PARTORDING NI PARMINGGUON

MINGGU DUNG NATAL

 Ev: Jeremia 31 : 7 - 9  Ep: Epesus 1 : 3 - 6

TOPIK:
“JAHOWA DO PARTOGI JALA MUAL NI OLOPOLOP”

HURIA KRISTEN BATAK PROTESTAN (HKBP)

MINGGU, 31 DESEMBER 2023
1. Marende BE. HKBP No. 9 : 1 – 3 “HUPUJI HOLONG NI ROHAMU ”
BL. 110

 Hupuji holong ni rohaMu, o Tuhan Jesus, Rajangki.

Tu Ho hulehon ma tondingku, ai i do pinangidoMi.
Huhalupahon ma diringku, mamingkir holong ni rohaMu.
 Sai dilului Ho do ahu, au pe huhalungunhon Ho;
Ditaiti rohaMi rohangku, dibahen i hulehon do.
Dipillit Ho hian tondingku, i pe hutodo Ho, Tuhanku.

-----Musik/Jongjong----

 Huhilala, ingkon mar-Tuhan, ingkon mangolu au di Ho ;

Ndang jumpang au be hangoluan aut unang dipatupa Ho.
Sai Ho do paradiananku, sai gok di Ho nama langkangku.
2. VOTUM - INTROITUS - TANGIANG:
U : Marhitehite Goar ni Debata Ama, dohot Goar ni AnakNa Tuhan Jesus Kristus,
dohot Goar ni Tondi Parbadia na tumompa langit dohot tano on. Amen.
Bangso na mardalani di bagasan haholomon marnida sada panondang na bolon.
Binsar do sada panondang di angka na mangingani tano na nilinggoman ni
hamatean. Marrongoman bangsoM ro sian lomona di ari parporanganMu;
marpahean habadiaon, songon nambur sian ampuan ni andos torang ro do tu Ho
paranganMu angka na umposo. Haleluya!
H : (Mangendehon): BE. HKBP No. 852 : 1 “HALELUYA HKBP (3X)”
BL.852
♫♪♫
Haleluya… Haleluya… Haleluya.
U : Martangiang ma hita! Ale Amanami, Ama ni Jesus Kristus Tuhannami, na
tubu di huta Betlehem! Sai pinuji ma GoarMu na badia i, ala naung ditingkir Ho
hami bangsoM. Ditogutogu Ho do hami sian haholomon tu hatiuron jala
dipadomu Ho do hami, na holang hian sian Ho, gabe saor muse dohot Ho. Gok
halalas ni roha do hami ala ni i. Sai jalo ma hamauliateon ni rohanami, naung
tinopotMu hami marhitehite AnakMi. Amen. ( Hundul )
3. Marende BE. HKBP No. 714 : 1 – 2 “TUHAN NA MARMAHAN HAMI” BL.
714
 Tuhan na marmahan hami togu hami ruasMon,
Lehon dameMi di hami angka na hinophopMon.
Tuhan Jesus Sipalua, parmahani ruasMon,
Tuhan Jesus, Siparmahan, parmahani ruasMon.
  Tuhan Parmahan haposan dongan na sumurung i,
Sai padao pangunjunan togu ma na lilu i,
Tuhan Jesus Sipalua pasupasu ruasMi,
Tuhan Jesus Siparmahan pasupasu ruasMi.

