PARTORDING NI PARMINGGUON

MINGGU XXI DUNG TRINITATIS

DOHOT
ACARA MANJALO TOHONAN SINTUA
POS PARMINGGUON HKBP KEDAUNG

 Ev: 2 Tessalonik 2 : 13 – 17  Ep: Psalmen 145 : 17 – 21

TOPIK:
MARSIHOHOT DI BAGASAN PODA NI JESUS KRISTUS

MINGGU, 06 NOPEMBER 2022

1
1. Marende BE. HKBP No. 392 : 1 – 3 “SAI PASIAT TUHAN JESUS” BL. 261
♫ Sai pasiat Tuhan Jesus tu bagasan rohami. Sai maimaima Jesus, bege
panuktukNa i. Sai pasiat Tuhan Jesus, jangkon i tu rohami. Nunga tingki
parasian, sotung jolo salpu i.
♫ Hariburon na di tano, sai ringgas di jangkon ho. Marisuang Tuhan Jesus sai
dihagarishon ho. Sai pasiat Tuhan Jesus……………….
---Musik---
♫ (Jongjong) Ai sadia leleng nari laos so putus rohami. Unang toishon, so tung
salpu tingki parasian i. Sai pasiat Tuhan Jesus……………..

2. Votum –Introitus: (U: Uluan ; H : Huria)

U : Marhitehite Goar ni Debata Ama dohot Goar ni AnakNa Tuhan Jesus Kristus
dohot Goar ni Tondi Parbadia na tumompa langit dohot tano on. Amen!
Parangehon hamu ma na tama di Tuhan i, marguru tu sandok lomo ni
rohaNa, marparbuehon parbue marhitehite saluhut ulaon na denggan. Oloi
hamu ma Jahowa marhitehite las ni roha, ro be ma hamu tu joloNa
marhitehite olopolop. Haleluya!

U&H : Mangendehon: BE.HKBP No. 852: 1 “HALELUYA (3x) HKBP”

♫ Haleluya, Haleluya, Haleluya.

U : Martangiang ma hita! Ale Tuhan Debata, Amanami na di banua ginjang! Sai

lehon ma tu hami roha na togu, na badia, pingkiran na denggan dohot roha
na ringgas pasauthon ulaon na denggan. Sai lehon dame tu hami asa sonang
hami mangolu di bagasan pangondingiM, sai marsigantung tu HataM ma
hami maradophon saluhut musunami. Sai ramoti jala pargogoi ma hami
marhitehite Tuhan Jesus Kristus Tuhannami. Amen.
(Hundul)

3. Marende BE. HKBP No. 701 : 1, 3 “TU HO DO AU MARPADAN” BL. 701

♫ Tu Ho do au marpadan, o Jesus Tuhanhi, asa burju haposan au di adopanMi.
Sai Ho ma mandongani au di ulaonhi, ajari pargogoi ma au di dalanki.
♫ PadanMu ale Jesus tu angka ruasMi. Luhut do toguonMu tu hasangaponMi.
Padanhu pe, o Jesus, satia au tu Ho. Sai pargogoi ma au, lao mangihuthon
Ho.

4. Patik :
U : Tatangihon ma Patik ni Debata di Minggu XXI dung Trinitatis, ima na
tarsurat di Patik I – IV. Patik Parjolo :
Ahu do Jahowa Debatam! Ninna Debatanta. Ndang jadi marungkap Ahu
bahenonmu Debatam.
2
 H : Patik Paduahon : Ndang jadi ganaonmu jala ndang jadi sumanonmu
manang aha na di banua ginjang dohot na di banua tonga on, ro di na
di bagasan aek na di toru ni tano, ianggo tung gabe sisombaon
manang sioloan.
U : Patik Patoluhon : Ndang jadi dohonon goar ni Debata, ianggo so ture
dalanna. Ai hona uhumNa do sogot angka na marsineang di goarNa.
H : Patik Paopathon : Ingot hamu ma pabadiahon ari minggu i! Di na
onom ari ma ula hamu nasa siulaonmu, alai anggo ari papituhon i, ari
paradianan ni Jahowa Debatam do i. Ndang jadi ho mangula anggo di
na sadari i manang anakmu pe manang borum, manang naposom
lahilahi, manang naposom boruboru, ro di pinahanmu ro di pangisi ni
huta ni halak pe na mangebati hutam. Ai di na onom ari do ditompa
Debata langit dohot tano dohot laut dohot nasa isina; dung i maradian
do Ibana di ari papituhon i. Dibahen i do umbahen na dipasupasu
Debata Jahowa ari paradiananNa i jala diparbadiai.
U : Antong rap mangido gogo ma hita sian Tuhan Debata
H+U: Ale Tuhan Debata! Sai pargogoi ma hami mangulahon na
hombar tu PatikMi. Amen.

