PARPUNGUAN BODARI

PARNINGOTAN ARI HATUTUBU

NI TUHAN JESUS
HKBP LAPAN – LAPAN
Tema : “Nunga Tubu Raja Ni Hadameon”
Sabtu, 24 Desember 2022
1. Joujou marsomba tu Debata: (U = Uluan; R = Ruas)
U : Hamuna Amang, Inang, Naposobulung, Remaja, Dakdanak Singkola Minggu; sude
tahe hita na pungu di bagas joro on. Jumolo pinasahat ma, Selamat Ari Natal!
R : Selamat Ari Natal ma tutu di hamu Parhalado ni Tuhan i.
U : Marolopolop ma tondinta, di na marningot ari hatutubu ni Sipalua i. Las ni roha
bolon do borngin on di tongatonga ni saluhut halak Kristen. Beta ma hita marsomba
di adopanNa, taendehon ma GoarNa, ai nunga dipatongon Kristus na gabe
partanobatoan ni hatuaonta.
R : Marolopolop do rohanami mandapothon Jesus naung tubu i, taolophon ma Ibana
marhite pujipujian dohot unduk ni rohanta. Beta ma, taendehon ma pujipujian, ai
nunga dipalua hita sian nasa dosa dohot pangalaosionta.
U : Antong ale angka dongan, taparade ma dirinta tasomba ma Tuhanta i di bagasan las
ni roha. Tabaritahon ma: “Nunga tubu Kristus, nunga songgop hadameon, asa
saluhut jolma taruli di las ni roha naung pinarade ni Kristus.” Antong tapuji ma
Tuhanta, marende ma hita!

2. Marende BE. No. 56 : 1, 2 & 4 “Sai Ro Ma Hamuna”

♫ Sai ro ma hamuna angka na porsea, sai ro ma hamuna tu Betlehem. Ida Dakdanak,
Sipalua hita, tasomba ma Ibana, tasomba ma Ibana, tasomba ma Ibana Rajanta.
♫ O Raja na sangap, Tuhan ni saluhut, ditaon Ho na porsuk di tano on. Ala ni jolma na
di hamagoan; tasomba ma Ibana, tasomba ma Ibana, tasomba ma Ibana Rajanta.
(Jongjong)
♫ O Jesus Tuhanhu sai naeng pujionhu pambaenMu di au pardosa on. Ai gabe jolma Ho
humophop au; tasomba ma Ibana, tasomba ma Ibana, tasomba ma Ibana Rajanta.

3. Votum – Introitus – Tangiang

U : Marhitehite Goar ni Debata Ama dohot Goar ni AnakNa Tuhan Jesus Kristus dohot
Goar ni Tondi Parbadia na tumompa langit dohot tano on. Amen.
Nunga patar hangoluan i, jala nunga huida hami jala nunga huhatindanghon hami
dohot hubaritahon hami tu hamu hangoluan na saleleng ni lelengna, na di lambung
ni Ama i hian jala naung patar di hami. Haleluya!
R : Mangendehon: Haleluya, Haleluya, Haleluya
U : Martangiang ma hita! Ale Debata, Ama na di banua ginjang! Pujipujian, hasangapon
dohot hamauliateon husombahon hami tu Ho, marningot silehonlehonMi na balga i
 tu hami jolma na di pardangolan on, i ma AnakMu, Jesus Kristus, na sinuruM sian
banua ginjang ala ni hami. Gabe na dangol do Ibana jala na pogos, pola tubu Ibana di
bara ni pinahan di Betlehem, asa mamora hami. Sai rajai jala togutogu hami
marhitehite TondiM, asa lam huida hami godang ni holong ni rohaM na pinapatar ni
AnakMi. Amen (hundul)

4. Marende BE. No. 612 : 1 – 2 “Sai Paherbang Ma Habongmu”

♫ Sai paherbang ma habongmu angka pardisurgo i. Baritahon nunga tubu Sipalua
jolma i. Beta hita lao manomba Raja Sipalua i.
♫ O parmahan na manjaga dorbia di Efrata. Nunga dame hita jolma saor dohot
Debata. Beta hita lao manomba Raja Sipalua i.