4. PATIK:
U : Tangihon hamu (Tatangihon) ma Patik ni Debata di Minggu sadari on tarsurat
di Patik I – X.
Patik I:
Ahu do Jahowa DebataM, ninna Debatanta. Ndang jadi marangkup Ahu
bahenonmu Debatam.
Patik II:
Ndang jadi ganaonmu jala ndang jadi sumanonmu manang aha na di
banuaginjang dohot na di banua tonga on, ro di na di bagasan aek na di toru ni
tano, ianggo tung gabe sisombaon manang sioloan.
Patik III:
Ndang jadi dohonon Goar ni Debata, ianggo so ture dalanna. Ai hona uhumNa
do sogot angka na marsineang di GoarNa.
Patik IV:
Ingot hamu ma pabadiahon ari minggu i! Di na onom ari ma ula hamu nasa
siulaonmu, alai anggo ari papituhon i, ari paradianan ni Jahowa Debatam do i.
Ndang jadi ho mangula anggo di sadari i, manang anakmu pe manang borum,
manang naposom lahilahi, manang naposom boruboru, ro di pinahanmu ro di isi
ni huta ni halak pe na mangebati hutam. Ai di na onom ari do ditompa Debata
langit dohot tano dohot laut dohot nasa isina; dung i maradian do Ibana di ari
papituhon i. Dibahen i do umbahen na dipasupasu Debata Jahowa ari
paradiananNa i jala diparbadiai.
Patik V:
Ingkon pasangaphonmu do natorasmu, asa martua ho, jala leleng mangolu di
tano na nilehon ni Jahowa Debatam di ho.
Patik VI: Unang ho mamunu!
Patik VII: Unang ho mangalangkup!
Patik VIII: Unang ho manangko!
Patik IX:
Unang ho olo manghatindanghon hata na so tutu maralohon dongan jolma.
Patik X:
Ndang jadi haliangan ni roham bagas ni donganmu, ndang jadi haliangan ni
roham dongan saripe ni donganmu, manang naposona baoa manang naposona
boruboru, manang lombuna manang hodana, manang dia pe ugasan ni
donganmu.
U : Beha do pandok ni Debata taringot tu Patik nasampulu i?
On do: Ahu do jahowa Debatam, ninna Debatanta. Pargogo na so hatudosan jala
 Parrimas, Siluluhon dosa ni amaama tu pinomparna ro di sundut patoluhon, ro
di sundut paopathon, pinompar ni angka na sogo roha di Ahu, alai asi do
rohangKu di angka na marriburibu angka na marholong ni roha di Ahu, na so
mangalaosi PatikHi.
I do sahatna. Antong, rap mangido gogo ma hita sian Tuhan Debata!
U+H : Ale Tuhan Debata sai pargogoi ma hami mangulahon na hombar tu
PatikMi. Amen.
5.Marende BE. HKBP No. 174 : 3 – 4 “TOROP DOPE NASIAT I”
BL. 184
 Pardosa ho didok roham, na so tama be dohot?
Ndang pola ala ni dosam, umbaen na sundat bongot.
Ai nunga sae do dosami, digarar Tuhan Jesus i
Naung sae, naung sae, naung sae do dosami.
 Haporseai ma hata i ai i do haluaon
Haposi Tuhan Jesus i mudarNa i ma golom
Ai nang gok dosa rohami malua ho bahenon ni i
Tutu, tutu Malua baenon ni i.
6. MANOPOTI DOSA:
U : Tatopoti ma dosanta martangiang ma hita! Ale Tuhan Debata, Pargogo na so
hatudosan jala Ama Parasiroha! Ndang lomo rohaM mida hamatean ni pardosa;
mulak ma nian parjahat i tumadingkon dalanna, asa mangolu ibana, i do
dipangido rohaM. Ala ni i umabahen hupangido hami; sai sundati ma torutoruM
asa unang mangonai be tu hami. Sai sesa sude dosanami, asa mangolu hami di
bagasan asini rohaM. Sai pargogoi ma hami, asa margogo hami, marhitehite
Tuhan Jesus Kristus, Tuhannami. Amen.

Bagabaga ni Debata taringot tu hasesaan ni dosa! Songon on do Hata ni

Tuhan Jahowa: Nunga pola hupasisi angka pangalaosim songon ombun, jala
songon ombun manorop angka dosam. Sai mulak ma ho tu Ahu, ai Ahu do
Sipalua ho. Hasangapon ma di Debata na di ginjang!
U+H : Amen. (Hundul)

7. Marende BE. HKBP No. 183 : 3 “NA JUMPANG AU” BL. 105
 On pe holan asi ni roha sipangasahononhon i
Sipujionku do Jahowa dung ro na pamanathon i
Unduk huhut las rohangki mamuji asi roha i, mamuji asi roha i.
8. E P I S T E L:
U : Tangihon hamu (Tatangihon) ma Hata ni Debata turpuk Epistel di ari Minggu
on, tarsurat di Epesus 1 : 3 - 6 “Pinuji ma Debata, Ama ni Tuhannta Jesus
 Kristus, naung umpasupsuhon tu hita ragam ni pasupasu partondion sian banua
ginjang, di bagasan Kristus.
H : Ai dipillit do hita di bagsan Ibana, andorang so ojak dope tano on, asa
badia hita jala so hasurahan di adopanNa i, dibagasan holong ni roha.
U : Ditodo hian do hita bahen anakNa, marhitehite Jesus Kristus, asa tu Ibana,
manghihuthon halomoan ni rohaNa,
H : Asa tarpuji asi ni rohaNa na marmulia i, na niasihonNa tu hita di bagasan
na HinaholonganNa i.
U : I do sahatna. Martua do angka na tumangihon Hata ni Debata jala na
umpeopsa.
U+ H: Amen.