5. Marende BE. HKBP No. 417: 2- 3 “RADE SITUTU HALUAON“ BL. 278
♫ Patedek sude hahurangan, topoti sandok dosami. Pangido : Sai sesa o Tuhan
sude pangalaosionhi. Datdati sai saut botoonmu naung sesa dosam sasude.
Mardame dagingmu nang tondi maniop tongtong Tuhan i.
(Jongjong)
♫ PanghophopNa i parangehon, pasangap Tuhanmu antong. Ibana buas
mangalehon tu ho hasonangan tongtong. Sandok sian holso malua, nang sian
biarmu sude. Sonang nama ho na martua, manghirim tongtong surgo i.

6. TANGIANG MANOPOTI DOSA:

U : Tatopoti ma dosanta tu Debata, martangiang ma hita! Ale Tuhan Debata,
Pargogo na so hatudosan jala Amanami! Hujou hami do GoarMu na badia i,
ala na targogot hami marningot dosanami.
H : Sai marasi ni roha ma Ho mida hami on: O Tuhan Jesus Kristus, Anak ni
Debata na gabe jolma ala ni hami, na mate jala na hehe sian na mate, na
manaek tu banua ginjang do Ho mangondihon hami!
U : Asi rohaM di hami, sai patongtong ma di hami roha hamauliateon tu Ho. O
Tondi Parbadia, pangapul di na marsak roha, pamalum ma saluhut na bernit,
binahen ni dosanami!
H : Ro ma Ho mangingani hami, asa marlas ni roha hami mangulahon lomo
ni rohaM. Ho do parhitean ni nasa asi ni roha, sai uang tulak hami. Sai

3
 tangihon ma hami, Ho ale Debata, Ama, Anak dohot Tondi Parbadia!
Amen.
U : Bagabaga ni Debata taringot tu hasesaan ni dosanta : Ai ndang adong imbar
ni i; ai saluhut do pardosa jala hurangan maradophon hasangapon ni Debata,
alai angka na gabe pintor, binahen ni basabasa marhite sian asi ni RohaNa,
hinorhon ni panobusion na marhitehite Kristus Jesus i, na pinajongjong ni
Debata bahen habangsa parasian marhitehite haporseaon di mudarNa.
Hasangapon ma di Debata na di ginjang!
H : Amen.
( Hundul )

7. Marende BE. HKBP No. 755: 1, 3 “HAPOSAN HO TUHAN” BL. 755

♫ Haposan Ho Tuhan, hot do holongMu di las ni roha, tingki arsak pe. Asi ni
rohaMi nang pambaenanMu, Ho Sipalua pangondingan pe. Haposan Ho
Tuhan, haposan Ho Tuhan, ndang na mansohot asi ni rohaM. Nasa na ringkot
di au di parade, tung ala ni asiM do i sude.
♫ Dirade Ho do dame na manongtong, ditogu Ho do au di dalanhi. Marlas ni
roha au marpanghirimon jala margogo ala basaMi. Haposan Ho Tuhan,
haposan Ho Tuhan, ndang na mansohot asi ni rohaM. Nasa na ringkot di au di
parade, tung ala ni asiM do i sude.

8. Epistel:
U : Hata ni Debata Epistel di minggunta sadari on tarsurat di Psalm.145 :
17 – 21, tajaha ma marsoringsoring!  Na bonar do Jahowa di saluhut
angka dalanNa jala basa di bagasan saluhut jadijadianNa i.
H : Donok do Jahowa di sude angka na manjou Ibana, tongon tahe di sude
angka na manjou Ibana di bagasan hasintongan.
U : Ibana mambahen lomo ni roha ni angka na manghabiari Ibana, jala dibege
do angguknasida i, jala dipalua do nasida.
H : Jahowa do pangondingan ni sude angka na manghaholongi Ibana, jala
disiaphon do sude angka parjahat.
U : Ingkon baritahonon ni pamanganku do pujipujian di Jahowa, jala nasa
sibuk mamuji goarNa na badia i ro di salelenglelengna.
I do sahatna. Martua do angka na tumangihon hata ni Debata jala na
umpeopsa.
H: Amen.

09. Marende BE. HKBP No. 403 : 1 – 2 “POS ROHANGKU DI TUHANHU”

BL. 402
♫ Pos rohangku di Tuhanhu, ndang tarbaen tarhirim au. On do tongtong
tangianghu, tu lambungMu au patau. Lobi pos do rohangki, sai patulusonNa i,
4
 boanonNa au tusi.
♫ Huhilala ganup ari paniopNa di au on. Sai tong dipasarisari, naeng badia
rohangkon. Naeng lam tu tinggilna i pinggol partondionhi lao mambaen
lomoNa i.