5. Liturgi Panompaon
U : Marmula do nasa na adong di hasiangan on jala ujungna pe sai naro do. Marmula do
nasa na adong di tano on jala mansohot do disada tingki. Alai anggo Debata naso
marmula do Ibana jala na so marhaujungan.
Baoa : Ibana do Alpa dohot Omega, Debata do mula ni nasa na adong jala ujung ni
saluhut na, na hot saleleng ni lelengna sahat ro di saleleng ni lelengna.
Boru : Ibana do na jumadihon portibion dohot isina sudena, Ibana do paojakhon tano on
marhitehite huasoNa.
U : Ido tutu, diparhatutu rohangku do adong Debata na manompa nasa namanggulmit,
jala diparhatutu rohangku do adong Debata najumadihon jolma di bagasan haulion
so humurang.
Sude : Ai ditompa Ibana do hita jolma tumiru rupaNa tudos tu pangalahoNa. Jala
ditompa do dagingnta marparnidaan, marparbinegean, marparnianggoan,
marpangkilalaan, marpardaian. Dilehon do roha tu tondinta jala di patureture do i
saluhutna rasirasa nuaeng.
Baoa : Mandok mauliate ma sude jadijadianMu tu Ho ale Jahowa, jala dipuji angka
naniasianMu do Ho.
Boru : Angkup ni i diparade Debata do nasa naringkot, dilehon do tu au parabiton dohot
sipanganon siganup ari, ro di nasa na hasea di au di hangoluan on.
U : Dibahen i tama tapujipuji Tuhan i ala saluhut na i, paboa las ni rohanta di Ibana.

6. Marende BE No. 116 : 1 “Ditompa Ho Do Au”

♫ Ditompa Ho do au, sondangi rohangkon. Tung basabasaMi sudena di au on. Gomgomi
pamatangku, naeng Ho do oloanhu. Sai lehon ma gogongku, lomoM naeng ulaonhu.
Urupi, tatap au tutu, Panompa na burju.

7. Patik
U : Patik ni Debata di hita di borngin Parningotan Hatutubu ni Tuhan Jesus Kristus, i ma
na tarsurat di Rom 12 : 1. Songon on ma didok disi: Na huapoi ma hamu, ale angka
 dongan, marhitehite asi ni roha ni Debata: Pasahat hamu ma dagingmuna bahen
pelean na mangolu, na badia, na hinalomohon ni Debata; i ma hadaulaton ni na
marroha.
(Ido sahatna. Antong rap mangido gogo ma hita tu adopan ni Debata)
U+R : Ale Tuhan Debata, sai pargogoi ma hami mangulahon na hombar tu PatikMi.
Amen.