9. Marende BE. HKBP No. 190 : 1 + 3 “LAS ROHANGKU SITUTU” BL.

69
 Las rohangku situtu mida Jesus na lulu
Manjalahi hajolmaon ai Ibana paluahon
Jolma manisia i sian hamagoan i
-----Jongjong-----
 Las rohangku situtu ai parjambar au tutu
Di na denggan sasudena pinarbaga ni Debata
Di sude na burju i mangihuthon Jesus i
10. MANGHATINDANGHON HAPORSEAON:
U : Tahatindanghon ma haporseaonta i, songon na hinatindanghon ni donganta
sahaporseaon di sandok portibi on. Rap ma hita mandok!
H : Ahu porsea di Debata Jahowa... d.u (Hundul)
11. TINGTING:
12. Papungu Pelean Huhut Marende BE. HKBP No. 712 : 1… “TOGU AU ALE
JAHOWA ” BL. 712 (Pelean Ia & Ib)
 Togu au ale Jahowa di dalan na rodop on.
Ho do na tongtong satia togu au na gale on.
Sagu-sagu hangoluan sai pabosur tondingkon,
Sai pabosur tondingkon.
 Ro ma ho aek hangoluan na pahisar tondingki
Sai dijolo ma ho Tuhan dohot tiang apiMi
Sipartogi na gumogo ho ma lombu-lombungki
Ho ma lombu-lombungki.
------Musik-----
  Ditopi ni aek Jordan ndang mabiar huriaM
Ale Jesus Siparmonang boan au tu Kanaan
Pujionku ma goarMu salelenglelengna i,
Salelenglelengna i.
13. J A M I T A: Jeremia 31 : 7 - 9

14. Papungu Pelean Huhut Marende BE. HKBP No. 707 : 1--- “HAGOGOON
DOHOT APUL APUL” BL. 707 (Pelean II)

 Hagogoon dohot apul-apul do dilehon Tuhan i tu au,

Ganup ari au ditogu-togu ganup tingki diondingi au.
Ai hombar tu lomo ni rohaNa do dilehon Tuhan i tu au
Ro marsorin arsak las ni roha haporseaonhu dipatau.

 Ganup tingki Tuhan raphon ahu jala sai dipasu-pasu au.

Sai di togu au molo madabu, talu musu jala monang au.
Ai pargogo nasohatudosan, Debatangku salelengna i
Mangalehon dame dohot tua, tu angka nabojok roha i.
-----Musik----
 Songon Ama do tu anakkonNa holong ni Tuhanta i tu au.
Ndang mansadi pangurupionNa hombar tu padanNa na tu au.
Debata Amanta na di ginjang i do haposanhu sai tongtong.
Dipangiringiring ni tanganNa, dame, sonang do rohangkinon.
15. Tangiang Pelean (Jongjong ma hita )
U : Tatangianghon ma peleanta. Ale Debata, Amanami na di banua ginjang! Ho do
haroroan ni saluhut silehonlehon na denggan dohot nasa ulibasa na mauliutus.
Hupasahat hami ma sian na nilehonMi tu hami, peleannami tu Ho. Sai jalo ma i
gabe uap na hushus di joloM. Pasupasu ma i jala ramoti asa huparhaseang hami
pelean on, patimbulhon HarajaonMu di tongatonga ni HuriaM dohot di portibi
on. Buhai ma rohanami marhitehite TondiM, asa lam hutanda hami godang ni
silehonlehonMi tu hami, asa lam girgir hami mandok mauliate tu Ho,
marhitehite Jesus Kristus Tuhannami. Amen.
H : (Mangendehon) BE. HKBP No. 204 : 2 “NDANG TADINGHONONHU
HO” BL. 73
♫♪♫
Nasa na nilehonMi, tondi ro di pamatanghu
Hosa dohot gogonghi, ro di saluhut artangku
Hupasahat i tu Ho, na so unsatonhu do.
U : Ale Amanami na di banua ginjang! Sai pinarbadia ma GoarMu! Sai ro ma
HarajaonMu! Sai saut ma lomo ni RohaM di banua tonga on songon na di banua
ginjang! Lehon ma tu hami sadari on hangoluan siapari! Sesa ma dosanami
 songon panesanami di dosa ni dongan na mardosa tu hami! Unang hami togihon
tu pangunjunan! Palua ma hami sian pangago!
H : (Mangendehon): BE. HKBP No. 841 : 1 “AI HO DO NAMPUNA
HARAJAON” BL. 841
♫♪♫
Ai Ho do nampuna harajaon, dohot hagogoon
Ro di hasangapon, saleleng ni lelengna, Amen
U : Tangiang Pasupasu.
Dipasupasu jala diramoti Tuhan Debata ma ho (hita)! Disondanghon Tuhan
Debata ma bohiNa tu ho (hita) Jala asi ma rohaNa mida ho (hita)!
Didompakhon Tuhan Debata ma bohiNa tu ho (hita) jala dipasaorhon ma
dameNa tu tondim (tondinta be)! Amen.
H : (Mangendehon ) BE. No. 845 : 1 “AMEN (3x) HKBP” BL. 845
♫♪♫
Amen, Amen, Amen.