10. Manghatindanghon Haporseaon:

U : Tahatindanghon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok!
H: Ahu porsea di Debata Jahowa……
(Hundul)
11. Koor : Ina Kamis
12. Tingting
13. Koor : Paduan Suara Musik Keroncong
14. Marende BE. HKBP No. 697 : 1 - - - “MOLO HO DO HU IHUTHON“
BL. 697 (Papungu Pelean Ia,Ib)
♫ Molo Ho do huihuthon dame sonang rohangki, sai horas jala martua nasa na
hinophopMi. Ho tongtong ihuthonongku Jesus na palua au. Ho sambing do
oloanhu ala nii martua au.
♫ Na rade do au manaon mangasahon padanMi. Molo ho na margogoihon talu
haholomon i. Ho tongtong ihuthonongku, Jesus na palua au. Ho sambing do
oloanhu ala nii martua au.
----Musik-----
♫ Hupelehon ma diringku mangihuthon lomoMi. Ndada be na olo salpu na
manggohi rohangki. Ho tongtong ihuthonongku Jesus na palua au. Ho sambing
do oloanhu ala nii martua au.

♫ Marparange na badia ma au diadopanMi. Sai patau ma au tiruan songon

pinangidoMi. Ho tongtong ihuthonongku Jesus na palua au. Ho sambing do
oloanhu ala nii martua au.

15. JAMITA: 2 Tessalonik 2 : 13 - 17

16. Marende BE. HKBP No. 435 : 1 - - - “MAROLOPOLOP TONDINGKI” BL. 294
(Pelean Namarboho tu Dana Pensiun HKBP ).
♫ Marolopolop tondingki ai naung di tobus Jesus i. Hamu sude bege ma i, sai las
ro hangku mandok i. Sonang ni tingki i, dung jumpang Jesus Tuhanki !
TondiNa mangajari au. Tarbaen marlas ni ro ha au! Sonang ni tingki i, dung
jumpang Jesus Tuhanki.
♫ Dihaol holongna rohangki, tung na so boi be mago i. MataNa do manatap au,
pinggolNa tumangihon au. Sonang ni tingki i,………….

5
 ---Musik---
♫ Tu Jesus sahat ngolungki saleleng ni lelengna i. Rap dohot au endehon ma
endengku na imbaru da. Sonang ni tingki i,…………..
♫ O rohangki sai tahan ma, sitobus Ho ihuthon ma. I ma tutu, nang mate ho, tu
surgo do ditogu ho. Sonang ni tingki i,………………
----Musik----

17. Acara Pasahathon Tohonan Sintua

a. Marende BE No. 156 : 1+4 “Jesus Parmahan”
 Jesus Parmahan i, Sinuru ni Debata. Manogu jolma i, Marhite sian
hata. Na sintong na ture, Tu hangoluan i. Dipuji sasude, Huria GoarMi.
(jongjong)
 Sai tatap ma dison, O Jesus siseanMu, Na jongjong di joloM, Mangido
lehononMu. Tu ganup TondiMi, Nang huasoNa pe, Manogu bangsoMi,
Nang mangajari pe
b. Pandita:
Hamu ale angka dongan na sa Huria on. Diida hamu do nuaeng donganta na
jongjong dison, na tapillit bahen Sintua di tongatonganta. Naeng
pangidoannasida ma pasupasu sian Tuhanta i, asa margogo nasida
mangulahon ulaonnasida. Antong tabege ma jolo pangarimpunan ni ulaon ni
Sintua:
1) Pangula ni Huria do nasida mamatamatahon dongan angka na
pinasahat tu nasida dohot mangaramoti parangenasida. Molo
diboto nasida, na hurang ture parange ni manang ise, ingkon
pinsangonnasida i, manang paboaonasida tu Guru dohot tu Pandita,
asa dipature.
2) Mandasdas donganta tu parmingguan dohot manangkasi alana
umbahen na so ro
3) Mandasdas anakboru singkola, asa ondop ro
4) Maningkir angka na marsahit jala paturehon na ringkot tu nasida
dohot nasa na tarpatupasa, alai na rumingkot, pasingothon Hata ni
Debata tu nasida dohot tumangianghonsa
5) Mangapuli angka na marsak, paturehon angka na dangol dohot na
pogos
6) Mangapuli angka sipelebegu, angka parugamo na asing dohot angka
na lilu, asa dohot marsaulihon hangoluan na pinatupa ni Tuhan
Jesus
7) Mangurupi angka na paturehon angka guguan dohot ulaon na
ringkot tu Harajaon ni Debata.
6
c. Marende BE. No. 718:1 “ Hubege Jesus Manjou”
Hubege Jesus Manjou, hubege Jesus Manjou;
Sipalua au manjou: Porsan Silang ihuthon ma Au.
Sai ihuthononku Jesus, Sai ihuthononku Jesus, Sai ihuthononku Jesus,
Huihuthon Jesus Tuhanki.
d. Pandita:
On pe hamu na hinaholongan, naeng tangkas botoonnami burju ni rohamuna
mangaradoti ulaon hasintuaon i. Dibaheni alusi hamu ma na husungkunhon
on tu hamu:
(1) Na olo do hamu mamarangehon parange na tama di jolo ni Debata
dohot di jolo ni jolma?
(2) Na olo do hamu manjalo ulaon hasintuaon songon na hupajojor
ondeng tu hamu?
(3) Na olo do hamu mangaradoti sude sian nasa roha dohot sian nasa
gogomuna hombar tu Hata ni Debata?
Molo sada rohamuna mangoloi jala marpadanhon sudena i di jolo ni
Debata dohot di jolo ni donganta on, dok hamu ma alusmuna:
e. Na Manjalo Tohonan:
OLO, SAI DIPARGOGOI TUHAN I MA AHU MANGULAHON SALUHUTNA I
f. Manjalo Tohonan Ha-Sintua-on:
(Jongjong ma Sude Na Manjalo Tohonan di Jolo) (Sebelum Dipasahat
Tohonan, Jumolo Di jaha Parhaldo Sintua na Martohonan Ayat)
(St. Jhonson Simanjuntak : 1 Joh 3:18; St. Maralo Aruan: 1 Pet 2:16;
St. Alfonso Lumbantobing: 2 Tim 3:16; St. Berliana Rumapea : Mat 11:29;
St. Marsintong Hasugian: 2 Pet 1:5; St. Jontor D. Hasugian: 1 Pet 3:12;
St. Dohar Simanjuntak: 2 Tim 1:7; St. Victor D.T Sinaga: Kol 3:17)