8. Liturgi Hadadabu Jolma tu Bagasan Dosa – Tangiang Manopoti Dosa

U : Tung sonang do tahe jolma na parjolo i si Adam dohot si Hawa di Porlak Eden i, rap
dohot saluhut na tinompa ni Debata.
Sude : Alai dipatihi Debata do nasida : Na so jadi panganon, manang jamaon nasida sian
parbue ni hau parbinotoan na denggan dohot na roa; didok Debata do: “sadari
dipangan hamu sian i, sai na mate do hamu”.
Baoa : Umbahen dipatihi Debata nasida, asa marhabiaran jala marhaunduhon do tu lomo
ni roha ni Debata. Alai lupa do jolma i di tona ni Debata, elaela ni sibolis i do dioloi
nasida. I do umbahen gabe madabu jolma i tu bagasan.
U : Tung aha do na manginsombut tu bagasan roham ale jolma manisia umbahen dilaosi
ho tona ni Debata, lomoan do roham manangihon husiphusip ni si bolis i?
Boru : Nunga sonang, naeng hurang sonang; nunga adong, naeng hurang godang. I do na
sai jotjot mangaliliani roha nang pingkirannami.
Sude : Sipata ndang marnamahap rohanami, ido umbahen sai lulululu rohanami
mangalului hasonangan na sian portibi on. Hape laos disi do ro husiphusip ni
sibolis na mangelaela rohahami mangalaosi Patik ni Debata, mangoloi hagiot ni
roha nang pingkiran nami naung diramuni ni si bolis i.
U : Ndang hea mahap roham di silehonlehon ni Debata, sai lao do roham manjalahi
hasonangan sian na hinusiphon ni sibolis i, hape nunga dipatupa sibolis i jorgong asa
tarihot jolma i tu lomo ni rohana. Ndang adong sidalianmu ale jolma manisia, jala
ndang boi pabalionmu manang tu ise pe hasalaan na niulami.
Sude : Ai ndang adong na holip sian Debata, tung sude do patar di adopan ni Debata,
diida jala diboto Debata do na piningkirannta, dohot na taulahon.
U : Nunga marsoara Debata mandabu uhum tu saluhut siulahon dosa i, jala ndang adong
na boi malua sian i.
Baoa : Hansit jala ngotngot do huhilala hami ngolu na dibagasan dosa i, ai nunga dipalao
Debata hami sian Porlak Eden, inganan hasonangan i, tudia nama hami laho
mangalualu? So adong be inganan hasonangan di hami. Marudutudut do sitaonon i
manosak dung madabu hami tu bagasan dosa i. Hamatean, sahit, hir do
hodoknami mangalului sipanganonnami.
Boru : Hajahaton ni jolma i pe lam mangimbukbuk do: parmusuon, parbadabadaan,
hosom, elat, late, teal, i do dipaulaula jolma i. Mago do las ni roha i, soluk ma arsak
ni roha i. Tudia nama hami mangalului inganan hasonangan i ?
 U : Ndang adong pangalualuanta so holan tu Debata, ndang adong haluaonta ia so holan
sian Debata, ndang adong be hasonanganta ia so dilehon Debata. Dibahen i maporus
ma hita tu Debata. Haporseai ma hataNa, ihuthon ma dalanNa, tu Jesus ma ho ro, ai
las do rohaNa manjangkon hita jolma pardosa on. Jongjong ma hita saluhutna, laos
taendehon ma BE No. 61: 3 “Na Tau Las Ni Roha”
Sude : Mangendehon BE No. 61 : 3 “Na Tau Las Ni Roha”
♫ Na so tarhatahon hamogoan i, aut so tubu Jesus Sipalua i, aut so tubu Jesus
Sipalua i.

U : Ale Tuhan huparhatopot hami do, jolma na ramun do hami di diadopanMu ala ni
dosanami i, jotjot do hulaosi hami patikMi, huulahon hami na so lomo ni rohaM,
tarelaela do hami mangoloi hagiothagiot ni rohanami hape nunga dao hami sian
lomo ni rohaM. Na patut hona uhumMu do hami ala ni saluhutNa i. Marsahit do
rohanami nami, pamatangnami, nang pingkirannami, jala ndang jumpang hami be
hasonangan i ala na sai ni inganan ni dosa i ngolunami. Dibahen i ro do hami
tarsolsol bagi tu adopanMu Tuhan, huhut mangido sian Ho: Ale Tuhan sesa ma
dosanami. Jala patupa ma di hami haluaon i asa malua hami sian ihotihot ni dosa i,
gabe sumuang hami maramahon Ho, Ale Debata naung manompa hami.
Sude : (Mangendehon BE No. 683 : 3 “DiadopanMu Jesus” )
♫ Di adopanmu Jesus, tarsolsol bagi rohangkon, muba ma au tu jolo on di
adopanMu Jesus.
U : Molo dung tasolsoli sude dosa dohot pangalaosionta i, didok Debata do bagabagaNa
tu hita: Songon on do panghaholongi ni Debata di portibi on. Pola do anakNa na
sasada i dilehon asa unang mago ganup na porsea di Ibana, asa hangoluan na
saleleng ni lelengna di Ibana. Hasangapon ma di Debata na di ginjang
Sude : Amen

9. Marende BE No. 39 : 5 “Beha Ma Panjalongku”

♫ Di na tarihot ahu, ro Ho mananggal au. Di na tarhurung au, Ho paluahon au. Ho do
na pasangaphon na lea on hian. Ho do na pamorahon na pogos on hian.

