroha hami, hurajumi hami do paboa pardosa hami, ima marhite hata nang pambahenan, di angka ruhut-ruhut ni partuturon nami di punguan on. Hujou hami do goarMu na badia i, ala na targogot situtu hami di dosanami i. Sai marasi ni roha ma Ho mida hami on. H : O Tuhan Jesus Anak ni Debata na gabe jolma ala ni hami. Ndang tagamon so adong hahurangan nami angka hula-hula, angka na marhamaranggi maradophon angka na mardongan tubu, maradophon angka boru, songoni maradophon angka berenami. Sipata olo do sogo roha ni dongan hubahen hami, sipata olo do bingkas roha ni angka boru nang angka berenami hubahen hami. Saluhutna i olo do tubu sian rohanami sandiri nang naso hutuntun hami. Asi ma RohaM di hami, sesa ma dosanami jala paimbaru ma hami. U : O Tuhan Jesus Anak ni Debata! Ho do Ulu ni saluhut na porsea, ruasMu do hami. Ho do hangoluan dohot hasonangannami. Sipata olo do lupa hami laho pasangaphon angka natua-tua, dongannami, sisolhotnami. Olo do ndang huboto hami manjagahon parhundul nang panghataionnami. Alani i Tuhan, di tingki on, disaluhut angka hahurangannami, sai sesa ma i, paimbaru ma hami nang parsaorannami. H : Paias ma rohanami be, parangenami baen ture nang panghataionnami. Tompa ma roha na imbaru di hami asa haru monang hami maralohon nasa dosanami. U : Tajangkon jala tahangoluhon ma bagabaga ni Debata taringot tu hasesaan ni dosanta : “ Songon on do Hata ni Tuhan Jahowa: Nunga di arsahi ho Ahu marhite sian angka dosam, jala nunga di lojai ho Ahu marhite sian angka hajahatonmu. Ahu tutu, Ahu sandiri manalesei angka pangalaosim ala hadirionKu, jala ndang be Hupaingotingot angka dosam”. Hasangapon ma di Debata na di ginjang. UH : Amen 5. Tangiang Pangondihon Sian Sahalak Anggota 6. Koor : ENDE HASADAON TOGA PURBA O Debata suru ma tondim tondi porbadia.... Tu punguan ni toga purba on, dohot boru bere na on Sai lam sada, sai lam sonang martua ma sudena.... Hapistaran bisuk pe, nang lambas ni roha pe, Mian ma di hami on sude..... Eme sitamba tua parlinggoman ni siborok, Debata silehon tua sude hita diparorot Pasupasu ma punguan ni toga purba on dohot boru bere nai. Sai lam sada, sai lam sonang martua ma sudena.... Hapistaran bisuk pe, nang lambas ni roha pe, Mian ma di hami on sude..... Pauk pauk hudali pago pago tarugi, natading diulahi nasega tapauli, Pasupasu ma punguanni Toga Purba on dohot boru bere na on Sai lam sada, sai lam sonang martua ma sudena.... Hapistaran bisuk pe, nang lambas ni roha pe Mian ma di hami on sude..... Eme sitamba tua parlinggoman ni siborok, Debata silehon tua sude hita diparorot Pasupasu ma punguan ni toga purba on dohot boru bere na on .......amen...... 7. Marende BE.677: 1 “ Mansai Lambok” Mansai lambok Tuhan Jesus manjou, Manjou ho dohot au, ida Ibana paima Haroromu mulak ma ho dohot au. Antong sai ro ma ho angka na sorat Sai ro ma ho, mansai lambok, Tuhan Jesus manjou pardosa mulak ma ho. 8. Jamita : 9. Marende BE.753 Dipardalanan Jesus di jolongku “Papungu Pelean” Dipardalanan Jesus dijolongku, Holong ni tanganMi manogu au Nang di ngoluku Ho do sombaongku, Tung sonang mardalan raphon au. Huboto do tangkas pangouonMu, Diiringiring Ho do langkangki Sahat ro di ujung ni pardalanku, Togu ma au jonok tu lambungMi, Sipata lilu haporseaonhu, Ni lilianan ni portibi on Alai dung Ho hutatap o Tuhanku, Margogo doau dingolungkon Huboto ……… Patogu ma Tuhan haporseaonku, Asa polin tu Ho manghirim au, Tu surgo I patulus pardalananku, TondiMi maringan ma di au. Huboto do ……… 10. PANUTUP U : Mandok mauliate ma hita tu Debata, ala dengganni basaNa dohot asi ni rohaNa na so halompoan i, na mangaramoti ngolunta. Mansai balga situtu do holong ni roha ni Tuhanta mangaramoti hita Punguan Toga Purba Boru dohot Berena on, sian ari, minggu, bulan, dohot taon rasirasa sadari on. Dihita saluhutna, nunga di paloas Debata hita mandalani ariari ni ngolunta. Silehon-lehon ni Debata do on tu hita, sihamauliatehononta. Alai ingkon pangkeonta do tingki na di basa-basahon ni Tuhan i dibagasan hasatiaon tu Ibana marhite ngolu nang pambahenanta. H : Jahowa do silehon tua dohot pasupasu tu hita, ibana do hatuaonta. Soara ni olopolop dohot hatuaon marsaringar di undung-undung ni angka partigor: Sian ni Jahowa do sibahen hamonangan dohot las ni roha di hita. U : Diingot Jahowa do hita : Ibana ma tutu mamasumasu ngolunta. Ibana do mamasumasu nang sude anggota ni punguan on: martua ma hita jala sonang. Alai tutu, manat ma hita mamereng, manangkasi angka parulaonta be songon angka na marroha, unang ma songon angka na hurang roha. H : Saluhut ma hita umboto laho mamparhaseang tingki tu ulaon na denggan, ai ari hasusaan do nuaeng. Taantusi ma, manang dia lomo niroha ni Tuhan i. U : Marhite parsaoranta on, sai saut ma dihita saluhutna, songon na nidok ni Umpamai: Pir ma pokki, bahul-bahul pansalongan, Pir ma tondinta, ditambai Tuhanta ma di hita angka pansamotan. Alani i Masioloan ma hita sian biar ni rohanta mida Kristus. Amen. 11. TANGIANG PASU-PASU II. ACARA NA MANGIHUT DIATUR PENGURUS MA.
SELAMAT ULANG TAHUN PTPBB KE - 14
Di tanganNa siamun do ganjang ni umur, Jala di hambringNa do hamoraon dohot hamuliaon. Poda 3:16