TOPIK :
NDANG MARPANSOHOTAN ASI NI ROHA NI TUHAN I
04. PATIK:
U : Tatangihon ma Patik ni Debata, i ma Patik Paopathon dohot lapatanna,
Patik Paopathon: Ingot hamu ma pabadiahon ari minggu i! Di na
onom ari ma ula hamu nasa siulaonmu, alai anggo ari papituhon i, ari
paradianan ni Jahowa Debatam do i. Ndang jadi ho mangula anggo di
na sadari i, manang anakmu pe manang borum, manang naposom
lahilahi manang naposom boruboru, ro di pinahanmu, ro di pangisi ni
huta ni halak pe na mangebati hutam. Ai di na onom ari do ditompa
Debata langit dohot tano dohot laut dohot nasa isina; dung i maradian
do Ibana di ari papituhon i. Dibahen i do umbahen na dipasupasu
Debata Jahowa ari paradianan i jala diparbadiai. Dia do lapatan ni i?
H : On do: Ingkon dihabiari rohanta Debata jala ingkon holong
rohanta di Ibana, asa unang tois rohanta di ajar na sian Hata ni
Debata, ingkon badia do Hata ni Debata di rohanta jala ingkon
ringgas rohanta tumangihon dohot mangguruhon.
U : Ima sahatna. Antong rap mangido gogo ma hita sian Tuhan Debata!
U&H : Ale Tuhan Debata! Sai pargogoi ma hami mangulahon na
hombar tu PatikMi. Amen.
3
HataMi ale Tuhanhu, arta na ummarga i. Sai paian di rohangku, unang
so hutiop i. Molo so be sitiopan hata na badia i; aha nama haojahan ni
haporseaon i?
.
08. E P I S T E L :
U : Tatangihon ma hata ni Debata turpuk Epistel di Minggu XVI Dung
Trinitatis, ima na tarsurat di 2 TIMOTEUS 1 : 1 – 14. Ahu surat
tinongos ni si Paulus, apostel ni Kristus Jesus, marhite sian tahi ni
Debata, marguru tu bagabaga hangoluan, na di bagasan Kristus Jesus,
H : mandapothon si Timoteus, anakkonhu na hinaholongan: Asi ni
roha, talup ni roha, dame sian Debata Ama dohot sian Kristus
Jesus, Tuhanta i!
U : Mauliate rohangku di Debata, na huoloi di bagasan roha na ias, sian
angka daompung dope; ai so marpansohotan hupaingotingot ho di
angka tangianghu, borngin nang arian.
H : Ai masihol do ahu marnida ho, marningot iluilumi, anggiat gok
halalas ni rohangku.
U : Ai huingot do haporseaonmu na so marlaok i, na maringanan hian di
bagasan ompungmu boru, si Lois, nang di bagasan inangmu, si
Oinike; alai dohot do di bagasan ho, dihaporseai rohangku.
H : Ala ni i hupaingot ho, asa diparatarata ho silehonlehon ni Debata,
na tu ho i, di na huampehon tanganhi tu ho.
U : Ai dilehon Debata do tu hita tondi hagogoon, tondi haholongon, tondi
pangarajaion diri, ndada tondi hatahuton.
H : On pe, unang ho maila, manghatindanghon Tuhanta i, jala unang
hailahon ahu, na tarhurung humophop Ibana; dohot ma ho tahe
manghonghop Barita na Uli, sian hagogoon ni Debata!
U : Ai dipalua jala dijou do hita marhitehite panjouon na badia; ndada
marguru tu ulaonta, tung sian tahiNa dohot sian asi ni roha, na
binasabasahon tu hita di bagasan Kristus Jesus, na sian mula ni
mulana.
4
H : Alai nuaeng dipapatar do, di na tarida Sipalua hita, Kristus Jesus
i. Ibana do pasohothon hamatean, dipaullop hangoluan dohot
hatongtongon marhitehite Barita na Uli i.
U : Tusi do ahu dipabangkit, gabe parjamita dohot apostel dohot
pangajari.
H : Ala ni i do, umbahen na marsitaonon ahu, alai ndang maila ahu
disi; ai hutanda do Ibana na huhaporseai, jala pos do rohangku,
margogo Ibana mangaramoti na pinalumehonNa i tu ahu, ro di
ari sogot i.
U : Ihuthon ma angka poda na tingkos i tiruanmu, songon naung binegem
sian ahu, di bagasan haporseaon dohot holong ni roha na di Kristus
Jesus i.
H : Na pinalumehon na denggan ima ramoti marhitehite Tondi
Parbadia, na maringanan di bagasan hita.
U : Ido sahatna. Martua do angka na tumangihon Hata ni Debata jala
na umpeopsa.
H : Amen.
11. TINGTING
12. Marende BE HKBP No. 194 : 1 … “AUT SO ASI ROHAM” BL 62
(Pelean Ia, Ib)
Aut so asi rohaM, aut so godang basaM, tu dia au?
Alai dibaen basaM, dohot asi rohaM, tu surgo au.
Mauliate ma, di Ho o Debata, ala basaM.
Sibahen dalan i, marhite AnakMi, tu banuaM
….Musik….
Anggiat ma holong, rohangku sai tongtong, burju tu Ho.
Sai dongananMu au, manang tu dia lao, sonang tutu.
Disuru AnakMi tu au TondiNa i na sian Ho.
Manogu tondingki tu hasonangan i, pinuji Ho.
U : Tangiang Pasupasu !
7
H : (Mangendehon): BE HKBP No. 845 : 1 “AMEN (3x) HKBP” BL
845 Amen, Amen, Amen.
========