10. Liturgi Bagabaga Debata tu Haroro ni Sipalua i

U : Ndang dipaloas Debata jolma i gabe mago, ai atik pe hona uhum jolma i dibahen
Debata, alai ihut do holong dohot asi ni rohaNa, dipataridahon marhite na marsuru
angka Panurirang pasahathon bagabaga haluaon ni jolma pardosa.
Baoa : Didok Debata do, ndang lomo rohangKu mida hamatean ni parjahat, mulak ma
nian nasida asa mangolu.
Boru : Hehe ma ho! Marsinondang ma ho! Ai na ro ma panondangmu, jala hamuliaon ni
Jahowa binsar di atasmu.
Sude : Ai ida ma, haholomon do manghungkupi tano on, jala hagolapon angka bangso;
alai na binsar ne ma Jahowa di atasmu, jala marsinondang hamuliaonNa di
atasmu.
U : Alai anggo ho, ale Betlehem Eprata, mametmethu do ho nian anggo tung pola
jujuron tu angka huta marriburibu di Juda; hape sian ho do haroroan ni na gabe
panggomgomi di Israel.
Baoa : Mariaia situtu ma ho, ale boru Sion, marolopolop ma ho ale boru Jerusalem! Ida
ma, na ro ma rajam tumopot ho, partigor ibana jala siparmonang.
Boru : Dibahen i, apala Tuhan sandiri ma mangalehon tanda di hamu; Ida ma, gabegabean
ma sada na marbaju, jala tumubuhon sada anak, jala bahenonna ma goarna
Immanuel.
Sude : Tutu do Ho Ale Tuhan sondang hatiuron sian ginjang. Sondangi ma nang rohanami,
asa sonang hami laho manjalo hangoluan na pinatupami, o Tuhan!

11. Marende BE. No. 48 : 2 + 4 “Ria Ma Hita Sasude”

♫ Diungkap Debatanta i banua ginjang i. Disuru do AnakNa i, hangoluanta i,
hangoluanta i.
♫ Sitompa nasa na adong sigomgom sasude. Ro songon i tu tano on, manaon na
porsuk i, manaon na porsuk i.

12. Epistel
U : Hata ni Debata, turpuk Epistel, di Parpunguanta Borngin on tarsurat di Ulaon Ni
Apostel 13 : 21 – 25, tajaha ma marsingkatsorin! Dung i dipangido nasida ma raja,
jadi dilehon Debata ma tu nasida si Saulus, anak ni si Kis, marga Benjamin, leleng ni
opatpulu taon.
R : Jadi dung dipaijur i, dipabangkit ma di nasida si Daud bahen rajanasida, na
hinatindangkonna i di na nidokna: “Nunga jumpang Ahu si Daud, anak ni si Isai,
halomoanHi, sipasaut nasa na pinangido ni rohangKu!”
U : Sian pinompar ni i ma diparo Debata di halak Israel, Jesus, i ma Sipalua na
pinarbagabagaNa i.
R : Patujolo ni haroroNa dibaritahon si Johannes tu sandok bangso Israel pandidion
mandokkon paubahon roha.
U : Mareak ujung ni langkana didok si Johannes i: ‘Ndada ahu na niarop ni rohamuna; di
pudingku do Ibana ro. Na hurang tama do ahu mananggali sipatuNa.’
I ma sahatna: Martua do angka na tumangihon hata ni Debata jala na umpeopsa.
Amen.

13. Marende BE No. 49 : 1 + 4 “Sai Ro Ma Tu Bara”

♫ Sai ro ma tu bara di Betlehem on, hamu na porsea hatop ma tuson! Marnida
halasan ni rohanta i, tinongos ni Ama na di surgo i.
 ♫ Pasinggang ma totmu hamuna sude, marnida parmahan marsomba muse.
Marende hamu na marlas roha i, maniru suruan na di ginjang i.