(Ro ma tu jolo marsasahalak rap dohot keluarga)

Pandita: Antong Marsijalangan ma hita : Manjaha Surat Penahbisan
Sintua. (Jalo hamu ma pasupasu na sian Tuhanta):
“SAI DIPARROHA I TUHAN DEBATA, AMA NI TUHANTA JESUS KRISTUS
MA HAMU, MARHITEHITE TONDI PARBADIA MANGHABURJUHON
SIULAONMUNA,NA PINASAHAT TU HAMU SADARION, ASA MARSANGAP
DEBATA DI TONGATONGA HURIANA I, AMEN.”
(mulak tu hundulanna)
g. Marende BE. No. 666: 1 :Ingkon do Boanonta Barita”
Ingkon do Boanonta Barita, tu inganan na holom i.
Ima holong nang Hasintongan, Dame na manontong i, Dame Na manontong i
Ai na binsar do hatiuron, nunga salpu na holom i,
Huaso ni Kristus hot Tongtong salelenglelengna i.

7
 h. Tangiang Panjangkonon: (na manjalo Tohonan Jongjong di Tempat)
Pandita:
Hamu angka dongan na di Huria on, jangkon hamu ma nasida di
bagasan dame. Sude ma hita on manggogo tumangianghon nasida, asa
manjadi ulaonnasida i, huhut mangkorhon hasangapon ni Tuhanta:
Ale Tuhan Debata Amanami na di banua ginjang. Mauliate ma
rohanami tu Ho ala ni asi ni rohaM di angka dongannami on. Sai tambai
ma tu rohanasida angka silehonlehon ni Tondi Parbadia, asa lam
marroha jala margogo nasida mangaradoti tohonan na sahat tu nasida.
Asi ma rohaM dohot di sude ruas ni HuriaM on, asa lam hot
haporseaonnasida be, jala lam ture parangenasida mangihuthon Ho.
Sungguli ma rohanami asa masihaholongan, unang adong sipinsangon
di hami asa lam rarat HarajaonMu, jala marmulia GoarMu na badia i.
Amen.
i. Mandok Hata:
- Mewakili Ruas ni Huria (Alisati Siregar)
- Mewakili Parhalado (St. Marsintong Hasugian)
- Mewakili Na Manjalo Tohonan (St. Heru Harianja)
j. Marende BE No. 730 : 1 “Sai Patau Ma Au Tuhan”
(jongjong)
Sai patau ma diringhu ale Tuhan, Papatarhon hinauliMi Tuhan. Suru ma
TondiMi, Saor tu rohangki, Lao papatar holongMu tu donganhi.

18. TANGIANG PELEAN DOHOT PASUPASU:

SAHAT ULA TOHONANMI!

TUHANTA JESUS NA MANDONGANI
JALA MANGARAMOTI HITA SALUHUTNA