14. Refleksi – Pagalak lilin – Manghatindanghon Haporseaon

U : Dimulana i uli dohot denggan situtu do portibi on dohot sude pangisina, alai nuaeng
nunga dihuphupi timus, ndang adong be godang soara ni pidong na marhabong alani
i. Jolma na jotjot manegai angka suansuanan laho pasauthon lomo ni rohaNa.
Hadameon i pe nunga maol be didapot jolma i nuaeng, alani porang, huaso dohot
arta. Partangison alani hapogoson, hageduhon dohot pangarupaon nang
panggosagosaon di dongan, nang nasa ulaon dosa tahe, sudena i alani jolma nunga
dao jala ndang manghahalongi Debata dohot donganna jolma.
R : Ale Tuhan, nunga ro Ho tu Portibi on, sondangi ma rohanami na di bagasan
hagolapon.
U : Alani i Tuhan asi ma rohaM di hami. Patogu ma haporseaonnami asa unang mabiar
jala mandele hami alani parngoluan on. Patupa ma hami gabe panondang
maradophon dongananmi songon hataM na mandok: Tung sura lam marpogos
donganmu, lam surut tahe parbohalon di lambungmu, ingkon tolonganmu do ibana,
nang halak dagang nang halak paisolat ibana, asa mangolu ibana di lambungmu.
R : Ale Tuhan, nunga ro Ho tu Portibi on, sondangi ma rohanami na di bagasan
hagolapon.
U : Huria ni Tuhanta, nunga ro Tuhanta manopot bangsoNa jala mamboan haluaon. Ido
na tahalashon di borngin on. Alai haholomon do jotjot manghuphupi tano on jala
lam tu jorbutna do pangela ni sibolis i mangihoti torop jolma, disegai do tondi,
haporseaon dohot panghirimon sogot. Digunturi na marrumatangga, disegai nang
roha ni ianakhon asa tois tu hata ni Debata. Alani i tama do pahusorhusoronta
dibagasan rohanta be.
R : Marende BE No. 53 : 2 “Di Betlehem Do Tubu”
♫ Tu holong ni rohaNa hubonom rohangkon. Hulehon di Ibana sude na di au on.
Olo, olo, sude na di au on.
U : Lam godang pe angka parungkilon na masa di tongatonga ni ngolu on, ingot ma
Tuhanta do na mandongani hita. Molo lam lumlam angka parrohaon ni jolma di
partingkian on, ingot ma, alani i do umbahen na ro Tuhan Jesus sian banua ginjang
sorang tu portibi on, asa disondangi sandok ngolunta na dibagasan hagolapon. Alani
ndang jadi papeolonmu uhum, ndang jadi ho marnidanida bohi, jala ndang jadi
jaloonmu silua, ai sisip do papitung mata ni halak na pistar jala pabalikbalik
parhataan ni halak na tigor. Antong songon dia pe rumang ni parngoluan na
 niadopanmu nuaeng, di arsak manang las ni roha, sai ungkap ma roham manjangkon
Tuhan i asa sorang Ibana di bagasan ngolum.
R : Mangendehon BE No. 616 : 1 “Ulina i di borngin na badia”
♫ Ulina i diborngin na badia humirdophirdop do bintang disi. Diborngin i do tubu
Sipalua dipanggatan di Betlehem i. Portibi on dangol gok haholomon marnida
sondang ni Tuhanta i. Uli na i marende do suruan diborngin i do tubu Kristus i,
diborngin i do tubu Kristus i.
(tingki marende ro ma Pandita/Parjamita tu langgatan, laho pagalakhon lilin. Laos
diombas on ma ro Parhalado na marhobas mamboan lilinna asa dipagalak
Pandita/parjamita, jala borhat ma angka parhalado mandapothon ruas, diintopi ma
lampu, dipagalak ma lilin ni ruas)
Pdt : Hamu angka dongan sahuria, dihorhon hatutubu ni Jesus i do, ombas na imbaru,
parsaoran na imbaru dohot holong na imbaru. Jangkon ma Sipalua i! Sondang ni lilin
on ma songon simbol na marpadan hita borngin on, na so taulahon be dosa. Tuhanta
do mandok: Ahu do Panondang diportibi on. Na so tupa be mardalan di na holom
nasa na mangihuthon Ahu. Jongjong ma hita mangendehon:
Marende BE. No. 54 : 1 – 3 “Sonang Ni Borngin Na i”
♫ Sonang ni borngin na i, uju ro Jesus i. Sonang modom do halak sude, holan
dua na dungo dope; mangingani Anakna, Jesus Tuhanta i.
♫ Denggan ni bornginna i, uju ro Jesus i. Tu parmahan di Betlehem i, dipaboa
na di surgo i; nunga ro Sipangolu, Jesus Tuhanta i.
♫ Godang ni tua disi, di na ro Jesus i. Tung malua pardosa muse, sian
hamagoanna sude; ala ro Sipangolu, Jesus Tuhanta i .
Pdt : Hamuna angka dongan, las ma roham nunga saor be Tuhanta Jesus Sipalua i tu
portibi on, jangkon ma Ibana sian ungkap ni roham jala hatindanghon ma Ibana di
ngolum.
R : Haluaon do diboan Tuhan Jesus marhite hatutubuNa, alani hami pe naeng ma
hobas manghatindangkon Tuhan Jesus marhite ngolunami.
U : Antong, tahatindanghon ma haporseaonta i songon na hinatindanghon ni donganta
sahaporseaon di sandok portibi on. Rap ma hita mandok.
U/R : Ahu porsea di Debata Jahowa ….. du....

15. Duet Vocal : “Ajal ni Portibi on” -Inang Rafael & Inang Ferdinand-
16. Koor Punguan Ina
17. Vocal Grup : “Hagabeon, Hasangapon, Hamoraon” -Grup Solidaritas PBB-
18. Sunggulsunggul
19. Vocal Grup : “Kau Rangkai Air Mataku” -Inang Gilbert br. Panjaitan, dkk-
20. Marende BE No. 52 : 1... “Hatuaon do” (Papungu Pelean Ia + Ib)
♫ Hatuaon do, las ni roha do, hatutubu ni Jesus i. Mago do jolma, ro ma Tuhanta, las be,
las be ma rohanta i. Mago do jolma, ro ma Tuhanta, las be, las be ma rohanta i.
♫ Hatuaon do las ni roha do, Hatutubu ni Jesus i. Domu do hita tu Debatanta, las be, las
be ma rohanta i. Domu do hita tu Debatanta, las be, las be ma rohanta i.
♫ Hatuon do las ni roha do hatutubu ni Jesus i. Las ma rohanta, mida Tuhanta, las be, las
be ma rohanta i. Las ma rohanta, mida Tuhanta, las be, las be ma rohanta i.

21. Jamita: Mika 5 : 1 – 4

22. Marende BE. No. 615 : 1… “Tarbege Surusuruan Marende”
(Papungu Pelean tujolo IIa+IIb tu STT/ Singkola Pandita HKBP)
♫ Tarbege surusuruan, marende mansai uli. Angka dolok dohot rura, gok do saringar
na i. Sangap ma, sangap ma di Tuhan. Sangap ma, sangap ma di Tuhan.
♫ Las roham ale parmahan, nunga tubu Kristus i. Rap marende ma hamuna,
pasangaphon Raja i. Sangap ma …du...
♫ Borhat ma hamu marnida, tu huta Betlehem i. Somba Kristus Sipalua, na imbaru
tubu i. Sangap ma …du...
♫ Ida ma di panggagatan, Sipalua na ro i. Sigomgomi parluhutan, langit dohot tano i.
Sangap ma …du...

23. Pangujungi
U : Hamu angka haholongan! Tanda naung tubu Jesus i, endehon ma Jahowa ai Ibana do
pardenggan basa na paluohon jala paulihon.
R : Tajanghon ma Sipalua i di ngolunta, asa ro Ibana pasabam rohanta jala pamalum
mangalilit bugang ni rohanta asa dohot hita manghatindanghon Debata do tama
pujipujion.
U : Endehon ma Jahowa ai Ibana do panompa na marmuduhon na tinompa na i.
R : Diatur Debata, langit, tano, laut nang angka hajanghajang dohot sude angka na di
bagasanna mansai uli. Saluhutna i ditanda Debata. Ibana ma tama sipujipujion.
U : Endehon ma Jahowa di bagasan haserepon dohot olopolop.
R : Las ma rohanta, margogo jala monang ma hita, manang aha pe na masa ai nunga
ro Sipalua manopot hita pardosa na dangol on, asa sumuang parsaoranta dohot
Debata panompa na burju i.
U : Tangiang Pelean – Ale Amanami – Pasupasu